«Шапка пожум» повесть йылiсь (Иньва, 1966)

Печатайтсьö обсужденнё понда.

Мöйму миян издательствоын торья изданнёöн петiс В. Баталовлöн повесть «Шапка-пожум». Темаэс произведеннёас куима — этö челядьöс воспитывайтöм — кыдз главнöй; сыкöт ордчöн сувтöны: оланын ковтöм и öддьöн вреднöй — енлö веритöм да том­мез коласын отношеннёэз, нето мöднёж висьтавны — любитöм. Буржыка удайтчис мыччавны авторлö мöдiк темасö — енлö ве­ритöм да сыкöт йитсьöм быд торсö.

Пöрись Даньчиха, кöда оз ни чайтчы уджавны, и сiйöн, что абу сылöн челядь да некинсянь видзчисьны нянь кусöк, бöбöтлö отирöс, пуктö асьсö тöдiсьöн. Сiя веритö ен­лö да лешöйлö, öктö быдкодь туруннэз, öшлö черöшланнэз. Сiя веритö ачыс и старайтчö ассис верасö внушитны и мöдiккезлö, тшöктö юрбитны грешитöм понда. Но авторыс кужöмöн мыччалö, что абутöмыслöн и некытшöм вын да польза абу. Черöшланöн ворожитöм бöрсянь Даньчиха вись­талiс, что öнi Костикыслö некытчö воштiсь­ны и сiя ашын жö локтас гортö ачыс. Но эз лок Костикыс не ашынас, не мöд лунас, не куимöтас. Эз лок сэтчöдз, кытчöдз сiйö эз адззы Андрей. Черöшланыс, кöда вылö сiдз надейтчисö старухаэз, кольччис вынтöм.

Аслас «удж» йылiсь Даньчиха баитö: «Вексö йöзлö весись отсала — некинлiсь нем ог босьт. Ен эта йылiсь тöдö... А ме тэныт пыр отсала, кöть ойшöрöн лок. Бвагороднöй менам уджö ..» Но эта «бвагороднöй удж» понда вежтiсьöмыс бура тыдалö Дань­чиха кулöм бöрын. «Бур морт, шуа, вöлi.

Пыр йöзлö отсалiс. Быдлö бурö старайтчис керны, а кулiс — кольлавны некинлö вöлi», — баитö Варялöн мамыс аслас жöниклö. «Ме думайта, дак некинлö сiя нем бурсö эз кер. Отирсö только бöбöтлiс да сы вылын и олiс. А кулiс вот и нем дорö, нем понда лоис касьтывны. Сьöрсяняс кольччис пöлiньтчöм, дорöм öшына керку да бöрсяняс лыссэз туй вылас чапкалiсö. Вот и быдöс...» Этö паныт иньыслö баитö Алексей Филиппович. И вермас кö кытшöмкö непроницательнöй лыддьöтiсьлöн одзжык лоны пöрись Даньчиха дынö кытшöмкö веритöм нето жалейтöм, то эна кыввес чышкасö веритöмсö да жалейтöмсö. Алексей Филипповичöн Даньчихалö да сы оланлö сетöм приговорыс и эм развязка эта темалö. Колö висьтавны, что быдöс материалыс эта те­ма сьöртöт бура думайтöм. Быд явленнёыс, действиеыс, диалогыс дзик оланiсь босьтöма, быдöс сiя и только сiдз вермис лоны.

Медодзись цельыс авторлöн — этö сетны картина челядьöс воспитывайтöмын. Кыдз сiя мыччалöма? Видзöтам. «Кыдз тэ сiдз верман баитны? Кагасö гусьöн ме шогья пыртöмат да эшö шуан «не тэнат дело». Ме эд ачым ни не учöтик. Мыйлö тэ метöг сiдз керин?!» — споритö Варя мамыскöт, кöр тöдö Костикöс пыртöм йылiсь, «Чöвтiс пернасö да шупкис порог увтас: — Эн кышавлы кагаыс бердö, мый оз ков». Одз­лань: «Мама, мыйлö тэ сiйö юрбитны велöтан?.. Кытчö колас, дак ме ачым сiйö велöта... Абу некытшöм ен. Немлö сiйö касьтывны». И эшö: «Мыйлö тэ кагасö ведьмаыс ордö вайöтiн?! Ладсис сiйö öштан. Вийны мöдатö?!». Этö Варялöн кыввез мамыс ды­нö. Вот, пожалуй, и быдöс полемика челядьсö воспитывайтöмын.

А может, Варя етша баитö, да уна керö? Варя вайöтiс гортас кагасö, пасьтöтiс сiйö: вурис йöрнöсоккез, керис кагарузуммез, не­бис игрушкаэз, книгаэз да тöдсасис, кыдз быдтыны учöтик челядьсö. А кöр Даньчиха пондiс кадитны Костиксö, мырддис сiйö эта шогья да пышшöтiс старухаэз дынiсь. Вот и быдöс, мый позьö адззыны Варя ладор­сянь кагасö воспитайтöмын. И лыддьыны кö повестись этö темасö главнöйöн, то кыдз бы колiс, сiя абу осьтöм. Ог сорась, шуа кö, что авторыслö öддьöн охота вöлi мыччав­ны эта темаын ассис главнöй геройес буржыкöн да буржыка, мöдiккезся вынажыкöн аслас грамотностьöн, но петö как раз мöд­нёж. Абу эд öтiк случай, кöр бы, мамыскöт споритiкö, Варяыс вермис сiйö, кытшöм-нибудь примерöн мыччалiс, что некытшöм ен абу, убедитiс сiйö этаын. А Варяыслö этö керны колiс, и не только гортас, мамыс пон­да, но и ны понда, кöдна мамыс моз жö юрбитöны еныслö. Эта недостаток, и недостаток öддьöн ыджыт.

Следитны кö повестьын Костикöс воспитайтöм сьöрын, то позьö казявны, что этаын вермалö не Варяыс, а мамыс. Колiс я сiдз авторыслö? Натьтö, эз. А сёжö по­вестьын сiдз петöма. Кин пыртiс Костик­сö? Мамыс. Кин велöтiс юрбитны да ве­ритны енлö? Мамыс. Кин сiйö нуöтö вöрö? Мамыс. Кин кадитö кагасö? Бöра жö ма­мыс. Эта мамыслöн практическöй мераэз Костиксö воспитывайтöмын, а не кыввез, кыдз Варяыслöн. А мый керö Варя паныт мамыс действиеэзлö? Не лыддьыны кö сы­лiсь протестуйтöмсö, кöда не кыдз убежденнё либо наступленнё, а лишь дорйисьöм, то позьö висьтавны, что Варяыс ас ладор­сянь совсем нем оз кер.

Миян литератураын эм öтiк öддьöн ко­лана да бур черта — справедливостьлöн торжествуйтöм. Эта черта, кöдö подтверждайтö оланыс. Повестьын жö нем оз позь адззыны эта вылö вачкисянасö. Развязкаыс эта темалöн — ёрдöм. Сылö авторыс посвятитiс быдса глава, а кöр эта лоис етша, сiя и главаыслö нельки нимсö сiйö сетiс. Сiдз мыччалöм эта повестьын справедливостьыслiсь торжествуйтöм. Традиционнöй методын, кö­да важын ни пырис да крепамис миян литератураын, эта öддьöн грубöй нарушеннё. Эд позьö шуны, что юрбитiссезкöт пессьöмыс — аскоддя революция, кöда кыссьö не öтiк дас год ни. И лыддьыны кö этö пессьöмсö Варяыс пессьöм сьöртi, то колö ду­майтны, что эта уджыс тырмас миянлö эшö не öтiк дас год кежö.

Варяыс гортсис мунiс. Сы туйö, медбы пессьыны, сiя сетiс ассис позициясö, мычча­лiс ассис вынтöмсö, мыччалiс, что сыкöт, мый талун мешайтö миянлö овны, пессьыны сiя оз чайтчы. Эстöн жö и пырö юрö вопрос: а мыйлö сiя сэк дас годсö велöтчис советскöй школаас да мыйлö эшö вит годсö чулöтiс институтас? И не пессьöмыс понда ли государствоыс сетiс сылö высшöй образованнёсö?

Миянлö, гижиссеслö, партия да правительство сетö право выражайтны асланым народлiсь воля, сы оланын быдöс бурсö да умöльсö, но выражайтны сiйö колö сiдз, мед этасянь лоис польза народыслö, кöда ентöг, аслас юрöн да киэзöн керö му вылас олансö.

Колö сувтчыны и сы вылын, что комсомольскöй да партийнöй организацияэзлöн абу мыччалöм некытшöм удж, кöть и öтыс и мöдыс деревняас эмöсь и тöдöны, что уна отир веритöны енлö, кöда нем бурсö оланас оз вайöт. Быдöс отсöтыс сыын только и эм, что Николай Степанович шуö Варялö: «Набожнöй тэнат мамыт, Алексеевна... Сьöкыт лоас — лок ме дынö. Мыйöн верма — отса­ла». Эта быдöс сiдз, и быль бы, натьтö, по­зис веритны, не кольччыны кö эна шуöм кыввезлö пустöйезöн: бедаыс сыын и эм, что отсöтыс абу. Разь только сiя, что Николай Степановичыс отсалiс кошшыны Костиксö, кöр сiя öшис нюрас. Но сэк быдöс шумковчиыс отсалiсö.

Куимöт тема — любитöм. Вячеславкöт, кöдö оз позь сувтöтны главнöй геройыскöт ордчöн, лыддьöтiсь пантасьлö недыр кежö и оз ешты тöдсасьны пыдынжыка. Варяыс дынö отношеннёэзын Вячеславлöн идеалыс тöдса и этасянь вежöртны сiйö не сьöкыт. Тöдса да вежöртана миянлö и Андрей, кöда томсянь любитö Варясö, кыдз и Варяыс сiйö. Нiя дыр (öддьöн дыр!) сомневайтчöны ас думаэзын öтамöд дынö отношеннёэзын, но сыбöрсянь — не сiдз öтамöдсö любитöмсянь, кыдз оланын зорамöм обстоятельствоэзсянь — лоöны öтлаын. Кин тöдö, что вермисö бы нiя висьтавны öтамöдныслö асси­ныс любитöмсö да öтлаасьны, не вашöтны кö гортсис Пиля Олёшикалö ассис нывсö.

Куимнан темаыс коланаöсь, но сiйöн, что осьтöмась авторöн слабöя, оз сетö колана впечатленнёсö. Этасся эмöсь и мöдiк недостатоккез, кöдна вылын сiдзжö колö сувтчыштлыны.

Позьö кö шуны, что мукöд персонажжес типичнöйöсь, то не типичнöйöсь ны понда обстоятельствоэс. Босьтам медодзза главаись картинасö. Инькаэз вартлöны цыганкасö, вартлöны кин кыдз да мыйöн вермö. Ка­гаыс цыганкаыслöн эта коста сьöрас, кыдз и пыр овлö ны коласын, морос одзас каттьöм шальын. Вартлiсö, чужьялiсö, быглялiсö сiдз, что сылöн садь бырис. А мый жö эта коста кагаыскöт? Авторöн рисуйтöм картинаыс сьöртi позьö вежöртны, что сiя важын ни абу ловья. Но вот ештiс эта коста предсе­датель, и инькаэз пышшисö. Думайтсьö, что вот цыганкаыс чеччас, босьтас усьöм да кулöм ни пиянсö и пондас мунны. Мед и кулöм, а сё ни эд аслас, и сiйö колö дзебны. Сэтчö жö нiя, кöдна сiйö эта бура вартлiсö, öнi некытöн ни эз тыдалö, и повнытö вöлi некинiсь. Но нет. Цыганкаыс кагаыс йы­лiсь оз и думайт. Сiя усьöмöн-пöрöмöн пышшö веськыта сю коласöт. А кыдз жö кагасö? Эд сiйö колö дзебны. О, да мыля нö дзебны? Сiя жö ловья! Цыганпияныс, кöда эшö оз вермы котрасьны да шуны öтiк кыв, только и видзчисьöм, кöр дугдасö тышкась­ны, мунас сылöн мамыс, но локтас тöдтöм тётя, медбы вöрзьöтчыны сы син одзын ас­лас рузуммезын. Сiя и сэк, кöр инька та­буныс турунъюрöн ветлiс сы кузя, гындiс сылiсь мамсö, терпитiс, медбы не шыасьны, терпитiс нельки сэк, кöр мынiс мамыс морос одзись да усис чорыт му вылö, и сэк сiйö öтлаын мамыскöт и чужьялiсö, и талисö, и лязöтлiсö, кыдз тупöсьöс, сiйöн что сiя эз эшö куж котрасьны и эз вермы пышшыны. Но мый бы сэтчин эз вöв, сiя öтпырись öтiк шы эз сет. Ась тöдö лыддьöтiсьыс, кытшöм кагаэз вермöны чужтыны цыганкаэс: куим-нёль месяцся сiя ылöстö и вермö терпитны сэтшöм вартлöм мукаэз, кöднасянь нельки гыриссезлöн (мамыслöн) бырö садь. И бы­лись кö вöвны бы сiдз, то эттшöм мамыслö завидуйтiс бы быд инька, а вайны сэ­тшöм кагасö быдлöн бы вöлi медыджыт да медъюгыт мечта. Но оз кö веритсьы лыддьöтiсьыслö, то висьталам веськыта — этö сказка, кöдö гижис авторыс.

Уна öштö произведеннёыс и сысянь, что пондöтöм сiя не типичнöй явленнёсянь, а частнöй случайсянь. Часто ли позьö оланын пантавны сiйö, мый служитiс авторлö поводöн? Öддьöн шоча и нач мöдiк причинаэз кузя (баитсьö кагасö мамнас чапкöм йы­лiсь).

Миян классическöй литератураö пырис эшö öтiк бур черта, кöр В. И. Ленин петкöтiс народö лозунг «Кин оз уджав, сiя оз сёй» и кöр быдыслöн лоис право уджавны. Этасянь и мунö сiдз, что быд литературнöй геройсö пондiсö характеризуйтны уджалöм сьöртi.

Миян одзын Варя. Том учительница, комсомолка, образованнёсö босьтiс педагогическöй институтын. Локтiс сiя уджавны горт деревняö. И кыдз бытьтö сы понда эта годö осьтiсö Шумковаас виль школа. Но кыдз пондöтiс том, эшö опыттöм уджалiсьыс ас­сис уджсö, кыдз первуись пырис классас, кыдз тёпкöтiс эта минутаö сылöн сьöлöмыс, кытшöм думаэз сорлассисö юрас, кыдз чу­лалiс медодзза урокыс — лыддьöтiсь эта йылiсь некöр оз тöд. Авторыс висьталö, что Варя одз асывсянь сёр рытöдз вöвлi школа­ын, пыравлiс гортас только öбед коста. Но кытшöм лыддьöтiсь веритас эна кыввезö? Кытöн геройыслöн уджыс: сьöкытыс, гажаыс, кытöн сылöн удж йылiсь думаэс, мечтаэс, мый сылö гленитчö аслас бöрйöм туйын, мыйлö сiя рад, кытшöм успеххезлö?

Да, быд авторыс аслас уджын кошшö мыйкö вильö, ассис, но эстöн нем вильыс абу, а чожажык эм отклоненнё литератураын нiя нормаэз дынсянь, кöдна вылына лэбтiсö социалистическöй литературалiсь значеннёсö быдсöн мировöй литератураын.

Абу характеризуйтöма Варяыс аслас удж ладорсянь, абу характеризуйтöм и сылöн духовнöй ладорыс. Мый эм повестьын сэтшöмыс, кодя мыччалiс бы сылiсь мечтаэсö, стремленнёэсö, ас оланын сылiсь идеалсö? Ми сiйö ог адззö не гажаöн, не гажтöмöн, не лöгöн, не сьылöмын, не йöктöмын, не книга сайын, не тетраддез сайын. Öтпырись сiя оз горöтчы «Да провалитчы бы этатшöм оланыс вакрамешö!» или «Вöлiсö бы менам борддэз — лэбзи бы, лэбзи бы медвылына уян кымöрыс дынöдз!»

Не öтiк год Варя олö ордчöн аслас любимöй морткöт, олö не öддьöн гажöн аслас мам шогья да быдтас шогья, но оз пессьы сьöлöмыс, кöр нiя пантасьöны, оз адззись кыв, медбы горöтчыны сылö, оз адззись любитан сьöлöмын вир, кöда бы чепöссис чужöмö Андрейыс син одзын. Медбы убедитны этаын лыддьöтiсьсö, позьö видзöтны Андрей да Варя пантасьöмись картина. Нiя öтлаын локтöны Сордвасянь гортö концерт бöрсянь. Авторыс гижö: «Кыкнанныс чöлiсö... Чöвны бур, но эд колö жö мыйкö вись­тавны. Андрей думайтö, мый йылiсь бы го­рöтчыны». Да, овлö сiдз, кöр кык морт пер­вуись пантасьöны, тöдтöмöсь. Одзлань авто­рыс гижö: «Важын ни эз адззисьлö. А вот пантасисö, öтнаныс мунöны и баитны, ты­далö, нем йылiсь». Оз веритсьы. Мымда по­зьö чöвны, кöр тэ любитан, кар быд лунö, быд шагын кошшан пантасьöм понда кад, медбы быдöс, мый сотчö сьöлöмын, мый нельки узикö оз петав юрись, висьтавны öтамöдлö? И сiйöн томмез сётаки пондöны баитны. «А тöдан, Андрюша, меным часто тöдвылам усьлö, кыдз мийö кöркö важын ни кыкöн жö сёрöн рытнас кайимö гортö выпускнöй вечер вывсянь? Этадз жö чöлiмö. Тöдан?» «Тöда» — öтiк кылöн шыасьö па­ныт зонка. А эта бöрын висьталöны öтамöдныслö, что нiя пыр вöлiсö кыкöн и нылö вöлi бур. И быдöс? Да, быдöс. Кык любитiсь том морт сэсся нем йылiсь абу адззöмась горöтчыны öтамöдныслö. Абу казялöмась нiя, что звездаэс эта мича ойö югьялöмась только ны понда и ны моз жö югьялiсö нылöн öтамöдлö синнэзныс, и тёпкöтiсö сьöлöммезныс, кыдз повзьöм кай, и бергалiс юрныс пым тырппез бердö павкöтчöмсянь. Ме думайта, сiдз оз любитö. А любитöны кö, то только мумияэз, сiйöн что нылöн косьмöм сьöлöмсянь оз котöрт орсöмöн пым вир, а косьмöм вемын абу некытшöм ду­маэз.

Сысянь, что главнöй геройыс абу мыччалöм аслас удж ладорсянь, абу мыччалöм сылöн духовнöй содержаннё, оз позь судитны Варя характер йылiсь — сiя тожö абу. А этасянь петö сiдз, что произведеннёсис главнöй геройыс — кöть сiя и главнöй — öддьöн беднöй. А авторыс, натьтö, оз со­гласитчы эта анализкöт, дак медбы убедитны сiйö, кежам бокö.

Вот миян одзын М. Шолоховлöн «Лэбтöм вильсаись» герой, не главнöй, а только вспомогательнöй персонаж — Варя Харламова. Оз позь сувтöтны ордчöн öння кадсö сэксяыскöт, кöдасянь чулалiс ни тридцать год­ся унажык, но... Авторыс веськыта некытöн оз висьтав, что Варяыс любитö Давыдовсö, но мыччалö. Кöр Давыдов локтiс отсасьны полевöй станö, Варя лунтыр ветлöтiс эта лунö гöрöм му кузя, а ойнас оськалiс не öтiк дас километр мымда, медбы ашынас басöк паськöмöн мыччисьны любимöй морт одзын. А мый вöлi нывкаыс сьöлöмын, Да­выдовсö сiя етша интересуйтiс. Но Варя любитiс и сылö колiс, медбы любимöй мор­тыс тöдiс эта йылiсь.

Кöр тэнат любитö сьöлöм и эм эта вылö право, то энö чувствоэсö сайöвтны öддьöн сьöкыт да и оз ков этö керны. Сiйöн Варя аслас любитöм йылiсь ачыс медодз висьта­лö Давыдовыслö, и не полöмöн, а быдöс нывкася отчаяннёöн: «Синтöм дурак!.. Нем тэ он адззы! Любита ме тэнö, тулыссянь ни любита, а тэ... а тэ ветлöтан дзик кöрталöм синнэзöн!»

Лыддьöтан энö строкаэсö, и Шолоховыслöн Варяыс сiдз и сулалö син одзын, сулалö дрöжитан киэзöн, öгралан синнэзöн, вы­лына лэбтасян моросöн, гöрдöтöм чужöма, повтöм, пым да искренньöй — сэтшöм жö, кыдз и сылöн любитöмыс. Сыын и жарыс любитöмсяняс, и лöгыс торйöттöм чувствоэзсянь сiдз и йиджöны сьöлöмöдз лыддьöтiсьыслö, и охота лоны быдыслö сэтшöм жö пымöн да неполiсьöн ас чувствоэзын. А мый позьö босьтны «Шапка-пожумын» Варясянь? Мыйлö вермас завидуйтны да подражайтны лыддьöтiсьыс? Удж дынö отношеннёлö? Сiя оз тыдав. Оланын неколанкöт пессьöмлö? Сiя оз тыдав. Духовнöй богатстволö да идеаллö? Сiя оз тыдав. Любитöмын чувствоэзлö? И сiя тожö абу. Варя характерын вывтi уна пустота, беспечность.

«Шапка-пожум» сьöртi, сiдз кыдз произведеннё сiя не учöт, позьö судитны и авторлöн художественнöй воспроизведеннё йылiсь, мöднёж шуны, мастерство йылiсь. И сразу жö колö висьтавны, что мастерст­во слабöй. Быдöс йылiсь авторыс (унажыксö главнöй геройыс йылiсь да сы действиеэз, поступоккез, думаэз, мечтаэз, желаннёэз йылiсь) висьтасьö ас кыввезöн, кöр колö мыччавны сiйö действиеэзын. Этасянь художественнöй воспроизведеннё туйö петö мыйкö корреспонденция кодь. Вот пример: «...Варяыс быд лунöн пондiс велавны кага­ыс дынö, сё öддьöнжык радейтiс сiйö. Сiдз Костикöн и шуö. Лэдзчас ли вала, петас ли магазинö, а кагаыс пыр тöдвылас. Чожа­жык только сы дынö тэрмасьö. Гортас ки­ись сiйö оз лэдз — новйöтö керкуöттяс, бöбалö сыкöт, топ кыдз аканьöн орсö». Эта повествованнёыс куимöт главаын. Висьталiс авторыс и кажитчö сылö, что быдöс керöм.

Но öтiк дело — висьтавны, а совсем мöдiк — мыччавны сiйö, мыччавны геройсö действиеэзын, уджын, думаэзын. Веритас ли лыддьöтiсьыс авторыс кыввезлö? Натьтö, оз. Оз верит сiйöн, что висьталöмыс сьöртöт оз позь сувтöтны воображеннёын картинасö. Эта понда колö не висьтасьöм, а мыччалöм, картинасö колö рисуйтны художественнöя.

«Эна думаэз бöрсянь Андрей грудитiс пызан вылiсь бумагаэз, сюйыштiс нiйö ящикö, петiс öтöрö и ачыс эз казяв, кыдз локтiс клубö. Öшын дорö пельпоннас валитчöмöн сiя сулалiс сцена сайын, öшын увтас быдмисö кыдзоккез. Чулалiс куим год, кыдз нiйö садитiсö комсомольскöй воскресник коста. Андрейыс сэк тожö öтлаын уджалiс. Кыдзоккез ыджыткодьöсь ни, стройнöйöсь. Но öнi Андрейыс эз адззы нiйö». Авторыс пондылiс висьтавны Андрейыс переживайтöм йылiсь, но эз кончит, эз ри­суйт быдöс картинасö и сэтöн жö пондiс гижны кыдзоккез йылiсь. Андрейлiсь жö отношеннёэсö эна кыдзоккез дынö висьталö авторыс, что сiя öнi эз адззы нiйö. И быль кö сiдз, то мыйлö колiс сюйыштны нiйö эта эпизодö? Конечно жö авторыслö охота вöлi эна кыдзоккез пыр выразитны мыйкö Ан­дрейыс сьöлöмын, но петiс не сiдз, кыдз ко­лiс: деталь кольччис лишньöйöн, только мешайтö син одзын.

«Варя берег дорсис пельдöтiс му комок, шупкис сiйö ваас. Кокнит валоккез круггезöн шупыта тарöвтчисö сьöрсьöн-бöрсьöн да öшисö». Невежöртана. Штрих, оттенок, сравненнё? Сiя оз баит не Вячеслав да Ва­ря состояннё йылiсь, не ны думаэз йылiсь. Одзлань: «Нiя дыр эшö пукалiсö берег до­рын, баитiсö. Сэсся Вячеслав лöгöн чеччис и кисö эз сет — мунiс». А быль ли сiдз? Оз веритсьы. Колö лоны öддьöн гордöйöн, медбы сiдз мунны. А Вячеслав характерын эта гордостьыс абу.

И сiдз, ми видзöтiм повестись нiйö ладорресö, кöднасянь зависитö сылöн успех. И колö висьтавны веськыта, что эта колана успехыс абу.

Талун миян лыддьöтiсьыс бура бöрйисьö литератураын, кужö судитны быд произведеннё йылiсь, кошшö ныын сiйö, мыйись бы позис босьтны пример, велöтчыны. «Шапка-пожум», кыдз вöлi висьталöма ни, етша мыйö велöтас. Думайтсьö, что быд лыддьöтiсьлöн унажык бур чертаэс, чем Варяыслöн повестяс. Гижны колö не сы понда, мед вöлi гижöм, а сы понда, мед лыддьöтiсьыс вермис босьтны ас пондас кытшöмкö польза.

Талуння литератураын лыддьöтiсьыс кошшö сэтшöм геройес, кöда бы аслас характе­рын качествоэзнас отвечайтiс оланлöн та­луння требованнёэзлö, кöдö бы позис при­митны быдыслö идеал туйö. И миян лите­ратураын быд гижись одзын сулалö зада­ча — отсавны отирыслö оланын адззыны бур да правильнöй туй, кöдасянь миян потомоккезлö кольччас кытшöмкö след.