Глава IX

Сiя жö кадö, кöр Сизёв петiс аслас важ квартираись да локтiс овны Чистоеввез ордö, видзчисис и путёвка, мед мунны виль автомашинала. Зонка тöдiс: быдсöн автоколонна пасьта сы автомашинася умöльжыкыс сэсся некнилöн оз адззись. И сибöтчис кö кад вежны кынымкö важ автомашина виллез вылö — сылiсь разьсьöмсö медодз. Эд кöсйисис жö Егор Егорович сылö отсавны.

Но не сiя лунö, не ашынас путёвкаысла Сизёвöс сiдз и эз корлö. Куимöт лунас кывсис: виль автомашинаэз вайöтöмöсь, сулалöны гортын ни. Сэк вöлись Сизёв и вежöртiс — справедливостьыс вылö надейтчöм весь. Зонка вились иньдöтчис директор дынö, но мöдыс эта коста вöлi отпускын ни.

Удж вывсянь гортö Сизёв бертiс гажтöмкодь. Пызан саяс, ужин коста, пукалiс кымöра да лöнь. Ужнайтöмыс бöрсянь сэк жö водiс, кöть и узьнытö вöлi эшö одз. Рытывбыт зонка куйлiс чöлöмöн, думайтiс. Но сэтшöмыс, мыйсянь бы позис вежны, бурсьöтны ассис положеннёсö, сiдз нем юрас и эз пыр. Босьтны расчёт да вуджны мöдiклаö? Но эд и мöдiк местаын медодзза кадö виль автомашинасö тожö оз сетö. Мунны мöдiк удж вылö Сизёвлöн охота эз вöв. Кольччис öтiк — одззамоз мырсьыны важ самосвал вылын, видзчисьны буржык кад. Эта вылын зонка и лöньсис, кыдз бытьтö виль автомашинаэс йылiсь нем эз и тöд. Нельки механикыскöт, Егор Егоровичкöт, кöдакöт öнi олiс сiя ордчöн и часто рыт-асывнас удж вылö да гортö ветлiсö öтлаын, аслас разьсьöм автомашина йылiсь Сизёв сэсся эз баит. Вöвлi кö сiя дзонь — уджалiс, жугавлiс — Сизёв пыравлiс гаражö, одззамоз вочис.

Сiдз и кыссисö месяц бöрын месяц. Виль год бöрас вились вачкисö мороззэз да сэтшöмöсь, что нельки меднюдз сталь мунiс ротшкöп, кыдз стекло. И эстöн зонкалöн автомашинаыс вились жугалiс да сiдз, кыдз эшö некöр эта вотöдз: бетоннöй блоккез увтын, кöднö Сизёв кыскис станциясянь, чегис рама.

«Но и но. Öнi кытчöдз вильсö дорöтан, сiдз и тöд: тöлыс быдсöн чулалас» — и лöгсорöн, а öткоста кытшöмкö вежöрттöм гажöн думайтiс Сизёв. Но дорöтны виль рамасö зонкалö эз ни ковсьы.

Ашынас Егор Егорович вайöтiс сiйö ГАЗ-52 дынö, висьталiс:

— Вот. Пуксьы да уджав кытчöдз. Сы вылiсь шофёрыс больницаын куйлö. А кöр петас — ачыс ен оз тöд.

— А ассим разьсьöм телегасö кытчö?

— Жаль янсöтчынытö?

— Янсöтчынытö, Егор Егоровнч, и абу жаль, но пола, что мöдiклö вермас сюрны. Пондас сэк мортыс ме моз жö мырсьыны.

— Эн пов, оз. Металлолом корöны, дак ми сы вылö талун жö акт сувтöтам. Шупкалам торрез вылö да иньдам.

Сэк вöлись Сизёв ловзисис кокнитжыка, кытшöвтiс автомашина гöгöр, видзöтiс. Сiя вöлi тожö важкодь ни, но сувтöтны ордчöн киссьöм самосвалыскöт эз позь: кытчöдз быдöс дзонь. Эта сьöртi ни позис вежöртны, что уджалiс автомашина вылын бытшöм мывкыда, техникасö радейтiсь морт, кöдалö сы вотöдз, кыдз натьтö и Сизёвыслö жö, не етша усис мырсьыны важ машинаэз вылын.

— Гленитчö, оз невестаыс?

— Ог тöд эшö. Видзöтам вот, кыдз сiя асьсö уджас мыччалас.

— Не век тэныт и сы вылын пукавнытö. Уджав кытчöдз, — Егор Егорович сетiс зонкалö автомашина бердiсь ключчез, мунiс. А Сизёв сэк жö осьтiс кабина, пуксис руль сайö.

Мотор заводитчис перыта. Машина кокнита вöрзис местаись. А чожа мый Сизёв вашöтiс ни станция ладорö. «Ичмонь» кывзiсис бытшöма. Лöня уджалiс мотор. Эз кыв кöртлöн кöрт бердö зыртчöм да виксöм. Эз жеркöтö ыбöсоккез. Эз дзурт дзонь кузов. Волькыт местаöт автомашина мунiс перыта.

Бертiс Сизёв бöр рытланяс, но талуння рейс бöрсянь эз кыв некытшöм мыдз. Сiйöн зонка и гортö öддьöн эз тэрмась. Медперво сiя кежалiс заправкаöдз, мед ашын асывсянь чожажык вермыны петны рейсö. Гаражас Сизёв эшö вель дыр бергалiс автомашина гöгöр: чышкис, мавтiс, лöсьöтiс. А кöр быдöс коланаыс вöлi керöм, кежис Егор Егорович дынö, кыкöн ни иньдöтчисö гортö.

— А одз тэ талун, видзöта ме да, гортö бертiн. Батi, эн и вовлы станцияöдззис да...

— Вовлi жö. Столовöяс дзир эг пырав. Грузитчи да и бöр.

— Сiдз тшыгйöн лунтыр и ветлöтiн? А пуксьöтны кö тэнö виль машина вылö? Сэк эд и нач сёйнытö он понды. Кыдз машинаыт?

— Да кыдз висьтавнытö... Кывзiсьö. Кокнит. Чож. Мöдыскöт ордчöн он сувтöт. Но моторыс, кылö, вынтöмöв.

— А сiдз уж. Сэтшöмöсь ны вылын сулалöны. Но да мый керан? Вывтi тöбавны он понды — кыскас, — эстöн Егор Егорович мыйкö дырна чöлыштiс, öзтiс куритны, одзлань висьталiс: — Но, а тöдан жö кöть, он, кин тэ виль автомашина вылö пуксис?

— Менам вылö, шуат? Эз на вöвлы кытчöдз менам сэтшöмыс да...

— Вöлi сiя тэнат, позьö шуны, да вот... — Егор Егорович паськöтыштiс öтмöдöрö киэзнас — адззан пö вот, кыдз вермис петны.

— А кыдз, Егор Егорович? Нем тай ме мыйкö ог вежöрт.

— Нем он тöд, сiйöн и он вежöрт. Но кывзы вот, висьтала. Ме эд тэ бöрсянь эшö ачым директорыс дынö баитнытö пыралi, и баитчим ми сыкöт кыдз колö. Ме дырни жö сiя и диспетчерыслö звонитiс, мед тэнö виль автомашинаысла ыстыны.

— Но и мый?

— А сiя и эм, что рытсяняс путёвкаыс вöлi гижöм тэ ним вылö, а ашынас тэ местö механикыс мöдiк мортöс ыстiс.

— Кинöс?

— Пестеровöс, вот кинöс.

— Дак сiя жö вöлись таво арнас уджавнытö татчö локтiс, и машинаыс сылöн менамся буржык вöлi. Кыдз жö сiдз?

— А сiдз вот. Кужöны сэтшöммес овнытö. Кывсьö, бытьтö бы пö сiя лунö Пестеровыс главнöйсö гортöдззас гöститöтны нуöтлöм. А мöдыс винаыс понда и ловсö сетас, не только машинасö. Сiдз вот, зонö, миян эшö керсьö.

— Дак меным, Егор Егорович, öнi сiдз жö я мый я керны?

— Сымдасö ме тэныт эг висьтав. Векöс овтöн ачым öтпырись сiдз эг кер, и томмесö некинöс эг велöт. Висьталi вот, кыдз отирыс керö. А тэ, ме тöда, некöр сымдасö он кер.

— Мыйöн тöдан? Ме, батi, кыдзкö эшö буржыка верма.

— Ме ог и шу, что он вермы, да кернытö дзир Пестеровыс моз он понды. Этö ме öнöдз вежöртi ни, сiйöн веськыта, кыдз эм, и юöртi тэныт.

— Сiдз кыдз öнi Сизёв и ачыс ветлiс буржык автомашина вылын, Егор Егоровичлöн юöрыс зонкасö öддьöн эз дойд. Мыйкö дырна сiя эшö и видзсис тöдвылын, но бöртiжык жагвыв пондiс вунны. И дзир сэк, кöр Пестеров пантасьлiс аслас виль автомашина вылын, Сизёвлiсь мороссö мыйкö сё жö дзескöтiс. И вöвны кö бы Пестеровлö лöньжык мывкыдаöн, не ошшасьны мöдiккез одзын, видзöтан кö, быдöс бы и чулалiс. Но...

Кыдзкö суббота лунö Сизёв тэрмасис станциясянь: рытнас зонка лöсьöтчис пывсьыны. Аннушка эшö асывсянь юöртiс, что пондас банничайтны.

Сэксянь, кöр Сизёв пырис Чистоеввез ордö квартираö, городскöй баняö сэсся эз ветлы. Антон Васильвичлöн баняыс вöлi аслас, и лонтiсö сiйö быд неделя. Вот и талун Сизёв тэрмасис сы понда жö, мед не сёрмыны пывсьыны.

Станциясянь зонка петiс одз. Но джын тун гöгöрас, кыдз нарочно, моторыс мыйсянькö пондiс пöдны. Öтпыр-мöдöтпыр сiя несйыштiс, дзик волькыт местаöт тэрмасьтöн мыдзöм вöв. Ковсис сувтны.

Сизёв пырис капот увтö, пондiс гуддисьны. Эта коста бöрсяняс кылiс автомашиналöн сибöтчöм. Сизёв недырик кежö лэбтыштiс юрсö, перыта мышкыртчис бöр. Сибöтчис Пестеров. И вöлi бы унаöн буржык, мунны кö бы сылö сувтчывтöг. Но Пестеров дзик нарочно кошшöм сыкöт пантасьöмсö. Сiя перыта одзалiс зэв бокöттяс, чапкис газ. Öтпыр-мöдöтпыр горöн пишкыштiс тормоззэзöн лэдзöм ру, автомашина сувтiс. Пестеров петiс не тэрмасьöмöн, дзик ошшасьöм могись, кыскис кармансис пачка «Беломорканал», öзтiс куритны, жын-жын чужйис кокнас бöрись колесосö, иньдöтчис Сизёв ладорö. Эта сьöртi ни позис вежöртны, что суббота увья сiя юыштöм.

Сизёв, ась сiя и шофёр, вöлi ылын не ны коласiсь, кöдна томсянь велалöмöсь вина рюмка бердö, оз вермö видзны асьнысö нельки удж коста, руль сайын пукавтöн. Сiйöн, кыдз асьсö код мортсö, сiдз и сылiсь баснисö, зонка терпитны эз вермы. Сэтчö жö виль автомашинаыс увья Пестеров вылö лöгыс öнöдз эшö шайялiс сы моросын.

Ванйöв паськöтöм пась полаэзöн Пестеров сибöтчис Сизёв автомашина бердöдз, пиннес пыр швычкис-сьöвзис, бытьтö кытшöмкö абутöмкодь тор йылiсь горöтчис:

— Дак жугасим бöра, шуан?

Кывны бы Сизёвлö этнö жö горöтчöм кыввесö кинсянькö мöдiксянь, позис бы примитны нiйö шутка местö. Но Пестеровлiсь горöтчöмсö зонка вежöртiс, кыдз ас вылас сералöм. Юрыс пондiс сьöктамны вывлань чепöссьöм вирсянь, синнэс одзын пемдыштiс. Кыдз позис видзсьöмöн да лöня Сизёв паныт горöтчис:

— Не сытöг, — жагвыв пöдналiс капот, кыскис зепсис неыджыт рукля тор, пондiс чышкыны сы бердö мазьöсьтöм киэсö.

— И мыла тэнат, кывзы жö, оз быр эта важ няридз вылын пилитны?

— Кин сiйö тöдö. Бырö жö, батi, да... Мылаысся мортыс мывкыдын эшö и мöдiк торрез эмöсь.

— Философ тэ, кывзы жö, Сизёв, кыдз ме видзöта дак, — Пестеров горöн ваксьыштiс, вились швычкис-сьöвзис. — Философ, да. Но миян уджын философиясö нач нем вылö, вежöртан тэ сымдасö, он? Философия ― сэтшöм тор, кöдасянь не код, не пöт он ло. Сiйö и карманö деньга местö он пукты, и öмö он сюйышт. Ась уж сiйöн, кинлö колö, занимайтчöны, а миянлö сiя оз ков.. Миян философия — туяна машинка и дöс сэтöн!

— Кинлö кыдз...

Но Пестеров бытьтö эз и кыв Сизёвлiсь паныта шыасьöмсö. Сылö талун охота вöлi баитны, и мед сiйö кывзiсö. Сiйöн одзлань зонка пондöтiс:

— Эд и менам перво, кывзы, тэнат кодь жö картинаыс вöлi, тожö тэ кодь нярьян вылын ветлi-мырси. Но ме сiйö перыта ас дынсим кылöтi. Кытшöм интерес том мортлö разьсьöм розваль вылын ветлыны да лунiсь лун сiйö вочны.

— Кин уж кыдз вермö...

— А тэ бытьтö сымдасö он вермы?

Рукля торсö, кöдöн öнöдз зыртiс Сизёв ассис мазьöсьмöм киэсö, öнi сiя сюйыштiс бöр зепас, ачыс нырыштчыштiс гырдззанас автомашина крыло вылö, первуись дзар керыштiс веськыта Пестеров чужöмö, серöмтчис.

— Да кыдз тэныт, Пестеров, висьтавнытö? Тöда, что тэ нетуяна автомашинасö кылöтiн. Но сэтшöм я донтöма сiя тэныт сувтiс, кыдз тэ эта йылiсь думайтан да ошшасян-баитан? Ог пондö касьтывны винаыс йылiсь, кöдö ковсис юктавны виль автомашинаыс понда. Но öтлаын важ автомашинаыскöт тэ эд и совестьтö ассит кылöтiн. Тэ бытшöма тöдан, что автомашинасö, кöда вылö пуксин, татöн уджавтöн эшö эн шедты. А сiйö разь вунöтiн, кин путёвкаöн сыла ветлiн да кин местö вайöтiн? Сымдасö не быдыс вермас. Сэтшöмсö дзир тэ кодь совестьтöм мортсянь и позьö видзчисьны.

Сизёвыс баснисянь, дзик синнэзас сьöвзьöмсянь, Пестеров зэгöтыштiс юрнас, веськöтчыштiс. Но паныта кывнас чожа эз адззись. А Сизёв одзлань баитiс:

— Автомашина, эта сэтшöм тор, кöдö позьö вочны, кöр сiя жугалас, вежны — кöр важмас. Мортлiсь жö совестьсö не вочны, не вежны некытшöм мöдiк вылö некöр оз позь. Сы вылö дöмассö он пукты, и вились сiйö он дорöт. Мортлöн совестьыс век кежö дзир öтiк. И тальны кö сiйö öтпырись кок увтын — некыдз да немöн сэсся он ни миськав. Эта бöрсянь сiя век сьöрна лоас нятьöсь. А кылöтны кö сiйö тэ моз жö, автомашина понда, эта бöрсянь сiя и нач оз ло. А овны совестьтöг отир коласын — сiя жö, кыдз нагöлеч пасьтöмлö паськöмаэз коласын.

Сизёвыс баснисянь, кöдö Пестеров, тыдалö, эз видзчись, öнi сiя и нач öшис. Зонка вель дыр котрасис öтмöдöрö синнэзнас, нöитiс чуннес коласын биа папироскасö и вöлись горöтчис:

— Кысь тэ тöдан, кин местö ме сiйö вайöтi? Тэныт сы вылö путёвкасö эз сетлö.

— Бöбöтчан, Пестеров, сетлiсö. И пуксин кö тэ совестьтöг шедтытöм эшö да йöз автомашина вылö, дак кöть бы чöлiн ни, эн ни бы тальöм совестьнат ошшась. А тэнат эд нельки сы вылö ни ылöсыт оз тырмы.

— Тэ киись ме путёвкасö эг мырддьы. Меным сiйö ачыс главнöй механик сетiс, колö кö тэныт тöдны дак.

— Сiйö ме и тэтöг ни тöда.

Одзлань горöтчынытö Пестеровлö кольччис нач нем. Сизёвыс пöлöн мыйкö дырна сiя эшö нёджжасьöв-керис öтмöдöрö.

— Ме тэныт, кыдз ёртлö, совет мöдi сетны, а тэ... завидыт увья... — Пестеров шупкис кок увтас нöитöм папироска, бокöн моз иньдöтчис аслас автомашина дынö. Не одззася юыштöмыс, не вывтырнас ошшасьöм-чегласьöмыс сы мыгöрын öнi эз ни тыдалö.