Мöдiк картина

Сiя жö обстановкаын. Фельдшер пукалö пызан сайын, павтыралö да видзöтö кытшöмкö справочник. Коридорсянь пондöны кывны кокшыэз, ёркöтчöм. Оссьö ыбöс. Приёмнöяс пырöны ÖГРУШ да ИГНАТ.

ИГНАТ. Вот, вайöтi, Сиволот Андреевич, кыдз баитчим.

ФЕЛЬДШЕР (пызан сайись чеччытöн). Бур. Пуксьö.

ÖГРУШ (мужикыслö). Сиволот эн я шуин?(Горöн пондö ваксьыны.) А-ха-ха-ха! И-хо-хо-хо! Эта разь ним? Этадз жö миян деревня вывсис дзир медумöль отирсö шуöны.

ИГНАТ. Дугды жö, реш öм. Етша я, кыдз деревня вылас отирсö шуöны. А мортыслöн сiя ним. Вежöртiн тэ сымдасö?

ÖГРУШ (вежсьöм голосöн ни). Вежöртi, кöс перк, вежöртi. Тэ мый менö ки вылат я мый я вайöтiн? Вайöтi, шуан. Ме, батя, ачым локтi.

ИГНАТ. Ачыт, ачыт. Кытчö ме тэнö, сэтшöм бонбасö, киэз вылын?..

ФЕЛЬДШЕР (лöсьöтыштö ныр вылас очкиэз). Пуксьö, пожалуйста.(Мыччалö стуллэз вылö.) Игнат пондылö бы пуксьыны.

ÖГРУШ. Мый тэныт эстöн пукавнытö? Асьтö я мый я мыччавны мöдан? Пет мун эстiсь! (Мыччалö кинас ыбöс ладорö.) Колидорас, колö дак, видзчисян.

Игнат нёджжöвтыштö фельдшер ладорö.

ФЕЛЬДШЕР (гогинялыштö паныт юрнас). Позьö и сiдз.

Игнат чöлöмöн оськöвтö ыбöс сайö.

ÖГРУШ (öнi вöлись пешлыштö кинас жебыник стул). Кытчö нö ме сы пасьтыштаыс вылö пукся? А оз кö терпит?

Фельдшер жмитыштö пельпоннэзнас.

ÖГРУШ. Эта вылö, буди. (Мыччалö кушетка вылö.)

ФЕЛЬДШЕР. Позьö и сэтчö. Кытöн буржык, сэтчö и пуксьö.

ÖГРУШ. Этчö ме тöра. (Пуксьö.)

ФЕЛЬДШЕР (öнi вöлись петö пызан сайись, полöмöн кодь сибöтчö матöжык кушетка дынöдз, кыскыштö сьöрас стул, пуксьö паныт). Висьтасьö, пожалуйста, мый вылö норасят.

ÖГРУШ. Кысь тэ, пажаласта, сiйö босьтiн — норася? Ме, пажаласта, нем вылö ог норась. Туйö разь эттшöм туша-рожанас мыйкö вылö норасьнытö? (Мыччасьöмöн видзöтöв-керö ас вылас.)

ФЕЛЬДШЕР (кулакас куршыктöмöн). Сiдз, натьтö... Но жöникыт баитö, бытьтö бы...

ÖГРУШ. Кутшöм öшö жöник? Жöникнас сiя меным свалитчытöдззаным ^вöлi. Кöр рукйöсь пон моз ме сьöрын люштыртiс-вöтлiсис. А öнi, пажаласта, мужик.

ФЕЛЬДШЕР. Сiдз, сiдз. Проститö, неладно горöтчи. (Чöлыштöм бöртi.) Дак вот сiя баитö, бытьтö бы челядь тiян абу.

ÖГРУШ. Абу, пажаласта, кытчöдз. Но и мый? Кöркö, батi, лоасö жö, еныс сетас дак.

ФЕЛЬДШЕР (дивуйтчöмöн). Тi мый, енлö веритат?

ÖГРУШ. Кыдз инö, ог да? Енлö ли, кинлö ли — веритнытö сё ни колö. Немтöг эд челядьыс оз овлö.

ФЕЛЬДШЕР (веськöтчыштö аслас стул вылын). Эг вежöрт.

ÖГРУШ. Мый сэтöн эн вежöрт? Нiйö жö, пажаласта, керны колö. Челядьсö, ме шуа. (Ас кежас.) Немтöг и курöгыс оз кольттяв.

Фельдшер, öшöм кодь недолытсяняс, пондылö бы чеччыны аслас стул вылiсь, но кольччö пукавны бöр, мынöтö ныр вывсис очкиэз, кыскö чышьянок, жагвыв пондö чышкыны стеклоэз, думайтö.

ÖГРУШ. Мый, пельшöр, он верит?

ФЕЛЬДШЕР (öшöмöнмоз). Да не... Мыля жö?.. Верита... Сiдз, натьтö.(Чöлыштöм бöрсянь.) А тi мый?..(Лöньсьö бöр.)

ÖГРУШ. Узьлам-огö, юавны мöдан?

ФЕЛЬДШЕР. Да...

ÖГРУШ. Оз лысьт сiя менö сибöтнытö. Сыын, натьтö, бедаыс и эм.

ФЕЛЬДШЕР (дивуйтчöмöн). Дак сiя жö тiянöс тыраöн лыддьö...

ÖГРУШ. Ась, пажаласта, лыддьö... Колö сылö öддьöн дак. А тыранас ме эшö некöр эг вöвлы.

ФЕЛЬДШЕР. Но мый жö сэк? Мый жö?..

ÖГРУШ. Бöра, пельшöр, меным он верит?

ФЕЛЬДШЕР (ас кежас думайттöн). Ог тöд эшö. Видзöтам часöт. Сетö, пожалуйста, меным кинытö.

ÖГРУШ. Тэ мый, бытьтö, öшö ворожитны прокман? (Нюжöтö кисö.) На, пажаласта.

ФЕЛЬДШЕР. Да не. Ме пульснытö только пешла. (Кутö Öгрушлiсь кисö, кывзö, видзöтö часыэз вылö.)

ÖГРУШ. Этасянь разь мыйкö сэтчинiсь кылö жö?

ФЕЛЬДШЕР. Умöля. Ковсяс давленнё меряйтны. Вешшыштö, пожалуйста, матöжык пызан дынас. Пуктö этчö кинытö.

ÖГРУШ. Пажаласта. (Вешшыштö матöжык пызан дынöдз, пуктö сы вылö кисö.)

ФЕЛЬДШЕР (каттьыштö киыс бердö бандаж, кутчисьö груша бердö, качайтö, öткоста видзöтö прибор вылö, бергöтлöв-керö юрнас). Ыджытöв давленнёыс. Чöвтчывны ковсяс. Эшö сьöлöмнытö кывзыштам.

ÖГРУШ. Нагöлеч я мый я?

ФЕЛЬДШЕР. Мед кывзынытö позис. (Мыччалö киэзнас морос гöгöр, бергöтчö öшын ладорö.)

ÖГРУШ (чöвтö вывсис джемпер, платье, нёджжасьыштö ыбöс ладорö). А увтiсьсö кыдз? Мешайтас жö я мый я?

ФЕЛЬДШЕР (öшынас видзöттöн). Ме ог тöд. Видзöтö, кыдз тiянлö буржык.

ÖГРУШ (пондылö бы лэдзны увтiсь йöрнöссö мороссэс вывтi, но нем оз пет, чöвтö и сiйö, ас кежас). Пырас жö эд то кöс перклö юрас сэтшöмыс... Лунся лун шöрнас... Но чöв. Ме тэныт гортын эта понда мыччала.

ФЕЛЬДШЕР (горöн ловзисьö, бергöтчö, лöсьöтыштö ныр вылас очкиэз, кыскö кармансис да кышалö пеллезас фонендоскоп, сибöтчö зэв, пуксьö, зэгалан кинас вайöтö фонендоскопсö Öгрушлö лопатка увтас, пондö кывзыны.)

ÖГРУШ пондö чутрасьны вывтырнас кöдзыт трубкасянь, но кытчöдз эшö видзсьö.

ФЕЛЬДШЕР. Ловзисьö, пожалуйста. (Кывзö.) Öнi эд лолалö.(Бöра кывзö. Кадiсь кадö вештышалöмöн сибöтö трубкасö öгрушалö кокувт ладорас.)

ÖГРУШ (дзик гильöтöмсянь, чутыртчö эшö öддьöнжык). Ой, полö менам сэт.(Видзсьöмöн пондö китшсьыны-серавны.) И-хи-хи-хи-хи.

ФЕЛЬДШЕР. Видзсьö. пожалуйста. Терпитö. (Вайöтö трубкасö конувт ладорсянь морос увтас.)

ÖГРУШ. Кыдз нö ме, пажаласта... Полö коли менам сэт. И-хи-хи.

Фельдшер мыдз да люзь пымалöм дзимлялö фонендоскопсö бöр, пыдына ловзисьö.

ÖГРУШ. Пасьтасьны туйö, пельшöр?

ФЕЛЬДШЕР (чышьянокöн чышкисьöм бöрсянь дыр мыйись). Водö спина выланыт.

ÖГРУШ. Мый, бöра гöг гöгöр пондат пешлыны?

ФЕЛЬДШЕР (бокöмоз видзöттöн). Колö. Сэтшöм менам удж.

ÖГРУШ. Тожö меным, мужик морт, аслыс удж адззöм — инькаэзöс быдлаöт пешлыны. Висьталi жö ме тэныт — нем сэтчин абу. И тэ вотöдз пешлiсö, а прокыс сё сымда. Мымда грекас пыртат этöн пешлiсьöмнас.

Фельдшер öшöмсянь паськöтыштö киэсö, бергöтлöв-керö увлань мышкыртöм юрöн, вились пондылö бы чеччыны аслас местаись.

ÖГРУШ (кинас öвтыштöмöн). Но ась. Вода инö. Мый керан, сiйö и кер.(Жагвыв пöрöтчö кушетка вылö.)

Фельдшер полöмсянь зэгалан кинас жагвыв сибöтчö Öгруш кынöм бердöдз.

ÖГРУШ (кытчöдз видзсьö, сыбöрын ни пондö зэгавны быдсöн вывтырнас, китшсьö-сералö). И-хи-хи-хи-хи!

ФЕЛЬДШЕР. Тувдöтчыны оз ков. Небзьöтчö, пожалуйста. (Пондö пешлыны кынöм увтсö.)

ÖГРУШ (одзлань видзсьыны оз ни вермы, пондö ваксьыны быдгоршись). И-хо-хо-хо-хо!(Öтпыр-мöдöтпыр зурзисьö, горöн öдззö дырскöтны бöрнас кушетка кузя, сы коста жö.) И-хо-хо-хо-хо! О-хо-хо-хо!

Фельдшер полöмöн да чöлöмöн вешшыштö кушетка бердсис бöр. Оссьö ыбöс. Приёмнöяс, ва бонöн киас, пырö уборщица.

ФЕДОСЬЯ (горöн сьöвзьö). Тьфу! Стыдтöм! Тэ мый сэтöн, мурьялан, нетель тэ, чульсит петан? Мый, кушетка вылас быглясьтöн, кöбыла моз гöрдлан?! И совесь тэнат абу? Омöн эд больнича пасьтöн кылö! Локтiн мыччасьны врачыс одзын, дак и мыччась морт моз. Нем сэтöн отирсö смешитны!

ÖГРУШ (ваксьынытö дугдö, паныт). Мый тэ, Педöсь тётка, ме вылö пон моз увтан. Сiя жö менчим гöг увтöс пешлö.

ФЕДОСЬЯ (сибöтчö öшын дынöдз, рамасö да подушкасö чышкытöн). Но и мый, гöг увттö дак?.. Кыт нö öшö тэнчит колö? Мортыс, небось, велöтöм. Миянтöг тöдö, кыт пешлынытö.

ÖГРУШ. Ме ог и шу — оз тöд. Но мый нö ме кера, полö кö менам сiя местöт?

ФЕДОСЬЯ (вуджö чышкисьны шкаф бердö). Полас, натьтö, мыйнö бы тэныт оз да. Госыт, висьтав, гилялö.

ÖГРУШ. А кöть бы и сiдз, Педöсь тётка, да мый сэтöн сэтшöмыс? Сё тай öтiк, что полö, что гилялö. Ме эд, поди, öшö ловья морт жö. (Чöлыштöм бöртi.) Видзöтны бы, мый бы ачыт висьталiн, пырны тэныт гöг увтöдз йöз киэзнас дак.

ФЕДОСЬЯ (чышкисьтöнняс вуджö пызан дынöдз). Тьфу бы тэнö, совесьтöмöс, баснинат!(Чöлыштöм бöртi, чышкисьтöнняс.) Кутшöм нуждасянь йöз киэслö ме дынöдз вöлi пыравлынытö? Ме эд тэ моз эг мурьял. Тэ годдэзö ме гöгöр чива-уляыс, кыдз кодзыл, сизимöн ни визлалiсö.

ÖГРУШ. Тэныт жö...

ФЕДОСЬЯ. А не тэныт уж менчим вайöмсö.

Басниыс ны коласын недырик кежö лöньсьö.

ФЕЛЬДШЕР (вились сибöтчö аслас стулöн матöжык кушетка бердö). Терпитыштö, пожалуйста, эшö невночка.(Вились сибöтчö кинас Öгруш кынöм бердö.)

ÖГРУШ (видзсьöмöн мыйкö дырна чöлö, но чожа мый вились пондö рыгзьыны-серавны, а кытшöмкö кадö öдззö зурасьны-тэчкасьны коккезнас, дырскöтны бöрнас, быдгоршись ваксьö). О-хо-хо-хо-хо! И-хо-хо-хо-хо! Ой, кула, кула, кула-а! И-хо-хо-хо-хо!(Вынöн дырснитöмсянь сы увтын горöн кажнитö кушетка.)

ФЕДОСЬЯ. Да этö нö мый ни сэтшöмыс лоö! Кытчöдз тэ, кöбыла мыгöр тэ, пондан эстöн отирсö смешитны? (Чепöссьö пызан дынсянь кушетка дынöдз.) Видзöт, кыдз ме тэнчит, стыдтöмлiсь, бöр гöгöртö куля!(Öтпыр-мöдöтпыр вачкö паськöтöм боннас Öгрушлö куш лядьвейес кузя.)

Фельдшер повзьöмувьяс чепöссьö кушетка дынiсь аслас пызан сайö.

ÖГРУШ (повзьöмöн-сорöн). Педöсь тётка! Педöсь тётка, мыся! Тэ мый сымдасö керан? Нятьöсь боннас куш яй кузя!(Перыта пуксьö кушетка вылö.) Он разь адззы синоккезнат — ме пасьтöм!(Кватитö ассис паськöм, вевттисьö.)

ФЕДОСЬЯ (вартлынытö дугдö грöзитöмöн). Някöст öшö менам öтпырись, дак вöлись ме тэныт масленичасö мыччала!(Оськöвтö ыбöс ладорö, петö.)

ФЕЛЬДШЕР (пыркöтöв-керö юрнас, горöн ловзисьö). Фу-у.(Пызан бердсис синнэсö лэбтытöг.) Вермат пасьтасьны. Мый эшö сэтöн...(Чöлыштöм бöртi.) Нем мыйкö ме тiян коласiсь ог вежöрт.

ÖГРУШ (пасьтасьтöнняс). А мый, пажаласта, сэтöн не вежöртнытö?

ФЕЛЬДШЕР. Кыдз жö мый? Öтыс тiян коласiсь баитö — тыра, новйöтчö. Мöдыслöн нем дукыс этаись абу. Кыдз жö сiдз?

ÖГРУШ (кышалö платье, лöсьöтыштö пидзöссэс весьтöт подол). А сiдз вот. Кывзö, висьтала. Ён ме вöлi эшö нывкасянь. А кыдз айка саяс петi, пондi ёнмыны эшö тырсявтöдз. Столовöйын жö уджалi. А сёйнытö ме учöтсянь горш вöвлi. Тшыгувья кöть культöм понöс одзам вай, нем вылö ог видзöт, быдöс лопошита-сёя. Вот мужикöлö и пондiс мыччассьыны, бытьтö ме сыкöт овтöн тырсялi да челядясьны мöда. Тшöктiс декретö петны. Пондiс видзчисьны, кöр кинöскö вая. Вот и видзчисьö сизим год сьöрна. А меным мый?.. Видзчись, пажаласта, дышыт оз пет дак. Абу тай жаль. А кертöмсö ме сылö кысь вая?

ФЕЛЬДШЕР. Вежöртi. Сьöлöмныт вылö од норасьö?

ÖГРУШ. Мыйсянь бы? Нем ог кер да. Но кöр гора паныт ва кайöта нето пес öтпырись пырта, кыла — бытшкыны пондö.

ФЕЛЬДШЕР. Вот и ме сiйö жö думайта.

ÖГРУШ (паймыштöмöн). А мый?

ФЕЛЬДШЕР. Сьöкыт сылö лоö.

ÖГРУШ. Кыдз сьöкыт? (Вешшыштö матöжык пызан бердас.)

ФЕЛЬДШЕР. А сiдз вот. Сьöкыт лоö тiян туша вылö уджавны. Тi жö видзöтö ас выланыт, кытшöмöсь. А сiя тiян дзир кулакныт ыжда. Вот и думайтö эта бöрсянь.

ÖГРУШ (дзар керыштö аслас жмитöм кулак вылö, дивуйтчöмöн). Былись я мый я?

ФЕЛЬДШЕР. Былись, конешно.

ÖГРУШ (кватитчöмöн). Ой, былись эд, забыль, школаас кöркö велöтлiм. Но сэксясö öнöдз ме вунöтi ни. Сiйöн меным пыр и думайтсьö, бытьтö сiя менам ме ыжда жö.

ФЕЛЬДШЕР. Абу эд. И кысь сылö вермыны эта пасьта да эта мымда вир лун и ой вашöтлыны.

ÖГРУШ. Мыля жö бöра лун и ой? Ойнас жö ме нем ог кер, только узя. Дак эд сiя сэк, натьтö, тожö узьö.

ФЕЛЬДШЕР. Оз эд. Сiя и ойнас жагвыв уджалö.

ÖГРУШ (дивуйтчöмöн). Былись, бытьтö? Öддьöн тай интересно. А ме чайтлi, сiя ме моз жö шоччисьö.

ФЕЛЬДШЕР. Сьöлöм — эта сэтшöм орган, кöда некöр не оз шоччись, не оз узь, пыр уджалö. Сэтчö жö тiян сiя, кыдз и асьныт жö, пондöм госсявны.

ÖГРУШ. Но и мый?

ФЕЛЬДШЕР. А сiя и эм, что кöркö вермас пöдны.

ÖГРУШ (повзьöмöн). Да тэ мый, пельшöр, сымдасö баитан? Ме чожа кула я мый я?

ФЕЛЬДШЕР. Сымдасö висьтавнытö и оз позь. А вот сьöлöмнытö жалейтыштны колö. Вот ме мый тiянлö висьтала.

ÖГРУШ. А кыдз сiйö жалейтнытö? Сiйöн ме тэнö, пажаласта, верма жалейтны. А асьсö сiйö кыдз? (Пондылö бы чеччыны, сэтöн жö кутчисьö сьöлöм бердас, ойкнитö, пуксьö бöр.) Ой, пельшöр! Былись эд, былись, видзöт жö, пондiс бытшкыны. Джагалö ни, батi, да?

ФЕЛЬДШЕР (перыта чеччö пызан сайись, оськöвтö шкаф дынöдз, кыскö сэтчинiсь таблетка, кисьтö графинiсь стаканö ва). Юö вот. Чулалас.(Сетö медперво таблеткасö, сэсся стакансö.)

ÖГРУШ (босьтöнняс). Етша, батi, öтiкыс лоас да?.. Кыкö бы вот, то ли куимö. Öтiкыс разь меным кытчöкö сибалас.(Юö.)

ФЕЛЬДШЕР (пуксьö бöр пызан саяс). Позьö и сiйö жалейтыштны.

ÖГРУШ (нюжöтчöмöн сувтöтö простöй стакансö пызан дорыш вылö, гажмыштöмöн). Былись, пельшöр? Кыдз жö бы, пажаласта, сiйö жалейтнытö? Лекарство, батi, кытшöмöкö гижöтат?

ФЕЛЬДШЕР. Вöрöтчыны унажык колö, вот тiянлö быдöс лекарство.

ÖГРУШ (дивуйтчöмöн). Кыдз вöрöтчыны? Этö тэ меным бöра ойсяыс йылiсь я мый я казьмöтан?

ФЕЛЬДШЕР (тожö дивуйтчöмöн). Кытшöм эшö ойся йылiсь? Эта йылiсь ме эг и думайт. Этö тi уж асьныт тöдат.

ÖГРУШ. А мый нö сэк баитан — «вöрöтчыны колö»? Кытöн нö ме этася, декретас пукавтöн, вöрöтчынытö понда?

ФЕЛЬДШЕР. А гортын разь тiян некытшöм хозяйство абу?

ÖГРУШ. Мыля жö абу? Эм. И мöссö видзам, и порсь быд год тöвйöтам, и баляэз дас етш эмöсь. Дак ны гöгöр жö кöс перкыс ачыс бергалö. И керку пытшкас сiдз жö. Эд висьтала жö ме тэныт — тыраöн менö лыддьö, декретын видзö да челядясьöм видзчисьö.

ФЕЛЬДШЕР. Декретсис колö петны. Нем сэтчин простöн пукавнытö.

ÖГРУШ. Лэдзас кö öшö вöв юрыс дак, мужикöс ме шуа.

ФЕЛЬДШЕР. Лэдза-ас. Висьталат кö, что весь пукалат.

ÖГРУШ. А сэсся мый?

ФЕЛЬДШЕР. Уджавны пондат. Мый эшö этася? И уджавны-вöрöтчыны колö, кыдз позьö, унажык. Кыным унажык, сыным буржык.

ÖГРУШ (гажмыштöмöн). Былись, доктор? Вот тай, тыдалö, кытöн счассёыс вöлöм!

ФЕЛЬДШЕР. Вот и быдöс рецепт. Вермат мунны.

ÖГРУШ (гажöн, дивуйтчöмöн). И некытшöм лекарсво сэсся оз ков?

ФЕЛЬДШЕР. Оз. Здоровöй мортлö уджыс — быдöс лекарство.

ÖГРУШ (одззамоз гажöн). Спасибо инö, пельшöр.(Оськöвтö ыбöс ладорö, кулаккесö жмитöмöн, ас кежас ни.) Но энна, кöс перк! Вот вöлись кытöн ме тэныт жарсö мыччала сизим годыс понда!(Ыбöс одзас сувтчыштö, бергöтчö, бертö бöр.) Вунöтчи эд, забыль, юавнытö...

ФЕЛЬДШЕР. Мый сэтшöмсö?

ÖГРУШ. Эта вöрöтчöмыс сьöктамнытö отсалас, оз?

ФЕЛЬДШЕР. Обязательно отсалас.

ÖГРУШ. Спасибо, инö, доктор. Ме öнi кыдз борддэз вылын понда лэбавны.

ФЕЛЬДШЕР. Лэбав, пожалуйста.

ÖГРУШ. А тэныт, пажаласта, ась еныс здоровьё сетас. (Петö.)