Питю öньö да м. Лихачёв йылiсь (а. Зубов, м. Лихачёв. Бöрйöм произведеннёэз. Кудымкар, 1989) составительсянь

Коми-пермяцкöй национальнöй литератураын медодзза гижиссезнас лоисö А. Н. Зубов да М. П. Лихачёв, кöдна пондöтчисö уджавны Октябрьскöй революция бöрсянь медодзза годдэзö. Сэк кежö коми-пермяккезлö вöлi сетöм право асланыс письменность вылö, но ачыс письменностьыс, кыдз сэтшöмыс, эшö эз вöв. Вöлi коми-пермяккез олöмын аскодьöм уклад, вöлiсö история да аскодьöм жö национальнöй культура, басни (кыв), кöда вылын позис баитны. Но эта кывлöн эз вöлö азбука да грамматика, кöдна сьöртi позис бы велöтчыны гижны да лыддьöтны. Этасянь миян медодзза гижиссезлö А. Н. Зубовлö да М. П. Лихачёвлö, висьтавны мöднёж, коми-пермяцкöй литературалöн основоположниккезлö, мед пондöтны ассиныс творческöй удж, кутчыны гижны ас кыв вылын отир понда стиххез, песняэз, сказкаэз да рассказзэз, медодз ковсис думайтны, кытшöм азбукаöн сiйö керны.

Медодз вöлi примитöм миян кыв дынö öддьöнжык лöсялан «молодцовскöй» азбука, кöда вылын зорамис сiя кадö национальнöй письменность родственнöй миянкöт коми-зырянскöй йöзлöн. И ась эта азбукаын эз тырмö миян кывлö сэтшöм колана звуккез да букваэз, кыдз: дз, дж, тш, э, ф, х, ю, яда небыт знак, сы вылын 1920-й годсянь 1932 годöдз зорамис А. Н. Зубовлöн да М. П. Лихачёвлöн творчество. Сiя жö азбука сьöртi иньвенскöй диалект основа вылын 1922–1925 годдэзö А. Н. Зубовöн да М. П. Лихачёвöн вöлiсö сувтöтöмöсь неграмотнöй гырись йöз да поснит челядь понда медодзза учебниккез: «Виль ованвань» да «Выддьыны-гижны вевöтчан». Эта азбукасянь да этна учебниккезсянь пондöтчис миян национальнöй письменность. Но сiдз кыдз севернöй районнэзiсь коми йöз диалектö, кыдз и роч кылö, пырис буква Л, то вежöртана, что сытöг сувтöтöм азбука да учебниккез сьöртi Л-овöй диалекта отир велöтчыны эз вермö. Сiдзкö и примитны иньвенскöй диалекта медодзза письменностьсö литературнöй кыв местö эз позь.

Аскадö лоас казьмöтöм, что «литературнöй кыв йылiсь вопросыс обсуждайтчис коми-пермяцкöй интеллигенциялöн медодзза съезд вылын эшö 1923 годся февраль месяцö. Сэк ни эта съезд провозгласитiс право коми-пермяцкöй литературнöй кыв вылö.

Мед йитöтны öтамöд коласын кык коми-пермяцкöй диалект ^да матынсьöтны сы пыр коми кывсö рочкöт, сiя жö съезд пыртiс коми-пермяцкöй азбукаö буква Л, кöда эз вöв иньвенскöй диалектын.

Литературнöй кыв зорöтöм вылын одзланься удж пондöтчис 1925 год бöрсянь, кöр коми-пермяккезлö вöлi сетöм автономия, кык диалекта коми йöзiсь организуйтчис национальнöй округ. Сiя кадсянь коми-пермяцкöй литературнöй кыв зорöтöмын пондöтчис мöдiк этап.

1926–1927 годдэзö А. Н. Зубов да М. П. Лихачёв вуджисö асланыс творчествоын öтлаöтöм диалекттэза кыв вылö, кöдаö, кыдз и коми-зырянскöйö, лоис пыртöм буква Л. Эта жö öтлаöтöм диалекта кыв сьöртi пондöтчис нылöн удж виль учебниккез сувтöтöм вылын.

1928 годö «Центриздат» лэдзис виль коми-пермяцкöй азбука, авторнас кöдалöн вöлi М. П. Лихачёв. Сiя жö годсянь А. Н. Зубовлöн да М. П. Лихачёвлöн пондiсö петны виль азбука сьöртi сувтöтöм велöтчан книгаэз: А. Н. Зубовлöн — «Коми грамматика» 1928 годö; М. П. Лихачёвлöн — «Виль оланлань» (гыриссез понда букварь) 1929 годö; С. Ф. Зубовлöн öтлаын М. П. Лихачёвкöт — «Мича асыв» (челядь понда лыддьöтны велöтчан) 1931 годö.

Эта жö öтлаöтöм диалекта кыв вылын А. Н. Зубов да М. П. Лихачёв нуöтiсö одзлань и ассиныс литературнöй творчество: гижисö стиххез, песняэз да рассказзэз кыдз гырись лыддьöтiсь, сiдз и велöтчись челядь понда. Уна ны гижöмись нiя жö годдэзö пырис велöтан материал туйö виль учебниккезö. Часто нiя печатайтiсö ассиныс виль стиххез, рассказзэз да поэмаэз сiя годдэзся окружнöй газета «Гöрись» да коми журнал «Ордым» страницаэз вылын. Петавлiсö нылöн произведеннёэз и торья сборниккезöн Москваын, кыдз А. Н. Зубовлöн «Öнджа», а М. П. Лихачёвлöн челядь понда «Пионер», «Челядьлö», «Медодзза петассэз» да мöдiккез, кöднö лэдзлiс «Центриздат».

1932 годö М. П. Лихачёвöн сувтöтöм азбука, а öтлаын этакöт и быдöс учебниккез вежсьылiсö латинизированнöйез вылö, а 1938 годсянь нiя вöлись вöлiсö сувтöтöмöсь роч основа вылын, кöдна сьöртi ми велöтчам гижны да лыддьöтны ас кыв вылын талунöдз. Но национальнöй литературнöй письменность да национальнöй жö литература пондöтчисö йывны М. П. Лихачёвöн сувтöтöм азбука сьöртi. Сы сьöртi жö вöлiсö сувтöтöмöсь медодзза национальнöй учебниккез, кöдна отсöтöн велöтчис гижны да лыддьöтны быдöс пöрись и том йöз. Ны отсöтöн 1932 год кежö вöлi ликвидируйтöм коми отир коласын неграмотность. Сiдзкö, ог сорасьö висьтавны, что М. П. Лихачёв да А. Н. Зубов лоисö основоположниккезöн не только национальнöй литературалöн, но медодз национальнöй письменностьлöн. Этö нiя зорöтiсö да сетiсö ас отирлö мам кыв, кыдз донася-дона козин, кöда сьöртi велöтчö лыддьöтны, гижны да вежöртны асьсö коми мулöн гражданинöн не öтiк поколеннёись ни быд морт. Öтiк этöн А. Н. Зубов да М. П. Лихачёв колисö ас бöрсянь ыджыт да тöдчана след, керöм уджöн шедтiсö право кольччыны пыр кежö ас отир тöдвылын.

Сэтшöм жö дона быдöс коми йöз понда и керöм нылöн творческöй удж: гижöм стиххез, песняэз, поэмаэз, рассказзэз да М П. Лихачёвлöн коми-пермяцкöй литератураын медодзза роман «Менам зон».

Öддьöн зубыт да сьöкыт сьöлöм вылын сысянь, что миян национальнöй письменность да литература пондöтiссезлö, сэтшöм талантливöй коми зоннэзлö, кытшöмöн вöлiсö А. Н. Зубов да М. П. Лихачёв, эз усь овны сымда, мымда нылö вöлi сетöм мам-природаöн. Кытшöм югыт мечтаэз, кытшöм ыджыт творческöй планнэз сiдз кертöг и кольччисö. А что вöлiсö А. Н. Зубов да М. П. Лихачёв и былись талантливöй морттэзöн, эта йылiсь баитсьö не только талун, уна год бöртi, эта йылiсь баитсис сэк ни, кöр нiя вöлiсö эшö ловьяöсь. 1936 годся коми-зырянскöй антологияö «Пармаын», кöдö лэдзис роч кыв вылын «Гослитиздат», вöлiсö пыртöмöсь произведеннёэс и миян литератураись основоположниккезлöн. А эта сборниклöн составительыс А. А. Попов аслас вступительнöй статьяын А. Н. Зубов да М. П. Лихачёв творчество йылiсь гижö: «Ордчöн Коми областькöт Коми округын сiдз жö эмöсь аслас поэттэз да прозаиккез. Колö висьтавны, что Коми округись поэттэз асланыс поэтическöй мастерствоöн сулалöны вылынжыка унажык поэттэзся Коми областись В. Т. Чисталёв да В. А. Савин бöрсянь» ^1. А одзлань, М. П. Лихачёв вылö сетöм биографическöй справкаын сiя жö А. А. Попов гижö: «Öддьöн плодовитöй да талантливöй поэт и прозаик»^2.

Творчестволöн медвынöн цветитан годдэзö, кöр А. Н. Зубовлö да М. П. Лихачёвлö эз вöв эшö и нёльдас годöн, сталинскöй репрессия, кöда, кыдз чума, паськалiс омöн Союз пасьта, сiсьтiс да пöдтiс ловья вывтi, вийис да джагöтiс государстволiсь: армияись, наукаись, искусствоись да культураись медсöстöм, меддона да медодзын мунан вын, эз ордйы сiя и миян письменностьлiсь да литературалiсь основоположниккесö. 1937 годö, кыдз А. Н. Зубов, сiдз и М. П. Лихачёв вöлiсö нетшкöвтöмöсь асланыс творческöй удж да олан бердiсь, а быдöс ныöн сы вотöдз керöмыс — пöртöм шойö.

Кыкнан гижисьлöн дженытика сувтöтöм биографическöй очерккез сьöртi примитöм лыддьыны, что кулiсö нiя 1945 годö. Но кыдз эта условнöй датаыс, кöда пытшкын годлöн даскык месяц, или 365 лун да ой, сiдз и нылöн «кулöмыс» висьтавны бытшöма да достовернöя истина йылiсь некыдз оз вермö. Эта увья сiя öнöдз эшö примитсьö дзир условность местö. А мед тöдны бытшöма ны усьöмлiсь истина, колö эта понда эшö уджавны: кошшыны да адззыны. Репрессия годдэзö не А. Н. Зубов, не М. П. Лихачёв творчествоись нем эз петав. Эта «пöданыс» кыссис кыкдас год сьöрна, 1958 годся реабилитация вотöдз.

50-й да 60-й годдэзö Коми-Пермяцкöй книжнöй издательствоын юралiссезнас лоисö нiя неунаыс, кöднö ордйис кыдзкö сьöкыт репрессия кад да колис ловйöн не кокнитжык этася Великöй Отечественнöй война, кöдна олiсö ассиныс том каднысö основоположниккескöт öткоста да öтлаын, пантасьлiсö ныкöт öтласа уджын, адззывлiсö нiйö ас синöн, кывзiсö нылiсь баснисö ас пельöн, керисö асланыс творчествоын медодзза оськöввесö А. Н. Зубов да М. П. Лихачёв опыт вылын. Сiйöн 1959 годö Н. В. Попов составительство увтын Коми-Пермяцкöй книжнöй издательство лэдзис М. П. Лихачёвлiсь бöрйöм произведеннёэз, кытчö пырисö: стихотвореннё «Межатöм ыб дорын», поэма «Козинтöг», повесть «Виль туйöт» да медодзза эшö сiя кадö роман «Менам зон».

1963 годö (а позис бы и одзжык) С. И. Караваев составительство увтын петiсö А. Н. Зубовлöн бöрйöм произведеннёэз «Питю Öньö», кытчö вöлiсö пыртöмöсь дзир квать стих да песня, куима быдсöн да öтiк торрезöн — поэмаэз.

Кыдз гижис С. И. Караваев Питю Öньö творчество йылiсь биографическöй очеркын, А.  Н.  Зубов бытшöма тöдiс коми-пермяцкöй йöзлiсь устнöй поэтическöй творчество. Андрей Никифорович творчествокöт тöдсасьöм бöртi веритны этаö абу сьöкыт, сiдз кыдз сылöн основаыс öддьöнжыксö народнöй фольклорись и эм. А этасянь и поэт да сы творчество дынö коми йöз ладорсянь сы ыжда признаннёыс, сiйö радейтöмыс да лыддьöтöмыс. Öнöдз эшö эз вун тöдвылiсь сiя впечатленнёыс, кöдö колис меным шестидесятöй годдэзся öтiк концерт. Кинотеатр «Пролетарий» сцена вылын выступайтiс Верх-Юсьвинскöй самодеятельнöй коллектив: сьылiсö, йöктiсö, танцуйтiсö. Кытшöмкö номеррезын эта петiс буржыка, кытöнкö — умöльжыка. Сiя жö вöлi и залын. Кинкö кывзiс да видзöтiс, а кинкö и суналiс. Но вот сцена вылас мыччисис шöрöт годдэзся, визыв эшö, боевöй наградаэзсянь югыта сотчан мороса учитель-фронтовик, ыджыт юморöн, бытшöма сувтöтöм голосöн, чожвыв да выразительнöя, тöдчана артистическöй мастерствоöн пондöтiс: «Олат-вылат, комиэз». Залыс лолавнытö дугдiс. Быдöнныс видзöтiсö осьта öммезöн да югмöм синнэзöн лыддьöтiсь ладорö, мед не лэдзны бокö öтiк кыв. А кöр лыддьöтiсьыс лöньсис, залыс пöдiс гымалан аплодисменттэзсянь, корис лыддьöтны эшö öтпырись. Сэтшöм явленнёэс миян гижöм вылö овлöны не öддьöн часто, сiйöн и кольччöны тöдвылын пыр кежö.

Не сiйöн я А. Н. Зубовлöн ученическöй тетрадь кызышта поэтическöй сборникыс, кöдалöн лист да джын ыжда объёмыс вöлi тöрöтöм нёльдас страница коласö, книжнöй магазиннэзсис чожа петiс, незьдiс лыддьöтiсь йöз коласын.

М. П. Лихачёвлöн роман «Менам зон» вöлi вуджöтöм роч кыв вылö и 1962 годö петавлiс Пермскöй книжнöй издательствоын. 1969 годö одзза изданнё сьöртi А. Н. Зубовлöн поэзия мöдöтпырись вöлi лэдзöм Коми-Пермяцкöй отделеннёын. Одзза изданнёись дас стих да поэма дынö В. В. Климов отсöтöн вöлiсö содтöмöсь эшö öтiк стих да песня.

Кыдз ми тöдам, не А. Н. Зубов, не М. П. Лихачёв сэк кежö ловьяöсь эз ни вöлö. Но коми йöзыс вöлi ловья. Пöрисьжык отир коласiсь уна эшö позис пантавны нiйö, кöдна тöдiсö миян письменностьлiсь да литературалiсь основоположниккесö ловйöн да видзисö тöдвылын быдсöн нылiсь творчество, кöда локтiс ны дынö эшö репрессия периодöдз. Несьöкыт вöлi казявны да вежöртны, что 1958 год бöрсянь лэдзöм книгаэзын А. Н. Зубовлöн да М. П. Лихачёвлöн творческöй наследие вайöтöм лыддьöтiсь коми йöз дынö ылын не быдсöн. Öддьöн бытшöма тöдiсö эта йылiсь и сiя кадся издателлез. Думайтсис бы: мед не кольччыны долгын асланым письменность да литературалöн основоположниккез одзын, нiйö асьнысö да нылiсь керöм удж уважайтöм могись, издательствоын уджалiсь преемниккез пуктасö быдöс вын, мед одзланься изданнёэзын кыдз позьö тырöнжык вайöтны лыддьöтiсь дынöдз нылiсь творческöй наследие. Колiс чукöртны öтлаö быдöс сiйö, мый петавлiс репрессия вотöдз Московскöй, Коми да Коми-Пермяцкöй книжнöй издательствоэзын, а öтлаын и сiйö, мый эта вотöдз эшö некытöн эз вöв печатайтöм, но кыдзкö вермис кольччыны дзоньöн. Но...

Чулалiсö год бöрын год, нельки!.. (проститчас я кöркö сэтшöмыс?) десятилетие бöрын десятилетие, а колана уджыс сiдз и эз вöв керöм. Ло сiя керöм аскадö, тöдчöмöн вермис бы паськöтны да богатсьöтны миянлiсь öнöдз эшö абутöм кодь национальнöй литература. Но уджыс кольччис кертöг. Эз вöв сiя керöм А. Н. Зубовлöн да М. П. Лихачёвлöн не сизимдас, не кыкьямысдасгодся юбилейез кежö. Висьтассяс унажык. Сэтшöм значительнöй датаэз кежö книжнöй издательстволöн Коми-Пермяцкöй отделеннё эз лэдзлы некöдалiсь нельки сiйö неунасö, кöда петавлiс шестидесятöй годдэзö да пыр вöлi ки увтын. И этö сiя кадö, кöр вит книгаыс местö год сьöрна Коми-Пермяцкöй отделеннё лэдзавлiс кыкöн да куимöн. Нельки сэк основоположниккез творческöй наследиелö лыддьöтiсь йöз дынöдз туй издательство пыр вöлi сё эшö пöдана.

Сэтшöм неблаговиднöй положеннёсö (мед проститчас авторлö истина да справедливость увья веськыта горöтчöм кыв) да литературалöн основоположниккез дынö неблагодарнöй отношеннёсö колiс кыдзкö да мыйöнкö сайöвтны. Эта увья эшö 60-й годдэзся издателлезöн вöлi лöсьöтöм (бордсьöтöм да лэдзöм) мненнё, бытьтö А. Н. Зубов да М. П. Лихачёв творческöй наследиеын нем буржыкыс одзза лэдзöмся оз ни адззись. А сiя неунаыс, кöда абу пыртöм быдсöн öтлаын бöрйöм произведеннёэзкöт, сэтшöм несовершеннöй аслас художественность сьöртi да сквернöй аслас содержаннёöн, что лыддьöтiсь дынöдз сiйö буржык и не сибöтны.

Колö висьтавны, что баитсьö эстöн А. Н. Зубовлöн нач не нiя произведеннёэз йылiсь, кöдна асланыс «сквернöй» содержаннё увья некöр эшö эз адззывлö свет, эз сибавлö асланыс лыддьöтiсь дынöдз. Сэтшöммес сы творческöй наследиеын талуння виöдз кытчöдз эз на пантасьлö. Басниыс медодз мунö стихотвореннё «Проповедь» да поэма «Олат-вылат, комиэз» йылiсь, кöдна 1963 да 1969 годдэзся изданнёэзын вöлiсö сетöмöсь джендöтöмöн, но кöдна вöлiсö печатайтöмöсь быдсöн эшö ловья автор дырни. Висьталöмыслö подтвержденнёнас — А. Н. Зубовлöн поэтическöй сборник «Öнджа», кöда петавлiс 1929 годö Москваын. Сэк эта сборникö касьтылöм произведеннёэс вöлiсö пыртöмöсь быдсöн, медодзза строкасянь медбöрьяöдз. Сэксянь и öння кадöдз, джын векся унажык ни, этна кык произведеннёыс кольччöны лыддьöтiсь коми йöз коласын самöй популярнöйезöн. Сэксянь и öнöдз отирыс видзö нiйö ас тöдвылын и сiдз вуджöтö поколеннёись поколеннёö. Эшö миян луннэзö позьö пантавны пöрисьжык йöз коласiсь нiйö, кöдна этнö произведеннёэсö тöдöны наизусть медодзза строкасянь медбöрьяöдз, а нылiсь торресö позьö кывны отир басниись быд лун да быд пельöсын омöн округ пасьта. Мед лыддьöтiсь эз лыддьы авторлiсь кыввесö бöбöтчöм туйö, вайöта эшö öтiк пример. Олö Кочёвскöй районiсь Пелым деревняын нылочка Петрова Люда. Сiя ветлö начальнöй школаö да участвуйтö школьнöй самодеятельностьын. А неылын Кудымкар дынсянь, Мижуевскöй сельсоветiсь Чукыль деревняын олö Людалöн дед Лесников В. И., кöда эшö томсянь тöдö уна стиххез да сказкаэз. Дедыс дынын гöститтöн нылочка кывзiс сылiсь висьтасьöм. А медгленитчан стихотвореннёыс, кöдö висьтасис дедыс, сiдз быдсöн нылочка тöдвылын и кольччис. Сёрöнжык этöн стихотвореннёнас Петрова босьтiс первöй места не только школьнöй, но и районнöй смотр вылын. Сiйöн жö сюрлiс и окружнöй вылö. А öнi кольччö висьтавны, что стихотвореннёыс шусьö «Талун масленича». Авторыс — А. Н. Зубов. Одзланься комментарийес, кыдз баитсьö, оз колö, не казьмöтны кö, что и эта стихотвореннёыс витдасгодся дыржык ни эз адззыв туй аслас лыддьöтiсь дынöдз. Кыдз не усьны эта бöрсянь тöдвылö бессмертнöй грибоедовскöй строкаэзлö: «А судьяэс киннэз?..»

Мый висьтассяс стихотвореннё «Проповедь» да поэма «Олат-вылат, комиэз» йылiсь, дак 60-й годдэзся составителлез да издателлез сюрöтiсö нiйö «сквернöйез» разрядö сатирическöй да обличительнöй характер увья, кöда «мыйсянькö» нельки нылö эз гленитчы. Не 1963, не 1969 годдэзся изданнёэзö быдсöн нiя пыртöмöсь эз вöлö.

Вывланьын висьталöм причинаэз увья эта книгаыс, кöдö талун видзö киас лыддьöтiсь локтiс сы дынöдз öддьöн сёрмöмöн. Этадз сылö колiс петны дас нето кыкдас годöн одзжык. И шогмы эта былись сэк, да ло керöм ныöн, кöднö обязывайтiс этаö кыдз гражданскöй да профессиональнöй, сiдз и товарищескöй долг, колö думайтны, что эта книгаыс вермис бы лоны унаöн буржыкöн, паськытжыкöн да тыражыкöн. Но кыдз вылынжык вöлi висьталöм ни, А. Н. Зубовöс да М. П. Лихачёвöс тöдiсь ёрттэзöн эта колана уджыс керöм эз вöв. Этасянь сборниксö ковсис öктыны унаöн томжыклö, кöдалö вöвны тöдсаöн национальнöй литературалöн основоположниккезкöт эз ни усь. Сэтчö жö составительыс не иньвенскöй, а косинскöй отир коласiсь, мый, натьтö, кыдзкö тожö пондас тöдчыны сы уджын.

1989 годын öтiклö национальнöй письменность да литературалöн основоположниккез коласiсь, А. Н. Зубовлö, тырö чужан лунсянь öкмысдас год. Сiдзкö, эта öтласа сборникыс лоö сы понда юбилейнöйöн. И ежели вöлi мыйкö составительыс уджын, дак медодз öтiк желаннё, мед кыдз позьö тырöнжык чукöртны эта сборникö лыддьöтiсь понда кыдз А. Н. Зубовлiсь, сiдз и М. П. Лихачёвлiсь творческöй наследие.

Унажыкыс ны гижöмись вöлi печатайтöм кыдз торья сборниккезын, сiдз и периодическöй печатьын эшö репрессия период вотöдз. Эта йылiсь висьтассьö ны биографическöй очерккезын. Сiдзкö, надейтчынытö бытшöмжыксö сэкся изданнёэз вылö и колiс. Быдöнныс коласiсь öддьöнжыксö интересуйтiсö А. Н. Зубовлöн торья поэтическöй сборник «Öнджа» да М. П. Лихачёвлöн сэтшöм жö «Медодзза петассэз», сiдз кыдз мöдiккезся нiя петiсö сёрöнжык и вермисö лоны одззаэсся тыражыкöн. Жаль только, что 60-й годдэзся составителлез да издателлез библиотекаын талун кежö этна медколана сборниккес кытшöмкö невежöртана причинаэз увья «эз ни адззисьö». Эз вöлö нiя и окружнöй краеведческöй музейын, но... Кыдз баитсьö — бур отирыстöг оланыс оз овлы. Адззисис морт, кöдалö отсöтыс понда благодарнöй не только составитель. Думайта, что эта книга петöм бöрсянь сылö сiдз жö лоас благодарнöй быд лыддьöтiсь, кöдналö сьöлöмви дона миян литератураись основоположниккезлöн творчество, кöда сетö гаж да долыт истоккезкöт пантасьöмсянь.

Верх-Иньвенскöй шöрöт школаись роч да коми кыв сьöртi велöтiсь Лия Константиновна Сысолетина А. Н. Зубовлiсь да М. П. Лихачёвлiсь творчествосö, кыдз аслас земляккезлiсь, радейтiс эшö учöтсянь. А 1950 годдэзö сiя лоис Пермскöй государственнöй педагогическöй институтiсь студенткаöн. Институтас велöтчытöн Лия Константиновна часто ветлывлiс занимайтчыны Горький нима областнöй библиотекаö. Сэтчин сiя и адззис коми-пермяцкöй литературалöн основоположниккезлiсь этнö колана соорниккесö — «Öнджа» да «Медодзза петассэз». Любознательнöй студентка не только тöдсасис ныкöт, но адззис кад да мыла, мед коркасянь коркаöдз гижны этна сборниккезö пыртöм стиххесö да поэмаэсö аслас тетрадьö, кöда кольччис овны öтлаын Лия Константиновнакöт öння кадöдз.

1987 годö, кöр эта сборникыс лоис пыртöм издательскöй планö, юасьöм да кошшисьöм пантöтiс миянöс эта благороднöй морткöт да сы тетрадькöт, кытöн видзчисисö ассиныс кад сэтшöм дона да колана талун кежö кык поэтическöй сборник: А. Н. Зубовлöн «Öнджа» да М. П. Лихачёвлöн «Медодзза петассэз».

А. Н. Зубовлöн творческöй наследиеись унажык произведеннёэс «Öнджа» сборникись эта книгаö и пыртöмöсь. Öтлаын ныкöт мымдакö пырисö и нiя стиххез да песняэз, кöдна адззисисö эта кад кежö сборникын «Горадзуль», учебникын «Виль олан» да 1927–1929 годдэзся «Гöрись» газета страницаэз вылын.

Первуись нёльдас вит год сьöрна А. Н. Зубовöс вийöм бöрсянь да öкмысдас годся юбилей кежö сы творческöй наследиеись эта сборникын чукöртöмöсь нёль разделö нёльдас сизим стихотвореннё, песня да поэма, кöдна, надейтча, сетасö лыддьöтiсьлö пыдынжык да паськытжык представленнё сы творчество йылiсь. Но оз ков думайтны, бытьтö А. Н. Зубовлöн творческöй наследие эта вылын быдöс чукöртöм ни и керны эстöн одзлань нем. Буржык лоас висьтавны, что талун эта уджыс вöлись пондöтчö. Эта сборникö сюрöтöм произведеннёэс — медодзза попытка чукöртны сылiсь гижöмсö быдсöн öтлаö. Öнöдз эшö кольччöны видзöттöг Коми АССР-ись журналлэз «Ордым» да «Ударник», кöдна страницаэз вылын 1920–1930 годдэзö часто печатайтiсö ассиныс произведеннёэсö кыдз М. П. Лихачёв, сiдз и А. Н. Зубов. Не быд годсяöсь дзоньöн кольччисö талун кежö сiя кадся «Гöрись» газеталöн подшивкаэз, кöда страницаэз вылын публикуйтчис медодз быдöс вились гижöмыс. Эз пырö эта сборникö А. Н. Зубовлöн и коми йöз коласiсь öктöм да гижöм сказкаэз, кöднö 1935 годö лэдзлiс торья книжкаöн Коми-Пермяцкöй книжнöй издательство.

А. Н. Зубовлöн биографическöй очеркын (Питю Öньö, 1963–1969 гг.) С. И. Караваев гижö: «Уджалiс Андрей Никифорович и драматургияын. 1935 годö гижис пьеса «Пемыт ой пырйöт», кöдаын мыччалiс коми-пермяккезлiсь важся сьöкыт олан. Эта пьесаыс вöлi сувтöтöм Кудымкарскöй театр сцена вылын, а 1937 годö(курсивыс составительлöн — Т. Ф.) Свердловскын уральскöй народдэзлöн олимпиада коста». Сiдзкö, колö думайтны, что быдöс вывланьын висьталöмысся А. Н. Зубов лоö эшö основоположникöн и миян национальнöй драматургиялöн. Жаль только, что мымда бы ми талун эг юасьö да эг кошшисьö, А. Н. Зубовлöн пьеса «Пемыт ой пырйöт» кытчöдз эз адззись. Но удж эта вылын оз сувт. И пондыны кö нуöтны сiйö одзлань, колö думайтны, что А. Н. Зубовлöн творческöй наследиеись позяс пантавны эшö уна интереснöйö да коланаö.

Оз позь ордйыны, не висьтавны кыв-мöд А. Н. Зубовлöн öтiк неыджыт стихотвореннё йылiсь, кöда пыртöм эта сборникö сы рукописнöй папкаись и, колö думайтны, публикуйтсьö первуись. Шусьö стихотвореннёыс «Овсьöма». Уна йылiсь да веськыта юöртö сылöн названнёыс. А вежöртны кö эшö бытшöма сылiсь содержаннёсö, оланiсь «неизбежность» одзын курыт шогсö да обидасö, лöнь мужествосö, достоинствосö да öткаса мам понда тöждiсьöмсö, позьö висьтавны, что поэтлöн эта стихотвореннёыс медбöрья прощальнöй кыв, кöдö эз вермы пöдтыны да шойсьöтны «чим гöрд быгöн лэбöм» кад, и кöда локтiс талун миян дынöдз.

Быд ладорсянь стихотвореннёсö видзöтöм бöрсянь позьö уна баитны сы достоинствоэз да значеннё йылiсь. Пондам надейтчыны, что этö керасö критика да миян лыддьöтiссез. Ме жö, ог кö сорась, висьтала эстöн дзир öтiкö: ылöснас и сьöлöмнас поэт одзлань ни кылö, мый видзчисьö сiйö ашын. И ась не веськыта, но косвеннöя юöртö аслас потомоккезлö сэкся атмосфера йылiсь:

...Саридзыс пö пизьöма,

Чим гöрд быгöн лэбöма.

Мый баитсяс М. П. Лихачёвлöн творческöй наследие йылiсь, дак колö юöртны, что положеннёыс эстöн тöдчöмöн буржык. Романся «Менам зон», повесться «Виль туйöт», поэмася «Козинтöг» да стихотвореннёся «Межатöм ыб дорын», кöдна петавлiсö куимдас годöн одзжык (М. П. Лихачёв. Бöрйöм произведеннёэз. Кудымкар, 1959) эта сборникö пыртöмöсь быдса цикл стиххез, кöднаись вöлi сувтöтöм поэтическöй сборник «Медодзза петассэз» (Москва, Центриздат, 1930). Пыртöмöсь öтлаö кынымкö стихотвореннё и челядь понда сборникись «Пионер» (Москва, Центриздат, 1929) да М. П. Лихачёвлöн мукöд учебниккезiсь. Но быдöс этася видзчисьöны лыддьöтiсь дынö ассиныс туй да кад стиххезöн да поэмаэзöн сэтшöм сборниккез, кыдз: «Челядьлö» (ОГИЗ, Молодая гвардия, Москва, 1933), «Пионер» (Центриздат, Москва, 1929), «Учöтик ударниккез» (Центриздат, Москва, 1931), «Межатöм ыб дорын» (ГИХЛ, Москва, 1932), «Быдмам и ёнмам» (Окриздат, Кудымкар, 1932), «Челядь садын» (Окриздат, Кудымкар, 1934), а сiдз жö газета «Гöрись» страницаэз вылын печатайтöм рассказзэз: «Делегатка», «Гöрд дöрапас», «Пельöс сайсянь» да мöдiккез. Но и эта вылын М. II. Лихачёв творческöй наследиеын сувтчыны тожö оз позь. Сiдз жö, кыдз и А. Н. Зубовлöн, сылöн адззисяс öтi-мöдi «Ордым» да «Ударник» журналлэзын, «Дзульзян кай» да «Горадзуль» сборниккезын.

Дас год бöртi (1999-йö) А. Н. Зубовлö, даскык бöртi (2001-йö) М. П. Лихачёвлö — пондас тырны 100 годöн ны чужан лунсянь. Быдöс коми йöз понда этна датаэс лоасö гырись да знаменательнöй событиеэзöн.

Издательстволöн Коми-Пермяцкöй отделеннё öнiсянь ни думайтö сы вылын, кыдз этна вековöй юбилейез кежö лöсьöтöм торья книгаэзын эшö öнняся тырöнжык да паськытжыка вермыны мыччыны лыддьöтiсьлö миян национальнöй письменностьлöн да литературалöн основоположниккезлiсь творческöй наследие. И вöлi бы öддьöн бур, отсалiсö кöбы и советöн, и делоöн керны этö уджсö буржыка миян лыддьöтiссез, медодз пöрисьжык отир. Адззисясö эшö, натьтö, мымдакö нiя, кöдналö усис овны А. Н. Зубовкöт да М. П. Лихачёвкöт öтiк кадö, кöдна тöдiсö нiйö ловйöн, не только кывлiсö ны йылiсь, но сiдз ли, этадз ли усьлiс пантасьлыны, тöдсасьны, кывзыны нылiсь сёрни, орсöм, сьылöм. И вöлi бы öддьöн бур, пантасисö кöбы издательскöй почтаын А. Н. Зубов да М. П. Лихачёв йылiсь этна воспоминаннёэз, кöдна одзлань вермисö бы пырны ны йылiсь книгаэзö.

А. Н. Зубовлöн да М. П. Лихачёвлöн произведеннёэз сетсьöны эта книгаын вежтöг, кыдз печатайтсисö тридцатöй годдэзö.