Почкаэз оссьöны (Почкаэз оссьöны, 1970)

Быд чулалöм лунöн öтöрас лымыс кольччис сё етшажык и етшажык. Сы увтiсь пондiс мыччисьны му. Керку юррез вывсянь лунтыррезöн патькöтiс вотьва, кадiсь кадö мынлiсö йыжоллез. Му бердас нiя пазавлiсö и югьялiсö шондi югöррез увтын.

— Видзöт жö, Наташа, тулыс эд локтö, — горöтчис Маша, кöр пырис кухняö да казялiс сэтчинiсь ассис соседкасö.

— Локтö тай, — сковородкаын жаритчöм лук сорлавтöн шыасис паныт Наташа.

Öтöрын дзульзисö челядь. И нiйö гажöтiс тулысся шонытыс да мича погоддяыс. Челядь ветлöтiсö öтмöдöрö керку гöгöр, орсiсö. Мукöдыс прудйис ва, мукöдыс сувтöтiс мельница баба, а кöда и сiдз, нем керöмись, видзöтiс быдöс вылö, видзчисис, мый шогмас одзлань.

Канава дорын, киас неыджыт зырокöн, сулалiс сизим годся Галочка. Сыкöт öтгодся Толик эта коста черокöн лöсйис баба. Кöр зоночка вöрöтыштлiс коккезнас, сы ботинкаэзын горöн чольскöтiс ва. Коккес сылöн кöдзытсö эз ни тöдö, а доннэз вылö вачкисян киэс эшö чайтчисö видзны чероксö да бедьсö.

Толик сэтчöдз лöсйисис, что медбöрын сы бабаись кольччисö чаггез да неыджыт öшöпек кодь бедь. Эта лöгöтiс сiйö. Зоночка лöгувьяс шупкис тшыкöтöм бабасö, кöда усис канаваö, веськыта Галочка одзö. Этасянь зелёнöйкодь рöма кöдзыт ва дрöгнитiс да чепöссис вывлань. Гырись ва воттес свиттьöвтiсö шондi югöррез увтын да резсисö Галочка вылö.

— Ы-ых-хы! — повзьöмсянь медперво горöтыштiс нылочка. А сыбöрын мымда вын: — Ма-а-ам! Ма-а-ма-а!

Галочкаыс горöтлöм вылö мыччисис Наташа. Бордпавкйöн, топ бабука-курöг, сiя сибöтчис нылыс дынö. Эта коста Толик ештiс ни сайöвтчыны керку угöв саяс.

Кухняын кык соседка коласын, кöдна эшö нач неважын бытшöма баитiсö ас коласаныс, öнi лэбтiсис быдса «баталия». Кончитчис сiйöн, что Маша мунiс кошшыны ассис зонсö. А Наташа, кöда нывсö öбидитöмсянь локтiс горзытöдз, сiдз и нöбöтiс бöр кухнясис пусьытöм супсö.

Сэтшöм картинаэс кык соседка коласын вöвлiсö часто.

Наташалöн ныв, Машалöн зон. Вежöртана, что öтгодся нылочкасö зоночкаыс сё ни вермö. Вот и öбидитö сiйö: то Галочкалö лым комокöн зубыта инмас, то сöстöм тапочкаэзнас нятьö пыртас.

Басöкся-басöкöсь, кыдз и мамыслöн жö, вöлiсö Галочкалöн чикиссез: кузьöсь, сьöдöсь. И кыдз кыяс нiйö алöй нето голубöй ленточкаöн — видзöтан и син он орöт — акань акань и эм. Но эта басöкись Толик вежöртiс етша. Вöвлi сiдз, что чикиссес бердö сибавлiсö Толиклöн бöб киэс, мыйсянь нылочка сiдз жö вовлiс горзытöдз.

Сiдз и быдмисö челядь кыкьямыс годöдз.

Но вот öтiк арся асылö маммезныс вочöтiсö-пасьтöтiсö челядьнысö да нуöтiсö школаö. Толикöс да Галочкаöс пуксьöтiсö öтiк классö. «Öтiк школаын да öтiк классын, быдпыр велöтiсьыс син одзын, поди, и пондасö лöсявны», — думайтiс Маша.

Маммезныс дума сьöртi эз пет. Галочка одззамоз часто гортö вовлiс горзытöн. А öтпырись, кöр челядь ветлöтiсö ни куимöт классö, шогмис сэтшöм история. Кöр Маша локтiс удж вывсянь гортö, зоныс сё эшö эз вöв. Галочка пукалiс кухняын нятьöсьтöм учебниккез дынын да сыркьялiс.

Одзза лунас Толик вельдыр котрасис аслас ёрттэзкöт и нач вунöтiс гортся удж йылiсь. Усис эта сылö тöдвылас ашынас ни, классын. Но зоночка эз öш. Сiя сэтöн жö гижис гортся уджсö ордчöн пукалiсь ёртлiсь. Галочка эта лунö вöлi дежурнöйöн. Перемена коста классiсь сiя некытчö эз петав и быдöс адззылiс.

— Кин лыддьöтас гортся удж? — юалiс урок коста Серафима Васильевна.

Медвылына да повтöг лэбтiс кисö Галочка. Полöмöнкодь, но лэбтiс кисö и Толик. Сiйö и юалiсö. А кöр журналас Толиклö сувтöтiсö четвёрка, Галочка сэтöн жö вились лэбтiс кисö.

— Мый сэтшöм, Галя? Галочка сувтiс да висьталiс:

— А Носковыс талун гортся уджсö перемена коста Брагин Андрейлiсь гижис. Ме ачым адззылi.

Серафима Васильевна бергöтчис Толик ладорö. Галочка эта коста гусьöник мыччалiс Толиклö кузя нюжöтöм кывсö да шынньöвтiс сэтшöм ехиднöя, бытьтö шуис: «Адззылiн, кыдз ме тэнö велöтi. Пондан öнi тöдны, кыдз йöз керöмнас отметкаэсö босьтавны».

«Чöв, ябеда. Горзыштан тэ бöра менам эта понда», — сэтöн жö ас кежас думайтiс Толик.

Вештiсьöмсö дыр кыскыны зонка эз понды. Уроккез бöрын, кыдз только Галочка петiс школаись, Толик иньдöтчис сы сьöрö.

Сулалiс ар. Шондiыс шоча мыччасьлiс лажмыта уян кымöррез сайсянь. Зэррезсянь канаваэзын пукалiс нять ва. Нильыг вöлi ветлöтны пуовöй тротуаррез кузя.

Неылын ни асланыс керку дынсянь Толик вöтiс Галочкаöс.

— Мый, ябеда, нильдыны думайтiн? Оз пет, — горöтчис Толик. Сiя сэтöн жö татшкис нылочкасö да сэтшöм вынöн, что Галочка нельки ассис портфельсö эз вермы видзны киас. Галочкасö одзалöмöн портфельыс шлёпнитчис-усис канава шöрас. Ачыс Галочка мöдiс чеччöвтны канава мöдöрас, но коккес нильдiсö и тожö баасис нятяс.

— Адззылiн, кыдз ябедничайтнытö. Ме тэнö велöта, — сэтöн жö эшö полöтiс Толик. Радмöм сысянь, что долгын эз кольччы, вештiсис, зоночка иньдöтчис гортас.

Рытнас соседкаэз вились «воюйтiсö».

Эта рытö Толик дыр эз вöв гортын. Локтiс зоночка сёрöн ни. Гусьöник, мед не саймöтны мамсö, сiя сэк жö водiс. Уроккез эта лунö вились кольччисö велöттöг.

Вельдыр эз узьсьы эта рытö Машалö. Инька думайтiс. Тöдвылö усисö жöник сайын оланiсь медодзза годдэз.

Кыкнан том семьялö квартираэсö сетiсö öтдруг. Öтiк лунö и новоселлёсö празднуйтiсö. И кытчöдз мужиккез вöлiсö гортын, ны коласын эз вöвлы нем умöльыс. Том ичмоннез нельки новйöтчисö öтiк кадö и только неделя-мöдöн одзжык Наташаöс нуöтiсö больницаö. Ештiс только сiя нывнас ни петны, кад локтiс Машалö.

— А од, батя, тi кольччö öтамöд сьöрись, — сералiсö том ичмоннез вылын мöдiк соседдэз.

Öтпыр тулыснас, кресення лунö, шоччисьöм могись; мужиккез ветлiсö вöравны. Гортö локтытöн öтлаын вужжезнас нiя вайисö нетшкöвтöм пуоккез. Метр сувда льöмпусö да рябинасö садитiсö увдöрас, балкон весьтö. Сымда война вотöдз и ештiсö только керны кык том морт асланыс челядь понда. Садитöм пуэзнас аслыныс любуйтчынытö эз усь, эз бертö.

Сьöкыт годдэс, кöдна коста колiс бы эшö öддьöнжык йитсьыны öтамöд коласын кык том инькалö, нiйö янсöтiсö. Медодзза шумыс лэбтiсис Галочка акань увья, кöдалiсь бöбавтöнняс Толик орöтiс юрсö, мыйöн и вайöтiс Галочкасö горзытöдз. Наташалö эта эз гленитчы. Сысянь сiя и эз понды лэдзны ассис нывсö орсны öтлаын Толиккöт.

Сiдз чулалiс год, мöдiк. И вот... школа, но мый керас школаыс? Велöтiссез вермасö видзöтны только сэк, кöр челядьыс школаас. Но и этö керны не быдпыр удайтчö. Уна и Наташаыс не сiдз вежöртö. Этасянь сыкöт баитны мыла оз тырмы. Сiя перыта, и мукöд коста нач нем пондаись, вермö öбидитчыны, а кыдз буржыка челядькöт лöсьöтчыны — оз думайт.

Ашынас, рытъяв кадö, кухняын соседкаэз вились пантасисö. Маша недыр мыйкö думайтыштiс ас кежас, а сэсся горöтчис:

— Наташа, ми тэкöт öддьöн часто лöгалам челядь понда. Этасянь ог и тöдчö ас коласын. А эд кинлö ли бы, кыдз не миянлö, кык öткаса инькалö, овны мирын. Пыр вот талун ме ордö ужнайтны, öтлаын Галочкаыскöт. Пукалам рытсö, баитам-керам ас коласын.

Соседкаыс кыввез вылö паныт Наташа нем эз висьтав. Сiя чöлöмöн только нюмыртiс тырппесö да жмитыштiс пельпоннэзнас, бытьтö горöтчис паныт: «Мый вылö сiйö? Эта только оз и тырмы».

Маша видзчисис Наташасянь кытшöмкö ответ. Сiя видзöтiс соседкаыслöн гордöя видзсян юрок вылö, казялiс сылiсь висьтавтöм думаэсö да сэтöн жö содтiс:

— А меным и былись думайтсьö, что эта только и оз тырмы.

Наташа и öнi нем эз горöтчы паныт. Сiйöн сорöн и янсöтчисö. Но кöр Маша лöсьöтiс ни гортас пызан вылö, кинкö негорöн стукöтчис. Сэсся ыбöсыс жагвыв оссис. Порог дорас сувтiс Галочка.

— Тётя Маша, — полöмöн моз горöтчис нылочка, — мамö тэнö корö, Толикыскöт.

«Сидзис сiдзкö басниыс», — ас кежас думайтыштiс Маша, а нылочкаыслiсь шутитöмöн юалiс:

— Гöститны, сiдзкö?

— Аха.

— А мый нö тэ, Галочка, порог дорас сулалан, лок пыр. Ме вот ужнайтны лöсьöтi. Вай-ко, гöститам перво миянын, а сэсся вöлись тiянöдз мунам. Лок, Галочка, пуксьы.

Эшö пызан дынас сибöтчытöдз Галочка медперво полöмöн видзöтыштiс Толикыс ладорö. Мöдыс эта коста пукалiс мöдiк пызан сайын да кадiсь кадö вирскышалiс нырнас. Толик керис гортся удж.

— Тэ эн пов, Галочка, эн пов. Косясьны сiя гортын оз лысьт, — горöтчис Маша.

...Наташа сiдз и эз вермы видзчисьны нылыслiсь бертöмсö. А кöр сiя осьтыштiс соседкаыс ордö ыбöссö, Галочка пукалiс пызан сайын, ордчöн Толиккöт, да юис тупöссезöн чай.

Маша аскадö грöзитыштiс Наташалö чуньнас, бытьтö шуис: «Чöв тэ, нем эн шу».

Толик гужгыштiс-вештiс ас одзсис стакансö да шытöг чеччис пызан сайись. — Но пöтiт?

— Спасибо, тётя Маша.

— Вот и бур. Öнi тi мунö кыкöн уроккезнытö велöтö, ми мамыткöт тожö пондам ужнайтны.

Челядь кывзiсисö. Нiя былись кутчисисö уроккез бердö. Галочкалöн полöмыс чожа чулалiс. Кыкöн нiя велöтiсö стихотвореннё «Ар», а сэсся кутчисисö примеррез бердö. Маммезныс эта коста, мед не мешайтны челядьыслö, сё эшö пукалiсö дзимлявтöм пызан сайын да негорöн баитiсö.

Ашынас Маша эшö порог дорсянь казялiс зоныслiсь сотчан синнэсö. Юавны сiя нем эз ешты. Толик сэтöн жö гажа голосöн висьталiс:

— Мам, а ме талун кык пятёрка босьтi.

― Вот адззан. Этö тэныт Галочка тöн отсалiс.

— И сiя тожö пятёрка босьтiс.

— Сiдзкö и тэ сылö отсалiн. Вот адззан кытшöм бур уроккесö кыкöн велöтны. И весь тэ сiйö, сэтшöм вежöра да ылöса нылочкаöс, пыр öбидитан.

— Мам, ме сэсся ог понды, честнöй пионерскöй, ог понды.

Эта рытыс, кыдз и одззасяыс, соседкаэз коласын чулалiс öтлаын. Только талун нiя пукалiсö не Маша, а Наташа ордын. Толик да Галочка вились öтлаын керисö гортся удж.

Эта кадсянь и пондiс жагвыв лöсямны ны коласын оланыс.

Öтiк тöвся рытö, кöр сулалiсö бимороззэз, Наташа локтiс уджалансянь и эз казяв гортiсь Галочкасö. Ыбöсыс квартираись вöлi осьта, а пытшкас некин абу.

— Галка! Галочка! Кытöн тэ? — повзьöмкодь голосöн горöтчис Наташа.

— Мам, ми татöн! — кылiс ордчöн.

Наташа тэрмасьöмöн пырис кухняö. Сэтчин, неыджыт пызанок сайын, челядь пукалiсö ордчöн, велöтiсö уроккез.

— А мыля не гортын? Сэтчин эд югытжык и местаыс унажык.

— Сэтчин, мам, кöдзыт, а татöн шонытжык. Öддьöн гажöн панталiс Галочка мамсö ашынас.

Ештiс только Наташа вуджны порог, кыдз нылыс сэтöн жö уськöтчис паныт да гусьöник, бытьтö кинкö вермис кывзыны нылiсь баснисö, шушкыштiс:

— Мам, мама, кывзы жö, мый ме тэныт висьтала.

— Кывза, кывза, Галочка, висьтав, мый сэтшöмыс лоис.

— А талун Толикыс косясис.

— Мый, бöра ли мый ли тэнö песiс?

— Да не-е. Менö гортö локтöн Саша Ракин туй вылас татшкис. Ме уси и пидзöсöс вирöдз дойдi, а Толикыс адззылiс. Сiя кыдз кутiс Ракинсö да кыдз пуркнитiс толаас...

Наташа чöлöмöн кывзiс нылыслiсь баснисö, но паныт горöтчынытö сiдз нем эз и лысьт. Сiя только ыш ловзисис да жмитiс тырппесö. Тöдвылас усисö неважынся гажтöм историяэс.

Эмöсь кö челядьлöн кытшöмкö склонносттез, то нiя унажыксö пондöны тöдчыны школаын велöтчикö медбöрья классэзын. Быдкодь машинаэз да механизммез любитiсь Толиклö унажык вöлi интереснöйыс физикаын да математикаын. Зонка бура да кокнита решайтiс задачаэз, а вот гижикас запятöйесö вунöтлiс сувтöтлыны. Галочка жö, поэтическöй чертаöн аслас характерын, унажыксö дружитiс литературакöт. Этасянь и грамматиканас мунiс Толикся кокнитжыка.

— Но мый, Галка, петiсö тэнат задачаэс?

— Фи-и. Кытiсь сiйö... нем менам эз пет.

— Ме нiйö решайтi, а вот гортся сочиненнёнас кöть юр жугды — нем оз пет. Керам öтлаын, а?

— Керам, — шыасьлiс паныт нывкаыс.

Уроккез сайö пуксьывлiсö öтлаын. Кыкöн быдöс петлiс — и задачаэс, и сочиненнёыс.

Кадыс эта коста эз сулав öтiк местаын. Сiя чулалiс и керис ассис удж.

Кöркö том, сьöд синкыма да вирöн сотчан чужöмбана Наташа öнi лоис Наталья Васильевнаöн, а вылын мыгöра, ён лысьöра Маша — Мария Фёдоровнаöн. Кыкнанныс юрси бердöдз ештöм ни сибавны арся пужыс. Öтiк бöрсянь мöдiк водiсö чужöм вылö чукыррез.

Вежис кадыс и челядьсö. Шыннялан кодь сера синнэза, понпутша ныра бöб зоночкаись нюжалiс вылын мыгöра зонка. И кыдз уж эз старайтчы мамыс бытшöмжыка пасьтöтны ассис зонсö, петiс эта умöля. Вывтыр сьöртi босьтöм костюмсö позис новйыны только год сьöрна. Эз кольччы сы сьöрись и рöма чужöмбана, биöн сотчан сьöд сина Галочка. Сiя тожö тэрмасис годдэз сьöртöт зорöтны ассис вывтырсö. Этасянь классiсь зонкаэз кадiсь кадö пондiсö ни дзарышавны сы вылö. А тырис эта коста челядьлö дассизим годöн. И öнi, эта годдэзö, мунны Галочкакöт ордчöн да не казявны сыын быдöс гленитчанасö Толик и ачыс эз вермы. Зонка эшö эз вежöрт быдöссö, мый керсис сыын.

Челядь сё одззамоз жö уроккез керлiсö ас коласаныс. Мукöд коста Галочка лыддьöтiс, а Толик кывзiс, видзöтiс нывкаыс вылö да шыннялiс.

— Тэ мый?

— Да нем. Усис мыйкö тöдвылам, — шыасьлiс паныт Толик. А öтпыр эта вопрос вылö жö, то ли аслыс казявтöг, то ли нарочно ни, Толик шуис:

— Любуйтча вот...

— Мыйöн?

Галочка сэтöн жö пондiс смекайтчыны öтмöдöрö, кошшыны Толиклiсь любуйтчан торсö, но некытiсь нем эз казяв.

— Мыйöн? — эшö öтпырись юалiс Галочка да веськыта дзар керыштiс Толикыс вылö. А Толик одззамоз орöттöг видзöтiс сылö паныт да чöлiс. Зонка чöлiс, но сы синнэзiсь, чуть тöдчана шыннялöмись позис вежöртны быдöс, мый эз вöв висьталöм кылöн. Галочка понда эта вöлi видзчисьтöм. Повзьыштöмсянь сылöн синнэс недыр кежö ыждiсö да вамисö. Сэсся нывкалöн перыта öзйис чужöмбаныс. Галочка жмитiс чужöм бердас осьтöм книгасö, а сэсся чепöссис местасис да уськöтчис ыбöсö. Сы вылын эта лунö и чулалiс нылöн öтласа занимайтчöм.

Öддьöн полöм петiс пантасьны ашынас. Сiйöн Галочка лöсьöтчис тэрмасьöмöн и школаас мунiс одзжык. Гортö локтiсö тожö торйын. Лунтыр нывкаыс эз мыччась пöдана ыбöс сайись. Толик öтнас пукалiс кухняын, уроккез сайын.

Чулалiс неделя. Эта кадö физикаöн да алгебраöн Галочка ештiс босьтны не öтiк двойка.

Чулалiс медбöрья год школаын. Сибöтчис тулыс, вот-вот вöтасö экзаменнэз. Школаын, уроккез коста, Галочка быд вынiсь старайтчö кывзыны велöтiсьсö, но мый эта сэтшöмыс? Сiйö юалöны, а сiя нем оз кыв. Кватитчас, сувтас, а вопроссö оз тöд, оз тöд и мый йылiсь висьтасьны.

Гортын юрö тожö нем оз пыр. Галочка быдса чассэзöн пукалö осьтöм учебниккез дорын, видзöтö букваэз вылö, а ны местын, син одзын сулалöны Толиклöн гажöна сотчан синнэс.

Сэк Галочка повзьöмувья пышшис и мыйкö дырна эз лысьт пантасьны Толиккöт. Нывкалöн полöмыс и öнi эшö досповна эз чулав. Но öтлаын этакöт пондiс зорамны желаннё пантасьны. Тöдiс Галочка, что эта вылын быдöс чулавны оз вермы, эд дружитöмыс ны коласын только пондöтчö. Галочка видзчисис, а Толик вöлi ордчöн и эз лок. Кöр ыбöс саяс кывлiс сылöн кок шыыс, нывкалöн сьöлöмыс топ кулавлiс. Полöмсянь сiя жмитчывлiс учöтик комокö и дугдывлiс пессьыны. Чужöм вылö перыта чепöссьывлiс пым да визыв вир. Но Толик петавлiс öтöрö нето пыравлiс бöр, но öтпыр эз сибöтчыв сiя ыбöс дынö, кöда сайын не кулöм не ловья видзчисис сiйö Галочка. Нывкалö пондiс кажитчыны ни, что сiя кадсянь, кöр книганас вевттисьöмöн пышшис Толик дынiсь, зонка эз понды старайтчыны пантасьны сыкöт. Эта понда сiя эз кошшы некытшöм причина, эз сибöтчы, эз кор сiйö. А сэтöн эшö уроккез — этна химическöй уравненнёэз, задачаэз да теоремаэз, кöднö Галочка и терпитны эз вермы. Медстрашнöйыс жö — экзаменнэз, кöднаöдз кад кольччис нач етша ни.

Сибöтчис рыт. Шондi югöррес öшынсис петiсö. Эстöн Галочкалö усис тöдвылас, что колö лонтны кухняись гор. Сiя чеччис учебниккез сайись да полöмöн сибöтчис ыбöсыс дынö. И ештiс только пöднассьыны ыбöсыс нывкаыс бöрын, перыта оссис мöдöрсис. Повзьöмувья Галочка кинитчис кухня ладорö, но киыс казявтöг шедiс Толикыс киö.

— Галя! Галочка! Мый тэкöт лоис?

— Нем, — негорöн шыасис паныт нывкаыс. Эстöн нiя перыта дзар керыштiсö öтамöд вылö. Нiя сулалiсö öтамöдлö паныт и некöдыс эз тöдö, мый позьö да мый колö керны одзлань. Галочка сулалiс увланьö лэдзöм синнэзöн, но быдсöн вывтырнас кылiс ас вывсис Толиклiсь синнэсö. Перыта пессис сьöлöм. Кöсичаэзö горöн вартiс пым вир. Юр пондiс бергöтчыны. Галочка недыр кежö куньыштiс синнэсö. Эта коста улын оссис ыбöс и кылiсö мамыслöн тöдса оськöввес.

Асывнас, школаö мунтöн, Толик видзчисис Галочкаöс лиснич вылын. Но нывкаыс шысеттöг перыта лэдзчис увлань. И только сэк, кöр петiсö ни öтöрöдззас, шуис:

— Кывзы, Толик, менам полöм петö ветлöтны öтлаын.

— А кöр ми тэкöт ветлöтiм торйын?

— Сiя сiдз, но öнi мылякö кажитчö, что быдöнныс быдöс йылiсь тöдöны да видзöтöны миян вылö...

Но вот экзаменнэз. Гижöм сочиненнё, сетöмöсь физика да математика. Позьö лыддьыны, что медсьöкытыс бöрын ни. Толик да Галочка талун лунтыр пукалiсö öтлаын, велöтiсö химия, а рытланяс кытчöкö öшисö син одзись.

Пемдандорас ни Наталья Васильевна петiс балкон вылö. Этасянь паськыта тыдалiс город, кöда шумитiс эта кадö аскоддьöм рытся шумöн. Уджалан кад чулалiс. Тэрмасьны отирлö öнi некытчö. Городын олiссез шоччисисö. Нiя гуляйтöм могись жагвыв ветлöтiсö öтмöдöрö лöньсьöм улицаэз кузя.

«И менам, поди, кытöнкö сэтöн жö. Кытчö сiя талун öшис?» — отирыс коласiсь нывсö смекайтiкö думайтiс Наталья Васильевна.

Медбöрья кадö Галочка нач вежсис и мывкыднас и баснинас. Нывка унажык пондiс видзöтны аслас мöдöтчан вылö, а мукöд коста дыр пукавлiс чöлöмöн да мыйкö думайтiс. Рыттэзнас Галочка дырöн эз пыравлы гортö. Сэтшöм кадö пондывлiс пессьыны мамыслöн сьöлöмыс, бытьтö кылiс мыйкö умöльö да неколанаö.

Вельдыр Наталья Васильевна смекайтiс отир коласiсь ассис нывсö, но некысь эз казяв. Медбöрын лöсьöтчис ни пырны гортö, но мый эта? Кысянькö улiсянь кылiс сэтшöм тöдса сералöм. Эта сералöмсянь ёкнитыштiс Наталья Васильевналöн сьöлöмыс. «Чöв, чöв, да эта жö Галочка». Сэтöн жö Наталья Васильевна дзар керыштiс балкон вывсянь увдöрас. Сiдз и эм.

Льöмпу да рябина коласын, лабичок вылын и былись пукалiс Галочка да эшö не öтнас. Ордчöн Галочкакöт пукалiс Толик. И пукавны бы нылö кыдз кодя морттэзлö, дак вот не. Толик öт кинас жмитöм Галочкасö косöттяс. Мöдыслöн кузь чикися басöк юрокыс куйлiс зонкалöн пельпон вылын.

Ыбöссö бöрсяняс Наталья Васильевна эз пöднав. Кыдз только позьö гусьöнжыка, кокчуннес вылын сiя уськöтчис соседкаыс дынö.

— Мария Фёдоровна! Маша, петав жö недырик кежö балкон вылас. Дзар керышт, мый зоныт керö, — то ли полöмöн, то ли дивуйтчöмöн горöтчис Наталья Васильевна да ачыс сэтöн жö иньдöтчис бöр.

Соседкаыс сьöрö петiс и Мария Фёдоровна.

— Кытöн бöра сiя мый керö?

Наталья Васильевна чöлöмöн только качыкнитiс юрнас. Öнi нiя кыкöн ни видзöтiсö асланыс челядь вылö. Но вот инькаэз веськöтчисö. Наталья Васильевна видзöтiс Мария Фёдоровна вылö, бытьтö юалiс: «Мый эта сэтшöмыс?»

— Тулыс, тулыс, Наталья Васильевна, сибöтчö. Адззан, вот и почкаэз пондiсö оссьыны.