Столббез орсöны

Овлö я öння кадö природаын сэтшöм явленнёыс, висьтавны ог кутчись, сiдз кыдз казявлыны мылякö эз усьлы. Оз кывсьы эта йылiсь и тöдса отирсянь. А видзсьö сiя менам тöдвылын эшö войнася годдэзсянь, кöр вит-кватьгодся челядёкöн ас деревняын овтöн, öтлаын пöрисьжык отиркöт нёджжавлыны эта явленнё сьöрын унаись усьлiс аслым.

Вöвлi эта дзир тöвшöрнас, мича да кöдзыт ойшöрся кадö.

То ли кытшöмкö туй вывсянь сёрöн гортö бертöм, то ли öтöро петалöм коста, кинлöкö деревенскöй отир коласiсь усьлiс казявны енöжлiсь бытшöма да эшö не öтiк рöмöн югдöтöм ойвыв ладорсö. «Столббез орсöны! Столббез орсöны!»

И ась сэтшöмыс вöвлi рытöн, сёр да кöдзыт ойшöрся кадö, юöрыс эта йылiсь чожа мый паськавлiс омöн деревня пасьта. И сэк гырись и поснит отир, кöмасьöм-пасьтасьöм кинлö мыйö шедас, вель дыр кежö петавлiсö асланыс шоныт горвыв-полатя керкуэзiсь, чукöртчывлiсö неыджыт чукöррезö то öтiклаын, то мöдiклаын деревня пасьтас, дивуйтчöмöн да ас коласын негорöн, полöмöнкодь сёрнитöмöн, пондывлiсö видзöтны, мый керсис ны син одзын, бытшöма югдöтöм ойвыв ладорас.

А эта кадö син одзын югдöтöм ойвыв ладорись енöжыс вачкисис ловзьöтöм театральнöй сцена вылö. Чочком рöмöн бытшöма югдöтöм енöжыс то недырик кежö пемдыштлiс, а то сэтöн жö дзайкнитлiс-югмывлiс эшö одззася öддьöнжык. Вермис лоны и сiдз, что мыйкö дырна кежö öддьöнжык югмывлiс енöжлöн дзир öтöр дорыс, шульгаыс нето веськытыс, а мöдöрыс кольччывлiс пемытöн. А недыр мыйись эта жö югытыс вешшывлiс мöдöрас, и сэк нiя пемытыскöт местаэзнас вежсьывлiсö. Но вöвлi не только эта и не только сiдз. Вöвлi, что чочком рöма югытыс местö петавлiс сэтшöм жö югыт то ли лöз, то ли зелёнöй, то ли гöрд рöм. И вöвлi, кöр нiя этадз унапöв вежавлiсö öтамöдсö быдкодь сочетаннёэзын: чочком рöмыс вежсьывлiс зелёнöй вылö, а сэсся сы местö мыччисьлiс гöрд. Но кöр чожа, а кöр дыр мыйись гöрдыс вермис вежсьыны вились чочком нето лöз вылö, а сы бöрсянь петавлiс зелёнöй. Усьлiс нёджжавны и сэтшöмö, что енöжлöн öтöр дорыс вöлi югдöтöм öткодь рöмöн, мöдöр дорыс — мöдкодьöн. А частожыксö меным усьлiс адззывлыны сэтшöм картина, кöр ойвыв ладорся енöжыс вöлi югдöтöм öтдруг быд рöма югöрöн, кытöн вöлi и лöз, и чочком, и гöрд, и зелёнöй рöм. Бытшöма позис адззыны да вежöртны и сiйö, что этна быд рöма югöррес не шондiлöн. Нiя аркмöны да лэбтiсьöны вывлань паськалöмöн, топ веер, дзир шондi югöррезлöн, кытöнкö ылын небосвод саяс кытшöмкö нетыдалан точкаöн отражайтчöмсянь. Этасянь нiя и веськыт шондi югöррез вылö öддьöнсö озö ни вачкисьö, а вачкисьöны унажыксö кытшöмкö югöрресся паськытжык виззез вылö, мыйсянь нiйö отирыс и примитöм шуны столббезöн, сiдз кыдз этна виззес сiдз жö эшö вачкисьöны и столббез вылö.

Эстöн жö колö висьтавны эшö и сы йылiсь, что этна годдэзö мунiс гитлеровскöй фашисттэзкöт öддьöн сьöкыт, виркисьтан война. Быдöс том, грамотнöй да ылöстiсьжык отирыс вöлiсö фронт вылын. Нельки дасквать-дассизимгодся деревенскöй нывкаэз, кöдналö уджыс тырмис горшви гортын: колiс ытшкыны да куртны тöв кежö подалö турун, вундыны, вартны да тöлöтны сю, тожö вöлiсö ыстöмöсь-нуöтöмöсь повесткаэз сьöртi ФЗО школаэзö, мед велöтчансö кончитöм бöрсянь пондыны уджавны обороннöй заводдэзын. Эта увья и кольччисö деревня вылас дзир том и пöрись инькаэз, поснит челядь да вит-квать пöрись старик, кöдна коласiсь унажыкыс эз тöд некытшöм грамота и нельки газетаэсö лыддьöтны эз куж. Этасянь ны коласын и вöлi зорöтöм аскодьöм поверьё, кöда сьöртi эта природнöй явленнёыс, кöда шусис столббез орсöмöн, йитöтсис виркисьтан войнакöт. Этö сёрöнжык, кöр ме пондi ветлöтны школаö да велалi лыддьöтны, быдкодь литератураись усис тöдны эта природнöй явленнёлiсь истина. Вежöртана, кöр миян эстöн ой, мушар мöдöрас сулалö лун. Сэтчинсянь шондi югöррес усьöны Ледовитöй океанiсь йы да торья айсберггез вылö, а йыэс бердсянь, кыдз зеркало бердсянь шондi югöрреслöн отражайтчöмыс и аркмöтö этö явленнёсö, кöдö примитöм шуны севернöй сияннёнас, а миян нёдж — столббез орсöмöн. Но сiдз кыдз миян дынсянь фронт дынöдз вöлi ылын, не адззыны сiйö ас синöн, не кывны сы йылiсь нем мийö эг вермö. Эд и радиоыс войнася годдэзö миян деревняын тожö эз вöв. Сiйöн пöрисьжык отирыс йитöтiсö этö природнöй явленнёсö фронт вылiсь событиеэзкöт. Ны коласын олiс сэтшöм поверьё, бытьтö эта столббезлöн орсöмыс мыччалö быдöс сiйö, мый керсьö фронт вылын. Эта увья сы дынö и вöлi сэтшöм ыджыт интерес быд мортлöн.

Сiдз кыдз миян армияыс лыддиссис гöрдöн, то и столббес орсöмын сы местö вöлi примитöм гöрд цвет. А сiйöн, что быдлö колiс, мед война коста вермис миян армия, то и столббес орсöмын колiс, мед вермис гöрд цвет. Сэтöн жö, кыдз вывланьын вöлi висьталöм ни, шогмывлiс быднёдж. Вöвлi, что чочком виззес местö петавлiсö лöзöсь, но недыр мыйись вевттиссисö гöрддэзöн. Гöрддэсö сайöвтлiсö зелёнöй рöмаöсь, кöдна вились вежсьывлiсö то ли гöрд, то ли чочкоммез вылö. Мукöд коста öтамöд коласын эта вежсьöм-пансьöмыс чулавлiс сэтшöм вынöн (позяс кö сiдз шуны) да сэтшöм перыта, что мыччассис не орсöм, а быльнöй тышкасьöм вылö. И сэтшöм кадö эта вылö видзöтiкö, дзик кылiс нылöн öтамöд коласын кытшöмкö кышöтöм, а сы коста жö мыччассис, что вот-вот сэтчинсянь сибалас гымалан шы, кыдз эта овлö вирдалöм коста. Но колö висьтавны, что кывлыны сэтшöмсö столббес орсöмсянь некöр эз усьлы.

Отирыслö жö, кöдна бимороз вылын сулавтöн, видзöтiсö столббес орсöм вылö, медöддьöн колiс тöдны, мыйöн быдöс эта чулалас, кытшöм цвет вермас медбöрын. И вöвлiс сiдз, что кытшöмкö кадö быд рöма столббес жагвыв, да öтдруг куслiсö, öшлiсö син одзись. Нiйö вевттьывлiс быдпырся ойся пемыт, кöда унаöс инькаэз коласiсь вайöтлiс синваэзöдз. Сэк нiя горзытöн баитлiсö: «Но сiдз и тöд, быдöс öтамöднысö виясö. Некин да некин ни, тыдалö, ловйöн оз кольччы, не нылöн, не миян».

Вöвлi сiдз, что столббезлöн орсöмыс чулавлiс гöрд виззесö вевттьöмöн. Эта сьöртi отир думайтiс, что фронт вылас миянлiсь армиясö вермасö. Вежöртана, что этася умöльжыкыс да гажтöмжыкыс нем миян понда лоны эз вермы, и сы увья инькаэс горзывлiсö эшö öддьöнжык. Но нач мöднёж, кокнит гажöн рознитчывлiсö отир дыр да бытшöма кынмöм бöрсянь сэк, кöр столббезлöн орсöмыс чулавлiс гöрд виззез вермöмöн, мыйсянь позис надейтчыны сы вылö, что фронт вылас вермас сё жö миян гöрд армия. Колö висьтавны, что инькаэс коласын и сэк синваэзтöг эз чулавлы, но этна синваэс вöлiсö не курыт горелöн да сьöд печальлöн, а югыт да кокнит гажлöн. Гажмыштöм сьöлöмсянь да кокнит лов пыр инькаэс сэк баитлiсо: «Истиннöй Кристос да Ен-батюшко! Эм жö тай эшö сiя, тыдалö, миян юр весьтын. Вермис эд, батя, видзöтö жö, инькаэз, гöрдыс, вермис. Сiдзкö и тöждыны öддьöнсö нем — вермасö, сiдзкö, фронт вылас миянiссес и войнаыс чожа кончитчас». Мый эшö эстöн висьтассяс столббес орсöм йылiсь? Ог думайт, что эта природнöй явленнёыс вермис кыдзкö йитсьыны войнася событиеэзкöт. Но что сiя вöлi миян деревняись отир понда кытшöмкö фронтовöй барометрöн, дак эта быль, кыдз и сiя, что гöрддэс — миян гöрд армияыс — и былись вермис. Быль и сiя, что öнi кытчöдз войнаыс абу и столббес оз орсö. А отирлöн сэтшöм поверьёсянь нылöн орсöмыс оз и ков.