Глава VII

Не правленнёö, не гортö сiя рытö Светлана эз тэрмась. Правленнёас уджалан кадыс чулалiс ни, а гортö нем эз видз локны и сёрöнжык. Кукань карта дынсянь нывка кежис деревня сайö, вуджис йöр, жагвыв иньдöтчис ытшкöм межа кузя, ыб пöлöн.

Вöлi мича да лöнь. Лажмыта öшалан шондiлöн кузя нюжалöм югöррес шонтiсö топ сiйöн öднас, кöдасянь эз вöв не жар, не кöдзыт. Быд рöма цветöн мöдöтчöм межа весьтын горöнжыка, ежели луншöрся кадö, кылiс мошшезлöн дзингöм. Кыдз заводитöмöсь, нiя койисö цвет вывсянь цвет вылö — вердсисö. Сiйö жö керисö и бабыввез, кöдна гырись и поснит лепестоккезöн быркайтiсö цветтэз да турун коласын. Ыб весьтын мыдзтöг öшалiсö ыбшаррез, унапöв кисьтiсö вылiсянь сöстöм питиртöм, кöда матынжык му бердас сорлассис мошшез дзингöмкöт кытшöмкö аскодьöм гажа, сьöлöм бурмöтан симфонияö. Му весьтас вöрöтчытöг сулалiс сылöтöм ма кöра ру, дзик кывзiсис ас пытшкын горалан музыкаö. Лунтырся удж бöрсянь шоччисьöм могись охота вöлi лэдзчисьны межа дорö, вештыны юрись быд лунся думаэз, мыдзтöг видзöтны эта аскодьöм, тыртöм колана смыслöн, олан вылö нето сiдз жö мыдзтöг, куньöм синнэзöн, кывзыны сылiсь му весьтын пизьöм, но... Таисьякöт лöсявтöм басниыс эз коль. Сiя öнöдз эшö вöлi тöдвылын, зорöтiс öтiк бöрсянь мöдiк очапаныта думаэз.

Заседаннёыс чукöртчис неделя бöртi. Сэк кежö Светланалö и колiс вайны куканьвöдитiссянь обязательствоэз. И сiйöн, что этаись нем эз пет, а öддьöнжыксö — что Таисья сэтшöм повтöма сувтiс поперег сы баснилö, зоотехник перво и былись обидитчис. Сымдасö том куканьвöдитiссянь, уджавнытö кöда вöлись пондöтчö, Светлана кыдзкö эз видзчись. Эта увья сiя и кеймисьны вывтi эз понды, бергöтчис, петiс. И вöлись öнi, эстöн ни, зоотехник жагвыв вежöртiс, что Таисьяыс ас мознас прав, и обижайтчыны сы вылö да эшö винитны мыйкö понда некыдз оз позь. Подакокувтыс, кыдз баитiс куканьвöдитiсь (этö зоотехник и ачыс тöдiс бытшöма), былись вöлi нетуяна. Сiдзкö, и ыджытжык привессэсö видзчисьны некысь. Петанiн вöлi дзир öтiк — колiс адззыны да вежны куканнезлiсь подакокувтсö буржык вылö. И сэк зоотехниклö вились усис тöдвылас, мый вöлi эта жö подакокувт да вердчан увья чулалöм годö.

Распределеннё бöрсянь, кöр Светлана, кыдз перво жö и охотитiс, сюрис ас районö, а сэтчинсянь и горт колхозö, сэк ни радувьяс думайтiс: «Эз эд, батя, счастьеыс ордйы. Гортö уджавнытö шедi. Эта жö öддьöн бур! Не тöдсасьны виль отиркöт, не велавны ны дынö оз ковсьы. Учöтсянь быдöнныс тöдсаöсь, асланым, кыдз шусьö. А ас отир коласын и уджавнытö кокнитжык лоас».

Уджавнытö пондöтчис тулыссянь, кöр подаыс вöлi лэдзалöм ни. Жугдыны юр вердчан да сiйö ваялöм увья, кыдз эта вермис бы лоны туйтöм арö нето тöвнас, джуджыт лым коста, öнi эз ковсьы. Лэдзалöм подалöн вердчаныс, кыдз баитсьö, быдöс кок увтас. Эта понда сiйö колiс дзир видзны турунажык местаын, кытöн и мöс, и кукань вердчис бы тырмöмви ачыс. Но эта бöрьяыс — турунажык подакокувтыс — порсевскöй бригадаыслöн и эз тырмы. Сiйöн годiсь годö быдöс, и колхознöй, и единоличнöй пода: вöввез, мöссэз, куканнез да баляэз олiсö öтлаын, öтiк неыджыт пар йöрын.

Чожа Светлана вежöртiс, что сэтшöм подакокувтын подасö видзöм-вердöмсянь прок некытшöм оз ло. Медбытшöм кадö эз вермö высьтыны мöссэзсянь мымда колö йöв, эз содö куканнезлöн привессэз. Кыдз мыччалiс медодзза жö öшлiсьöм, нiя вöлiсö вердчантöм тулысся кодьöсь жö. Но мый дивуйтiс зоотехникöс медодзза луннэзсянь, дак этö сiя, что не фермаись заведующöйöс, не асьсö председательöс (бригадир йылiсь дак и баитны нем) эта немымда эз вöрöт. Чулалiс кад, а подасö видзöм-вердöм, йöв да привессэз йылiсь некöдöрсянь, кыдз баитсьö, не шы, не тöв. Вачкисис — некинлö правленчи коласiсь сылöн уджыс, а öтлаын и фермаыс, и дарöм оз ков. Ны понда сiя вöлi да эз вöв. Светлана вопрос вылö: «Мый керны нетуяна подакокувткöт?» — фермаись заведующöй Иван Фролович Порсев, дзар керыштiс паныт порсьлöн кодь векнитик, дзуз видзан синнэзнас, ны сьöрö жö öвтыштiс кинас. «Мый тэ сэтöн керан? Не таво дзир миян сэтшöмыс — быд год сiдз овлö».

Эз гажöт немöн и председатель, кöда дынö нывка локтiс сёрöнжык сiйöн жö баснинас. Яков Терентьевич и тожö Порсев — эта фамиллёа вöлi джын деревняыс, не весь и ачыс шусис Порсеваöн — дзир паськöтыштiс киэсö. «Мый ме сэтöн кера, абу раз миян буржыкыс?» — тэрмасис кежöтны зоотехник вылiсь, он и вежöрт кытшöмöсь, то ли бурöй, то ли порсьлöн кодь жö гöрда югьялан да öтмöдöрö пышшалан синнэсö, мыйöн и сетiс тöдны, что эта вылын басниыс баитсис. И вöлись сэк, кöр зоотехник сiдз немтöг и иньдöтчис правленнёсис бöр, мöдыс, дзик часöт тöдвылас уськöтöмö, горöтчис:

— Думайт ачыт, мый кернытö. Тэ эд миян главнöй специалистыс.

И ась этна кыввес и вöлiсö висьталöмöсь сералöм сорöн (сiдз мыччассис зоотехниклö), Светлана эз лöгась. «Мый вылö?» Эта дженытик басниись нывка вежöртiс ни, что правленнёсянь отсöтсö видзчисьны нем.

«Сiдзкö, подакокувтöн петанiнсö колö кошшыны аслым».

Рытнас, гортын, ужнайтöм бöрсянь Светлана сибöтчис айыс дынö. Нывка одзлань ни тöдiс (не председатель, не бригадир, нельки не правленнёись член, кöть лоны сылö сэтшöмнас нем эз видз) — айыс немöн и оз отсав, но... сё жö...

— Висьталан, батi, ая, мый порсевскöй фермаыскöт одзлань керны? Гожум шöр эд сибöтчö, а миян, кодя отирыслöн, не йöв, не привессэз — немись нем абу.

Савелий Григорьевич, кöда неважын öзтiс куритны да пуксис осьта öшын одзö, думайтöв-керис мыйкö дырна ас кежас, горöтчис:

— Да кайöтö тi мöссэзнытö гожум кежас Вырвожас, дак тоннаöн йöлсö чилькöтат.

«Вырвож?.. Вырвож?..» Отир басниись этö кывсö нывка кывлiс шочыника эшö учöтсянь, а мый сайласис сы сайын, öнöдз эд тöд.

— Кытöн сiя сэтшöмыс?

Одзлань Савелий Григорьевич дышöтчытöг юöртiс, что эта кöркöся, чапкöм ни öнi вöр посёлок, кöда гöгöр одзжык вöлi уна быдкодь видз да покос — отир эд олiсö, — а öнi сы пыр жö писькöтöм леспромхозлöн вöр кыскалан туй.

— А адззисяс кытчö сэтчин ой кежас подасö йöртны?

— Ог висьтал сымдасö. Видзöтны колö... эз кö öнöдз быдöс сiсьмы.

«Вот тэныт и на! А ме кыным лун ни эта вылын юрöс жугда».

Ашынас, одз асывсянь, ая-ныла петiсö туйö. Вöр кыскалан трасса дорöдз локтiсö подöн. А одзлань, кыдз надейтчисö, сюрисö вöрын уджалiссез автобус вылö, час бöртi локтiсö колана местаöдз.

Вель важын чапкöм вöр посёлок öддьöнсö и эз гажöт. Мый вермис лоны гажаыс мортöн кольöм оланiнын, кöда ештöм тырны ни пипу да кыдз вöрöн, а сы коласöт увдöрсяняс пелитчисö ньыв да кöз? Быдöс посёлокыс, позяс кö сiйö сiдз шуны, и вöлöм дзир вит-квать баракись да даскыным олан керкуись, бöрьяэс кöдна коласiсь вöлiсö, тыдалö, разьöмöсь да петкöтöмöсь мöдiк местаö. Öнi ны йылiсь казьмöтiсö дзир мудйöт местаэз да киссьöм горрез. Разьтöм бараккес жö, кыдз и кынымкö неыджыт киссьöм баня, сiдз жö джынысви пуксьöмöсь, топ пырöмöсь му пытшкас. Унажыкыслöн ны коласiсь вевтыс вöлi сiсь да кульсьöм, а кыскалöм рамаэза осьта öшыннэс, кöдна лэдзчисьöмöсь мудйöттэс бердöдз, бытьтö горзiсö. И дзир öтiк неыджыт керкуок, натьтö, кöркöся контора нето магазин, кöда сулалiс торйынмоз быдöнныс дынсянь, матынжык туй бердас, сё эшö вынсьöтчис мыччасьны дзоньжыкöн. Сыын эз тырмö ыбöс да öшын стеклоэз, а негырись рамаэс öнöдз эшö вöлiсö местаын, öтöрсяняс незьдöм да пöрöм труба, но кирпичись тэчлöм горыс сулалiс дзонь.

Бараккес дынсянь кырыв ладорын, гырисьжык да тшöкжыка лэбтiсьöм вöр коласын, вöлiсö эшö кынымкö кульсьöм вевта вöв карта.

Кытчöдз Савелий Григорьевич тöдiсь синöн видзöтiс быд постройкасö, тюкöтыштлiс кадiсь кадö стенаэзö да угöввезö сьöрас босьтöм черöн, Светлана ештiс кытшöвтны посёлок гöгöр, а бöртiжык, вöв картаэс бердсянь петiс неыджыт, но сiя местöт öддьöн визыв, сöдз юок дорö. «Видзöт, то и подасö юктавны эм кытöн». Но мый гажöтiс медöддьöн, дак этö вердчан. Гöгöр, кöдöрö бы эн видзöт, сулалiс тальтöм-травиттöм, бытшöм да небыт турун, кытшöмö пар йöрас видзтöн фермаись подаыс и гожумбыт сьöрна оз адззывлö.

— Но и кыдз, ая, думайтан? Позяс эстöн мöссэсö гожйöтны?

— Этö тэ, нылö, ачыт думайт... Ас син одзат. Ме нёж, дак нем оз видз. Эм кытчö ой кежас йöртнытö, — Савелий Григорьевич мыччалiс вöв картаэз ладорö. — А воротаэс местö и заворняэз оласö.

Видзöтчöм-бергалöм вылö кад уна эз чулав. Сiйöн и вöр кыскалан автомашинаэслiсь бöр лэдзчöмсö, кöдна куим-нёль кайисö вывлань, Савелий Григорьевич видзчисьны эз понды, кытшöмкö, дзир сылö öтнаслö тöдса туй кузя иньдöтчис гортö веськыта, подöн.

Тöдтöм туйыс быд коста мыччассьö кузьжыкöн. Сэтчö жö сiя эз и вöв. Медперво оськалiсö важын ни кералöм делянкаэз кузя, кытöн сiсьмöм да пуксьöм чашья коласöт тшöка лэбтiсисö кыдз да пипу. Матi посёлок гöгöр, кыдз и юöртiс одзжык нывкалö айыс, частожыксö лажмытжык да волькытжык местаэзын пантасьлiсö непаськыт ытшкассэз.

Бöртiжык, дас километр ылына, не висьтавны кö ылынжык, кыссисö виль керассэз, кытöн вöлi кольöм морт сувда йыв-ув ёг.

Быдлаын, кыдз важ, сiдз и виль делянкаэз вылын вöрсö пöрöтöм-кыскöм бöрсянь югмöм местаас, сука да джуджыта кайис турун, нем унажык кöдася Светланалö эз и ков. Вынöн лэбтiсян паськыт листа ён лобозьтурунся, косьмöм юра ни горадзулься да зутурунся, кöдна паськалiсö унажык лажмыт местаэзын, вылынiнжык сiдз жö пантасьлiсö и шыргöридз, и гöрд сизьюр, и брыжьятурун. А эшö вылынжык местаэзын быдса куртинаэзöн, кыдз пыш, лэбтiсис вöйтурун. А нiя негырись ытшкассэс, кöдна абу на ештöмöсь тырны быдсöн вöрöн да пантасьлiсö жö важ делянкаэз вылын, вачкисисö подушка кодь небыт, басöк ковёррез вылö.

Дивуйтчöмсянь шардöм синнэзöн нывка видзöтiс быд паныта шедöм туруна видзок нето кулижка вылö, айыс сьöрö кокнита оськавтöн, кынымöтпыр ни думайтiс: «Неужто миян правленчиыс: не пред, не бригадир, не фермаись заведующöй — этна местаэз йылiсь некöр эз кывлö да нем оз тöдö? Некöр и некöр ме эталö ог верит».

Делянкаэс чулалiсö. Сэк вöлись кок увтын пондiс тöдчыны непаськыт важынся тальöм подöна туёк. Километр кыным ылына сiя эшö нюжалiс томыник да тшöк кöзъя вöрöт, кöда вежсис сёрöнжык шочыник да гора кыдззаинöн. Эстöн ни югмыштöм да гажмыштöм туёк чожа петкöтiс медодзза колхознöй видз дорö. Сэк кежö и шондiыс ештiс бергöтчыны павжун саяс.

Сiя жö лунö, рытъявылас, подöн ветлöтöмсянь тöдчöмöн мыдзыштöм коккес вылын Светлана иньдöтчис правленнёö, председатель дынö.

— Адззи ме, Яков Терентьевич, мöссэслö подакокувтсö.

Нывкалiсь юöрсö юралiсь примитiс шутка местö. Пышшалан синнэзнас дивуйтчöмöн сiя видзöтöв-керис зоотехник ладорö — «Вöтöн я мый?»

— Былись ме баита. Вырвожöдз талун айöкöт ветлiм.

Сэк вöлись председатель гажмыштiс, и мед видзыштны кыдзкö зоотехниклiсь пондöтöм баснисö, дивуйтчöмöн горöтчис:

— И дыш бытьтö эз пет сы ылынаас подöн муннытö? Меным бы некöр эта юрам эз пыр. — Одзлань председатель ассис гажсö эз ни сайöвт. Медодз Яков Терентьевичöс гажöтiс не сiя, что — вöлиськö! — колана подакокувтыс адззисис, а чожажык сiя, что подакокувтнас петанiнсö, кöда йылiсь сiя и одзжык нем эз думайт, зоотехник адззис сы отсöттöг. Но мед вермыны кыдзкö мыччавны колхознöй пода да зоотехник удж дынö ассяняс кöть кытшöмкö интерес, юалiс:

— Но и мый жö эта бöрсянь?

— Думайта, что лун-мöд бöртi мöссэсö Вырвожас вуджöтам, а куканнеслö ой кежас ковсяс ытшкöм турун ваявны, öнi быд хозяйствоын сiдз керсьö. А эта вылö тiянсянь распоряженнё колö.

Мыйкö дырна председатель думайтiс зоотехник предложеннё вылын. А кöр вежöртiс, что и эстöн öтiк распоряженнёся сысянь нем оз ков (вашöтны пастух местö колхознöй подасö сiйö некин оз тшöкты, ытшкыны да ваявны куканнезлö ой кежö турун — сiдз жö), гыжьялöв-керис юрбöрсö. «Мый жö?.. Колö, дак колö...» — кутчисис ручка бердö.

«Видзöт жö... — дивуйтчис зоотехник, кöр распоряженнёнас киас петiс председатель дынiсь, — ...быдöс эд, тыдалö, лöсявны мöдö». Сiя кадö нывка эшö эз тöд, что радуйтчынытö одз, быдöс понда пессьöмыс вöлись пондöтчö.

Баитчыны фермаись заведующöйкöт Вырвожас мöссэсö вуджöтöм йылiсь вöлi сьöкытжык. Иван Фролович некыдз эз мöд дзугны ассис важынсянь лöсьöтöм распорядок — мыччасьны фермаас час етш кежö рыт-асыввезнас.

— Торкат! Öшталат подасö пыд дзиббезас! А отвечайтнытö эта понда кин пондас?! — горöтлiс сiя зоотехниклö. Но кöр и высьтiсиссез согласитчисö вуджöтны мöссэсö виль местаö, воштiсьны заведующöйлö кольччис некытчö.

Неделя бöртi, кöр сiя жö Савелий Григорьевич киэзöн быдöс коланаыс Вырвожас вöлi лöсьöтöм, порсевскöй ферма вуджис гожумбыт кежö виль местаö. Сiдз первуись вöлi осьтöм гожумся лагерь.

Ас мознас панталiс вильсö и бригадир. Мöссэсö вуджöтöмлö Прокопий Егорович öддьöнсö и эз панлась, кöть тöдiс, что высьтiсиссесö новйöтöм да йöвсö ваялöм кузя сэтчин рыт и асыв пондас ковны вашöтлыны колёснöй трактор. А вот куканнеслö турунсö ваялöмöн сы ладорсянь петiс нач не сiдз, кыдз надейтчис зоотехник.

Первуись, кöр Светлана сетiс сылö председательсянь распоряженнё, Прокопий Егорович, кöда вексö кытчöкö тэрмасис да кужис мыччавны быд одзын, что сылö öддьöн некöр — мыйкö увья эд вачкисис жö кöс ватшкан вылö, мыйын дзир лолыс видзсис, — перыта нёджжöвтыштiс гижöмыс вылö, сэтöн жö пондылiс бергöтны сiйö бöр.

— Думайтны колö, — и нильдiс зоотехник син одзись, öшис, кыдз бытьтö эз и вöв.

Мый думайтiс бригадир и лун, и кык, и куим сьöрна — Светлана эз тöд. Этöн каднас куканнезлö турунсö öтпырись эз вайлö.

Мöдöтпырись пантасьöм коста зоотехникыс басни вылö Прокопий Егорович, нач видзчисьтöг, юöртiс:

— Кутшöм öшö турун? Гожум шöрнас?..

— Куканнезöс вердны, Прокопий Егорович, вот кытшöмö. Ме тiянлö эта вылö председательсянь распоряженнё сетлi.

— Пöрьясян эд, Свет Савельевна. Нем ог тöд. Некутшöм сэтшöм распоряженнё тэ меным эн сетлы. Вöтасин, натьтö, узьтöннят.

— Сетлi, Прокопий Егорович, эд суськисьö. Вунöтiт я мый я? Куим лун вöлись сэксянь чулалiс да?.. Öштiт разь памятьнытö?

— Эн, ме висьталi, — сулалiс ас дор бригадир.

Одзлань нем эз кольччы, кыдз пыртны сiйö председатель дынö. Бур, что басниыс ны коласын пондöтчис правленнё посöдз дынын. Кысянькö мöдiкласянь сы дынö Прокопий Егоровичöс и гезöн эн бы кыскы. Нем сiйö эз видз нильдыны зоотехник шогья и правленнё дынсянь. Но бригадир, тыдалö, сыöддьöн веритiс аслыс, бытьтö сэтшöм распоряженнёыс некöр и лоны эз вермы, что сэтöн жö горöтчис:

— Лок, лок пыралам, юалам.

Председательыс вöлi ас местас. И вöлись сэк, кöр сiя кыкнанныс одзын висьталiс (бур — кöть бöр эз суськись), что сэтшöм распоряженнёыс и былись сетöм, сэк вöлись Прокопий Егорович кватитчис:

— А-а... Усис тöдвылам. Вунöтлi ме эта йылiсь. Нач кыдзкö юрись петiс, — каитчис бригадир. Быдöс эта вöлi висьталöм сэтшöм кокнита да убедительнöя, что не веритны некыдз эз позь. Но пондас я сiя эта бöрсянь ваявны куканнезлö вердчан, эта йылiсь и джын кылöн эз казьмöт. Позис вежöртны, что некытшöм вердчан оз ло. Сiдз сёрöнжык и петiс. Распоряженнёыс вöлi, а вердчаныс эз.

Неделя бöртi сiйöн жö баснинас колiс локны бригадир дынö куимöтпырись. Пантасьöмыс лöсялiс тожö председатель дырни. И кыдз только бригадир вежöртiс, мый йылiсь пондöтчö басниыс, горöтчыны зоотехниклö кыв одзлань эз ни сет.

— Дугдö жö пурöтчынытö, Свет Савельевна! Кыдз этö ог ваялö? Ваялам! Ачым Поликарпыслö нарядсö сетi.

Но кöр Светлана повтöг ни да öддьöн убедительнöя висьталiс, что чулалöм кадö кукань карта дынö туруныс эшö и öтпыр эз вовлы, бригадир кутчисис юр бердас.

— Да, да, Свет Савельевна, тэнат правдаыс. Бöра ме вунöтчи, что Поликарпыслöн тележкаыс удерлун жугалiс. Но вочасö жö, натьтö, дак сэк вöлись... — Мый «сэк вöлись», одзлань бригадир сымдасö эз ни висьтав.

Кöсйöм «лун кыным» местö чулалiс эшö öтiк неделя, но нельки сэк вердчаннас тракторыс кукань карта дынын эз мыччась. Сiдз зоотехник и вöтлiсис бригадир сьöрын гожумбыт сьöрна. Быд сэтшöм пантасьöм да баитöм коста Прокопий Егорович кöсйис одзлань кежö, но быд коста адззис причинаэз, кöдна увья кöсйöмсö эз кер. А причинаэс бригадирлöн тырмисö. То сiя висьталас, что тракторыс жугалiс, то — тележкаыс грузитöм туруннас ни кытчöкö сибдiс, то — сёрöдз куртöм увья ытшкынытö некöр вöлi, то — зэрыс уджсö костiалiс. Этна жö причинаэзöн бригадир вермис сайласьны и председатель одзын, и мöдыс, вачкисьö, веритiс. А кöть и эз верит, дак тшöктыны бригадирöс тыртны ас киöн сетöм распоряженнё некыдз эз вермы. И ась бригадирыс бöбöтчöмö зоотехник важын ни эз верит, эта бöбöтчöмыс отсалiс Прокопий Егоровичлö не керны колана удж.

Арланяс ни, кöр пар йöрись межаэз вылын сёйнытö подаыслö кольччис нем, а муыс вöлi гöрöм да кöдзöм, подакокувтсö (вöлиськö!) пöдналiсö. Деревня увтiсь ольын сувтöтöм турун зороддэсö йöрйисö остожьяэзöн, а куканнесö лэдзалiсö отава вылö. Öнi эстöн сёяныс вöлi тырмöмви. Сэк вöлись зоотехник öвтыштiс бригадир вылö кинас, попуститчис. «Ась. Оз ков правленчиыслö дак».

Но вот чулалiс год и эта жö проблемаыс сувтiс виль вынöн мöдöтпырись. И сувтöтiс кö мöйму сiйö правленнё одзын ачыс зоотехник, то таво сiйö жö адззис да лэбтiс куканьвöдитiсь. И обижайтчыны эта понда Таисья вылö некыдз эз позь. И кыным дыржык Светлана думайтiс эта йылiсь, сыным буржыка вежöртiс — обижайтчöм местö колö дзир радуйтчыны да отсавны. Да, да, отсавны. Но этö бöрьясö, отсавны Таисьялö адззыны туянажык подакокувт то ли вердчан, зоотехник и эз вермы. Эд не мыйкö мöдiк, а дзир сы увья, сiя и паныта баснинас эз адззись. Позис, конешно, и кöсъясьны, что быдöс лоас керöм. Позис мунны правленнёö, председатель дынö да корны отсöт. Но эта отсöт увья бригадир сьöрын мöймуся вöтлiсьöм-кеймисьöмыс Светлана тöдвылiсь эз на вун. Зоотехник тöдiс, что лоас кö таво эта отсöтыс мöймуся кодь, некытшöм прок сысянь он адззыв, некинлö и нем сiя оз сет.

Этна думаэзöн Светлана и кытшöвтiс деревнясö, петiс асланыс улица весьтö. Шондiыс ештiс ни павкöтны öтiк дорнас сьöдöтöм стена кодь вöр бердö, кöда пöдналiс ылiсь горизонт. Лöньсис мошшезлöн неважынся дзингöм. Öшисö син одзись бабыввез. Кытöнкö вылын, не голубöй рöма ни, кыдз одзжык, а öддьöнжыксö лöзвевья кымöрас кылiс ыбшарлöн бöрья «тиу-лиу-ви-сип-сип», лöньсис. А зоотехник юрын, кыдз кытшö шедöм кай, дугдывтöг бергалiс öтiк дума: «Мый жö бы керны? Мый? Мый?..»

Сэк сылöн и зорамис дума — корны правленнёö заседаннё вылö асьсö куканьвöдитiсьöс. Позяс я керны сымдасö да лоас я этаись кытшöмкö прок, эта йылiсь перво кыдзкö эз и думайтсьы. Зоотехник нельки эз тöд, лысьтас я Таисья баитны заседаннё коста сiдз, — ковсис кöбы, шуам, сылö сiйö керны, — кыдз этö сiя керис сэтчин, конюховкаас. Но то ли аслас охота увья, мед эта вöлi былiсь сiдз, то ли нывкаыс повтöм басни увья, Светлана веритiс, что умöльыс этасянь нем оз ло. Сiя тöдiс, чукöртчö кö заседаннё тöв кежö вердчан заптöм кузя, баитны позяс и подасö гожумся видзöм-вердöм йылiсь. И зоотехниклö вöлi охота, мед Таисья кылiс ачыс, кыдз да мый пондасö баитны эта йылiсь правленнёись членнэз.

Лун кыным сьöрна эта думакöт Светлана сэсся эз ни янсöтчыв. Заседаннё панытас, рытъявнас, кöр бертiс Порсевскöй фермаись правленнёö, а председатель ытшкисиссез дынсянь, нывка пырис юралiсь дынö, юöртiс:

— Некыдз тай, Яков Терентьевич, заведующöйыс оз согласитчы Вырвожас мöссэсö вуджöтны. Смех эд — гожум шöрнас куим-нёль литраöн мöссэссянь йöвсö высьтыны. А сылö кöть баит, кöть эн, сё сымда прокыс: огö пö и дöс сэтöн.

Заведующöйлöн пыксьöмыс председательлö вöлi тöдса, сiйöн и юасьны унажыксö сiя эз понды.

— Баитам ашын заседаннё вылас. — Сiя вöлi кутчисис телефон трубка бердö, но зоотехник эшö юалiс:

— А позяс, Яков Терентьевич, заседаннё вылас виль куканьвöдитiсьсö корны?

Председатель лэдзис кисис трубкасö бöр.

— Мый вылö бы?.. Не сы йылiсь вопросыс да...

Зоотехник вежöртiс — не адззыны кö колана причина, сы думаись нем оз пет. Норасьны эта вотöдз Таисья вылö сiя некöр и эз думайт, но нем коланажыкыс öнi юрö эз пыр. «Ась. Мый лоас».

— Ме тöда, не сы йылiсь, но... — Светлана лöньсьыштiс, ловзисис, кылiс, кыдз эшö висьтавтöм кыввез увья пондö мичасявны чужöм вылас, — ...Таисьяыс откажитчö обязательствоэз босьтны. Юалiт бы, батi, кыдз одзлань уджавнытö мöдö. Не öтiк лун кежö эд локтiс.

— Ладно. Кор, коран дак, — кинас öвтыштöмöн горöтчис председатель, вились кутчисис телефон бердö.