Глава VIII

Не ашынас, кыдз перво жö думайтiс Таисья, не лун кыным бöртi некытшöм юöр зоотехникöс фермаись «вашöтöм» йылiсь и эз кывсьы. Но думайтны эта йылiсь нывка эз дугды. Эз думайтсьы дзир сы йылiсь, что обязательствоэзiсь откажитчöмöн сiя пондöтiс пессьöмсö не сiдз зоотехниккöт, кыдз медодз быдсöн правленнёкöт. Эз тöд Таисья и сiйö, что сы ытшкисьöм йылiсь, — а ытшкисис нывка лунiсь лун быдса неделя сьöрна, — правленнёас кывсис ни. Эд сайласис кö сiя отир син шогья, дак дзир лопатитчытöн. Сайласьны кинкö шогья ытшкисьтöн сылöн и дума эз вöв. Да и колiс я, ытшкис кö Таисья тшыг колхознöй куканнез понда колхознöй видз? Ытшкисьтöнняс сiя дзир сымда и керис — тэрмасис. А тэрмасьтöнняс эз и казяв, кыдз кытшöмкö рытö неылi сы дынöт видзсö поперегалiс бригадир, бертiс ытшкисян-куртансянь.

Сiя асылö, кöр куканнес сьöрö жагвыв оськавтöн Таисья сибöтчис правленнё весьтöдз, сэтчинсянь сылö паныт петiс зоотехник.

— Таисья! Сулав жö!

Мый дивуйтiс нывкаöс этна кыввезын, дак сiя, что лöгыс да обидаыс ныын эз ни кылö. Таисья сувтiс. Мöдыс сибöтчис зэв, здоровайтчис, юалiс:

— Вашöтан жагвыв? — öвтыштiс юрнас куканнес ладорö.

— Вашöта тай.

— Эн на вунöт заседаннёыс йылiсь, казьмöтi сэки да?

— Эг. А мый? — дженытика и шыасис паныт, и юалiс нывкаыс.

— Да нем. Предыс тай тэнö тожö тшöктiс корны.

И вились эта голосын, кыдз и чужöм вылас да синнэзас, не лöг некытшöм, не обида казявны эз позь. Но и причинасö, мыйлö колiс Таисьялö лоны заседаннё вылын, зоотехник одзлань тожö эз юöрт. А юасьны эта йылiсь да эшö правленнё одзын сулавтöн, нывкалö вöлi недолыт. Да и керны сылö сымдасö некöр: куканнес мунiсö öтнаныс, кольлавтöг ештасö кытчöкö и кежны.

«Пондöтчö, тыдалö». Не öддьöн рам синнэзöн Таисья нёджжöвтыштiс зоотехник ладорö. «Норасит, сiдзкö?»

— Позяс и вовлыны, — чöлыштöм бöрсянь эшö: — Ешта дак...

— Обязательно, Таисья. Эн вунöт, пожалуйста.

— Но, — охотатöг шыасис нывка, оськöвтiс куканнез сьöрö.

Погоддяыс сулалiс жарся-жар. Куканнез нерадсялiсö эшö павжун вотöдз. Этасянь бытшöма дöнзис и Таисьялö. Нывка вынсьöтчис видзны нiйö вöр коласiсь неыджыт видзоккез да турунажык кулижкаэз вылын. Но сэтшöм местаэзö эз сибав некытшöм тöлок. А лöдззес, кöдна быдса кымöрöн ветлiсö куканнез гöгöр, сiдз пышналiсö, что некытшöм спасеннё нысянь эз вöв. Лунтырнас туруныс бердö куканнез кодьöн эз и мышкыртчылö, сiйö и керисö, видзöтiсö, кыдз бы заргисьны пыдöжык ыркыт да тшöк бадьтальникö. А усьлiс кö нылö мунны ыббез вылöдз, этасянь, кыдз вермисö, тэрмасисö горт ладорö. Видзöтлытöг нiйö и минута сьöрна видзны эз позь.

Рытъявылас куканнез кытшöвтiсö Логсай муэз. Этасянь Таисья бергöтiс нiйö гортлань. Лунся жарыс сэк тöдчöмöн чинiс ни. Нывкалö думайтсис, что нiя пондасö локны йирсьытöн. Но сы нёж эз пет. Кыдз только куканнез вежöртiсö, что бергöтчисö гортлань, кок увтаныс сэсся эз ни мышкыртчылö. Час сьöрна табуныс локтiс Шöрдзиб лог дорöдз. Горш косьман увья эстöн нiя мыйкö дырна и бергалiсö. А одзлань, дзик чушкалöмöсь, рознитчисö ыб пасьта, одзасьöмöн уськöтчисö воротаэз ладорö. Не кытшöвтны, не панöвтны нiйö эстöн эз ни позь. Кольччис öтiк — даскыным учöтжык куканькöт вöтчыны сьöраныс.

Гортын куканнез быдöнныс чукöртчисö карта пытшкö, и керны нывкалö кольччис нем, кыдз вились кутчисьны литовка бердö да ытшкыны, мед не кольны нiйö тшыгйöн ойбыт кежö.

Сiя рытö, эшö турунсö пыртлытöдз, Таисья недырик кежö котрасьлiс гортас, мед аскадö меститны пода. А кöр бертiс бöр, кутчисис медсьöкыт удж бердö. Но талун нывка кыдзкö казялiс осьтны карта весьтiсь завор: вуджöтлыны турун ношаэсö йöр омöн эз ковсьы.

Лунтырся бергалöм коста зоотехниклö асывся кöсйисьöмыс Таисья юрись кыдзкö нач петiс. Усис эта сылö тöдвылас сэк, кöр рытся уджыс быдöс вöлi керöм ни, кольччис мунны гортö. Сэк вöлись нывка и иньдöтчис правленнё ладорö.

Председатель кабинетын сотчис би: кынымкö öшын пытшксяняс вöлiсö югдöтöмöсь.

«Сёрми, тыдалö. Мый меным öнi эта понда висьталасö?» Полöмöнкодь, кокшытöг Таисья кайис поспуэз кузя, оськöвтiс порог. Председатель кабинетiсь ыбöс вöлi осьта. И кöр нывка казялiс сы пызаннэз сайись отирöс, öшис кодь, мый керны одзлань, эз тöд.

— А, Таисья? — дивуйтчыштiс председатель. Быдöнныс лöньсисö. — Но лок матöжык, пырин дак. Пуксьы вот пызан саяс, — председатель мыччалiс кинас простöй стул вылö. — Висьтась, кыдз уджассьö.

Öнi, кöр Таисья сюрис югытiнас, вöлись казялiс, что правленнёас пырис уджалан паськöмöн. Одзжык эта йылiсь кыдзкö эз думайтсьы, а часöт лоис недолыт. Но воштiсьны вöлi некытчö. Не сiдз неважынся полöмыссянь, кыдз аслас паськöм увья недолытсянь синнэсö вывлань лэбтытöг, нывка сибöтчис пызан дынöдз, пуксьыштiс стул пельöс вылö, полöмöн нёджжöвтыштiс ас гöгöр.

Öтöрланьын сы дынсянь пукалiсö зоотехник да вердöм пороз кодь ён, öшалан тшöкаа, эшö öддьöнжык öшöтчöм кынöма фермаись заведующöй Иван Фролович, кöда, киэзнас кынöмсö асыкалöмöн, сiйö и керис ерзулитiс местаас, топ сiйö увдöрсяняс кинкö петшöралiс. Сы сайын, матынжык председатель дынö, то ли гижис, то ли рисуйтiс мыйкö одзас паськöтöм блокнотö куимдас год гöгöрся, пемыт синлыссэз увтын пемыт жö сина, кузьмöса чужöма колхознöй агроном Степан Васильевич. Мöдöрланьын пукалiсö мöдiк бригадаись бригадиррез да эшö öтiк фермаись заведующöй, кöсыник чужöма, пöрисьвевья ни Анфиса Сергеевна. Прокопий Егорович — шöрöт бригадаись бригадир, кöда пукалiс неылын пыранiн дынсянь, Таисьяыс пырöм бöрсянь, дзик нетшкöвтöм аслас местаись, сувтiс, дугдывтöг пондiс ветлыны одз да бöр кабинет пасьта, öткоста дугдывтöг куритiс. Таисья видзчисис, что басниыс перво жö пондöтчас обязательствоэз йылiсь, пондiс думайтны, кыдз да мый висьтавны паныт. А эта коста сы пельшы бердöдз сибалiс:

— Кылзам, Таисья. Висьтась, гленитчö-оз куканнес гöгöр бергавны?

Председатель юалiс чожажык отсыштöм могись, мед нывкалö кокнитжык вöлi пондöтны ассис баснисö, пыкыштiс шульга кинас тшöкасö.

Зоотехник, кöда эта вотöдз тэрмасис мыйкö гижны одзас паськöтöм журналö, öнi вöлись лэдзис кисис ручка, гусьöн шынньöвтöмöн дзар керыштiс Таисья ладорö, дзик горöтчис: «Баит, эн пов».

Обидитны нывкасö аслас медодзза вопросöн председатель, натьтö, и эз думайт. Но сылöн кыввес Таисьяöс дзик чушкалiсö. Нывка сэтöн ни вунöтiс неважынся недолыт йылiсь, бытьтö некöр сыкöт сэтшöмыс и эз вöвлы, дженытика дзар керыштiс председатель ладорö.

— Ме не бергавны ны гöгöр — вердны локтi. Шынньöвтiс председатель. Лэбтыштiс юрсö агроном.

Мыйкö шушкыштiсö ас коласын мöдiк бригадаэзiсь бригадиррез. Этасянь ни гажмыштöм чужöм вылас, мышкыртiс увлань юрсö зоотехник. Дивуйтчöмöн видзöтiс Таисья ладорö Анфиса Сергеевна. А Иван Фролович недырик кежö нельки ерзулитны бöр вылас дугдiс, юалiс:

— Не öтiк разь — бергалны да вердны?

— Тiянлö, батi, öтiк, а меным не. Ме бергалöмсянь куканнес пöтöсь оз лоö.

Бригадир чепöссис ыбöс ладорсянь Таисьялань, сувтiс паныт.

— Дак тэ эн бергал ны гöгöр, а верд, верд, мед нiя тэнат пöтöсь вöлiсö! — Ачыс сэтöн жö вак-вак серöмтчис, бöра öдззис ветлыны одз да бöр кабинет пасьта.

Нывка лэдзис кисис чышьян угöв, кöдö öнöдз пустуйтiс челядьлöн кодь поснит чуннес коласын, сувтiс, оськöвтiс стул спинка сайö, вежсьыштöм, чорытжык, а этасянь вынажык голосöн юалiс:

— Верд, шуат? А мыйöн? Мыйöн ме нiйö верда?!

Таисья кыввез бöрсянь зоотехник перыта лэдзис увлань синнэсö, жмитчыштiс быдсöн вывтырнас. «Пондöтчö, тыдалö».

— Таисья? Да тэ мый? — дивуйтчöмöн панöвтiс фермаись заведующöй да нывкасö велöтöмöн горöтчис: — Он разь тöд, мыйöн подасö вердöны? Турунöн, вот мыйöн, ту-ру-нö-ö-öн.

— Адззöмöсь жö эд то кинöс куканнес дынö султöтны, — лöдсыштiс бригадир. — Да сiя жö талуння виöдз öшö оз и ылöс, мыйöн подасö вердöны. Натьтö, öшö эз и адззыллы, кыдз куканнес сёйöны.

— Тöда — турунöн. Но тi висьталö, кысь меным сiйö вайнытö?

— Таисья? Да тэ некыдз талун вöлись свет вылас шогмöмыт? — Иван Фролович мынöтiс кынöм бердсис киэсö, кыкнаннас нiйöн нывкаыс одзын дюттьöтöмöн, одзлань баитiс: — Öнi жö гожум, го-жум! Вежöртан тэ, он сымдасö? А гожумнас подаыслöн вердчаныс кок ултас. Али тэ полан, он лысьт куканнесö ыбöдззас вашöтны? Он лысьт, дак сiдз эстöн и висьтал.

— Колö жö эд?.. Челядь сад да и дöс сэтöн! — чушкалiс бригадир.

— Сiдзкö, турунöн, шуат? Кöда подаыслöн кок увтас быдмö? А тi асьныт кöть тöдат одö, кытöн поданытö видзат?

— Мыля жö бöра сымдасö ог тöдö? — лöньжыка шыасис заведующöй. — Пар йöрын видзам. Кытöн öшö этася.

— Сiдз вот и висьталö — пар йöрын. Вöввезнытö — пар йöрын, мöссэзнытö — пар йöрын, баляэзнытö — пар йöрын и куканнезнытö...

— А кыдз нö тэ öшö думайтiн? — эз сет горöтчыны бригадир. — Сы понда сiя и пар йöр, мед турунзьöм межаэсö травитны да муэсö назьмитны. Деддэзным дырни öшö сiдз вöллi.

— Сiдз, батi. Сымдасö ме ог тöд. Меным дзир öтiк невежöртана, мыйлö тi куканнесö видзат? Сы понда я, мед нiйö вердны-быдтыны или дзир пар йöрнытö травитны да муэсö назьмитны?

— Но мыля жö, Таисья, пар йöрсö травитöм понда куканнесö бöра пондам видзны? — шыасис сэтчö председатель, бытшöмжыка лöсьöтчыштiс стул вылын. — Вежöртана, вердны-быдтыны, мед сёрöнжык яйö сетны. Но эд видзнытö нiйö кытöнкö сё ни колö.

— Думайтö сэк, пожалуйста, мый тiян пар йöраныт сымда подаыслö травитнытö? Сiя жö не видз, не шутём кытшöмкö, а гöрöм му. А сы гöгöр неыджыт видзоккес, межаэс да кулижкаэс öнöдз сэтчöдз ни пичиктöмöсь, что кодяжык турунсис öтiк тылöпок некытöн оз сулав. А тi меным эшö шуат — верд. Мыйöн нö ме сэтшöм подакокувтас верда? Тi разь, правленчи, сымдасö од вежöртö? Газетаэсö од лыддьöтö? Радиосö од кывзö? Телевизорсö од видзöтö? Эд кывлö, кыдз талун мöдiк колхоззэзас отирыс подасö быдтö-вердö? Од тöдö, кытшöммезö привессэсö босьталöны? А тi? Да тi жö этадз видзöм-вердöмнас нiйö дзир кулöмсис кыскат! Эта понда жö судитны колö!

Дзик Таисьяыс зэркыта да пыма висьталöм кыввезсянь койыштöм бичир правленнё öшыннэз сайын тыдыштiс югыт-зелёнöй рöма вирдыштöм. Недырик кежö сувтöм лöнь пыр сэтчинсянь сибалiс быд пельшы бердö ась и ылын эшö, но ятнöя гымалöм.

Таисьялöн бöрья кыввес вöлiсö, тыдалö, быдöнныс понда нач видзчисьтöмöсь. Мыйкö дырна сылö паныт нельки некин эз и шыась. Пöрöтчыштiс стена бердö да зэвжык жмитiс киэзнас кынöмсö фермаись заведующöй. Сайöвтчöмöн да гажтöма ыш ловзисис агроном. Гусьöн да полöмöн шушкöтчисö ас коласын мöдiк бригадаэзiсь бригадиррез. Кытшöмкö недолытсянь юрсö мышкыртöмöн думайтiс мыйкö Анфиса Сергеевна. Нельки зоотехник, кöда эшö неважын сiдз радуйтчис Таисьяыс пондöтöм баснилö, öнi сымда и керис — перыта кваркышалiс аслас кузь да басöка краситöм синлыссэзöн. Чöлöмöн жмитчис аслас стул бердö председатель, И дзир öтiк бригадир, кöда, вачкисис, нем эз кыв да эз казяв, чöвны этна кыввез бöрсянь эз думайт. Быдöнныс коласын сiя адззисис медодз. Прокопий Егорович (а сулалiс сiя эта коста ыбöс дынын, куритiс) лöгвевйöн шупкис кок увтас биа папироса, кöдасянь бичиррес паськыта чеччалiсö джодж пасьта, не сiдз паныт Таисьялö, кыдз быдöнныслö дорйисьöмöн шуис:

— Видзöт тэ, öшö кутшöм прокурор адззисьöм! Вот этö да-а! — оськöвтiс пызан ладорö. — Кылат, ёрттэз, мый тiян йылiсь баитöны? Эт-та мыйкö ви-иль. Вöллытöм, колö шуны. Дас год сьöрна ни бригадирала, но сэтшöмсö, мед заседаннё вылын быдсöн правленнёсö судитiсö, сэтшöмсö эг на кыллы. Думайтны эд колö, кытчöдз локтiм. — Бригадир оськöвтiс матöжык Таисья дынö, копыртчис, зэв матö вайöтiс сы бердö ассис бриттöм чужöмсö, издевайтчан голосöн юалiс: — Дак кинöс тэ эстöн судитны мöдан? Правленнёсö? Кöда одзын часöт сулалан? А кин тэ сэтшöмыс? Тöння школьница, кöда куимöт лун колхознöй куканнесö пастушитö. Сiдз эд? Сiдз! Думайтан, сы понда тэнö татчö и корисö, мед правленнёыс вылын суддэсö лöсьöтлыны? Не-е. Кылзiм. Колö кö талун кинöс судитны, — бригадир öдззис легöтны мыччасян чуньнас зэв матын Таисья ныр одзын, — ...дак медодз тэнö! А, ноко, вот висьтал, кин тшöктiс ферма ултсис видзсö куканнеслö ытшкыны? Кинлiсь юасин?

— Некинлiсь эг. Тiянлiсь тшöктöмсö видзчисьны, дак сы коста куканнес тшыгйöн куласö. Вот и ытшки, мед не тшыгйöтны. И ковсяс кö, дак и одзлань сiйö жö понда керны.

— Вот, ёрттэз! Видзöтö тi сы вылö. Бригадир веськöтчис. — Не. Тi только кылзö, мый сiя баитö. Этö жö думайтны колö. Сiйö корисö правленнёö, мед висьталны, мый позьö, мый оз. А сiя миянлiсь баснисö кылзыны оз и думайт, — а одзлань öтнаслö зоотехниклö ни: — Кысь только тэ, Свет Савельевна, сэтшöм уджалiсьсö адззöмыт?

— Гортiсь, Прокопий Егорович, колö кö тiянлö тöдны дак, ас колхозiсь. Таисьяыс ачыс фермаас локтiс.

— Сiя жö, тыдалö, и эм — ачыс. Кöдö правленнё пыр вайöтан, дак сэтшöмыс некор сымдасö оз и кер. И кыдз тэ сыкöт, интересно, уджалнытö мöдан?

— Эта менö оз полöт. Öддьöнжык полöтö тiянкöт уджалöмыс.

— Мекöт? — öшöмöнмоз горöтчис бригадир, мыччалiс ас моросас. — Вот уж некор бы эг думайт... Да ми разь тэкöт первöй лун öтлаын....

— Сiя и эм — не первöй, — лöгтöг, но и шуткатöг баитiс одзлань зоотехник. — Мöднёж, дак талуння виöдз некор бы эг и локтö.

— Но этö тэ весь, Свет Савельевна, ме йылiсь сымдасö... — вились öшöмöнмоз горöтчис бригадир, но мед аскадö кежны недолыт басниись, сэтöн жö эшö юалiс: — Петö, тэ куканьвöдитiсьыс дор султан?

— Смех эд лоас, Прокопий Егорович, сувтны кö меным тiян дор.

— Дугдыл жö, Прокопий Егорович. Не сы йылiсь öнi басниыс. Одзöл дорйисьны пондöтчан. Пукалышт, пуксьы да, — дзугис председатель бригадирлiсь баснисö, а одзлань то ли ас понда, то ли быдöнныс понда, и тожö дорйисьöм могись содтiс: — Оз мыйкö меным веритсьы, мед эта пасьта пар йöрын подаыслö нем вöлi сёйнытö.

— Оз, шуат, веритсьы, Яков Терентьевич? — дивуйтчöмöн юалiс Таисья, мыдзувья вежсьыштiс кок вылiсь кок вылö. — Локтö сэк ашын, видзöтö ас синнаныт — оз веритсьы дак. Быдöнныт вермат вовлыны, Прокопий Егорович. И тi, Иван Фролович, и тi, Светлана Савельевна. Мыччалат, батi, меным, кытöн тiян сэтшöм бытшöм подакокувтныт да сымда бур туруныс, кöдöн позьö пöттöдз куканнесö вердны. — Эта вылын Таисья вöлi лöньсис ни, но сэтöн жö кватитчис: — Оз, шуат, веритьсы, Яков Терентьевич, что куканнеслö сёйнытö нем? А привессэс? Июнься привессэс тiянлö разь нем йылiсь оз и баитö? Нiя жö дзир двести тридцать граммöн сутки кежас петiсö, кöр тiян плановöйес — четыреста. Кытшöм эшö эта бöрсянь доказательство колö? Или бöра меным од веритö? Од веритö, дак вот зоотехникыс, — тшöканас öвтыштöмöн Таисья мыччалiс Светлана ладорö, — ордчöн пукалö. Сiя öшлiс да лыддис, ась сiя и висьталас.

Мый йылiсь пондас мунны басни заседаннё вылын, одзлань сымдасö Таисьялö некин эз юöрт. Сiдзкö, и тöдны эта йылiсь правленнёас локтытöдз сiя эз вермы. Но председательлöн юасьöмыс инмис медзубыт местас, кöда йылiсь этна луннэзö нывка думайтiс уна ни. Эн лэбты сiйö перво жö смех вылö, кыдз этö керисö фермаись заведующöй да бригадир, Таисья, натьтö, и баитiс бы нач мöднёж. И кин тöдö, вермис бы я сiя висьтавны сэк быдöс сiдз, кыдз этö ковсис керны ассис убежденнёсö дорйöм понда. А эта убежденнёыс нывкалöн сыын и вöлi, что öнöдз сiя тöдiс ни — сэтшöм подакокувт вылын тшыгйöтöмсянь куканнесö чожа он быдты и некытшöм прок сы уджись оз ло. Тöдiс Таисья и сiйö, что мöдiк районнэзiсь хозяйствоэзын привессэс нач мöдiкöсь. А мыйсянь сiдз, причинаыс тожö вöлi син одзын.

Спорыс лэбтiсис истина увья, кöдö Таисья и адззис, и вежöртiс бытшöма, но кöдö эз адззö нето адззисö да видзöтiсö сы вылö куньöм синнэзöн правленнёись членнэз. И кöр нывка казялiс, что споритö быдсöн правленнёкöт, сувтчынытö джын туй вылас вöлi сёр ни. А что баитiс Таисья сэтшöм веськыта да повтöг, дак эта чертаыс сы мывкыдын эз вöв одзöстöм. Сiя сылöн вöлi аслас и видзчисьны эта местö мöдiкö, истинасö дорйикö, эз позь.

Привессэз йылiсь Таисьялöн аргументыс вöлi сэтшöм вына, что нывкалö думайтсис ни — сувтöтны эталö паныт правленчилö лоас нем. Не весь жö эта бöрсянь быдöнныс да вель дыр кежö лöньсисö.

Лунтырся удж бöртi тшыг да мыдз Таисьялö сьöкыт вöлi сулавны коккес вылын. Сiя лэдзчисис киэзнас стул спинка бердiсь, лöсьöтыштiс пельпоннэс вылö везтыштöм чышьян, оськöвтiс, мед пуксьыны. Но бригадирлö, кöда готов вöлi петны кучиксис, мед только вермыны мыччавны асьсö правöн кöть бы ас син одзас ни, и эта эшö вöлöм етша. И сiя кадö, кöр быдöнныс, кöдна пукалiсö пызан сайын, кыдз бытьтö вежöртiсö ни, что правдаыс былись нывкаыс сайын, бригадир и сэтöн эшö öвтыштiс сы вылö кинас:

— Да кылзö тi сылiсь челядь баснисö. Кытöнкö остожьяын, натьтö, лун-лун видзö куканнесö, а эстöн норасьö — вердны немöн да привессэс учöтöсь. Колö жö эд мыйкö йылiсь баитны, кöр прокыс оз тырмы пастушитнытö.

Таисья кылiс, кыдз сьöлöмсис пым вирыс пизьöмöн чепöссис юрас. Одззася обида дынö, кöда и сiдз вöлi тырмöмви, нельки лолавнытö бытшöма эз сет, пöдтiс, öнi зорамис лöг. Сiдз ни бледыник нывкалöн чужöмыс бригадирыс кыввезсянь бель вачкис эшö öддьöнжык, и дзир синнэс резiсö сё сiйö жö югыт бичир. «Сьöвзьыны бы тэныт рожаат». Но сымдасö отирыс син одзын нывка кытчöдз и эз кер, тöдiс, что и горöтчынытö паныт эта вылö сылöн эшö адззисяс мый. Таисья керсьыштiс бöр одзза местаас, чуннес чочкоммытöдз кутчисис киэзнас стул спинка бердö, ловзисис.

— Остожьяын, шуат, бригадир, куканнесö видза? Да? И стыд тiян абу сымдасö баитны? Тöдат жö кöть, одö, кин нiйö июньнас пастучитiс? Тi жö асьныт часöт баитiт, что ме вöлись куим лун сьöрна фермаас уджала. Дак висьталö, пожалуйста, кытшöм совестьöн тi меным сымдасö горöтчит? — Таисья лöньсис, пондiс видзчисьны, но горöтчыны мöдыслö вöлi нем, а быдöнныс син одзын — недолыт. Но не горöтчыны нем, нельки эта недолыт коста, бригадир тожö эз вермы.

— Не тэ, дак мöдiккез остожьяэзын видзисö. — Сiя чеччис пызан сайись, иньдöтчис порог дынö, вились öзтiс куритны. А бригадирыс неколана кыввезöн лöгöтöм Таисья чöвнытö и одзлань эз вермы.

— Ась. Ась, шуам, куканнесö кинкö остожьяэзын видзис. А мöссэзнытö?.. Висьталат, батi, что и нiйö остожьяэзын видзöны?

— Мый жö тэ, Таисья, кöдö оз ков да каттян? — дзик саймис, шыасис фермаись заведующöй. Сiя мынöтiс кынöм бердсис асыкöнмоз кышалöм киэсö, пызан омöн керсьыштiс нывкаыс ладорö. — Кин тэныт сымдасö висьталiс? Не мöссэз йылiсь öнi басниыс.

— Ачым тöда — не мöссэз йылiсь! — орöтiс Таисья. — Подакокувт йылiсь басниыс. И одö кö тi веритö привессэслö, öддьöн кö бур, шуат, тiян подакокувтныт, дак висьталö сэк, мыля гожум шöрнас мöссэзнытсянь вит-квать литраöн йöвсö чилькöтат. Нiя эд тiян сiя жö подакокувт вылын олöны.

Паныт баитiссес öнi эз ни адззисьö. Негорöн дзуртышалiс стул заведующöй ерзулитöмсянь. Пызанпöв увтö сайöвтöмöн гуддис ассис гыжжесö зоотехник. Шульга кинас кымöссö пыкöталöмöн думайтiс мыйкö агроном. Тырппесö тшып кутöмöн орöттöг видзöтiс Таисья вылö Анфиса Сергеевна, дзик юалiс: «Кысь тэ сэтшöмыс петöмыт?» Дивуйтчöмсяняс кадiсь кадö бергöтышалiсö юррезнаныс мöдiк бригадаэзiсь бригадиррез. Ловшысö пöдтыштöмöн пыдына ловзисис председатель. Нельки Прокопий Егорович, кöда эшö неважын готов вöлi петны кучиксис, öнi лöня папкис-куритiс осьта ыбöс дынын, Таисьялiсь бöрья кыввесö дзик эз и кыв. И вились, дзик ас йывсис эшö öтпырись казьмöтöм могись, рытвыв ладорся занавескатöм кык öшынсö югыта пасьтöтiс чарньöвлöн би. А чожа сы бöрсянь паськалiс гымалöм да тöдчöмöн зэгöтiс правленнё стенаэсö. Быдöнныс понда вöлi вежöртана, что сибöтчö гожумся ыджыт зэр, но кыдз сiя чулалас да мый коляс ас бöрсянь, эта йылiсь некин и нем эшö эз тöд.

Дыр мыйись председатель шыасьтöг паськöтыштiс киэсö, дзик этöн ни горöтчис: «Да, Таисья, нем он висьтал, тэнат правдаыс» — и бытьтö öнi вöлись казялiс сiйö кок йывсис.

— Да тэ пуксьы, пуксьы. Мый, кыдз часовöй, рытылбыт коккет вылын сулалан. Эн на разь мыдз лунтырнас? .

Тувдöм коккес вылын Таисья оськöвтiс пызан ладорö, одззася невна перытжыка пуксис. Пукавтöнняс ни нывка кылiс, кыдз ештöм мыдзны этöн каднас, дзик öнöдз кыскалiс ношаöн турун. Одзлань баитны охота эз вöв. Сэтчö жö быдöс коланаыс вöлi висьталöм ни, кольччис дзир видзчисьны, мый лоас одзлань. Нывка пöрöтчыштiс мышкнас стул спинка бердö, лэдзис öлöдзас вугмöм чуня киэсö, шоччöтöм могись веськöтыштiс коккесö.

Эта коста агроном мынöтiс ки вывсис пыкöталöм юрсö.

— Дак мымда жö бы тэныт, Таисья, привессэс колöны?

Таисья дивуйтчыштiс: «Мыля эта йылiсь юалö медодз не ачыс председатель, не зоотехник, нельки не фермаись заведующöй, а агроном?»

— Öнi отирыс килограммовöйезö босьтöны. Мыля бы и миянлö не сiдз, не отирыс моз пондывны? Отир жö эд, натьтö, мöдiк колхоззэзас, мöдiк районнэзас уджалöны.

Таисьялöн басниыс некинöс эз дивуйт. Дзик сикöджыс зэлöтöмсянь бергöтыштiс юрсö председатель. Шыасьтöг жöдзыштiс аслас стул вылын фермаись заведующöй. Чöлöмöн видзчисисö баснисö бригадиррез да Анфиса Сергеевна. Шыасьтöг пыркöтыштiс увлань öшöтöм юрöн порог дорын сулавтöн бригадир. И дзир зоотехник жмитыштiс радувьяс морос увтас киэсö. А агроном, гажмыштöм нывкаыс кыввез бöрсянь, горöтчис:

— Молодец, Таисья. Правильно баитан. Важын ни колiс пондывны. А то миянлö зоотехникыс эстöн висьталö, бытьтö бы тэ и обязательствоэзiсь откажитчöмыт.

Öнi вöлись Таисьялö дзик вачкис — вежöртiс, что Степан Васильевич не только агроном. Сiя жö эшö и партийнöй секретарь. Одзлань нывка гажöнжыка думайтiс, что пондöтiс кö сiя баснисö, часöт сувтас да эшö мыйкö висьталас, сiдз кыдз колана привессэз йылiсь нывкалiсь кыввесö мöдiккез дзик эз и кылö. Но нем унажыксö агроном баитны эз понды, дзир нёджжöвтiс быдöнныс ладорö, юалiс:

— А кыдз правленнё эта вылö видзöтö?

«А кыдз эшö сэтöн правленнёыслö видзöтны? — зорамис Таисья ылöсын. — Ме разь мыйкö вöвлытöмö да неколанаö тшöкта?»

— Да неумöль бы, натьтö... — шыасис председатель кытшöмкö аслас дума пыр, негорöн сяткöтыштiс чуннезнас пызанпöв кузя. Но не быдсöн горöтчöм кыввезiсь позис вежöртны, что сiя то ли ачыс оз верит сымдаыслö, то ли сэтшöм привессэс сылö оз колö. Этö сыын казялiс не только Таисья, но и зоотехник тожö. — Первуись разь, Степан Васильевич, эта йылiсь баитам? А прокыс? Эд мымда баитам, сымда и эм. Привессэс быдöнныслö колöны, дзир уджавнытö ны понда годiсь год некин оз кутчись.

— Кыдз этö, Савельевна?.. — Председатель пыкöтасис киэзнас пызанпöв бердö, пöрöтчыштiс мышклань. — Кыдз этö некин оз кутчись? Да, кончиттöм миян öнöдз кукань картаыс. Важинын куканнесö видзам. И механизация сэтчин некытшöм абу. Но кин тэныт висьталiс, что привессэс понда некин уджалнытö оз кутчись? Да и кинлö öшö медодз, кыдз не тэныт аслыт, зоотехниклö эта бердö кутчисьнытö?

— Öтнам, ме кыдз и Таисьяыс жö, правленнёыс отсöттöг нем ог кер, не пред, не бригадир озö кö пондö отсавны.

— Мый тэныт предыссянь колö?

— Ме тiянлö висьтавлi ни, Яков Терентьевич, что мöссэсö пар...

— Эта уджыс не правленнёлöн... — орöтiс председатель, — ...а медодз тэнат, кыдз специалистлöн да вот, юрнас öвтыштöмöн мыччалiс Иван Фролович ладорö, — ...фермаись завлöн. Вот и керö!

— Но эд... — шыасис заведующöй, пондылiс вöрзьöтчыны.

— Некытшöм «но эд», Иван Фролович! — поперегалiс Яков Терентьевич. — Ашынсянь жö мöссэсö вуджöтат гожумся лагерьö и эта йылiсь басни баитсис. Висьталö, мый куканнескöт керны?

Таисья кылiс, кыдз сiя то ли быдмö, то ли лэбтiсьö вывлань ас син одзын. Нельки важынся лöг да обида сыын чулалiсö. Эз понды кывны вывтыр пасьта мыдз, кöдасянь эта вотöдз нывка вöлi дзик домалöм. Ас кежас öнi сiя гажöн думайтiс. «Вöрзис эд йыыс, вöрзис».

— Вердны колö, мый эшö этася? — шыасис зоотехник председатель юалöм вылö. — Медодз ковсяс виль подакокувт адззыны, ой кежас ытшкöм турун ваявны да пизь нето комбикорм сетавны.

— Не унаöл я перво жö мöдан? — панöвтiс председатель. — И подакокултсö, баитан, вежны да эшö и ой кежас турунсö ваялны.

— Но уна кö тiянлö, Яков Терентьевич, сеттöмыс эшö, дак сэсся менчим и юасьны нем. Кыдз асьныт тöдат, сiдз и керö!

— А кысь тi, интересно, виль подакокувтсö мöдат адззыны? — бытьтö саймис да юалiс ыбöс дынсянь бригадир. — Абу топ миян бригадаас лишньöй видззес да...

— А вот этö ми тэнчит, Прокопий Егорович, и юалам, кытшöм видз вылö ашынсянь куканнесö туяс лэдзалны, — панталiс бригадирлiсь баснисö партийнöй секретарь.

Прокопий Егоровичöс вились дзик чушкисö. Сiя перыта оськöвтiс матö пызан бердöдз, веськыт кинас русö керавтöн горöтчис:

— Ме тiянлö висьталi ни — подакокулт вылö видззес миян бригадаын абу. Ачым ог тöд, кысь фермаэслö тöл кежас вердчансö керны. Нуöтö вот Иван Захаровичыс бригадаö куканнезнытö да сэтчин и ёркöтö-вердö. Сылöн видзыс тыр, а некытшöм ферма абу.

— Но этö тэ весь, Прокопий Егорович, челядь баснисö баитан, бытьтö миян бригадаын видзыс тыр, — панöвтiс пöрисьвевья ни мöдiк бригадаись бригадир. — Миянлö эд кöть и вайöтат, дак йöртнытö куканнесö сё ни некытчö: не карта, не весйöт ^некытшöм абу.

— Гожумнас и йöрттöг оласö, нем колхознöйеслö оз ло.

Таисья öнöдз вежöртiс ни, что жаралö виль спор. Сыын нывкаöс медöддьöн полöтiс сiя, что вермас кö öмнас Прокопий Егорович, виль подакокувтнас, сiдз и тöд, нем оз пет. И кöть баитнытö сылö эта рытö некытшöм охота эз ни вöв, пукавны чöлöмöн, кöр басниыс мунiс сылö колана тор йылiсь, нывка эз вермы.

— Видззес, шуат, Прокопий Егорович, подакокувтыс вылö абу? А ферма увтсис видзыс мыйöн не подакокувт? И куканнесö вашöтлыны ылö оз ков, и йöрйöм быд ладорсянь, пышшавнытö некытчö, и...

— Мый?! Ольсö подакокувтö? — Эз сет кончитны бригадир нывкалö пондöтöм баснисö. — Да тэ кöть думайтан жö ылöстöм юрокнат, мый баитан? Сiйö весöтöмыс колхозыслö золотöйöн султiс. А кысь нö сэк тöл кежат куканнетлö турунсö керны?

— А ме тöвйöтнытö нiйö ог и думайт, и вердчансö нылö тiянлiсь тöв кежас ог кор, — дорйисис Таисья. — Ми нiйö арнас яйö сетам.

— Правильно, Таисья! — сувтiс нывкаыс дор зоотехник.

Куканьвöдитiсь и эстöн эз бöбöтчы. Сылö öнiсянь былись сiдз и думайтсис. Но кокнит я вöлi тшöктыны веритны бригадирöс сыö, мый некöр эшö эта вотöдз ны колхозын эз вöвлы? Частожыксö вöвлi нач мöднёж, кöр умöля быдтöм-вердöмсянь яяс нылiсь куканнесö эз примитлö нельки кык-куим год бöртi. Бригадир вак-вак серöмтчис.

— Мый? Мы-ый? Гöдöвöйсяэсö мöдат яяс сетны? Эдö жö бы отирсö смешитö. Вöтасит я мый я? Кин тiянлiсь сэтшöм дзеззэзнытö примитас? Нiя жö тiян ас выланыс оз вачкисьö. Эз на тай кытчöдз вöллы сэтшöмыс, мед миян колхозлiсь гöдöвöйся куканнесö яяс примитiсö. Эз вöл да оз и ло — ог верит. Баитат мымда.

Бригадирлöн басниыс, тыдалö, и зоотехникöс тожö сидзöтiс.

— Пондам кö ми, Прокопий Егорович, талуннямоз сэтшöм подакокувт вылын куканнесö видзны, дак вежöртана, что нiя миян некöр ас выланыс вачкисьны оз пондö, некöр и яяс, отирлiсь моз, оз примитö.

— А сiдз жö, натьтö, и эм, — негорöн шыасис и Анфиса Сергеевна. — Огö кö пондö асьным кыдз колö вердны-быдтыны, дак некин мöдiк миян местö сiйö оз кер.

— Тырмас, ёрттэз, споритнытö. Предложеннё сэтшöм: лэдзны ашынсянь куканнез понда подакокултöн ферма ултiсь видз и ваялны нылö быд ой кежö тележка мымдаöн ытшкöм турун...

«Важын ни эд, важын сiдз колiс», — ештiс думнитны радувьяс Таисья. Но эта вылын председательлöн басниыс баитсис. Видзчисьтöг, кöр сiя кончитас, бригадир нетшкöвтчис петанiн ладорсянь пызанлань.

— Тi мый? Дикмит таво этна куканнез вылын? Етша эшö — медбур видзсö бригадаыслiсь подакокултö лэдзат, дак öшö и ой кежас нылö турунсö ваял? Да кысь тi кыллiт, мед гожумшöрнас колхознöй куканнесö ытшкöм турун вылын видзисö? Сералны эд отирыс пондасö.

— Дугды жö, Прокопий Егорович, митингуйтнытö! Эн сор менö баснисис. Некин тэныт кылсö эз сетлы, — пондылiс падтыны председатель.

— Миян вылын отирыс важын ни сералöны, öнöдз ог кужö подасö вердны да, — содтiс зоотехник. Но лöньсьöтны бригадирöс нiя эз ни вермö. Председательыс да зоотехникыс öмалöмсянь сылö дзир öд шедiс.

— Думайтö жö кöть, кысь, мый эта ыжда араваыслö тi ытшкынытö мöдат? — дульнас резсьытöн горöтлiс бригадир правленнё пасьта. — Клевер миян бригадаын абу! Зöр-анькытш тулыссянь эг кöдзлö! А пондыны кö öнiсянь ваялны ытшкöм турун, дак мыйöн нö сэк мöссэзнытö тöлйöтны мöдат?

Видзöтны бригадирыс чепсасьöм вылö да кывзыны сылiсь горöтлöмсö öнöдз, тыдалö, быдöнныс мыдзисö ни, и дзир падтыны сiйö этаись некин эз вермы.

Степан Васильевич, кöда эта вотöдз неöтпырись ни дзарышалiс Прокопий Егорович ладорö, горöтчис:

— А не буржык я тэныт, Прокопий Егорович, эта йылiсь думайтнытö? Тэ эд сё жö бригадирыс, и вердчансö тэныт ваялны колсяс.

— Нем менам, нем, висьталiсö тiянлö, ытшкынытö!

Ог и думайт, ог и кöсйы!

— Рудзöг пондан ытшкыны, ежели нем этася оз адззись.

— Мый? Гумьясьöмсö? Да тi кöть вийö менö, кöть джагöтö...

— Тырмас, Прокопий Егорович! — сувттöнняс ни орöтiс Степан Васильевич. — Не унаöв я ми, ёрттэз, бригадирыслiсь демагогиясö кылзам? Эд не бригадир жö öшö, натьтö, правленнёнас юралö. Мыля сэк рытылбыт дзир сылöн голосыс и кылö? Мыля некинлö мöдiклö и кыл горöтчыны оз сет, быд öм вылö пуксьö? Кин бы мый эз висьтал — сылö сё не сiдз, некинкöт оз лыддись. Бытьтö сiя öтнас быдöннысся унажык тöдö.

«Важын ни эд сiйö ас местас колiс пуксьöтны», — думайтiс Таисья партийнöй секретарьлiсь баснисö кывзытöн.

— Правильно талун Таисьяыс вопроссö султöтiс, — баитiс одзлань Степан Васильевич. — Правильно и зоотехникыс горöтчис, что быд год эта йылiсь баитам, а прокыс сё сымда, баснися ылöжык ог мунö. И кылзыны кö бригадирлiсь баснисö, дак миян и одзлань кежö нем оз вежсьы. Кыдз вежöртны сэтшöм позиция, кöр сiя öтнас султö правленнёыслö паныт: оз думайт керны сiйö, мый тшöктöны? Тырмас, ёрттэз, годiсь год кыллэзнаным уджалны. Колö кутчисьны киэзöн. И тэ, Прокопий Егорович, кыдз бригадир, пондан керны сiйö, мый тэныт правленнё висьталас, а не сiйö, мый юрат пырас...

Бригадир, кöда ештiс ни пуксьыны аслас местаö, лöга вирдыштiс синнэзнас Степан Васильевич ладорö, вились, кынымöтчид ни заседаннё коста, кывсö кортöг горöтчис:

— Мый? Решеннётöг? Да? Голосуйттöг? Эта жö произвол! Кин тiянлö правосö сетiс? Да ме ашын жö райкомöдз...

— Верман. Кöть кытчöдз. Сiя тэнат право. А обязанность — керны сiйö, мый унажыкыс висьталасö. Тэ сё жö коммунист и партийнöй дисциплинасö колö тöдны.

— Вот кыдз? — нарочитöя дразнитöмöн горöтчис бригадир, но эта вылö паныт некин эз ни шыась. — Но не-е-е. Не вöлны сымдаыслö. Сiдз и тöдö. Ме сэсся не бригадир! Кыдз тiянлö колö, сiдз и уджалö! Сiдз и вердö дзезмöм куканнезнытö! Месянь тырмас! — Прокопий Егорович чепöссис кок вылас, кыскис кытшöмкö карманiсь неöтпöвсöн куснялöм наряддэз, лöгöн швыргис нiйö быдöнныс одзö, иньдöтчис ыбöсö.