Андрей никифорович зубов (питю öньö)

Андрей Никифорович Зубов чужис ноябрь 25 лунö 1899 годö Кудымкарскöй районiсь Верх-Иньва посадын коми крестьянин семьяын.

Сельскöй школасö кончитöм бöрын нёль год сiя велöтчис Юрлинскöй высшöй начальнöй училищеын.

Эта бöрсянь Андрей Никифорович кык год сьöрна уджалiс Кудымкарын почтово-телеграфнöй контораын телеграфистöн.

1919 годся июль месяцö Андрей Зубовöс босьтiсö Краснöй Армияö. Служитiс сiя 51 стрелковöй Московскöй дивизияын рядовöй красноармеецöн почти куим год. Демобилизуйтчис май 5 лунö 1922 годö.

Эта бöрсянь Андрей Никифорович годся дыржык уджалiс Кудымкарскöй Рабпросын секретарьöн да вторöй ступенись школаын преподавательöн.

1923–1927 годдэзö Андрей Никифорович велöтчис Пермскöй государственнöй университетын педагогическöй факультетын. Öткоста сiя вöлi Пермскöй Губонолöн запаснöй учительöн, заведуйтiс детскöй домöн да тшöтш уджалiс преподавательöн Пермскöй советско-партийнöй школаын.

Университетсö кончитöм бöрын Андрей Никифорович вит год сьöрна уджалiс естествознаннё сьöртi преподавательöн Кудымкарскöй педагогическöй техникумын. Сэсся öтiк год да вит месяц сiя уджалiс Коми-Пермяцкöй окрисполкомись Научнöй бюроын. 1934 годö Андрей Никифорович вöлi Пермскöй научно-исследовательскöй институтын аспирантöн. А 1935 годö велöтчис Мичурин нима плодово-овощеводческöй институтын, кытöн кончитiс агроном-плодовод усовершенствуйтан курссэз и год да джын сьöрна уджалiс эта специальность сьöртi.

Гижны Андрей Никифорович Зубов пондöтчис 1922 годсянь. Ассис медодзза стиххесö сiя печатайтiс «Лымдорчача» да «Горадзуль» сборниккезын, бöртiжык «Гöрись» газетаын, Коми АССР-ись «Ордым» да «Ударник» журналлэзын. Торья сборникöн Андрей Никифоровичлöн стиххес да поэмаэс петавлiсö Москваын «Центриздатын» 1929 годö. Шусис эта сборникыс «Öнджа». 1933 годö ГИХЛ-ын сылöн петiс торья книжкаöн поэма «Виль туй вылöт».

Мийö тöдам, что Октябрьскöй революцияöдз коми-пермяцкöй йöзлöн эз вöв аслас письменность. Сiдзкö, эз вермы лоны и литература. Мед лоис национальнöй литература, медодз колiс зорöтны национальнöй письменность. Миян странаын Советтэзлöн власть паськыта осьтiс ыбöссö быд народлö. Коми-пермяккез, öтлаын мöдiк народдэзкöт, кокнита ловзисисö да гажöн оськöвтiсö виль оланö, кутчисисö лэбтыны экономика да культура.

Сiя жö 1922 годсянь Андрей Никифорович Зубов керис уна удж коми письменность да литературнöй кыв зорöтöм сьöртi. Сiя лöсьöтiс неграмотнöй коми йöз понда медодзза учебниккез да учебнöй пособиеэз, öктiс терминологическöй словарь. Сiдз Москваын «Центриздат» лэдзис А. Н. Зубовлiсь 1925 годö вторöй класс понда учебниккез: «Виль олан» да «Задачник — лыддисьны велöтчан»; 1928 годö — «Коми грамматика» 1-й часть; 1930 годö — куимöт класс понда учебник «Виль олан»; 1931 да 1934 годдэзö А. Н. Зубовлöн петiсö торья книгаэзöн роч кыв вылын научнöй характера сэтшöм уджжез, кыдз: «Основы грамматики» да «К вопросам языкового строительства»; 1932 годö — витöт класс понда «Природа тöдмöтан книга». Сэтчö жö корсьö висьтавны эшö и сiя, что 1938 годö окружнöй издательство лэдзис Андрей Никифоровичлiсь коми кыв вылын «Плодоводство».

Мыччисис миян асланым письменность и пондiс зорамны коми-пермяцкöй литература. Медодзза гижиссезнас, кöдна пешлiсö ассиныс вын да способносттез творчествоын, вöлiсö Андрей Никифорович Зубов, Михаил Павлович Лихачёв, Фёдор Гаврилович Тараканов, Василий Иванович Дерябин, Фёдор Егорович Зубов да Пётр Казанцев. Ны коласын, киннэз гижисö медуна, оригинальнöй художественнöй мастерствоöн да талантливöя, кöдна сетiсö ыджыт надеждаэз одзлань кежö, вöлiсö Андрей Никифорович Зубов да Михаил Павлович Лихачёв, кöднö талун ми заслуженнöя лыддям национальнöй письменность да национальнöй литературалöн основоположниккезöн.

Андрей Никифорович Зубов, сiдз жö, кыдз и М. П. Лихачёв, öддьöн интересуйтчис устнöй народнöй поэтическöй творчествоöн, öктiс уна сказкаэз, песняэз, пословицаэз да поговоркаэз. Тшöтш тöдмалiс и коми йöзлiсь богатöй кыв. 1935 годö Коми-Пермяцкöй книжнöй издательство лэдзис сылiсь торья сборникöн «Сказкаэз».

Уджалiс Андрей Никифорович и драматургияын. 1935 годö сiя гижис пьеса «Пемыт ой пырйöт», кöдаын мыччалiс коми-пермяккезлiсь важся сьöкыт олан. Эта пьесаыс вöлi сувтöтöм Кудымкарскöй театр сцена вылын да Свердловскын уральскöй народдэзлöн олимпиада коста. Вачкисьö, кытшöмкö невежöртана причинаэз увья, талунöдз эта пьесаыс кольччыны «ловйöн» эз вермы. Вель дыр юасьöм да кошшисьöм сiдз нем и эз сетö. Но национальнöй письменность да литература зорамöм коста сiя вöлi медодззаöн коми-пермяцкöй оригинальнöй кыв вылын. Сiдзкö, сылiсь авторсö, Андрей Никифорович Зубовöс, ми заслуженнöя вермам шуны и медодзза драматургöн, лыддьыны национальнöй драматургиялöн основоположникöн.

Сiя кадö быдöс коми йöз öддьöн интересуйтчис ас кыв вылын гижöм медодзза произведеннёэзöн. Да и асьныс авторрес, М. П. Лихачёв да А. Н. Зубов, мыдзтöг тöдсöтiсö отирсö асланыс творчествоöн. Ассиныс гижöмсö нiя не только печатайтiсö газетаын, журналлэзын да книгаэзын, но асьныс жö и лыддьöтiсö сiйö коми йöз одзын. Сэк вöлi примитöм чулöтны коми рыттэз, кыдз общественно-культурнöй мероприятие, кöдна вылö чукöртчывлiс тырся-тыр коми йöз и кытöн авторрез лыддьöтлiсö ассиныс коми стиххез да хорöн сьывлiсö коми песняэз. Андрей Никифорович покоряйтiс отирлiсь сьöлöммез аслас стиххезöн да нiйö лыддьöтöмöн. Колö висьтавны, что сiя и сьылiс неумöля. А голосыс сылöн вöлi баритон. Коми рыттэз коста Андрей Никифорович сьылiс и коми и роч песняэз, сьылiс кыдз хорын, сiдз и öтнас, исполняйтiс сольнöй песняэз.

Гижис Андрей Никифорович унажыксö важся олан йылiсь. Эта и вежöртана. Сiя быдмис да воспитывайтчис царскöй строй коста, бытшöма тöдiс революция одзся олан. Челядьöн эшö уна адззылiс, кытшöм сирньылöмын да лёк нуждаын пессис коми йöз, кытшöм сьöкыт доля вöлi коми инькалöн да кыдз сiя кисьтiс эта курыт олан дорын ассис пым синваэз. Ыджыт поэтическöй мастерствоöн Андрей Никифорович гижис инькаэз йылiсь произведеннёэз «Горттöм кöк» да «Шудтöм» (счастьетöм), кöднö позьö шуны неыджыт поэмаэзöн.

Ох тэ, инькаиньöй, небыт сьöлöминьöй,

Мувлас тэ чужин, невестаöдз быдмин,

Быдмин, айка сайö йöз пытшкö мунiн,

Олiн и олан, пыр тшын-бусын пöдан,

Нять пытшкын шоггезöн мылатö öштан,

Сьöкыт работаись он и петавлы,

А син увтсит лöзыс тай оз и быравлы!..

Сэтшöм кыввезöн сiя кончайтö неыджыт поэма «Шудтöм». Но советскöй власть годдэзö коми инька мезмис гортся рабствоись, получитiс мужчинакöт öткодь правоэз, пондiс овны да уджавны вильмоз, свободнöя. Öнi инькалöн счастьеыс лоис аслас киэзын. Сiя гордöя пондiс оськавны одзлань мужикыскöт ордчöн. Эта йылiсь Андрей Никифоровичлöн гижöм поэма «Вильтуй вылöт». Вот кыдз баитö сэтöн поэт виль деревня йылiсь.

Оссис школа и читальня,

Кресттöм вичкуын нардом.

Важ оланыт кольö бöрö,

Пемыт ойлö локтiс пом.

А инь-нывлöн быдса праздник.

Сьöлöм ёткö, сьöлöм рад:

Льöмпу увтын, вадöр дорын

Лунлань сералö детсад.

Детскöй садын челядь лун-лун

Пуö, бортьын кыдзи мош.

Инь пöлöслö быдтiсьöмыт

Абу сэсся вöрись ош.

Сэтöн ордчöн детскöй садкöт

И столовöй общöй эм.

Пызан сайын мукöд шöрын

Еремика да Ерем.

Тöдчана места занимайтö Андрей Никифорович творчествоын сатира да юмор. «Олат-вылат, комиэз» поэмаын автор едкöя сералö дыш да юись отир вылын. Поэмаыс гижöм 20-й годдэзö, и вот кыдз джын век сьöрна ни, вунтöг олö отир тöдвылын да öнöдз лыддиссьö медпопулярнöйöн. Сiя и талун эшö сё сiдз жö повтöг да вынöн чушкалö дышкуллезöс, кодуллезöс да быдкодь тунеядеццезöс, кöдна оз радейтö удж, öштöмась эта увья ассиныс честь, гордость да человеческöй достоинство.

Стихотвореннё «Проповедь» гижöм антирелигиознöй тема вылö. Эстöн сiдз жö повтöг, ыджыт сарказмöн поэт сералö святöйез вылын, кöдна немöн абу буржыкöсь дыш да юись отирся, керöны сiйö жö «удж», кöдö керöны «Олат-вылат, комиэз» поэмаись смех вылö лэбтöм земнöй да грешнöй персонажжез.

Тöдчана места Андрей Никифорович творчествоын занимайтöны и челядь понда гижöм произведеннёэз, кыдз: «Ми — пионеррез», «Оськöлöн одзö», «Мастерскöйын». Коми фольклорись лöсьöтöм стиххез: «Катша», «Öнджа» да мöдiккез. А сэтшöм стихотвореннё, кыдз «Коми велöтчисьлö», примитсьö кыдз настоящöй завещаннё поэтсянь быд велöтчись коми йöз понда. Некыдз мöднёж сiйö и шунытö оз позь.

Уна Андрей Никифоровичлöн и лирическöй да любитöм йылiсь стиххез, кöдна коласiсь неетша пöрисö песняэзö. «Пемыт ойöн», «Кöкö горттöм», «Лён», «Ой, деревня менам» да мöдiккез часто позьö кывны отир коласiсь эшö и öння кадö.

Эта биографическöй очерк одзын оз сулав сэтшöм задача, мед быд ладорсянь позянанёж пыдына да паськыта анализируйтны Андрей Никифоровичлiсь творчество. Но сiдз кыдз сы популярность йылiсь вывланьын вöлi казьмöтöм ни, дженытика корсьö содтыны то мый. Андрей Никифоровичлöн поэзия аскодь, öддьöн оригинальнöй да самобытнöй, кöда йывмö не сiдз поэтическöй правилоэз, кыдз народнöй фольклор сьöртi, сiдз кыдз бöрьяыс вужжезiсь жö и петö. Эта йылiсь эшö 1930-й годдэзö гижис и коми-зырянскöй литератураись антология «Пармаын» составитель А. А. Попов: «А. Н. Зубов бытшöма тöдö ас отирлiсь фольклор и кыдз поэт аслас поэзияын отражайтö öддьöнжыксö Коми округлiсь положеннё, кöда вöлi революция вотöдз. Аслас творчествоöн сiя быдсöн базируйтчö фольклорнöй материал вылын». Андрей Никифорович бытшöма тöдö да паськыта используйтö коми йöзлiсь богатöй фразеология да поэтическöй образзэз.

Джыннян боткö тринi-трон,

Лютки-петки нин да бон...

нето

Пропадай пö, коли сiдз,

Кинлö уллюн, кинлö видз.

то эшö

Паныт-паныт тусь масьтöны,

Дорвыв чер-барöн ветлöны...

и сiдз одзлань.

Сэтшöм примерресö Андрей Никифорович творчествоись позьö вайöтны öддьöн уна. Сылöн быд произведеннёын тыдалö народнöй поэтическöй творчестволöн влияннё. А эта только богатсьöтö сылiсь поэзиясö, керö матынжыкöн лыддьöтiсь понда. Быд стих лыддьöтсьö кокнита, сэтшöм жö кокнита да дыр кежö кольччö лыддьöтiсь тöдвылын. Гижöмыс Андрей Никифоровичлöн не öддьöн уна. Но нiя стиххес, песняэс да поэмаэс, кöднö колис миянлö сьöрсяняс поэт, век сьöрна пондасö овны коми йöз коласын, ны тöдвылын да сьöлöмын.

А. Н. Зубов олiс неуна. 1937 годся массовöй сталинскöй репрессия эз ордйы и сiйö, сэтшöм талантливöй коми зонöс. Эта годö сiя вöлi арестуйтöм. Кытшöм вöтiс одзланься судьба поэтöс да драматургöс, миян письменность да литература пондöтiсьöс, эта йылiсь бытшöма талун эшö некин оз тöд. Не öддьöн убедительнöй сведеннёэз сьöртi, кöдна локтiсö 1958 годся реабилитация бöрсянь, примитöм лыддьыны, что А. Н. Зубов кулiс 1945 годö.

Андрей Никифоровичлöн не öддьöн ыджыт аслас объёмöн творческöй наследие öнöдз эшö кольччö чукöрттöмöн. Мымдакö сiя чукöртöм эта сборникö, но эшö ылын не быдсöн. Пондам надейтчыны, что эта колана уджыс лоас керöм пыдынжыка да паськытжыка А. Н. Зубовлöн 100 годся юбилей кежö, кöда пондас отмечайтсьыны 1999 годö.

Биографическöй очерк основаö пуктöм одззася изданнёись (Питю Öньö. Кудымкар, 1963) составитель С. И. Караваевлöн материал.