Глава VIII

Важынкодь ни дугдiс öгравны гöрдöдз калитчöм рöмöн кымöрлöн ылiсь шондi пуксян места. Лöньсьöм да ыркалöм му весьтын жагвыв сукмис вылiсянь лэдзчисьöм ой. А тыра флягаэзöн грузитöм тележкаа колёснöй трактор, горöн гурöтöмнас ас гöгöр пемыт лöньсö косявтöн, кежис трасса вывсянь Порсева ладорö.

Туйыс пондöтчис умöль. Эшö умöльжыкöн мыччассис сiя пемытувья. Трактор бöрись тележкасö чапкалiс то увлань, то вывлань, öвтiс борт вылiсь борт вылö, сiйö и видзöт — боквывтас.

Кузь туй коста быд берсясö баитöмсянь мыдзыштöм высьтiсиссез эстöн вöлись лöньсисö. Кин пукалiс — сувтiсö коккез вылö, зэвжык жмитчисö джуджыта ыждöтöм борттэз бердö, мед буржыка видзсьыны. Быдöнныслö öнi сымда и думайтсис, кыдз бы тракторист казявтöг эз пöрöт тележкасö, ловйöн да дзоньöн вайöтiс гортöдз.

Светлана, кöда талун пукалiс не кабинаын, а сулалiс öтлаын инькаэзкöт тележка вылас да ны моз жö видзсис усьöм-пöрöмись, öткоста сё эшö думайтiс öштöм пода йылiсь, кöда увья нельки гортö бертны некытшöм охота эз вöв.

Лыддьыны, что кватьнан мöсыс сюрисö öтдруг лось петляэзö нето кватьнансö жö öтдруг косялiс ош, эз позь. Лоны сэтшöмыс öтiк лунö некыдз эз вермы. И кыв зоотехник сымдасö кинсянь, ас синöн адззывтöг, некöр эз бы верит. «Сiдзкö, ловьяöсь. А эгö кö перво жö адззö, дак дзир сы увья, что кошшим не сiя местаись, кытöн нiя вермисö лоны. Эзö разь, шуам, вермö нiя янсöтчыны да кольччыны табуныс сьöрись эстöн ни, эшö трасса вылас петтöдз? Вермисö. Сiдзкö эстiсь и колö кошшыны.

Мыйкö дырна тележкасö эшö чапкалöв-керис увлань-вывлань. Но вот вöрыс пемытiнас öтмöдöрö паськалiс. Трактор петiс ыббез вылö, гурöтöмлöн говкыс лöньсьыштiс, а ачыс сiя дзик гажмис, содтыштiс чож. Чожа кольччис бöрлань фермаэз весьтiсь паськыт да нятьöсь лог. Трактор öдззöтчис деревня одзись медбöрья керöсок вылö.

Деревняыс узис ни. Некытöн и öтiк биок эз тыдав. Эз саймöт сiйö и тракторлöн гурöтöм. Туй вывсис кежöмöн, тракторист зэв матö сибöтчис аслас öшын увтö, сувтiс.

— Истиннöй Кристос. Лолйöн жö, батя, кыдзкö вайöтiс.

— Локтiм, инькаэз, гортöдз, локтiм, — негорöн баитiсö высьтiсиссез тележка вывсис лэдзчытöн, рознитчисö деревня пасьта.

Гортын Светлана пöрччасис, миссис да пуксьывлiс недырик кежö пызан сайö. Подасö öштöм йылiсь эстöн тöдiсö ни. Аймамыс юасьöм вылö нывка сымда и горöтчис: «Ме ачым нем ог тöд», пызан сайсянь уськöтчис ольпасьö и минута бöртi дзик сылiс.

Саймис Светлана не асылыс сибöтчöмсянь и не пöттöдз узьöмсянь, а адззылöм вöтсянь, кöр аймамыс эшö узисö, а югдынытö öтöрас вöлись пондöтчис. Нывка зэгалiс быдсöн кикокнас, а сьöлöмыс моросас вартiс сэтшöм вынöн да перыта, кыдз эз бы вермы вартны баня жар понсянь. Бöр ланьтöм йылiсь и думайтны вöлi нем, кöть чеччыны вöлi эшö одз. Адззылöм вöт сэтшöм ятнöя сулалiс син одзын, что Светлана öнöдз эшö и кылiс, и адззис асьсö сы пытшкын. Мыйкö дырна нывка куйлiс осьта синнэзöн, мöдпöв видзöтiс быдöс адззылöмсö, думайтiс: «Мый одзын этö? А вдруг былись сiдз?..» Кольччыны ольпасьын эта дума бöрсянь эз ни позь. Сiя куркнитiс-чапкис вывсис кокнит шебрас, пондiс пасьтасьны.

— Кытчö тэ сы одза? — саймис да юалiс заборка сайсянь мамыс.

— Фермаö. Кытчö эшö этася.

— Одз öшö да... Бöра я мый я Вырвожас мунан?

— Ог на тöд. Мöссэз колö кошшыны.

— Дак кыкöн бы, батi?.. Кытчö тэ öтнат? — шыасис коласас айыс.

— Оз ков, ая. Ме эшö ачым ог тöд, кысь да мый... — ыбöс колассяняс ни поперегалiс Светлана айыслiсь баснисö, петiс.

Асылыс вöлись пондöтчис. Вöлi сöстöм да ыркыт. Нельки горрез эз на лонтiсьö. Дзир петуххезлöн уна голоса сьылöм дугдывтöг косялiс деревня весьтiсь русö да жагвыв пондöтчис рöмсявны не öддьöн эшö мича рöмö асыв ладорсянь кымöр.

Трактор гöгöр вились чукöртчисö высьтiсиссез. Сэтчö жö сёрöнжык петiс и ачыс тракторист, заводитiс. Перыта быдöнныс пуксисö, перыта жö вöрзисö. Недырик кежö кежалiсö фермаö, мед вежны флягаэз. А кытчöдз петiсö трасса дорö, асылыс вöтiс. Шондiлöн медодзза югöррес сибалiсö гырисьжык пу йыввез бердö, жагвыв маласьöмöн, но сувтчывтöг пондiсö йиджны увлань. Дзик пакмис, пышшис вöр коласiсь ойся пемыт. Поснит бичирöн койыштiс-öзйис турун вылын лысва. Саймöтöм шондi югöррезнас ловзис вöр. Öтмöдöрсянь öдззис кывны кайезлöн мыдзтöм эшö асывсянь сьылöм.

Трасса дорас Светлана чеччис, видзöтöв-керис бöрсяняс учöтсялан трактор вылö, кытчöдз сiя эз саясь син одзись, öнi, кöр нывка кольччис öтнас аслас думаэзкöт, адззылöм вöтыс виль вынöн сувтiс син одзас. Сiя жö уськöтiс тöдвылö эшö мöдiк тор, кöда талун тожö вачкисис то ли вöт, то ли сказка вылö.

Висьтассяс сiдз. Не тридевятöй царствоын, не тридесятöй государствоын, а сiя жö Порсева деревняын олiсö-вöлiсö кöркö принц да принцесса. Олiсö нiя öтiк улицаын, нельки керкуэзныс сулалiсö паныт öтамöдлö, кöднö янсöтiс дзир непаськыт деревенскöй улица. Быдлöн ны коласiсь вöлiсö айез да маммез, пöрисьжыкöсь ли, томжыкöсь ли, сойез да воннэз, но басниыс часöт не ны йылiсь.

Зуалöм сöдз кодь чочком юрсиа, мича кымöр вылö вачкисян сина, быдса тöлiсь кодь гöгрöса чужöмбана да быгрöтчан кодь волькыт кикока принцессалöн, кытшöмöн сiя тöдiс асьсö, а пондiс сiя тöдны асьсö нёльöт вывсянь, вöлiсö аслас чачаэз, кöднöн сiя орслiс. Кыдз одзланься мамлöн — принцессаэс, кыдз оланас быдöс мампöвыс, тожö челядясьлöны, — сылöн вöлiсö не только быдкодь чикись кыян ленточкаэз, вöлiсö и поснит дöмасовöй рузумоккез, одеялоэз да подушкаэз да ас кодяс жö чочком юрсиа, голубöй сина акань, кöдö сiя быдса час сьöрна тöбавлiс да водтöтлiс узьны, но «вадiсьöм» кузя минута кыным бöртi чеччöтлiс бöр и вились час сьöрна, а то и дыржык вежис сы увтiсь «ва» рузумоккез, дышöтчытöг кутчисьлiс тöбавны мöдпöв. Сiдз вöвлi тöвнас.

Гожумнас сiя жö аканькöт принцесса петавлiс гуляйтны видз вылö, кöдöн вöвлi öшын увтiсь порсьтурунöн, сизьюрöн да туйдортурунöн вевттисьöм лудовка. Эстöн принцесса сьылiс аслас аканьлö песняэз, сылö жö гöрдззис сизьюр цветтэзiсь басöк юркытшшез.

Томыник принц, кöда сэк кежö вöлi сизимöт вылас ни, орсiс ас мознас. Тöвнас сiя сувтчывлiс негырись лыжаэз вылö да вермавлiс крут «керöссэз», кöднöн вöвлiсö деревенскöй йöррез пöлöн пуксьöтöм столаэз. Тулыснас, пидзöсöдз бродиттöн, прудйис канаваöт визывтан шор, лэдзавлiс сы вылö гижöтiсь куснялöм корабллез. Гожумнас ысласис аскерöм самокат вылын, «сабляöн тышкасис враггезкöт» — киас сюрöм бедьöн пöрöтлiс йöррез пöлöн петшöр да шульгашать, чылiс соседдэз льöмпуэз вылö да судзлалiс воöм льöм.

Öтамöднысö нiя адззисö да тöдiсö сэксянь, кöрсянь адззисö да тöдiсö асьнысö, но мед лоны ас коласын ёрттэзöн, вöлiсö эшö тöдтöмöсь. Быдыс ны коласiсь орсiс ас кежас, и öтамöд чачаэзлö некытшöм завид эз кут. Но кадыс — шор, öтiк местаын эз сулав.

Кытшöмкö тулысö учöтик принц öтöрас мыччасьны дугдiс. Эта местö сы керкусянь улица мöдöрöдз пондiс кывны, ась эшö и не öддьöн горöн горалан чача вылын орсöм. Кылiс сiя не öтiк неделя сьöрна, лунiсь лун, и, кыным одзлань, лоис сё вынажык да горажык, а öткаса шыэс пондiсö öтлаасьны кытшöмкö стройнöйжык ладö. И кыным дыржык принцесса кывзiс этнö горалан шыэсö, сыным нiя сылö гленитчисö сё öддьöнжык да öддьöнжык.

Кытшöмкö кадö первуись, ась и полöмöн, мед только буржыка вермыны кывны адззывлытöм чачалiсь горалöм, принцесса вуджис улица мöдöрöдз, гусьöн сибöтчис принц öшын увтö, керыштiс бöрлань киэсö, чатыртыштiс вывлань юроксö, пондiс кывзыны. Гортланись канава дорö пуксьöтöмöн кольöм акань эта коста усис, пондiс «горзыны», но сылiсь горзöмсö принцесса эз ни кыв. Öшын сайын басöка горалан шыэс сiйö пöдтiсö. Но кыдз только орсöмыс лöньсис, принцесса сэтöн жö уськöтчис бöр улица мöдöрö, а канава сайö вуджöм бöрсянь кутiс кипöлöт ассис горзiсь акань да жагвыв пондiс öктыны цветтэз, мыйöн и мыччалiс, что нем сэтшöмсö сiя эз кер.

Кытшöмкö лунö учöтик принц, кöр пондiс ни, кылö, артавны öтi-мöдi басöка горалан чачаись (а вöлi эта неважын небöм гармоння), сiя петiс öшын увтöдз, пуксис пес пилитан козла вылö да и кутчис пилитны, мымда прок. И ась унаыс сы орсöмись эшö эз шогмы, сы киын чачалöн горалöмыс ас мозöн саймöтiс учöтик принцессаын интерес. Охота вöлi кывзыны и полöмсö сiя вермис. Петiс сiдз, что кытшöмкö кадö, аслыс казявтöг, аканьсö кипöлöт нуöттöн, сiя вились вуджис улица мöдöрöдз, оськöв бöрын оськöв сибöтчис зэв матö козла бердöдз, сувтiс, дзик кынмис местаас осьтыштöм öмöн.

Орснытö учöтик принц старайтчис сыбурна, что принцессалiсь дынас сибöтчöмсö нельки эз и казяв. И мымда чулалiс этадз кад, некöда ны коласiсь эз тöдö. öтыс орсiс — мöдыс кывзiс. И вöлись сэк, кöр орсöмсяняс мыдзыштöм принц жмитыштiс меххесö да лэбтыштiс юрсö, казялiс принцессасö ас дынсис.

— Этö тэ?

Да. Эта вöлi сiя. Но гусьöн сибöтчöм увья кутöм стыдсянь томыник принцесса пеллезöдз пыкнитiс-öзйис би рöмöн, шыасьтöг уськöтчис аслас аканькöт улица мöдöрö.

Сы пышшöм кузя орснытö принц одзлань кежö эз ни дугды, кыдз эз кус принцессалöн охота кывзыны сылiсь орсöм. Сiя кадсянь и вöвлi сiдз — аканькöт принцесса гуляйтлiс сэтчöдз, кытчöдз эз мыччисьлы принц. Колiс бöрьяыслö петны горалан чачаöн öтöрö да пуксьыны козла вылö, кыдз мöдыс, кöда только этö и видзчисис, вунöтлiс аслас акань йылiсь, вуджавлiс улица мöдöрö, ась одззамоз полöмöн, сибöтчывлiс зэв матö орсiсьыс дынö, мукöд коста гусьöн нельки пуксьывлiс сiя жö козла вылö мöдöр понсяняс, видзöтiс, кыдз принцлöн чöрс кодь кузь да вöснитик чуннес береститöны öтöрсянь сьöд, мöдöрсянь чочком кнопочкаэз кузя, мыдзтöг да чöлöмöн кывзiс.

Сiдз пондöтчис ны коласын тöдсасьöм.

Кыным одзлань — принц велалiс орсны сё буржыка, а принцессалö сылöн орсöмыс гленитчис сё öддьöнжык. Эд музыка шыэзiсь позис кывны тулыслiсь сибöтчöм да шоррезлiсь больгöм. Локтiс сэтчöдз, кöр орсöмсö кывтöг принцесса, мыччассис, и лун сьöрна овны эз вермы.

Охота вöлi кывны сiйö рытöн и асылöн. Жаль — оланас лонытö сiдз эз вермы.

Чулалiс мича гожум. Сибöтчис гудыр ар. Кытшöмкö лунö одз асывсянь принц кышалiс пельпон сайö ранец, иньдöтчис школаö. Эта бöрсянь сiя пондiс вовлыны гортö дзир павжун кежö, а гортся удж увья, кöдö сылö сетлiсö школасянь, не быд лун ештывлiс босьтны киас горалан чача да петны öшын увтö, мед гажöтыштны ассис принцессасö. Сёрöнжык сэтчö жö эшö и кöдздöтiс: медперво кынтiс, а сэсся пондiс усьны саван кодь чочком лым. Принцлöн шочыника орсöмыс öнi пондiс кылышавны дзир керку пытшксянь. Но и эта тожö гажöтiс. Принцесса дышöтчытöг сюйлiс коккесö шоныта катайтöм пимиэзö, пасьтавлiс вылас небытик гöна пась, кышавлiс юр вылас гöрдззöм шапочка, киэзас — бытшöма гындöм вуруновöй кеписёккез, вуджавлiс улица мöдöрö, сувтчывлiс принц öшын увтö, кывзiс. Орсöмыс шонтiс. Ась гöгöр и сулалiс кöдзыт тöв, но музыка шыэзын принцесса сё эшö кылiс кайезлiсь горалöм да мошшезлiсь дзингöм, адззис цветтэзлiсь окласьöм да бабыввезлiсь быркайтöм.

А öтпыр тöвнас, кöр öтöрын чикöтiс бимороз да зубыта чеплялiс ныр, кöр кöдзытсянь горöн потласисö пуэз, а лэбзьытöн кынмисö поснит кайез, принц нельки школаö эз мун. Сiя асывсянь пукалiс гортын, лонтiс кöртовöй печка, орсiс. А принцессаöс и эта лунö гортын эз пукöт. Быдсöн куржавитöм аслас лолалöмсянь, сiя вöрöтчытöг сулалiс принц öшын увтын, сiйö и видзöт, тöрстас каёк моз, кывзiс. И кöр принц, пятак пасьтöн ушкöм öшын стекло пыр, казялiс сымдасö, петiс, пыртiс принцессаöс керкуöдз, чöвтiс, пöрччалiс, пуксьöтiс матöжык гажöн урган печка дынö, кутiс сылiсь доннэз вылö вачкисян чунёккесö аслас кузь чуня шоныт киэзö, ловнас ушкытöн, пондiс шонтны. Принцесса перыта шоналiс бöр. Ёртыс благородствосянь сiйö кутiс нельки жар. Но принцессалiсь мичö пасьталöм чужöмсö принц мылякö эз казяв, босьтiс киас горалан чача, пондiс орсны. Эта бöрсянь принцесса, ась и одззамоз полöмöн, ачыс ни пыравлiс шочыника принц ордö. Сiдз и чулалiсö год бöрын год.

Кытшöмкö арö и аслыс принцессалö ковсис мунны школаö. И сiя вежöртiс, что вöтчö принц сьöрö. Эта сiйö тожö гажöтiс. Сэк принцыс отсöтöн букваэс вöлiсö велöтöмöсь ни, а одзлань сiя отсавлiс принцессалö гижны да лыддьöтны, решайтны да рисуйтны. Жаль только, что и эта гажыс кыссис недыр, дзир год сьöрна. Мöдiк год кежö принц вуджис витöт классö. А сiдз кыдз ны школаын витöт классыс эз ни вöв, сылö ковсис мунны Сенинскöйö. Эта нiйö янсöтiс. Вежöртана, что аслас принцтöг принцесса гажтöмтчис. Отсавны сылö велöтчöмын лоис некинлö, а принцлiсь орсöмсö позис кывны дзир öтпыр неделя пытшкас, кресення лунö, кöр сiя ойкöлöн вовлiс гортö.

Аслас гажтöмтчöм увья принцесса и тэрмöтiс кад, мед не кольччыны ёртыс сьöрись, вермыны сiйö вöтны. И вöтiс... ась и недырик кежö. Кöр сiя вуджис витöт классö, тожö пондiс ветлыны Сенинскöй школаö. Сэтчин жö эта годö принц кончайтiс кыкьямысöтö. Год сьöрна вились велöтчисö öтлаын. И эта бöра гажöтiс. Быд субботаö Сенинасянь гортöдз, быд кресенняö гортсянь Сенинаöдз бöр ветлiсö öтлаын. Велöтчисö тожö öтiк школаын, ась и не öтiк классын, öнi принцлiсь орсöмсö позис кывны быд коста, кыдз гортын гармоння вылын, сiдз и школаын, баян вылын, орсны кöда вылын сiя тожö велалiс.

Гортсянь Сенинаöдз ветлiсö не öтнаныс, а уна ёрттэзкöт. И кыдз часто овлö том отир коласын, бöбалöм могись зонкаэз нылочкаэсö невночка сё ни обидитлiсö.

Сiдз öтпыр тöвнас, сiя жö туй вылын кинкö ны коласiсь зэв ёна туплялiс принцессаöс лымын. А принц, кöр казялiс сымдасö, сэтöн жö уськöтчис «обидчик» вылö: «Эй-эй! Тэ мыйлö менчим принцессаöс обидитан?!» Эта вöлi горöтчöм шутка могись. Но кыдз ачыс принцесса, сiдз и сылöн «обидчикыс» примитiсö этö быль местö. Обидчик сэк жö, топ сiйö чышкисö, кежис принцесса дынiсь. А ачыс сiя, кöр сувтiс коккес вылö, вель дыр пыркöтчис сайöвтчöмöн, мед не мыччавны принц кыввез бöрсянь чужöм пасьта чепöссьöм мич. Не этна я кыввес, кыдз любитöм йылiсь медодзза казьмöтöм, и кольччисö сы тöдвылын век кежö? Не сысянь я первуись и зорамис сы ылöсын: «Сiдзкö, ме сылö гленитча? Но и ась. Сiя меным тожö...» Не ны увья я, кадсö одзалöмöн, принцесса öнiсянь ни кокнита вермис сувтöтны син одзас, кыдз сiя тулысся мича рытö сулалö ордчöн аслас принцкöт чочком кымöрö каттисьöм льöмпу увтын? Не эна кыввез увья я кытшöвтö сыкöт ордчöн тöдса ыб гöгöр, югыта öгралан звездаэз увтын? Не ны увья я, кадсö одзалöмöн, сылö и только сылö, аслас принцлö, сетö сибöтчыны öгралан тырппезнас аслас тырппез бердöдз, кыдз меддона да медколана мортöс кольлалö сiйö армияö, тöждiсьö, гажтöмтчö, гижö сылö шонытся-шоныт письмоэз, видзчисьö, панталö. Гожумнас ни, велöтчансö кончитöм бöрсянь, кытшöмкö рытö принцесса подругаэскöт ветлiс колхознöй анькытш вылö. Бöр берттöн, деревня дорас нiйö панталiсö зонкаэз, кöдна коласын вöлi и сiя, принц. И сэк, кöр нывкаэз уськöтчисö пышшыны зонкаэс увья кинлö кытчö туй, мед не сетны мырддьыны анькытш, принцесса, ассис принцсö казялöм бöрсянь, керны сымдасö эз ни вермы. Содзтыр анькытш пуртöссэсö одзлань нюжöтöмöн, сiя кольччис сулавны принц одзын, дзик кынмис местаас, а пеллезöдз чепöссьöм мичсö сайöвтöм могись мышкыртыштiс увлань чужöмсö.

— Этö тэ? — дивуйтчытöг, сё эшö кыдз челядь кадö, юалiс принц.

Сьöлöмыс вынöн ёткöтöмсянь мöдыс этö юалöмсö эз кыв, кольччис сулавны чöлöмöн.

Не сiя годдэзын ни вöлi статя вывтыра, гажа мывкыда, сэтöр сина да чож принц, мед не казявны принцессаын сiйö, мый сiдз сайöвттöг усис син вылö. Но эта понда сiя, кыдз думайтiс принц ас кежас, вöлi эшö том. Принцессаын быдöс казялöмсö примитiс полöм местö.

— Тэ тай сё эшö челядёк... Сё одззамоз полан... Вежöртана, сэтшöм кыввез бöрсянь висьтавнытö принцесса нем эз письты. А мöдыс, сы содзись кык анькытш пуртöсöн, тэрмасис кежны бöр.

«Этö сiйöн, что ме сысся томжык. Вöвны бы öтiк годсяэзöн — некöр бы сымдасö эз висьтав».

Сiя арö принц мунiс велöтчыны городскöй ПТУ-ö, мед лоны крановщикöн, а принцесса пуксис вöлись кватьöт классö. Куим год бöртi, кöр принцессалöн кыкьямысöтыс вöлi кончитöм, мöдыс ПТУ бöрсянь мунiс служитны армияö.

Кольлавны сiйö, кыдз этö керис принцесса одзжык, аслас мечтаэзын, былись эз усь. Этö сы местö керис мöдiк, кöда год бöртi петiс жöник сайö. Но нельки сэк принцессалö принц письмоэсö эз ыстав, тыдалö, сё эшö лыддис сiйö челядёкöн. А сiя видзчисис: и тöждiс, и гажтöмтчис, а öткоста надейтчис да быдмис.

Принцесса велöтчис медодзза курс вылын, институтын ни, кöр принц бертiс служба вывсянь. Сэк кежö томыник принцесса йылiсь сiя, вачкисис, нач вунöтчис ни, немöн и öтпыр эз сет тöдны ас йывсис. Уджавны крановщикнас сiя тожö эз понды. Кыдз кывсис гортiссез пыр — мунiс велöтчыны милицейскöй школаö. Но нельки сэк принцессалöн сы вылö надейтчöмыс эз кус.

Институтас велöтчикö челядёкнас принцессаöс лыддьынытö эз ни позь. И пантавлiс сiя аслас принцся не етша мöдiккезöс, кöдна пыр кежö вöзйисö сылö и ки, и сьöлöм. Но вевттьыны сыын аснаныс челядь кадся мечта сiдз некин и эз вермы. Медыджыт надейтчöмыс сё эшö кольччис сы вылö. Этöн надейтчöмнас принцесса и бертiс гортö.

Бöрья луннэзö, мöссэсö öшталöм кузя, Светланаöс эз коль öтiк гажтöм дума: «Кыдз бы эта делоыс эз лок судöдз». Полöтiс не сiя, что öштöм пода понда ковсяс отвечайтны, а сiя, что сэтшöм качествоын усяс пантасьны Проша Костякöт (öнi, вежöртана, Константин Прокопьевич ни), ась и челядь кадся, но öнöдз эшö одззакодь сöстöм да югыт мечтакöт. «Эд некин мöдiк, а сiя саймöтiс кöркö аслас горалан чачаöн сьöлöм. Некин мöдiк, а сiя шонтiс аслас киэзöн да лолöн кынмöмсянь доннэз вылö вачкисян чуннез. Некин мöдiк, а сiя велöтiс тöдны медодзза букваэз, отсалiс гижны да лыддьöтны. Сiя ыслöтiс аслас самокат вылын, судзлалiс льöмпуэз вылiсь льöм, новйöтiс гожуммезнас ягöда местаэзöт. Некин мöдiк, а медодз бöра жö сiя шуис менö аслас принцессаöн, кöр ачыс былись ни вачкисис настоящöй принц вылö, пöртiс асьсö мечтаö ме ылöсын да сьöлöмын. И сувтны öнi сы син одзын виноватöйöн колхознöй пода понда? Не-не-не. — Нывка зэркыта зэгöтiс öтмöдöрö юрнас. — Эд этася ыджытжык стыд да позор и лоны оз вермы». А талун ойнас, кыдз нарошно, эта медполöтанаыс вöтын и уськöтчис. Думайтны эд только... Лунся югытöн, отир син одзын Костя пыртiс сiйö кытчöкö курöг сувдышта картовка кор коласö, кытöн нельки сайöвтчынытö, кыдз колiс бы, эз позь, стыдтöг окавтöн, кынымöтчид ни, öтiк и сiйö жö, юалiс: «Кыдз этö тэкöт, принцесса, вермис лоны сэтшöмыс, что сы дырна менö видзчисин, а колхознöй подасö öштiн?» Вежöртана, что сэтшöм вöт бöрсянь одзлань эз ни узьöт, нельки гортся ольпасьыс полöтiс.

Мый ылына Светлана оськалiс туйвеж бердсянь тырöм делянкаэз да поснит вöр коласöт, эз тöд. Адззылöм вöтыс öнöдз эшö кольччис сулавны син одзын, кöда увья то чапкывлiс жарö, то вывтыр чутравтöдз коявлiс кöдзытöн. «Мый одзын жö бы? Неужто мöссэсö былись ог адззы?»

Кытшöмкö лажмыт местаын син вылö усис кинкö ветлöтöмсянь тöдчöмöн нильышалöм турун. Нывка сувтiс, пондiс видзöтны. Олöмыс вöлi паськыт, вачкисис не öтiк вылö, но не ылын, не матын некин эз тыдав. Эз тöдчö бытшöма и следдэз. Местаыс вöлi кöс да туруна. Ковсис кытшöвтны. Сэк вöлись и усис инмыны кынымкö назьмитöм вылö. Сiя вöлi талуння ни. «Адззи эд, тыдалö! Этö нiя!» — думнитiс Светлана гажвевйöн. «А вöтыс?.. Мыйлö ме сэк сiдз вöтаси? Сiйöн, натьтö, что полi да думайтi эта йылiсь дугдывтöг, сэтшöмыс, кывсьö, оланас тожö овлö. А эшö сiйöн, что былись сэтшöм стыд-позорыс, мед сiя менö лунся югытöн да эшö отир син одзын... лонытö некöр оз вермы». Эта вылын нывка и нач гажмис. Одзлань кольччис дзир тöдны, кöдöрö ештiсö мунны мöссэз, мед вöтны, панöвтны да петкöтны нiйö трасса дорö.