Статьяэз кык поступок йылiсь (Иньва, 1964)

Кыв «коммунизм» талун тöдса не только быд мортлö, но и смыслсö сылiсь сiдз жö тöдö быдыс. Но мый колö сы понда, медбы чожажык сибöтчыны, пырны эта обществоö — висьталас, натьтö, не быд морт. Эта понда медодз колö сознаннё, кöда отсалас мортыслö перытжыка керны этö виль обществосö.

В. Баталовлöн рассказ «Туйын» (видзöт «Гора му», 1963 г.) гижöм самöй эта тема вылö — мортлöн талуння сознаннё да сы сьöртi сылöн поступоккез. Колö висьтавны, что темаыс босьтöм öддьöн колана, как раз талуння.

Рассказлöн сэтшöм жö и идейнöй содержаннё. Эд медбы отсавны лыддьöтiсьлö зорöтны ассис сознаннё, колö мыччавны сылö, кыдз эта керсьö, быдкодь примеррез вылын. Автор сiдз и керис.

Рассказын медтöдчана герой — нефтераз­ведкаись главнöй инженер Николай Фёдоро­вич. Буровöйез проверяйтiкö сiя панталiс тöдтöм отирöс, кöдналö ковсис отсöт. Сiдз и керис Николай Фёдорович — сетiс машинасö морттэслö, ачыс кольччис туй шöрö. Эз повзьöт Николай Фёдоровичöс кадыс, кöдö ковсяс сулавны öтöрын крепыт мороз коста, машинасö видзчисикö. Бура вежöртiс сiя, что колö отсавны, а сысся некин этö керны оз вермы.

Этö рассказсö лыддьöтöм бöрын шоныт да бур лоö сьöлöм вылын Николай Фёдорович поступоксянь. Лыддьöтiсьлö усясö тöдвылас аслас оланiсь поступоккез: сьöлöм гажöтанаöсь — вöлiсö кö нiя бурöсь, и сьöлöм дзугыльтанаöсь — вöлiсö кö нiя умöльöсь.

Но куньны кö синнэз рассказсö лыддьöтöм бöрын, то медодз мыччисьö картина, кыдз Николай Фёдорович бертö гортас и кыдз панталö сiйö иньыс, Тамара Ивановна. Мы­ля? А сiйöн, что талун сылöн нимлун, эта рытö сылö öддьöн охота вöлi лоны öтлаын жöникыскöт, но сы моз эз пет. Николай Фё­дорович сёрмöтчö кыдз нарочно. «Нимлун кежам локтан? Тэтöг гажтöм лоас» — вот иньыслöн кыввес. И сiйöн, что Тамара Ивановна сьöлöмсянь желайтiс адззывны жöниксö эта рытö ордчöн аскöттяс, и сiйöн, что Николай Фёдорович сёрмö локны — быдмö ни конфликт. Эта бытовöй конфликт пыр авторлö позис бы мыччавны Николай Фёдоровичлiсь кыдз мортлiсь характеристика. Медодз рассказын корсьö эта семейнöй конфликтлöн изображеннё, но эта авторöн абу керöма. Этатöг рассказыс öштö уна.

Судитны кö авторöн мыччалöм поступок сьöртi, то кыдз вöлi ни висьталöм, Николай Фёдорович — герой положительнöй. Автор старайтчö öтiк фактöн керны образ, кöдö бы вермис любитны лыддьöтiсь, завидуйтны сылö, босьтны сысянь пример. Но петiс ли сiдз, кыдз думайтiс автор? Лыддьöтiсьыслö öддьöн охота веритны этаö, но öткоста этакöт чужöны неколана сомненнёэз. Мыля? «Тöдвылас усисö иньыслöн кыввес: этадз шонытжык... Сьöкыта ловзисис». Кык кыв, кык неколана кыв, кöдналiсь смыслсö казялöм бöрын, лыддьöтiсь пондас видзöтны Ни­колай Фёдорович вылö мöдкодь синнэзöн, пондас думайтны мöдкодь думаэз. И толь­ко эна кыввез кузя геройыслiсь поступоксö лыддьöтiсь примитас не кыдз мортлiсь та­луння духовнöй необходимость, а кыдз приличие понда поступок. И этасянь геройын нем оз кольччы сэтшöмыс, кöдалö позис бы завидуйтны, кöдö позис бы босьтны оланын пример туйö. Сьöкыта ловзисис, кöр усисö тöдвылас иньыслöн кыввес... А лыддьöтiсь лоас прав, висьталас кö: «Сетiс машинасö да сэтöн жö каитчыны, жалейтны пондiс». Эта штрихыс, детальыс, позьö шуны, совсем нетыдалана, а керö рассказсö бессмысленнöйöн. Позьö примитны и сiйö, что сьöкыта ловзисис, но колiс авторыслö мыччавны нето висьтавны сьöкыта ловзисьöмыслiсь смыслсö, медбы лыддьöтiсь эз думайт умöля бур поступок йылiсь.

Кыдз вöлi висьталöма ни, рассказлöн те­маыс — талуння мортлöн сознаннё быдмöм. Рассказлöн нимыс — «Туйын» — веськыта вежöртана. Но кöбы керны сiйö аллегорическöй формаын, петiс бы туйö не геройыс ни, а сылöн сознаннёыс. Эд талуння мортлöн сознаннёыс оз сулав öтiк определённöй местаын, сiя быдмö, сiдзкö позьö висьтав­ны, что тожö туйын. И керны кö авторлö рассказсö эна упущеннёэзтöг, петiс бы не öтiк факта корреспонденция, а быдсöн реалистическöй да öння кадö öддьöн колана произведеннё.

Мый жö мешайтiс авторлö керны рассказ­сö коланаöн да эшö буржыкöн?

Причина, ме думайта, öтiк. Эпизодыс, кöда служитiс поводöн рассказсö гижöм понда, босьтöм оланiсь, автор наблюденнёэзiсь — и эта, конечно, бур, — но сiя абу думайтöм кыдз колö, а висьталöм сiдз, кыдз вöлi. Наблюденнёэзiсь нем абу чапкöм сэтшöмыс, кöда оз вермы служитны примерöн лыддьöтiсь понда, и нем абу содтöм, кöда бы öзтiс лыддьöтiсьлiсь сьöлöмсö жара сотчан биöн.

* * *

«Праздник панытö» (видзöт «Гора му») — рассказ öтiк том деревенскöй тракторист йы­лiсь. Темаöн рассказ понда С. Федосеев бось­тöм бур поступок, кöдна часто пантасьлöны оланын. Действиеыс, кöда йылiсь висьтассьö рассказын, мунö сельскöй местаын, кöда, кыдз ми адззам, не матын районнöй центр дынсянь. Оз позь висьтавны, что лыддьöтiсь оз вермы веритны гижöмыслö. И деревняыс, кöда пукалö кытöнкö вöр коласын, не öтiк дас верста ылынаын районнöй центрсянь, и туйез, кöднö тулыснас да арнас оз позь шуны туйезöн: нiя чожажык вачкисьлöны пыд парма пыр нюжалöм виль просекаэз вылö, и юыс, кöда весьтöт некыдз оз чайтчö керны пос — быдöс рассказас висьталöма öддьöн бура да веськыта, кыдз эм.

Первöй май панытö, кöр лымыс эз на еш­ты быдсöн сывны, кöр эз ни позь доддявны додь, но телега доддявны вöлi эшö одз, кöр тöвся разьсьöм туй кузя öддьöн сьöкыта кыссисö автомашинаэз, а юэз петiсö асланыс береггезiсь — тожö празднуйтiсö кузь годын ассиныс öтiк праздник — том, смев да ён зонкаöс, колхозiсь трактористöс, кöдö шуисö Вячеславöн, председатель иньдöтiс районö деньгала. Часто овлö сiдз, что оланыс оз лыд­дись умöль погоддякöт, туйезтöм кадкöт и, колö висьтавны, что темаыс босьтöм удачнöя. Рассказсö лыддьöтöм бöрын герой йы­лiсь кольччö бур впечатленнё. И, натьтö, не öтiк том морт завидуйтö геройыслö, не öтiклö охота керны сiдз жö да сiйö жö, кыдз да кöдö керис Вячеслав. Эта сьöртi ни позьö висьтавны, что рассказыслöн идейнöй содержаннё бур. И композицияыс сьöртi сiя керö­ма не умöля. Но öтлаын бурыскöт позьö пантавны и сэтшöм местаэз, кытöн автор эз вермы мыччавны ассис геройес да сылiсь действиеэсö сiдз, медбы лыддьöтiсь одзын эз сувт вопрос: а мыля? Вот иньдö предсе­датель Славикöс районö, а лыддьöтiсь оз вермы вежöртны: мыля сiйö, а не мöдiкöс? Эд колö мунны не тракторлöн запаснöй часттезла, а деньгала. Тöдам, что Славик и смев, и вына. Но сiя ли только колö сы пон­да, медбы вайны деньгасö? Эд, авторыс кыввез сьöртi, Славикыслö öтнаслö ковсяс мунны деньга мешöкнас не öтiк дас верста ылына да сэтчö жö подöн, сьöкыт туй кузя. Думайтiс ли эта йылiсь председатель — лыддьöтiсь тöдны оз вермы. Авторыс сылiсь думаэсö оз мыччав не иньдöтöм одзас, не сы бöрсянь. Колö висьтавны и сiйö, что рас­сказыслöн развязкаыс слабöй. Быд художественнöй произведеннёлöн развязкаыс дже­ныта, но öддьöн точнöя да яснöя выражайтö сылiсь идейнöй содержаннёсö. Эстöн сiя оз тырмы. Колiс бы авторлö мыччавны главнöй герой поступокись результатсö кöть не­ыджыт штрихöн, öтiк фразаöн. Эта бы слу­житiс поступоклö оценкаöн, вöлi бы унаöн интереснöйжык да дыр кежö пуксис бы тöд­вылас лыддьöтiсьлö.

Оланiсь öтiк эпизод — случай неыджыт, и сiйöн рассказын геройез коласын да ны действиеэз коласын абу нем сэтшöм сложнöйыс да проблематическöйыс, кöдö решитöм да гижöм понда ковсис бы керны персонажжезлiсь сэтшöм жö характеррез. И сiйöн рассказын образзэз не сьöкытöсь — простöйöсь.

Главнöй герой рассказын — Вячеслав. Сыын нем абу сэтшöмыс, кöдö бы эз вермы примитны лыддьöтiсь либо эз верит эталö. Рассказсö пондöтiкö сетöм характеристикаыс сьöртi позьö ни тöдны, что зонка сiя том, но вежöра, постояннöй характера да самостоятельнöй. Кöр Славик эз адззы вуджöтiсьсö, сiя решитiс керны плот и öтнас вуджны юсö сы вылын. Но кöр плотыс разь­сис, а сiя шедiс кöз вылö, Славик и эстöн оз öшты юрсö. Славик медодз думайтö деньга йылiсь — кыдз сiйö берегитны нельки сэк, кöр ачыс сiя вермас кынмыны нето вöйны. Эта медвына, медыджыт и медколана чер­та Славик характерын. Эта стержень, кöда вылын видзсьö рассказыслöн идейнöй содержаннёыс. Эта чертаыс дона лыддьöтiсь понда. Герой йылiсь авторлöн кыввес «Ась мортыс и усяс ваас, а кöзичасö адззасö честнöй отир, и деньгаыс кольччас дзонь» оз вермö мунны лыддьöтiсь сознаннё пыр, мед­бы не волнуйтны сылiсь сьöлöм. Эна жö кыввезын Славик характерын автор осьтö эшö öтiк, но öддьöн бур черта — мортлö веритöм. Кин тöдö, мый бы вермис лоны кöз вылын кольччöм деньгакöт, кöбы петiс Славиккöт мыйкö умöль. Сiя надейтчö, что кольччас кö деньгаыс дзонь, то сы одзын сувтöтöм задачаыс лоас досповна тыртöм. Сiя веритö, что деньгаыс сюрас честнöй морт киö, кöда вермас сетны сiйö, кытчö колö.

Рассказiсь мöдiк персонаж — колхозiсь председатель Николай Максимович. Автор неумöля керис Славиклiсь образ и скупöя мыччалiс председательöс: рассказас сiя не кыдз герой, а кыдз авторлö колана деталь. Лыддьöтiсьсö сылöн образыс оз вермы не лöгöтны, не гажöтны. А эта коласiсь мыйкö бы колiс. Лыддьöтiсь оз чайтчы висьтав­ны, кытшöм сiя морт. Рассказын кыдз председательлöн Николай Максимовичлöн абу некытшöм сэтшöм действие нето поступок, кöда вермис бы убедитны лыддьöтiсьсö, что сiя былись председатель. Мыля? Николай Максимович морт годдэза ни и тöдö, что туйтöм кадö, деньгаöн да эшö подöн не только сьöкыт шедны районсянь деревняöдз, но и полöм петö. И сiйöн Славиклöн ветлöмыс не тревожитны сiйö оз вермы. А мый адззö лыддьöтiсь? Славик аскадö эз вермы шедны гортö. Быдса ой сiя пукалiс кöз вы­лын. Но эта коста лыддьöтiсь оз адззы председательлiсь тöждiсьöмсö. Ежели Сла­виклöн неаскадö бертöмыс оз беспокоит Ни­колай Максимовичöс кыдз мортöс, то кыдз председательлö сылö колiс бы думайтны эта йылiсь. Рассказ сьöрна сiя öтпырись нельки оз кутчись звонитны телефонöн, оз интересуйтчы Славикыс бертöмöн, оз ду­майт «вирöн заробитöм» отир копейкаэз йы­лiсь. И только конецас ни, Славиксö панталöм бöрын, Николай Максимович юалö: «Но, кыдз ветлiн? Дзонь деньгаыт?» Эна кыв­вес не председательлöн. Славик ветлöм йылiсь сiдз жö вермис бы юавны быд морт, кöда эз иньдöт сiйö и кöдалö эз бы ковсьы видзны некин одзын некытшöм ответ не Славик олан понда, кöбы петiс сыкöт мыйкö умöль, не деньга понда, кöда вермис öшны.

Неыджыт, не уна кыла эпизод, кöр Сла­вик медодзза керкуас пырöм бöрын инмö коддэз дынö, öддьöн бура характеризуйтö сэтiсь отирсö. Авторлöн да геройлöн отношеннёыс пызан сайын пукалiссез дынö öддьöн точнöя да вынöн сетсьö лыддьöтiсьлö. Славик да коддэз коласын диалогсö лыддьöтöм бöрын кокнита сувтö син одзын кар­тина, кöда рисуйтö быдöс компаниялiсь öтвывса образ.

Паныт код компаниялö сувтöтöма стариклöн образ. Старик отсалö зонкалö, вуджöтö Славиксö берегöдз, шонтö шедтöм бинас да сьöлöмсянь бур кывнас. Стариклöн образыс лыддьöтiсь син одзын лоö быдсöн код компанияся вылынжык.

Автор используйтö уна быдкодь деталлез, кöдна пыр интереснöйсьöтö рассказсö, матынсьöтö лыддьöтiсьсö колана впечатленнёэзкöт. Но мукöдыс нельки неколанаöсь. Сiдз, автор висьталö, что райцентрö локтöм бöрын Славик ветлiс киноö, кöдö мыччалiсö бура, не сiдз, кыдз гортас. Лыддьöтiсь, конечно, веритас, но мый одзлань? Кытшöм отношеннё эта эпизодлöн рассказыс тема дынöдз? Сiя немöн оз отсав мый-нибудь висьтавны главнöйыс йылiсь.

Эмöсь и мöдiк неточнöй выраженнёэз да деталлез, кöдна чинтöны интереснöй произведеннёлiсь донсö.

Рассказыс гижöм севернöй, косинскöй диалект вылын и сiйöн сетö кытшöмкö ас­коддя характер. С. Федосеев литератураын эшö öддьöн том. «Праздник панытö» — сы­лöн медодзза рассказ, кöда пырис миян литературно-художественнöй сборникö. И нельки этö медодзза рассказсö лыддьöтöм бöрсянь позьö висьтавны, что авторыс правильнöя видзöтö оланын явленнёэз вылö, и пондас кö одзлань развивайтны ассис мастерствосö, то позьö надейтчыны, что вер­мас керны лыддьöтiсь понда неумöль художественнöй произведеннёэз.