Маньчжурскöй орех

Кытшöм жö челядь оз радейтö ореххез, нiйö жö, шуам, грецкöйесö, лещиналiсь нето сыспулiсь. Эд быдöнныс нiя и чöскытöсь, и öддьöн пöтöсаöсь. Ныын эм уна жир (гос) да быдкодь витаминнэз. И быдмö кö миян вöррезын, а шочыника и мукöд саддэзын сыспу, то не лещина, не грецкöй орех озö быдмö. Нiя радейтöны овны-быдмыны шонытжык местаэзын, а миянлiсь уральскöй мороззэсö терпитны оз вермö — кынмöны. Сэтчö жö и гожумыс миян ны вегетация понда дженыт, оз тырмы. Но эм быдöнныс коласын эшö öтiк вид — орех маньчжурскöй. Кытшöм жö эта быдмас?

Маньчжурскöй орехлöн гортыс — Приморскöй да Хабаровскöй край. Быдмö сiя сэтчин кыкдас-кыкдас вит метр сувдöн, а му бердсяняс дыныс вермас лоны, кыдз и топольлöн жö, быдса метр кыза. Шочыник, но кыз да ён уввесö сiя, кыдз и монгольскöй дуб жö, паськöтö шатёрöн öтмöдöрö вель паськыта. А сы бердын гожум кежö петöны да быдмöны быдса метр кузя листтэз, кöдна невночка вачкисьöны ясень листтэз вылö. Думайтны эд только! Сы гырися листа пуэсö миян вöррезын некöр он пантав и, вежöртана этасянь, что не кыдз, не пипу, не льöмпу, не сирпу сыкöт ордчöн некöр он сувтöт. А ореххес пу вылас шогмöны сэтшöмöсь жö, кыдз и грецкöйес. Медбурыс жö маньчжурскöй орехын — что мороззэзiсь сiя оз пов. А сiйöн, что пугырыс сылöн, кыдз и дублöн жö, оссьö мöдiк пуэзся сёрöнжык, то и тулысся сёрöн кынтöм-пужмалöмыс да кöдздöтлöмыс сылö нем туйö.

Томсянь маньчжурскöй орех быдмö перыта, гожум сьöрна — джын метр сувдöн, а то и джуджытжыка. Но мусö сiя радейтö бытшöмö, кокнита да рышкытö, кытöн тырмис бы öткоста и ва. И сiйöн, что маньчжурскöй орех оз пов кöдзыт тöв шогья, сiя вермас быдмыны и миян климатическöй условиеэзын. Талун кежö эталö эм нельки öтiк пример.

Öнöдз эшö тöдвылын, кыдз ме аслам корöм вылö босьтi сизимдасöт годдэзö истöг коробок ыжда ящичокын посылка. Ыстiсö сiйö меным Владивостокскöй дендропаркись нач тöдтöм да бытшöм отир. Ящичок пытшкас вöлiсö пуктöмöсь вит маньчжурскöй орех — вежöртана, не гöстинеч местö. Вит орехыс коласiсь куимыс вöлiсö тöдчöмöн гырисьжыкöсь. Садитöмыс бöрсянь нiя, тыдалö, и петалiсö, сiдз кыдз петассэс вит орехсис вöлiсö дзир куима. Мöдiк годö куим сеянецыс коласiсь öтiкö ме сетi быдтыны В. М. Ермаковалö, кöда олö Филичын, Маяковскöй нима улица вылын.

Сэксянь чулалiс дасвит год гöгöр. А этöн каднас и оланыс тöдчöмöн вежсис. Меным ковсис вежны ассим оланiн и кольöм усадьбаын орехлöн кык сеянецыс кытшöмкö причина увья ловйöн эз кольччö. Овнытö сэксянь кольччис дзир öтiк — Валентина Михайловна ордын. И вот...

Уна год бöртi ми пантасим вились. Керку бердын ойвыв ладорсянь, палисадниклöн пытшкись пельöсын, неылын пыранiн дынсянь öнi ме одзын сулалiс нач тöдтöм да нач вачкисьтöм мöдiккез вылö кык вожа пу. Сiя джын метр сувдышта петасiсь, кöдö ме сетi Валентина Михайловналö кöркö, чулалöм каднас ештöм лэбтiсьны куим метр сувда адззывлытöм пу, да чуть я не сы пасьтöн жö паськöтöм ассис уввез. Видзöтi ме öнi сы вылö и аслам синнэзлö эг верит. Эд ме одзын сулалiс не пипу нето кыдз, не льöмпу нето тополь, а маньчжурскöй орех, кöдö эта вотöдз миян округын некин и вöтöн эшö эз адззывлы.

Вовлi ме аслам пукöт адззисьлöм могись апрель месяцö, кöр пугырыс потнытö эшö эз ешты и сiя сулалiс листтöг. Но эта коста бытшöма позис адззыны да видзöтны сы уввез вылö. А нiя, шочöсь, ёнöсь да дзик нарошно волькöтöмöсь, вачкисисö мыйöнкö айпöв кöр сюррез вылö.

Меддивуйтанаыс жö эстöн не сiя, что миян сьöкыт климатическöй условиеэзын вермö быдмыны, кöть бы отирыслö мыччасьöм могись ни, маньчжурскöй орех. Меддивуйтанаыс — что орех пондö цветитны да нельки сетны плоддэз.

Басниыс коласын Валентина Михайловна юöртiс, что цветитiс маньчжурскöй орех кык год сьöрна ни и шогмисö сы вылын этöн каднас нёль орех. Жаль только, что дженыт гожум увья вонытö нiя пу вылас быдсöн оз ештö. Но что ачыс орехыс олö миян округын сымда год сьöрна ни, эта öддьöн бур. Садитöм сiя вöлi 1975 годö. Сiдзкö öнöдз сылö тырис дасвит год.

Быдсöн округ пасьта талун кежö эта дзир öтiк пу — ловья природнöй памятник, и, вежöртана, что сы сьöрын колö бытшöма синйыны. И эстöн ме рад сылö, что куим петасыс коласiсь кöть öтiкыс сюрис бытшöм морт киэзö, кöда сы дырна ни мыдзтöг да бытшöма дозирайтö сы сьöрын. Кин тöдö, батi этö рассказсö лыддьöтöм бöрсянь адззисясö отир, кöднаын саймас охота не только адззывны сэтшöм диковиннöй пусö, но и быдтыны сiйö аслыныс. А эта понда колö дзир öтiк тор — охота.