Виль ягöд

Сюрис меным кыдзкö лыддьöтны «Приусадебнöй хозяйство» журналiсь öтiк интереснöй статья. Сылöн авторыс, сельскохозяйственнöй наукаэзлöн кандидат, Б. Москаленко, олö да уджалö Ставропольскöй крайын.

Аслас статьяын автор норасьö сы вылö, что миян сад радейтiсь отир то ли вунöтчисö, то ли öнöдз нем оз тöдö öтiк öддьöн интереснöй да колана миян саддэзын ягоднöй культура йылiсь, кöда нельки шусьö сэтшöм жö интереснöя — магония падуболистнöй, — лажмытик да вексö зелёнöй кустарник.

Дасгодся магония кусттэз метр да джын сувдася вылынжыкöсь оз и овлö. Сы пасьтöн жö вермасö паськавны öтмöдöрö и сылöн уввез. Листтэс тöв кежас оз киссьö. Мукöдыс ны коласiсь краситчöны ар кежас бурöй-гöрд рöмö. Тулыснас том листоккес медперво тожö гöрдкодьöсь, а гожум кежас нiя лоöны пемыт-зелёнöйезöн да басöка свиттяланаэзöн.

Гортыс эта быдмаслöн — Севернöй Америкаись рытвывся районнэз. Миян странаын сiйö позьö быдтыны чуть я не быд климатическöй зонаэзын — Крымсянь да Кавказсянь тшöтш Архангельскöдз. Магония оз пов мороззэзiсь, бытшöма цветитö да аркмöтö ягöд сэтшöм районнэзын, кыдз Казань, Москва да Ленинград. Вылынжык ойвывлань местаэзын невна колö вевттьывны тöв кежö сылiсь вужжез. Ачыс кустыс кынмö дзир сэк, кöр вевдöрсяняс тöв кежö етша усьö лым.

Магония бытшöма быдмö вуджöрын, дзир ягöдсö сэк сетö етшажык. Россиялöн шöрöт полосаэзын цветитö майнас.

Цветтэс ув поннэзын чукöртöмöсь веськыт сыррезö квать-дас сантиметр кузьöн. Нылöн югыт-виж рöм да чöскыт дук вылö бытшöма локтöны мошшез. Ягöддэс магониялöн негырисьöсь, кузьмöсакодьöсь, сантиметр кузяöсь. Рöмнаныс воöммес пемыт-лöзöсь, шöмакодь-чöскытöсь. Воöны нiя сентябрьпонö, а куст вылас вермасö видзсьыны вит месяц сьöрна и кöрнысö этöн каднас оз öштö. Киськалöмöсь сахарöн магониялöн ягöддэс бытшöма тöвйöны стекляннöй банкаэзын. Этна жö ягöддэзiсь позьö пуны вареннё, кисель, компот, сок, пюре, желе да сiдз одзлань.

Магония вермас быдмыны кöть кытшöм почва вылын, но бытшöмжыка — перегнойöн да песокöн сорлалöм му вылын.

Быдтыны сiйö позьö кöдзысiсь, кöднö кöдзöны öктöм ягöдiсь пидзыртöм бöрсянь. Магониялöн кустыс бытшöма петö и летöрöс ^вужжезсянь. И нырыштны кö нiйö тулыссянь му бердö да тыртны муöн, ар кежас вужьясясö да зорамасö виль кустиккез виль местаö садитöм понда. Бытшöма кутчисьöны и череноккез, кöднö позьö вундавны кыдз арнас, сiдз и тулыснас.

Мыйлö ме сэтшöм паськыта висьтася виль культура йылiсь? Не сiйöн я, что, кыдз гижö аслас статьяын Б. Москаленко, сад радейтiсь отир то ли вунöтiсö, то ли нем оз тöдö сы йылiсь? Ог вермы висьтавны, кыдз мöдiк местаэзын. Но бытшöма тöда сiйö, что миян округын сад радейтiсь отир талуння вотöдз магонияыскöт и былись нач тöдтöмöсь. Некин ны коласiсь этö культурасö эз адззыв. А думайтны кö сы сьöртi, что некытшöм садоводческöй литератураын сы йылiсь нем оз гижö, то и кывны, лыддьöтны вöлi некытiсь. Но висьтася ме сы йылiсь не только эта причина кузя. Медколанаыс эстöн, думайта, сыын, что магонияыс, сiдз жö, кыдз, шуам, ирга да крыжовник, вишня да гöрд льöм, арония да облепиха, вермас лоны виль садовöй культураöн быдсöн округ пасьта сад радейтiсь отир саддэзын.

Одзлань ни повтöг верма висьтавны, что не сорасьöм некытшöм, не бöбöтчöм эстöн абу. Вылынжык висьтасьöмись лыддьöтiсь öнöдз, натьтö, вежöртiс ни, что быдмö кö магония Казань, Москва да Ленинград районнэзын да сэтчö жö эшö бытшöма кö тöвйö лым увтын, то оз ло сьöкыт велöтны сiйö быдмыны и миян климатическöй условиеэзын.

Висьтассяс и унажык. Позьö шуны, что эта виль да тöдтöм эшö кытчöдз садовöй культуракöт, кыдз кöркö и иргакöт, округись сад радейтiсь отирлö бытшöма лöсялiс. Округас магонияыс важын ни пыртöм и нельки быдöс испытаннёэз пыр öнöдз ештiс мунны ни. Эстöн лыддьöтiсьлö, натьтö, интересно лоас тöдны и сы йылiсь, кыдз да кöр эта вермис лоны. Кытшöм ылöса да бытшöм морт керис миянлö, коми-пермяккеслö, сэтшöм колана козин?

Великöй Отечественнöй война коста, 1944 год конецö ранитöмöн сюрис миян военнöй госпитальö (вöлöм сэтшöмыс война коста Кудымкарас) томыник лейтенант Богданчик Пётр Нестерович. Гортнас сiя вöлi Белорусияись. Госпитальын куйлытöн том да гöтыртöм эшö сэк кежö лейтенант тöдсасяс аскодяс жö томыник коми-пермячка медсестракöт, кöда уджалöм эта жö госпитальын.

Кытчöдз Пётр Нестерович веськöтчас да вились сувтас коккес вылö, сэк кежö и войнаыс чулалас. Сэк том лейтенантлö да медсестралö нем мöдiк оз кольччы, кыдз орсны свадьба да öтлаасьны, мый нiя и керасö. Но гортас, аслас Белорусияö, Пётр Нестерович оз тэрмась. Войнакостася фашистскöй оккупация бöрсянь локнытö сэтчин вöвлöм нем дорö. Сэтчö жö и некытшöм гражданскöй специальность (профессия) сэк кежö сылöн эз вöв. Сэк том лейтенант поступитас велöтчыны Кудымкарскöй лесотехникумö, лесохозяйственнöй отделеннё вылö.

Техникумсö бытшöма кончитöм бöрсянь Пётр Нестерович и уджавнытö кольччис сэтчö жö, учебно-опытнöй участокись лесничöйöн. И колö висьтавны, что кыдз вöрсö, сiдз и ассис уджсö том лесничöй радейтiс бытшöма. Эстöн уджавтöн сiя сувтöтiс ас одзас задача — садитны учебно-опытнöй участок территория вылын дендрарий, кытчö позис бы чукöртны быдкодь пуэз да кустарниккез, кöдна оз быдмö асьныс округ пасьта природаын, но, кöдна пыртöмöсь шонытжык местаэзiсь, вермисö бы велавны миян климатическöй условиеэз дынö.

Пондöтöм уджыс кыссис не öтiк год сьöрна.

Медодз вöлi бöрйöм дендрарий увтö участок да сувтöтöм план. А сэсся, эта план сьöртi, пондiсö садитсьыны быдкодь пуэз да нач эшö тöдтöмöсь миян местаын кустарниккез. Унажыкыс ны коласiсь то ли вöлiсö вайöмöсь, то ли ыстöмöсь посылкаэзöн Москва увтiсь Ивантеевскöй питомниксянь. Сэтчинсянь жö ыставлiсö и колана кöдзыссэз, кöднö кöдзöм бöртi быдмывлiсö виль пуэзлöн да кустарниккезлöн саженеццез. Сiдз первуись эта дендрарийын вöлi садитöм остролистнöй клён, не öтiк вид боярышниклöн да öддьöн и басöк городскöй озелененнёын туя западнöй — лыспу. Виль кустарниккез коласiсь: чочком свидина, пузыреплодник калинолистнöй, айва японскöй, кизильник блестящöй, трескун амурскöй (сирень), черёмуха Маака, гранатнöй рябина и, конешно жö, магония падуболистнöй.

Быдöс эта уджыс вöлi керöм эшö 1960-й годдэзö. И нiя пуэс да кустарниккес, кöдна оз полö миян кöдзыт климатiсь, не только быдмöны, но и цветитöны годiсь годö да сетöны то ли кöдзыс, то ли ягöддэз.

Ме, виль пуэсö да кусттэсö радейтiсь морт, старайтча вöвлыны эта дендрарийын быд год. Не интересно разь ветлöтыштны шоччисьöм могись сэтшöм пуэз да кусттэз коласын, кöднö округ пасьта вöррезiсь некöр он пантав? Быдöскöт ныкöт, кöдна вöлiсö казьмöтöмöсь вывланьын, пантасьнытö позьö дзир эстöн. Кытшöмкö годö, одз тулыснас, эстöн меным первуись усис адззывны, кыдз, кытшöм югыт гöрд-виж биа рöмöн, дзик сотчö, цветитö гырись да басöк цвета хеномелес — айва японскöй. Эстöн жö адззылi кизильник вылiсь несёяна ягöддэз, кöдна овлöны коричневöй рöмаöсь и свиттялöны, дзик бытшöма зыртöм галька. Эстöн жö ме öктывлi свидиналiсь да пузыреплодниклiсь кöдзыссэз, кöднаись бытшöм саженеццес важын ни пöрисö гырись кусттэзö ме öшын увтын.

Кытшöмкö арö, а вöлi эта даскыным годöн одзжык, дендрарий пасьта ветлöттöн менö сувтöтiсö магониялöн кусттэз. Эта вотöдз нылiсь цветитöмсö адззывлыны меным и эз усьлы. А эстöн, видзöта, кусттэс вылын ягöдоккез öшалöны. «Сiдзкö, цветитö», — дивуйтчыштi ас кежам. Кусттэс весьтö матöжык мышкыртчöмöн ме нельки босьтлi киам кынымкö ягöдок. Бытшöма ни воöмöсь сэк кежö, нiя вöлiсö öддьöн небытöсь, кыдз öктöм бöрын дозын узьтöтöм чöд. Но сiя кадö эта быдмасыс и меным тожö вöлi тöдтöм. Мед казявтöг не отравитчыны, пешлыны ме нiйö эг лысьт, видзöтöмыс бöрсянь сэтöн жö лэдзалi кисим бöр.

Б. Москаленколiсь журналсис статьясö лыддьöтöм бöрсянь меным, вöлиськö, и усис тöдвылам эта важ тöдсаыс. Петö, что магонияыс, кöдö 1960-öй годдэзö первуись пыртiс миян округö Пётр Нестерович Богданчик, быдмасыс не только декоративнöй, но эшö и ягоднöй. Этасянь, вежöртана, медодз сiйö колö садитны не городскöй улицаэз вылö озелененнё местö, а садö, мед быдтыны ягöд понда.

Медбöрын эшö öтпырись кольччö касьтывны ирга йылiсь. И. Я. Кривощековлiсь округö пыртöм иргасö одзлань паськöтiс И. Ф. Овчинников. Этöн нiя кыкнанныс колисö коми отир тöдвылын бытшöм да тöдчана след. Историяыс повторяйтчö. И мый баитсяс сы йылiсь, мед быдтыны магониялiсь саженеццез да пыртны сiйö миян саддэзö кыдз виль садовöй культура — колö И. Ф. Овчинников кодь сад радейтiсь морт-энтузиаст. Дак неужто миян округын некин сэтшöмыс оз адззись, мед керны ас отир понда бытшöм удж да кольны этöн ас йылiсь ны тöдвылын бытшöм след? Надейтча, что этö рассказсö лыддьöтöм бöрсянь сэтшöммес адззисясö.

ЛЫСПУ

Сизимдасöт годдэз конецö ме уджалi «Горадзуль» пьеса вылын. Сэк меным и усис вöвны öтпырись Всероссийскöй театральнöй обществолöн Дом творчестваын семинаррез вылын, кöдна чулалiсö неылын Москва дынсянь Рузскöй районын.

Колö висьтавны, что Москва гöгöр вöррес, кыдз и климатическöй условиэс жö, миян сьöртöт тöдчöмöн мöдкодьжыкöсь ни. Сэтчин нiя унажыксö лиственнöйöсь, кöдна коласын, ордчöн кыдзкöт, пипукöт, бадькöт да ловпукöт, ась и шочыника, но несьöкыт пантавны и дуб, и клён. Кин видзöтчывлiс вагонiсь öшынö, поезд вылын Москва дыш сибöтчытöн, сiя этö тöдö бытшöма. А Дом творчествалöн территория пасьта озелененнё йылiсь, кöда сьöрын пыр дозирайтöны натодиль сувтöтöм отир, кыдз шусьö, и баитны нем. И цветтэсö клумбаэс вылiсь, и морт киöн жö садитöм-быдтöм пуэсö да быднёж цветитан кустарниккесö эстöн позьö пантавны вель уна. Вот кöть бы, шуам, сiйö жö лыспусö, кöдакöт ме первуись сэтчин и тöдсаси.

Вöлi Дом творчествалöн территория вылын неыджыт почтовöй отделеннё. А неылын, кынымкö оськöв ылына сы посöдз дынсянь, быдмис и эта пуыс. Лыса пуэз коласiсь эстöн сiя вöлi дзир öтнас. А сэтчö жö и том да нач неыджыт, метр куимся не джуджытжык. И ась сiя не улiсянь, не вылiсянь миян понуль вылö öддьöнсö и эз вачкись — и му бердсянь, и вылынжык сылöн тшöк лыса уввес кыссисö не вывлань, кыдз понульлöн, а паськалiсö непаськыта быд ладорö, — матынжыка тöдсасьтöдз, ме сiйö примитi понуль туйö. Этасянь, ордчöн шочыника ветлöттöн, ме сы вылö некöр бытшöмжыка и дзар эг кер. Мый вильсö позис казявны понуль вылiсь, кöда меным тöдса учöтсянь?

А öтпырись ме сёрми почтаö. Ыбöс бердын öшалан замоксö казялi тшöтш сiя кадö, кöр сибöтчи зэв эта понуль бердöдз. Досадасянь öшöмкодь, сэк ме сувтчыштi аслам думаэз коласын. Эта коста и усисö син вылö адззывлытöм эшö эта вотöдз да нач тöдтöм, поснитик да руд рöма, топ и топ кыдз таг шест вылын косьмöм таглöн жö, голиэз. «Голиэз? Понульыс вылын?.. Интересно...» — думнитi ме ас кежам да сэтöн жö нюжöтчи öтiк бердö кинам. Голиокыс вöлi небыт, чуть я не былись кыдз таглöн.

Öткоста этакöт усис син вылам и сылöн лыс, кöда понуль лысыс вылö тожö немöн эз вачкись, кыдз эз вачкись и мöдiк, тöдса меным пуэзлöн лыс вылö. Сiя вöлi аскодьöм не сiдз рöмнас, кыдз аркмöм-шогмöмнас. Буржык, натьтö, лоас висьтавны сiдз, что сэтшöм лысыс, кытшöм овлö миян пуэз вылын, эстöн эз и вöв. Эд лысыс лыса пуэс вылын, кыдз, шуам, кöз, пожум, ньыв нето понуль вылын — этö кузьöсь или дженытöсь, но быдкоста быдса еммез. Эстöн жö сэтшöм еммес эз вöлö. Эта местö быд неыджыт улок янсалiс йылас эшö поснитик, то сантиметр, то кык кузя улоккез вылö, кöдна и мыччассисö еммезнас. Но вöлiсö этна еммес не быдсаöсь, кыдз ньывлöн или кöзлöн, а йитöмöсь, дзик лякöтöмöсь öтамöд коласын зелёнöй рöма чешуя вылö вачкисян векнитик да поснитик листоккезiсь. Ылiсянь видзöтiкö этна поснитик улоккес и былись вачкисисö еммез вылö, мыйсянь быдсöн и ачыс пуыс мыччассис лысаöн.

Öддьöн дивуйтанаöн мыччассис пу матiсянь видзöтiкö, кöр бытшöма позис адззыны, кыдз быд неыджыт улок аркмöтöм унася-уна да кузя-дженыта быдмöм сэтшöм ув-лысоккезiсь. Эстöн ме вöлись и вежöртi, что ме одзын сулалö не понуль, а нач эшö тöдтöм мöдiк пу. И ась меным одзжык пантасьлынытö сыкöт и эз усьлы, дендрологическöй литератураись öтi-мöдiкö эта вотöдз ме сы йылiсь лыддьöтлi ни. Сiйöн жугдыны юр, мед тöдны, кытшöм виль тöдса сулалiс ме син одзын, дырсö эз ковсьы. Эта вöлi туя — кипарисовöй семействоись торья вид.

Вежöртана, что пуокыс меным öддьöн гленитчис. Сэтöн жö лоис охота, мед сiя быдмис и миян округын. А эта понда колiс öктыны сы голиэзiсь кöдзыссэз, вайны да кöдзны гортын, мый ме сэтöн жö и кутчи керны. Вöлi эта октябрь конецö, кöр кöдзыссэслö колiс лоны воöммезöн ни. Голиэзöн тыртöм карманнэзöн ме бертi бöр аслам номерö да сэтöн жö кутчиси одзланься удж бердö. Но кыдз усис вежöртны бöртiжык, быдöс эта лоис керöм весь. То ли пуокыс вöлi эшö томöв, то ли климатыс не сiя, но голиэзас кöдзыссэс эз вöлö. Ковсис дзир жалейтыштны да сы вылын и лöньсьыны.

Гортын ни, тöвсö чулöтöм бöрсянь, ме вились кыдзкö сюри лесотехникумлöн учебно-опытнöй участок вылö. И кöр эта жö лыспуыс, садитöм быдса аллеяöн, вились усис син вылö, öнi ме сiйö понульыскöт эг ни сорав. А что эта басöк пуыс сэк кежö округас вöлöм пыртöм ни, дак эта уджыс бöра сылöн жö, П. Н. Богданчиклöн.

Эта учöтик рассказын ме шуи туясö лыспуöн, сiдз кыдз сылöн чешуя кодь поснитик листоккезiсь аркмöтöм улоккес вачкисьöны унажыксö не лист, а лыс вылö. А кутчисяс я сылö эта ним, кадыс мыччалас.