Адззисьлытöдз, марина!

I

Ойшöр чулалiс. Везтöм öшыннэз сайын ойся пемытыслöн рöмыс вежсьынытö кытчöдз и эз на ешты, Но кадыс сибöтчис асывлань ни, кöр том да здоровöй отирöс узьöтö медчöскыт онöн.

Казармаын шы не тöв. Матроссэз узьöны. Быд койка вывсянь кылö жагвыв да лöнь лолалöм.

Оз узьöт эта коста дзир кык торöс: корабельнöй часыöс да электрическöй лампочкаöс, кöдна öшалöны öтамöдкöт ордчöн, казармаись петанiн весьтын. Öтыс ны коласiсь югдöтö кубриксö не öддьöн югыт, небыт лöз рöма биöн; мöдыс лöня, топ гусясьöмöн, вештö одзлань ассис стрелкаэз, лыддьö кад. Нылö абу некытшöм дело сы дынöдз, что отирас, казарма стенаэз сайын, сулалö небытшöм погоддя, кучиксис петö тöв. Поснит зэр воттезöн, топ каша шыдöсöн сiя дугдывтöг вартö öшын стеклоэз да стенаэз кузя, кыдз вермö, нёкралö казарма гöгöрись пуэз, нетшкö ны бердiсь да каттьö-нöбöтö вежöтöм ни да косьмöм лист, дзик бöбмöм, уннялö-горзö печка трубаэзын.

Казармаын лöнь. Лунтырся некокнит служба коста мыдзöм матроссэз шоччисьöны. Лöз рöма биыс караулитö нылiсь он, часыэс лыддьöны кад. Кыдз öтыс, сiдз и мöдыс, нiя тожö служба вылын. А служба нылöн сэтшöм. И вдруг... Кöр часыэзлöн стрелкаэс сибöтчисö вит часöдз — ловзис куимöт тор. Часыэз весьтын вывланьсянь öшалан ретрансляторсянь паськалiс видзчисьтöг горöн кышöтöм. Недыр мыйись сэтчинсянь жö кылiс: тырс, тырс, тырс.

Эта аскодьöм сяткöтöмыс тöдса быд матрослö, тöдса кöть кытшöм кадö, нельки ойнас, медкыз он коста. Сяткöтöмыс бöрсянь некытшöм шыасьöм кытчöдз и эз на кыв. Но казарма ловзис. Кынымкö секунда бöртi ни быдöнныс вöлiсö кок йылын. Негорöн дзуртышалiсö койкаэз. Уна киэзын, и тожö негорöн, но перыта кышöтiс паськöм. Саймöм отир пемытiнас кималаснаныс тэрмасисö пасьтасьны.

Öнi вöлись ретрансляторсянь омöн казарма пасьта горöн паськалiс: «Учебно-боевöй тревога! Учебно-боевöй тревога!»

Эта коста жö, конувтас симöт гырдззимöн моз каттьыштöм пробковöй матрацöн, кинкö котöрöн уськöтчис ни петанiн ладорö. Сы бöрсянь сiйö жö керисö и мöдiк, и куимöт. А сэсся быдöнныс ни пондiсö тэрмасьны ыбöсö.

Ильинов саймис быдöнныскöт öткоста. Öткоста жö зонка и кöмасис-пасьтасис. Но бöртiжык сылöн дзугсис да каттисис голя бердас гюйс, форменнöй матросскöй воротничок, кöдаись вель дыр ковсис кошшыны лад. Дзугсьöм воротничок увья да аслас тэрмасьöм увья Ильинов нач вунöтiс босьтны сьöрас ольпась, сiдз простöн и уськöтчис ёрттэс сьöрö. Казялiс зонка этö увдöрас ни, лиснич увтын, сэтöн жö сувтчис, думайтыштiс: «А мореö кö, да эшö не öтiк лун кежö? Сэк кыдз?» Но ась, шуам, и не мореö, не походö. Ась кынымкö час бöртi — сiдз тожö овлö — сетасö отбой. Но Ильинов бытшöма тöдiс: ольпасьтöг катер вылö сiйö некин оз лэдз. Сэтшöм уж катерниккезлöн закон. Сулалöны, шуам, нiя базаын, кытöнкö берег дорын, службаись унажык кад чулöтöны казармаын. Но ковсяс кö петны мореö — ольпась сьöрö. Эд лоас кö мыйись мый уявтöн, дак кокнитик пробковöй матрац — медодзза спасеннё. А сетöны сiйö служба коста öтiкö. И не босьтны кö сiйö сьöрö, то, öткö, нем лоас ольсавны увтö катер вылын, а, мöдкö, нем вылö и надейтчыны. И öнi, кöр Ильинов казялiс вунöтöм ольпась йылiсь, син одзас зонкалö перыта сувтiсö мичман Елуховлöн быдпырся лöг, поснитик да бытшкасян синнэс, а тöдвылас усис сылöн жö сибдöм кодь, жеркöтчан голосыс: «Ог верит! Юртö бы вунöтiн — мöдiк дело!» Охота я не, ковсис бертны бöр.

Стенаыс пöлöн Ильинов пондылiс кайны вывлань. Но да позяс разь керны сымдасö öтiк мортлö, кöр омöн лиснич пасьтöн зэв-зэв öтамöд бердын быдöнныс, кыдз вермöны, тэрмасьöны увлань. И кыдз бы Ильинов эз пондыв, кык-куим ступенькася вылöжык кайны некыдз эз вермы. Ковсис кежны бöр да видзчисьыштны, кöр унажыкыс лэдзчасö. Эстöн и чулалiс кынымкö минута мымда кад, кöд коста позис бы ештыны пирс вылöдз. И вöлись сэк, кöр чуть я не быдöнныс лэдзчисö, Ильинов быд чожись чепöссис вывлань.

Казармаын эта коста некин эз ни вöв. Сулалiс лöнь. Сiйöн öткаса ботинкаэзöн джодж кузя козöтöмыс горöн паськалiс пуста стенаэз коласын, а Ильинов моросын сэтшöм жö горöн ёткöтiс сьöлöмыс. Öткö, тэрмасьöмсяняс, мöдкö, ёрттэс сьöрись кольччöмсянь чапкис жарö. Зонка кылiс, кыдз увтiсь паськöм пондiс лякасьны вывтыр бердö. Перыта курмыштöм да конувтас жмитыштöм ольпасьöн сiя уськöтчис бöр.

Öтöрас погоддяыс вöлi небытшöм. Ыбöс коласас ни тöлыс вынöн летыштiс вывтiсь паськöм, койыштiс чужöмö кöдзыт зэр воттез. Вöлi кымöра да сэтшöм пемыт, что нельки оськöв ылына нем эз тыдав.

Порог саяс Ильинов, дзик слепöй, нюжöтiс одзлань öтiк кисö, сiдз иньдöтчис лиснич ладорö. Кизертчöм мусянь кок увтын вöлi нять, нильыг. Мукöд местаэзын вонясянöдз пукалiс ва.

Джуджыт бетоннöй лиснич кузя, кöда лэдзчöтiс пирс дынö, увлань горöн боргис-котöртiс зэр ва. Вылiсянь кадiсь кадö мынлiсö ванас жö кырöтöм иззэз, гирскöмöн инмалiсö скала пельöссэз бердö, сьöкыта усялiсö увлань.

Лисничыс кольччис бöрлань. Сы увтын вились пондöтчисö ва да нять. Но кошшыны пемытiнас кытшöмкö кöсжык туёк, то ли бöрйисьны, кытчö буржык тальччыны, вöлi некöр.

Эта коста пирс сайын кынымкö катер вылын кылiс ни моторрезлöн негорöн уджалöм, кöда дзик содтiс Ильиновлö чож. Зонка уськöтчис котöрöн. Но эз ешты сiя керны и дас оськöв мымда, кыдз падмис кöрттуй рельса бердö, усис. Бур кöть сiя ни, что усьтöнняс конувтiсь ольпасьыс сюрис увтас, доймынытö эз сет. Сэтöн жö Ильинов перыта сувтiс коккес вылö, уськöтчис одзлань.

А вот и пирс. Сы сайын, ойся пемытiнас, негырись волнаэз вылын, тыдыштiсö ни катеррезлöн жагвыв окласян контуррез.

Ештiс вöлись Ильинов оськöвтны тöдса палуба вылö, кыдз сы коста жö лэдзöм моторрезсянь катерыс зэгалыштiс быдсöн вывтырнас, тöдчöмöн пондiс тогзьыны. Корма сайын ключöн моз да быгьясьöмöн öдззис пизьны-бергöтны ва. Мукöд коста сiя жö чепсасьыштiс нельки пирс вылöдз, кышöтöмöн паськалiс öтмöдöрö кок увтын.

Аслас сёрмöм увья полöмсянь Ильинов гусьöнмоз уськöтчис лажмытик, но крут трап кузя кубрикö. Ештiс дзир зонка чапкыны кисис öшалан койка вылö ольпась, сэтöн жö, кыдз нарошно, пантасис катер вылiсь командиркöт. «Колö жö эд то неколана кадас...» — думайтыштiс Ильинов ас кежас, а эта коста аслас веськыт киыс сибалыштiс ни бескозырка бердö.

— Ёрт лейтенант... — пондöтiс вöлi Ильинов.

— Боевöй пост вылö! Перыта!

— Эм! — дженытика да не öддьöн горöн шыасис паныт Ильинов, ачыс, мымда чож, уськöтчис трап кузя вывлань.

Сэк кежö катерлöн команда вöлi чукöртчöм ни. Быдöнныс сулалiсö асланыс местаэзын. Ильинов вежöртiс: видзчисисö дзир сiйö.

Чожа мый Ильинов бöрсянь вевдöрись палуба вылын мыччисис и ачыс катер вылiсь командир, лейтенант Свиридов.

Мичман Елухов, кöда öтiк местаын жöдзтöн дзир сiйö и видзчисис, öнi топ усис, оськöвтiс командир одзö. Нельки двигателлес уджалöм пыр кылiс сы каблуккезлöн öтамöд бердö оча шовкнитöм.

— Ёрт лейтенант! Лэбтöм учебно-боевöй тревогаöн катер вылiсь личнöй состав чукöртöм!

— Сулавны ас местын!

— Эм сулавны ас местын.

— Сетны швартовöйез!

— Эм сетны швартовöйез.

— Жагвыв одзлань!

— Эм жагвыв одзлань.

Горöнжыка эрзыштiсö. моторрез. Вынöнжык да перытжыка чепöссис корма увтсянь бöрлань бурун. Катер кокнита янсалiс пирс бердiсь, кытшöлöн бергöтчытöн, иньдöтчис бухта шöрö.

Звеноись кык катерыс эта вотöдз вöлiсö петöмöсь ни. Ны кильватерö жö сувтiс и куимöтыс да сiдз иньдöтчисö одзлань. Нельки ойся пемытiнас ны коласын видзсис колана интервал — стройлöн закон.

II

Катеррез не öддьöн перыта кытшöвтiсö мыс Скальнöй. Пемытiнас сiя öнi и эз тыдав. Но сiдз кыдз тöлыс пöльтiс море ладорсянь, сы сайын вöлi тöдчöмöн лöньжык.

Югдандорас чулалiсö бухтаö пыран воротаэз — кык мыс коласын медвекнит места, öтлаын ныкöт кольччис бöрланьын и зэр. Дöмассэз вылö вачкисян кымöррез одзасьöмöн да öтамöдсö увлань нырыштöмöн, дзик баля табун, кывтiсö материклань.

Вынсялiс тöв. Катер то нач саясьлiс волнаэс коласö, то сэтöн жö чепöссьывлiс вывлань бöр. Волна йылас секунда сьöрна кажитчис, что сiя нетшкöвтчис, мынiс ва бердсис аслас некокнит вывтырöн да сiдз и кольччис öшавны руас. Но катер казявтöг нильдывлiс увлань, мед чожа мый вились чепöссьыны мöдiк паныта быгыльтан волна вылö.

Дыр мыйись кымöррес жагвыв чулалiсö. Мичамис, öнi гöгöр кольччисö дзир сьöд волнаэз да ны вылын катерлöн качайтöмсянь юр вевдöрын öтмöдöрö вештасян звездаэз. Ылiсь горизонтыс, кöда жагвыв пондiс ни калькавны ва бердiсь, бытьтö саясьлiс син одзись, дзик вöйлiс, то öтлаын ваыскöт тэрмасис лэбтiсьны вывлань. И кажитчис сэк, что часöт мореыс боквывтчас катерыс вылö, шебралас сiйö аслас паськыт да сьöкыт вывтырöн. Но кытшöмкö кадö эта шебрасыс сувтчыштлiс, а сэсся перыта лэдзчисьлiс бöр катерыс увтö.

Паныта волнаэс кадiсь кадö чепсасьлiсö нельки вевдöрись палуба вылöдз, люкасьлiсö да пазавлiсö надстройка бердö, унася-уна гырись и поснит воттезöн резсисö öтмöдöрö, быгьясьöмöн да кышöтöмöн ыскöвтiсö корма сайö.

Не öтiк час сьöрна ни катеррез бороздитiсö море пасьта. Эта кадö эз кыв эшö öтiк боевöй команда. Позис вежöртны, что нiя видзисö курс учебнöй полигон вылö.

Жагвыв югдiс. Син одзын вежсис валöн рöм. Чим сьöд пемытiнас, кыдз и ачыс ойыс жö, öнi сiя лоис пемыт-лöз. Кытöнкö ылын-ылын, асыв ладорын, горизонт бердöт, дзик ва увтiсь мыччисисö чочком кымöр палаккез. Медперво учöтикöсь, кыным одзлань, нiя сё быдмисö, лэбтiсисö вывлань да паськалiсö. Кизерик туман пыр, кöда лажмытика кöвьясис ва весьтас, нiя вачкисисö сказочнöй очертаннёа кокнитик керöссэз вылö да топ уйисö ва вылöт паныт катерреслö. Ылынжык ны сайын жагвыв рöмсялiс горизонт. Сэтчинсянь лэбтiсис асывся том шондi. Ачыс сiя кытчöдз и эз на тыдав. Дзир сылöн медодзза югöррес усисö бöрсяняныс кымöр палаккес вылö, мыйсянь нылöн чочком рöмыс дзик мичöтчис, вежсис розовöй вылö, а ны неровнöй очертаннёэз бердöт чуклясьöмöн öзйис зарни рöмöн сотчан сунис. Чулалiс минута кыным, и öнi ачыс шондiыс ни мыччис кымöррес коласöт ассис мича да сöстöм чужöмбан. И колiс дзир сымдаыслö лоны, кыдз кымöррес бердöт зарни рöма сунисыс пондiс орласьны. Недыр мыйись сiя и нач ни öшис син одзись, кыдз бытьтö сэтшöмыс некöр эз и вöвлы. Сы коста жö ва вылö усьöм югöррес öзтiсö волна йыввезын унася-уна да югытся-югыт, синбур гусялан биоккез, кöдна дугдывтöг сiйö и керисö — то куслiсö, то öзйывлiсö бöр, а катеррез бöрсянь кольччан бурун öдззис пежьявны-орсны радугаись быд рöмöн.

Ильинов сулалiс кормовöй турельнöй установка бердын. Медперво зонка тожö видзöтiс шульга борт сайö — оз я кыськö да мыйкö усь син вылö. Но дугдывтöг öтмоз вöрöтчан вася некытöн да нем эз тыдав. Эз вöв и некытшöм команда. Сiйöн тревога коста сёрмöмсянь одззася полöмыс öнi зонкалöн пондiс чулавны. Юрын жагвыв зорамисö быдкодь думаэз. Медбöрын Ильинов сувтiс синнэзнас кытшöмкö öтiк нетыдалан тор вылö, пондiс думайтны. Тöдвылас усис... Кин медодз вермас усьны матрослö тöдвылö служба коста, ылын аслас горт дынсянь? Сiя меддона мортыс, кöда часöт торйын, но кöда аслас письмоэзöн кокньöтö сылiсь служба кад, кöда йылiсь думайттöг и луныс оз чулав. Видзöтiс Ильинов паныт быгыльтан волнаэз вылö, дюттясис ны вылын öтлаын катерыскöт, кывзiс корма сайись валiсь шумитöмсö, а думанас эта коста вöлi гортын.

...Вынсялiс тулыс. Лунiсь лун сё пымжыка öгралiс да шонтiс шондi. Шолис да горöн ружтышалöмöн пуксис му бердö рудсялöм, дзик пöрисьмöмкодь лым. Лунiсь лун деревня вылiсь канаваэзöт быгыльтiс-котöртiс зелёнöйкодь рöма лым ва. Тополь йыввезын пукавтöн горöн карзiсö сьöдракаэз, мыдзтöг борддэзнаныс шовкöттöн, быднёж питиртiсö сьöдкайез. Зумыт тöв нёкралiс да павтыралiс öтмöдöрö небзьöм ни и этасянь лёлльыт пу уввез. Рыт кежö шоналöм руас тöдчöмöн кылiс вöрзьöм почкаэзлöн дук.

Деревня дорын, пöрись да паськыт тополь увтын, öшöтöм дюттян. Сёр рыт. Том отир, кöдна рытывбыт шуксисö дюттян гöгöр, бöртiжык, сьывтöн да серавтöн, рознитчисö деревня пасьта. И дзир нiя кыкöн, кöдналiсь ас коласын öзйöм радейтöмсö эз ни позь кусöтны, кыдз и вына тулыслiсь сибöтчöмсö, сё эшö вöлiсö дюттян вылын. Паныт сулавтöн да öтамöдыслö шыннявтöн, нiя сё öдззöтчöны да öдззöтчöны. Дюттяныс, дзик волнаэс вылын катерыс жö, то перыта лэбтiсьö вывлань, то тэрмасьöмöн лэдзчисьö бöр. А юр вевдöрын öшалан звездаэс эта коста тожö вештасьöны кöр öтöрö, кöр мöдöрö. Дюттясьöмсяняс зорамöм тöв койö нывкалiсь кымöс весьтас лэдзчисьöм юрсисö, одз да бöр чапкалö алöй ленточкаа чикисьсö. Сiя жö мукöд коста вылынакодь лэбтышалö сы пидзöссэз весьтiсь тулыс рöма, чочком кузя негырись лöз цветока, платьесö. Этасянь нельки рытся кизерик пемыт коста позьö казявны, кыдз рöмсялö нывкалöн чужöмыс. Сiя перыта öвтышалö öтмöдöрö юрнас: эн пö видзöт талань. Зонка недырик кежö мышкыртчö увлань, то ли бергöтчö. Но нывкалöн рöмсялöм чужöмыс да юрнас öвтышалöмыс дзир вынсьöтöны сы дынö зонкалiсь кыссьöмсö. Охота лоö öнi жö оськöвтны паныт, сывьявны, жмитны сiйö морос бердö, кöдаын эта коста сэтшöм горöн да гажöн ёткöтö сылöн радейтан сьöлöмыс. И дзир öдззöтöм дюттян увья кернытö сымдасö кытчöдз оз позь. Сiйöн öдззöтчыны нiя одзлань дугдöны. Недыр мыйись дюттян сувтö. Му вылас ни öтдруг оськöвтöны öтамöдлö паныт. Öнi зонкаыс одзын дзир зелёнöйкодь рöмаöсь нывкалöн синнэс: югытöсь да пыдынöсь, сöстöмöсь да гажаöсь. Кыкнанныс нiя эта кадö сэтшöм счастливöйöсь асланыс радейтöмсянь, что нельки висьтавны эта йылiсь кывнаныс оз чайтчö. Быдöс местö зонкаыс дугдывтöг шушкö дзир öтiкö: «Катя, Катенька, Катюша менам». Нывкаыс паныт оз шыась. Но гажнас тырöм синнэс, кöднöн сiя орöтчытöг видзöтö паныт, сэтшöм жö гаж шынньöлыс топ баитöны: но мый, мый сэтшöмыс? Висьтав, казьмöт. Быдöс басни местö, кыввес местö, кöднö видзчисьö нывкаыс, зонка вынöн, а öткоста кыдз позьö и рамжыка, и небытжыка жмитö сiйö морос бердас, жмитчö ачыс, пондö окавны. И öнi не дюттясьöмсяняс ни, а öтамöд бердö сибöтöм сотан тырппезсянь вились пондö бергöтчыны юр.

...Ильинов вель ылына пырис аслас думаэзö, ны увья и вунöтiс сы йылiсь, что сiя не гортын, тополь увтын, а мореын, боевöй корабль вылын. Катерлiсь волнаэз вылын качайтчöмсö зонка примитiс тополь ув бердын öшалан дюттян местö, корма сайын бурунлiсь шумитöмсö — тулысся шоррез местö, а паныт быгыльтан зелёнöй рöма волнаэз туйö сы син одзын сё эшö сулалiсö нывкалöн сэтшöм сöстöм да югыта öгралан синнэс. Эта увья сiя и эз кыв не двигателлезлiсь уджалöм, не командирлiсь сетöм командаэз, кöдна эта коста не öтiк ни паськалiсö омöн катер пасьта.

Вот катерыс тöдчöмöн пöлiньтчис — водiс боевöй курс вылö. И кывны кöбы Ильиновлö сэк кежö медбöрья командасö, сысянь сымда и колiс, мед чепöссьыны аслас торпеднöй аппарат дынö да сувтöтны сiйö боевöй взвод вылö. Керны кö уджсö кужöмöн, эта вылö минутася унажык кад эз ковсьы. Но аслас думаэзын зонка, тыдалö, сё эшö дюттясис нывкаыскöт тополь ув бердö öшöтöм дюттян вылын, сiдз кыдз мый ковсис сысянь эта кадö, кернытö сiя эз и думайт. Кылiсö эшö кынымкö команда. А Ильиновöс и нiя эз саймöтö. Эта коста катерсö ёнакодь зэгнитiс, татшкыштiс бöрлань, мыйсянь сiя недырик кежö сувтчыштiс, пыдына пуксис корма вылас.

Öнi вöлись Ильинов дзик саймис. Зонка перыта нетшкöвтчис аслас аппарат дынö. Дзир кернытö öнi эстöн вöлi нем ни. Йöз киöн взвод вылö сувтöтöм аппаратiсь торпедаыс вöлi лэдзöм. Кылiс нельки, кыдз неылын катерыс одзын сiя горöн чольснитiс ва бердас.

— Веськытлань руль!

— Эм веськытлань руль, — дублируйтiс рулевöй командирлiсь сетöм командасö. Катерыс тöдчöмöн водiс веськыт борт вылас.

— Вынöнжык одзлань! — Кылiс команда машиннöй отделеннёись мотористтэзлö. Паськалiс двигателлезлöн горöнжык эрзыштöм. Корма увтсянь вылына лэбтiсис пизьöмöн чепöссьöм бурун, вынöн татшкис одзлань катерсö.

— Быд вынiсь одзлань!

Перыта мунтöнняс ни катерсö татшкис эшö вынöнжык, мыйсянь сiя нельки ордчыштiс одзнас вывлань, петiс джын корпуснас ва вевдöрас, дзик мöдiс нетшкöвтчыны сы бердiсь, да сiдз, öтiк корманас волнаэсö юкöвттöн, лэбзис-мунiс одзлань.

Звеноись командирлöн катерыс, кöда вывсянь юралiсö «бойнас», мунiс одзаныс. Атака коста торпедаэз вöлiсö лэдзöмöсь «цельö». Заданнё тыртöм. Мед аслыныс кольччыны дзоньöн, öнi колiс сайöвтчыны. Бöриссесö сайöвтöм могись юралiсьыс вывсянь лэдзисö дымовöй завеса. Сы коласö öнi и юркнитiсö-пырисö кыкнан бöрись катерыс. Тшыныс гöгöр вöлi сэтшöм сук, что нельки матын борт сайын нем эз тыдав. Кажитчис этасянь, что катерыс мунiс не ва вывтöттяс, а лэбзис борддэз вылын сук кымöр коласöт.

Öткö, тшынсяняс, а, мöдкö, ас вылö досадасянь Ильиновлiсь синваэз петтöдз курöтiс синнэсö. Одззася думаэзiсь, кöднасянь сэтшöм кокнит да гажа вöлi сьöлöм вылын эшö нач неважын, öнi и след некытшöм сы юрын эз кольччы. А и думайтсис кö эшö мый, дак дзир сы йылiсь, что öтiк лунö, öтiк тревога коста, сiя мöдöтпырись ни сёрмис аслас боевöй пост вылö.

Катер чуйкнитiс-петiс тшын колассис, босьтiс курссö одзисьыс сьöрö. Кыдз только дымовöй завеса увтiсь мыччисис и куимöтыс, одзисьыс вывсянь сетiсö воздушнöй тревогалiсь сигнал да команда — лöсьöтчыны «бой» кежö.

Öнi оссис удж зенитнöй пулемётчиккезлö. Володя Панов, кöда неважын вежис Ильиновсö торпеднöй аппарат сайын, жмитчис, топ лякасис кормовöй турельнöй установкаись прицел бердö, видзчисис команда, мед осьтны би «противник» самолёттэз кузя. Недыр мыйись кормовöй зениткалöн стволлэс и былись пондiсö перыта зэгавны. Этасянь жö тöдчöмöн зэгалыштлiс и быдсöн катерлöн корпусыс.

Не сэтшöм овлö кокнит мездiсьны «противник» самолёттэз шогья, кöр нiя казяласö ва вылiсь цель. Бомбовöй ударöн уськöтчисö самолёттэз катеррес вылö, перыта дзугисö звенолiсь походнöй строй. Öнi катеррез мунiсö вель ылын öтамöд дынсянь, кадiсь кадö сувтчышалiсö нето перыта чепсасисö то шульгалань, то веськытлань — маневрируйтiсö А «противниклöн» самолёттэз дзик лякасисö катеррес бердö, керисö кытш бöрын кытш, «бомбитiсö».

Бöртiжык катеррез вылын бырисö снаряддэз. Нуöтны одзлань противниккöт «бой» лоис немöн. Кольччис öтiк — кужны да вермыны сайöвтчыны, мед кольччыны дзоньöн да ловйöн. Эта коста катер вылын юöртiсö: пробоина носовöй отсекын.

Мый колö керны сэтшöм обстановкаын, Ильинов тöдiс бытшöма. Сiя медодз уськöтчис пытшкас, котöртiкас ни кульыштiс вывсис форменнöй роба. Сы сьöрö жö ештiс и катер вылiсь электрик, старшöй матрос Макаров. Кыкöн кутчисисö удж бердö. Кынымкö минута бöртi носовöй отсекись пробоина вöлi тупкалöм.

Эз ешты Ильинов юöртны командирлö пробоинасö тупкалöм йылiсь, кыдз висьталiсö: ранитöм стрелок-зенитчик. Ильинов думайттöг уськöтчис сы дынö.

Шульга пельпон вылас юрсö уськöтöмöн да плетьöн моз увлань лэдзöм киöн, Володя Панов пукалiс аслас турель вылын, бытьтö и былись вöлi ранитöм.

Ильиновлö ковсис кыскыны ёртсö турельнöй установка вылiсь, лэдзны увдöрись палуба вылö да керны перевязка.

Эта коста катеррез вывсянь вились вöлi öшöтöм дымовöй завеса. Тöвнас, кöда пöльтiс одззамоз, тшынсö кыскис одзлань. Сiя и отсалiс катеррезлö сайöвтчыны «противник» шогья.

Чожа мый куимнан катерыс вились сувтiсö походнöй стройö. Боевöй расчётлö сетiсö отбой.

Öнi вöлись Ильинов кылiс, кыдз ештöм мыдзны ученнёэз коста. Кикок вöлiсö дзик кöрталöмöсь. Вынöн да сьöкыта брякйис-ёткöтiс сьöлöм, зубытöдз вартiс кöсичаэзö вир, тöдчöмöн бергалiс сьöктамöм юр. Охота вöлi узьны.

III

Луншöр гöгöр катеррез бертiсö ученнёэз вывсянь. А павжун бöрсянь быдöнныслöн шоччисян кад. Нiя, кöдна бертiсö мореись, вöлiсö мыдзöсь, водiсö и чожа мый ланьтiсö. Казарма лöньсис.

Ильинов тожö вöлi мыдз и тожö лöсьöтчис узьны. Зонка водiс, но эшö, онмöссьытöдззас сылö усис тöдвылас, что чожа лоас почта. Он сэк жö палялiс.

Петавлö мукöд коста служба вылын сэтшöм кад, кöр ас письмо вылö ответсö сьöкыт овлö видзчисьны лун нето кык сьöрна. Ильинов жö видзчисьö сiйö не лун и не кыкö, а вот кыдз джын год ни.

Частьö почтасö ваялöны быд лун. Быд лун чуть я не быдöнныс босьталöны письмоэз. Мукöдыслö öтiк лунас локтöны нельки кыкöн, куимöн. И сэтшöммес радöсь, гажаöсь. Нiя лыддьöтöны, ошшасьöны öтамöдлö босьтöм фотокарточкаэзöн, гижöны паныт, думайтöны ны йылiсь, кинлö гижöны, надейтчöны мыйкö бур да колана вылö и сiдз, лунiсь лун, неделяись неделя, чулöтöны служба кад. Ильинов тожö гижис аслас нывкалö. Сiя и думайтiс сы йылiсь мукöдысся не етшажык, а паныта письмоэс сылö эз вöлö. Джын годнас зонка гижис нывкаыслö не öтiк дас письмо, дзир кытчöдз и öтiк вылö ны коласiсь ответсö эз босьт. Медбöрья кадö сылö нельки пондiс думайтсьыны: кин оз видзчись письмоэсö, сылö локтöны. А кин видзчисьö дугдывтöг, быд неделя, лун, час, — сылö озö. Этасянь, кыным одзлань, Ильиновлöн думаэс лоисö сё сьöкытжыкöсь да гажтöмжыкöсь.

Вот и талун. Кыдз только зонкалö усис тöдвылас, что чожа лоас почта, он сэк жö палялiс. И кольччис кö сiя аслас ольпасьын, дак дзир шоччисьöм могись, сiдз кыдз кадыс шоччисян и вöлi: нем мöдiкö эта коста керны эз ков да и эз позь. Куйлытöнняс Ильинов кутчисьлiс книга бердö, но чожа мый пöдналiс бöр. Лыддьöтсяс разь, кöр лыддьöтöмсис юрö нем оз пыр? Сэк зонка бöра пондiс думайтны, лоас, оз сылö письмоыс кöть талун ни. А кокнит я тöдны одзлань сымдасö, да эшö сэк, кöр сiйö видзчисьöмсянь мыла нач ни бырис?

Медбöрын, кыдз унаись ни вöвлi одзжык, зонка нюжöтчис кинас тумбочка вылын куйлан паськöм бердöдз. Сэтчин, моросiсь карманын, бытшöма каттьöм целлофановöй гижöтö, куйлiс меддона фотокарточка. И колiс дзир сiйö öнi разьны, кыдз сы вывсянь паныт шыннялöмöн, дзар керыштiсö зонка вылö сэтшöм гажа, лöсьыт чужöмбана нывкалöн чикыракодь сералан синнэс.

Вель дыр видзöтiс Ильинов фотокарточка вылö, дзик кошшис, мöдiс казявны нывкаыс чужöмись, этна тöдса синнэзiсь сiйö причинасö, кöда увья сiя чöлiс быдöс этö кадсö. Но мымда бы зонка эз нёджжась, коланасö казявны сiдз и эз вермы. Сэк сiя бергöтiс фотокарточкасö мöдöрнас. Сэтчин важынсянь тöдса почеркöн дженытика вöлi гижöм: «Мед эн вунöт, кинöс любитан».

Тöдса почеркыс да сьöлöмöдз йиджан кыввес недырик кежö гажöтiсö зонкасö сiйöн гажнас, кöдакöт сiя некöр эз янсöтчыв, кытчöдз локтiсö нывкасянь письмоэс. Öнi сiя видзöтiс фотокарточка вылö, думайтiс: «Да не. Вермас разь лоны сэтшöмыс, мед сiя менö вунöтiс? Некöр. Ми жö сыкöт томсянь не öтiк год сьöрна дружитiм. А сетöм кылыс?.. А эстöн гижöмыс?.. Эд сы киöн, сы фотокарточка вылын гижöм, мед янын овтöн не вунöтны öтамöдöс. Сiдзкö, нем оз вермы лоны умöльыс. И оз ков повны весь, что письмоэс вель дыр абуöсь. Етша ли мый вермис лоны».

Быдöслö этна причинаэзлö Ильинов важын ни эз верит. А думайтiс кö сiдз, дак дзир сы понда, мед кöть недырик кежö бöбöтны асьсö да этöн бöбöтлöмнас лöньсьöтны ассис гажтöмсö. Но вот бöбöтчан думаэс юрсис тöвзисö. Ны местö вились сувтiс зорамöм картина. Думайтны эд колö: мымда да кытшöм бытшöма бы сiя тасянь эз гиж джын год сьöрна — и öтiк паныта письмо эз вöв. А джын годыс — не джын лун. Некыдз сiдз эз вермы лоны, мед эта коста эз адззись кад кöть öтiк дженытик письмо вылö. Ильинов важын ни казялiс, что сылöн нывкаыскöт дружитöмын лоис мыйкö неколана да небытшöм, кöдö öнi оз ни позь бергöтны бöр, то ли вештыны кытчöкö бокö. Сiя вынсьöтчис не думайтны эта йылiсь, вашöтны юрись этö думасö, но керны сымдасö некыдз эз вермы: вын эз судз. И öнi, кöр быдöс вились усис тöдвылö, сылö лоис öддьöн охота кöть недырик кежö шедлыны гортö, адззывны ас синöн, тöдны, мыля, кытшöм сэтшöм причина увья нывкаыс и öтiк кылöн оз пантав сылiсь письмоэсö. Но служба эм служба и сiйö, мый тэныт ковсьö öтнасытлö, ас воляöн он кер. Эта местö Ильинов дзир сибöтiс матöжык син одзас нывкалiсь фотокарточка, кыдз бытьтö этасянь мöдыс вермис ловзьыны да шыасьны паныт, юалiс: «Катя? Катенька? Катюша менам? Мыля тэ чöлан? Мыля тэ меным сы дырна он гиж? Тöдны бы тэныт, кытшöм татöн гажтöм тэ письмоэзтöг, тэтöг, Катенька, Катюша». Но фотокарточка вылас нывкаыс эз ловзьы, и быдöс вылö, мый вöлi висьталöм, сiя и öтiк кылöн паныт эз шыась.

Эта коста оссис казармаись ыбöс. Порог дорас сувтiс старшöй матрос Макаров. Сылöн мыччисьöмыс, кыдз тревогалöн сигнал, перыта саймöтiс да лэбтiс быдöннысö кок йылö. Радувья кинкö шуис:

— Почта локтiс!

А одзлань быдöнныс öтдруг ни:

— Макаров, дона ёрт, меным медперво!

— Толик, а меным мыйкö эм, абу?

— А меным, Макаров?

Кинкö кульыштiс вывсис шебрас, перыта пондiс кöмасьны-пасьтасьны. Кинкö кöмтöг-пасьтöг уськöтчис паныт Макаровлö, босьтöм письмонас ни радувьяс лэдзчисис йöктыны.

Койкаэз коласöт Макаров жагвыв кытшöвтiс казарма пасьта: сеталiс, кинлö мый вöлi вайöм. Öтмöдöрсянь пондiс кывны гижöтлöн кышöтöм. Быдöнныс тэрмасисö осьтны письмоэз, лыддьöтiсö, радуйтчисö. И дзир öтнас Ильинов кольччис куйлыны одззамоз аслас ольпась вылын. Кадiсь кадö зонка тожö дзарышалiс Макаров ёртыс ладорö, но чеччыны койка вывсис да сибöтчыны сылö паныт эз тэрмась. «А весь кö?»

Ильинов дынö Макаров сибöтчис медбöрын. И вöлись сэк, кöр сiя не öддьöн тэрмасьöмöн мыччис лöз рöма нöитчöмкодь конверт, Ильинов нюжöтiс паныт кисö. Босьтiкас ни зонка вежöртiс: письмоыс мамыссянь. Пöрись синнэза да не öддьöн грамотнöй, сiя гижис зоныслö письмоэсö йöз отсöтöн. Сiйöн эшö лэдзтöдззас, пиас нето карманас новйöтöмсянь, конвертыс ёна нöитчывлiс. И сетлiсö кö Ильиновлö сэтшöм конверт, зонка сорасьтöг одзлань ни тöдiс, кин сылö гижö. Öнi Ильинов тожö разис письмо, тожö пондiс лыддьöтны.

Мамыс медодз юöртiс, что локтiс сысянь письмо да фотокарточка, мыйöн вель öддьöн гажöтiс сiйö. Сэсся пöрись морт висьтасис аслас абутöмкодь здоровье йылiсь, колхознöй удж да öткаса олан йылiсь. И вöлись бöрья страница вылас Ильиновлö мамыс юöртiс сiйö, мый мöдыс сысянь некöр эз и видзчись, но кöда увья джын год сьöрна ни доймис сылöн сьöлöмыс. Мамыс гижис: «Зонiньöй, эн лöгась ме вылö, пöрись морт вылö, небасöк юöрыс понда, кöдö часöт тэныт юöрта. Катяыс, кöдакöт тэ тöдчин да письмоасин, кöдö ме öнöдз лыдди аслым монь туйö, — мунiс. Мунiс Максим Öльöшка сайö, кöда эшö мöйму арнас бертiс армиясянь, а öнi, вот кыдз мисеч ни, олöны. Эн гиж сэсся сылö письмоэсö, эн сор нылiсь öтласа олансö да эн пöрт асьтö смехö отирыс син одзын. Сы увья тэ весьтöт шондiыс сё ни оз саясь. Служит бытшöмика да берегит асьтö. Окала тэнö, зон. Мамыт».

Лыддьöтiс Ильинов мамыс киöн гижöм письмосö и медперво нем эз и вежöрт. Примитны сэтшöм видзчисьтöм юöрсö ылöснас зонка эз чайтчы. Сiйöн этö местасö ковсис лыддьöтны и мöдöтпыр, и куимöтпыр. Кытшöм жö зубыт да сьöкыт вöлi веритны гижöмыслö. Не веритны жö мамыс кыввезлö некыдз эз позь. Письмонас киыс жагвыв лэдзчисис морос вылас. Ильинов сувтöтiс потолокас синнэсö, гусьöн да пыдына ловзисис. Сьöлöмыс, кöда эшö неважын сэтшöм вынöн корсис петны мороссис, öнi лöньсис, жмитчис, дзебсисис, топ ранитöм кай. Одззася думаэзсянь юр просмис. Быдöс лоис вежöртана. Невежöртанаöн кольччис öтiк: мыля, кытшöм причина увья сiдз вермис лоны? Но мымда бы Ильинов эз думайт, адззыны ответ эта сувтöтöм вопрос вылö сiдз и эз вермы. Сы местö зорамöм обида, кöда вачкисис сьöкыт из вылö, эшö одззася вынöнжык пондiс нырыштны сьöлöмсö.

Шоччисян кадыс эз на чулав. Но не узьны, не куйлыны öнi некин эз ни думайт. Босьтöм письмоэзсянь он быдöнныслöн палялiс. Кинкö сё эшö лыддьöтiс, кинкö ошшасис ёрттэслö босьтöм фотографияэзöн, а кин сэтöн жö кыскис тумбочкаись гижöт, пондöтчис гижны.

Орсiсö «подъём». Сетiсö команда построеннё вылö. Нiя, кöдна вöлiсö гажöтöмöсь талуння почтаöн, бур настроеннёöн, кокнита иньдöтчисö служба вылö. Чожа мый казармаыс лöньсис. И дзир öтнас Ильинов эз кыв сетöм командасö да эз вöрзьöтчы аслас местаись. Койка вылас куйлытöн, сiя öнöдз видзöтiс неадззан синнэзö кытшöмкö öтiк нетыдалан местаö.

Недыр мыйись кылiсö кинлöнкö сибöтчан оськöввез. Мичман Елухов сувтiс Ильинов койка дынö.

— Ёрт матрос! — топ лыйис, паськалiс казарма пасьта сылöн шыасьöм. Ильинов паныт эз шыась. Сэк Елухов нюжöтчис кинас койка бердöдз, вынöнкодь зэгöтыштiс. Öнi вöлись Ильинов, дзик саймис, дрöгнитыштiс местаас.

— Мыля не развод вылын?

И эна кыввезлö паныт Ильинов тожö нем эз висьтав. Да и мый сiя вермис висьтавны сэк, кöр и ачыс эз ылöст да эз тöд, мыля сiя öнöдз не развод вылын.

— Ме тэнчит юала, ёрт матрос? — эшö öтпырись горöтчис Елухов.

Ильинов пуксис, кышыштiс вылас роба, пондiс кöмасьны.

Паныта шыасьöмсö видзчисьтöн Елуховлöн мыла бырис. Мичман нюжöтчыштiс, дзик сулалан строй одзын, шовкнитiс оча каблук, веськыт кинас сибöтчыштiс мичманка козырёк бердö.

— Развод вылö сёрмöм понда кык наряд очередьтöг. А öнi шагом марш катер вылö!

Ильинов бытьтö эз и кыв сылiсь баснисö. Позис думайтны, что зонка то ли нач глухöй, то ли Елуховлöн басниыс сы ылöсöдз оз сибав. А висьтавны кö веськытжыка, дак, натьтö, сiдз и вöлi — эз сибав. И вöлись сэк, кöр вöлi лöсьöтыштöм койка вылiсь ольпась, зонка веськöтчис, первуись дженытика дзар керыштiс Елухов вылö. Эта коста сы синнэзiсь эз позь казявны не лöг, не полöм, не обидалiсь выраженнё. Нiя вöлiсö тыртöмöсь сэтшöм сьöкыта нырыштан шогöн да гажтöмöн, кöднасянь нельки аслыс Елуховлö лоис кыдзкö не ас сьöртöт.

Ильинов босьтiс тумбочка вылiсь бескозырка, кыдз шедiс, кышыштiс сiйö юр вылас, бергöтчис, иньдöтчис петанiнлань.

— Сулав жö... Тэ доймин? Шогалан?

Но не сувтны, не горöтчыны мыйкö паныт Ильинов эз письты. Сiя вöлi нерад аслыс. Эз вöв некытшöм охота осьтны синнэз, видзöтны чочком свет вылö. Ильинов чулалiс казарма, жагвыв да лöня, дзик вуджöр, сайöвтчис ыбöс сайö.

IV

Гажтöма чулалiс катер вылын павжун бöрсянь кад: колiс весöтны да мавтны материальнöй часть — торпеднöй аппараттэз. Гажтöм вöлi не сiдз уджсяняс, кöдö ковсис керны, а думаэзсянь, кöдна дугдывтöг пырисö юрö. Быдöс, мый усис тöдвылö, öнi некыдз эз ни гажöт, дзир содтiс да вынсьöтiс зорамöм обидасö. Но медсьöкытыс Ильиновöс видзчисьöм вöлись рытнас.

Ужин бöрсянь быдöнныс мунiсö кин кытчö. Öтiккез — киноö, мöдiккез — спортзалö, тренировкаэз вылö. Мукöдыс чукöртчисö ленинскöй комнатаö, орсiсö шахматтэзöн, лыддьöтiсö журналлэз да газетаэз. Киннэз кольччисö казармаö, вились кутчисисö письмоэз бердö. А Сашка Черкасов кыскис койка увтiсь баян, сувтöтiс сiйö пидзöссэс вылö. Орстöг, кыдз и шуткатöг, Черкасов овны эз вермы. Нытöг зонкалöн и луныс эз чулав. Öнi сiя мыйкö дырна дзикöтöв-керис бассэзнас, кынымиськö вашöтiс чуннезнас ладдэз кузя вылiсянь улöдз да бöр, а сэсся вуджöтiс переборсö быдöнныслö сэтшöм тöдса да сьöлöмöдз йиджан мелодия вылö «Ой, красивы над Волгой закаты».

Черкасов орсiс. Ильинов эта коста пукалiс неылын орсiсьыс дынсянь, койка юр бердас гырдззаэзнас нырыштсьöмöн, кывзiс. Баянлöн небыт да гора шыэс тыртiсö лöнь матросскöй казармасö, висьтасисö сöстöм любитöм да нывкаыс видзчисьöм йылiсь. Нiя жö уськöтiсö Ильиновлö тöдвылас и ассис гортiсь мунöмсö. А быдöс вöлi топ сiдз жö, кыдз висьтассис эта сьыланкылын.

...Пондöтчис июнь, медодзза да медгажа, дзик праздник, гожумся месяц. Сiя кадö ештiс ни саймыны вöра Коми крайлöн природа. Юэз пырисö асланыс береггезö. Гора гожумся паськöмö мöдöтчис вöр. Син одзын вежсис ыббезлöн рöм: перыта лэбтiсисö осяэз, рам да шоныт тöлок увтын окласис гумьясьöм рудзöг. Вöр пасьта горöн паськалiс кöккезлöн кöкöм, а ыбшаррезлöн сöдз да гажа питиртöм поснит бисерöн койис ыббез пасьта. Видззез мöдöтчисö быд рöма цвета сарафаннэзö, топ праздник кежö деревенскöй инькаэз, а нысянь руыс тырис коддзöтан ма кöра дукöн.

Сэтшöм кадö, рытъявылас, Ильинов бертiс военкоматсянь.

— Но, мама, лöсьöт, мый ештан, — горöтчис сiя, кöр пырис керкуас да мыдзöмувья пуксьыштiс недырик кежö лабич вылö.

— Мый сэтшöмыс лоис? — юалiс паймыштöм мамыс, но чожа мый быдöс вежöртiс, пондiс горзыны.

Оз позь висьтавны, мед Ильинов полiс да мыйкö увья пыксис армияын служитöмись. Зонка вежöртiс, что служитны ковсяс, видзчисис этö кадсö, лöсьöтчис одзлань ни: тöдiс — армияын служитiсь мортлö и отир ладорсянь уваженнёыс ыджытжык. Эз думайтсьы дзир эта вотöдз, что босьтасö сэтшöм перыта, öнi эта и дзугис кодь сылiсь настроеннёсö.

Мамыс сэтöн жö, тэрмасьöмöн, пондiс лонтны гор. А Вася петiс гортiсь, иньдöтчис колхознöй клубö.

Рытыс эшö эз вöв сёр, и сэтчин эта кадö, кыдз кужис-вермис, гажöтчис том йöз. Кинкö зонкаэз коласiсь серöтiс-орсiс хромка вылын, а нывкаэз сы одзын сьылiсö да йöктiсö.

Кыдз только том йöз казялiс Ильиновлiсь клубö пырöм, быдöнныс сэтöн жö чукöртчисö сы гöгöр, пондiсö юасьны. А кöр зонка юöртiс, что асывнас колö мунны, лöньсьыштiсö.

Томмезлiсь öтамöд коласын дружитöм деревенскöй отир увья он сайöвт. Вася да Катя дружитöм йылiсь тöдiсö быдöнныс.

— А Катяыс?.. Кытöн нö талун сiя? — кватитчис кинкö нывкаэз коласiсь. Наташа Лысова паныт висьталiс:

— Гортын сiя талун. Сельсоветö, шуö, ветлöм кытшöмкö справкаэзла, мыдзöм подöн ветлöтöмсяняс. А Васяыс бертöм йылiсь сiя öнöдз эшö нем оз и тöд.

— Ветлам сэк гортöдззас, — горöтчис Ильинов.

— Ветлы, колö дак. Ме мыйлö муна?

— Наташка! Мыля тэ сэтшöм? Зонкаыс бöрья лун гортын, а тэ сылö сiдз горöтчан. И стыд тэнат абу? Сьöкыт я мый я Катяыс дынöдз котрасьлыны? Тi жö сыкöт тöдчат, и пыр öтлаын, — горöтчис кинкö нывкаэз коласiсь. Эна кыввезсянь Наташалö, тыдалö, лоис недолыт. Нывка сэтчöдз рöмсялiс чужöм вылас — сiйö и видзöт, вирыс вотьыштас. Эта бöрсянь сiя и горöтчынытö паныт нем эз лысьт, эшö зонкаысся одзжык тöвчикöн иньдöтчис ыбöсö.

Векнитик коса, вывтырнас Ильиновкöт öтсувда, чочком да кузь чикися, гöгрöса чужöм вылас ылöса лöз сина Наташа вöлi Катякöт öтiк годся. Велöтчисö нывкаэз öтлаын кыкьямысöт классöдз, а сэтöн янсöтчисö. Наташа год кежö ветлiс курссэз вылö, пондiс уджавны колхознöй правленнёын счётоводöн. Некинкöт зонкаэз коласiсь нывка öнöдз эз ветлöт, но не сы увья, что вöлi эшö том, нето зонкаэс эз адззисьö. Причинаыс эстöн нач мöдiк. Важын ни саймис сы моросын том да пым сьöлöм, важын видзчисис паныта радейтöмсö, но не нысянь, кинлö-кöдналö гленитчис, а дзир сысянь, кин дынö кыскис сьöлöмыс. А колö висьтавны, что кыскис нывкатö сiя жö Ильинов Вася дынö, кöда эта коста дружитiс ни сы подружкакöт. И сiдз кыдз öтiксö кыкыслö янсöтнытö некыдз эз позь, Наташа, кыдз кужис-вермис, сайöвтiс отирыс син шогья ассис öгралан чувствоэсö.

Öнi нiя оськалiсö ордчöн, небытик луда тöдса деревенскöй улица кузя. Быдыс ны коласiсь думайтiс ассис. Вася сы йылiсь, что чожа, вот-вот, пантасяс Катякöт, и дыр кежö янсöтчöм одзын нiя öтлаын чулöтасö этö мича да шоныт гожумся ойсö. Наташа жö — что вот нiя оськалöны öтамöдкöт ордчöн, но зонкаыс некыдз не оз адззы, не оз казяв сылiсь висьтавтöм думаэсö, оз кыв сы моросын пым сьöлöмлiсь сэтшöм вынöн ёткöтöмсö. А быдöс сысянь, что думайтö эта коста нач мöдiк йылiсь.

Ордчöн оськавтöн, Наташа, кöть и дженытика, бытьтö казявтöг, кынымиськö нёджжöвтыштiс ни зонкаыс ладорö. Бöртiжык видзсьынытö, тыдалö, сё жö эз вермы, юалiс:

— Кывзы жö, Вася. Мыля нö тэнö сэтшöм чожа босьтöны? И öтiк лун эд, видзöт жö, шоччисьнытö эз сетö.

— Кин сiйö тöдö. Сымдасö эд миянлö оз висьталö. Сiдз, натьтö, колö.

— А кытöн служитны пондан, тожö он тöд? — Тöда. Флотын висьталiсö.

— Былись, Вася? — дивуйтчыштöмöн горöтчис нывкаыс. — Морякöн, сiдзкö, лоан. Вот эд, батя.

— Мый, оз гленитчы?

— Да тэ мый, Вася? Мыля нö оз? Öддьöн нельки гленитчö. öтiк формаыс моряккеслöн кытшöм бытшöм да басöк. Сы бердiсь эд кöть синтö эн орöт. — А недырик чöлыштöм бöртi одзлань: — Счастливöй сё жö Катяыс, видзчисяс кö тэнчит бертöмтö.

— А кыдз тэ, Наташка, думайтан, видзчисяс, оз?

— Ме уж, батя, сымдасö ог тö-ö-öд. Этö тэ сылiсь ассис юав. — Недырик чöлыштöм бöртi одзлань: — Мыля бы и не видзчисьны, радейтö кö тэнö да пондас кö надейтчыны? Ме бы сы туйын, дак кöть нёль, кöть дас год сьöрна видзчиси. — Аслыс казявтöг нывка пыдына ыш ловзисис, но сэтöн жö, тыдалö, казялiс унаöв горöтчöмсö, öзйыштiс чужöм вылас, бергöтчис мöдöрö, тöдчöмöн содтыштiс чожсö. Но сiя кадö зонкаыс, тыдалö, эз и думайт нывкаыс горöтчöм кыввез йылiсь, мый вöлi казьмöтöм сы басниын — эз вежöрт, чöлiс. Сiдз чöлöмöн нiя и сибöтчисö Катяыс керку дынöдз.

Посöдз бердас ни Наташа зонкасö одзалыштiс, кокшытöг кокнита быркнитiс-кайис вывлань. Посöдз ыбöсыс пытшксяняс вöлi игана. Нывка повтöг ёркöтчис.

— Кин сэтчин? — чожа мый кылiс ыбöс сайсянь паныта шыасьöм, кöдасянь, дзик саймис, ёкнитiс Ильиновлöн сьöлöмыс.

— Да ме, кин эшö. Петав недырик кежö.

— Видзчисьышт, Натка, ме часöт пасьтася.

Но видзчисьны Катялiсь петöмсö Наташа эз понды. Ыбöс дынсяняс жö нывка перыта бергöтчис бöр, топ нильдiс, лэдзчис увлань.

— Видзчись. Часöт петас, — дженытика шыасис сiя зонкаыслö, ачыс сувтчытöг иньдöтчис горт ладорö.

— Сулав, Наташка. Часöт öтлаын мунам.

— Кытчö ни меным тiянкöт... — нето шутка могись, нето обидитчöмöн горöтчис паныт нывкаыс, чожа мый саясис син одзись.

Öнi вöлись кыдзкö недолыткодь лоис Васялö сьöлöм вылын, но эта коста оссис посöдз ыбöс. Порог вылас сувтчыштiс Катя. Неыджыт, но ён вывтыра, сэтшöм жö кикока, тыра мороса да лöсьыт чужöмбана, сiя вачкисис вочöтöм акань вылö. Зонкаыс одзын сулавтöн, нывка дзик мыччалiс асьсö. Быдöс сыын эта коста топ баитiс: да видзöт жö тэ, видзöт, кытшöм ме быдкодь сэтчин Машаэз да Наташаэз сьöртi. И Ильинов видзöтiс. Минута сьöрна, а то и дыржык, сылöн синнэс гладитiсö нывкалiсь вывтырсö. Эта коста Наташа одзын одззася недолытiсь и некытшöм след эз кольччы. Бöртiжык зонка ачыс ни нетшкöвтчис вывлань сы дынö, босьтiс киэс вылö, лэдзис порог вывсис.

— Катя, Катенька, Катюша менам.

— Ноко жö. Мамö öшынöттяс адззылас.

— Но и ась — бöрья рыт талун.

Зонкаыс киэз коласын нывкаыс пессьыны дугдiс.

— Мый, примитiсö? Да? А кöр муннытö?

— Ашын.

— Ашын ни? Вася? Да тэ мый? Мыля нö сэтшöм чожа?

Ответыс местö зонка дзир жмитыштiс пельпоннэзнас. Мыйкö дырна сулалiсö чöлöмöн, видзöтiсö öтамöд вылö: гажтöмкодя — зонкаыс, дивуйтчöмöн — нывкаыс. Сiя жö медперво одзлань и юалiс:

— Вася, а кыдз нö сэк...кыдз ме?.. Гажтöм эд лоас...

— Мöдiкöс адззан, — шутитöм могись, кöть и не öддьöн гажöн, шыасис паныт зонкаыс.

— Бöбöв тэ, Вася! И стыд тэнат абу сiдз баитнытö? Кыдз тэ лысьтiн ме йылiсь сiдз думайтнытö? Не-е. Некинöс, батя, меным тэсся оз ков, эн и думайт, эн и баит сымдасö. Ме понда видзчисьны тэнö, вот адззылан. Некытчö тэрмасьнытö. А тэ пондан меным письмоэсö гижны?

— Катенька! Мыйлö тэ сiйö юалан? Кинлö нö эшö меным гижнытö, кыдз не тэныт? Вежöртана — понда, быд лун. — Зонка вились сывьялiс нывкасö, кыдз вермис, жмитiс ас бердас. Мездiсьны эта увья мöдыс öнi эз ни пондыв, ачыс пуктiс зонкаыс пельпоннэз вылö киэсö, ачыс жö жмитчис паныт сы бердö.

Шондi петан кадö, кöр деревняись отирыс ештiсö саймыны ни да пондiсö вашöтны пода, Вася да Катя недырик кежö янсöтчисö.

Быд бур нето умöль юöр деревня пасьта паськалö перыта. Ильинов мунöм йылiсь асыв кежас деревняыс быдсöн тöдiс ни. Час кыным бöртi том и пöрись йöз чукöртчис Ильиноввез ордö. Öтлаын мöдiккезкöт локтiс и Катя.

Зонсö кузь туйö лöсьöтöмсянь, öшöмкодь да гажтöм, Васялöн öткаса мамыс корис нывкасö комö, рамыника горöтчис:

— Мыдзи ни ме талун, дитя, бергалöмыссянь. Отсасьыштiн бы невночкасö ныв местö. Босьт кружкасö да удав отирыслö юнытö.

Недырик нывка сулалыштiс паймыштöм кодь. Бöртiжык ассис полöмсö сiя вашöтiс. Юан кружканас киас ни Катя петiс занавеска сайись, öтiк бöрсянь мöдiклö пондiс удавны юны. Отирыс, кöда син вылö усис нывкаыс эта керкуын да эта гортся удж сайын, дивуйтчытöг думайтiсö: «А мый сылö сайласьнытö? Эта дырна ни дружитöны ас коласын да кöркö эд сё ни öтлаын лоасö». Ильинов жö, кöда дугдывтöг видзöтiс нывкаыс вылö, радуйтчан сьöлöмöн ас кежас думайтiс: «Мыйöн не инь? Некинкöт эд ордчöн он сувтöт. Быдöнныс коласiсь медбытшöм, медбасöк. Сы вылö и видзöт».

Кыскыны гортiсь петöмсö кадыс эз вöв. Ильинов жагвыв кытшöвтiс керку пасьта, быдöнныслö сетiс ки, петiс. А кöр кайисö да пуксисö автомашина вылö, том отир пондöтiсö сьывны. Сiдз, сьывтöн, петiсö деревняись, мунiсö тöдса ыббез да видззез кузя.

Медбöрья ыббес дорын автомашина сувтiс.

— Но, мама, Катенька, спасибо тiянлö кольлалöмыс понда. Эд кытчöдз бы мекöт эд мунö, янсöтчынытö сё ни ковсяс. — Эстöн Ильинов повтöг ни кыкнаннысö окалiс. Сэк жö, мамыс синваэз кузя, зонкалiсь первуись курöтiс синнэсö... Эта вылын и янсöтчисö. Автомашина жагвыв вöрзьöтчис увлань. Кольлалiссес кольччисö сулавны керöс вылас, туй шöрын.

— Гиж, дитя, письмоэсö, да частожык! Гажтöм эд миянлö тэтöг лоа-а-ас! — голоснас ни горзытöн горöтчис автомашина сьöрö мамыс.

— Гиж, Вася! Ми пондам видзчисьны! — сы сьöрö жö горöтiс и нывкаыс. Эна кыввезiсь зонка вежöртiс: Катя кöсйисьö видзчисьны не только сысянь письмоэсö, но и сiйö асьсö.

Нывкаыс киын мыччисис чышьянок. И сiя кадö, кöр автомашина кокнита тарöвтчис увлань да нюжöтiс ны коласын туйсö сё кузьжыка, нiя сё эшö сулалiсö керöс вылас, дугдывтöг öвтiсö сылö киэзнаныс.

Керöс увтас, неыджыт посок сайын, туйыс чукыльтчис бокö. Матын сулалан вöр сайöвтiс кольлалiссесö син одзись. Но нельки сэк Вася син одзын сё эшö кольччисö сулавны нiя кык мортыс, кöднаын сылöн вöлi и челядь кадся шонытыс, и том кадся медодзза любитöмлöн гажыс. И усьлiс кö мый тöдвылö служба коста, ылын горт дынсянь, дак медодз эта янсöтчöмыс. Колiс дзир сувтöтны син одзö чышьянокнас öвтiсь нывкасö, кыдз сэтöн жö и кокнямлiс и гажмывлiс сьöлöм вылын.

Öддьöн охота вöлi Ильиновлö пантавны служба бöрсянь нывкасö сэтшöмöн, кытшöмкöт дружитiс, кытшöмöн тöдiс, кытшöмлö веритiс. Быдöс мечтаэз коласiсь эта вöлi медъюгыт, быдöс желаннёэз коласiсь — медыджыт. Зонка веритiс аслас счастьелö. И эта веритöмыс сетiс сылö вын да гаж, тöдчöмöн кокньöтiс служба. И вот...

Черкасов киын баяныс важын ни вежис ассис мелодиясö. А Ильинов син одзын öнöдз эшö павьялiс нывкаыслöн чочком чышьянокыс. Сылöн жö медбöрья кыввес: «Гиж, Вася. Ми пондам видзчисьны», — дугдывтöг öшшисö тöдвылын и öнi дзик сотiсö.

Ылöсын обидасянь да сьöлöм вылын зубытсянь позис кö бы керны сымдасö, Ильинов готов вöлi косявны мороссö. Охота лоис кинкöткö баитыштны, янсöтны нырыштан шогсö. Зонка дзар керыштiс Макаров койка вылö, нёджжасьыштiс омöн казарма пасьта. Син вылö медматiсь ёртыс некысь эз усь. Сёрöнжык Ильинов кежалiс и ленинскöй комнатаö, но и сэтчинiсь Макаровсö эз пантав. Гажтöмыс жö эта коста не эз кус, не эз лöньсьы. Сiя сё быдмис, вынсялiс, дзескöтiс морос, корсис петны.

Аслыс казявтöг ни, Ильинов петiс казармаись, кежис ограда сайын тшöка садитöм пуэз коласö, нырыштсис пельпоннас яблоня бердö. Баянлöн гажтöмсö содтан шыэс татчöдз эз кылö, дзир вылын, пу йыввес коласын, норöн шутнялiс тöв. Дзик бöбмöм, сiя, кыдз вермис, быд вынiсь летiс пуэз бердiсь кельдöтöм да косьмöм лист. Нiя кышöтiсö, чепсасисö öтмöдöрö, топ кытшö шедöм кайез. Кöдна чайтчисö, кытчöдз видзсисö асланыс местаын. Кöдна эз чайтчö керны сымдасö, мынлiсö, руас перыта бергавтöн, кыдз вермисö, сайласисö тöв шогья да тэрмасисö лэдзчисьны му вылö, мед сэтчин, сэтшöм жö листтэз коласын, сайöвтчыны лёк тöв шогья. Нiйö жö, кöдна эз ештö да эз вермö сайöвтчыны пуэс коласын, вынöн пöльтан тöв вылына лэбтывлiс небоö, вашöтiс ылö-ылö, бухта весьтö. Эта тожö вöлi олан, тожö аскоддьöм пессьöм. И думайтны кöбы Ильиновлö, листтэс вылö видзöтiкö, ны олан йылiсь, ныын сiя казялiс бы и ассис. Но эта коста зонка думайтiс дзир ас йывсис. Эта увья и эз вежöрт, мый позьö, мый колö керны сыкöт гажтöмыскöт, кöда сьöкыт изöн нырыштiс сылiсь сьöлöмсö, петляöн моз зэлöтiс горшсö, пизьöтiс вир да пыкöталiс лов.

Ильинов бертiс бöр, но казармаас öнi эз ни пыр. Бетоннöй лиснич кузя сiя лэдзчис пирслань. Увдöрас ни зонка кежис кöрттуй вылö, шпалаэс кузя жагвыв оськавтöн, петiс бухта дорö.

Тöлыс, кыдз и асывнас, пöльтiс море ладорсянь. Дьöгöдь рöма гырись волнаэз, лöга кышöттöн, кадiсь кадö чепсасисö берег вылö. Волнаэс ордалiсö Ильинов кок увтын, а нылiсь лöга кышöтöмсö зонка кылiс ас моросын.

Казялiс асьсö Ильинов, дзик саймис, КПП дынын. Думнитiс, вöлi, бертны бöр, но сэтöн жö пыдына ловзисис, öвтыштiс быдöс вылö кинас. «А-а, мый лоас, сiя и ло. Сё ни некытшöм петанiн абу. Обидаыс увья некытчö он воштiсь».

КПП будкаись паныт петiс тöдса старшина.

— Кытчö тэ, матрос Ильинов?

— Магазинöдз, часыэз видзöтны, — перыта адззисис Ильинов, ачыс сэтöн жö дивуйтчыштiс аслас бöбöтчан кыввезлö.

— Бöбöтчытöг, видзöт, менам. Дас минута и бöр.

Бертiс сiя бöр, кöр и дас минутаыс эшö эз чулав. Зонка мунiс сiя жö туй кузя, кöда кузя неважын локтiс — бухта пöлöн, шпалаэз вылöт. Эстi ветлiсö етшажык, и повны кинкöткö пантасьöмись эз ков. А кöр КПП будкаись биыс кольччис ылынкодь бöрлань, Ильинов кежыштiс кöрттуй шпалаэз вылiсь, пуксис скала увтö, кыскис кармансис небöм бутылка, осьтiс.

Сёян коласiсь зонкалöн сьöрас нем эз вöв. Но чожа мый Ильинов казялiс, что сымдасö оз и ков. Дивуйтiс сiя, что юöмыс бöрсянь немымда эз и курöт. Сымда уж, тыдалö, вöлi сiя лунö сы горшын, юрын да сьöлöмын курыт-зубытыс, что нельки винаыс курытлö сiя эз сетчы. Недыр мыйись шонытыс сё жö паськалiс вывтыр пасьта. Ильинов керис куритны, сувтiс. А кöр кынымиськö кыскис горшас крепыт махорка тшын, сэк вöлись казялiс, что юрыс тöдчöмöн пондiс бергöтчыны. Синнэс люммисö, выныс пондiс кольны. Медумöльыс жö, кыдз вежöртiс Ильинов, вöлi сiя, что не обида, не гажтöм юöмыс бöрсянь эз чулалö.

— Эх, Катя, Катя! А эшö кыв сетiн. Видзчисьны эшö мöдiн. Письмоэз гижны тшöктiн. Сволочь тэ, а не Катя. Да, сволочь! — Эстöн зонка падмис, турйöвтiс, öвтыштiс одзлань кинас, мöдiс судзöтчыны скала бердöдз. Скалаыс вöлöм ылынöв, киыс эз судз. Ильинов нырнитiс киыс сьöрö, люкыштiс скаласö юрнас, усис.

V

Саймис сiя кöдзытсянь, осьтiс синнэсö, видзöтчис. Гöгöр вöлi пемыт да лöнь. Зонка вежöртiс — узьöм не казармаын, аслас койка вылын, а кытшöмкö учöтик да тöдтöм жырокын, куш топчан вылын. Тöдчöмöн висис юр, косьмис горш. Ильинов пондiс думайтны, кытöн сiя да мый сыкöт лоис сэтшöмыс. Бöртiжык зонкалö усис тöдвылас чулалöм рыт: кöрттуй, магазин. «Эг вермы, сiдзкö, ачым локнытö. А öнi мый видзчисьö? Да-а. — И одзлань сэтöн жö: — Ась. Мый лоис, сiя и ло. Керöмсö бöр он ни бергöт».

Эта коста ыбöс саяс кылiс телефоннöй звонок. Кинкö увтын негорöн дзуртыштiс стул, кылiсö негора оськöввез. Кинкö босьтiс трубка. Шыасьöмыс сьöртi Ильинов тöдiс дивизионiсь дежурнöйöс. Сы сьöртöт зонка вежöртiс: гортын сё жö, кöть и не казармаын, не аслас ёрттэз коласын. Ильинов лöньсис

Час кыным бöртi орсiсö «подъём». Кылiс, кыдз быдöнныс петiсö асывся прогулка вылö. Сэк кежö Ильиновöс эшö эз лэдзö. И вöлись джын час бöртi, кöр быдöнныс бертiсö бöр да пондöтчис казармаын асывся аврал, кинкö сибöтчис замокалöм ыбöс дынö, осьтiс. Ыбöс коласас сувтiс старшöй лейтенант Максимов, ны катеррез звеноись командир, горöтчис:

— Тырмас, Ильинов, узьнытö, кад чеччыны.

— Ме важын ни ог узь, — шыасис паныт Ильинов, сувтiс, оськöвтiс матöжык ыбöс ладорö.

— Думайтан, натьтö? Талун тэныт эм мый йылiсь думайтнытö. Ильинов жмитыштiс пельпоннэзнас, паныт эз шыась.

— Дак мый тэкöт сэтшöмыс лоис, Ильинов? Бöрья год вылас ни...

— Да нем, — синнэсö вывлань лэбтытöг, шаысис Ильинов, öткоста ас кежас думайтiс: «Мый сэтöн юасьнытö? Тiянлö висьтав, эн висьтав, — колананёж сё ни од вежöртö».

— Адззан вот, кытöн ковсис узьтöтны?

«Да уж адзза, не слепöй». Паныт шыасьтöг, Ильинов дзир пыдына ыш ловзисис, вежсьыштiс кок вылiсь кок вылö.

— Но мый жö? Мун, пет, — ключчезнас киас жолькнитöмöн, Максимов вешшыштiс ыбöс колассис, мед сетны туй.

Казармаын ёрттэс панталiсö чöлöмöн. Некин да нем йылiсь эз юась и нельки шутка могись баснисö сыкöт эз пондöт. Быдöнныс уджалiсö; кинкö чышкис öшын стеклоэз, кинкö ровняйтiс койкаэз, кинкö миськалiс джодж, кыскалiс öтмöдöрö разьöм канатiсь керöм ыджытся-ыджыт швабра. Ачыс Ильинов баснисö некинкöт тожö эз пондöт. Умывальникын бытшöма миссьöм бöрсянь зонка сэтöн жö кыскис ассис дзебöм бон, пидзыртiс сiйö матегалöм бöрсянь, а кубрикас кутчисис аслас удж бердö: сы сайын аврал кежö вöлiсö крепитöмöсь кык ыджытся-ыджыт стекляннöй люстра.

Авралсö кончитöм бöрын Ильинов дынö сибöтчис сылöн ёрт Макаров, не öддьöн горöн, мед не быдöнныс кылiсö, горöтчис:

— Весь эд тэ, Вася, керин сымдасö. Думайтан, кокнитжык мыйöнкö лоас? Оз эд. Некинöс этöн он дойд, дзир ассит службатö тшыкöтан. Сьöвзин бы быдöс вылö. Год эд, год кольччис служитнытö, и сэтöн... Эх, Вася, Вася.

Ильинов чöлiс. Думайтны кö öтнёж, дак и былись сiдз: служитны кольччис öтiк год. А мöднёж? Кытчö воштiсьны сэк, кöр обидаыс да сьöлöмшогыс увья и öтiк луныс годысся кузьжык да сьöкытжык? Öнi Ильинов и ачыс ни пондiс вежöртны, что петiс небытшöм. Сiйöн Макаровыс кыввез бöрсянь ас кежас думайтiс: «Сёрöнöв тэ,

Макаров, пондöтiн этö баснисö. Тöн колiс сiдз баитнытö, кöр ме ачым аслым нерад вöлi да местасö эг адззы А талун мый? Талун тэнат велöтöмыт некытшöм прок оз ни сет".

Развод бöрсянь быдöнныс мунiсö занятиеэз вылö. Дзир öтнас Ильинов кольччис сулавны мичман Елухов одзын. Сы дынö матö сибöтчытöг, мöдыс медбöрын висьталiс:

— А тэ, дисциплинасö дзугись матрос, шаго-о-ом арш командир дынö.

Быдöс лоöмыс бöрсянь Ильинов понда эта видзчисьтöмöн эз ни вöв. Зонка чöлöмöн бергöтчис, иньдöтчис штабö. Неылын бöрсяняс сiйö кольлалiс мичман Елухов. Сiя бытшöма тöдiс, что Ильинов талун некытчö оз ни пышшы, но вöтчис дзир сы понда, мед висьтавны командирлö сылiсь приказаннёсö тыртöм йылiсь.

Командирыс кабинет одзын Елухов одзалiс, сувтöтiс Ильиновöс ыбöс саяс, ачыс ёркöтчис, пырис. Минута кыным бöртi мичман перыта петiс бöр, мыччалiс Ильиновлö дерматинöн дорöм ыбöс вылö.

Дивизионiсь командир, капитан-лейтенант Лебедев, — неыджыт вывтыра, кöсыник чужöма да одзлань тöдчöмöн нюжöтöм тшöкаа морт, — пукалiс эта коста пызан сайын, баитiс трубкаö. Локтöм йылiсь Ильиновлiсь доклад сiя кывзiс сувтсöн, вель дыр видзöтiс веськыта сы чужöмö, дзик мыйкö лыддьöтiс.

Ильинов видзчисис, что командир часöт пондас юасьны, кысь да кинкöт юис, горöтлыны, видны. Но петiс нач мöднёж. Капитан-лейтенант видзчисьтöг тшöктiс пуксьыны, вештiс Ильинов одзö джыннялöм «Беломорканал» пачка, пуксис ачыс. А кöр вились öзтiс аслас тырппес коласын кусöм папиросасö, мыдзöмкодь голосöн, дзик ас кежас, горöтчис:

— Кин тэнат айыт, Ильинов?

Ильинов лэбтыштiс паныт синнэсö, дивуйтчöмöн видзöтöв-керис командир вылö, бытьтö юалiс: мыйлö пö эстöн менам айыс? Горöн командирыс юалöм вылö юöртiс:

— Абу сiя менам.

— А кытöн?

— Война вылын усис, Волховскöй фронт вылын.

— Молодец, что нельки местасö тöдан. Эз на усьлы öнöдз сэтчин вöвлыны?

— Эз кытчöдз

— А колiс бы, петас кö сэтшöм кад. А мамыт?

— Гортын сiя, колхозын уджалö.

— А тэ, Ильинов?

Ильинов жмитыштiс пельпоннэзнас: ме пö вот сiя, одзаныт.

— Мый, он вежöрт, кыдз петö? Ильинов чöлiс.

— А петö сiдз, кывзы вот, висьтала. Айыт усис. Висьтавны мöднёж, пуктiс юрсö сы понда, мед тэнчит, вешьянтöмлiсь эшö сэк, дорйыны олан. Мамыт уджалö. Тэнö, айтöмöс, сiя öтнас быдтiс: вердiс, пасьтöтiс, сувтöтiс кок вылö. Нельки öнi, кöр тэ служитан, сiя сё эшö тэнö и вердö, и пасьтöтö. А тэ?..

Ильинов вежöртiс — командиркöт басниыс кöсъясьö лоны сьöкытöн. Öнöдз зонка кылiс ни, кыдз медодзза ньылöм воттес жагвыв пондiсö визывтны лопаткаэз коласöт. Шыасьны жö паныт командирыс вопрос вылö сiя сiдз и эз вермы. А одзлань бöра вопрос:

— Письмоэс гортсянь вовлöны?

— Вовлöны.

— Кöр медбöрьяыс вöлi?

— Тöн.

— Позяс меным сiйö видзöтны?

Ильинов мыйкö дырна думайтiс Сетны или не сетны командирлö мамыссянь босьтöм письмо — право, конешно жö, сылöн. Эд эта увья командирыс и эз кор, а дзир юалiс. Но откажитны Ильинов эз вермы. Сiя кыскис пытшкись кармансис нöитчöм конверт, нюжöтчöмöн пуктiс пызан дорыш вылас, ачыс мышкыртчис, пондiс видзчисьны.

— Да, — дыр мыйись дженытика шыасис капитан-лейтенант. — Сiдзкö, тэ и мамтö ассит он кывзы? А видзöт вот, кытшöм бытшöма сiя тэныт гижö. Эд этася буржыка и висьтавнытö оз позь. И гортö тэнö оз кыскы, охота абу мамтö адззывны? А вот сiя тэтöг гажтöмтчö и öддьöн бы, натьтö, вöлi рад, вовлiн кö бы тэ недырик кежö.

Не сэтшöм уж ылöстöм вöлi Ильинов, мед не вежöртны командирлiсь баснисö. Но висьтавны паныт сы кыввезлö зонка нем эз вермы. Сiя вежöртiс: тöння поступок увья отпускö ветлöм йылiсь öнi и думайтны нем.

Мыйкö дырна кадыс ны коласын кыссис чöлöмöн. А одзлань капитан-лейтенант вились юалiс:

— Дак кыдз юöртны мамытлö тэ поведеннё йылiсь?

Эта вопрос бöрсянь Ильинов нельки синнэсö вывлань эз лэбтыв: вежöртiс, что аслас басниын командир оз шутит, öнi вöлись сы одзын, кыдз судья одзын, быдсöн ылöснас зонка вежöртiс: кытшöм бы эз вöв сьöкыт сьöлöм вылын небытшöм юöрсянь, мунны сэтшöм проступок вылö некытшöм право сылöн эз вöв. Ильинов и одзжык ни тöдiс: государственнöй интерес ас интересся сё ни ыджытжык, и дзир тöння сьöкыт да гажтöм настроеннё коста недырик кежö вунöтiс эта йылiсь. Вот эта понда и ковсис талун видзны ответ дивизионiсь командир одзын. А то кыдз жö эшö? Некыдз мöднёж армияын оз позь. Мый вермас лоны, пондас кö быд матрос, аслас недолыт увья, керны сiйö, мый сылö эта коста пырас юрас? И öнi, кöр Ильинов виль вынöн вежöртiс сымдасö, сылö лоис öддьöн и öддьöн охота овны вились тöння рытсö. Но позьö лэбтыны уськöтöмсö, нельки адззыны öштöмö, — öтпырись жö олöм кадсö, кытшöм бы бура нето умöля тэ сiйö эн ов, — бергöтны бöр да овны мöдпöв некöр оз позь.

Чöлiсö. Капитан-лейтенант видзчисис, что Ильинов висьталас мыйкö паныт. Но горöтчыны мöдыслö вöлi нем, и сiя кылiсь джынöн эз шыась. Ильинов вежöртiс: история петiс öддьöн небасöк. Сiя готов вöлi примитны эта понда кöть кытшöм наказаннё, но корны, мед проститiсö, эз думайт. Зонка сымда и керис, одззамоз видзöтiс аслыс кок увтас, зубытöдз курччалiс тырппесö, видзчисис, мый лоас одзлань.

Ильиновлiсь недолытсö вежöртiс и ачыс командир.

— Служитан тэ, Ильинов, не первöй год, уставвез да дисциплина тöдан. Гортö мунтöдз кольччис год. Охота кö петны служба вывсянь кодя морт моз, думайт ачыт, кыдз да мый. А что сiдз лоис нывкакöт — вунöт. Тэ эд сё жö мужчина, матрос, отличник, класснöй специалист. Мый бердö кутчисян — быдöс верман. Ме тэнö тöда сэтшöмöн. Рад бы вöлi тэ понда, адззин кö бы тэ вын да вермин и этö сьöкытсö. Думайт вот ачыт, оланыс тэнат вöлись пондöтчö, кадыс одзын эшö уна. И босьтны кö асьтö киö, а сьöкытсö да недолытсö сетны кадлö, сiя, он и казяв, кöд коста бурдöтас тэнчит ранасö, и быдöс чулалас. А пондан кö этадз вот примитны матö сьöлöм бердö быд берсясö, кöдна видзчисьöны оланас эшö вель уна, сiдз и тöд, недыр и юртö öштыны.

«Вот эта вот, этна кыввес, эта басниыс тöн меным и эз тырмö»,— öнi вöлись думайтiс ас кежас Ильинов. А эта коста жö капитан-лейтенант вились öзтiс куритны, одзлань эшö баитiс:

— Мортлöн оланыс не пыр сэтшöм волькыт, кытшöм бы миянлö колiс. Сiдзкö, и овнытö сiйö овлö не пыр кокнит. И вот эшö мый, Ильинов... Думайтан кö буржыка, натьтö, вежöртан: мортыс, кöда увья тэ сiдз тöждан, сымдасö оз и сулав. Да, да, Ильинов, этö ме тэныт сьöлöмсянь, былись висьтала. И менам тэныт совет одзлань кежö — сэсся сэтшöмсö ас оланат не пантавны.

Öнi вöлись Ильинов тырппес вылын чуть тöдчан шынньöлöн видзöтыштiс командир вылö, мöдiс горöтчыны, что сэтшöмыс сэсся некöр оз ло, но горöтчынытö нем эз ешты, капитан-лейтенант одзалiс:

— Верман мунны, матрос Ильинов.

Ильинов сувтiс, шовкнитiс оча каблук, бергöтчис, петiс. Ыбöс саяс ни вöлись зонка ас кежас думайтiс: «Медсьöкытыс, тыдалö, чулалiс. Сэтшöм командир кöть кытшöм шогöтiсь веськöтас».

Лунся развод коста Ильиновöс петкöтiсö стройын сулалiсь ёрттэс одзö. Дивизионiсь дежурнöй лыддьöтiс матрос Ильиновöс вит сутки кежö арестуйтöм йылiсь командирлiсь приказ. Сэтöн жö, быдöнныс одзын, мынöтiсö сы морос бердiсь служба коста шедтöм отличниклiсь да класснöй специалистлiсь знаккез. А кöр Ильинов, немтöг ни, сувтiс бöр аслас ёрттэз коласö, Макаров ёртыс горöтчис:

— Кокнита эшö кыдзкö петiн. Вермисö бы и дасвитö сетны. Черкасов жö и эстöн шуткатöг эз вермы. Сiя гусьöник мыччалiс

Ильинов пидзöссэз вылö

— Быдöс эд, натьтö, зонка, командирыс одзын бырöтiн?

И кöть етша вöлi эта кадö Ильинов сьöлöм вылын гажыс да долытыс, ёртыс шутитöм вылö ковсис шынньöвтны паныт.

VI

Вит лун да вит ой, уджтöг, ёрттэзтöг да быдöстöг сытöг, мыйöн лунiсь лун овсьö служба коста, чулалiсö жагвыв да гажтöма, топ вит год. Нем керöмсянь эстöн сымда и позис — думайтны, эшö öтпырись уськöтны тöдвылö быдöс лоöмсö, адззыны сылiсь причинасö.

Кытöнкö бетоннöй стенаэз сайын, кöдна янсöтiсö Ильиновöс быдöс да быдöнныс дынiсь, вöлi ар: гажтöма увгис тöв, дугдывтöг то ли зэрис, то ли шлячитiс. Но сымдасö Ильинов не эз кыв, не эз адззы. Быдöс местö, мый вöлi этна стенаэз сайын, эстöн, öшынтöм неыджыт каморкаын — пöввезiсь дорöм векнитик наррез да потолок бердын неыджыт электрическöй лампочка. Нельки сэтшöм быдлаö сибалан тор, кыдз книгаэз, журналлэз нето газетаэз, эстöн эз вöлö. И кольччис Ильиновлö öтiк — думайтны. Куйлiс я зонка векнитик наррес вылын, ветлiс я угöлiсь угöлö, кыдз цепь вылö пуксьöтöм пон, — син одзын сулалiс öтiк — аслас вöра Коми край, кытöн гожумся кадö юэс сöстöмöсь, топ синва, а гöгöр быд рöма цветтэзöн вевттисьöм муыс вериктö син одзын, дзик ковёр. Думаэзнас Ильинов вились вöлi сэтчин, сiя му вылын, кытöн чужис, быдмис да сувтiс кок вылö, му вылын, кöдö учöтсянь велалiс шуны гортöн, кöдатöг синваэз петтöдз овлö гажтöм кöть кытшöм бур да гажа местаын.

Сэк тожö вöлi тулыс. Вöр коласын да юэз пöлöн эшö öшалiсö льöмпу цветлöн пух кодь кокнит да лым кодь чочком кымöррез. Видззез вылын, лажмытик местаэзын, оссис горадзуль. Мукöдлаас сiя цветитiс сымда, что позис öктыны быдса ношаэзöн. А сылöн вына да чöскыт дукыс, кöда сука сорлассис руас, коддзöтiс, дзик том да тагья шоныт ырöш.

Сэтшöм кадö чулалiсö экзаменнэз. Лунина посадiсь школаын, кытчöдз Чазова деревнясянь лыддьöны дас километр ылына, челядь кончитiсö кыкьямысöт класс. Экзаменнэз бöрсянь велöтчиссезлö петiс шоччисян кад. Челядь кытчöдз отсасисö гортся уджын, а рыттэзнас чукöртчывлiсö деревня шöрись грива вылö, орсiсö нето, вöвлi кö кино (война бöрсяняс кинопередвижкасö шочыника и сэтчин ни ваявлiсö), ветлiсö колхознöй клубö.

Ильинов керис сiйö жö. Неделя етш зонка бергалiс гортын: ыджыт морт моз мöдпöв йöрйис карчйöр, кöда гöгöр сiсьмöм да пуксьöм важ йöрыс не öтiк год сьöрна ни видзсис дзир пыкöттэз вылын, лöсьöтiс да крепитiс керку юр вылiсь дзугсьöм тёссэз да пöлiньтчöм труба, вежис öтöрись посöдзись кынымкö сiсь поспу.

Эна жö луннэзö, кыдзкö рытнас, зонка мунiс киноö.

Клубас ни, эшö киноыс пондöтчытöдз, öтлаын мöдiккез коласiсь сiя панталiс Катяöс, кöдакöт уна год велöтчис öтлаын, а таво, öтлаын жö, сетiс и экзаменнэз. Сеансыс коста пукалiсö торйын и öтлаын гортö мунöм йылiсь эз баитчö. Но кöр кончитчис кино да быдöнныс пондiсö мунны горттэзö, нылöн бöр туйыс лöсялiс öтлаын. Сэк нывкаыс и пондöтiс Ильиновкöт баснисö. Ордчöн оськавтöн, Катя юалiс:

— Свидетельствоытла ветлiн ни?

— Эг на. А мый?

— Дак эд быдöнныс ни босьтöмась. Дзир ми тэкöт кольччим. Ветлам, батi, ашын? Кыкöн гажажык лоас.

— Позьö и ветлыны, — шыасис паныт зонкаыс.

— Ашынöдз сэк. Да, видзöт, эн коль менö. Кежав асывнас.

— Но, — одззамоз дженытика кöсъясис Ильинов. Эта вылын сiя рытö и янсöтчисö.

Сiя рытö некöдыслöн ны коласiсь и дума эз вöв сы йылiсь, что ашынас Лунинаöдз öтлаын ветлöмыс йитöтас нiйö öтамöд коласын сiдз, кыдз эз йитöт кыкьямыс год сьöрна öтласа велöтчöм.

Асывнас Вася пасьталiс веж йöрнöс вылö ассис дзескыткодь ни медбöрья кадö школьнöй костюм, вель дыр зыртiс кремсора рукляокöн новйöмовöй ни ботинкиэз, иньдöтчис Катя ордö.

Мöдыс эта коста эшö кöмтöм, дзир дженытик ситцевöй платьеа, киськалiс кöш понiсь карчйöрын гряддэз.

— Видзчисьышт, Вася, ме чожа, — горöтчис нывкаыс, кöр казялiс ёртыслiсь сибöтчöмсö, простöй ведраэзнас кокнита öвтышалöмöн, перыта саясис керкуö.

Зонка сибöтчис öтöрись посöдз дынöдз, пуксьыштiс увланись поспу вылö, лэбтiс кок увтсис неыджыт шатёк, сiйöн му вылас чиркайтчöмöн, пондiс видзчисьны.

Недыр мыйись нывкаыс петiс. Но медперво Вася сiйö нельки эз и тöд, примитiс пöрисьжык сойыс местö. Катя вылын вöлi голубöй рöм кузя поснитик чочком гöглянока штапельнöй платье, кокас чочком носкиэз вылö кöмалöм сьöд туфелькаэз, а алöй ленточкаöн кыйöм чикисьыс куйлiс одзсяняс тöдчана ни мороссэз вылын.

Поспуэс кузя увлань лэдзчытöн, нывка казялiс ас вывсис зонкалiсь, дзик домалöм, синнэсö, вежсьыштiс чужöм вылас.

— Мый тэ ме вылö сiдз видзöтан?

Вася и ачыс эз тöд, мыля сiя талун сiдз видзöтö нывкаыс вылö, и öнi сы юалöмсянь тожö гöрдöтыштiс, дзик кутiсö мыйкö умöль вылын, а горöтчынытö паныт сiдз нем и эз письты.

— Но мунам?

Зонка öнi вöлись топ саймис, сувтiс коккес вылö, одззамоз чöлöмöн, иньдöтчис нывкаыс сьöрö.

Чожа мый нiя петiсö деревня сайись ыббез вылö.

Медперво оськалiсö чöлöмöн. Кадiсь кадö Вася сё эшö дзарышалiс нывкаыс вылö бöрсяняс, дивуйтчöмöн ас кежас думайтiс: «Сiя и не сiя талун Катяыс. Сэтшöмнас ме сiйö эшö некöр эг адззыв. Или талунсянь вöлись сэтшöм лоис?»

Нывкаыслö, кöда öнöдз мунiс одзлань, öтамöд коласын чöлöмсянь лоис, тыдалö, гажтöм. Сiя сувтiс, юалiс:

— Мый нö шы он сет?

— А мый баитнытö?

— Нем разь он тöд?

— А мый колö тöднытö?

Но нельки этатшöм ответтэз бöрсянь нывка чöвны эз понды. Сiя лöньсьыштiс дзир недырик кежö, бытьтö уськöтiс тöдвылас мыйкö вунöтöмö, одзлань вились юалiс:

— Кытчö велöтчынытö мöдан мунны?

— Ог на тöд да. А тэ?

— Медö.

— Тэныт мед гленитчö?

— Гленитчö. А мый?

— Да нем. Сiдз тай юалi.

— Вежöртан, Вася, чочком, кыдз лым, халат и быдкодь лекарство дук. И отсавны позяс быдöнныслö, пöрись и том отирлö, а öддьöнжыксö челядьлö. Вот миян Ваньканым кöркö кулiс, учöтжык вонö менам. Сiя гыркнас вель дыр маитчис, а веськöтнытö вöлi некинлö. Лунинаас врачыс сэк эшö эз вöв, а миянын и медпунктыс тожö. А мамö öнi шуö — вöвны кöбы пö врачлö, позис бы и веськöтны. Ме вот велöтча, локта гортö и пыр понда уджавны ас отир коласын.

— Кинлö мый. Меным вот машинаэз гöгöр бергавны гленитчö, охота механикöн лоны. Но кытчöдз, натьтö, нем оз пет. Некин сайсянь одзлань велöтчынытö. Ковсяс кöть курссэз вылö правленнёсяняс корсьыны да то ли шофёрö, то ли трактористö велöтчыны.

— А мый, умöль я мый я шофёрнас лонытö?

— Ме ог и шу — умöль, да сё жö ни не механик.

Эта да мöдiк басниэз коласын эз и казялö, кыдз чулалiс дас километр ылына туй колас, локтiсö Лунинаöдз. А кöр свидетельствоэзныс вöлiсö босьтöмöсь, öтлаын жö петiсö бöр туйö.

Кöд коста мунiсö лунинскöй ыббез кузя, Катя разис чышьянок, кöдö öнöдз домалöмöн новйöтiс киас, кыскис сы коласiсь да нюжöтiс зонкаыслö кынымкö кулига пирöг.

— Сёй. Ме сьöрам павжун босьтлi.

— Ог. Оз менам симав.

— Босьт, мыся. Мый тэ абутöмыс дорын шванитчан? — Нывка сюйыштiс зонкаыс киö пирöггесö, одзлань висьталiс: — Пешлы кöть. Он, поди, верит — ачым пöжалi.

И кöть зонкалöн кынöмыс былись öддьöнсö эз симав, керны бöр вöлi небасöк: пирöггесö ковсис примитны.

Öнi нiя янсöтчыштiсö öтамöд дынiсь, пондiсö мунны торйын, öтыс ны коласiсь оськалiс öт туй бокöттяс, мöдыс — мöдöттяс. А кöр кыкнанныслöн пирöггес вöлiсö сёйöмöсь, Катя дзар керыштiс бöрланяс, сы коста жö повзьöмöн горöтчис:

— Видзöт жö, Вася, кытшöм бöрсяняным кымöрыс кайö! Мый нö öнi миян лоас? Бертам бöр Лунинаас, сэтчин матынжык. Гортöдз эд этасянь сё ни ог ештö, а ме пола.

— Мыйись тэ полан?

— Дак эд гымавны, вирдавны пондас.

— Но и ась. Адззöмыт мыйись повны.

— А тэ разь он?

— Да пов кöть эн. Полöмыссянь эд сё ни оз дугды.

— Дак эд люзь вадас. Адззан, кымöрыс кытшöм нёштöм. Сы вылö нельки видзöтнытö полöм петö. Бертам, кывзы, бöр, а?

— Полан, дак эн и видзöт. А вадас и вад, ог эд незьдö. Зэрыс бöрсянь эшö ыджытжыка быдмам, — шутитыштiс зонкаыс.

— Но мунам сэк перытжыка. Ыб вылас эд нельки сайöвтчынытö некытöн. — Нывка сэк жö пондiс тэрмасьны. Сы сьöрö и Вася содтiс оськöввесö, кöть одзлань ни тöдiс, — сизим кольччöм километрсö öтдруг он чеччöвт.

Кысянькö вылiсянь уськöтчис вына тöвчик, гезöс моз кутiс каттьыны туй вылiсь бус, кымöрöн лэбтiс сiйö вывлань, а сэсся кежис да каттисис кытчöкö сук вöр коласас. Тöлыс жö вайöтiс бöрсяняныс медодзза гымалан шы. Недыр мыйись гымыштöмыс кылiс мöдöтпыр, куимöтпыр да одззася горöнжыка ни. Шондiыс сайöвтчис. Лоис пемытжык да ыркытжык. Югйöвтiс медодзза чардби, топ вундыштiс шöри лажмыта öшалан сьöд кымöрсö. Вились паськалiс горöн гымыштöм. Позис нельки думайтны — этö ачыс гым кымöрыс чегласис-потласис торрез вылö, дзик тулысся польдöм йы. Кöс песока туй вылö сьöкыта да горöн усисö медодзза гырись зэр воттез. Перво нiя вöлiсö шочöсь, но бöртiжык тшöксялiсö и бытьтö лöгувья горöн пондiсö вартны веж турун да кöс песок кузя.

Вася да Катя кежисö туй вылiсь, котöрöн уськöтчисö вöр ладорö. Зонка эшö ылiсянь бöрйис синнэзнас лапьяжык кöз, пырис да сувтiс сы увтö. Вася бöрсянь и Катя керис сiйö жö. Котöртiканыс нывкалöн вöснитик платьеыс ештöм вамны шучкöп и öнi пондiс лякасьны сы вывтыр бердö. Сöстöм зэр воттес, топ бисер, кадiсь кадö сувтчышалöмöн, ыскöвтiсö увлань басöка кыйöм чикись да алöй ленточка кузя. Нiя жö зэр воттес жагвыв визывтiсö нывкалöн котöртöмсяняс тöдчöмöн рöмсялыштöм чужöм кузя.

Эстöн Вася вились дзар керыштiс Катя вылö и кынымöтпырись ни эта лунö кутiс асьсö сы вылын. Аслыс жö этасянь лоис недолыт. Зонка бергöтчис мöдöрö, нырыштсьыштiс пельпоннас кыз да неровнöй кача кöз бердö. Эта коста вирдыштiс кытöнкö öддьöн матын, сэтшöм матын, что нельки кылiс, кыдз чижöтiс ны весьтын, топ би вылын ньывпу лыс, электрическöй зарядлöн искра. А сыкöт öтлаын паськалiс сэтшöм вына да гора гымалыштöм, что сысянь тöдчöмöн зэгалiс кок увтын му. Но мый лоис эшö этася, зонка понда вöлi нач видзчисьтöм. Повзьöмувья Катя кыкнан кинас вевттьыштiс чужöмсö, уськöтчис да жмитчис зонкаыс пельпон бердö. — Мый, полан?

Нывка паныт эз шыась, дзир жагвыв качыкнитiс юрнас. Чожа мый Вася казялiс, что вамöм паськöмсянь Катя пондö кынмыны. Öнi, кöр нiя сулалiсö зэв-зэв öтамöд бердын, зонка бытшöма кылiс ас вывтырнас сы вывтырлiсь поснита тогзьöмсö. Сiя бергöтчис паныт, вештыштiс нывкалiсь юрси морос весьтас, кыскис сы кисой вылiсь чышьян, вевттис сiйöн сылiсь жö пельпоннэсö.

— Мый тэ керан? — синнэсö осьтöг да негорöн юалiс нывкаыс. Сiя, тыдалö, мöдiс ни мыччыны вевттьöм чужöмсö, но эта кадö, кыдз нарошно, вились, паськалiс горöн гымыштöм.

— Кынман тай, тыдалö, дак ме чышьяннат пельпоннэтö вевтти.

— Ме пола, Вася.

— Но сулав сiдз. Часöт дугдас гымавнытö, — нывкасö лöньсьöтöм могись горöтчис Вася, öткоста пуктiс сы пельпоннэз вылö ассис киэсö.

Зэр кисьтiс, топ ведра понiсь. Гöппез да канаваэз тырисö гудыра ваöн, кöда гырись и поснит шороккезöн котöртiс кырывлань. Вирдалiс да гымалiс сё одззамоз. И ась öнi эта вöлi кытöнкö ылынжык ни, чарньöввес сё эшö югыта чарлалiсö волькамöм зэр кымöрсö, а лöга мурзьöмыс горöн паськавлiс омöн небо пасьта.

Нем керöмсянь зэрыс вылö видзöттöн, Вася думайтiс, кытшöм бы вöлi бур шедны öнi ыждöм ю дорö да ысласьыштны ас керöм плот вылын. Эстöн зонкалöн одзланься думаэс видзчисьтöг орисö. Сiя дзик саймис узянпонсянь, а кин сiйö саймöтiс, мыйсянь сiдз вермис лоны, перво некыдз эз вежöрт. Ас кежас дивуйтчöмöн, Вася нёджжасьыштiс öтмöдöрö, но казявны мыйкö сэтшöмö син одзись, кöда увья вермис бы лоны сыкöт сымдаыс, эз вермы, а öткоста вöлись кылiс, кыдз ёткöтö Катя моросын сьöлöмыс. Медперво эталö мылякö нельки эз и веритсьы. «Неужто сысянь?» Лолавтöг ни зонка кывзыштiс одзлань и... сэк вöлись вежöртiс, что эта и былись сiдз. Нывкалöн сьöлöмыс жмитчышалiс зэв зонкаыс морос бердöдз, дзик ёркöтчис аслас местасянь да то ли мöдiс судзöтчыны зонкаыс сьöлöм бердöдз, то ли корсис, мед сiйö сы дынö лэдзисö. И сэк думайттöг, позьö оз керны сымдасö, Вася зэвжык жмитiс нывкасö ас бердас. Но сы сьöлöмлöн ёткöтöмыс этасянь эз лöньсьы. Нач мöднёж, сiя дзир вынсялiс да чожмис эшö öддьöнжык. А недыр мыйись усис кывны эшö öтiк ёткöтöм — саймис аслас Васялöн. Медодз сiя вöрöтчис жагвыв, дзик полöмöн, на кыным одзлань — сё вынöнжык, сё перытжыка. Бöртiжык вежöртнытö эз ни позь, кöда ны коласiсь ёткöтö медвынöн, кыкнанныслöн ёткöтöмыс öтлаасис öтiкö. Сiйö, мый керсис эта коста ны моросын, ас оланын Вася эшö эз пантавлы, и вöлi сiя сы понда нач тöдтöмöн да невежöртанаöн. Но öнi зонкаын сiя ештiс ни саймöтны кытшöмкö тожö эшö невежöртана, шоныт да виль гаж, янсöтчыны кöдакöт некытшöм охота эз ни вöв. Сiйöн, кöр Вася сё одззамоз кывзiс кык сьöлöмлiсь öтдруг ёткöтöмсö, ас кежас кеймис ни, мед дыржык эз чулав зэр, эз дугды гымавны да вирдавны.

Катяыс, кыдз и Васяыс, натьтö, тожö кылiс — некыдз эз вермы не кывны — сымдасö. Но и сiя тожö чöлiс. Саймöм сьöлöмыс саймöтiс сыын кытшöмкö полöм да стыд, кöднасянь öнi лоис нельки жар. И кöть вынтöмсялöм гымалан-вирдалан шыэс эз ни полöтö одззамоз, нывка сё эшö эз лысьт мыччыны ассис чужöмсö. Сiдз нiя и сулалiсö öтамöд бердö жмитчöмöн, кытчöдз эз чулав зэр.

Кöр нывка первуись осьтiс синнэсö, гымалан кымöрыс вöлi ылын ни, а быдöс сiя, мый усис гöгöр син вылö, мыччассис вильмоз мичаöн да сöстöмöн, бурöн да гажаöн, кокнитöн да коланаöн, кытшöмöн некöр эшö эта вотöдз некöдыс понда эз вöвлы. Кыдз некöр, рама югьялiс ны весьтын шондi; кыдз некöр, югыта сотчисö пу лист да лыс вылын öшалан зэр воттез; кыдз некöр, сöстöма да басöка питиртiсö-горалiсö омöн вöр пасьта кайез.

— Мый нö шы он сет? — нарошно зэркытакодь юалiс нывкаыс. Сё эшö чулавтöм стыдитчöмсянь сiя вевттьыштiс кинас сöстöма öгралан зелёнöйкодь рöма синнэсö. А мöдыс öнöдз и ачыс эз тöд, мыля сiя чöлö, мыля одзжык эз казьмöт нывкаыслö зэрыс чулалöм йылiсь. Висьтавны кö веськыта, дак зонка и ачыс эз казяв, кöр дугдiс зэрны, лöньсис гымалöм-вирдалöм да петiс шондi. Неважын ныкöт лоöмыссянь öнi Васялö эз и думайтсьы сы йылiсь, что эшö нач неважын ведра понiсь кисьтiс зэр, гымалiс да вирдалiс. Сы весьтын шондiыс эта коста дзик эз и саясьлы. Паныт шыасьтöг зонка тожö видзöтыштiс нывкаыс вылö. А кöр синнэзныс пантасисö, неважын лоöмсянь стыдыс тöдчöмöн мичöтiс кыкнанныслiсь чужöммезнысö.

— Мунам, — горöтчис одзлань Катя, перыта иньдöтчис туй ладорö. Зонка шыасьтöг оськöвтiс сы сьöрö.

Чулалiс гымалан кымöр, а öтлаын сыкöт и нывкалöн полöмыс. Öнi, кыдз и зэрыс вотöдз, сiя вились гажмис. Ёртыс одзын оськавтöн, Катя жагвыв пондiс сьывны.

Вася локтiс бöрсяняс. Мед не дзугны нывкалiсь сьылöмсö, вöтны сiйö зонка эз тэрмась. Сiдз, неылын öтамöд дынсянь, нiя и сибöтчисö горт деревня дынöдз. Вöлись янсöтчиканыс Катяыс жö юалiс:

— Мый ашынсянь пондан керны?

— Уджавны, натьтö, пета. Мый разь эшö?

— Но адззисьлытöдз сэк.

— Адззисьлытöдз, — сэтшöм жö дженытика шыасис паныт Вася. Эстöн нывкаыс кежис гортас. Сы вылын и янсöтчисö.

Гожум чулалiс уджын. Вася уджалiс вöлöн: кöр пинялiс, кöр петкöтiс вöр да потш. Катя — инькаэз коласын: велöтчис ытшкисьны, куртiс да талис зороддэз.

Пантасьлiсö шоча. Да и быд пантасьöмыс, лöсявлiс кö сiя отир син одзын, не сымда гажöтiс, мымда полöтiс. Кыкнанныс томöсь. Этасянь кыдз öтыслö, сiдз и мöдыслö быд коста думайтсис, что ны сьöрын синйö быд морт. Но кытшöм бы ыджыт эз вöв полöм, öнi сiя эз ни вермы кусöтны ны сьöлöммезын öтамöд дынö öзйöм чувствосö. Вöвлi, кöр неделя сьöрна пантасьлыны öтамöдкöт эз усьлы. И сэк кутлiс гажтöм. Зорамлiс охота кöть ылiсянь казявны öтамöдöс, кывны паныта шыасьöм.

Гожумся колхознöй удж мыдзöтö бытшöма. Но том да здоровöй мортлöн мыдзыс чулалö перыта. Лунтыр пиня сьöрын вöтлiсьтöн, то ли вöр петкöттöн, Вася тожö мыдзлiс. А кöд коста, гортö бертöм бöрсянь, зонка вежлiс вывсис уджалан паськöм, миссис да ужнайтiс, лунтырся мыдзись и след эз кольччыв. Бöртiжык зонка петавлiс гортiсь, иньдöтчывлiс грива вылö, кытчö чукöртчывлiс рыттэз кежö деревняись быдöс том йöз.

Зонкаэз орсiсö мячöн, шарöн да палкаöн.

Бöртiжык сэтчö жö чукöртчывлiсö и нывкаэз, пондывлiсö орсны öтлаын. Орслiсö быднёж. Но Ильиновлö медöддьöн гленитчис «кутасьöм». Лöнь да полiсь кодь мывкыда, сибöтчыны Катя дынö, мед перво жö сувтны кыкöн, ась и сэтшöм жö том отир син одзын, зонка эз лысьт. Сiйöн, кöр быдöнныс сувтлiсö параэзöн, сылö öтнаслö нем эз кольччы, кыдз пондыны вöдитны. Зонка и эталö вöвлi рад, сiдз кыдз одзлань ни тöдiс: вöдитны усяс сэтчöдз, кытчöдз оз котöрт Катя. И былись. Мымда бы да кин сьöрын зонка эз котрась эта вотöдз, вöтны да кутны кинöскö ны коласiсь сiдз и эз вермы. Но усьлiс кö котöртны Катялö, Вася пуктывлiс быдöс ассис чож, мед вермыны янсöтны нывкасö аслас паракöт. Эта бöрсянь нiя кыкöн ни сибöтчывлiсö орсiссез дынö, киэзнаныс кокнита кутчисьöмöн, сувтчывлiсö ордчöн. И мымда бы нылö эз усь котрасьны эшö эта бöрсянь, вöтны да янсöтны нiйö öтамöдкöт некин эз ни вермы.

Сёр рытöн, кöр том йöз рознитчас деревня пасьта, Ильинов кольлавлiс нывкасö гортöдз. Мунiсö кöть и ордчöн, но торйынмоз, оськöв ылына öтамöд дынсянь. Баитiсö тожö не асланыс радейтöм йылiсь, а удж, погоддя да одзланься велöтчöм йылiсь. Матынжык горт дынас нывка шувлiс: «Тырмас, Вася, а то мамö казялас». Ачыс сiя перыта кайлiс поспуэз кузя и, вöвлi кö эта коста игана ыбöс, ёркöтчис. А кöр сiя жö öтпыр-кыкись öвтыштлiс зонкалö кинас да саясьлiс ыбöс коласын, сэк вöлись мöдыс иньдöтчывлiс гортö. Нывкасö кольлалöм увья зорамöм гажсянь сылö охота вöвлi сьывны, йöктыны.

Гожумбытнас гажтöмыс петалiс дзир öтпырись, да и то недырик кежö, кöр Катя ветлiс городö, мед сетны экзаменнэз да пондыны велöтчыны медицинскöй училищеын. Сэк аслас гажтöмтчöмсянь Ильинов думайтiс: «А весь эд, натьтö, эг мун öтлаын. Кысси бы, батi, стипендия вылас».

Но шедны эта годö училищеö Катя эз вермы, чожа мый бертiс бöр. Мед не ештыны весись кад, арнас нывка мунiс öкмысöт классö.

Эта вотöдз Ильинов велöтчынытö одзлань эз ни думайт, но öнi, неделя бöртi, иньдöтчис нывкаыс сьöрö.

Öтлаын велöтчикö чулалiс год. Зонка быд коста видзсис öтлаын да, мыйöн вермис, отсалiс нывкаыслö. Часто аслас отсöтöн вовлiс сiя велöтчöмын. А сiдз кыдз гортсянь Лунинаöдз челядь ветлiсö пыр подöн, Вася отсавлiс нывкаыслö нуны мыйкö киын. Усьлiс кö ветлыны киноö, зонка и эстöн эз вунöтлы аслас ёрт йылiсь, ачыс неблiс билеттэз, видзис сылö ордчöн аскöттяс пуксян места. Быдöс эта, кыдз бытьтö не öддьöн тöдчанаыс, сё буржыка йитöтiс нiйö öтамöд коласын. Сы коста жö жагвыв чулалiс отир син одзын одззася полöм. Кыдз не кыдз, а сэк жö кыкнанныслö тырис ни дассизим годöн. Öнi ны йылiсь нельки пöрисьжык отир баитлiсö: «Томсянь, видзöт тэ, дружитöны, пыр и пыр öтлаын, биöн-ваöн он янсöт. Вот кöркö öтлаасясö, дак бытшöма пондасö овны».

Öтлаасьöмыс йылiсь öнiсянь нiя кытчöдз и эз думайтö. Но быдыс ны коласiсь ас кежас веритiс да надейтчис: сибалас колана кад, и нiя пыр кежö лоасö öтлаын.

Дасöт классын велöтчикö, кыдзкö тöвнас Ильинов сёрмис аслас ёрттэз сьöрись Лунинаöдз. Зонка петiс гортсис рытъявылас ни, быдсöн туйколас лöсьöтчис мунны öтнас.

Кыдз жö усис дивуйтчыны сэк, кöр сiя жö тöдса лапья кöз увтын эшö ылiсянь сiя казялiс неыджыт биок, а сы дынын öтнасö Катяöс. Пöрись пу бердö бöрнас жмитчыштöмöн, нывка видзöтiс öгралан биок вылö, думайтiс. Сы понда, что нывкаыс öтнас сёр тöвся рытö видзчисьö сiйö вöра да гажтöм туй вылын да эшö кыкнанныс понда сэтшöм дона местаын, Ильиновлö охота лоис сё эшö ылiсянь уськöтчыны сы дынö, кыдз и сэк, сывьявны да жмитны морос бердö. Но мед не повзьöтны нывкасö казявтöг сибöтчöмöн, сымдасö зонка керны эз понды, эшö ылiсянькодь шыасис:

— Катя?

Тöдса шыасьöмсянь нывка дзик саймис, дзир паныт зонкаыслö мылякö эз чепöссьы, жагвыв янсöтчис кöзыс бердiсь, юалiс:

— Вöтiн?

— Вöтi тай. А тэ мый эстöн öтнат керан?

— Он разь адззы, шоччися да тэнö видзчися.

— Катя! Катюша! — радувья Ильинов перыта сибöтчис зэв, пондылiс сывьявны нывкасö, но мöдыс видзчисьтöг вешшыштiс сы киэз увтiсь.

— Оз ков, Вася. Шоччисьышт да мунам. Пемдö ни.

Зонка отсалiс кышавны нывкалö спина саяс волыса мешöк, кыкöн ни да не тэрмасьöмöн вöрзисö одзлань туйö.

Мыйкö дырна мунiсö чöлöмöн. Бöрсяняс оськавтöн Вася казялiс — нывкаыс мыйкö увья чöлö: то ли обидитiс кин, то ли эшö мый. Но юавны нем зонка эз ешты. Катя чожа мый сувтiс, бергöтчис паныт.

— Тэ мыйкö тöдан, он?

— Ог. А мый колö тöднытö?

— Меным Максим Öльöшка письмоэз гижö, дружитны корö.

— А тэ?

— Ме, шуан? А мый ме? Нем. Висьтала тай тэныт. ― Нывка дзар керыштiс пемытiнас зонкаыс синнэзö, дзик одзлань эшö горöтчис: думайт пö вот ачыт, мый меным эта бöрсянь кольччö кернытö.

— Катя? Катенька? Да тэ мый? Тэ жö тöдан... Ми жö тэкöт... Вежöртан, Катя?.. Ме эшö сэксянь, кöр эта кöз увтын зэрыс коста сулалiм... Да ме тэнö некинлö ог сет! Вежöртан? Некинлö! — Ильинов перыта оськöвтiс зэв нывкаыс дынö, дзик сiйö часöт жö вермис кинкö сылiсь мырддьыны да нуöтны век кежö син одзись. Кыдз и пыр, сiя рамыника пондылiс сибöтчыны сы пельпоннэз бердö аслас киэзöн, но мöдыс талун вöлi нач не сэтшöм, кытшöмöн вöвлi пыр сыкöт одзжык.

— Ноко жö... Адззылас эшö кинкö дак... — зэркыта горöтчис Катя, öткоста перыта янсöтiс аслас пельпоннэз бердiсь зонкалiсь киэсö.

Вöр коласiсь туй вылын, да эшö пемдандорас, матын ны гöгöр некин ловьяыс эз тыдав: адззывнытö вöлi некинлö. Сiйöн нывкаыс видзчисьтöм кыввезсянь да сысянь, кыдз сiя мынöтiс ас бердсис сылiсь киэсö, зонкалö лоис недолыт, нельки зубыт. Кажитчис, что Катя нач нем понда вачкис сылö чужöмас нето сьöвзис синнэзас. Этасянь Ильинов вель дыр кежö бытьтö кынмис местаас. Нельки сэк, кöр нывкаыс иньдöтчис öтнас да сайöвтчис сы син одзись рытся пемытас, мöдыс, дзик öшöм, сё эшö эз тöд, мый пондыны керны одзлань, öтнас сулавтöн, сiя вель дыр видзöтiс кöз увтiсь вынтöма ни шаялан биок вылö, кöда вот-вот кусас, а сэсся гажтöма да не тэрмасьöмöн вöрзьöтчис одзлань туйö. Вöтны одзын мунiсь Катяöс некытшöм охота эз ни вöв. Нельки думасянь, что öнi Лунинаöдз ковсяс мунны вились öтнаслö, лоис невночка кокнитжык. Эта увья öддьöнсö зонка эз и тэрмась.

Километр ылына öтнас мунöм бöртi нывка видзчисьтöг бертiс бöр. Медперво Васялö этаö нельки эз и веритсьы, и кöр Катя зэв сибöтчис сы дынöдз, мöдыс этаись нельки повзьыштiс. Нывка жö, кыдз бытьтö эта вотöдз ны коласын нем эз и вöв умöльыс, юалiс:

— Мый нö кольччан?

— А кытчö меным тэрмасьнытö? — одззамоз жагвыв коккесö вештавтöн, негорöн шыасис Ильинов.

Эта бöрсянь вель дыр оськалiсö чöлöмöн. Нывка, тыдалö, видзчисис, кöр зонка пондöтас одзланься баснисö: то ли пондас юасьны мыйкö Максим Öльöшка йылiсь, то ли одззамоз корны сiйö да баитны аслас радейтöм йылiсь. Но зонка чöлiс.

— Мый нö шы он сет?

— А мый йылiсь баитнытö?

— Да кöть бы сы йылiсь, мый неважын горöтчин, что некинлö менö он сет. Тэ мый, былись сiдз думайтан? А верман разь не сетнытö? Ме жö тэныт не кытшöмкö сэтчин ловтöм тор.

Ильинов понда этна кыввес вöлiсö тожö нач видзчисьтöмöсь, но öнi нiя одззамоз эз ни дойдö. Горöтчыны мыйкö паныт зонка эз тэрмась, мыйкö дырна чöлыштöм бöртi висьталiс:

— Сiдз дак сiдз. Сэк ассим кыввесö босьта бöр. Одзлань эта йылiсь и баитны нем. — Öнi зонка ачыс ни петiс одзлань, пондiс оськавны шупытжыка. Вöтчыны сы сьöрö нывкалöн охота, тыдалö, тожö эз вöв. Лунина бердас ни сiя нарошно кольччис бöрлань.

Сёрöнжык Вася ас кежас думайтiс, что янсöтчисö пыр кежö. Этасянь вöлi сьöкыт, гажтöм, недолыт сьöлöм вылын. Эшö сьöкытжык вöлi сысянь, что нельки янсöтчöмыс бöрын быд лун ковсис пантасьлыны школаын, пукавны уроккез коста öтiк классын. Кыкнанныс видзсисö, кыдз вермисö, дзик ны коласын некöр нем эз и вöвлы.

Янсöтчöмыс сетiс тöдны эта йылiсь ас мознас. Сiя кадö, кöр зонка кыссис-велöтчис сё одззамоз, нывкаыс тöдчöмöн пондiс кольччыны. Бöртiжык локтiс сэтчöдз, что класснöй журналын мыччисисö кынымкö двойка. Но сымдасö зонка адззис да эз адззы.

Сибöтчис тулыс, кöда лöсьöтчис сылöтны лым, а öткоста пöльыштны гаж быд том сьöлöмö. Пондöтчис март. Сэк кежö зонкалöн одззася сьöлöмшогыс ештiс лöньсьыны ни. Эта кадö, кыдзкö уроккез коста, и сетiсö сылö Катясянь записка. Вöлi эта суббота лунö, кöр занятиеэз бöрсянь нiя лöсьöтчисö мунны гортö. Нывка корсис мунны öтлаын.

Колiс я сiйö ны коласын лоöмыс бöрсянь, Вася бытшöмик эз тöд: нывкалöн корсьöмыс сы понда вöлi нач видзчисьтöм. Сьöлöмнас зонка кылiс: пантасьны Катякöт лоас недолыт. Эта увья паныт нем сiя эз висьтав, горт туйö петiс öтнас, быдöннысся сёрöнжык. Но сiя жö лапья кöз увтын Катякöт пантасьöмыс видзчисьтöмöн эз вöв. Нывка эшö зонкаыс сибöтчытöдз медодз оськöвтiс паныт, гажа голосöн да повтöг горöтчис:

— Кытöн мый тэ талун сы дырна? Мыла бырис видзчисьнытö.

— Мыйлö нö видзчисян? Эз и ков. Ме эд эг тшöкты.

— Видзöт тэ, кытшöм вреднöй. «Эз и ков» эшö висьталас, — шутитöмöн нерыштiс Катя зонкасö. — А ог кö ме вермы öтнам муннытö, сэк мый? Менам пимиэзö шучкöп вамисö, и кокöс пондiс зыртны.

— Купиын ме тэнö сё ни ог нуöт.

— А мыля бы и не нуöтны, верман кö? Еныс эд эта понда оз чарöт, — кыт шутитöмöн, кыт серьёзнöя шупыта баитiс Катя.

— Кинкöт письмоасян, ась сiя тэнö и... — сы моз жö пондылiс горöтчыны Вася, но мöдыс перыта вевттис басöк сера кеписёка кинас сылiсь öмсö.

— Чöв, Вася. Оз ков эта йылiсь. Тэ сё эшö сы понда ме вылö лöгалан?

Зонка чöлöмöн жмитыштiс пельпоннэзнас: кин нö сiйö тöдö.

— Простит, пожалуйста, что унаöв сэк горöтчи, но? Колö кö, ме ачым тэнö сы понда окышта. — Нывка перыта сибöтчыштiс недырик кежö аслас тырппезöн зонкаыс тырппез бердöдз. — А öнi отсав. Босьт менчим туисоксö да мунам.

Вася лэбтiс кок увтсис нывкаыслiсь туисок, оськöвтiс Катя сьöрö. Сысянь, что чулалiс ны коласын янсöтчöмлöн сьöкыт да неколана кад, талун, кыдз и одзжык, нiя вöлись вöлiсö öтлаын, кыкнанныслö лоис и кокнит, и гажа. Сiйöн не только янсöтчыны, а и кольччыны öтамöд сьöрись эз ни вермö.

Максим Öльöшка письмоэз йылiсь ны коласын басниыс сэсся эз лэбтiсьлы, а öтпыр-кыкись казьмöтöмыс тöдвылiсь чожа вунiс. Öнi, кыдз и одзжык, не только школаын, но и рыттэзнас нiя вились вöвлiсö пыр öтлаын: ветлiсö киноö, библиотекаö, öтлаын жö лöсьöтчисö и экзаменнэз кежö.

Сёрöнжык тулыснас, экзаменнэс коста ни, гортö берттöн, сiя жö лапья кöз увтын вöлi сетöм öтамöдлö кыв: мый бы эз вöв оланас, нiйö некöр и нем оз янсöт, пыр кежö лоасö öтлаын.

Чулалiсö экзаменнэз. Öтласа велöтчан кад кольччис бöрлань. Но нельки эта бöрсянь эз петав сэтшöм лун, мед нiя эз пантасьлö.

Чожа Ильиновöс босьтiсö служба вылö. Сiя жö годö Катя сетiс медучилищеö экзаменнэз, арнас мунiс велöтчыны.

Письмоасисö. Кык год да джын сьöрна шоча петавлiс сэтшöм неделя, мед кöдакö ны коласiсь эз босьт ёртсянь письмо да эз гиж паныт. Гижисö быдöс йылiсь: кытшöм кино видзöтiсö, кытшöм книга лыддьöтiсö. Письмоэзнас жö мечтайтiсö асланыс одзланься олан йылiсь. Но кытшöмкö кадсянь нывка пондiс гижны шочжыка. Асьныс письмоэс лоисö дженытöсь, дзик гижнытö вöлi нем йылiсь. Медбöрын зонкаыс письмоэз вылö отвечайтны Катя и нач дугдiс. Но нельки сэк Ильинов оланын эз петав сэтшöм лун нето час, кöр сiя дугдылiс бы надейтчыны нывкаыс вылö. Сiдз видзчисьтöн чулалiс эшö джын год сьöрна. И вот... Нывкалöн чöлöмыс, а бöртiжык сы мунöм йылiсь сэтшöм видзчисьтöм да неколана юöрыс отличникöс да класснöй специалистöс вайöтiсö...

Чорыт наррес вылын куйлытöн, Ильинов горöн видчыштiс ас кежас, сэтшöм жö горöн сьöвзис, сувтiс, жагвыв пыркöтiс кармансис кольччöм махорка бус, пондiс каттьыны куритны.

VII

Чулалiс месяц Ильиновкöт небытшöм история бöрсянь. Эта кадö öтi-мöдi гöгöр ештiс вежсьыны. Приморьеö сибöтчис сёр ар. А сулалiс сiя татöн не öддьöн гажа. Рытöн и асылöн, лунöн и ойöн быдöс вöлi везтöм йöв рöма сьöкыт да сук туманöн. Сiя лажмыта öшалiс му весьтын, сайöвтiс быдöс, мый мича погоддя коста ылiсь и матiсь усьлiс син вылö: бухтасö и сопкаэсö ны вылын шочыника быдман дубовöй рассэзöн, нельки матын сулалан керкуэз да мöдiк постройкаэз. Туманыс жö вöтис ас пытшкас и быдкодь шыэз: отирлiсь баитöм, пароходдэзлiсь уксöм да морелiсь шумитöм. Туманыс увья лунiсь лун эз мыччасьлы шондi, эз петавлö ой кежö тöлiсь да звездаэз, и дзир дугдывтöг пожнассис бус кодь поснит зэр.

Бухтаыс öнöдз вöлi эшö и осьта, но навигация чулалiс. Катеррез, кöдна гожумбыт да мыдзтöг юклалiсö морелiсь паськыт ваэз, лун-мöдöн одзжык вöлiсö лэбтöмöсь берег дорö, шпалаэзiсь тэчöм клеткаэз вылö. Асьныс катерниккез öнi занимайтчисö теорияöн, велöтiсö ассиныс материальнöй часть. Быдöнныс понда кадыс петiс личытжык, ежели гожумнас, ученнёэз коста. Неделя пытшкас öтпыр-кыкись позис петавны увольненнёö, недырик вöвны городын.

Дзир Ильинов оланын эта кадö нем эз вежсьы. Ась медодзза зубытыс да обидаыс сы сьöлöмын мымдакö и чулалiсö ни, но чужöм вылас гажтöм выраженнёыс сiдз и кольччис, топ лякасис пыр кежö. Ёрттэс коласын одззася шутитöмись сы мывкыдын öнi и след некытшöм эз тыдав. Шутитны да серавны одззамоз сы оланын эз вöв некытшöм причина. И адззис кö мый эшö Ильинов ас понда бурсö, дак, этö служба. Вежöртана, что гажтöмсянь да умöль настроеннёсянь и сiйö нуöтны вöлi некокнит, но командирлöн басниыс да наказаннёын чулöтöм кадыс сетiсö тöдны ас йывсиныс, лоисö зонка понда бытшöм урокöн. Вöлi этася эшö öтiк причина — службасö бытшöма нуöтöмöн Ильинов вынсьöтчис пöдтыны сьöлöм вывсис шогсö, кусöтны неколана гажтöмсö, мый эта коста сылö колiс медöддьöн. Эта увья медбöрья кадö сулжбасö нуöтöмö зонка и пуктiс быдöс ассис вынсö да кужöмсö. Ильинов дышöтчытöг тыртiс командиррезлiсь быд приказ, бытшöма керис быд лунся удж, сэтшöм жö бытшöма лöсьöтчис занятиеэз кежö, а ковсис кö отсöт томжык ёрттэзлö, дышöтчытöг локтiс паныт. Этатшöм служба понда дженытик кадö Ильинов учётнöй карточкаын содiсö кынымкö благодарность. Пондiс кывсьыны, что чожа сувтöтасö бöр отличниклiсь да класснöй специалистлiсь званнё. Но нельки эта юöрыс Ильинов оланын нем эз веж.

Не öтiк лун сьöрна вöлi зонкалöн Катякöт дружитöмыс, мед сэтшöм кокнита вунöтны сы йылiсь, вужсорнас да пыр кежö нетшкöвтны сьöлöмись. Петавлiс кад, кöр быдöс лоöмыс виль вынöн усьлiс тöдвылö, и сэк Ильинов вовлiс тöдтöмöдз. Сэтшöм кадö сiя нельки местасö эз адззы, эз тöд, кытчö воштiсьны, дузгыльтчöм чужöма да лöнь, вачкисис гымалан кымöр вылö. Ассис состояннёсö зонка кылiс и вежöртiс, кылiс и адззис ёрттэс одзын недолытсö, дзир кернытö аскöттяс нем эз вермы. Сiя вöвлi нерад ачыс аслыс, но эз адззы сэтшöм колана тор, кöдöн позис бы гывйыштны сiйö обида гагсö, кöда дугдывтöг сöскис сылiсь юрвемсö, пидзыртiс сьöлöмсö.

Сэтшöм кадö Ильинов дынö сибöтчывлiс сылöн медматiсь ёрт Толя Макаров, баитлiс:

— Кывзы жö, Вася. Но кинкöт миян коласiсь оз овлы сэтшöмыс? Мый тэ эта увья пыр кежö юртö öшöтiн? Да сьöвзьы быдöс вылö. Öнi увольненнёö позьö ветлыны. Петав городöдз, тöдсась кинкöткö нывкаэз коласiсь, видзöтан кö, быдöс жагвыв и чулалас.

— Ог вермы ме, Толик, сымдасö. Не ме характерын, — юрнас öтмöдöрö öвтышавтöн, шыасьлiс паныт Ильинов.

Этатшöм ответ бöрсянь Макаров паськöтыштлiс öтмöдöрö киэсö, сы вылын и лöньсьывлiс бöр. А Ильинов и одзлань кежö кольччывлiс сё сiя жö гажтöм настроеннёын. Не висьтавны, мый дырна бы вермис кыссьыны зонка понда эта сьöкыт да гажтöм кад, не лоны кö бы эта коста сы оланын эшö сьöкытжыклö да гажтöмжыклö.

Сiя лунö Ильинов дзир асывнас бертiс караульнöй служба вывсянь. А рытнас, эшö ужин вотöдз, сы дынö сибöтчис Витя Зырянов.

— Кывзы жö, Вася. Ёрт тэ менам или не? Ветлiн бы ашын ой кежö ме местö пост вылас, а?

— Мый, аслат дыш петö?

— Да, не, кывзы, не сыын делоыс. Вежöртан, он, ашын городö, увольненнёö лöсьöтчи, а сэтöн, кыдз нарошно, нарядö ыстöны.

— Но и ветлан, ыстöны дак. Городас и мöдöтпырись ештан.

— Да не, Вася... — Зырянов пуктiс кисö Ильинов пельпон вылö. — Кыдз тэ сымдасö он вежöрт — ашын баитчи нывкакöт пантасьны, а сэтöн наряд. Бöбöтчана эд шогмас, вермас обидитчыны. Ачыт тöдан, кытшöмöсь нiя овлöны. Ковсяс аслыт мöдöтпырись, ог йöрт, эн пов.

— Сiдз бы перво жö и висьталiн.

— Дак мый, баитчим сэк?

— Висьтав дежурнöйыслö, ась вежас.

Радувьяс Зырянов вынöнкодь буткис кулакнас ёртыслö пельпон кузя, кыдз учöтик челядёк, котöрöн уськöтчис дежурнöй комнатаö.

Ашынас, развод бöрсянь, Ильинов сувтiс пост вылö. Караулитан местаыс вöлi тöдса — торпеднöй катеррезлöн эллинг, кöда дынын зонка и одзжык сулавлiс ни. Ачыс эллингыс сулалiс нач берег дорас. Куим ладорсянь сiя вöлi гöгöртöм бухтаись ваöн, и дзир öтiк ладорсянь сы коласöт да скалаэз коласöт кыссис кöрттуй.

Погоддяыс вöлi кымöра. Асывсянь кисьтiс поснит зэр, кöда и одзлань кежö эз дугдыв. Зэр ванас кырöтöм иззэз кадiсь кадö мынлiсö кысянькö вылiсянь, скалаэс бердiсь, сьöкыта зукöтöмöн усялiсö улö.

Мед пемытiнас казявтöг не сюрны ны увтö, Ильинов видзсис матынжык эллинг бердын. Сэтчö жö эстöн не сiдз сидзис зэр, мымдакö позис сайöвтчыны тöв шогья, сулавнытö вöлi шонытжык.

Чулалiс рыт. Ильинов кылiс, кыдз казармаын кольччöм ёрттэз, эшö водтöдззаныс, петалiсö рытся прогулка вылö, мунiсö и локтiсö бöр сьывтöн. А сэсся жагвыв быдöс лöньсис. Öнi дзир сымда и кылiс, кыдз гöгöр дугдывтöг кышöтiс зэр, скалаэз коласöт вылiсянь негырись шороккезöн котöртiс ва да кöрттуй насыпь увтас волнаэз дыша чепсасисö берег дорись галька вылö. Сёр арся кад, кымöра погоддя да сук туман увья гöгöр вöлi сэтшöм пемыт, что мымда бы эн вынсьöтчы, куим оськöв ылына ас дынсянь адззыны нем эз позь.

Сулавны вöрöтчытöг вöлi кöдзыт. Ильинов тэрмасьтöг ветлöтöв-керис öтмöдöрö эллинг бердöт, бертiс да сувтiс бöр сiя местаö, кытöн öшалiс телефонлöн аппарат. Ременьнас зонка зэлöтыштiс ас бердас пельпон сайын öшалан карабин, дзебис юрсö накидка шлём увтö, öтiк местаын жöдзтöн, пондiс думайтны. Öнöдз эшö зонкалö вöлi охота, мед мамыс письмоын Катя йылiсь юöрыс лоис не быльöн, а бöбöтчанаöн. И босьтны кö бы öнi ассяняс нывкаыссянь эта йылiсь письмо, этася ыджытжык гаж да счастье Ильинов понда эз бы вöв. «А вдруг письмоыс и былись локтас?» — думайтыштiс Ильинов ас кежас и нельки эта бöбöтлан думасянь недырик кежö гажмыштiс.

Эта коста кытöнкö вылын скалаэс коласын зэрыс кышöтöм пыр зонка пельшы бердöдз сибалiс кытшöмкö тöдтöм, не öддьöн гора мутшнитöм. И сэк жö, эта мутшнитöм бöрсянь, поснита пазалöм из гизьöтöмöн пондiс киссьыны насыпь да кöрттуй полотно вылö.

Ильинов медперво думайтiс, что вевдöрсяняс кинкö сибöтчö. Зонка перыта лэдзис пельпон сайись карабин, пондiс кывзiсьны одзлань. Но гöгöр вöлi лöнь. Некытшöм сибöтчан оськöввез кывны эз позь. Дзир нiя жö пазалöм иззэс кадiсь кадö сё эшö усялiсö вылiсянь. Сэк вöлись Ильиновлö тöдвылас усис, что лэдзчыны скалаэз вывсянь сiя местаöт не туй некытшöм, не лиснич абу. «Сiдзкö, иззэсö ванас кырöтö», — думайтiс зонка асьсö лöньсьöтöм могись, вились чапкис пельпон сайö карабин, жагвыв пондiс йöктышавны аслас местаын.

Недыр мыйись мутшнитöмыс кылiс мöдöтпыр. И сэк жö горöн гырснитöмöн вевдöрсяняс мынiс мыйкö ыджыт да сьöкыт, усикас öтпыр-мöдöтпыр нималiс скала выступпез бердö, буткисис му вылö. Сы усьöмсянь муыс тöдчöмöн дрöбалiс нельки Ильинов кок увтöдз, мусö дрöбöтöмсянь жö, öтмöдöрын кышöтöмöн, пондiс киссьыны поснит из. Эта вылын быдöс и лöньсис. «А ыджыт, кылö, базгисис. Не звонитны я разводящöйыслö?» — думайтыштiс ас кежас Ильинов да кынымкö оськöв ылына муныштiс эллинг дынсянь сы ладорö. Не ойся пемытiнас адззыны этасянь нем эз позь, а мунны ылöжык аслас пост дынсянь зонка эз лысьт. Сiйöн бöр петiкас ни эшö думайтiс: «Усис и усь. Меным сiя оз мешайт. А лэбтыны кö тревога кытшöмкö из увья, сiдз и тöд, ёрттэз насмех босьтасö да бöртiжык быдöнныс серавны пондасö». Этöн думанас Ильинов асьсö и лöньсьöтiс, вились пондiс ветлыны эллинг бердöт одз да бöр.

Кытшöмкö кадö бухта мöдöрсянь кыссян кöрттуй вылын мыччисис поезд. «Уголь, натьтö, тöв кежас пыртöны, — думайтiс Ильинов. — Тревога часöт орсасö — вагоннэз ректыны. Вот уж кинлö дöнзяс дак дöнзяс этатшöм погоддя коста». Но бöртiжык зонка казялiс, что угольнöй склад ладорö, кöда вöлi частьлöн расположеннё сайын, поездыс эз кеж. Сiя жагвыв пондас кытшöвтны бухтасö эллинг ладорö. «Не уголь, сiдзкö».

Кöр неыджыт состав сувтiс КПП весьтö, саймис дежурнöй телефон. Ильинов перыта сибöтчис аппарат дынö, кынмöмсянь дубалöмкодь кинас мынöтiс рычаг вылiсь трубка.

— Витöт пост кывзö.

— Частись дежурнöй баитö. Локтö груз. Куим платформа. Колö лэдзны. Вежöртiн?

— Вежöртi, — дженытика шыасис паныт Ильинов. Дежурнöй пуктiс трубкасö бöр.

«Лэдзны дак лэдзны. Ась пырас», — думайтыштiс зонка ас кежас.

Кытшöм вермис лоны ойся груз, этö сiя и висьтавтöг тöдiс. Ильинов тожö öшöтiс ассис трубкасö рычаг вылö, лöсьöтыштiс пельпон саяс карабин, оськöвтiс кöрттуй полотно вылö, пондiс видзчисьны.

Эта коста КПП дынсянь составыс вöрзис одзлань, пондiс сибöтчыны Ильинов ладорö. Паровозлöн биэс, öддьöнжыксö вевдöрсянь сувтöтöм прожекторыс, эшö ылiсянь малыштiсö вазьöм да пемыта югьялан гранитнöй скалаэсö, веськöтчыштiсö да усисö доль полотно вылö. И вöлись öнi, кöр паровоз одзын кöрттуйыс Ильинов бердöдз вöлi югдöтöм, рельсаэс коласiсь зонка казялiс мыйкö сэтшöмö, кöдасянь казявтöг чапкис жарö. Витдас-кватьдас оськöв ылына сы дынсянь, но куим-нёлись ылынжык сибöтчан поезд дынсянь, кöрттуй полотно вылын куйлiс чуть я не метр сувда сiя гранитнöй скалалöн пельдöм торыс, кöдалiсь мынöмсö да усьöмсö неважын и кылiс Ильинов. «Кыдз жö сiдз? Колö жö эд... Мый жö бы öнi?..» Зонка перыта сувтöтiс син одзас паровоз сьöрын сибöтчан грузсö. А сiйöн вермисö лоны дзир торпедаэз. Торпедист ачыс, сiя бытшöма тöдiс нылiсь взрывайтан вынсö. Недырик кежö Ильинов син одзын сувтiс сiя картинаыс, кöда вот-вот вермас лоны, и сэк жö, дзик баня жарсянь, сылöн паськöмыс лякасис вывтыр бердас. Казялас оз туй вылö усьöм изсö паровоз вылiсь машинист — эта йылiсь öнi эз ни думайтсьы. Босьтны трубка да звонитны частьö кад эз вöв. Сэтчö жö Ильинов вежöртiс, что зорамöм обстоятельствоэзын нельки лэбтöм тревога оз отсав, отир оз ештö сувтöтны поездсö, сiя одзалас татшкисьны кöрттуй полотно вылö усьöм из бердö. И позис кö эшö эта коста кöть невночка надейтчыны, дак только ас вылö. Кадсö öштытöг, Ильинов вуджöтiс спина сайись киас карабин, мымда чож, уськöтчис паныт сибöтчан поездлö, а котöртiкас быд горшись, дзик сiйö ловья вывтi пöжалiсö биа öгыр вылын, горöтлiс: «Сула-ав! Кытчö тэ! Сула-а-ав, висьталöны!».

Поездыс мунiс не öддьöн перыта. Сибöтчыны усьöм из дынöдз Ильинов ештiс сiя кадö, кöр мöдыслö сы дынöдз кольччис эшö дас кыным оськöв ылына. Изыс сайсянь карабиннас грöзитöмöн, зонка одззамоз, мымда горш, горöтлiс:

― Сула-а-ав! Сулав, тэныт висьталöны! — Повзьöмувья ачыс Ильинов некыдз эз вермы вежöртны сымдасö, что туй вывсис неладно лоöмсö öнi и ачыс машинист казялiс ни и дзир сувтöтны перыта сы ыжда да сы сьöкыта машинасö некыдз эз вермы. Эта увья сiя и сеталiс свисток бöрын свисток, мед тшöктыны вешшыны Ильиновöс туй вывсис. Но эта коста мöдыс ас йывсис эз думайт, машинистлiсь свистоккесö эз кыв.

Ыджыт, сьöд да сьöкыт паровозлöн вывтырыс, горöн пишкайтöмöн, дзик лöгöтöм пороз, сибöтчис нач матö ни, сiйö и видзöт, нильыштас ас увтас. Но нельки сэк вешшыны туй вывсис Ильинов эз пондыв. Топ лякасьöм нето домалöм изыс бердö, сiя одззамоз, кыдз вермис, грöзитiс поездыслö вывлань лэбтöм карабинöн, одззамоз, мымда горш, горöтлiс:

— Сулав! Сулав, шуöны! Мый тэ...

Паровоз одзнас вынöнкодь люкасис из бердö, бергöтiс, пöрöтiс. Усьтöнняс зонка эшö ештiс нырыштны взвод вылын сулалан спусковöй крючок вылö. Негорöн паськалiс öтпырись лыйöм. Сы коста жö мыйöнкö сьöкытöн вачкис Ильиновлö юр бöрас. Син одзас недырик кежö чепöссьыштiсö веж круггез, пемдiс.

VIII

Садясис Ильинов сьöкыта, сутки да джын бöртi первуись осьтiс синнэсö. Мый усис кывны да казявны медперво, дак этö сiйö, кытшöм зубыта мозжитiсö-доймисö коккес. Нiйö топ дугдывтöг изiсö изыннэз коласын, палитiсö би вылын, пилитiсö ныж пилаöн. Сы увтын койкаыс, кыдз дюттян, дюттясис-ветлiс то увлань, то вывлань. Юрас тожö дугдывтöг, дзик кольмöтсянь, сьöкыта жынöтiс-вартiс. Гöгöр вöлi лöнь. Коккез мозжитöмся, сьöлöм ёткöтöмся да юрö жынöтöмся, некытöн и нем эз кыв.

То ли ольпасьыс бердсянь, кöдаын куйлiс зонка, то ли русяняс, кöдöн лолалiс, а чожажык кыдз öтсяняс, сiдз и мöдсяняс öткоста, нырö вачкис лекарство дукöн. Эта сьöртi ни позис вежöртны: куйлö сiя не гортын, не тöдса казармаын или катер вылiсь кубрикын, а нето санчастьын, нето госпитальын.

Мый медодз усис зонкалö син вылас, дак этö лым кодь чочком потолок, кöда, кыдз и сы увтын койкаыс жö, öтлаын сы бердын öшалан неыджыт электрическöй лампочкакöт, тöдчöмöн ветлiс то öтöрö, то мöдöрö. Кык öшын, кöдна вöлiсö шульгаланьсянь да кадiсь кадö тожö пиньласисö, югдöтiсö жырсö не öддьöн сöстöм руд рöма югытöн.

Дыр мыйись Ильиновлöн юрыс бергавны дугдiс. Этö колiс вежöртны сы сьöртi, что öшыннэс да потолокыс сувтiсö асланыс местаö. Медодзза думаыс, кöда зубытыс пыр зорамис зонкаыс юрын, вöлi: «Мый мекöт сэтшöмыс?» Ачыс сiя этö кытчöдз эз вежöрт. Юавны вöлi некинлiсь: палатаын сысся некин эз вöв, веськытлань ордчöн сулалан койкаэс — просöсь.

Ильинов мöдiс чеччыны, эта увья жагвыв вöрзьöтчыштiс местаас. Но нельки жагвыв вöрзьöтчöмсянь сыбурна сöздыштiс коккес кузя, что эта зубытсянь, аслыс казявтöг, зонка горöн ружтыштiс, горöн жö гирчыктiс пиннезнас, пыдына ловзисьöм бöрын кунис синнэсö.

Перыта чапкис жарö. И гырись, и кöдзыт ньылöм воттез пондiсö визывтны чужöм пасьта. Зубытсö лöньсьöтöм могись Ильинов мыйкö дырна куйлiс вöрöтчытöг, вынсьöтчис вежöртны, мый сыкöт лоис сэтшöмыс. Но мымда бы зонка эз мырсьы эта вылын, тöдвылас сiдз нем и эз усь. А кöр сiя вились осьтiс синнэсö, казялiс аслас койка дынiсь том сестраöс.

— Мый, саймим? — негорöн юалiс нывкаыс и одзлань ачыс жö содтiс: — Вот и бур. А вöрöтчыны миянлö кытчöдз оз позь. Вай пондам веськöтчыны. Ме вайи порошоккез да таблеткаэз, кöднö ковсяс юны.

Сестралöн кыдз ачыс голосыс, сiдз и басниыс, вöлiсö сэтшöм рамöсь да небытöсь, что вачкисисö сьöлöмöдз йиджан сьыланкыв вылö, кöдö кывзöмöн и пöтны он вермы. Этö Ильинов вежöртiс нельки зубытыс пыр, кöда дугдывтöг сотiс-палитiс сылiсь коккесö. А кöр вежöртiс, сэк жö и казялiс: эта голоссянь сы коккезын зубытыс кыдз бытьтö невночка лöньсьыштiс.

Ас кежас öнöдз Ильинов ештiс вежöртны дзир öтiкö, что сыкöт лоис мыйкö öддьöн умöль да неколана. Но этö лоöмсö уськöтны тöдвылас зонка некыдз эз вермы, эшö вайöм лекарствоэсö примиттöдз сестраыслiсь юалiс:

— Сестра, ме кытöн?

Мед буржыка кывны да вежöртны, мый висьталас паныт нывкаыс, Ильинов первуись бергöтыштiс юрсö, дзар керыштiс сы вылö.

Эта коста мöдыс пуктiс сьöрас вайöм лекарствоэсö койкаыскöт ордчöн сулалан тумбочка вылö, ачыс кокнита пуксьыштiс койка дорыш вылас. А вöлi сiя неыджыт да кокнитик вывтыра, негырись, сера да шоныт югöра сина, воöм öмидз рöма векнитик тырппеза да петыштöмкодь одзлань гöгрöса тшöкаа. Некин вылö мöдiк тöдсаэз коласiсь нывка эз вачкись. Но öнi, кöр Ильинов первуись дзар керыштiс сы вылö, мыйсянькö пондiс думайтсьыны, что öтамöд коласын нiя важын ни тöдсаöсь, что сылö и одзжык ни усьлiс пантавлыны этнö шоныт югöра синнэсö, кывлыны сылiсь сьыланкыв кодь небыт да рам баснисö. Шоча овлö оланас сэтшöмыс, но овлö — кöр мортыс мортлö гленитчö медодзза жö пантасьöмсянь.

Сестра мышкыртчыштiс Ильинов весьтö, паныт юалiс:

— Мый, некыдз он вежöрт, кытчö сюрин?

— Ог. Вежöрта — не гортын, не асланым частьын, а кытöн — казявны да тöдны некыдз ог вермы.

— Городын тэ, госпитальын.

— А мый мекöт сэтшöмыс лоис?

— Вот уж, ёртö, эг вöв ме тэкöт öтлаын и сымдасö висьтавны ог куж.

— А кöр менö татчö вайöтiсö?

— Тöн асывнас.

— Сестра, а мый менам коккезкöт? Мыйсянь нiйö сiдз жугдö?

― Коккезкöт?.. — Нывка веськöтчыштiс койка весьтас, мыйкö дырна думайтöв-керис ас кежас, ыш ловзисис. — Умöль, Ильинов, тэнат коккеткöт.

— Да сымдасö ме ачым кыла, что умöль. Но эмöсь нiя менам?

— Эмöсь, Ильинов, эмöсь, дзир котрасьнытö вель дыр оз пондö. — Невна чöлыштöм бöртi одзлань: — Чегласьöмöсь нiя тэнат.

— Чегласьöмöсь? Кы... кы... кыкнанныс? — мыктыштiс повзьöмувья Ильинов. Эта коста жö сы чужöм вылiсь и сiдз ни абутöм кодь рöмыс и нач öшис, тырппес чочкоммисö.

Паныт сестра эз ни шыась, дзир öтпырись гогиньтыштiс юрнас. А кöр Ильинов пыдына да гажтöма ыш ловзисис да недырик кежö кунис синнэсö, сiйö лöньсьöтöм могись, мöдыс горöтчис:

— Но этаись повны оз ков. Быдöс чулалас. А медбы чожажык сувтны коккез вылö, колö бытшöмжыка веськöтчыны. Колö кывзыны да керны быдöс сiдз, кыдз висьталас веськöтiсь врач. Госпиталь миян военнöй и дисциплина татöн сэтшöм жö.

Видзчисьтöм да гажтöм юöрыс дзик содтiс Ильинов коккезын зубытсö. Зонкалö нельки пондiс думайтсьыны, что терпитны одзлань сылöн вын оз ни судз, и часöт сiя пондас горöтлыны. Эта жö зубытувья сiя мыйкö дырна нельки эз кыв сестралiсь одзланься баснисö. А кöр дыр мыйись нывкалöн баитöмыс вились сибалiс Ильинов ылöсöдз, сы коккезын зубытыс бöра дзик лöньсьыштiс.

Сестра сетiс Ильиновлö вайöм лекарствоэз, перыта кисьтыштiс стаканö ва, удiс юны. Сэсся ачыс жö сувтöтiс сылö градусник, юöртiс:

— Талун асывсянь тэ дынö вовлiсö ни.

— Кин?

— Лейтенант, томыник кытшöмкö. Командирныт, натьтö. Но сэк тэ вöлiн эшö садьтöм. Сiдз сiя бöр и мунiс. Мунтöнняс жö висьталiс, что чожа эшö кинкö вовлас. — Сестра дзар керыштiс Ильинов конувтiсь кыскöм градусник вылö, öвтыштiс öтмöдöрö юрнас, невна перытжыка, ежели эта вотöдз, горöтчис:

— Жарыс ыджыт. Баитны тэныт уна оз позь. Колö шоччисьны. Куйлы чöлöмöн, вöрöтчытöг да етшажык думайт. Узьöтö кö — верман узьны. Тэ положеннёын эта лекарствоыс медбур да медколана. — Эстöн сестра кыдзкö öддьöн кокнита да кужöмöн лöсьöтыштiс Ильинов морос весьтын дзугсьыштöм одеяло, бергöтчис, лöня, топ оськавтöг, петiс.

Сестракöт недырик баитöм бöрсянь Ильиновлö лоис вежöртана не только аслас сьöкыт положеннёыс, но и сiя, что кöркö эта положеннёись позяс петны бöр, — веськавны да сувтны коккез вылö. Не веритны нывкаыс кыввезлö некыдз эз позь. Тöдiс Ильинов и сiйö, что мукöд коста морт оланын пантасьлö эшö и не сэтшöм, да и то чулалö. Но чулалö сiя не кокнита и не перыта. Эта понда колö уна кад, вын да мыла. Сiйöн Ильинов талунсянь жö готов вöлi керны быдöс сiдз, кыдз висьталас веськöтiсь врач, или эта, небытик да рам голоса сестраыс: юны быдöс лекарствоэз, куйлыны чöлöмöн да вöрöтчытöг, то ли узьны. Но не думайтны?.. Этакöт Ильинов согласитчыны некыдз эз вермы. Позис я не думайтны сэк, кöр сiя нач видзчисьтöг сюрис сэтшöм положеннёö? Позис я, кöр сiя öтiк думайтöмся и кернытö сэсся нем эз вермы? Эд Ильинов öнöдз эшö нем эз тöд сы йылiсь, кöр, кытöн да мыйсянь шогмис сыкöт сэтшöмыс. И колiс дзир сестралö аслас петöм бöрсянь пöднавны палатаись ыбöс, кыдз Ильинов, öткö, коккезын чирыштан зубытсянь, мöдкö, зубытысувья жö зорамöм обидасянь, бертiс думанас аслас положеннё дынö. Охота вöлi тöдны, кытöн да кыдз лоис сыкöт сэтшöмыс.

Вель дыр куйлiс Ильинов лöньсьöмöн да куньöм синнэзöн, вель дыр вынсьöтчис вайöтны тöдвылас, кытöн да мый вöлi сыкöт госпитальö сюрöм вотöдз. Медбöрын ылöсыс, кöть и жагöна, бергöтiс сiйö неважын чулалöм кадас. Медодз мылякö сувтiсö син одзын паровозлöн перыта сибöтчан биэс, а одзлань öтдруг — паровоз, из, торпедаэз. «Кысь этö быдöс?» — вынсьöтчис вежöртны думанас Ильинов.

И вöлись эта бöрсянь жагвыв да неыджыт тороккезöн пондiсö öтлаасьны ылöсас: рытся развод, пост вылын сулалöм, зэр да сы увья кырöтöм иззэзлöн киссьöм, а сэтöн вились ыджыт, сьöд да сьöкыт паровозлöн сибöтчöм, из, торпедаэз. Быдöс лоöмись торья эпизоддэс жагвыв сувтiсö асланыс местаö. Сэк вöлись Ильинов син одзын и оссис быдсöн картинаыс да сiдз, бытьтö лöсьöтчис шогмыны эшö мöдöтпырись. Повзьöмувья, эшö синнэсö осьтöдз, зонка чепöссьыштiс аслас местаись, дзик öнi вöлись мöдiс уськöтчыны пышшыны. Сы коста жö зубыта вартiс коккес кузя. Зубытсяняс Ильинов перыта осьтiс синнэсö, видзöтчис. Палатаас одззамоз вöлi лöнь. Некытшöм паровоз тальны сiйö эз ни думайт, и повны этаись эз ков. Кыдз медодзза садясьöм бöрсянь, Ильинов вились пымалiс люзь. «Дак вот, сiдзкö, мый мекöт лоис. Поездыс люкалiс. А мый жö сыкöт аскöттяс? Торпедаэскöт? Быдöс эд ны увья». — А недыр мыйись одзлань: «Да нем, натьтö, ныкöт умöльыс эз ло, кольччи кö ме ловйöн. Эд лоны кöбы мый ныкöт, дак вежöртана — меись сэтöн и ва места бы эз кольччы. Сiдзкö, быдöс бур».

Грузыс понда Ильинов лöньсис. Нельки думаыс эта йылiсь одзлань кежö сы юрись петiс. Но миритчыны коккес чеглалöмкöт зонка некыдз эз вермы. Эд эшö удерлун, эта жö кадö, сiя вöлi здоров, кыдз и быдöнныс, ветлöтiс аслас коккез вылын. Не сэк, кöр лöсьöтчис пост вылö, не сёрöнжык, кöр сулалiс эллинг бердас, Ильиновлöн и дума эз вермы лоны сы йылiсь, что асывнас ни сiя оз вермы бертны казармаö, аслас ёрттэз коласö, а вот сiдз вот, нач видзчисьтöг, чеглалöм коккезöн да бырöм садьöн сюрас госпитальö. Да и вермис я лоны одзлань эта йылiсь думаыс, кöр природаыс абу сетöм мортыслö сiйö колана чувствосö, кöдöн одзлань бы позис кывны, вежöртны да тöдны, мый бурыс нето умöльыс видзчисьö сiйö одзланься оланын.

IX

Öддьöн сьöкыт вöлi терпитны зубытсö луннас. Но терпитны сiйö ойнас вöлöм эшö сьöкытжык. Эта зубытсянь эз позь вöрöтчыны, эз позь сайöвтчыны нето пышшыны. Эз судз и вын, мед кöть час, кöть минута кежö вунöтны сы йылiсь. Ильинов вынсьöтчис лöньсьыны. Но кыдз бы зонка эз мырсьы, кыдз эз пондыв бöбöтны асьсö, мед только не кывны коккез бердiсь зубытсö, керны сымдасö некыдз эз вермы. Одззамоз дугдывтöг нiйö сё сотiс, чушкис, сöскис, пидзыртiс. Мукöд коста зубытсяняс зонка пымавлiс сэтчöдз, что паськöмсö вывсис кöть пидзрав. Пымалöмыс вылö сэтöн жö пондывлiс кынтны, да сiдз, что и оча пинь эз сибав. И позис кöбы, Ильинов готов вöлi öнi жö разьны, перкйыны, йирны пиннезнас коккес бердiсь гипс, мед дзир адззыны, кутны да кыскыны сы увтiсь зубытсö. Но зубытыс — не жель, кöдо позис бы кошшыны, адззыны да кутны киöн. Сiйöн зонка гирчыктiс пиннезнас, курччалiс тырппесö, горöн ружтiс да кадiсь кадö öвтышалiс ньылöмсö, кöда, кыдз анькытш, гырись да кöдзыт воттезöн дугдывтöг визывтiс чужöм пасьта. Думайтсис нельки, что эта вöвлытöм зубытыс, кöда дзик лякасис сы коккез бердö, некöр оз ни чулав, сiдз век кежö и кольччас ныын. Ойбытнас сыкöт мырсьытöн, асыв кежас Ильинов сэтчöдз мыдзлiс, кыдз бытьтö неделя сьöрна дугдывтöг сёртiс из.

Вöвлi кö мыйсянь невночка кокнитжыкыс, дак уколлэзсянь да таблеткаэзсянь. Но и нiя пальöтлiсö зубытсö недырик кежö. Час кыным бöртi нiйö примитöм бöрсянь вились пондöтчывлiс сiя жö важыс. Сiдз чулалiсö госпитальын садясьöм бöрсянь медодзза лун да ой. А эта бöрсянь сэтшöм жö кузя да сьöкыта и мöдiк, и куимöт — быдсöн неделя.

Павжун бöрсянь госпитальын, кыдз и частьын жö, — шоччисян кад. Неважын примитöм уколлэзсянь да юöм лекарствоэзсянь коккезын зубытыс невночка лöньсьыштiс. Вынсьöтчис лöньсьыны и ачыс Ильинов. Вель дыр зонка куйлiс куньöм синнэзöн, а бöртiжык, кыдзкö казявтöг ни, сё жö ланьтiс.

Первуись эта лунö зонка адззылiс небасöк, нельки полöтанакодь вöт. Арся кымöра кадö Ильинов бытьтö бы вöлi гортiсь местаэзын. Мунiс зонка öтнас кытшöмкö тöдтöм да пемыт вöрöт, тöдтöм жö да чуть тöдчана туёк кузя. Недыр мыйись туёкыс öшис. Кошшисьтöнняс ни Ильинов сюрис эшö пемытжык да гажтöмжык местаэзö, и мымда бы одзлань эз гöграв öштöм туёксö, сэсся сiдз и эз адззы. Медбöрын, атшавтöдз мыдзöм да люзь пымалöм, сiя панталiс ошöс. Зонка пондылiс бы чепöссьыны, мед пышшыны, но повзьöмувья му бердас лякасьöм коккесö калькöтны некыдз эз вермы. А сiя кадö ошыс, морт моз шыннявтöн, сибöтчис зэв, пондiс шамравны лапанас сылiсь пельпонсö. Пельпонын зубытыс мылякö эз кыв. Медодз сiя сибалiс коккезöдз, кöдна öнi пидзöсви ни вöлiсö му пытшкын и кыскыны кöднö сэтчинiсь бöр эз судз некытшöм вын. Эта вылын Ильинов и саймис, паймыштöмкодь полöтана вöтсянь, перыта осьтiс синнэсö. Сэк вöлись зонкалö быдöс лоис вежöртана. Койкаэс коласö сувтöтöм стул вылын пукалiс сылöн ёртыс, Макаров Толя.

— Здорово, Вася! Мый нö сы дырна узян? — шутитöмöн горöтчис Макаров, сэтöн жö казялiс, что шуткаыс висьталöм не ас кадö.

— А, Толик, здорово, — гажöн, нельки дивуйтчöмöн, шыасис паныт Ильинов, а одзлань, вежсьыштöм голосöн ни, дзик сы вылын и былись сералiсö: — Дыр ни разь?

— Да не-е, — тэрмасис веськöтчыны Макаров. — Ме эд дзир шутитöмöн сiдз горöтчи.

— Онмöссиссьöм кыдзкö талун, — сё эшö одззася кодь голосöн, дзик дорйисьöмöн, горöтчис Ильинов. Эта бöрсянь мыйкö дырна кежö кыкнанныс лöньсисö.

Ильиновыс доймöм бöрсянь ёрттэз эз пантасьлö быдса неделя сьöрна. Öнi, кöр пантасисö, кыкнанныслö вöлi охота юасьны-висьтасьны быдöс йылiсь. Но Макаровлöн шутка местö горöтчöм кыввес вель дыр кежö дзугисö ны коласын баснисö. Чöлöмыс тожö эз отсав. Сiя дзир вынсьöтiс ёрттэз коласын недолытсö, сайöвтны кöдö öтамöд коласын одзлань эз ни позь. Этасянь и думайтсис: пантасисö ас коласын кык важся недруг, мед миритчыны, а некöдыс ны коласiсь эз мöд пондöтны керны сiйö одзжык мöдiкся. Ильиновлö эстöн вились усис тöдвылас одззася думаыс: кыдз примитiсö да мый думайтöны сыкöт лоöмыс йылiсь ёрттэс. Но öнi эта йылiсь баснисö сiя пондöтнытö эз ни лысьт: вöлi недолыт. Зонка дзир гажтöма ловзисис ас кежас, öвтыштiс кымöс вывсис сöдзöм ньылöм воттесö.

Макаровлö жö ёртыс одзын недолыт вöлi сысянь, что не одзжык, умöль юöр коста, не öнi, кöр Ильинов сюрис госпитальö, сiя немöн эз вермы отсавны сылö, а шутка местö горöтчöм кыввес пöрисö обидаö. И вöлись сэк, кöр лэбтiсьöм жар увья Ильинов корис ёртсö кисьтны стаканö ва, Макаров нюжöтчис графин бердö, юалiс:

— А куритнытö тэнат татöн мыйкö эм, абу?

— Абу, Толик, да кытчöдз оз и ков. Оз позь палатаас куритны.

— Вот кыдз, — дивуйтчыштiс Макаров, сэк жö кыскис кармансис кынымкö пачка «Беломорканал», пуктiс Ильинов тумбочка вылö. — Вот. Куритнытö оз сетö, дак кöть видзöтлан.

— Спасибо, Толик.

— Да нем понда, — шыасис Макаров, а одзлань пондiс кыскавны аслас зеппезiсь да тэчны тумбочка вылö сахар, ви, колбаса.

— А этö эшö мыйлö? Татöн тшыгйöн оз видзö, вердöны.

— Тэ эн думайт, что этö ме быдöс ассяням. Этö катер вылiсь командасянь, быдöс ёрттэзсянь, сiдзкö.

Эта бöрсянь вöлись кыкнанныслöн кыввезныс дзик пöрччассисö.

— Висьтась, кыдз да мый тэкöт сэк пост вылас, — корис Макаров, ачыс бытшöмжыка пуксис стул вылö, лöсьöтчис кывзыны.

— А мый сэтöн, Толик, висьтасьнытö? Изыс увья эд быдöс кашаыс пусис. Кылi эд ме сылiсь усьöмсö, эг тöд дзир, мый весьтын, нем жö пемытiнас эз тыдав. Позис разводящöйлö звонитны, тревога нельки лэбтыны, но эг кер не öтсö, не мöдсö. Висьтала — эг адззыв синнэзнам, мый ыжда сiя вöлi, а что самöй насыпь вылас, рельсаэс коласын, дак эта меным и юрö эз пыр. Да и кысь вöлi тöднытö, что сiя ойö, кыдз нарошно, базаас грузыс локтас? Не быд лун жö овлö сэтшöмыс. А кöр пондiс сибöтчыны поездыс да югдöтiс туйсö, сэк вöлись и вежöртi, мый эстöн вермас шогмыны.

Эстöн Макаров видзсьынытö сё жö эз вермы, одзасьöмöн юалiс:

— И эн повзьы? Тöдiн эд, натьтö, мый вылö мунан?

— Вежöртан, Толик, некöр вöлi сэк эта йылiсь думайтнытö. Полi ме ас понда или эг — ог тöд. Вежöртi дзир öтiкö: не сувтöтны кö аскадö поездсö, ловйöн кольччöм йылiсь думайтны вöлi нем. Ачыт эд, натьтö, вежöртан, мый вермис лоны эта грузкöт. Вот сы понда и полi.

— Да-а-а, — юрнас öтмöдöрö öвтыштöм коста нюжвылöн шыасис Макаров. — Счастливöй тэ сё жö, Вася, морт. Тэныт öнi, кыдз ме видзöта, дак мукöдыс нельки завидуйтны пондiсö.

— Завидуйтны, шуан? Меным? — дивуйтчöмöн юалiс Ильинов, — А мыйлö бы, интересно, сэтöн завидуйтнытö? Не сылö я, что коктöмсялi да госпитальын быгляся? Нем он висьтав, эм мыйлö...

— Ась кытчöдз и сiдз, но...

— Да кытшöм эшö, Толик, сэтöн но? Весь, ме думайта дак, тэ сiйö баитан. Не сэтшöм кокнит да гажа менам талунся положеннёыс, мед сылö завидуйтны. Усис бы кинлö сэтшöммес коласiсь терпитны этö зубытсö, нач бы мöднёж думайтiсö.

— Ась, батi, ме не сiдз горöтчи. Ме ачым вежöрта, — нем завидуйтанаыс тэ положеннёын абу. А что ми быдöнным öддьöн радöсь тэ понда, что ловйöн кольччин, дак эта быль.

— Вот эта понда спасибо. Ме и ачым эталö рад, кöть радуйтчынытö часöт öддьöнсö эшö оз позь. Öнöдз эшö некин оз тöд, сувта, ог ме бöр коккез вылö.

— А кыдз сё жö нiя тэнат?

— А вот, — подушка бердсянь юрнас качыкнитöмöн Ильинов мыччалiс одеялоöн вевттьöм чуркаэс вылö. — Кытчöдз, висьталöны, аскöттям. А вот кыдз да мый ныкöт, нем ог вежöрт. Кыла, кыдз дугдывтöг, дзик биа шоммез вылын, сотö-палитö, а вöрзьöтчан невна казявтöг ольпась вылын — топ кералöны. Неделя сьöрна ни эд татöн, а эта коста, натьтö, и öтiк ой мымда эшö эг узь. Зубытöсь, кывзы, Толик, и не висьтавны.

— Да уж тöдчö чужöмыт сьöртi. Вель дыр эд, натьтö, татöн быглясьнытö ковсяс?

— Кин сiйö тöдö. Ась уж кöть мый дырна, сувтны бы только.

— А гортö кыдз юöртiн?

— Да некыдз кытчöдз. Думайта вот ас кежам, кыдз сiйö керны. А, батi, оз и ков сымдасö? Уна я этасянь мамöлö гажыс лоас?

— Сiя даки сiдз.

Чöлыштiсö. А одзлань Ильинов горöтчис:

— Висьтась, мый тiян сэтчин вильыс?

— Вильыс миян тыр. Эм охота кывзыны, öтi-мöдiкö позяс и висьтавны. Эн на эд, натьтö, вунöт, кыдз тулыснас бухтаас ледоколыс пыралöм бöрсянь Панов Володькаыс йыэс коласiсь черикыйиссесö кыскалiс? Чуть тай эшö и ачыс эз вöй...

— Эг, конешно. Эта бöрсянь эд сы дырна санчастяс и куйлiс.

— Дак вот, öнi эта понда сылö медаль сетiсö.

— Медаль нельки? Бур.

— А эшö Сашка Черкасов талунсянь вились отпускö мунö. Билет ни небис и документтэз туй вылас сетiсö.

— Дак сiя жö нач неважын отпусксяняс бертiс, — дивуйтчöмöн горöтчис Ильинов. — Джын год эшö эта бöрсянь эз чулав да...

— Несчастье сылöн гортас ыджыт шогмöм, вот и корöны. Телеграмма срочнöй локтiс. Тэ жö тöдан, сiя служба вотöдз гöтыра вöлi. А öнi сытöг иньыс автомобильнöй катастрофаö сюрöм.

— Да-а-а. Жаль, конешно, Сашкасö, — шыасис Ильинов.

— Сiдз вот, Вася. Сэтшöм, видзöт жö, гажа мывкыда зонка, а гозъя оланыс, кыдз нарошно, эз лöсяв. Год мымда эд только и кольччис служитнытö — и на тэныт. — Макаров гажтöмакодь гогинялыштiс юрнас, кыкнанныс недырик кежö лöньсисö. А одзлань сiя жö бöра кыскис пытшкись карманiсь унапöв куснялöм газета, нюжöтiс сiйö ёртыслö, öткоста горöтчис:

— И вот эшö мый миян бурыс, верман тöдсасьны.

Ильинов босьтiс ёртыс киись газета, паськöтiс сiйö ас одзас, дзар керыштiс медодзза страница вылö, повзьыштiс. Печатайтöм фотография вывсянь сы вылö видзöтiсö сылöн жö, Ильиновлöн, синнэс. Сорасьны нето не веритны эталö öнi эз ни позь. Эта сы понда вöлi сэтшöм видзчисьтöм, что медодз зонка нельки öшис: эз тöд, кыдз сiйö примитны. Ильиновлö пондiс кажитчыны, что то ли сiя кинöскö, то ли сiйö кинкö бöбöтлiс. Этасянь лоис недолыт не только Макаров ёртыс одзын, но нельки ас одзас.

— Этö эшö мый вылö?

— Мыля жö, Вася... Этатшöм поступок и мед некин эз и тöд?..

— Да мый ме нарошно я мый я сiйö кери? Нарошно поездыс увтö уськöтчи? Да? Эта жö... Кыдз бы тэныт сэтöн висьтавны... обстановка сэтшöм, обстоятельствоэз сiдз зорамисö. И ковсис кö меным сымдасö, дак нач не сы понда, мед эта йылiсь газетаэзын гижисö.

Ёртыслiсь обидитчöмсö Макаров вежöртiс, споритны одзлань эз понды.

X

Бытшöма, тыдалö, тöдiс ассис уджсö корреспондент, кöда гижис Ильинов йылiсь флотскöй газетаас. Не кузя, но пыдын чувствоöн вöлi висьталöм сы состояннё йылiсь паныт поездыслö уськöтчöм коста. Позис думайтны, что сiя кадö гижисьыс вöлi кытöнкö ордчöн, быдöс, мый шогмис, адззылiс ас синнас. Но кыдз бы сэтчин эз вöв, гижöмыс Ильиновлö эз гленитчы.

Чужöм да быдмöм айтöг сьöкыт война годдэзö, деревенскöй отир да сьöкыт удж коласын, зонка учöтсянь эз велав, мед сiйö мыйкö понда ошкисö. Сэтчö жö неважынся проступокыс, кöда увья вит сутки сьöрна ковсис джендöтны гауптвахтаын, вунны тöдвылiсь кытчöдз эз ешты, и эта увья вöлi недолыт.

Эз гленитчы эшö и сiйöн, что поступокыс, кöдö сылö ковсис керны пост вылын сулавтöн, кыдз лыддис ачыс Ильинов, вöлi не сэтшöм уж геройскöй, мед сы йылiсь гижисö. Мый ковсис керны Ильиновлö, сы местын сiйö жö вермис бы керны и быд мöдiк матрос, сiдз кыдз не керны этö сiя кадö некыдз эз позь, некытшöм мöдiк петанiн этася эз вöв. Недолыт вöлi эшö и сысянь, что отирыс, кöдналö усяс лыддьöтны Ильинов йылiсь гижöмсö, пондасö думайтны эта йылiсь, кыдз нем туйö пуктана тор йылiсь, сiйöн, что эта бöрсянь зонкаыс ачыс вель дыр кежö кольччис коктöг.

Сiдз думайтiс ас йывсис да аслас поступок йылiсь ачыс Ильинов. Но кыдз газетаас гижисьыс, сiдз и лыддьöтiсь отирыс думайтiсö эта йылiсь нач мöднёж. Печать бытшöма керис ассис удж. Сы одзын сулалан задача вöлi тыртöм. И кыдз только отирлö кывсис Ильиновлöн коктöм положеннё йылiсь, уна ны коласiсь шыасисö паныт. Зонка ним вылö лунiсь лун пондiсö локны сьöлöм бурмöтан письмоэз да открыткаэз. Отир не только гижисö. Мукöдыс ны коласiсь эз жалейтö кад, эз дышöтчö локны госпитальöдз нельки асьныс. Эта вотöдз нач тöдтöмöсь, нiя пыравлiсö зонка дынö палатаас, дзик важся тöдса дынö. Локтiсö не простöн. Быдыс ны коласiсь вайис Ильиновлö ас сьöлöмын бытшöм да шоныт кыв, кöда сы коктöм положеннё коста тожö вöлi аскодьöм лекарствоöн, мед отсавны перытжыка веськавны да сувтны коккез вылö.

Йöз отирлiсь вниманнёсö Ильинов медперво некыдз эз вежöрт. Сылö сё эшö думайтсис, что эта быдöс весь, нем пондаись. Этасянь кыдз письмоэс да открыткаэс, сiдз и отирыслöн вовлöмыс зонкасö унажык дзескöтiсö, ежели гажöтiсö. Медумöльыс жö вöлi сыын, что не пышшыны, не сайöвтчыны сы дынö локтiсь отиркöт пантасьöмись сiя эз вермы.

Сiдз кытшöмкö кресення лунö, павжун бöрсянь, Ильинов дынö госпиталяс вовлiсö соседньöй частись торпедисттэз. Кыдз и Макаров ёртыс жö, зонкаэз — а вöлiсö нiя куимöн — вайисö сылö сьöраныс быдкодь гöстинеччез. Тöдсасьöмныс бöрсянь гöссез мыйкö дырна пукалыштiсö Ильинов дынын, юасисö сы здоровье йылiсь, паныт висьтасисö öтi-мöдiкö асланыс корабельнöй служба йылiсь.

Сёрöнжык, кöр зонкаэс мунiсö, Ильинов лöсьöтiс одзас гижöт да авторучка, пондiс думайтны, кыдз да мый юöртны гортас мамыслö. Кык письмо вылö, кöдна локтiсö сысянь госпиталяс куйлытöн, паныт зонка кытчöдз и öтiкö эз гиж. Но пондöтны мамыслö письмосö Ильинов сiдз и эз ешты. Эта коста коридорас вились кылiсö кинлöнкö горакодь и дзик мыйöнкö тöдса сибöтчан оськöввез. Сiдз быд оськöвсö печатайтöмöн, вермис мунны дзир важын служитiсь военнöй морт. Невна перытжыка, ежели пыр, оссис палатаись ыбöс. Порог вылас нач видзчисьтöг сувтiс ачыс дивизионiсь командир, капитан-лейтенант Лебедев. Ыбöс дынсяняс ни сiя перво жö горöтчис:

— Здравствуй, орёл! Эн на мыдз госпитальнöй койкасö нырыштны?

Ильинов, кöр казялiс командирлiсь палатаас пырöмсö, невночка паймыштiс. Зонка перыта дзимлялiс одзсис гижöт да авторучка, чепöссьыштiс аслас местасянь, дзик мöдiс чеччöвтны кок вылас. Вöрзьöтчöмсянь зубытыс, кыдз и пыр, бытшöма сöздыштiс коккез кузя. Ильинов казявтöг ружтыштiс, горöнкодь гирчыкнитiс пиннезнас, не кывны да не казявны кöдö капитан-лейтенант некыдз эз вермы и сэк жö, кинас öвтыштöмöн, горöтчис:

— Куйлы, куйлы. Не кад эшö тэныт чепсасьнытö. — Капитан-лейтенант сибöтчис зэв койка дынöдз, здоровайтчöм могись нюжöтiс Ильиновлö ассис лывевья, чорыт чуня кисö, дзар керыштiс öтмöдöрö палата пасьта, вештыштiс асланяс матынжык сулалан стул. А кöр пуксис, босьтiс юр вывсис фуражка — шапкасö капитан-лейтенант некöр эз новйы — пуктiс пидзöссэз вылö.

— Висьтась, кыдз овсьö? Кыдз здоровье? Абу гажтöм öтнатлö кадсö джендöтны?

Медперво Ильинов сымда и керис — чöлöмöн жмитыштiс пельпоннэзнас, и дзир бöртiжык паныт горöтчис:

— Оз сетö, ёрт капитан-лейтенант, гажтöмтчынытö.

— Эта бур ни.

— А мый бурыс? Нем ме сэтiсь бурсö ог адззы.

— Мыля жö бы? — чожажык шутитöмöн, ежели серьёзнöя, юалiс одзлань командир. Эта вылö Ильинов шуткатöг паныт висьталiс:

— Сiйöн, что газетанас весь шумсö лэбтiсö.

— Сiдз, сiдз, — унажыксö ас кежас шыасис капитан-лейтенант. — А мыля тэ сiдз думайтан?

— А сiйöн, что абутöмсö кытшöмкö вöвлытöм геройствоö пöртiсö. А кытшöм сэтöн геройство, кöр ме госпитальын чурка моз быгляся? Нем йылiсь, натьтö, вöлi газетаас гижнытö... А öнi эта увья и вузав отирыс син одзын краскатö. Меным сысянь ни, что татчö сюри, некытчö воштiсьнытö. А сэтöн эшö чуть я не быд лун палатаас пырöны, дивуйтчöны, жалейтöны, бытьтö ме и былись мыйкö вöвлытöмö кери. Вежöртат, одö, ёрт капитан-лейтенант, небытшöм меным быдöссянь этасянь, недолыт. — Одзлань Ильинов видзсьынытö, тыдалö, эз ни вермы, басниыс коста кынымиськö вачкис кулакнас аслыс моросас. — Ме жö не учöтик кага, кыла, адзза, вежöрта: быдöс эта ыждöтöм, нарошно керсьö. А этасянь менö сiдз дзескöтö — и аслым кучикам ог тöр. — Кыдз бы зонка эз вынсьöтчы видзсьыны эта басни коста, керны сымдасö сё жö вын эз судз, и сöдзöм синваэз öтпыр-мöдöтпыр югйöвтыштiсö сы син угöввезын.

Ильинов лöньсьытöдз капитан-лейтенант одзлань паныт эз шыась. Зонкалiсь баснисö кывзытöн, сiя сымда и керис, думайтiс ас кежас. А кöр мöдыслöн ассяняс быдöс вöлi висьталöм, сэк вöлись командир быдöс вылö паныт горöтчис:

— Сiдзкö, оз гленитчы, что отирыс осьта сьöлöмöн тэ дынö локтöны? — и ответсö видзчисьтöг, одзлань сэтöн жö: — Дак тэ вашöт, вашöт нiйö дынсит. Эн лэдз палатаас пырнытö.

Командирлiсь шуткаöн горöтчöм кыввесö Ильинов примитiс медперво серьёзнöй басни туйö, гажмыштöмöн перыта юалiс:

— А кыдз ме нiйö вашöта, ёрт капитан-лейтенант?

— Да кыдз верман. Сетав быдöнныслö сивилёнаныс да и дöс сэтöн. Мый тэ эшö ны вылö видзöтан? Вашöт. Игнав палатасис ыбöссö и куйлы öтнат. Сэк тэныт некин одзын оз ло недолыт. Сэк, натьтö, и веськавны перытжыка пондан и коккет вылö чожажык сувтан. Сiдз ме баита, Ильинов?

— Вежöртана — сiдз, ёрт капитан-лейтенант. — Радувья зонка нельки лэбтiсьыштiс гырдззаэс вылö. — Но кыдз ме нiйö вашöта, кöр ачым койка вывсис чеччынытö ог вермы?

― Ах, вот мыйын делоыс! Койка вывсис тэ чеччыны он вермы. А вермин бы, вöлiн бы тэ коккез вылын, дак некин отирыс коласiсь тэ дынö и дуксö бы эз вай. Вежöртан, он тэ сымдасö, Ильинов?

Быдöс, мый вöлi висьталöм Ильинов басни вылö, висьталöм не лöга, не чорыта, а чожажык шутитöмöн. Но öнi зонка казялiс ни, кöдöрö вöлi бергöтöм командирлöн басниыс. Этасянь сiя и паныта кывнас одзлань эз адззись, лöньсис. Но чöлöмыс ны коласын кыссис недыр. Командирыс жö бöра одзлань пондöтiс:

— Вот мый, Ильинов. Тэнчит недолыттö ме вежöрта. Но и тэныт аслыт кад ни бы вежöртны, что аслат поступоклiсь значеннёсö ыждöтöм йылiсь баитан весь. Сiдзкö, эн на ешты быдсöн сiйö вежöртнытö. Баснисит ме öнi тöда ни: быдöс лоöмыс бöрсянь тэныт охота вöлöм кольччыны дзоньöн да здоровöн. Да эстöн и баитны нем. Кыдз тэ понда, сiдз и частись командованнё понда этадз бы вöлi медбур. Но öткоста оз ков вунöтлыны эшö и сы йылiсь, что вермис бы лоны эшö и этася умöльжык, кöда йылiсь тэ ачыт öнi эн ни бы тöд. Вежöртан, Ильинов, мый йылiсь ме часöт тэныт баита? Мый, шуам, вермис бы лоны сэк, керны кö бы тэныт невночка не сiдз, кыдз керин, а кыдзкö мöднёж? Пондiн бы, шуам, сы местö, кöр казялiн поездлiсь сибöтчöмсö, звонитны разводящöйлö, лэбтiн бы тревога, чукöртiн сiя местаö быдöс личнöй состав, а асьсö поездсö эн сувтат. И сэк... Вежöртан, он, кытшöм каша бы вермис пусьыны? Эд эта йылiсь нельки öтiк думасянь юрси кышöпöн сувтö. Висьтав спасибо, что ловйöн кольччин. Талун эта öддьöн ни бур. А что коккеткöт сiдз шогмис, эн пов, сувтöтасö. Ме часöт врачческöт баитi ни, и полöтанаыс, кыдз юöртiсö, нем абу. Сiдзкö, и газетаыс вылö обижайтчан весь. Весь дзескаман и отирыс пыр. Тэ кытчöдз коктöм. А эд быдыслö вежöртана, что госпиталяс куйлыны гажыс етша. И висьтав спасибо нылö, кöдна тэнчит талуння положеннётö вежöртöны тэсся буржыка, гижöны да локтöны, мед кöть невночка гажöтны тэнö эта сьöкыт кадö. И эта йылiсь тэныт думайтны нем. Думайт сы йылiсь, кыдз чожажык сувтны коккез вылö. Этася унажыкыс талун тэсянь оз и ков. Вежöртiн, Ильинов?

― Да, вежöртi.

— Вот и бур. Эта вылын и баитчим. А öнi верман шоччисьны. — Капитан-лейтенант сувтiс, эшö öтпырись нюжöтiс Ильиновлö кисö.

XI

Веськöтiс Ильиновöс госпитальын пöрись военврач-хирург подполковник Хромицкий, кöдалö, кыдз кывсис эта вотöдз отирыс басниись, эшö война коста усьöм унаöс сувтöтны коккез вылö. Отсалiсö сылö этаын ассиныс уджсö бытшöма тöдiсь да радейтiсь медсестраэз.

Госпитальын куйлытöн Ильиновлöн адззисисö уна виль ёрттэз да тöдсаэз. Вöлi кинлö гижны, кинкöт сёрнитны да мый лыддьöтны госпитальнöй библиотекаись. Эта кадö Ильинов тöдсасис унася-уна быдкодь произведеннёэзкöт. А сэтшöммезö, кыдз «Настоящöй морт йылiсь повесть» да «Кыдз калитчис сталь», зонка лыддьöтiс нельки неöтпырись, дзик этна книгаэз сьöртi лöсьöтчис экзаменнэз кежö. Мымдакö эта и былись вöлi сiдз. Эд Ильиновлö сiдз жö, кыдз и Мересьевлö да Корчагинлö, ковсис пуктыны неетша вын да мыла, мед вились вермыны сувтны коккез вылö, стройö, лоны öтлаын аслас ёрттэзкöт. Эта сувтöмыс вöлi сы понда тожö аскодьöм экзамен.

Госпитальын куйлытöн кад весись эз чулав. Сiйöн некыдз эз позь думайтны, что Ильиновлö мыйкö оз тырмы, мыйсянькö вермас лоны гажтöм, мед веськавны да перытжыка сувтны коккез вылö.

Но тырмис зонкалö и былись не быдöс, и былись вöвлi гажтöм. А эз тырмы сiя медвына да медколана торыс, кöдöн öтiкöн позис бы вежны уна öтi-мöдiкö быдöс тырмансис. Эта торыс, вöвны кö бы сылö Ильинов оланын, вермис бы шонтны, гажöтны, лэбтыны настроеннё да сетны вын сiдз жö, кыдз сiйö керис быдöс тырманаыс. Сэтчö жö, сылöн вöлi эшö öтiк аскодьöм черта — позис кö сiйöн вежны öтi-модiкö быдöс тырмана коласiсь, то асьсö сiйö вежнытö немöн эз позь. Эта увья и кольччис Ильинов сьöлöмын öтiк пустöй пельöсок, кöда дугдывтöг доймис, топ пуртöн бытшкöм рана, гажтöмтiс аслас доймöмöн, тшыкöтiс настроеннё, мырддис он. А вöлi эта нетырман торыс — радейтöмлöн чувство, кöда паныта радейтöм коста вермö сетны мортыслö ыджыт гаж да счастье, а сытöг пöрö сэтшöм сьöкыт да лёк шогö, кöдö оз чайтчы веськöтны некытшöм врач.

Сьöкыта чулалiс Ильиновлöн госпитальын медодзза кад. Неделя кык сьöрна ёна жугдiс коккесö, видзсис жар, умöля узьöтiс. Гажтöмыс йылiсь эта коста эз думайтсьы. Но вот зубытыс жагвыв пондiс лöньсьыны, жарыс усис. И кöр колiс бы только веськавны, пондiс сетны тöдны ас йывсис колана морттöг гажтöмтчöм.

Кокнитжык вöвлi луннас, кöр позис гижны да лыддьöтны, баитны сестраэзкöт, няняэзкöт да сы дынö вовлiсь отиркöт. Думайтны мыйкö мöдiк йылiсь кад эта коста эз вöв. Но сибöтчывлiс рыт. Лöньсьывлiс палатаись ыбöслöн дзуртышалöм. Дугдывлiсö кывны коридорсянь дежуритiсь сестраэзлöн да няняэзлöн оськöввез. Сёрöнжык кусöтлiсö палатаись би. Рытся пемытыс топыт шебрасöн каттьывлiс син одзись быдöс тыдаланасö. А узьнытö вöвлi эшö одз, он эз пет. Сы местö юрö и пондывлiсö пырны быдкодь думаэз. И вöвны кöбы нылö буррезöн да гажаэзöн, нiя бурсьöтiсö бы настроеннё, отсалiсö бы кокнитжыка чулöтны сэтшöм жагвыв визывтан да гажтöмтан кад. Но думаэс Ильиновлöн вöлiсö гажтöмöсь. Нiя жö гажтöмтiсö и сiйö асьсö.

Вель важын ни кывсис гортсянь Катяыс мунöм йылiсь. И не чеглавны кöбы Ильиновлö коккесö, не сюрны эта увья госпитальö, адззисис бы, батi, вын, мед этöн каднас вермыны вунöтны тöдвылiсь быдöс важсясö, то ли не лэдзны сы йылiсь думаэсö сэтшöм матö сьöлöм бердö. Но эм морт мывкыдын сэтшöм черта, что сьöкыт кадö сiя, кыдз ылöснас, сiдз и сьöлöмнас, кыкись, куимись вынöнжык кылö да примитö кыдз бурсö да гажасö, сiдз и умöльсö да гажтöмсö. Ылын горт дынсянь, лöнь госпитальнöй палатаас коктöг кадсö джендöтiкö, Ильинов некыдз эз вермы не уськöтны тöдвылас сiйö, мый гажöтiс сылiсь олансö одзжык, кöр сiя вöлi кок вылын, и эз ло öнi, кöр пондiс ковсьыны медöддьöн, нельки кынымиськö öддьöнжык, ежели одзза кадö. Катялöн сьöлöмсянь гижöм письмоэс, вöвны кöбы нылö одззамоз, вöлiсö бы зонка понда медыджыт гажöн, медвына да медколана лекарствоöн. Быдöс этö Ильинов и тöдiс, и вежöртiс бытшöма, эта увья и эз вермы адззыны вын, мед не думайтны аслас одззася любитöм йылiсь. Но öнi зонкалö думайтсис не сымда сы йылiсь, кыдз да мый вöвлi кöркö, а унажыксö — мый кольччис быдöсiсь этаись талун кежö.

Катяыс одззася письмоэзiсь Ильинов бытшöма тöдiс не только сылiсь уджалан местасö, но и уджсö. И колiс дзир зонкалö уськöтны тöдвылас нывкасö, кыдз сiя сэк жö вунöтлiс госпитальнöй палата йылiсь. Думаэс зонкаöс перыта да кокнита вуджöтлiсö сы дынö, гортö, быд пельöсöн учöтсянь сэтшöм тöдса деревняö, кöда кык непаськыт улицаöн вöлi ляпкисьöм-пуксьöм неыджыт юок пöлöн. Öнi тöв, и кын юокыс лым увтсис оз тыдав. Дзир берег дорись паськыт бадь кусттэз мыччалöны, мый весьтöт сiя визывтö. Негырись öшынока керкуэс, кöдна сулалöны вель ылын öтамöд дынсянь, пидзöсви вöйöмöсь бель чочком лымö. Лымыс жö тыртöм керкуэз коласiсь йöррез, и дзир кузя-дженыта кольччöм майöг йыввес гозйöн-гозйöн усьöны öтмöдöрсянь син вылö.

Кöдзыт тöвся асыв. Бытьтö кынмöм öтiк местаö, вылына да вöрöтчытöг öшалö деревня весьтын, кöдзыта вериктан звездаэз коласын, быдса тöлiсь. Сiдз жö вöрöтчытöг сулалöны керкуэс гöгöр кыза куржавитöм пöрись пуэз: кыдззез да тополлез. Руд-чочком, кыдз пар, тшын, кöда петö быд керку трубаись, столбöн моз веськыта öшалö руас.

Югдандорас деревняыс жагвыв ловзьö. Öтмöдöрсянь пондö кывны поннэзлöн вувтöм, подалöн баксöм, ыбöссэзлöн дзуркöтöм да отирлöн ветлöм, баитöм. Кытшöмкö кадö дзуркнитö-оссьö тöдса посöдз ыбöс. Неыджыт сумочкаöн кисой вылас гортсис петö Катя. Нывка лэдзчö увлань, тöдса оськöввезöн перыта иньдöтчö тöдса жö деревня кузя. Сы пимиэз увтын вöснитик да лёк голосöн, дзик горзöмöн-норасьöмöн, дзуртышалö чорыт лым.

Деревня шöрас нывка кежö медпункт ладорö. Посöдз дынас сiя кынымиськö пыркнитö пимиэс бердiсь лым, перыта кайö вывлань, пырö, биасьö. Эстöн лöнь. Бытшöма лонтöм гор бердсянь омöн паськалö шоныт да кöс ру, кöдаын сорлассьöм быдкодь медикаменттэзлöн дук. Асьныс нiя, ыджыт и учöт флаконнэзын, баночкаэзын да коробкаэзын, сулалöны сэтöн жö, стеклитöм ыбöса шкафись джаджоккез вылын. Гор сайись пельöс янсöтöм чочком занавескаöн. Сэтчин öшалан миссян доз бердсянь кадiсь кадö лöня да небыта патькöтö-вотялö тазö ва.

Порог дынас жö нывка чöвтö вывсис пемыт-гöрд рöма тöвся пальто, öшöтö тув вылö. Коксис кыскалöм сьöд пимиэсö сувтöтö шоныт гор бердö. Пимиэс местö Катя кышалö кокас тапочкаэз, пасьталö вылас халат, лöсьöтыштö гор бердын сулалан кушетка, сынасьтöнняс видзöтыштö заборка бердö öшöтöм зеркалоö, пондö лöсьöтны удж кежö колана инструмент.

Недыр мыйись пондöны локны шогалiсь отир. Нывкалöн пондöтчö уджалан лун. А удж сылöн сэтшöм — отсавны, мыйöн да кыдз вермас, шогалiсь отирлö. Эд эта йылiсь сiя мечтайтiс эшö школаын. Кинлöкö нывка керö укол, кинлöкö сувтöтö банкаэз, кинöскö юкталö порошоккезöн да таблеткаэзöн, кинöскö ны коласiсь ыстö районнöй больницаö, врач дынö. Сiдз сылöн и чулалöны павжунöдз час бöрын час.

А вот сiя жö, Катяыс, öнi павжун бöрсянь ни, бытшöма тöбалöм сумкаöн, тэрмасьö подöн мöдiк деревняö, шогалiсь морт дынö. Öтöрас кöдзыт, сэтшöм кöдзыт, что нельки пимиэзын да вуруновöй кыз кеписсезын кикок чирыштö, дзик кöрт бердсянь. Охота шупкыны сьöкыт сумкасö кытчöкö бокö, котöрöн бертны бöр гортö да кайны шоныт гор вылö. Но да позьö я сымдасö? Эд сумкаас нывкалöн колана инструмент да медикаменттэз, и чапкыны кок увтö нiйö некыдз оз позь. Да и бöр бертöм йылiсь, кöр тэсянь видзчисьöны кытöнкö колана отсöт, некытшöм дума лоны оз вермы — нывка оськалö одзлань.

И мымда бы Ильинов эз видзöт аслас воображеннёын Катя вылö, кыдз эз вынсьöтчы адззыны сыись мыйкö вежсьöмö, керны этö некыдз эз вермы. Мыгöрнас и оськöввезнас, шынньöвнас и гажа баснинас сы син одзын нывкаыс кольччис сё сэтшöмöн жö, кытшöмöн зонка тöдiс сiйö уна год сьöрна, кытшöмöс любитiс, а этасянь сё одззакодь донаöн да коланаöн, но...

Вот сiя жö, öнi рытнас ни, тэрмасьöмöн бертö гортö бöр. Но тэрмасьö не аймамыс ордö, кыдз вöвлi одзжык, а Максим Öльöшка ордö: öнi гортыс сылöн сэтöн. И ежели аймамыс дынын овтöн, рытся ештан кадö сiя вермис уськöтны Ильиновöс тöдвылас, лыддьöтны сысянь босьтöм письмо, гажмöм сьöлöмöн пуксьыны да гижны паныт, öнi сiя тэрмасьö дзир сы понда, мед чожажык пантасьны аслас мужиккöт, Максим Öльöшкакöт. Катя сыкöт баитö, лöсьöтö да вайö сёйны, öтлаын пукалö пызан сайын, ветлö киноö, кöдö кыкись-куимись мыччалöны месяцнас, то ли пукалö сыкöт оча ныр, вочлö носкиэз, песлалö сылiсь паськöм, а сёрöнжык кусöтö би, чöвтчö да водö сыкöт öтiк ольпась вылö. И этö сiя, Катяыс? Сiя мортыс, кöдö Ильинов любитiс не öтiк год сьöрна, любитiс сэтшöм ыджыт, вына да сöстöм любитöмöн, ыджытжыкöн, вынажыкöн да сöстöмжыкöн кöдася и лонытö ни оз вермы. Этö сiя, кöда янсöтчиканыс и корис, и кöсйис: «Гиж, Вася. Ми пондам видзчисьны». Этö сiя, кöдалöн чышьянокнас öвтöмыс öнöдз эшö сулалiс Ильинов син одзын. Быдса векыс местö колöм дзир кык год да джын, мед Катя вунöтiс аслас сетöм кыв йылiсь, бергöтчис сы дынiсь. И кöр тöдчöмöн умöльтчöм чужöм вылас, гажтöмтчöм сьöлöмнас, кытчöдз эшö нач коктöм Ильинов вовлiс этна думаэзöдз, зорамöм обида виль вынöн пыкöтавлiс зонкалiсь лов, дзик палатаас руыс эз тырмы. Эта обида гагкöт мырсьöмсянь, мездöтчыны кöдасянь сылöн вын и öнi эшö эз судз, вились кутлiс шог. Вились пондывлiс висьны юр, лэбтiсьлiс жар, то ли кынтiс, а öткоста быдöскöт этакöт бöра пондывлiс жугдыны коккез.

Но аслас обидакöт да шогкöт мырсьöм коста дыр мыйись Ильинов сё жö вежöртiс: кытшöм бы дона да колана эз вöв сы понда кыдз ачыс нывкаыс, сiдз и сыкöт дружитöм, не сыкöт одзланься пантасьöм, не öтласа олöм вылö надейтчыны öнi эз ни позь. Сiдзкö, Катякöт янсöтчöмсö колiс не только терпитны, но и примитны. Колiс адззыны вын, мед вужсорнас нетшкöвтны сiйö сьöлöмись да тöдвылiсь, нетшкöвтны сiдз жö, кыдз этö керис сыкöт ачыс нывкаыс. Вежöртiс öнi Ильинов и сiйö, что кытшöм бы эз вöв сьöкыт да неколана Катякöт янсöтчöм, сы сьöлöмись радейтан чувствосö кусöтны быдсöн да пыр кежö эта янсöтчöмыс оз вермы. Эд öштiс кö мый зонка этöн янсöтчöмнас, дак не сiйö, мыйöн любитiс, а дзир сiйö, кöдö любитiс. Сiдзкö, эта öштöм торыс олансö быдсöн оз кусöт. И кусiс кö Ильинов сьöлöмын Катя вылö одзланься надейтчöм, то оланыс вылö надейтчöмыс кольччис.

XII

Одззамоз дышöтчöмöн чулалiсö лун бöрсянь лун. Но нельки жагвыв чулалан кад керис ассис удж. Ильинов сорасьтöг кылiс, кыдз медбöрья кадö пондiс вынтöмсявны сы коккезын одззася зубытыс, öткоста этакöт пондiс ныжмыны сьöлöмын и обида. И кöть мездiсьны Катя йылiсь думаэзсянь зонка öнöдз и эз вермы, сыкöт янсöтчöмыс важ вынöн эз ни дойд. Нельки ны дружитöмись меддона воспоминаннёэс, кöдна одзжык вöлiсö кыдз лов, öнi жагвыв öштiсö сы понда дон, лоисö нем туйö. Кытшöмкö кадö, кöр Ильинов сё эшö вынсьöтчис сувтöтны воображеннёын нывкалiсь голоссö, баснисö, синнэсö, быдöс местö эта сувтiс не сылöн ни, Катялöн, а Мариналöн. Медперво зонка нельки эз и вежöрт, мый эта сэтшöмыс да кыдз сiя вермис лоны. А кöр госпитальын чулöтöм кад, лун бöртi лун, вöлi уськöтöм тöдвылö, жагвыв быдöс лоис вежöртана.

Эшö сэк, кöр Ильинов только садясис да первуись кылiс сестралiсь рамыник шыасьöмсö, казялiс, кыдз эта шыасьöмсянь, дзик вына да колана лекарствосянь, лöньсьыштiс сы коккезын зубытыс, а нывка вылö öтпырись дзарнитöм бöрсянь зонкалö нельки мыччассис, что öтамöд коласын нiя важын ни тöдсаöсь.

Сiя лунö сестра немöн эз мыччав ассис мыдзöмсö. А, батi, Ильинов аслас коккезын зубытсянь казявнытö сымдасö эз вермы. Кöр нывкалöн чулалiс дежуритан кад, нiя янсöтчисö и былись, дзик важся тöдсаэз.

Сёрöнжык вöлись Ильиновлö кывсис, что сестрасö шуöны небыт да гора нимöн — Маринаöн и что медодзза ойö нывкаыс, топ домалöм, ончиртöг да вешшывтöг пукалiс сы койка дынын, вöдитчис сыкöт, кыдз учöтик кагакöт, мед кöть невночка лöньсьöтны сы коккезiсь зубытсö, уськöтны жар да сетны садясьны: кадiсь кадö меряйтiс жар, керис уколлэз, тэчис компрессэз. И кöр Ильиновлö кывсис эта йылiсь, öтiк сы понда ни зонка лоис радся-рад, нельки эз тöд, кыдз да кытшöм кыввезöн висьтавны сылö эта понда спасибосö. Сестралöн сыкöт вöдитчöмыс ни тырмис, мед öзтыны ас дынö Ильинов сьöлöмын сiйö радейтан чувствосö, кöдатöг сылö вöлi сьöкыт да гажтöм лöнь госпитальнöй палатаас.

Öнi Ильинов вежöртiс ни: кытшöм бы эз вöв сьöкыт сы понда коктöмалöм, эта не пыр кежö. Одз ли сёрöн, коккез вылö сiя сувтас. Олiс жö зонка ас оланiсь сэтшöм кад, кöр любитöмтöг овны оз позь, кöр етша кин оз любит. И сё жö сестра дынö саймöм чувствоись медодзза кадö Ильинов, полiскодь. «Позьö разь ме кодь чуркаыслö думайтны талун эта йылiсь? Эд казялас кö, мыйись мый, этö нывкаыс, вермас и обидитчыны». Сiдз думайтiс зонка ылöснас. Сьöлöмнас жö кылiс нач мöдiкö: сайöвтны нето пöдтыны Марина дынö ассис кыссьöмсö да радейтöмсö öнi сiя оз ни вермы.

Дежуритiсö сестраэз суткиэзöн, кык лун бöртi. Сiйöн Ильинов сорасьтöг, одзлань ни тöдiс, кöр, кытшöм лунö сибöтчас, а кöр чулалас Мариналöн дежуритан кад. И вöвлi кö зонкалö кöр эшö гажтöмкодь, дак дзир сэк, кöр чулавлiс Мариналöн дежуритан смена, и нывкаыс лöсьöтчис мунны гортö.

Мед не сыбурна гажтöмтчыны недырик кежö янсöтчöм коста, Ильинов кошшис, мыйöн бы тыртны сытöг ассис кад. Зонка кутчисьлiс гижны ёрттэслö письмоэз, то ли дугдывтöг лыддьöтiс. Но нельки сэк Маринатöг чулöтöм кык луныс мыччасьлiсо кык неделя кузяöн.

Куимöт лунас, нёль час гöгöр павжун бöрсянь, вежсьывлiсö сменаэз. Недыр мыйись эта бöрсянь жагвыв оссьывлiс палатаись ыбöс, и пыр öткодь лöнь кокшыöн, воöм öмидз рöма векнитик тырппес вылын чуть тöдчана шынньöлöн, порог вылас сувтлiс Марина. Палатаись ыбöсыс оссис-пöднассис шытöг. Но кытшöм бы лöня сiя эз пыр, Ильинов сорасьтöг кылiс сылiсь сибöтчöмсö, кылiс нельки куньöм синнэзöн, онувья, сiдз кыдз сылiсь локтöмсö видзчисис и сэк, узьтöнняс. Мариналöн локтöмыс вежис, дзик ловзьöтiс зонкасö син одзын, перыта вашöтiс сы чужöм вылiсь гажтöмтчан выраженнёсö, а синнэсö тыртлiс гажöн öгралан биöн. И сэк жö шытöг вöрöтчан тырппес вылiсь позис вежöртны сестралiсь нимсö, кöдö сiя шувлiс ас кежас.

Эз куж, эз чайтчы Ильинов сайöвтны нывкаыс син шогья сьöлöм вывсис зорамöм гажсö. Да и кернытö сiйö, кыдз зонка бöртiжык вежöртiс, абу и колöм. Марина не только примитiс Ильиновсянь сылань саймöм радейтöмсö, но и янсöтiс сiйö öтлаын. Позис нельки думайтны, что сестра, кыдз и Ильиновыс жö, важын ни видзчисьöм сыкöт тöдсасьöмсö, и öнi, кыдз и зонкаыс, тожö рад эталö. И кыдз только Марина казявлiс сы тырппез вылiсь ассис нимсö, чöлöмöн да кокнита качыкнитлiс паныт юрнас, бытьтö шувлiс: да, да, Вася, этö ме, Марина.

Палатаас быд локтöм коста сестра кокнитика пуксьывлiс недырик кежö Ильинов койка дорö, юасьлiс:

— Кыдз миян здоровье? Коккез кыдз?

Но эта дженытик юасьöмись Ильинов быд коста кывлiс мыйкö унажык, ежели здоровье йылiсь юасьöм. Эта тожö гажöтiс. Сэтчö жö Марина дырни, кöр сiя вот этадз ордчöн да зэв пукалiс Ильинов бердын да баитiс сыкöт быд коста öткодь рам да шоныт голосöн, зонкалöн некыт не эз вись, не эз доймы. Норасьны сэтшöм кадö вöвлi нем вылö, и паныта ответ местö сiя дзир чöлöмöн öвтышалiс öтмöдöрö юрнас. Сы коста жö сылöн киыс кыссис ни сестраыс учöтик ки бердöдз, мед недырик кежö сибöтчöм коста кывны сылiсь шонытсö, вермыны веритны ас синнэзлö, что эта не вöт, не мечта,—

Маринаыс, кöдатöг зонка сыбурна гажтöмтчис кык чулалöм луннас, — öнi и былись ордчöн. Нывкаыс жö, дзик казявтöг, перыта жмитыштлiс паныт сылiсь кисö, шувлiс:

— Но мый жö?.. Быдöс кö бур, шоччись, веськав. — Сэтöн жö чеччывлiс местаись, лöня саясьлiс бöр палатаись ыбöс сайö.

Петавлiс кö дежуритiкö кад, Ильинов дынö палатаас сестра пыравлiс и рыттэзнас. Сёрнитiсö ас коласын мый йылiсь шедас, но некыдз не сы йылiсь, мый быдса месяц сьöрна ни быдмис да зорамис öтамöд коласын. Да и колiс я эта йылiсь баснисö? Эд быдöсын сыын, мыйын сiдз колiс Ильиновлö, Марина вежöртiс сiйö баснитöг. Госпитальын чулöтöм кадö зонка бытшöма ни ештiс тöдсасьны нывкаыс мывкыдкöт. Баитны аслас радейтöм йылiсь гора кыввезöн Марина эз радейт. Нельки сьöлöм вывсис гажсö да бур настроеннёсö, вöвлi кö кöр сылöн сэтшöмыс, нывка кужис мыччавны да висьтавны ас мознас, баснитöг. Этö колiс дзир адззыны да вежöртны. Дзар керыштас сестра тэ вылö лöня, что и казявны сьöкыт. Но пантась тэ эта коста сы синнэзкöт, ныын шоныта öгралан биоккöт, и висьтавтöг вежöртан, мый керсьö эта коста сы сьöлöмын.

Мый дырна бы эз кыссьы нылöн öтамöд коласын чöлöм, öтпырись петiс сё жö мöднёж.

Сiя лунö Марина вотöдз госпиталяс дежуритiс лöсьытик вывтыра, сэтшöм жö чужöма, томыник сестра Ира. То ли моднöй причёскаэзнас, кöднö сiя вежавлiс лунiсь лун, то ли краситчöм да веклясьöмнас, кöднатöг нывка нельки удж вылын овны эз вермы, Ильинов видзöтiс сы вылö, кыдз кокнит мывкыда морт вылö. Эта дежурство коста Ира лунтыр ветлöтiс пыктöмкодь сина да гажтöм чужöма, вöлi ачыс не ачыс и нельки быдпырся чуклясьöмыс кытчöкö дзик öшöм.

Павжун бöрсяняс Ира вежсис.

Рытнас ни, ештана кадö, палатаас пырис Марина. Сьöрас вайöм порошоккесö да таблеткаэсö сестра пуктiс тумбочка вылö, пуксис. — Висьтась, кыдз миян здоровье? Ог я думайтö сувтны?

— Здоровье вылö, сестра, ог норась. И висьталат кö сувтны - талун жö готов.

— Вот и молодец. Но видзчисьышт, Вася, эшö невночка. Чожа, натьтö, и былись сувтöтам. — Одзлань Марина мыйкö думайтöв-керис ас кежас, лукавöйкодь выраженнёа синнэзöн гажöн да дженытика нёджжöвтыштiс Ильинов вылö.

— Кывзы жö, Вася. Позьö, оз тiян кодь зонкаэслö веритны? Пондöтöм басниыс Ильинов понда вöлi нач видзчисьтöм, кöть

Марина и юалiс не веськыта сы йылiсь. Сiйöн висьтавны эта вылö мыйкö паныт зонка эз тэрмась, дыр мыйись горöтчис:

— Ме верми бы висьтавны ас понда, мöдiккез понда ог тöд.

— А ме не тэ йылiсь, быдöнныс йылiсь юала.

— Дак эд эстöн и сорасьны недыр. Не быдöнныс жö, натьтö, öткодьöсь. Кинлöкö, батi, и былись оз позь, а кинлöкö и позьö.

— А ме вот думайта — оз. Эта увья нельки и тöдсасьны нем вылö. Неколана быдöс эта, бöбöтчана, позьö шуны, и бурсö этасянь видзчисьны нем.

— А мый сэтшöмыс лоис? Мыля тэ, Марина, сiдз думайтан?

— Тэ жö адззылiн, кытшöм талун миян Ирочканым ветлöтö. Горзöмсяняс нельки синнэс пыктöмась.

— Но и мый?

— А сiя вот и эм. Тöдсасис сiя öтiккöт эшö мöйму. Год сьöрна дружитiсö и ылööв, тыдалö, асланыс дружитöмын пырöмась. Служитiс сылöн зонкаыс кытöнкö неылын город дынсянь и вовлiс Ираыс дынö гортöдззас быд кресенняö. Медбöрья кадö нывка пондiс лöсьöтчыны свадьба кежö, а неважын вöлись кывсис, что öнöдз сылöн зонкаыс ештöм петны служба вывсис да нывкаыслö казьмöтчытöг и кывтöм кытчöкö аслас Украинаö. Кошшы, кытöн öнi сiя. Бöбöтлiс нывкасö, öштiс пыр кежö ладсис, да и дöс сэтöн.

Кытшöм вöлi Иралöн тöдсаыс да ны коласын дружитöм, сымдасö Ильинов эз тöд. Сы местö зонка бытшöма тöдiс Марина дынö ассис чувствоэсö. Сiйöн зонка сiдз одзлань и висьталiс:

— Неужто, Марина, тэ думайтан, что зонкаэс быдöнныс öткодьöсь? Неужто думайтан, что быдöс бурыс понда, кöдö тэ меным керин да сетiн эта сьöкыт кадö, паныт эталö ме верма керны сiдз жö, кыдз и Ираыслöн тöдсаыс?

Марина одзын вопросыс вöлi сувтöтöм сэтшöм веськыта, что не видзны сы вылö паныта ответ некыдз эз позь. Этасянь нывкаыс медодз нельки паймыштiс. Сiя перыта сибöтыштiс тырппес бердö чуньсö, негорöн шушкыштiс:

— Чöв, Вася. Ог пондö сэсся эта йылiсь.

Но дугдöтны сэтшöм колана баснисö, кöда вöлись пондöтчис, да эшö сэтшöм неколана местаын, Ильиновлö öнi некыдз эз ни позь. Зонкалö охота вöлi висьтавны быдöс йылiсь, мый чукöртчис медбöрья кадö сы сьöлöмын.

— Быдкодь мортыс, Марина, кыдз миян, сiдз и тiян коласын пантасьлöны, и öтiк морт сьöртi быдöнныс йылiсь думайтны оз позь.

Этна кыввез бöрсянь нывка вежöртiс, что вермис кежöтны зонкасö баснинас невночка мöдöрö, одзлань паныт юалiс:

— Мый, бытьтö и нывкаэс коласын сэтшöммес тожö эмöсь?

— Вежöртана — эмöсь.

— Весь, натьтö, тэ, Вася, сымдасö баитан. Оз тай мыйкö меным веритсьы, мед и нывкаэс коласын сэтшöммес вöлiсö.

— Да нем не весь, Марина. Неважын ме оланын историяыс топ сэтшöм и петiс. Нёль год сьöрна дружитiм. Позис думайтны — не биыс, не ваыс некöр оз янсöтö. А кöр меным служитнытö кольччис год да джын мымда, сiя петiс мöдiк сайö.

— Былись я мый я? Интересно.

Марина дивуйтчöм вылö одзлань Ильинов эз шыась. Öнi вöлись, кöр быдöс йылiсь вöлi висьталöм ни, сылö аслас баснисянь лоис мылякö недолыт нывкаыс одзын. Пондiс думайтсьыны, что керис этö весь. Но да лэдзöм кайсö бöр он ни кут.

Сестра жö медперво мыйкö дырна чöлöмöн думайтöв-керис ас кежас, бöртiжык вöлись горöтчис:

— Но мый жö?.. И сэтшöмыс оланас тожö овлö. И бура, натьтö, керис, мунiс кö тэнат нывкаыт мöдiк сайö любитöмöн.

— Бура, шуан, Марина?

— Сiдз ме думайта.

— Тэ мый, шутитан?

— Да мыля жö бöра, Вася? Некöр эг и думайт шутитнытö.

— Мыля нö сэк сiдз баитан? Ми жö сыкöт томсянь дружитiм. Ме сiйö ас понда меддона мортöн лыдди, надейтчи: кöр берта гортö, öтлаасям и пыр кежö лоам öтлаын. Эд и сiя тожö кöсъясис видзчисьны, кыв меным сетiс. А сiдз кö, то мый жö сэтöн бурыс, что невночка кольччöм кадсö видзчисьнытö эз вермы?

— Да не невночка кадас, Вася, эстöн делоыс, вежöртан, он?

— А мыйын эшö, кöр некытшöм причина этася абу?

— Бöбöтчан эд, Вася, что некытшöм причина абу. Причинатöг некöр да нем оз овлы, этö тэ ачыт тöдан. Тэныт дзир обидасянь неохота сыкöт лыддисьнытö, но причина эстöн эм.

— Ог тö-ö-öд. Нёль год сьöрна дружитiм, некытшöм причина эз вöв, а öнi кыськö бытьтö лоис. Интересно сё жö...

— Да эз любит сiя тэнö, вот мый. Тэ, батi, и былись любитiн, а сiя эз, вежöртан, Вася? Эз. Сiя дзир веритiс тэ чувстволö, но паныт ачыс эз любит. А и любитiс кö, то не сiдз, кыдз вермис да кыдз бы сылö колiс. Эз адззы, сiдзкö, тэын быдöс сiйö, кöда увья мортлöн морт дынö чувствоэс оссьöны быд вынöн. Öнi, тэтöг ни, сiя панталiс мöдiк мортöс и вежöртiс, что сы дынö сiйö кыскö вынöнжык, ежели тэ дынö, что любитö сiйö тэсся буржыка, сiдз кыдз öтiк мортыслö öтвынöн да öткоста любитны кыксö некыдз оз позь. А что сiдз петiс тiян коласын, эстöн нывкасö винитны оз ков. Вежöртан, Вася, ас коласын любитöмыс сэтшöм чувство, кöда не быд коста кывзiсьö морт ылöслö. — Марина сэтшöм интереснöя пондöтiс эта йылiсь баснисö, что Ильинов кывзiс сiйö, топ челядёк, нельки öтпырись сорны эз пондыв. А мöдыс эта коста одзлань баитiс:

— Öнi эта увья тэ, натьтö, и обижайтчан сы вылö, а весь. Висьтав, Вася, спасибо, что сiя аскадö панталiс аслыс колана ёртöс да эз сет сорасьны öтамöдын не тэныт, не аслыс. Тэтöг ни сiя вежöртiс тэ дынö ассис бöбöтчан чувствосö и керис сiдз, кыдз висьталiс сьöлöмыс. Эта öддьöн ни бур. А мый думайтан, петiс кöбы тiян коласын янсöтчöмыс не öнi, а сёрöнжык?

Ильинов шыасьтöг жмитыштiс пельпоннэзнас, пондiс думайтны. Мымда бы зонка эз жугды одзжык ассис юр, мед адззыны причина Катяыс мунöмлiсь, мымда бы эз мырсьы, разьны этö дзугсьöм тшакыльсö öтнас сiдз и эз вермы, öнi зонка кывзiс Мариналiсь баснисö, кывзiс, кыдз сьöкыт задачалiсь решеннё, и жагвыв вежöртiс, что не согласитчыны сы кыввезкöт оз позь. Но и примитны видзчисьтöг оссьöм правдасö зонкалö вöлi сьöкыт. Сiйöн вöлись дыр мыйись горöтчис:

— Ог тö-ö-öд.

— А мый сэтöн, Вася, не тöднытö? Эд пет тiян коласын эта öтлаасьöмныт бöрсянь, а сiдз тожö не етша овлö, сэк уж сiдз и тöд,— не сылö, не тэныт кодя оланыс эз ни бы вöв. Эд любитöмыстöг кык морт коласын бур оланыс некöр оз овлы. Но и янсöтчынытö öтамöдкöт сэк вöлi бы унаöн сьöкытжык. А öнi?.. Öнi кытчöдз сымда и эм, что мыйкö дырна сьöкыт да недолыт сьöлöм вылын. Но быдöс эта чулалас. Адззисис ёрт тэ нывкалö — адззисяс и тэныт.

— Сiдз, батi, Марина, адззисяс. Да позяс разь мöдöтпырись любитны одззамоз, сэтшöм жö ыджыт да вына чувствоöн? Меным мылякö эта бöрсянь пыр думайтсьö, что оз.

— Думайтсьö сiдз, ме вежöрта. Но оланас овлö нач мöднёж, не сiдз, кыдз ми часто думайтам. Позяс, Вася, — колö дзир веритны эталö да пантавны колана мортöс.

— Ме понда колананас вöлi дзир сiя öтнас.

— И тэ веритан эталö?

— Верита, Марина. Не веритны, дак эг бы и баит.

— А весь. Мыйöн тэ верман тöдны, что эта мымда нывкаэз коласiсь и öтiк оз пантась сэтшöмыс, кöдö позис бы сувтöтны ордчöн тэ нывкакöт, кöда вермис бы лоны мыйöнкö нельки сысся буржыкöн?

Лöньсисö. Мариналö охота вöлi кывны, мый висьталас паныт эта вылö Ильинов. Мöдыс жö баснинас öнi, тыдалö, нач падмис, пондiс думайтны. Зонкалiсь чöлöмсö сестра вежöртiс ас мознас, что сiя öнöдз оз верит нывкаыс басниö. А и чöлö кö, дак дзир сысянь, мед не споритны паныт. И сэк Марина мышкыртчыштiс матöжык Ильинов весьтö, дзар керыштiс аслас лöнь да шоныт югöра синнэзöн веськыта сы синнэзö.

— Кывзы жö, Вася... А вермин бы тэ меным висьтавны... — Эстöн Марина лöньсьыштiс недырик кежö, и дзир синнэс, сэтшöм лöнь да шоныт югöра синнэс, сё одззамоз веськыта видзöтiсö сы вылö. — Вермин бы висьтавны, мыйöн, шуам, ме умöльжык тэ нывкася?

Эстöн Ильинов нач öшис.

Кывны бы сылö этнö жö кыввесö Ирасянь нето эшö кинсянькö мöдiксянь, нем унажыксö, кокнит мывкыдся, ныын зонка эз бы адззы. Но висьталiс нiйö Марина, кöда некыдз да немöн Катяся умöльжыкöн эз вöв. И öнi этна кыввес сiдз гажöтiсö, что медперво Ильинов нельки эз тöд, кыдз да мый горöтчыны паныт. Былись эд. Позис разь сы бокын пукалiсь сестрасö, сы рам голосöн, шоныт югöра синнэзöн да сэтшöм небыт сьöлöмöн, кöдна сымда ни вайöтiсö сылö, Ильиновлö, гаж да счастье, лыддьыны мыйöнкö умöльжыкöн Катяся? Некöр и некöр эз. Сiйöн Ильинов перыта кутiс Мариналiсь учöтик кисö, жмитiс морос бердас, гажöн тырöм синнэзöн паныт сы вылö видзöттöн, висьталiс:

— Сестра. Марина. Немöн, немöн, немöн.

— Эшö тэ меным он верит?

— Верита, Марина, верита, сестра.

— Но вот и бур. А öнi шоччись. Дыр ни ми тэкöт талун... — Öнi вöлись Марина чеччис, иньдöтчис петанiнлань. Ыбöс колассяняс ни сiя кусöтiс палатаись би, эшö горöтчис:

— Бур он тэныт, Ильинов.

Сестра мунiс. Ильинов кольччис öтнас. Но сылö öнöдз эшö кажитчис, что Маринаыс пукалö сыкöт ордчöн, что сiя сё эшö кылö нывкалiсь голоссö, ас бердас сылiсь шоныт ловшысö, ас вывсис сы синнэзлiсь лöнь югöрсö. Маринакöт рытсö чулöтöм бöрсянь, сыкöт бытшöм баснисянь юрö дугдiсö пырны сьöкыт да гажтöм думаэз, дугдiс пидзыртны одззася обидасянь дойман сьöлöмсö.

Öшыннэз сайын, ойся пемытас, норöн да гажтöма увгис тöв. Сiя, кыдз вермис, нёкралiс пуэзлiсь куш да кын уввесö, сорлалiс песоксорöн лым да чажгис сiйöн öшын стеклоэз бердö. А Ильинов кывзiс тöвлiсь кышöтöмсö и сылö кажитчис, что бертiс тулыс, усьö гырись да шоныт зэр, колö дзир чулöтны ойсö и ашын асывсянь öшынöттяс позяс казявны, кыдз вежöтö öтöрас луд, визывтöны гудыр шоррез, сьылöны кайез, а унася-уна оссьöм цветтэз быд рöмöн öгралöны тулысся шондi югöррез увтын.

XIII

Госпитальын Ильинов оланiсь кыдз бытьтö эз позь казявны некытшöм вежсьöм. Одззамоз лун бöрын лун зонка джендöтiс чеччывтöг. Асыввезнас саймывлiс одз, кöр палатаын биыс эшö эз сотчы. Пемытiнас кернытö вöлi нем. Сiя куйлiс осьта синнэзöн, думайтiс. Сёрöнжык, кöр öзтывлiсö би, Ильинов босьтлiс киас кытшöмкö книга нето журнал, лыддьöтiс.

Палатаас пыравлiс кинкö няняэз коласiсь тазöн да чайникöн. Ильинов миссис. Сестра пыртлiс кытшöмкö витаминнэз да таблеткаэз, кöднö ковсис юны. Лекарствоэсö примитöм бöрсянь вайлiсö сёйны. А недыр мыйись пондöтчывлiс врачлöн обход. Врачыс мунöм бöрсянь Ильинов вились куйлiс-думайтiс, куйлiс-лыддьöтiс да куйлiс-гижис письмоэз кинлöкö аслас ёрттэз коласiсь. Сiдз сибöтчывлiс павжун, а сэтчин сэтшöм жö куйлан-шоччисян кад, кöдасянь зонка мыдзис ни, кыдз и аслас шогöтсянь.

Мукöд лунö сы дынö госпиталяс вовлiс кинкö ёрттэз коласiсь; частожыксö сё сiя жö Толя Макаров нето Витя Зырянов, кöда местö Ильинов сувтiс сэк пост вылас. Ныкöт басни коласын кадыс визывтiс перытжыка. Сибöтчывлiс ужин, а сы бöрсянь вились нiя жö думаэз, книгаэз, письмоэз. Сiдз жагвыв и джендамис кад одз асывсянь и сёр рытöдз.

Сьöкыт пантавны том отир коласiсь сэтшöм лöнь мывкыда мортöс, кöдалöн бы неделя нето кык бöртi эз быр мыла госпитальнöй режимсянь, да эшö сэк, кöр шогалiсьыс, дзик домалöм, лун и ой куйлö чеччывтöг, кыдз эта вöлi Ильиновкöт. А койка бердö домалöмкодь положеннёыс — мöдiк сэтшöм жö шогöт, кыдз и чеглалöм коккес, миритчыны кöдакöт тожö абу кокнит. Эта вылö колöны сымда жö вын да мыла, кыдз и шогöтыскöт пессьöм вылö.

Ас оланiсь быдöс бурсö и умöльсö Ильинов примитлiс зэв матö сьöлöм бердас, и шуны сiйö равнодушнöйöн да лöнь мывкыдаöн некыдз эз позь. Öтiк госпиталяс шедöмыс ни лоис сы понда сэтшöм жö сьöкытöн да неколанаöн, кыдз и чеглалöм коккес. Вöлi бы унаöн буржык, усис кö бы Ильиновлö быдсöн госпитальын чулöтöм кад коста шедтыны из, ежели куйлыны чеччывтöг лöнь палатаын.

Но вот Маринакöт сёрнитöм коласын чулалiс рыт. И кöть чулалiс сiя перыта да казявтöг, дзик вöт, эта рытыс вель дыр кежö кольччис Ильинов тöдвылын. Да и кольччис я только? Сiя рытö нывкакöт матöжык тöдсасьöмыс да ны коласын басниыс перыта вежисö зонкалiсь одззася сьöкыт да гажтöм состояннёсö. Сэтчö жö сэтшöм рытыс ны коласын вöлi не öтiк. Медодззаыс бöрсянь сiдз жö чулалiсö и мöдiк, и куимöт. И ась этна пантасьöммес немöн эз вачкисьö сэтшöм пантасьöммез вылö, кытшöмöсь вермисö лоны ны коласын, вöвны кö бы Ильиновлö здоровöйöн да коккез вылын, но нельки сэк нiя бытшöма керисö ассиныс удж. Эна дженытик пантасьöммез коласын казявтöг и чулалiс Ильиновлöн госпитальын медбöрья кад. Эна рыттэз коласын и локтiс сэтчöдз, что зонка коккезын одззася зубытыс жагвыв чулалiс. Öнi сiя вермис не только куйлыны, но и пукавны.

Кытшöмкö лунö, обход коста, Аркадий Львович вель дыр кежö сёрмöтчис Ильинов койка дынын, быд ладорсянь пешлiс да видзöтiс сылiсь коккесö. Но сiдз кыдз нiя öнöдз эшö вöлiсö гипсын, кернытö этö кыдз колö эз позь. Сiйöн врач юасис, кыдз чувствуйтö асьсö Ильинов, оз я сылöн кыткö вись нето доймы, оз я сiя мыйкö вылö норась. Но сэк кежö Ильинов коккезын зубытыс чулалiс ни, норасьнытö вöлi нем вылö. Медбöрын Аркадий Львович мыйкö дырна думайтöв-керис эшö ас кежас, висьталiс:

— Пондылам сувтöтны. Тырмас, натьтö, койкасö нырыштны. Марина, кöда эта коста сулалiс сэтöн жö, öзйыштöм синнэзöн дзар керыштiс зонкаыс вылö, дзик горöтчис: «Вася, кытшöм ме рад тэ понда».

Ильиновлöн жö, кöр кылiс басни асьсö кок вылö сувтöтöм йылiсь, öтiк эта юöрсянь ни вынöн öдззис ёткöтны сьöлöмыс. Зонка тожö нёджжöвтыштiс сестра ладорö, кынымиськö гогиньтыштiс паныт юрнас: «Спасибо, сестра, спасибо, Марина».

Врач да сестра мунiсö. А Ильинов, кöда сы дырна ни видзчисис эта коктöмалöмись петöмсö, кольччис аслас ольпасьын. Сiя сё эшö куйлiс гипсуйтöм коккезöн, но думанас вöлi кок йылын ни, ылын, эта госпитальнöй палата дынсянь, аслас ёрттэз коласын.

Вот одз асывнас орсöны «подъём». Быдöнныскöт öтдруг Ильинов перыта куркнитö-чапкö вывсис одеяло, кöмасьö-пасьтасьö, и кынымкö минута бöртi ни петö асывся прогулка вылö. Öтöрас кöдзыт. Вундыштö лэчыт тöв. (Приморьеын погоддяыс быд коста тöла.) Поснит да желля лым мöртчöмöн вачкö чужöмö. Но Ильинов здоров, сулалö аслас коккез вылын, и чеплясян мороз да лэчыт тöв сылö нем туйö. Но эта дзир дума. Былись жö эта дынöдз вöлi эшö ылын, и Ильинов одзлань думайтiс: «Кöр жö, интересно, гипссö разясö? Казьмöтнытö казьмöтiсö, а бытшöмик сiдз нем и эз висьталö. Дыр я мый я эшö ковсяс видзчисьнытö?»

Видзчисьнытö усис недыр.

Обход бöрсянь палатаас вились бертiс Марина, вайис сьöрас костыллез, шутитöмöн висьталiс:

— Вот, Вася. Эна тэнат медодзза отсасиссез. Ны отсöттöг коккез вылö тэ некыдз он сувт.

Мöдiк кадö ны вылö Ильинов и дзар бы эз кер. А öнi зонка видзöтiс костыллес вылö, кыдз кытшöмкö волшебнöй бедёккез вылö, кöдна отсöтöн позяс янсавны койка бердiсь, вермыны сувтны, и полöтiс кö эшö öнöдз мый, дак дзир сiя — быдöс я бур коккескöт? Бытшöма я йитсисö бöр асланыс местаын не öтiк тор вылö чеглалöм коскаэс? Видзасö я ны вылö сувтöмсö? Оз я пондö доймыны? Вайöм костыллесö Марина сувтöтiс Ильинов койка бердö.

— Видзчисьышт, Вася, невночка, часöт нуöтам.

— Талун ни, Марина?

— Да часöт, висьтала ме тэныт.

— Ура! Коккез вылын! — эз вермы видзсьыны радувья да горöтiс Ильинов. Сiя перыта пуксис койка вылö, дзик учöтик кага, пондiс зыркйыны-чеччавны бöр вылас.

— Чöв тэ, эн горöтлы. Кыласö эд коридорас.

Но лöньсьöтны Ильиновöс эта кадö сестралöн öлöмыс эз ни вермы, öнi зонка готов вöлi и сьывны, и йöктыны, и чеччавны, кыдз учöтик челядёк, и керны мыйкö эшö уна-уна сэтшöмö, кытшöмö позьö керны здоровöй мортлö.

Недыр мыйись вились оссис палатаись ыбöс, пыртiсö тележка.

Сё эшö йöз отсöтöн койкасö Ильинов колис.

Мыйкö дырна ковсис видзчисьны перевязочнöйын, кытöн врач да сестраэз вундалiсö гипс, мынöтiсö сiйö коккез бердiсь. Мед кыдзкö вермыны лöньсьöтны сьöлöмлiсь бöбмоза ёткöтöм, Ильинов куйлiс куньöм синнэзöн, вынсьöтчис нем йылiсь не думайтны. Но и эта öнi отсалiс етша ни. А сьöлöмыс зонкалöн ёткöтiс сэтшöм вынöн да горöн, что этö сiя кылiс нельки пеллезнас.

И вот сьöкыт гипс коккез бердiсь мынöтöм. Керисö массаж. А сыбöрсянь нiйö кокнита каттисö бинтöн. Видзсьыны одзлань Ильинов сэсся эз ни вермы, юалiс:

— Мый, быдöс?

— Быдöс, Вася, быдöс. Пондыв. Сувт, - шыасис паныт Марина. Эта бöрсянь позис видзчисьны, что часöт Ильинов чепöссяс-сувтас коккес вылö, радувьяс уськöтчас йöктыны. Но сестраыс тшöктöм бöрсянь зонка мылякö эз чепöссьы, одззамоз кольччис куйлыны кушетка вылын. Мый дырна видзчисис Ильинов этö кадсö... Но öнi, кöр сiя и былись сибöтчис ни, зонка вдруг повзис. Сылö öнöдз эшö эз веритсьы, что позьö и былись сувтны коккез вылö, кöдöрöкö мунны.

— Мый, былись, Марина?

— Вежöртана — былись. Оз я мый я веритсьы?

«Былись, былись», — бергалiс Ильинов ылöсын сестралöн паныта шыасьöм. «Бы-лись, бы-лись», — вынöн да горöн ёткöтiс моросас сьöлöмыс. А Ильинов куйлiс сё одззамоз и некыдз эз лысьт вöрзьöтчыны аслас местаись. Зонкалöн волнуйтчöмыс эз чулав.

Сьöкыт висьтавны, вежöртiс я кинкö ны коласiсь, кöдна сулалiсö Ильинов гöгöр да видзчисисö сылiсь сувтöмсö, мымда ковсис терпитны зубытсö да гажтöмсö, адззыны вын да желаннё, мед вермыны видзчисьны эта кадлiсь сибöтчöм. Натьтö, эзö. Эд мед колананёж вежöртны мортлiсь сэтшöм состояннёсö, сiйö колö овны аслыт. Ильиновлö эшö сувттöдззас медперво усис тöдвылас быдöс сiя, кöда пыр ковсис мунны коккесö чеглалöм бöртi. И не волнуйтны да не полöтны сэтшöмыс некыдз эз вермы.

— Но мый? Сувт, котöрт, — сералöмöн горöтчис öнi ачыс ни Аркадий Львович.

Зонка жагвыв пуксис, лэдзис увлань коккесö, полöмöн, дзик нiя вермисö жугавны да киссьыны торрез вылö, сибöтчыштiс нiйöн кöдзыт джодж бердöдз. Тапочкаэсö, кöдна вöлiсö вайöмöсь одзлань ни да куйлiсö ордчöн сэтöн жö, Ильинов эз казяв. Эз казяв медперво и сiйö, кыдз пымалiс быдсöн вывтырнас, и сiйö кыдз волнуйтчöмсяняс сöдзöм синваэс визывтiсö неыджыт шороккезöн рожабаннэс кузя. Синваэс пыр Ильинов нёджжöвтыштiс быдöнныс вылö, öвтыштiс öтмöдöрö юрнас, горöн ловзисис. И вöлись эта бöрсянь зонка пыкöтасис киэзнас кушетка дорыш бердö, ны отсöтöн жö жагвыв сувтiс. Чеглалöм местаэсö уналаöт бытшкыштiс, топ еммезöн. Ильинов повзьыштiс, но зубытсö терпитiс. Вот оськöв, мöдiк, а сэтöн... Зонка эз и казяв, кöд коста бергöтчис сылöн юрыс. Син одзас недырик сьöрна дзик пöртмасисö Мариналöн повзьыштöмкодь синнэс, жырыс пиньласис, пондiс берездасьны.

Сёрöнжык, палатаас ни, Ильинов полöмöнмоз юалiс;

— Мый эта мекöт сэтшöмыс?

— Да нем. Бергöтчыштiс, тыдалö, юрыт дыр куйлöмсяняс. Эн пов, эта чулалас. Унакöт сэтшöмыс овлö.

Сiя лунö, павжун бöрсяняс, эз ни узьöт. Эз пырö юрö и некытшöм гижöм да лыддьöтöм. Костыллес отсöтöн Ильинов жагвыв сибöтчис палатаись öшын дынö, сувтiс.

Öшын саяс, госпитальыс зданнё одзын, паськалiс ыджыт да важ парк. Гырись да лапья пуэс сулалiсö шочыника, вель ылын öтамöд дынсянь. Пуэс коласын то öтöрын, то мöдöрын тыдалiсö скамьяэз. Öнi нiя вöлiсö эшö лым увтын. Но пондöтчис ни январь, и сылöн аскодьöм приметаэз тöдчöмöн усисö син вылö: жагвыв бертiс лун, вылынжыка пондiс бергавны шондi, а сылöн югöррес йыла еммезöн сибалiсö да мöртчисö муас. Сiйöн пуэс бердöт лунлапöвсянь пондöтчис ни сывны лым. А крыша бердсянь, топ öшын весьтöт, кадiсь кадö мынлiсö да виялiсö вотьваэз. И ась кытчöдз эз оссьö почкаэз да эз визывтö шоррез, шондiлöн вылынжыка бергалöм да вотьваэзлöн дышöтчöмöн виялöм казьмöтiсö ни тулыс сибöтчöм йылiсь, кöдалö вились позис радуйтчыны.

XIV

Кыдз только Ильинов сувтiс коккез вылö, кадыс топ саймис, пондiс визывтны тöдчöмöн перытжыка, кыдз визывтö пым шондi югöррез увтын тулысся вынсялöм шор. Оланыс, кöда эта вотöдз кыссис вежсьытöг, перыта петiс аслас важ колеяись. Коккез вылö сувтöм вайöтiс Ильиновлö не только гаж, но и öтi-мöдi сэтшöмö, кöдакöт бы эз усь пантасьны койка вылын одззамоз куйлытöн.

Сiя рытö госпитальын куйлiсь отирлö мыччалiсö кино. Аппаратыс вöлi сувтöтöм коридор шöрас. Кöдна чайтчисö ветлöтны, ужин бöрсянь ни пондiсö чукöртчыны сы гöгöр.

Эз сёрмы и Ильинов. Сылö эта луныс вöлi праздникся праздник, а кино йылiсь юöрыс гажöтiс зонкаöс эшö öддьöнжык. Гусьöн, ас кежас, Ильинов надейтчис эшö и сы вылö, что кино коста кад позяс чулöтны öтлаын Маринакöт. А этася ыджытжык счастье йылiсь сiя кадö зонкалö эз и думайтсьы: вежöртiс, что сы положеннёын этася ыджытжыкыс лонытö оз и вермы.

Сестраэз да няняэз, кöдналö позис орöтчыны удж бердiсь, локтiсö медбöрын, кöр экран одзын чукöртöм стуллэз да скамейкаэз вылын прос местаэс эз ни вöлö. Нiя пуксисö, кин кытчö вермис: кин — скамейка дорыш вылö, кин — сьöрас вайöм стул вылö, а унажыкыс ны коласiсь кольччисö сулавны кок йылын.

Ильинов дугдывтöг видзчисис Мариналiсь локтöм. Стена бердын пукавтöн, зонка сiйö и керис, дзарышасис виль локтiссес ладорö. Но мымда бы зонка эз нёджжась, быдöнныс коласiсь сестрасö сiдз и эз казяв. Бöртiжык эта местö сылö син вылас усис годдэза ни да кызвевья Агния Александровна, кöда вежис Маринасö чулалöм смена бöрсянь. Сэк вöлись Ильиновлö дзик вачкис, усис тöдвылас, что Марина, кöда дежуритiс сутки сьöрна тöння лунсянь, талун павжун бöрсянь вежсис да мунiс гортö.

Кино дынö, кытшöм бы сiя эз вöв бур да интереснöй, одззася интерес öшис. Ильинов чеччис аслас местаись, жагвыв, мед не шумитны костыллезнас коридор пасьта, иньдöтчис палатаö. «Вот жö ылöстöм. Вот баран», — досадуйтiс зонка ас вылас, битöг койка вылас пукавтöн.

Настроеннё тшыксис. Кутчисьны мыйкö мöдiк бердö некытшöм охота эз вöв. Рытыс чулалiс гажтöма. Сiя жö вöлi и ашынас. И дзир куимöт лунас, павжун бöрсянь, пондiс мичамны Ильиновлöн сьöлöм вылас. А быдöс сысянь, что сибöтчис Мариналöн дежуритан кад. Сэк кежö Ильинов осьтiс книга, пуксис матö öшын одзö. Но лыддьöтöмыс юрас эз пыр. Думаэс зонкалöн вöлiсö Марина йылiсь, а синнэс унажыксö видзöтiсö öшын ладорö, ежели осьтöм страница вылö.

Санпропускник ладорсянь госпитальöдз туёк кыссис палата öшыннэз одзöт. Этасянь, кин бы эз мун нето эз лок, позис казявны быдöннысö.

Вот матi стена пöлöн оськалiсö кык врач, öтыс ны коласiсь дзор юрсиа, пöрись ни и горбакодь — подполковник Хромицкий. Мöдыс — вылынжык вывтыра да том капитан — вöлi тöдтöм. Ны бöрсянь перыта оськалiсö эшö öтiк военврач-майор, шöрöт годдэзся, но мыйсянькö тожö ни дзор юрсиа инька.

Сiя кадö, кöр Ильинов сё эшö видзöтiс ны вылö бöрсяняныс, санпропускник ладорсянь мыччисисö эшö нёльöн. Медодзын мунiс кызся-кыз да öддьöн ни чатыра сестра. Сiя, кыдз слон, жагвыв вöрöтiс чурка кодь кыз коккезнас, öвтышалiс кинас, а öткоста дугдывтöг баитiс. Кыкпöвса öшын стеклоэз пыр сестралöн басниыс палатаöдззас и эз кыв, но этö позис вежöртны сы сьöртi, кыдз нюмрасис-вöрис сылöн кыза краситöм öмыс да кыдз мöддэс, кöдна оськалiсö сы бöрсянь, тожö дугдывтöг ваксисö-сералiсö.

Нёльыс коласiсь öтiкыс вöлi Марина. Оськалiс сiя медбöрын. Сестраöс Ильинов казялiс да тöдiс сэк жö, кыдз только сiя ештiс усьны син вылö. Да и позис я Ильиновлö не казявны да не тöдны Маринасö нёль морт коласiсь, кöр сiйö зонка эз бы сорав некинкöт и тысяча коласiсь?

Одзын мунiсь сестраыс баснисянь Мариналöн, тыдалö, тожö петiс серöмыс. Но быдöнныс моз нывка эз ваксьы, шыннялiс дзир ас кежас. А эта сылöн шыннялöмыс немöн эз вачкись мöдiккез шыннялöм вылö. Сiдз вермис шыннявны дзир сiя, Марина, не сымда воöм öмидз рöма векнитик тырппезнас, мымда — лöнь да шоныт югöра синнэзнас.

Сiдз, кин висьтасьтöн, кин ваксьытöн, быдöнныс и сибöтчисö госпиталь зданнё весьтöдз. Öшын увтöттяс мунтöн Ильиновöс вермисö казявны. Буржык бы, натьтö, вöлi вешшыны, сайöвтчыны син одзись. Но сiя кадö эта йылiсь зонкалö мылякö эз и думайтсьы. Сiя, дзик домалöм Марина бердö синнэзнас, сiдз и кольччис сулавны одзза местаас.

Öшын весьтас сибöтчöм коста Марина чожажык кылiс, ежели казялiс ас вывсис Ильиновлiсь синнэсö, аслыс казявтöг недырик кежö бергöтчыштiс сы ладорö. Эта дженытика нёджжöвтöмыс тырмис, мед казявны öшын сайись зонкасö. Синнэзнаныс пантасисö. И , сэк жö Мариналöн чужöмыс тöдчöмöн югмыштiс. Здоровайтчöм могись сестра кокнитика öвтыштiс сылö кинас. Аслыс казявтöг, Ильинов керис сiйö жö.

Сестра сувтчывтöг оськалiс быдöнныс сьöрö. Ильиновлö нем эз кольччы, кыдз кольлавны сiйö синнэзнас. И öнi, кöр Мариналiсь чужöмсö адззыны эз ни позь, бöрсяняс сы вылö дугдывтöг видзöттöн, зонкалö син вылас усис сыын мыйкö сэтшöм, кöдö медперво сiя некыдз эз вежöрт, но кöдасянь зубытакодь пидзыртыштiс сьöлöмсö, а ачыс сiя повзьыштiс.

Недыр мыйись быдöнныс саясисö. А Ильинов, кöдзыт öшын стекло бердö кымöснас павкöтчöмöн, кольччис сулавны одзза местаын, думайтiс

Этöн думанас жö бöртiжык зонка бертiс койка дынöдз, жагвыв пöрöтчис гатш, тэчис юр увтас киэсö, кунис синнэсö. И вöлись сэк, кöр быдöс неважын адззылöмыс вились сувтiс син одзас, Ильинов жагвыв вежöртiс, мыйын делоыс. А быдöс вöлi сыын, что руд рöма норковöй воротника габардиновöй пальтонас, кöда сэтшöм бытшöма, топ-топ, пукалiс сы неыджыт вывтыр вылын, юр вылас сэтшöм жö шапочканас, а эшö öддьöнжык немыччасян мыгöрнас, нетэрмасян да лöнь походканас Марина вачкисис не сiдз нывка, кыдз инька вылö. И öнi, кöр Ильинов вежöртiс сымдасö, сiя повзис. «Неужто быль? Кыдз нö ме сэк сыись одзжык сымдасö эг казяв?» Но öткоста эна сувтöтöм вопроссэзкöт тöдвылас зонкалö усис ны коласын дружитöм, кöда сы ылöсын некыдз эз лöсяв нывкаыс йылiсь зорамöм думакöт. «Да не. Весь ме сы йылiсь сiдз думайта. А кыдз сэк быдöскöт сыкöт, кöда сэтшöм тöдчöмöн усис син вылö?»

Ильинов сё эшö споритiс аскöттяс аслас думаэзын, кöр шытöг оссис палатаись ыбöс, порог вылас сувтчыштiс ачыс Марина. Сы синнэзын выраженнё сьöртi сорасьтöг позис казявны гажа да бур настроеннё йылiсь. Эд не мыйсянь мöдiксянь, а дзир сы мыччисьöмсянь, дзик шондi югöррезсянь, палатаас тöдчöмöн югмыштiс. Но сестралöн локтöмыс, кöда одзжык пыр гажöтiс Ильиновöс, талун первуись эз гажöт. Маринаыс пырöм бöрсянь зонка жагвыв бергöтчис паныт, чöлöмöн лэбтiс сы вылö юасян выраженнёа синнэсö. Мöдыс, кöр казялiс Ильинов чужöм вылiсь тöдтöм, гажтöм да юасян выраженнёсö, повзьыштiс, перыта пондiс вежсьыны чужöм вылас: синнэс пемдыштiсö, чужöм вывсис неважынся гажыс öшис, дзик сiйö чышкисö. Сы местö чепöссьöм вирсянь сестра пондiс рöмсявны, кыдз бытьтö сiйö кутiсö мыйкö небасöк да неколана вылын. Сiдз кыкнанныс нiя видзöтiсö öтамöд вылö и эз тöдö, мый колö да мый позьö керны нето горöтчыны одзлань. Сёрöнжык Марина, оськöв бöрын оськöв, лöня сибöтчис Ильинов койка бердöдз, кыдз и пыр, пуксьыштiс сы дорыш вылö, сибöтчыштiс кинас зонкаыс морос бердöдз.

— Вася, мый талун тэкöт сэтшöмыс? Мый лоис?

Сэтшöм учöтик да тöдса Мариналöн киыс, сылöн сибöтчöмыс, сэтшöм небыт да рам голосыс, кöднö öнi вились кылiс Ильинов, кылiс и вывтырнас, и пеллезнас, керисö ассиныс. Нiя вашöтiсö сы юрись сестра йылiсь неколана думаэсö. «Весь эд ме, весь сы йылiсь сiдз думайта». Гажа ловшы сорöн ни Ильинов паныт горöтчис:

— Сестра? Марина?

— Ме, конешно, ме. Мый талун тэкöт сэтшöмыс?

— Нем, Марина, нем. Ме сiдз, ас кежам, мыйкö гажтöмö да неколанаö думайтi. — Ильинов сэтöн жö кутiс нывкалiсь кисö, жмитыштiс морос бердас, недырик кежö кунис синнэсö.

— Мый гажтöмсö? Да и колö я сiйö думайтны, кöр оланас миян быдöс гажа да бур?

— Мый бурыс?

— Да быдöс, Вася, быдöс. Бур, что чулалö тöв и чожа бертас тулыс. Бур и сiя, что тэ сувтiн коккез вылö и миянлö чожа ковсяс янсöтчыны. Вились бертан частьö, аслат ёрттэз коласö, одзлань пондан нуöтны ассит служба. Сiдз эд? — басниыс коласын Марина мынöтiс Ильинов киись ассис кисö, вешшыштöмöн веськöтчис.

— Сiдз, батi, да не быдöс.

— А мый эшö?

Ильинов сэсся паныт эз шыась. Госпитальсис мунöм йылiсь зонка тöдiс и одзжык, и не радуйтчыны эталö эз вермы. Но сiдз вöлi сэк, кöр эшö эз думайтсьы Маринакöт янсöтчöм йылiсь, öнi жö, кöр сестра ачыс казьмöтiс эта йылiсь, не янсöтчöмсяняс эшö, а вöлись сы йылiсь баснисянь сьöлöм вылын лоис гажтöм.

Зонкалiсь висьтавтöм думаэсö Марина öнi тожö вежöртiс ни. Мед не кыскыны одзлань öтамöд коласын сьöкыт чöлöмсö, кöдасянь кыкнанныслö вöлi недолыт, нывкаыс одзлань горöтчис:

— Быдöс, Вася, петiс öддьöн и öддьöн бура. Коккез вылö тэ сувтiн. Да и одззася сьöлöмшогыт öнöдз, натьтö, чулалiс ни. Быд шогöтiсь, позьö шуны, татöн куйлытöн веськöтiсö. Сiдзкö, гажтöмтчыны кольччö нач нем понда. Верман лöсьöтчыны. Чожа ми тэнö лэдзам. — Шутитöмöн ни одзлань содтiс: — Видзöт только, машинаэс увтö сэсся эн ни пыр. Мöдöтпырись не сувтöтны лоас.

— Спасибо, Марина. Тэ отсöтöн позяс и мöдöтпырись сувтны. Вот усис бы, шуам, тэ понда сымдасö... ме бы эг и...

— Чöв, Вася. Мыйлö тэ, кöдö оз ков... — Кинас перыта öвтышалöмöн Марина падмöтiс Ильиновлiсь пондöтöм баснисö. — Вот ме тэныт талон вайи, мун ужнайт. — Сестра кыскис аслас халат карманiсь неыджыт картонка, пуктiс тумбочка вылö, бергöтчис, мед мунны.

А эта кадö Ильиновлö мылякö думайтсис, что госпитались петтöдз пантасьлыны нывкаыскöт сэсся оз ни усь. Кыдз позис перыта зонка сувтiс, оськöвтiс сы сьöрö.

— Сестра! Марина! Тэ öддьöн тэрмасян?

— Тэрмася, Вася. Мöдiк палатаэзын видзчисьöны, — шыасис паныт Марина, но ыбöс вуг бердас видзсьытöн кольччис сулавны одзза местас. — А мый сэтшöмыс?

— Вежöртан, Марина, миянлö бы баитыштны колiс.

— Вежöрта, Вася, но талун некöр. Мöдöтпырись кöркö баитам. Эн пов, пантасям эшö.

XV

Кык месяц да джын джендöтiс Ильинов госпитальын, мед вились сувтны чеглалöм коккес вылö. Сибöтчис кад янсöтчыны чочком стенаа лöнь палатакöт да быдöнныскöт ныкöт, кöднакöт зонка ештiс тöдсасьны татöн куйлытöн. Этасянь вöлi и гажа, и гажтöм. Гажа сiйöн, что сьöкыт коктöмалöм кад кольччис бöрын, гажтöм — Маринакöт янсöтчöмсянь. Нывка дынö саймöм чувствоыс, сестракöт дружитöмыс колисö зонка сьöлöмын ыджыт да тöдчана след. Ильинов одзлань ни тöдiс, что Маринакöт янсöтчöм бöрсянь сылö лоас не öддьöн кокнит.

Не сiя рытö, не ашынас пантасьны сестракöт сэсся эз усь.

Эна луннэзö кытшöмкö береговöй частись госпитальö вайöтiсö кынымкö солдатöс, кöдна ёна сотчöмась пожар коста. Ныкöт вöдитчытöн сестралöн ештана кад и минута сьöрна эз петав. Ильинов дынö палатаас Марина кодьöнсö сэсся эз и мыччась. А ашынас, кöр чулалiс сылöн дежуритан кад, узьтöм да мыдз нывкаыс тэрмасис гортö. Ильиновлö нем мöдiк эз кольччы, кыдз öшын одзын сулавтöн, кольлавны сiйö синнэзнас санпропускник будка дынöдз. Эта коста вöлi öддьöн охота, мед сестра кöть öтпырись дзар керыштiс сы ладорö. И Марина топ кылiс сылiсь желаннёсö. Тöдiс, натьтö, что мöдыс öнöдз сулалö öшын одзас и пондас сулавны сэтчöдз, кытчöдз сiя оз саясь син одзись. Санпропускник будка дынас ни Марина недырик кежö и былись сувтчыштiс, кынымиськö öвтыштiс зонкалö кинас и вöлись эта бöрсянь саясис ыбöс саяс. Ильинов вились кольччис öтнас, аслас думаэзкöт. А думайтны эна луннэзö сылö вöлi мый йылiсь.

Госпитались петан луныс, кыдз и колiс Ильиновлö, лöсялiс Маринаыс дежуритан кадö. И не пантасьны сыкöт баитöм могись, кöть недырик кежö, зонка некыдз эз вермы. А быдöс бурыс понда, мый керис сылö сестра, охота вöлi вештiсьны сiйöн жö. Но Ильинов одзлань ни вежöртiс: лоас кö Мариналöн одззакодь сьöкыт дежурство, пантасьöм да баитöм йылiсь и думайтны нем. Нем эз пет зонкалöн и одзлань думайтöмись: некытшöм лöсялан тор, кöдö позис бы козьнавны нывкаыслö, сылöн сьöрас эз вöв. Эз позь петны городö, мед мыйкö небны. Госпитальын куйлiссесö нельки санпропускник будка сайöдз некöр эз лэдзавлö. Сэтчö жö, кöть бы и лэдзисö, муннытö вöлi немöн, формаыс дынын эз вöв. Ветлöтiс Ильинов татöн дзир увтiсь бельёöн да шинель кузя лöз фланелевöй халатöн. Вежöртана, что городас, отирыс коласö, да эшö тöвнас, сэтшöм паськöмöн он мыччись.

Вель дыр думайтiс Ильинов, мый бы позис керны сы положеннёын, но медбöрын петанiныс сё жö адззисис. Мунан панытö сы дынö вовлiс Толя Макаров. Сы отсöтöн и вöлi керöм быдöс коланаыс.

Ашынас, палатаись петан одзын, ловья цветтэсö, кöдна öнöдз вöлiсö сайöвтöмöсь тумбочка сайын, Ильинов кыскис да сувтöтiс тумбочка вылас. Кельдöтны öтiк ойнас нiя кытчöдз абу ештöмась: не весь жö зонка сутки сьöрна дозирайтiс ны сьöрын.

Торья жырокын ни Ильинов чöвтiс вывсис госпитальнöй паськöм, а сы местö пасьталiс ассис форма. Этасянь зонка тöдчöмöн вежсьыштiс. Неыджыт, но топыт вывтыр вылын бытшöма пукалан формаыс да юр вылас кокнитика кышыштöм бескозыркаыс Ильиновöс томмöтыштiсö. Нем сьöртi эз и думайтсьы, что зонка сы дырна кад чулöтiс госпитальнöй койка вылын. И дзир бель вачкöм чужöмыс сьöртi позис казявны неважынся шогöт йылiсь.

Ильинов петiс коридорöдз. Эстöн эта коста сiйö видзчисисö ни. Веськöтiсь врач, сестраэз да няняэз, кöдна отсалiсö сувтны кок вылö, öнi чукöртчисö сы гöгöр, мед кольлавны. И дзир медколана мортыс, кыдз перво жö и казялiс Ильинов, быдöнныс коласын эз вöв. «Неужто сiдз оз и ешты?»

Зонка öддьöнсö эз тэрмась. Сьöлöмсянь сiя висьталiс быдöнныслö ыджыт спасибо, эшö öтпыр дзар керыштiс омöн коридор пасьта, аслыс казявтöг, гажтöма ыш ловзисис, бергöтчис, жагвыв иньдöтчис петанiн ладорö, а ас кежас сё эшö думайтiс: «Кыдз жö сiдз? Неужто ме сiйö сэсся ог и адззыв?» Ильинов сибöтчис петанiн дынöдз, кутчисис кинас ыбöс вуг бердö, мед оськöвтны порог сайö, кыдз эта коста бöрсяняс вöлись кылiс: «Вася!».

Видзсьыны, мед не бергöтчыны паныт эта шыасьöм вылö, зонкалöн вын эз судз. Нельки перытжыка, ежели колiс бы, сiя дзар керыштiс бöрас.

Кок шытöг да кокнит оськöввезöн, кыдз и пыр, Марина оськалiс сы ладорö. Нывка и öнi эшö эз тэрмась, дзик мыйкö думайтiс ас кежас. Сестра сибöтчис зэв Ильинов бердöдз, дженытика нёджжöвтiс бöрлань.

— Мый, мунан ни? — юалiс нывкаыс. И эна горöтчöм кыввезын первуись кылiс кытшöмкö то ли мыдз, то ли гажтöм.

— Да вот... колö мунны, — ловзисьöм сорöн шыасис Ильинов. Öтлаын петiсö тамбурöдз. Эстöн Ильинов вель дыр да шоныта видзöтöв-керис нывкаыс синнэзö. Колiс бы мыйкö горöтчыны, мыйсянькö пондöтны колана баснисö. Но кыввес, кöдна вöлiсö заптöмöсь эшö одзжык, öнi Ильинов юрись öшисö, дзик тöвзисö. Марина одзлань тожö эз шыась. Нывка сулалiс бокöнмоз зонкаыс ладорö, перкйышалiс учöтик гыжнас ыбöс вуг бердiсь краска, видзчисис. Чöлöмныс коста ни Ильинов казялiс, кыдз пондö вынсявны сы моросын сьöлöмлöн ёткöтöм, — сiйö вились кутiс неколана волнуйтчöм, — аслыс казявтöг, вежсьыштiс кок вылiсь кок вылö.

— Марина... — И вöлись эта горöтчöм кыв бöрсянь, голосыссянь, кытшöмöн вöлi шуöм сылöн нимыс, сестра дзик повзьыштiс, чуть тöдчöмöн дрöгнитыштiс вывтырнас, вежсьыштiс чужöм вылас.

— Кывзы жö, Марина, — пондöтiс одзлань Ильинов. — Кытшöм ме сё жö рад, кытшöм счастливöй, что тэ пантасин меным сэтшöм колана кадö. Эд не тэ бы аслат пым сьöлöмöн, ог тöд, эта йылiсь нельки висьтавны оз позь, кытшöм сьöкыта усис бы меным терпитны быдöс этö и зубытсö, и гажтöмсö. И дзир тэнат киэт, синнэт, быд коста паныт шыасьöмыт, быдсöн тэ ачыт вöлiн эта кадö ме понда медбур, медвына да медколана лекарствоöн. Спасибо тэныт, Марина, спасибо, сестра. И эшö... — Эстöн Ильинов вились недырик кежö падмис баснинас, чöлыштöм бöрын одзлань висьталiс: — Вежöртан, Марина? Позис кöбы, шуам, меным, ме бы рад вöлi лоны тэкöт ордчöн... öтлаын... пыр кежö. Эд ме любита тэнö, и тэ сiйö тöдан.

Сестра дивуйтчытöг видзöтöв-керис Ильинов вылö, лэдзис синнэсö бöр, невна перытжыка, ежели колiс бы, горöтчис:

— Оз ков, Вася, эта йылiсь. Ме тöда, вежöрта, но тэрмасьны оз ков. Дыр эшö тэныт служитнытö. Кöркö мöдöтпыр баитам.

— А позяс тэныт гижны? Эд эта янсöтчöм бöрсянь меным тэтöг лоас гажтöм.

Марина и эстöн перво жö паныт эз шыась. Медперво сiя думайтыштiс мыйкö дырна ас кежас, сёрöнжык вöлись висьталiс:

— Гиж, он дышöтчы дак.

— А кытчö?

— Верман татчö, госпиталяс — локтас эд.

— Спасибо, Марина. — Ильинов эшö öтпырись дзар керыштiс сестраыс шоныт югöра синнэзö, жагвыв лэдзис ас кисис сылiсь учöтик да шоныт кисö. — Пырав, пожалуйста, недырик кежö ме палатаö, видзöт, мый тэныт коли, — бергöтчис, петiс.

Ыбöс саяс ни зонка перыт кокшыöн лэдзчис лажмытик поспуэз кузя, госпитальлiсь зданнёсö кытшöвтöмöн, сибöтчис аслас палата весьтö. Эта кадö Марина, морос одзас жмитöм цветтэзöн да гажöн шыннялан чужöмöн, сулалiс ни öшын одзас.

— Спасибо, Вася, — вöрыштiсö сестралöн тырппес. И ась кыкпöвса öшын стекло пыр сылöн шыасьöмыс öтöрöдззас и эз кыв, горöтчöм кыввесö Ильинов и сытöг вежöртiс. И вöлись öнi, кöр сестраыс вöлi эшö син одзын, но судзöтчыны сы бердöдз киöн эз ни позь,

Ильинов быдöсöн: и ылöснас, и сьöлöмнас — кылiс, кытшöм дона да колана сылö эта мортыс, и кытшöм сьöкыт да неколана сыкöт янсöтчöм. Сiя вöрöтчытöг сулалiс öшын одзас, и öткоста орöттöг видзöтiс Марина вылö. Нывкалöн шоныт югöра синнэс дзик домалiсö сiйö ас берданыс. Вежöрттöг, колö я, бöртiжык Ильинов нельки бергöтчис, мед бертны бöр. Но Марина, кöр казялiс, мый думайтö керны зонкаыс, перыта зэгöтыштiс öтмöдöрö юрнас. Сэк вöлись Ильинов вежöртiс, что бертны бöр öнi оз ни позь: ас паськöмын сестра дынö госпиталяс сiйö сё ни оз лэдзö, да и кернытö сымдасö нем вылö, сiдз кыдз янсöтчынытö сё ни ковсяс. И кöр Марина прощайтчöм могись кынымиськö öвтыштiс сылö кинас, зонка паныт керис сiйö жö, öткоста, оськöв бöрын оськöв, иньдöтчис санпропускник ладорö.

Гöрд кирпичись тэчöм госпитальнöй зданнёлöн стена чожа мый сайöвтчис син одзись сэтшöм жö ограда сайö.

Городыс панталiс гора да гажа шумöн. Кадыс вöлi луншöрся. Погоддя сулалiс шоныт да мича. Пым шондi югöррес шонтiсö нельки паськöм пыр, зэв ёна ёрисö синнэз. Öтлаын зумыт да чож тöвкöт нiя сылöтiсö лым, а кытöн сiя эз ни вöв, шонтiсö нельки мусö. Сэтшöм местаэзiсь вывлань тöдчöмöн кайис кокнитик парок. Нырö вачкис сола ва да уль му дукöн.

Эстöн ни Ильинов вежöртiс, что госпитальыс сулалö топ город шöрас. Сiдзкö, частьöдз вöлi дас кыным километр ылына.

Не трамвай вылö, кöда нуöтiс бы город конецöдз, не автобус вылö, кöдöн позис бы локны местаöдз, Ильинов эз пуксьы. Госпитались аслас коккез вылын петöмсянь да Маринакöт бытшöма янсöтчöмсянь зонкалö вöлi сэтшöм бур да гажа сьöлöм вылын, что быдсöн эта кузя туй колассö сiя лöсьöтчис мунны подöн.

Не жагöн и не перыта Ильинов оськалiс город кузя. И быд торын, кöдна эта коста усисö сы син вылö, быд шыын, кöдна сибалiсö сы пельшы бердöдз, позис адззыны да кывны öтiкö — гаж. Гажöн ёркöтыштлiсö трамвай вагоннэз увтын колесоэз. Гажöн кышöтiсö визыв автомашинаэз увтын шинаэз, гажöн сёрнитiсö ас коласын отир. И нельки заводскöй трубаэзiсь сьöд тшакыллезöн петан тшын, кöда бöртiжык паськалiс öтмöдöрö сэтшöм сöстöм да шуч тыдалан руас, лэбтiсис вывлань тожö гажöна.

XVI

Город саяс Ильинов оськöввесö тöдчöмöн содтыштiс, öткоста зонка öнiсянь ни пондiс думайтны, кинкöт медодз усяс пантасьны частьын, мый видзчисьö вильыс ёрттэз коласын да кыдз чулалас медбöрья навигация, кöда пондöтчытöдз кад кольччис не уна. Думайттöнняс зонка эз и казяв, кöд коста мунiс эта кузя туй колас. Вот Ильинов кытшöвтiс медбöрья сопка гöгöр, петiс тöдса бухта дорö. Этасянь ни син вылö усисö тöдса казармаэз, плац да матросскöй клублöн лажмытик зданнёыс, кöдна вöлiсö бухталöн мöдöр берегас, а нач ва бердас чочком, дзик серебритöм эллинглöн, кокнит да паськыт корпус, кöда бердсянь берег пöлöнняс векнита да кузя нюжалöм пирс. Быдöс эта вöлi важын ни тöдса и быдöс ас местас. Этасянь зонкаöс кутiс аскоддьöм гаж да волнуйтчöм, кöдасянь кытшöмкö шоныт тöдчöмöн паськалiс вывтыр пасьта. Кыдз не кыдз, а талун эта вöлi сылöн горт. Аслыс казявтöг, Ильинов пондiс оськавны эшö перытжыка, дзик полiс кытчöкö сёрмöмись. Чожа мый сiя вуджис кöрттуй полотно сайö, сибöтчис тöдса контрольно-пропускнöй пункт дынö.

КПП будкаись сылö паныт петiс мичман Елухов. Эта бытшкасян сина морткöт пантасьöмыс зонка понда вöлi нач видзчисьтöм, но ордйыны сiйö öнi некыдз эз ни позь. Кынымкö оськöв ылына сы дынсянь Ильинов сувтiс, веськöтчыштiс, шваткыштiс оча каблук, лэбтiс веськыт кисö вывлань, сибöтчыштiс чунь йыввезнас бескозырка бердöдз, мыдзöмсянь негорöн висьталiс:

— Ёрт мичман, матрос Ильинов бертö госпитальсянь одзланься служба вылö. — Ильинов видзчисис, что Елухов часöт жö панталас сiйö кытшöмкö сьöлöм вундыштан лёк кыввезöн, мый сысянь видзчисьнытö кöть кöр позис. Но талун сымдаыс мылякö эз ло. Елухов кынымкö оськöв мымда сибöтчис паныт, здоровайтчöм могись нюжöтiс кисö.

— Здравствуй, матрос Ильинов! Здравствуй, герой! Сувтiн, сiдзкö, коккет вылö. Бур. Висьтась, кыдз здоровье?

— Здоровье вылö ог норась, ёрт мичман.

— Молодец, матрос Ильинов. А кыдз городсянь локтiн?

— Подöн, ёрт мичман.

— Подöн нельки? Да он я тэ, матрос Ильинов, бöбöтчы?

— Некыдз ог, ёрт мичман.

— И дыш бытьтö эз пет сы кузя туй колассö подöн оськавны?

— Некыдз эз, ёрт мичман.

— А мыля городскöй автобус вылö эн пуксьы? Деньгаыт, натьтö, билетыс вылö эз вöв?

— Да не, ёрт мичман. Сувтчанiнас видзчисьны эг ни понды.

— Сiйöн подöн и локтiн? Молодец, матрос Ильинов. Неполiсь тэ, кыдз ме видзöта дак, зонкаыс вöлöмыт, неполiсь, да-а. Эг тöдлы ме одзжык сымдасö.

Висьтавны паныт эна кыввезлö Ильиновлöн нем эз ни адззись. Зонка сымда и керис, вежсьыштiс кок вылiсь кок вылö. Öнi вöлись, öтiк местаас сулавтöн, сiя кылiс, кыдз чорыт туй кузя подöн мунöмсянь пондöны мозжитны коккес. А Елухов, аслас басни коста, некыдз эз вермы казявны, что мöдыслö неважын чеглалöм коккес вылын сулавнытö сьöкыт. Сiя одззамоз юасис:

— Эз вöв гажтöм эта дырнасö госпиталяс куйлыны?

— Да кыдз жö эз, ёрт мичман? Быднёж вöлi.

— Вот и ме думайта — быднёж. Эд и тöдсаэз коласiсь тэнат некин сэтчин эз вöв.

— Эз, да. Но асланым зонкаэс кадiсь кадö вовлiсö.

— Да-а-а.

Оз позь висьтавны, мый дырна бы кыссис ны коласын эта абутöмкодь басниыс. Но сэтöн оссис КПП будкаись ыбöс, кинкö дежуритiсь матроссэз коласiсь юöртiс:

— Ёрт мичман! Тiянöс телефон дынö!

― Ладно, матрос Ильинов, мун шоччись, ― эстöн вöлись горöтчис Елухов зонкаыслö, ачыс бергöтчис, котöрöн уськöтчис будкаö.

Ильинов кокнита ыш ловзисис, вуджис КПП сайö. Öнi, кöр будкаыс кольччис бöрлань, а ачыс сiя сюрис частись территория вылö, висьтавны мöднёж — гортö, бытшöма кылiс ассис мыдзöмсö. Шоччисьöм могись охота вöлi то ли пуксьыны, то ли водны сэтöн жö кöть недырик кежö. Но керны сымдасö Ильинов эз ни понды, бухта пöлöнняс жагвыв иньдöтчис вывлань.

Казармаас пыранiн одзын зонка недырик кежö сувтчыштiс. Вуджны тöдса порог сайö петiс полöмкодь. Вились пондiс думайтсьыны, кыдз панталасö ёрттэс. Буржык бы вöлi пантасьны кинкöткö эшö пыртöдззас, но, кыдз нарошно, кадыс вöлi эшö одз, локны занятиеэз вывсянь некин эз ешты, да и сы бертöм йылiсь, öтiк Макаров Толяся, некин эз тöд. «А-а, сё ни быдöнныскöт ковсяс пантасьны», — думайтыштiс медбöрын Ильинов, жагвыв осьтiс ыбöс, сэтшöм жö жагвыв оськöвтiс порог омöн пытшланяс.

Пантасьнытö усис сэтöн жö. Дневальнöй, повязкаöн кисой бердас, морос весьтас öшöтöм боцманскöй дудкаöн, пыранiн дынын сулалiс Сашка Черкасов.

— Ильинов? Вася? Вöлись тэ мöдöр светсяняс мыччисин. А ми эстöн тэтöг гажтöмтчыны ни пондiм.

Ёрттэз здоровайтчисö. А одзлань бöра Черкасовыс жö горöтчис:

— Дыр жö, батя, тэнö сэтчин куйлöтiсö. Нельки чужöм вылат вежсьыштöмыт, умöльтчöмыт топ. Эз я мый я госпиталяс вердö?

— Да тшыгйöн эзö жö видзö.

— Но да куль сыкöт, вердöмыскöт. Бур, что ловйöн кольччин, — одзлань Черкасов, юрнас гогиньтыштöмöн, мыччалiс Ильинов коккез вылö. — Здоровье кыдз? Кыдз костыллет вылын сулалан?

— Видзöны тай, — шыасис паныт Ильинов, шыннялöмöн, дзик мыччалiс, видзöтыштiс аслас кок ныррез вылö.

— Абу зубытöсь?

— Зубыткодьöсь жö кылö, да чулалас, батi. А эстöн тiян мый вильыс? — мед вежны ас йывсис баснисö, тэрмасьöмöн юалiс Ильинов.

— А мый эстöн, Вася, вильыс? Нем кытчöдз. Быдöс одззамоз. Менö вот тöнсянь дневальнöйöн сувтöтiсö. А зонкаэс быдöнныс катер вылын. Тулыс эд сибöтчö, навигация, медбöрья навигацня, Вася. Лöсьöтчам. Весöтам, вочам, краситам, кыдз вермам, ассиным коробкаэзнымöс. Ачыт тöдан, мый эта коста керсьö.

— А кыдз тэнат аслат?..

— А кыдз эшö? Кыдз и быдöнныслöн.

— Да не, Сашок. Ме не сы йылiсь... Меным Макаров госпиталяс юöртiс, бытьтö бы отпускö ветлöмыт, дак...

Ильиновыс пондöтöм баснисянь Черкасов дзик джöмдiс, лöньсис, сы коста жö вежсьыштiс чужöм вылас.

— Простит, Сашок, не сiдз кö мый горöтчи.

— Да, Вася. Эта йылiсь буржык бы и не казьмöтны. Но да кытчö öнi сы увья воштiсян? — Черкасов паськöтыштiс киэсö, гажтöма ыш ловзисис. — Да, ыстiсö телеграмма, и ковсис ветлыны. Но сэтшöм отпускыс, Васёк, мед эз и вöв. Коли гортö ловйöн, а джын год бöртi пантаси шойкöт. Сюйыштi муас да и бöр. Нельки сетöм отпусксö быдсöн эг чулöт. И бур бы эшö, некин кö бы сы бöрсянь эз кольччы. А менам жö ныв сыкöт, нылочка быдмö. Нёльöт вылас ни. Коли вот кытчöдз сы аймам ордö, а кыдз понда одзлань мамыстöг быдтыны, немись нем ог тöд.

— Да-а-а, — гажтöма гогинялыштiс юрнас Ильинов. — А сы увья одзжык некыдз оз лэдзö?

— Кин сiйö тöдö. Гижи командирыслö, но мый висьталасö — ог тöд. Некытшöм ответ кытчöдз абу.

Ёртыскöт басни коста Ильинов öтпыр-мöдöтпыр вежсьыштiс кок вылiсь кок вылö. Черкасов казялiс, тэрмасьöмöн сэк жö горöтчис:

— Мый нö тэ, Вася, чöлан, шы он сет? Тэ жö мыдз, и коккет, натьтö, доймöны. Куйлышт мун невночкасö, кытчöдз зонкаэс катер вывсис эз бертö.

— Ковсяс, тыдалö, — Ильинов жагвыв бергöтчис лиснич ладорö.

— Отсавны, батi, тэныт? — Черкасов чепöссьыштiс ёртыс сьöрö.

— Оз ков, Сашок. Кытчö тэ пост вывсит, сулав. — Вугмöм коккесö жагвыв лэбтавтöн, Ильинов иньдöтчис вывлань.

Бытшöма лонтöм горрезсянь казармаын вöлi шоныт. Аслас койка дынын Ильинов чöвтчис, пöрччасис, вель дыр видзöтiс да малалiс мыдз да пыктöмкодь коккесö, водiс. Некытшöм дума юрын эз öшшы, зонка чожа ланьтiс.

Шоччисьнытö усис недыр. Сэк кежö катеррез вылын чулалiсö удж да занятиеэз, и чожа мый быдöнныс пондiсö чукöртчыны казармаö. Эшö онувья Ильинов ылöсöдз сибалiсö ёрттэслöн тöдса голоссэз. А вот кинкö ны коласiсь жö жагвыв сибöтчис сы койка дынö, чепöльнас жмитiс зонкалiсь нырсö. Ильинов осьтiс синнэсö. Койка дынас сулалiс Толя Макаров.

— Гортын ни?

— Гортын, Толик.

— И кыдз? — Макаров мыччалiс Ильинов коккез вылö.

— Вайöтiсö тай.

— Мый, подöн ли мый ли?

— Вежöртана, не самолётöн дас километрсö.

— Вот этö здорово, — дивуйтчыштiс Макаров. — А ноко, мыччав костыллетö. Мыйкö тай оз и веритсьы да.

— Тэ мый, врач ли мый ли?

— Врач не врач, а синнэз кымöс вылын.

Ильинов пуксис койка дорыш вылö, öшöтiс увлань коккесö.

Öнi сылiсь бертöмсö казялiсö и мöдiк матроссэз, пондiсö чукöртчыны сы гöгöр, здоровайтчисö, юасисö. А Макаров, дзик быльнöй врач, видзöтiс да пешлiс эта коста Ильиновлiсь коккесö быд ладорсянь. Сiя жö сёрöнжык висьталiс:

— Пыктыштöмöсь жö невночка подöн мунöмсяняс, но этаись повны нем. Свадьба вотöдз быдöс чулалас.

Сетiсö команда построеннё вылö. Быдöнныс сьöрсьöн-бöрсьöн иньдöтчисö петанiнлань. Дзир öтнас Макаров кольччис сулавны ёртыс дынын, видзчисис. Ильинов перыта кöмасис-пасьтасис, и öнi нiя öтлаын ни, кыдз и пыр, иньдöтчисö ёрттэзныс сьöрö.

— Рад ме, Вася, тэ понда. Бур, что сувтiн. А тöдан жö кöть он, кытшöмöн ми тэнö сэк паровозыс увтiсь кыским? — Макаров, аслыс казявтöг, йыг-йыг-йыг пыркнитiс быдсöн вывтырнас, дзик сы вылö казявтöг кисьтiсö ведрапонiсь йыа ва. — Сiя кадö тэ вылö ме, батя, эг ни надейтчы.

— Вот сiйöн, что эн ни надейтчы, ме нарошно и сувтi, — шутитыштiс паныт Ильинов. Нiя сибöтчисö быдöнныс дынö, сувтiсö стро-йö, ёрттэзныс коласö, ордчöн öтамöдкöт, сiйöн, что кыкнанныс вöлiсö öтсувдаöсь, да и не только. Быдöсся, мый йитöтiс нiйö öтамöд коласын медодзза жö годö, дак этö сьыланкыв. Кыкнанныс, кыдз Ильинов, сiдз и Макаров, любитлiсö сьывны. И не только любитлiсö, но и вермисö. А сэтчö жö эшö кыкнанныс вöлiсö тенор голосаöсь. Стройын жö сьыланкывтöг матроссэз и оськöв ылына оз ветлö. Мунö я, шуам, матросня павжун вылö камбузö, бертö я сэтчинсянь бöр, оськалö я занятиеэз да удж вылö, то ли ны вывсянь, петас я рытнас прогулка вылö, сьыланкыв ныкöт пыр öтлаын.

Вот и часöт. Видзöтöв-керис дивизионiсь дежурнöй строй вылö, видзчисьыштiс, кöр быдöнныс сувтасö да лöньсясö, сетiс команда равняйтчыны, бергöтiс веськытлань.

— Медодзза оськöвсянь сьывтöн, шаго-о-ом арш!

Сы коста жö Макаров летыштiс Ильиновöс сосöттяс, чикыртыштiс синнас: «Мый пондöтам, батi, кыдз вöвлi?» Паныт эталö Ильинов дзир öтпырись гогиньтыштiс юрнас. Колонналöн медодзза жö оськöввезкöт, кöднасянь тöдчöмöн дрöбалö не только кок увтын му, а нельки казармалöн каменнöй стенаэс, пондöтöм öтдруг кык голосöн, кылö:

Нам не забыть печали и урона,

Когда дышала порохом страна,

Когда луганский слесарь эскадроны

Водил в бой по скошенным лугам.

Эз ештö кусны руас пöлян кодь чиння кык тенор, кыдз быдсöн дивизион, дружнöя кутыштöмöн, одзлань горöн нуöтö:

Дальневосточная — опора прочная,

Союз растет, растет непобедим

И то, что было кровью завоевано,

Мы никогда врагу не отдадим

Колана нотасянь кокнита пондöтöм сьыланкыв кусны öнi оз ни думайт. Кыным одзлань, сё горöнжыка, нельки кытшöмкö öзйöм азартöн, быд оськöв увтö дзик кералöмöн, кылö:

Сто-им на стра-же всегда, всегда!

И ес-ли ска-жет стра-на тру-да,

При-це-лом точ-ным вра-га в упор!

Крас-но-зна-мённая, даёшь отпор!

Даль-не-вос-точ-ная!

Смелее в бой! Смелее в бой!

«Бум-бум, бум-бум!» — вынöн паськалö стройлöн быд оськöв бöрсянь. А сыкöт öтласа да гора сьыланкыв, сэтшöм жö вынöн юкöвтö русö, кöвьясьö бухта весьтын, и кывтö, кывтö кытчöкö ылöжык сопкаэз весьтöт. И сысянь, что эта öтласа сьыланкылын кылö и сылöн, Ильиновлöн, голосыс, а дивизионыс топыт оськöввезын и сылöн кокшыыс, сьöлöм тырö сiйöн гажнас, кöда овлö мортлöн ыджыт да дружнöй семьяын, кöр сiя кылö сэтöн асьсö колана торöн.

XVII

Сылiс лым. Кушамисö изъя сопкаэз. Тöв да тулыс коласын пессьöмыс кытчöдз и эз на чулав, но кадыс босьтiс ассис. Бухта, кöда тöвбыт шоччисис йы увтын, оссис. Дзик ловзьöм дыр узьöм бöрсянь, öнi сiя дугдывтöг вöрöтчис пирс сайын, кышöтiс аслас сьöкыт волнаэзöн, быгьясис берег дорас да, погоддяыс сьöртi жö, вежлiс ассис рöм. Пемыт да дышвевья вöвлi сiя туман коста, свинец рöма сьöкыт да лöгöн чепсасись — тöла погоддяö, зелёнöй мич чужöма да пыдöсöдз шуч тыдалана, видзöтны кö сы вылö вевдöрсянь — мича да шондiа кадö.

Саймис тöвся онiсь и природаыс. Нюдзмисö пу уввез. Вужжезöт вывлань лэбтiсян соксянь да дзирыт шондi югöррезсянь пондiсö тырасявны почкаэз. Югыт-зелёнöй рöма, том да тшöк луд, кöда дзик пидзыртчис, петiс иззэз коласöт, перыта вевттис му. Быдöс ловзьöмыс лöсьöтчис быдмыны, цветитны, овны.

Сибöтчис навигация — сьöкыт, но гажа кад. Катерниккез лöсьöтчисö тактическöй занятиеэз кежö. Командаэз, кöдна чулöтiсö тöвсö берег дорись казармаэзын, öнi вöлiсö вуджöтöмöсь катеррез вылö. Лунöн и ойöн орслiсö тревогаэз. Учебно-боевöй бöрсянь лэбтiсьлiс воздушнöй, воздушнöй бöрсянь — химическöй. Быдыс кежö ны коласiсь колiс лоны готовöйöн, быдсö пантавны чужöмöн. Сiдз эта лöсьöтчöмын и чулалiс месяц. А кöр катеррез вöлiсö лэдзöмöсь ва вылö, плавсоставлö локтiс приказ — лоны готовöйöн вуджны гожумся базаö. Öнi тревогаэсö пондiсö орслыны эшö одззася частожык, но тöвся базаö вуджöм кытчöдз кыссис.

Нiя луннэзö, кыдзкö асывнас, развод бöрсянь, мичман Елухов иньдöтiс Ильиновöс штабö, дивизионiсь командир дынö. Причинаыс вöлi тöдтöм, и зонка повзьыштiс. Но керны вöлi нем, ковсис мунны.

Штабас ни, тöдса ыбöс одзын, Ильинов сувтчыштiс, лöсьöтыштiс вылас роба — сiдз шусьö матроссэзлöн быд лунся уджалан форма,— жагвыв ёркöтчис, пырис.

Пызан весьтö мышкыртчöмöн, командир лыддьöтiс кытшöмкö картаэз. Сiя перыта дзар керыштiс локтiсь вылö, кывзiс доклад, мыччалiс, кытчö пуксьыны, пондiс дзимлявны пызан вывсис. Эта коста Ильинов ас кежас сё эшö вынсьöтчис вежöртны, мый видзчисьö сiйö командиркöт видзчисьтöм пантасьöм бöрсянь.

Капитан-лейтенант öзтiс куритны, папироскаись лэдзöм тшын палак пыр лукавöя видзöтöв-керис Ильинов вылö.

— А гажтöм сё жö, Ильинов, служитнытö. Сьöкыт и гажтöм. — Ачыс сiя бокöмоз чукыльтыштiс юрсö, одззакодь лукавöй выраженнёа синнэзöн бытьтö одзлань эшö содтiс: «А ноко мый тэ меным эта вылö висьталан?»

— Эг вежöрт, ёрт капитан-лейтенант.

— Полан, натьтö, веськыта висьтавнытö? Да? Шыасьтöг ни Ильинов жмитыштiс пельпоннэзнас.

— Да, Ильинов. Служитам ми мирнöй кадö, висьтавны мöднёж — велöтчам. И ась эта уджыс и некокнит, ась мыйöнкö и вачкисьö воюйтöм вылö, сё жö сiя не настоящöй. Этасянь уналö тiян коласiсь и думайтсьö сiдз, что весись торкам вын да кад. Видзöта вот ме, Ильинов, тэ поведеннё вылö и адзза, что тэныт, да и быдöнныслö, натьтö, настоящöй дело колö. Но миян задача — велöтчыны. Мед ковсяс кö, шуам, мыйись мый — лоны кöть кöр, кöть кытшöм кадö готовöйöн быдöс кежö. А эта понда колö тöдны и оружие, кöда миянлö сетöм, и бойлiсь тактика, и дисциплина. Сiдз эд, натьтö, Ильинов?

— Точно сiдз, ёрт капитан-лейтенант.

— Вот и ме тэныт сiйö жö баита. А öнi висьтась, кыдз тэнат здоровье? Бытшöма я коккет вылын сулалан, да он я думайт недырик кежö гортö ветлыны?

— Здоровье бур, ёрт капитан-лейтенант. Коккез вылö ог норась. А гортö?... — Эстöн Ильинов недырик кежö лöньсис.

Кинлöн матроссэз коласiсь оз овлы желаннё петавны служба коста отпускö кöть кыкись, кöть куимись, мед только лэдзисö. Вöлi сiя и Ильиновлöн, кöда нёль годся служба коста отпускас и öтпырись эз петав. Вына вöлi эта желаннёыс Катяыс мунöм вотöдз. Сэк Ильинов тöдiс, веритiс, что гортын сiйö видзчисьö морт, кöдакöт нельки недырик кежö пантасьöмыс лоас сылö ыджытся-ыджыт гаж туйö. А öнi? Öнi эта гаж вылö надейтчынытö эз ни позь. А и вöлi кö талун Ильинов оланын мыйкö сэтшöм вылö вачкисянаыс, дак не гортын ни, а татöн, городас.

Госпитались бертöм бöрсянь зонка гижис Мариналö медодзза письмо, кöда вылö ответсö видзчисис лунiсь лун. Эта видзчисьöмыс лоис Ильинов понда аскоддьöм да колана гажöн, янсöтчыны кöдакöт некытшöм охота эз ни вöв. Сэтчö жö и служитнытö зонкалö кольччис джын год мымда, кöда и отпусктöг чулалас. Сiйöн паныт командирыс юалöм вылö öнi сiя горöтчис:

— И гортö мунны ог думайт.

— Дак тэ жö кытчöдз эн на отпускас петав.

— Точно сiдз, ёрт капитан-лейтенант. Одзжык эг, а öнi сiйö меным нем вылö ни.

Капитан-лейтенант нырыштчыштiс быдсöн мороснас пызанпöв вылö, мыйкö дырна чöлöмöн видзöтiс Ильинов ладорö, дзик вынсьöтчис адззыны да лыддьöтны сы чужöмись мыйкö нетыдаланаö, но сiдз нем и эз адззы. Одззамоз чöлöмöн да ас кежас дивуйтчöмöн, сiя жмитыштiс пельпоннэзнас: «Ог вежöрт, мый тэкöт сэтшöмыс, Ильинов?»

— Тэнö мый, обидитiс кин?

— Да не, ёрт капитан-лейтенант. Некин менö эз обидит, не челядь садiсь жö. Служита медбöрья год, чожа пондöтчас навигация, тактическöй занятиеэз...

— Но и мый этаись?

— Да нем, ёрт капитан-лейтенант. Тi жö асьныт дзир неважын висьталiт, что миянлö колö лоны готовöйезöн, быдöс тöдны, кужны, вермыны. Сiдзкö, отпускö мунны некöр, сытöг чулалас.

— Тэнат мый, решеннё сэтшöм примитöм?

— Решеннё, не решеннё ёрт капитан-лейтенант, но сiдз ме понда лоас буржык.

— Буржык я, Ильинов? Тэ жö неважын госпитальсянь. Сувтны эшö бытшöмик коккет вылö эн ешты. А тактическöй занятиеэз коста физическöй нагрузка лоас öддьöн ыджыт. Сiйö тэ и ачыт вежöртан. Вот ме и думайта — не умöль бы тэныт ны одзын шоччисьыштны.

— Сiдз, батi, ёрт капитан-лейтенант. Только ме здоровье понда тi полат весь, и некытшöм отпуск меным оз ков.

Командир веськöтчыштiс аслас пызан сайын, мыйкö дырна думайтыштiс ас кежас.

— Но мый жö сэк, Ильинов, воля тэнат. — Паськöтыштiс öтмöдöрö киэсö, содтiс: — Басни сэк миян баитсис. Верман мунны.

Ильинов петiс.

Командир дынсянь зонка иньдöтчис веськыта катер вылö. Чожа мый сiя сюрис аслас ёрттэз коласö, кöдналö, тыдалö, öддьöн охота вöлi тöдны, кытшöм юöрöн сiя бертiс.

Володя Панов панталiс Ильиновöс мöдiккезся одзжык, эшö пирс вылын, сэтöн жö и юалiс:

— Кытшöм юöрöн, Васёк, командирыс дынсянь?

— Öддьöн нельки бурöн, — шыасис паныт Ильинов. — Сiдз и тöд, талун-ашын вуджам гожумся базаö. Гожумбыт кежö пондöтчасö тактическöй занятиеэз, видзсьы тöд.

— Этö ме и тэтöг не умöльжыка тöда, что чожа гожумся базаö, тактическöй занятиеэз вылö. Не сы йылiсь тэнчит юалöны. Тэ висьтав, кöрсянь гортö отпускас мунан?

— Кытшöм эшö отпускö? Кысь тэ сымдасö босьтiн?

— Мыйлö нö сэк штабас командирыс корлiс?

— Здоровье йылiсь тай юасис, — верма, ог медбöрья навигациясö чулöтны. А отпуск йылiсь и басни некытшöм эз вöв, — бöбöтiс Ильинов, мед только перытжыка мездiсьны эта басниись.

XVIII

Сiя жö лунö, павжун коста, кöр матроссэз унажыксö узисö, Ильинов пукалiс öтнас ленинскöй комнатаын, гижис Мариналö мöдiк письмо.

Öтöрас погоддяыс вачкисис праздник вылö. Гажöн öгралiс шондi. Руалiс кокнит тöв. Осьтöм öшынöт кылiс кайезлöн горалöм. Сэтi жö, öтлаын сола ва кöркöт, кöда Приморьеын быд коста да сэтшöм вынöн патшкö нырö, жырас сибалiс польдöм почкаэзлöн дук. А репродукторсянь, кöда сулалiс осьта öшын вылын, жыр пасьта паськалiсö кокнит да гажа, кыдз и ачыс тулысыс жö, музыка шыэз.

Нывкалö письмоыс вöлi гижöм ни. Öнi сiйö кольччис дзир лэдзны. Сiйöн Ильинов öддьöнсö эз тэрмась. Ки долонь вылас пельбокнас нырыштсьöмöн, зонка пукалiс пызан сайын, видзöтiс осьта öшын сайын жагвыв окласян пуэз вылö, думайтiс.

Эта кадö репродукторсянь сибалан музыка шыэс орисö. Недырик кылiс дикторлöн баитöм. Аслас думаэз коласын сылiсь баснисö Ильинов кывзiс умöля, бытшöмик эз вежöрт. Но вот шыасис баян. Зонкаöс саймöтiс тöдса мелодия. Ильинов кытчöдз эшö эз вежöрт, мый эта сэтшöмыс, сэтöн жö нюжöтчис кинас репродуктор бердöдз, лэдзис горöнжыка. А эта коста сэтчинсянь, кылiс: «Ой тэ, Ии-и-иньва, гора бе-е-ерега-а, ась паськалö тэсянь гор...».

Öнi вöлись Ильиновöс дзик петшöралiсö. Зонка перыта чепöссис кок йылас, сэтöн жö бертiс бöр, пуксьыштiс репродуктор дынö, лэдзис сiйö быд горöн.

«Лишь советскöй миян го-о-оддэзö счастьеасис Иньва дор», — горöн паськалiс ленинскöй комната пасьта.

Неыджыт жырокас, кöда öнi вöвлытöмöдз югмис да гажмис Ильинов син одзын, сьыланкылыслö лоис дзескыт. Осьта öшынöт сiя чепöссис öтöрö, пондiс паськавны тулысся мича руас, саймöм почкаа пуэз да пым шондi югöррез увтын чежмасян бухта весьтöт. Но Ильиновлö и эта эшö вöлi етша. Зонкалö колiс, мед сы Коми му йылiсь этö гажа сьыланкывсö кывзiсö быдöс сылöн ёрттэс.

— Миянлiсь эд! Миянлiсь сьылöны! — радувья горöтыштiс Ильинов, уськöтчис казармаись репродуктор дынö, кöда шоччисян кад кежö вöлi пöдналöм и öнi чöлiс. — Кывзö жö! Ёрттэз! Миянлiсь! Миян кыв вылын! — Ильинов, кыдз позис горöн, осьтiс репродуктор. И öнi омöн казарма пасьта ни, тöдса да вежöртана дзир сылö öтнасыслö, но кывлытöм да нач тöдтöм быдöнныс понда, паськалiс: — Рöма ыббезны-ым пасьтаа-а-алiсö урожайнöй мöдöтчан, — Ильинов сьылiс, öтлаын.

Казарма саймис дзик тревога коста. Мукöдыс пуксисö асланыс койкаэз вылö, вынсьöтчисö вежöртны, мый лоис сэтшöмыс, мукöдыс, онувья, перыта пондiсö кöмасьны-пасьтасьны. А кинкö старшинаэз коласiсь лöгвевйöн горöтчис:

— Бöбмин, Ильинов? Тэ мый кучиксит петан?

Но сiя кадö Ильинов синнэзын, да и быдсöн сыын, тыдалiс сымда адззывлытöм эшö эта вотöдз да сайöвттöм гаж, что обижайтчыны зонка вылö шоччисян кадö шумсö лэбтöм понда, да сэтчö жö шуны сiйö эшö и бöбмöмöн некыдз эз позь. Мукöдыс этö вежöртiсö. Сашка Черкасов, кöда сэк кежö тожö саймис ни да осьта синнэзöн кольччис куйлыны аслас ольпасьын, кывзiс радиоын сьылöмсö да сувтiс

Ильинов дор:

— Дугдö жö шумитнытö! Од разь вежöртö, — сы кыв вылын сьылöны? Мукöд коста колана сьыланкылыс мортыслö нянь пиньги овлö. А сэтшöмсö зонкаыс нёль год пытшкас первуись кылö.

Эта и былись вöлi сiдз. Кывлыны ассис сьыланкыв Приморьеын, кöдасянь сы Коми крайöдз квать тысяча километр ылына, чулöтöм кадö Ильиновлö и былись эз усьлы.

Паныт Черкасовлö одзлань некин эз ни шыась. Мукöдыс лöньсисö, пондiсö кывзыны öтлаын, кöть быдöнныс понда кыввес вöлiсö нач тöдтöмöсь да невежöртанаöсь.

Кöр репродукторын медбöрья кыввес лöньсисö, мыйкö дырна казармаын вöлi шы не тöв. А дыр мыйись Черкасов горöтчис:

— А бытшöм эд кылö мелодияыс. Жаль — кыввес невежöртанаöсь. Но да куль ныкöт, кыввескöт. Ачыт тэ нiйö тöдан. А мелодиясö ми часöт велöтам. — Черкасов дышöтчытöг кыскис койка увтiсь баян, пуксис, кытчöдз эз вун тöдвывсис мелодияыс, пондiс орсны.

Ильинов сибöтчис матöжык ёртыс дынö, мед кывзыны, а то и отсавны сылö кытöнкö колана местаын, ковсяс кö сымдасö керны. Зонка кыскис кинкö койка увтiсь табурет — матросскöй кыв вылын «банка» — сувтöтiс, пуксис, нырыштсис гырдззанас ордчöн сулалан тумбочка вылö, пондiс кывзыны. Отсавны Черкасовлö немын эз ковсьы. Зонка кокнита кутiс неважын кылöм мелодиясö, жагвыв да негорöн пондiс орсны. И öнi, кöр эта тöдса ни быдöнныслö мелодия мöдöтпыр тыртiс матросскöй казармасö, сiя жö, кыдзкö видзчисьтöг да казявтöг, вились вуджöтiс Ильиновöс гортö, уськöтiс тöдвылас Катякöт дружитöм, мый эшö неважын вöлi сы понда сэтшöм жö донаöн да коланаöн, кыдз и гортыс.

Сулалiс февраль. Погоддяыс вöлi не öддьöн кöдзыт, но лымьялiс да нöбöтiс вель ёна. Неделя сьöрна турöпалiс сыбурна, что öтöрас кöть эн и пет, не син, не пель эз тыдав. Омöн туйес вöлiсö сыöддьöн тыртöмöсь — деревняись деревняö не вöлöн, не подöн и мунны эз позь. И кöть суббота кежö погоддяыс ештiс пуксьыны бöр, Лунинасянь Чазоваöдз туй вöлi писькöттöм. Эта увья чазовскöй челядь, кöдна велöтчисö лунинскöй школаын, эшö одзлань баитчисö, что выходнöй кежö гортö оз мунö.

Уроккес бöрсянь Ильинов да Катя петiсö öтдруг школаись, иньдöтчисö почтаö, мед сэтчинсянь звонитны гортö. Погоддяыс сулалiс мича да лöнь. Шондi югöррезсянь вöлi гажа.

Öтiк телефон, кöда йитöтiс Чазовасö Лунина селокöт, сiя лунö эз уджав, звонитнытö гортöдз эз позь. Сiйöн, кöр Ильинов да Катя нем сорöн петiсö почтасис бöр, поспуэз кузя жагвыв лэдзчытöн, нывкаыс горöтчис:

— Не ветлыны я сё жö гортö, а?

— Дак ми жö быдöнныскöт öтлаын баитчим — не мунны.

— Баитчынытö баитчим. Но эд гортын эта йылiсь оз тöдö и, натьтö, видзчисьны миянöс пондасö.

— Сiдз, батi, да кытчö нö туйтöгьяс мунан? — Пондылiс панöвтны нывкасö Ильинов. Эта вылö мöдыс перыта горöтчис:

— А тэ мый бöра и повзин ни? Тожö меным зонка морт... — Катя зэркыта öвтыштiс кепися кинас зонкаыс ладорö, оськöв кыным ылына перыта вешшыштiс сы дынiсь.

— Да уж, натьтö, и повзи ни, мыйнö бы эг да. Адззöм тожö мыйöн полöтны. Да колö кö тэныт öддьöн, дак ме часöт жö верма мунны, — шыасис паныт Ильинов. Катя сэк жö сувтiс, бергöтчис бöр, одззамоз зэркыта висьталiс:

— Сiдз бы перво жö и шуин, — а одзлань лöньжыка ни, унажыксö ас понда: — Эз жö, батi, вöр коласöттяс сыбурна тырт.

― Мунам сэк. Ме часöт только сумкаöс босьта и бöр.

— И ме тожö. Кин одзжык петас, деревня саяс видзчисяс.

Сiдз эта лунö нiя кыкöн и петiсö туйö.

Лунина бердсянь ыббес кузя самöй вöр бердöдз следыс вöлi писькöтöм ни: кинкö эшö ны вотöдз вöлöн-додьöн петкöтöм турун. Кузь вöр коласöттяс вились усьöм лымыс вонясянся вылынжык эз вöв. Ась и сьöкыткодь, но сы сувдасö пазитны позис. Ильинов ветлiс нинкöммезöн — некытшöм мöдiк тöвся кöмкöт сiя кадö зонкалöн эз вöв. Вежöртана, что шуч туй сiя мунiс одзас. Нывкаыс, аслас вочöм пимиэзöн, оськалiс бöрсяняс.

Джын туйсö мунiсö öтмоз. А сэтöн Катя тöдчöмöн пондiс кольччыны. Кыным одзлань, сiя сё частожык баитлiс: «Но жö тэ, Вася, кытшöм. Видзчисьышт невночкасö. Мыля нö колян?» То ли: «Кытчö тэ сiдз тэрмасян? Он разь адззы — ме мыдзи ни?»

Ильинов вежöртiс, что мунны пимиэзöн сэтшöм багыль туй кузя нывкаыслö сьöкыт. Кадiсь кадö зонка сувтчышалiс, то ли пуксьывлiс кытчöкö недырик кежö, видзчисис, öтлаын недырик шоччисьлiсö. Сы коста жö нывкаыс одзлань корис: «Тэ, Вася, только сэсся эн ни тэрмась, но? Абу ни эд этасянь öддьöн ылын, жагвыв локтам. А то ме нач сувта». Вились мунiсö одзлань. Нывкалöн простöй мешöкыс, неыджыт да тожö простöй туисокыс, кöдöн сiя быд коста новйöтлiс сьöрас юан нето йöв, важын ни вöлiсö сюйыштöмöсь Ильинов мешöкö. Но öнi нельки эта эз ни отсав, Катялöн етш эз сод. И кытшöм бы жагöн зонка эз мун, вöтчыны сы сьöрö мöдыс некыдз эз вермы, сё кольччис да кольччис.

А кадыс эз видзчись. Казявтöг чулалiс воробей оськöв кузя тöвся лун. Шондiыс, кöда вöр сайöт ыскöвттöн, кодьöнсö и сiдз эз мыччась, медбöрын ляпкисис-пуксис. Пондiс пемдыны.

Локны горт деревняöдз и былись кольччис неылын. А сэтöн кытшöмкö кадö Ильинов казялiс, что сы кузя волоксö одзас дугдывтöг пазитöмсянь сiя тожö мыдзöм. Сэтчö жö эшö öддьöн косьмис горш, охота вöлi юны.

Пемытсорнас ни нiя жагвыв петiсö асланыс ыббез вылö. Горт деревняöдз кольччис кык километр ылына. Ыббес кузя туйыс вöлi сiдз тыртöм-нöбöтöм, что пемытiнас сыись нем тор эз тыдав. Ильиновлö ковсис керны йылажык бедь. Сiйöн, одзаныс тюкöтöмöн, нiя и иньдöтчисö одзлань. Час кынымöн мунiсö медодзза километр. Бур кöть сiя ни, что эстöн туйыс кыссис вылын да паськыт ыб кузя, вились пуксьöтöм лымыс вöлi непыдын. Но медбöрья километрсö ковсис мунны лажмыт видз кузя, кытчö сiйö нöбöтöм пидзöсся джуджытжыка. Эстöн вöлись нывка нач и сувтiс, öнi сiя эз вермы оськавны нельки Ильинов бöрсянь, выныс колис. Локтiс сэтчöдз, что атшалöм, медбöрын нывка лэдзчисис лым вылö, синваэс сорöн ни висьталiс:

— Кöть вий, Вася, сэсся ог вермы. Ильинов бертiс бöр, пуксис ордчöн.

— Мый, бытьтö и ме сьöрö ни он вермы вöтчынытö?

— Ог, Вася. Весь тэ только менö кывзiн да согласитчин муннытö. Сiдз или не сiдз, споритны öнi нывкакöт Ильинов эз понды, тöдiс, вежöртiс — некытшöм басни нылö оз отсав. Мед лöньсьöтны нывкасö, паныт горöтчис:

— Öнi бöр сё ни нем он бергöт, колö мунны. Эз ни этасянь уна кольччы. Адззан, он деревнясис биэс тыдалöны ни.

— Адзза, Вася, но ог чайтчы.

— А буржыка кö ме тэныт туйсö понда тальны?

— Ог тöд, пондыв.

— Пукалышт сэк невночкасö, шоччисьышт, — Ильинов веськöтчис, бедьнас одзас тюкöтöмöн, иньдöтчис одзлань. Витдас оськöв бöртi зонка бергöтчис, паськытжыка следитöмöн, бертiс бöр. Сэсся сiдз жö керис эшö öтпырись да вöлись сэк чеччöтiс нывкасö лым вывсис. Тальöм канаваöттяс Катя жагвыв оськалiс, но одзлань бöра эз вермы. Эстöн сiя вились пуксис лым вылö, мед шоччисьыштны, а эта коста Ильинов одззамоз кутчис пазитны туй. Этатшöм уджсянь зонкаöс чожа дзик кöтöтiсö. Сы вылын увдöрись паськöмыс вамис люзь, кöда бердсянь кайис пар. Горшыс косьмынытö тожö эз дугды. Туйсö пазитiкö, Ильинов кадiсь кадö чапкышалiс öмас кöдзыт лым, кöть и одзлань ни тöдiс, что сёйны сiйö жарувья оз позь.

Медполöтанаыс, кöда йылiсь зонкалöн кытчöдз и дума эз вöв, видзчисьöм эшö одзаныс. Вель дырöн да вöрöтчытöг лым вылас пукавтöн нывка перыта сайкалiс. И сiя кадö, кöр Ильинов бердiсь кайис пар, мöдыс пондiс кынмыны. Мыйкö дырна, синваэс пыр ни, Катя эшö норасис он петöм вылö, а медбöрын и нач онмöссис. И мымда бы Ильинов эз мырсьы, кыдз эз пондыв, саймöтны нывкасö сiдз и эз вермы. Этасянь зонка сэтчöдз повзис, что повзьöмувьяс синваэзöн тырöм синнэзöн адззынытö и нач дугдiс. А видзчисьны кытшöмкö отсöт вöлi некинсянь, колiс мыйкö керны. Ильинов чапкис бедь, босьтiс нывкасö киэс вылö, туйтöг, адззытöг иньдöтчис деревня ладорö. Вель ёна мыдзöмлö ни этатшöм ношаыс вöлi сьöкыт. Кыкдас-куимдас оськöв бöртi ковсис сувтчывлыны, ловзисьны да чапкыштны öмö лым. Буржык бы вöлi локны öтнаслö деревняö да корны отсöт, но кольны нывкасö öткöн пемыт кадö туй вылас Ильинов эз лысьт.

Ойшöр гöгöр, кöр деревня вылын биэс эз ни сотчö, атшавтöдз мыдзöмсянь тогзян коккес вылын Ильинов сибöтчис аслас ношаöн нывкаэс посöдз дынöдз, ёркöтчис. И вöлись сэк, кöр чöвтöм-пöрччалöм Катя шонавтöнняс саймис аслас сьöкыт да кыз онiсь, зонка иньдöтчис гортас. Кытшöм бы сiя эта ойö эз вöв мыдз, коккес вылын эшö видзсис. Дзир ашынас, кöр зонка саймис потласьтöдз висян да бергалан юрöн, вежöртiс, кыдз сылö дöнзис эта ойö Лунинасянь гортöдз туй колас. Жарувья горш косьман вылö кöдзыт лымсö сёйöмсянь Ильинов кык неделя сьöрна эз чеччыв ольпась вылiсь.

А сэк сетiсö экзаменнэз дасöт класс понда. Быд экзамен бöрсянь лун нето кык кежö челядь вовлiсö гортö. Сiя лунö сетiсö химия. Кыдз и пыр, нывкаыс отвечайтiс бöртiжык. А кöр петiс, Ильинов сiйö видзчисис ни, мед öтлаын мунны гортö.

— Мунам, Вася. Только меным медперво гладитчыштны колö. Кежалам, батi, миянöдз, он дышöтчы дак?

Лунинаас нывка олiс частнöй квартираын, кытшöмкö род кодь тётка ордын, кытöн эта вотöдз Ильинов вöвлi унаись ни.

— Кежалам, колö дак, — шыасис паныт зонкаыс. Öтлаын иньдöтчис Катя ордö.

Сiя лунö погоддяыс сулалiс шоныт, нельки жар. Пырны медперво керкуöдззас зонка эз и мöд, кольччис пукавны öтöрись посöдзын. Но бöртiжык Ильиновлöн пондiс косьмыны горш, ковсис пырны.

Сэк кежö Катялöн уджыс вöлi керöм ни. Нывка дзимлялiс пызан вылiсь. Медперво сiя нуис да тэчис кытчöкö гладитöм паськöм, сёрöнжык кутчисис утюг бердö.

Юöмыс бöрсянь ни Ильинов сулалiс матын сэтöн жö, нем керöмсянь видзчисис да видзöтiс нывкаыс удж вылö. Эта коста Катя и сибöтiс пым утюгсö зонкаыс кисой бердö, юалiс:

— Пым?

— Пым тай, — шыасис паныт Ильинов, но мездiсьны утюг бердiсь: вешшыштны бокö нето татшкыны сiйö ки бердсис — эз и думайт. Ачыс Катя утюгсö мылякö тожö эз мынöт, одззамоз зэв видзтöн, юалiс:

— Кыдз нö терпитан?

— Терпита тай кыдзкö, — зубытсяняс чуть я не синваэзсорöн ни горöтчис Ильинов, но и эта бöрсянь эшö кольччис сулавны вöрöтчытöг. И вöлись сэк, кöр утюгыс увтсянь пондiс кывны палитчöм яй дук, нывка кватитчис, нетшкöвтiс утюгсö асланяс, да сёрöн ни. Пым утюглöн следыс сiдз печатьöн и кольччис зонкаыс кисой бердын. Эстöн вöлись Катя вежöртiс, мый керис, да ачыс жö медодз и пондiс горзыны. Нывка повзис сыись, что Ильинов часöт вермас вачкыны нето обидитчас да лöгасяс пыр кежö. Но не öтыс, не мöдыс эз лоö. «Бурдас свадьба вотöдззас», — думайтiс ас кежас Ильинов. Эта вылын быдöс и чулалiс.

Öнi, кöр Катяыс сыкöт эз ни вöв, а неколана юöрсянь одззася обидаыс да сьöлöмшогыс чулавнытö бытшöмик эз на ештö, кадiсь кадö, ась и не сэтшöм вынöн, нiя сё эшö сетлiсö тöдны ас йывсиныс да уськöтлiсö тöдвылö быд берсясö — Ильиновлö колiс бы лöгасьны нывкаыс вылö пыр кежö. Но нельки сэк некытшöм лöг Катя вылö эз вöв. Нач мöднёж. Талун сылö, кыдз некöр эта вотöдз, лоис жаль нывкасö, жаль не сысянь, что öштiс сiйö пыр кежö кыдз ас понда колана мортöс, а сысянь, что мöдыс, кыдз думайтiс Ильинов, сэтшöм радейтöмсö некöр да некинсянь оз пантав. А кöр тöдса сьыланкыв вились казьмöтiс зонкалö аслас горт йылiсь, уськöтiс тöдвылö Катякöт дружитöмсö, сiя вежöртiс: решеннё не петавны гортö отпускö — примитiс весь. Ильинов тöдiс, что гортын öткаса мамыс сытöг гажтöмтчö, и вовлыны недырик кежö, кöть сылö мыччасьöм могись, вöлi бы öддьöн бур. Но, öткö, сiйöн, что решеннё вöлi примитöм бöра жö нывкаыс мунöм увья, а, мöдкö, вежнытö сiйö бöр öнi эз ни позь, — эта йылiсь зонка вынсьöтчис одзлань не думайтны.

Сетiсö команда построеннё вылö. Черкасов орсны дугдiс.

Развод бöрсянь быдöннысö нуöтiсö катеррез вылö. Рытöдз кольччöм кад чулалiс одзланься лöсьöтчöмын.

Сiя жö ойö дивизионiсь быдсöн плавсостав вöлi лэбтöм учебно-боевöй тревогаöн кок вылö. А чожа мый катеррез, öтiк бöрсянь мöдiк, пондiсö янсавны пирс бердiсь, сьöрсьöн-бöрсьöн петiсö бухтаö. Дивизионiсь командирлöн катерыс мунiс медодзын. Эта сьöртöт ни быдöнныс вежöртiсö: мунöны вель дыр кежö гожумся базаö, тактическöй занятиеэз вылö.

XIX

Нёль месяц сьöрна торпеднöй катеррез, а öтлаын ныкöт и быдсöн плавсостав, олiсö ылiсь гожумся базаын. Быдöс эта кад чулалiс боевöй тактика велöтöмö. Эз петав öтiк сэтшöм лун, час нето минута, кöдö позис бы лыддьыны одззася кокнитжыкöн. Объявитöм готовность дзик домалiс быд мортсö аслас боевöй пост дынö. Дугдывтöг орсiсö учебно-боевöй тревогаэз. Луннас я ойнас, рытнас я асывнас, кöть кытшöм погоддя коста уннялiсö сиренаэз. Буржык погоддяö катеррез кодьöн эз и пыравлö асланыс стоянка вылö, бухтаö. Быдöс тактическöй занятиеэз, унася-уна варианттэзын, чулалiсö мореын, учебнöй полигон вылын. Но эз кö сет петны мореö штормовöй погода, катерниккез велöтiсö береговöй тактика. Тревогаöн лэбтывлiсö нельки сэк, кöр атшавтöдз мыдзöм матроссэз мышкыртчывлiсö недырик кежö пым флотскöй борщöн мискаэз весьтö. Сэтöн жö ковсис вунöтны сёян йылiсь, тэрмасьны, мымда чож, боевöй пост вылö.

Тактическöй занятиеэз катеррез чулöтлiсö частожыксö быдсöн дивизионöн нето бригадаöн. Но вöвлi, кöр нiя жö петавлiсö ученнёэз вылö öтлаын мöдiк боевöй корабллезкöт, мед велöтчыны нуöтны «противниккöт» бой öтласа вынöн. Сэтшöм занятиеэз коста катерниккезлö вöвлi унаöн сьöкытжык. Бергавны ковсис бытшöма, мед ештыны аскадö быд колана пельöсö: мунны торпеднöй атакаö, кужöмöн кольлавны сетöм курс сьöртi ыджытжык боевöй корабллез нето грузовöй судноэз — сайöвтны нiйö «противник» шогья, кужöмöн нуöтны öтласа «бой», вермыны сайласьны ас катерöн уськöтчöм «противник» шогья да петны дзоньöн кöть кытшöм обстановкаись, кусöтны пожар, öшöтны дымовöй завеса, тупкавны корпусын пробоинаэз, отсавны ранитöм ёрттэзлö, вежны нiйö боевöй пост вылын. А эта понда колiс, мед катер вылiсь неыджыт боевöй расчёт уджалiс кыдз öтiк механизм: бытшöма кывзiс командирлiсь быд командасö, колана кадö сэтшöм жö бытшöма тыртiс кöть кытшöм сувтöтöм задача.

Кытшöм бы бура эз лöсьöтчы катер вылiсь команда эна тактическöй занятиеэз кежö эшö тöвся базаын, велавны ны дынö медодзза кадö вöлi не сэтшöм кокнит. Объявитöм готовностьсянь да тревогаэзсянь ыджыт напряженнё перыта мыдзöтiс быд мортöс. Медöддьöн сiя сетiс тöдны ас йывсис томжыккесö, кöдна служитiсö катер вылын медодзза годöн и велавны быдöс дынö кыдз колö эшö эз ештö. И кыдз бы нiя эз старайтчö керны быдöс колананёж, мымда бы эз пуктö этаö вын, кытöнкö да мыйöнкö сё ни сорасьлiсö: мыйкö керисö одзöв, кытöнкö сёрмывлiсö, а частожыксö вунöтлiсö керны сiдз, кыдз колiс. Этасянь и ковсис öтiк и сiйö жö тактическöй задачасö решайтны унапöв.

Нач мöднёж мунiс служба Ильиновлöн. Тактическöй занятиеэс кежö медодзза жö лунсянь зонка сувтöтiс ас одзас öтiк задача — пуктыны ассис быдöс вын да кужöм. Эд эта понда Ильинов и служитiс ассис срочнöй служба, и керны сiйö вермис: условиеэз быдöс вöлiсö. Уставвез да флотскöй дисциплина зонка тöдiс бытшöма, не умöльжыка — и материальнöй часть. Не весь сiя нёльöдз год ни нуöтiс службасö катер вылын, не весь лыддиссис отличникöн да класснöй специалистöн. И кöть небытшöм проступок понда медбöрья кадö и ковсис янсöтчыны этна отличительнöй знаккезкöт, сылiсь тöдöмсö, кужöмсö да вермöмсö мырддьыны некин эз вермы, нiя пыр вöлiсö сыкöт аскöттяс.

Быдöсся этася вöлiсö Ильиновлöн и мöдiк причинаэз, кöдна тожö лэбтiсö настроеннё, содтiсö вын, отсалiсö, кыдз позьö бытшöмжыка нуöтны сылö служба. Этна причинаэз коласiсь медтöдчанаыс — чеглалöм коккез вылö вились сувтöм. Мöдiк сэтшöмыс — сьöкыт кадö госпитальын Маринакöт тöдсасьöм. Куимöтыс — медбöрья служитан год, кöда чулавтöдз кольччис нач не уна ни и кöда чулалас сыным перытжыка, кыным буржыка пондас мунны служба. Этасянь нёль месяц сьöрна öтпырись эз вöв сэтшöмыс, мед Ильинов мыйöнкö сорасис, кытчöкö сёрмис, мыйкö эз куж да эз вермы, нето керис умöльжыка сысся, кыдз колiс да позис. Ученнёэз коста сы торпеднöй аппаратiсь эшö öтiк торпеда эз мун бокö: вöлiсö «взрывайтöмöсь да вöтьöмöсь» дас кыным «неприятельскöй» корабль. «Бой» коста катерсö сайöвтöмись сылö неöтпырись ковлiс öшöтны дымовöй завеса и быдпырся нылöн катерыс кужöмöн сайласис «противник» шогья, дзоньöн петавлiс сы прицел да бомбаэз увтiсь. А кынымись эта коста Ильиновлö усьлiс «тупкавны» катер корпусiсь «пробоинаэз", керны перевязкаэз «ранитöм» ёрттэслö, вежны нiйö боевöй пост вылын, кусöтны катер вылын «пожар»? Но быдöс коста Ильинов и öтiк замечаннё аслас командирсянь эз кыв. Сiдз быд лунся велöтчöмын: тревогаэзын да походдэзын, торпеднöй атакаэзын да «противниккöт» паныта тышкасьöмын — и чулалiс зонкалöн медбöрья навигация, медбöрья служитан гожум.

Джендамисö луннэз. Ыркытжыкöсь да пемытжыкöсь лоисö ойез. Пондiс вежсьыны пуэз вылын листлöн рöм: зелёнöйыс коласö сё унажык сорлассисö гöрд да веж дöмассэз. Лöньсис кайезлöн сьылöм. Öшисö син одзись быдкодь цветтэз, кöдна гожумбыт гажöтiсö синбур. Кельдöтiс да водiс кок увтö чорзьöм турун. Сибöтчис кад, кöд коста нельки причинатöг овлö гажтöм сьöлöм вылын, — ар.

Пöрисьжыккес коласын, кöдна джендöтiсö медбöрья служитан годiсь лун бöрын лун да лöсьöтчисö петны гортö, кыным одзлань, сё частожык да горöнжыка кывлiсö басниэз тöвся базаö бертöм йылiсь. Тöдчис, что этöн каднас быдöнныс мыдзисö, а öткоста и гажтöмтчисö, висьтавны кö сэтчö жö, что почтаыс татчöдз вовлiс шоча, месяц пытшкас öтпырись-кыкись.

Тревогаэз, походдэз да некокнит тактическöй занятиеэз колисö быд чужöм вылын ассиныс тöдчана след. Эстöн чулöтöм кадöн быдöнныс дзик умöльтчыштiсö, öткоста кокнямисö кок вылын, чожмисö, вынсялiсö. Быдыслöн содiс боевöй тактическöй кужöм, буржыка велалiсö асланыс оружие да материальнöй часть дынö, пыдынжыка тöдсасисö да йитсисö öтамöд коласын. И вот...

Эшö рытсянь сетiсö отбой. Локтiс приказ — лöсьöтчыны бертны тöвся базаö. «Вöлиськö», — кокнитжыка ловзисисö катерниккез. Одззася напряженнёыс, кöда не лунöн, не ойöн и минута сьöрна эз кольлы некинöс быдсöн гожумся кадö, пондiс чулавны. Сы местö жагвыв бертiсö гаж да шутитöм. Горöнжыка пондiс кывны öтамöд коласын басни, сералöм.

Бытшöма, тэрмасьтöг, ужнайтöм бöртi водiсö шоччисьны. И кöть быдöнныс вöлiсö сё эшö мыдзöсь, унаöс ны коласiсь, талун эз ни узьöт. Тöвся базаö бертöм йылiсь юöр он пальöтiс. Быдыслö вöлi охота, кыдз позьö перытжыка, лоны сэтчин, кытöн видзчисисö письмоэз, а кинöскö ны коласiсь нельки матiсь тöдсаэз.

Черкасов Сашка мыйкö дырна бергалöв-керис бок вылiсь бок вылö, бöртiжык пыдына ловзисис, горöтчис:

— Оз талун менö узьöт. Эх, ёртö ордчöн абу, — этö сiя аслас баян йылiсь, кöда эз вöв сьöрас, ученнёэз коста, и кöдакöт этöн каднас зонка ештiс гажтöмтчыны ни.

— А тэ öмнат пондыв, батi, мыйкö петас, — шутитыштiс ёртыс вылын Володя Панов. Öтi-мöдi негорöн серöмтчисö. Но и эта öтласа шуткаыс отсалiс етша. Быдöнныс томöсь, здоровöсь. И öнi, кöр петiс личытжык кад, быдöнныслö ны коласiсь лоис охота не только шоччисьны — узьны нето куйлыны не öддьöн небыт пробковöй матраца ольпась вылын, но и гажöтчыштны. Эд бытшöм настроеннё коста гажöтчöмыс — сiя жö шоччисьöм. Но мый позис керны лажмыт да дзескыт катернöй кубрикын, кытöн и бергöтчынытö кодьöнсö некытöн? Сэтчö жö не баян, не гитара некинлöн сьöраныс эз вöв. И кольччис кö мый быдöнныс понда гажöтанаыс, дак этö сьыланкыв, кöда кöть кытшöм обстоятельствоэз коста мортыскöт пыр öтлаын. Сiйöн, кöр лöньсьыштiс Черкасов вылын ёрттэслöн шутитöм, Макаров ас кежас, не öддьöн горöн, пондöтiс повтöм да мужественнöй Ермак йылiсь.

Ильиновöс, кöть сiя и куйлiс эта вотöдз куньöм синнэзöн да чöлöмöн, талун тожö эз узьöт. Зонка важын ни видзчисис Маринасянь письмо. И ась сiйö гожумбытнас татчöдз и эз вайö, сiя веритiс, тöдiс, нельки сьöлöмнас кылiс, что нывкаыссянь письмоыс эм, видзчисьö сiйö гортын, тöвся базаын. Но эта тöдöмыс öнi вöлi етша ни, ковсис унажык. Öддьöн охота вöлi тöдны талун ни, кыдз да мый сэтчин гижöм. Эта йылiсь öнi зонка и думайтiс. Но ёртыслöн пондöтöм сьыланкыв вöрзьöтiс и сылiсь сьöлöмсö. И чожа мый Ильинов аслас отсöтöн öтлаасис сы дынö.

Недыр мыйись оссис командирскöй каютаись ыбöс. Лейтенант Свиридов, пельпоннэс вылö кизявтöг кышыштöм кительöн, мыччисис да сувтiс пыранiн весьтас. Шыасьнытö сiя эшö эз на ешты, да, тыдалö, эз и мöд. Но командирлöн видзчисьтöм мыччисьöмыс сэтшöм проникновеннöя, сьöлöмсянь пондöтöм сьыланкывсö недырик кежö дзугис. Сьылiссезлöн вынсялöм ни öнöдз голоссэзныс пондiсö лöньсьыны бöр, сiйö и видзöт, — кусасö.

— Сьылö, сьылö. Абу эшö сёр. Ме не падтыны тiянöс, а кывзыны петi, — негорöн шыасис командир, дженытика дзар керыштiс часыэз вылö да öтiк кинас лöсьöтыштiс пельпон вывсис нильдöм кительсö. А кöр Ильинов да Макаров вились вынсьöтыштiсö голоссэзнысö да пондiсö сьывны одзлань, Свиридов, мед не тшыкöтны аслас мыччисьöмöн командалiсь öзйыштöм гаж, öтлаасис ны дынö.

Катер вылiсь командир вöлi не унаöн пöрисьжык аслас командася. Служитiс сiя катер вылын куимöдз год. Тавося навигация одзын, отпусксянь бертiкö, вайöтiс сьöрас лукавöйкодь да сьöд сина томыник врачöс, кöдакöт öтлаын эта бöрсянь и месяц сьöрна овны эз ешты. Пондöтчис навигация, и сiя янсöтiс том гозъясö гожумбыт кежö. Вежöртана, что öнi лейтенантлö, кыдз и быдсöн катер вылiсь командалö, вöлi тожö гажтöм, тожö охота, кыдз позьö перытжыка, бертны гортö, тöвся базаö. И мед кöть недырик кежö мездiсьны эта гажтöмсянь, сiя рад вöлi чулöтны недырик шоччисян кадсö быдöнныскöт öтлаын.

Медодзза сьыланкыв бöрын сьывсис эшö и мöдiк, и куимöт. И вöлись сэк, кöр лейтенант Свиридов, кыдз и мыччисис, шыасьтöг сайöвтчис бöр аслас каютаö, команда жагвыв лöньсис. Кадыс эта коста вöлi уна ни, колiс узьны.

Асыв гöгöр учебно-боевöй тревога вились лэбтiс быдöннысö кок йылö. Локтiс приказ — быдсöн дивизионöн петны мореö. И кöр катеррез, звено бöрсянь звено, босьтiсö курс головнöй сьöрö, быдöнныс вежöртiсö: бертöны гортö, тöвся базаö.

Шоччисьны боевöй расчётлö и öнi эшö эз сетö. Учебно-боевöй тревогалö отбой сiдз и эз вöв. Сiйöн быдсöн команда одззамоз кольччис сулавны боевöй пост вылын.

Павжун гöгöр веськытланьсянь тыдыштiс тöдса маяк. Медперво сiя эз и вачкись ас вылас, сiдз кыдз кадiсь кадö сё эшö саясьлiс волнаэз сайö, мыйсянь сiйö позис примитны кытшöмкö уялан тор местö. Но кöр катеррез босьтiсö курс веськыта сы вылö ни, маякыс, дзик масiсь, жагвыв пондiс быдмыны син одзын. Бöртiжык öтмöдöрсянь сы гöгöр тыдыштiсö и береглöн лажмыт да неровнöй очертаннёэз. А недыр мыйись катеррез сьöрсьöн-бöрсьöн кытшöвтiсö тöдса мыс, пырисö асланыс бухтаö.

XX

Казармаас, эшö чöвтчытöдззас, Ильинов медодз сибöтчис аслас тумбочка дынö. Эстöн сiйö видзчисисö куим письмо. Кыкыс ны коласiсь вöлiсö нöитчöм конверттэзын, вачкисисö öтамöд вылö. Этна письмоэз гортсянь, мамыссянь. Куимöтыс, бель чочком, волькыт, шучтыдалан конвертын, вöлi мöддэсся тöдчöмöн учöтжык. И колiс дзир сылö усьны син вылö, кыдз Ильиновлöн сьöлöмыс ёкнитiс горöнжык öтпыр, мöдöтпыр, а сэсся эшö да эшö. Нельки увдöрись адресыс вылö дзар кертöг зонка и кылiс, и вежöртiс, кинсянь вермис лоны эта куимöт письмоыс.

Ильинов босьтiс сiйö киас, сувтiс синнэзнас гöгрöса букваэс вылын, кöдна вермисö петны дзир нывка перо увтiсь. Письмоыс и былись вöлi Маринасянь. Вевдöрсяняс, конверт вылас, сымдаыс и эз вöв гижöм, но конверт угöлас сулалiс адресыс сiя госпитальлöн, кöдаын Ильиновлö усис джендöтны ассис коктöмалöм кад.

Вöрöтчытöг, дзик кынмöм нето домалöм, Ильинов вель дыр сулалiс öтiк местаын, гажöн шыннялан чужöмöн жагвыв бергöтлiс киас босьтöм письмо, бытьтö вынсьöтчис, но некыдз эз вермы вежöртны, мый сыкöт пондыны керны одзлань. Осьтны конверт да лыддьöтны сэтчин гижöмсö зонка кыдз бытьтö эз и мöд. Позис думайтны, что Ильинов понда меддонаыс нач не сыын, мый сэтчин гижöм, а чожажык сыын, что письмоыс, кöдö зонка сыбурна да сыдырна видзчисис, эм, локтiс, и öнi, кыдз меддона да медколана тор, куйлö сы ки долонь вылын. Да и думайтсис я дзир? Эта и былись вöлi сiдз. Маринасянь босьтöм письмоыс, эшö лыддьöттöдззас, керис Ильиновöс аслас ёрттэз коласын медсчастливöй мортöн. Зонка одзлань ни тöдiс, надейтчис, веритiс, — эм кö Маринасянь письмо, то лоны умöльнас сiя некыдз оз вермы.

Бöртiжык Ильинов конвертсö сё жö осьтiс. Маринасянь босьтöм письмосö сiя вермис бы лыддьöтны быдса сутки сьöрна, вöвны кö бы сылö сэтшöм кузьöн. Жаль только, что гижöмыс вöлi не öддьöн уна. Нывкаыс гижис: «Здравствуй, Вася!

Письмосö тэсянь босьтi. Спасибо, что эн вунöт, видзан сетöм кыв. Тэ мунöм бöрсянь татöн лоис невночка гажтöмкодь, дзик мыйкö оз тырмы сiя палатаын, кытöн тэ куйлiн. Но öтöрас öнi тулыс, а сэтшöм кадö быд мортлö мыйкö оз тырмы, колö мыйкö унажык. Думайтсьö, что и тэкöт сiдз жö. Да мый эд керан, сэтшöм уж мортлöн мывкыд. Мымда бы сы оланын эз вöв бурыс да гажыс, эта сылö пыр етша, пыр колö унажык.

Уджала ме татöн одззамоз. А уджсö тэ менчим тöдан — кыдз верма, отсала отирлö. А кыдз сэтчин тэ? Кытшöм тэнат здоровье? Коккет? Бытшöма я чулалö служба?

Ар гöгöрас Приморьеын сулалö бур погоддя. Сэк кежö ме лöсьöтча отпускö и месяц сьöрна гортын ог ло. Эм кö кад да желаннё, сёрöнжык гиж. Понда видзчисьны. Адззисьлытöдз. Марина».

Нывкалiсь письмосö Ильинов лыддьöтiс öтпыр, мöдöтпыр, а сэсся эшö да эшö. И вöлись сэк, кöр быдöс не уна гижöмыс топ печатайтсис, кольччис тöдвылас, зонка янсöтiс гижöт лист бердiсь гажöн тырöм синнэсö. Но нельки öнi, кöр письмоыс вöлi лыддьöтöм ни, Ильиновлö сё эшö эз веритсьы, что эта самöй сiя меддонаыс да медколанаыс, кöдö зонка сыбурна видзчисис.

Не веритны эталö тожö эз позь. Öткö, ылöсыс, мöдкö, ачыс письмоыс, кöдö Ильинов каттьытöг сё эшö видзис киас, тшöктiсö веритны сыö, что некытшöм сорасьöм сэтöн абу, письмоыс и былись эм, и былись Маринасянь. Сэк вöлись зонкаыс син одзын сувтiс сiя ачыс, сувтiс не öтiк шоныт югöра синнэзнас да быд коста сэтшöм лöнь выраженнёа чужöмнас, а быдсöн кокнит вывтырнас, мыгöрнас, баснинас, сувтiс сэтшöмöн, кытшöмöн пантасис, кытшöмöн пыр кежö кольччис тöдвылын. Марина йылiсь гажöтан думаэс Ильиновöс кокнита вуджöтiсö сэтчин, кытöн вöлi ачыс нывкаыс.

Гожумся сёр да шоныт рыт. Öтöрсянь сук пемытыс гусясьöмöн жмитчö öшын стеклоэз бердö. Госпитальнöй палатаэзын лöнь. Быдöнныс ланьтiсö. И дзир осьта форточкаöт, öтлаын сöстöм рукöт, вайöтö пу листтэзлiсь тöв вылын негорöн кышöтöм. Ординаторскöйын сотчö би. Сэтчин, быдкодь журналлэзöн да карточкаэзöн тыртöм пызан сайын, пукалö сестра. Нывкаыс одзын, пызан вылас жö, куйлö неыджыт сöстöм гижöт лист, учöтик да небыт чуннес коласын — ученическöй ручка. Кадiсь кадö, аслыс казявтöг синнэзнас лöня кваркышавтöн, сестра видзöтö кытшöмкö нетыдалан точкаö, думайтö, а öткоста бергöтышалö öтмöдöрö тырппес бердö сибöтöм ручкасö, мыйсянь веськыт киись чуннес жагвыв вöрöны. Но вот, дзик повзыштöмувья, сылöн векнитик синкыммес чепöссьыштöны вывлань. Ачыс сiя калькöтö тырппес бердiсь ручкасö, мышкыртчыштö гижöт лист весьтö. Казявтöг нывкалöн тырппес вöрыштöны. Ны коласiсь шытöг петö: «Здравствуй, Вася». Эта жö кадö сестралöн киыс, öтлаын пероыскöт, сибалö гижöт лист бердö, петкöтö сы вылын этнö кыввесö. Сё сiдз жö чöлöмöн нывкалöн тырппес вöрöны одзлань. Ны сьöрö, чуть кылöмöн, дзуртышалö, гижöт лист бердын перо, не тэрмасьöмöн петкöтö строка бöрын строка.

Письмоыс гижöм. Сестра веськöтчыштö стул вылын, пызан сайсянь нюжöтчöмöн, судзöтö ассис сумочка, кöда сылöн куйлö сэтöн жö, ордчöн сулалан стул вылын. Гижöм письмосö, адресуйтöм конвертнас ни, нывка сюйыштö аслас сумкаö, а сы местö, пызан вылас, кыскö книга, аслас стул вылын бытшöмжыка лöсьöтчыштöм бöрын вель дыр кежö мышкыртчö осьтöм страница весьтын.

Ашынас, павжун бöрын, сестралöн чулалö дежуритан кад. Öтлаын мöдiккезкöт нывка петö госпитались, пондö тэрмасьны гортас. Но эшö автобус вылö пуксьытöдз Марина кежö почтовöй ящик дынö, лэдзö сы пытшкö гижöм письмо.

Сiдз да сэтшöмöн адззис аслас син одзын Ильинов нывкасö, кöр видзöтiс осьта письмо вылö, кыдз бытьтö быдöс эта картинаыс тыдалiс неыджыт гижöт лист вылас, дзик киноплёнка вылын. Да и вермис я лоны кыдзкö эшö мöднёж? Вермис я зонка не думайтны сестра йылiсь, не вынсьöтчыны вот сiдз вот сувтöтны нывкасö син одзас сэк, кöр не мый мöдiк, а дзир сыкöт тöдсасьöм да дружитöм отсалiсö сылö вашöтны сьöлöм вывсис одззася шогсö, не мый мöдiк, а нiя жö сувтöтiсö Ильиновöс бöр чеглалöм коккес вылö, нiя жö лэбтiсö да видзисö сыын колана настроеннё, мед вермыны, кыдз позьö бытшöмжыка, нуöтны бöрья навигация коста ассис служба, öзтiсö желаннё пуктыны сыö быдöс ассис вын да кужöм. А босьтöм письмоыс сулалiс сымдасö. Ась эта вöлi и не ачыс Маринаыс. Ась эта сестракöт и не аскöттяс пантасьöм да баитöм. Но письмоыс вöлi сысянь, сы думаэзöн да сы чувствоэзöн. Эта учöтик гижöт листыс, кöдö öнi видзис киас Ильинов, кöда вылö видзöтiс, кыдз вöвлытöм чудо вылö, эшö нач неважын куйлiс Марина одзын. И не кин мöдiк, кыдз ачыс Маринаыс, аслас учöтик да басöк чуннезöн петкöтiс сы вылын этнö букваэсö, сылöн ловыс косьтiс перо бöрсянь кольччöм черниласö. И сiйöн эта неыджыт гижöт листыс вайöтiс Ильинов дынöдз сестралiсь не только думаэсö, но и пым ловшысö, сы синнэзiсь шоныт югöрресö, сылiсь лöнь кокшысö да сылiсь жö рам голоссö. А быдöсын этаын зонка понда вöлi сiя, мый примитöм шуны радейтöмöн, кöда сетö мортыслö ыджыт гаж, отсалö джендöтны сьöкыт да гажтöм кад, кокньöтны удж, тыртö олансö ыджыт да колана смыслöн.

XXI

Бур погоддя сулалiс Приморьеын сiя кадö, кöр катеррез бертiсö тöвся базаö тактическöй занятиеэз вывсянь. Эз пöльт да эз пöдты лов вына тöв. Эз каттись сопкаэз гöгöр сьöкыт да сук туман. Эз нырыштö вылiсянь свинец рöма руд кымöррез. Эз пожнассьы лунiсь лун шогöт кодь мыла бырöтан поснит, кыдз бус, зэр. Лунiсь лун вöлi мича да лöнь. Шондi югьялiс гажöна да эшö бытшöма шонтiс аслас югöррезöн быд пельöс. Эта кадö лöньжыка, ежели пыр, видзис асьсö и море. Дзик бытшöма вашöтлöмсянь мыдзöм вöв, öнi сiя шоччисис, чукöртiс одзлань кежö вын: куйлiс то волькыт, кыдз зеркало, то дыша вöрöтчис негырись волнаэзöн. Мича погоддясянь и руыс эта коста тожö вöлi кöс, лолассис кокнита. Позис эшö купайтчыны. И нiя, кöдна радейтiсö сымдасö, туяна эта вылö кад весись эз öштö.

Нiйö жö, кин служитiс таво медбöрья год, не шоныт да мича погоддяыс, не кокнит руыс да лöня орсан мореыс öддьöнсö эз ни гажöтö. Одзланься служба йылiсь нылö тожö эз думайтсьы. Быдыс ны коласiсь, кыдз баитсьö, «пукалiс чемодан вылын», гажтöма джендöтiс лун бöрын лун.

Кыдзкö павжун коста, кöр дивизион бертiс камбузiсь, казармаас ни Ильинов дынö сибöтчис Сашка Черкасов.

— Петалам куритны?

Ёрттэз петiсö лиснич площадка вылö. Öтдруг каттьыштiсö да öзтiсö махоркаись цыгаркаэз. Черкасов öтпыр-мöдöтпыр горша ньылыштiс крепыт табак тшын, ловзисис гажтöмкодя, горöтчис:

— Гажтöм кыдзкö, Вася, медбöрья кадö сьöлöм вылын лоис. Вежöртан, он — гажа и гажтöм. Тöда эд, — не уна ни кад кольччис видзчисьнытö. Лоас приказ и быдöннымöс гортö лэдзасö. Но мыля сiя, проклённöй эта кадыс, сэтшöм жагöна кыссьö? Веритан, он — нельки узьöтны дугдiс? Вода вот рытсяняс, синнэзöс вöлись куня, а думанам бöра гортын ни. И асывнас сiя жö. Бытьтö сы шыасьöмсянь, кыдз шувлö: «Папа, папа», — быд асыв и сайма.

Этö Черкасов баитiс бöбöтчытöг и не веритны да не вежöртны сiйö некыдз эз позь. Иньсö дзебöм бöрсянь öткöн кольччöм нылочкаыс увья зонка вель дыр талис туй дивизионiсь да бригадаись командованнё дынö, но быдöс весь. Гортö одзжык петöмись сiдз нем и эз шогмы, ковсис служитны одзлань. А öнi, кöр колана кадсö видзчисьны кольччис нач недыр ни, быд чулöтöм луныс мыччассис сылö год кузяöн.

— Ась. Унасö видзчисим, дак невночкасö кыдзкö джендöтам ни, — асьсö лöньсьöтöм могись горöтчис одзлань Черкасов, юалiс:

— А тэнат, Вася, кыдз? Сiдз некинлö нывкаэс коласiсь сэсся и он гиж?

— Ог, — дженытика шыасис Ильинов. Маринакöт тöдсасьöм йылiсь Черкасов кытчöдз эз тöд, а ошшасьны сымданас аслас Ильиновлöн некытшöм охота эз вöв.

— Эта не беда. Петан вот гражданка вылас — быдöнныс тэнат лоасö. Сiдз я мый я, Васёк? — шутитöмöн горöтчис Черкасов, сiдз жö шутитöмöн татшкыштiс ёртыслö пельпон кузя.

— Мыйлö меным быдöннысö? И öтiк тырмас.

— Но öтiк дак öтiк. Одзза кодьсö дзир сэсся эн пантав. Сэтшöм тютясö и боксит, ольпась вылiсь, нуöтасö.

Катя йылiсь баснисянь Ильиновлö лоис недолыт. Зонка нельки кылiс, кыдз пондiс вежсьыны чужöм вылас. И мед перытжыка кежны эта неколана да небасöк басниись, сiя öвтыштiс кинас, горöтчис:

— Вакрамешö нiйö, сэтшöммесö. Баитны эшö ны йылiсь. Орсыштiн бы сы местö мыйкö, Сашок. Сё бы, видзöтан кö, кокнитжык сьöлöм вылын лоис.

— Ог эд, — дженытика да зэркыта горöтчис паныт Черкасов, сiдз жö пыркнитiс öтмöдöрö юрнас. — Кытшöм ни, Васёк, сэтöн гаж, кöр сiдз ни сьöлöм местасö оз адззы? Босьтны кö часöт киö баян, сiдз и тöд, эшö сьöкытжык да гажтöмжык лоас. Ась уж, терпитышта невночкасö. Ме аслым кыв сетi — мунан лунöдз сы вылö сэсся и дзар ог кер. — Öтпыр, мöдöтпыр Черкасов перыта нимыштiс абутöмкодь ни цыгаркаись тшын, сьöвзис, шупкис сiйö угöлын сулалан урнаö. — Тэ бы вот аслат пермяцкöй нинкöммез йылiсь мыйкö висьтасьыштiн, дак унаöн бы буржык вöлi. Кывзi ме кыдзкö ны йылiсь тэнчит баснитö, дак вежöртан, он, öнöдз тöдвылiсь оз пет. Охота тöдны, кытшöмöсь нiя тiян, а сувтöтны аслым син одзö некыдз ог вермы. Былись я мый я тэ нiйö служба вотöдз новйин? Меным мылякö некыдз оз и веритсьы.

— Вежöртана, былись. Мый сэтöн не веритнытö? Абутöмсö эд ог жö висьтав. Да и умöльсö этаись ме нем ог адззы. Миян деревняэзын и часöт эшö и мужик, и инька уджавтöн нинкöммесö новйöны.

Нельки тэныт, кöмавны кö, шуам, миян мороззэз коста, дак öддьöн бы гленитчисö — коксит бы эн чапкыв.

— Интересно сё жö. Адззывны бы вот кöть.

— Чöв, адззылан эшö.

Басниыс коласын öтамöд бöрсянь ёрттэз бертiсö казармаö. Эта коста сэтчö жö пырис Толя Макаров, порог дынсянь горöн юöртiс:

— Почта, ёрттэз, вайим! Кинлö медодз?!

Паныт Макаровлö уськöтчисö нiя, кöдна служитiсö медодзза год. — Нiя жö, кöдна видзчисисö не сiдз письмоэз, кыдз демобилизация йылiсь приказ, кольччисö куйлыны да пукавны асланыс местаэзын. Письмоэс, кöднö нiя видзчисьлiсö сыбурна одзжык, öнi öштiсö ни ны понда ассиныс дон. Локтас кинлö сэтшöммес коласiсь — бур, оз — не умöльжык. Колö я эшö торкны кад нiйö лыддьöтöмö да паныт гижöмö, кöр быдöс коланасö чожа позяс тöдны нытöг ни, пантавны да адззывны ас синöн.

Дзир öтiк Ильиновкöт кытчöдз вöлi нач мöднёж. Сылö, кыдз и сыкöт öтiк годся ёрттэзлö, служитнытö кольччис тожö не уна. Зонка тöдiс, что чожа тожö ковсяс тэчны чемодан да пуксьыны кытшöмкö лунö поезд вылö. И ассис этö гортö мунöмсö сiя видзчисис мöдiккезся не етшажык. Но видзчисьöмыс эз вермы кусöтны сы сьöлöмын Марина дынö öзйöм радейтöм. Сiдзкö, сыкöт янсöтчöм йылiсь и дума некытшöм лоны эз вермы. Вöлi мöдiк — желаннё лоны сыкöт пыр кежö öтлаын. А сэтшöмсö позис керны дзир сэк, нуöтны кö Маринасö сьöрас. И ась эта решеннёыс медперво мыйöнкö и полöтiскодь, желаннё — лоны öтлаын — вöлi сэтшöм ыджыт, что бöртiжык одззася полöмись и след некытшöм эз кольччы.

Аслас радейтöм да желаннё увья — лоны Маринакöт пыр кежö öтлаын — Ильинов нельки öтпырись эз думайт сы йылiсь, что мунны сыкöт öтлаын нывкаыс вермас и не согласитчыны. Ас ладорсянь сэтшöмыс вылö некытшöм причина зонкалöн эз вöв, и керны колананёж сылö нем эз мешайт. Сiйöн рыттэзнас, отбой бöрсянь, кöр Ильинов водлiс, шебрасьлiс дзик да куньлiс синнэсö, мед только перытжыка онмöссьыны, аслас воображеннёын часто адззис сiйö, мый лыддис сэтшöм коланаöн.

Зонка веритiс: мый бы сэтчин эз вöв, гортö петан вотöдз нiя Маринакöт не только пантасясö, но и баитчасö öтлаын мунöм йылiсь. А кыдз только Ильиновöс лэдзасö, сiя перво жö кежас нывкаыс ордö, кöда сэк кежö сiйö пондас видзчисьны ни. Öтлаын лöсьöтчöмö чулаласö кынымкö лун, кöд коста нiя ештасö ветлыны загсö, мед гижсьыны. А сэтöн кытшöмкö лунö пуксясö поезд вылö и... адззисьлытöдз, Приморье! Эта кадсянь нiйö сэсся некöр и нем оз янсöт.

Гортöдз туйыс кузь. Лунiсь лун нiя пондасö пукавны вагонiсь öшын одзын, видзöтны, мый, бöрлань кольччöмöн, тыдалö сы сайын: вöррез да юэз, тыэз да сопкаэз, городдэз да деревняэз, — а эта коста, öтамöд бердын зэв-зэв пукавтöн, кывны öтамöдлiсь шонытсö. Этöн жö каднас нiя бытшöма ештасö баитны быдöс йылiсь: кыдз пондасö овны да уджавны, кöр локтасö гортöдз. Сёр рытöн да ойезнас, кöр нывкаыс пондас узьны, Ильинов пондас пукавны сы бокын, караулитны сылiсь он, гажöн тырöм сьöлöмöн видзöтны вылас, рамыника малавны сылiсь небытик юрсисö, пельпоннэсö, киэсö. Быд городын нето станцияын зонка ачыс пондас котрасьны буфетö то ли магазинö, мед небны мыйкö сёян коласiсь. И сiдз лун бöрсянь лун, кытчöдз поездыс оз вайöт нiйö колана станцияöдз.

Быдса неделя сьöрна мунöм туй колас кольччас бöрын. Колхознöй автомашина вайöтас нiйö горт деревняöдз. Кадыс рытъявыв, пемыт ни да лöнь. Деревня пасьта быд керкуын сотчöны биэз. А колхознöй клубын кылö гармоннялöн горалöм, нывкаэзлöн сьылöм-йöктöм. Но öнi эта дынöдз некытшöм интерес Ильиновлöн абу ни. Ордчöн Маринакöт нiя тэрмасьöны гортö — пиньöлакодь посöдза, неыджыт, важ да учöтик öшынока керку дынö, кöда сулалö чуть я не самöй деревня дорас.

Жагвыв, мед не повзьöтны пöрись мамсö асланыс гора оськöввезöн, Ильинов да Марина кайöны поспуэз кузя, жагвыв жö сибöтчöны пыранiн дынö. Эстöн Ильинов сувтöтö кок увтас ассис чемодан и, мед сетны кöть невночка лöньсьыны вынöн ёткöптан сьöлöмлö, сувтö недырик кежö ачыс. Öтпыр, мöдöтпыр зонка пыдына ловзисьö, сэк вöлись кутчисьö кинас ась и кöдзыт, но учöтсянь сэтшöм тöдса ыбöс вуг бердö. Негорöн дзуркнитöмöн ыбöсыс оссьö. Ильинов лэдзö одзас Маринаöс, оськöвтö порог омöн ачыс.

Кытöнкö комын, важ да тöдса жö ситцевöй занавеска сайын, кылö ведра вуглöн негорöн жолькнитöм. Чожа мый сэтчинсянь мыччисьö Ильиновлöн мамыс.

— Истиннöй Кристос! Дитяö менам! Бертiс эд! — Этнöн кыввезнас сiя и уськöтчö паныт, кыдз учöтикöс, сывьялö зонсö морос бердас, пондö окавны. Дыр мыйись Ильинов паныт мамыслö шуö:

— Бертi, мама, да эшö не öтнам. Моньöс тэныт сьöрсяням кайöтi. Тöдсась вот, Маринаöн шуöны.

Кöд коста нiя тöдсасьöны да окасьöны, ачыс зонка нёджжасьöв-керö омöн керку пасьта, жагвыв пондö чöвтчыны. Сэсся Ильинов отсалö чöвтчыны Мариналö, пуксьöтö иньсö стена бердын сулалан кузь лабич вылö, шуö:

— Вот ми и гортын.

Быдöс йылiсь, кыдз да мый думайтiс ас кежас Ильинов, вöлi гижöм нывкаыслö неважынся письмоын. Но ответыс, кыдз нарошно, лунiсь лун сё эз вöв да эз вöв.

Вот и талун... Быдöнныс бöрсянь Ильинов тожö иньдöтчис паныт Макаров ёртыслань. Но мöдыс эшö ылiсянькодь öвтыштiс öтмöдöрö юрнас, горöтчис:

— Тэныт, Вася, нем.

Павжун бöрсянь дивизионiсь быдсöн плавсостав уджалiс угольнöй складын да пирс вылын. Навигация чулалiс, и öнi катерресö вились ковсис лэбтавны берег дорö да сувтöтны тöв кежас клеткаэз вылö. Эта понда угольнöй складö вöлiсö вайöмöсь да ректöмöсь кынымкö платформа мымда кöрттуй вылiсь важ шпалаэз, кöднö дрезина вылын öнi ковсис ваявны да ректыны пирс весьтö.

Сэтчин уджавтöн Ильинов адззис неыджыт пуовöй бакланок, кöдö сёрöнжык босьтiс да вайис сьöрас.

Ужин бöрсянь зонка кутчисис аскоддьöм удж бердö — адззöм бакланокись пуртöн лöсйис неыджыт каб, мед кыйны сы вылын Черкасов ёртыслö козин местö кöсйöм тор — коми-пермяцкöй нинкöммез.

Этна луннэзö петiс демобилизация йылiсь приказ. Медбöрья годсö служитiссезлö сiя луныс вöлi праздникся-праздник. А неделя бöртi медодзза нырыс пондiс лöсьöтчыны мунны гортö.

Саша Черкасов, кöда эшö неважын баитiс Ильиновлö, что мунан лун вотöдз аслас баян вылö и дзар оз кер, видзны ассяняс сетöм кыв сiдз и эз вермы. Кыдз только кывсис, что и сiя сюрöм медодз мунiссез коласö, рытнас жö, ужнайтöмныс бöрсянь, зонка кыскис баян, сувтöтiс пидзöссэс вылö. Эта рытö сiя орсiс сiдз, кыдз нёль год сьöрна служиттöн, натьтö, и öтпырись эз орслы.

Гортö лöсьöтчись ёрттэс гажöтчисö, а Ильинов гажтöмтчис. Лунiсь лун зонка сё эшö видзчисис Маринасянь письмо. Но кадыс чулалiс, а колана ответыс öнöдз сiдз и эз вöв. Настроеннё дзугсис. Ильинов бергалiс, дзик öшöм, эз тöд, мый бердö кутчисьны, мый пондыны керны одзлань.

Медбöрын зонка корсис увольненнёö, мед эшö письмоыс вотöдз пондывны адззыны да пантавны нывкасö, кöть сэтшöм пантасьöм вылö надейтчынытö öддьöнсö эз позь. Мариналöн гортся адресыс Ильинов дынын эз вöв. Но увольненнёö петан лунас ни нывкаыссянь письмоыс сё жö локтiс. Эта и вежис быдöс буржык ладорö.

XXII

КПП сайын, öтлаын мöдiк мунiссезкöт, Ильинов пуксис городскöй автобусö, а джын час бöртi сiя вöлi городын ни. Мед вермыны кöть невночка лöньсьöтны Маринакöт пантасьöм одзын ассис волнуйтчöм, автобуссэс медодзза жö сувтчанiн вылын зонка чеччис. Пантасьтöдззаныс, кыдз баитчисö письмоас, кадыс вöлi эшö вель уна, а госпитальöдз туй колас дженыт ни. Сёрмöмись повны эз ковсьы, тэрмасьны некытчö. Сэтчö жö эшö нывкаыскöт пантасьöм вотöдз Ильиновлö колiс думайтны öтi-мöдi ас кежас. Зонкалö öнöдз вöлi невежöртана, — мый пондыны керны, согласитчас кö Марина öтлаасьны, но оз понды мунны сыкöт öтлаын? Кольччыны татчö ачыс Ильинов тожö эз вермы. Кыдз не кыдз, но гортын вöлi öтiк мам, и янсöтны сiйö ас дынсис да сы ылына, некыдз эз позь. Думайтны кö ас йывсис, дак петiс сiя жö. Эд горт, сiя горт и эм, колö шуны мöднёж, кыдз и вежны мöдiк вылö, некöр да некыдз оз позь. И мед эшö öтпыр да бытшöмжыка ештыны думайтны эта йылiсь, автобуссэс сувтчанiн вывсянь госпитальöдз зонка лöсьöтчис мунны подöн.

Думаэс коласын Ильинов медперво вынсьöтчис не тэрмасьны. А недыр мыйись ни ачыс жö вежöртiс, что талун сылöн коккес оз кывзiсьö. Эта увья зонка эз и казяв, кöд коста оськалiс подöн быдöс кольччöм туй, видзчисьтöг сибöтчис госпиталь дынö. Тöдсаöсь ни гöрд кирпичнöй ограда да сы сайын пöрись парк усисö син вылö кыдзкö нач видзчисьтöг. А вот и санпропускник — голубöй рöмö краситöм неыджыт будочка, кöда дынын и колiс видзчисьны нывкасö.

Ильинов дзар керыштiс аслас именнöй часыэз вылö — службасö бытшöма нуöтöм понда частись командованнёсянь козин — сибöтчис лажмытик скамейка дынö, кöда сулалiс неылын санпропускник будка дынсянь, пуксис.

Эта ладорсянь, матi госпиталь дынöт, не автомашинаэз, не трамвайез эз ветлö, некытшöм бус да шум эз вöв. А погоддяыс сiя лунö сулалiс шоныт: мича, шондiа, лöнь. Абутöмкодь тöлок руалöмсянь кадiсь кадö мынлiсö кытшöмкö пу бердiсь вежöтöм листтэз, вель дыр бергалiсö руас, жагвыв, дзик полöмöн, лэдзчисьлiсö то забор бердö, то неважын асфальтируйтöм подöна туёк вылö.

Эта лöнь коласын и Ильиновлö тожö охота вöлi лöньсьыны. Но кыдз бы зонка эз вынсьöтчы, сымдаыс сылöн некыдз эз пет. Волнуйтчöмсяняс, аслыс казявтöг, Ильинов сiйö и керис, дзарышалiс санпропускник ладорö, мед не сёрмыны казявны аскадö Мариналiсь сэтчинiсь петöм. Сэк кежö госпитальсис, уджалан сменаыс чулалöм бöрсянь, петiсö уна ни, но быдöнныс коласын нывкаыс кытчöдз эз вöв. Кынымöтчид ни, эстöн пукавтöн, Ильинов вились пондiс лöсьöтчыны öзтыны куритны. Зонка вель дыр нöитiс чуннес коласын папироса, мышкыртчыштiс увлань, мед шедтыны би. Эта коста, нач видзчисьтöг, и усисö сылö син вылас кинлöнкö гöрд рöма учöтик босоножкаэз. Ильинов сэк жö вунöтiс öзтытöм папироса йылiсь, перыта лэбтыштiс юрсö. Оськöв кыным ылына сы дынсянь шыннялöмöн сулалiс Марина. Аслас волнуйтчöмсянь, кöда öнi вынсялiс сыын эшö одззася öддьöнжык, мыйкö дырна кежö Ильинов нельки öшис кодь. Мыйкö горöтчöм нето здоровайтчöм местö зонка сымда и керис, гажöн да дивуйтчöмöн, орöттöг видзöтiс нывкаыс вылö, чöлiс. Мöдыс, кыдз нарошно, одзлань тожö эз шыась, чуть тöдчана шынньöлöн сэтшöм тöдса тырппес вылын видзöтiс паныт Ильинов вылö, видзчисис.

Чулалöм кадö нывкаись нем эз позь казявны вежсьöмсö, не лыддьыны кö, что талун сiя вöлi Ильинов одзын не халата и не тöвся пальтоа, а кокнитик гожумся паськöма. Марина вылын сэтшöм жö бытшöма да басöка, кыдз и пыр, пукалiс югыт-сиреневöй рöма платье, а юр вылас кокнитика кышыштöм платьеысся невночка пемытжык берет. Серакодь кокнитик плащсö, кыдз и свиттялан сьöд сумочкасö, нывка видзис кисой вылас. Неыджыт да кокнитик вывтырыс, гöгрöса тшöкаыс, воöм öмидз рöма тырппес да шоныт югöра синнэс, кöднатöг сыбурна ни эта чулалöм кадö ештiс гажтöмтчыны Ильинов, вöлiсö сэтшöм тöдсаöсь, кыдз бытьтö нiя учöтсянь и век сьöрна олiсö пыр öтлаын, а и янсöтчылiсö кö, то нач недырик кежö, дзир талун.

— Марина? Здравствуй! — и гажöн, и дивуйтчöмöн горöтчис Ильинов. Öнi вöлись зонка, кыдзкö аслыс казявтöг, шупкис тырппес коласiсь öзтытöм папиросасö, чеччис, оськöвтiс паныт, нюжöтiс нывкаыслань кыкнан кисö. И вот Мариналöн киыс, учöтик да басöк чуннес, кöдна сэтшöм кокнита кужлiсö да вермывлiсö лöсьöтны сы морос весьтын одеялосö, сэтшöм ровнöя петкöтлiсö быд буквасö сылö гижöм письмоэзын, öнi зонкаыс киын ни.

— Здравствуй, Вася. Видзчисям?

— Да вот... — И невна чöлыштöм бöртi: — Тöдны бы, тöдны бы тэныт, Марина, кыдз ме видзчиси этö пантасьöмсö.

— Вот и пантасим.

— Спасибо, Марина, спасибо, сестра.

— Только тэ простит, пожалуйста, — кытчöдз дежурствосö сетi, невночка сёрмыштi.

— Пожалуйста, Марина. Ме бы и год сьöрна видзчиси, мед дзир тöдны, что тэ эм эта свет вылын и кöркö сё ни локтан.

— Да колö я сы дырнасö, Вася? Эд этöн каднас позис бы и мöдiккöт тöдсасьны.

— А некинöс кö меным сэсся оз ков, сэк кыдз?

— Спасибо, Вася. Эстöн ме тэнö вежöрта. Да мый нö ми öнöдз сулалам? Пуксям жö недырик кежö.

— Да, да, Марина, пожалуйста. Извинит, что эг и казяв одзлань сымдасö горöтчыны. Тэ жö мыдз, быдса сутки сьöрна кок йылын. Пуксьы, пожалуйста. Ильинов видзчисьыштiс. А кöр нывкаыс кокнитика лэдзчисьыштiс скамейка дорыш вылö, мöдыс сэк вöлись сибöтчис сы дынö, пуксис ордчöн.

— Вежöрта, Вася, — пондöтiс одзлань нывкаыс. — Пыр эд сiдз овлö, кöр любитан. Некин мöдiк сэсся оз ков. А колана мортсö охота век сьöрна видзчисьны. Ме верита тэныт. ― Эстöн Марина бергöтчыштiс Ильинов ладорö. ― Висьтась, мый вильыс тэ оланын? Юöртiн, что чожа гортö лöсьöтчан. А кöр? Абу кö секрет.

Эшö татчö локтöн Ильинов вель дыр думайтiс сы йылiсь, кыдз, кöр пантасясö, пондöтны нывкакöт баснисö, кыдз кужны да вермыны висьтавны сылö быдöс коланасö. Но вот пантасисö. И öнiвöлись

Ильинов вежöртiс, что мырсьыны, мед адззыны басниын колана кыввез, оз и ков. Марина эз видзчись кöр пондöтас Ильинов. Нывка ачыс перво жö пондiс юасьны быдöс йылiсь. Сылö кольччис дзир отвечайтны паныт.

— Кытшöм эшö сэтöн секрет? Ашын. ― Ильинов видзчисис, что сы ответ бöрсянь нывкаыс голосын усяс кывны то ли повзьöм, то ли жалейтöм. Но не öтыс, не мöдыс эз кылö. Чожажык нач мöднёж. Эта юöрыс Маринаöс нельки гажöтiс. Дивуйтчöмöн сiя горöтчис:

— Ашын ни, Вася? Дак эта жö öддьöн бур! Ме рад тэ понда!

— Мыйлö сэтöн радуйтчынытö?

— Мыля жö бöра мыйлö, Вася? Тэнö разь оз гажöт, что вермин сувтны коккез вылö, бытшöма служитiн ассит служба, а ашынсянь мунан гортö ни?

— Да, Марина. Быдöс эта сiдз. Но тэ вежöрт и сiйö, что колö мунны гортö, а кернытö сымдасö ме ог вермы. Эд ме локтi талун тэ дынö не öтiк адззисьлöм могись, и тэ сiйö тöдан. Тöдан, ме любита тэнö и мунны татiсь тэтöг ог вермы. Миянлö колö баитчыны: то ли мунны öтлаын, то ли кольччыны татöн. Или тэ меным сё эшö он верит?

— Спасибо, Вася. Ме и верита, и вежöрта, но... — Эстöн Марина лöньсис, мыйкö дырна видзöтöв-керис веськыта Ильинов вылö, эта бöрсянь вöлись одзлань горöтчис: — Медперво тэ висьтав меным вот мый: отсалiс, эз тэныт кöть невночка миян коласын тöдсасьöмыс да дружитöмыс?

— Марина. Мыйлö жö тэ эта йылiсь юасян? Эд тэ сiйö и висьтавтöг бытшöма тöдан. Вежöртана — отсалiс. И не невночка, а нельки öддьöн уна. Эд эта увья медодз ме и ог вермы тэкöт янсöтчынытö. Неужто тэ сымдасö он вежöрт?

— Спасибо, Вася. Ме вежöрта. И тэ менö тожö вежöрт. Вежöрт, Вася, что не öтсö, не мöдсö миянлö керны оз ков, оз позь. Гортын тэнö видзчисьö мам и кольччыны татчö нач нем вылö. А мунны öтлаын ми тожö ог вермö. Мыля? А кыдз вот тэ ачыт думайтан?

Кыкнанныс недырик кежö лöньсисö. Кокнит я вöлi тöдны нывкалiсь сiйö причинасö, кöда йылiсь Ильинов ас кежас одзжык и öтпырись эз думайт? Но юалöмыс вылö паныт мыйкö колiс висьтавны, и Ильинов горöтчис, мый медодз пырис юрас:

— Тöдса зонка, натьтö, видзö.

— Вот и эн тöд. Нельки унажык этася. Менам, Вася, эм семья: мужик и учöтик зоночка, кöдö тожö шуöны Васяöн. Вот эд кыдз, дона менам ёрт.

— Этö былись, Марина?

— Былись. Бöбöтчыны тэ одзын ме ог понды.

— Марина! Сестра! Кыдз жö сiдз?.. Кыдз тэ сiдз вермин? Эд кыдз бы ме эг кыссьы тэ дынö, тэ жö öтпырись не эн панöвт, не эн сувтöт, а быд коста локтiн паныт.

— А не сiдз разь колiс? Тэ жö ачыт часöт висьталiн, что миян дружитöмыс тэныт бытшöма отсалiс. Сiдзкö, сiдз и колiс.

Недырик кежö кыкнанныс лöньсисö. Ильинов думайтöв-керис мыйкö ас кежас, а сёрöнжык дивуйтчöмöн оклалöв-керис öтмöдöрö юрнас.

— Да-а-а. Не быдыс сiдз вермас.

— Сiдзкö, Вася, тэ мунан гортат и мунан öтнат. Öнi ачыт ни адззан и вежöртан, что некытшöм мöдiк петанiн этася миян абу.

— Да, Марина, ме быдöс вежöртi.

— Вот и бур. Меным тэсянь колö дзир öтiкö, мед эн обижайтчы сы понда, что сiдз петiс. Медбурыс эстöн, кыдз ме думайта, сё жö сiя, что талун тэ здоровöй, том, бытшöма сулалан коккет вылын. А сэтшöм мортлö колана ёртыс кöть кöр адззисяс.

— Марина, сестра. Янсöтчыны тэкöт меным öддьöн сьöкыт. Но обижайтчыны тэ вылö нач нем понда. Дона кö тэ вöлiн меным одзжык, то öнi, эта бöрсянь, лоан эшö донажык. И кытöн да мый бы мекöт одзлань эз вöв, тэнö, тэкöт дружитöмсö да сiйö, мый вылö тэ осьтiн талун менчим синнэзöс, некöр и некöр ог вунöт. Сiя век сьöрна лоас ме тöдвылын.

— Спасибо, Вася. А öнi миянлö кад янсöтчыны. — Марина сувтiс. Сувтiс и Ильинов. Сiя кылiс, кытшöм зубыта пондö пидзыртны моросас сьöлöмсö, но панöвтны сестракöт янсöтчöмсö öнi немöн эз ни позь.

Векнитик асфальтированнöй туёк кузя, кöда неважын вайöтiс татчö Ильиновöс, ордчöн да жагвыв оськавтöн, нiя сибöтчисö ограда угöв весьтöдз, сувтiсö. Марина медодз нюжöтiс зонкалö ассис кисö, а Ильинов медбöрьяись рамыника жмитыштiс сiйö аслас киэзын. Зонка вöлi мöдiс ни горöтчыны: «Прощай, Марина». Но эшö эта вотöдз ештiс дзар керыштны сестраыс синнэзö. А нiя сылöн, сэтшöм югытöсь да гажаöсь, эта коста дзик баитiсö! «Эн пов, Вася. Верит, что быдöс лоас бур». И сэк Ильинов ас кежас думайтiс: «Позьö разь сэтшöммескöт кыдз Маринаыс, янсöтчыны век кежö? Оз эд. Некöр и некöр оз. Эд сэтшöм ылöса, сэтшöм ыджыт да шоныт сьöлöма отиртöг, не вöвны кöбы нылö оланас, и овнытö бы эз позь. Сiдзкö, Маринаыс не öтнас сэтшöмыс. Эмöсь сы коддес эшö и эмöсь уна, ась нiя и мöдiк нимаöсь, мöдiк чужöмаöсь, но эмöсь. И кошшыны кö ас оланын сэтшöм ылöса да сэтшöм сьöлöма мортсö, кöр-некöр сiя сё ни пантасяс». Эта думасянь Ильинов и гажмыштiс.

— Адззисьлытöдз, Марина!

— Адззисьлытöдз, Вася!