Пияна ош

Бертiм ми гортö бöр неделя бöртi. Суббота лунö, кöр школаын вöлiсö чулöтöмöсь вит урок, сiя жö компанияöн ми быдöнным чукöртчим Чурак посад сайын да и иньдöтчим туйö. Öтлаын миянкöт вöлi и Гришка ёртнымлöн пон Сьöдпель. Сiя быдса неделя сьöрна видзчисис миянлiсь гортö бертöм, а йöз поннэс пурöм увья общежитие посöдз увтсис эта кадö кодьöн эз и мыччасьлы. Öнi жö, чожмöм и гажмöм посадсис петöм бöрсянь, витикöнмоз каттьыштöм бöжа, шочыника бöрлань дзарышалöмöн, сiя и шупыта, и кокнита тöлöтiс-котöртiс одзаным горт ладорö.

Поныс сьöрö да гортлань и ми тожö тэрмасим. Талун миян пельпоннэз сайын волыса котомкаэс вöлiсö нач просöсь и увлань эз ни нырыштö. Сэтчö жö павжун бöрсянь пондiс кымрасьны, и туй вылас миянöс вермис вöтны зэр.

Час сьöрна подöн оськавтöн ми чулалiм нёль километр ылына тракт кузя да кежим гортся туйвежö. А недыр мыйись вöр коласöттяс оськалöм бöрсянь кысянькö эшö ылiсянь миян пельшы бердöдз пондiс сибавны кытшöмкö понлöн лёка да зэркыта вувтöм. Этö вувтöмсö кылöмсянь вöралiсь да тöдiсь морт перво жö сорасьтöг висьталiс бы, что поныс сувтöтiс кинöскö гырись зверрез коласiсь: вöрмöсöс или ошöс. Нельки миян Сьöдпель кычаныс, кöда кылiс эта понлiсь вувтöмсö, пушитiс-сувтöтiс сиви вылас гöн да никсöм сорöн öдззис чепсасьны одз да бöр: то сiя уськöтчывлiс даскыным метр ылына одзлань, то полöмöн да норöн вувтышавтöн бертлiс бöр да пондывлiс каттисьны миян коккез гöгöр. Кылiс я Сьöдпель тасянь ни кытшöмкö зверлiсь дук, полöтiс я сiйö понлöн лöгвевья вувтöмыс, вежöртны эз позь. Кывны поныс моз кинлiськö дук ас нырöн мийö эг вермö, адззыны вöрыс пырйöт — сiдз жö. Этасянь миянлö сымда и кольччис, кыдз кывзiсьны да дзирбарасьны öтмöдöрö ас гöгöр. Сы коста жö миянöс бöрсяняным кинкö топ плетьöн вашöтiс. Öтамöд сьöрись кольччытöг, ышки-пойки ми тэрмасим одзлань. Но кыным ылöжык мийö мунiм, сыным эта понлöн зэркыта да горöн камгöм-вувтöмыс пондiс кывны сё матынжык да горöнжыка.

Костикакулан видз бердсянь горт ладорö туйыс километр ылына кыссьö öддьöн ни пöрись да шоч быд сора вöрöт. Ордчöн гырисся-гырись кöззэзкöт да пожуммезкöт позьö пантавны пипу да кыдз. А увтi, пыдына нитшсялöм му увья, шочыник, том рябинпуэзся да нин ляккезся сэсся нем и абу. Сiйöн вöрыс, кöть сiя и гырись, мыччассььö дзула-бала шочöн, и тыдалö шучкöп вель пыдына. Веськыт да паськыт эстöн и туй, а ровнöй местаыс увья тыдалö öтмöдöрö тожö ылына.

Эта вöрö пыртöн ни поннэслöн зэркыта вувтöмыс пондiс кывны эшö горöнжыка. А öтлаын эта вувтöмкöт сорлассьöмöн пондiсö кывны и мöдiк шыэз. Поныс вувтöмся нiя вöлiсö то тöдчöмöн кызжыкöсь, а то эшö вöснитжыкöсь и вачкисисö то ошлöн паныт да лöгвевйöн эралöм-ряксöм, то кычанлöн кодь норöн визжитöм вылö. Быдöс эта вувтöм-ряксöмыс да визжитöмыс паськалiс уль вöр коласас сэтшöм горöн, что мыччассис кытöнкö нач матын туй бердас ни. Но мымда бы ми эг дзирбарасьö сы ладорö да эг вынсьöтчö казявны кинöскö ловьяöс, сiдз миян син вылö кытчöдз некин и эз усь. Этасянь и асланым одззася тэрмасьöмись мийö кытчöдз эг сорсьö, котöрöн-котöрöн оськалiм сё одзлань да одзлань. А тэрмасьтöн, сэтчинiсь жö, одзсиным, миянлö медодз да нач видзчисьтöг усис казявны кык подвода. Вежöртана, что подводаэз этна вöлiсö миян, гортiсьöсь, кöдна, натьтö, нöбöтiсö Чуракись элеваторö виль урожайись сю. Пара вöлöн доддялöм телегаэзöн нiя, тыдалö, вынсьöтчисö локны миянлö паныт. Телегаэз вылын пукалiсь ямщиккес, год куим-нёльöн миянся пöрисьжыкöсь зонкаэз, ныкайтiсö вöввезнысö, мымда горш, быднёж чирзiсö-горöтлiсö ны вылö да кадiсь кадö сырйышалiсö нiйö плеттезöн. Но не öттэслö, не мöддэслö эта немымда эз отсав. Горöн вувтöм-ряксöм да визжитöмсö одзсиныс кылöмсянь мунны сылань вöввез некыдз эз лысьтö.

Кывзiсьтöг нiя чепсасисö то öтöрö шульгалань, мöдöрö веськытлань, мед бергöтчыны бöр, и дзир ямщиккес видзöмсянь кернытö сымдасö эз вермö.

Вежöртана, что тöдса подводаэсö казялöмсянь мийö гажмыштiм. Быдöнным öтдруг да öтамöд коласын одзасьöмöн, котöрöн уськöтчим нылö паныт. Сiя кадö вöр коласас поныс камгöм-вувтöм вылö горöн эралöм-ряксöмыс недырик кежö лöньсьыштiс. Эта местö пондiс кывны кинлöнкö эралöмöн сорöн жö норöн визжитöм. Öдззöтчöмöсь котöртны подводаэс ладорö, ми эг ештö чулавны и витдас оськöв ылына, кыдз веськыт ладорсянь миян одзын, тшöтш туй вылас ни, горöн то ли ружтышавтöн, то ли рюксышавтöн (лэбтiсьöм шум коласас сымдасö бытшöма вежöртны эз позь), турунъюрöнмоз, тарöвтчöмöн, мыччисис ош. И ась ми паныт поныс вувтöм вылö сылiсь ряксöмсö кылiм важын ни и нельки казявнытö сiйö одзлань вынсьöтчим, эта пантасьöмыс, кыдз сы понда, сiдз и миян понда вöлi, тыдалö, видзчисьтöм.

Колiс только ошыслö мыччисьны миян син одзын туй дорись пуэс коласын, кыдз ми быдöнным, горöн чирзöмöн: «ошыс! о-ошы-ыс!» — бергöтчим да уськöтчим бöр. Эта чирзöм-горöтлöмыс сы понда, тыдалö, вöлi тожö видзчисьтöм. То ли миянкöт видзчисьтöг пантасьöмсянь да горöн чирзöмсянь, то ли туй вылас, югытжык местаас сюрöмсянь ошыс, тыдалö, повзис миянся не етшажык. Горöн рюксыштöм сорöн сiя бергöтчис бöр, но сы коста жö сы вылö бöрсяняс чеччöвтiс сьöд-чочком сера пон. Эта вöлi миян колхозiсь председательлöн Патраш, кöда, тыдалö, бöбасьöм ямщиккескöт мунны эта туйö. Поныс кватитöмсянь ошыс ош моз и рякöстiс, пуксис бöр вылас, а öткоста öдззис курышавны ас гöгöр одзись лапаэзнас. Но поныс сы вылö и пон, мед вермыны кутны зверьсö, йöртны сiйö, кыдз баитсьö, да не сетчыны аслыс. Кöть сэтöн жö и колö висьтавны, что поныс поныскöт ылын не öткодь. Мый бы, шуам, Сьöдпельыслö, кöда бертiс миянкöт гортö, не кутчисьны вöлi öтлаын Патрашкöт ошыслö паныт да мыччавны асьсö отир син одзын туяна вöралiсь понöн, кыдз сiя вермис мыччавны асьсö кöчавтöн? Но сiя кадö, кöр Патраш пуксьöтiс ошсö бöр вылас да сэсся оськöв ылына некöдöрö керны сылö эз сет, Сьöдпель, ошсö казялöм бöрсянь, сайöвтчис миян коласö, жмитчис хозяиныс коккез бердö, чуксö вывлань чатыртöмöн öддьöн выразительнöя видзöттöн вуджöтлiс синнэсö öтiк вывсянь мöдiк вылö, дзик юалiс: кытчö нö пö öнi пондам воштiсьнытö? Да öткоста норöн да нюжвылöн уннялiс-горзiс кыдз аслас кулан одзын. И пондыны кö бы кывзыны сылiсь уннялöм-горзöмсö дыржык, нем бы эз видз и быдöннымлö миянлö унньöвтны сы сьöрö жö.

Сiя кадö, кытчöдз Патраш видзис ошсö öтiк местаын, кыдз домöт вылын, а мöдыс, бöр вылас пукавтöн, топ кураннэзöн куртiс-сыналiс одзись лапаэзнас ас гöгöрись ру, вöр пытшксяняс сы дынö сьöрсьöн-бöрсьöн петiсö эшö кык ошпиян. Вежöртана, что и эта миян понда вöлi тожö видзчисьтöм. Нiя вöлiсö эшö негырисьöсь и янсöтчыны мамныс дынiсь эз вермö. Сiйöн и дорйöмсö да отсöтсö видзчисисö асланыс мамсянь. Но кыдз только Патраш казялiс ошпияннэзлiсь мамныс дынö сибöтчöм, сэтöн жö поперегалiс нылö туй, уськöтчис паныт. Сиви гöгöрöттяс кватитöмöн пон вынöн мегырнитiс ош пиянсö мамыс дынiсь бöр. Мöдыс эта коста ештiс сибöтчыны мамыс дынöдз, кöда сэк кежö вились пондылiс сайöвтчыны вöр коласö.

Панöвтöм поныс уськöтчöмöн мампöв ош мöдöтпырись чывкнитiс-петiс туй вылас, мед вермыны вуджны туй мöдöрас. Но керны сылö сымдасö Патраш и öнi эз сет. Öтпыр-мöдöтпыр бöрсяняс кватитöмöн пон пуксьöтiс ошсö тшöтш туй шöрас. И сiя кадö, кöр сiя сибдöмкодь голосöн ни вувттöн чепсасис ош вылö быд ладорсянь да кыдз зi чушкалiс сiйö аслас пиннезöн, мампöв ош сэтшöм жö перыта бергалiс бöр вылас öтiк местаын, быд горшись ряксiс паныт да дугдывтöг куртышалiс лапаэзнас сы гöгöр визлалан пон сьöрö.

Эта öтласа шумöн повзьöтöм вöввесö, кöр нiя не только кылiсö мампöв ошлiсь ряксöм, но и адззисö сiйö одзсиныс ас синöн, видзны ямщиккез одзлань некыдз эз ни вермö. Горöн кивзытöн-гöрдлытöн да горöн жö ныррезнаныс корскайтöмöн нiя пондiсö петитчыны бöрлань. Лöньсьöтöм могись ямщиккезлöн тпрукайтöмыс öнi немымда эз ни отсав. Бöрлань петитчытöн пöрис одзись подводалöн телега, киссисö канава дорö сьöкыт рудзöга мешöккез. А öтiкись ны коласiсь, кöда ештöм кышасьны да косьöвтчыны усьтöнняс, сюыс сiдз быдсöн и бузнитiс-киссис туй вылас. Бур кöть сiя, что кыдзкö эшö шквореньыс телегаыслöн передоксис эз пет. Сiйöн сорöн бергöтчöм подводаэз, öтыс тырöн, мöдыс простöн, иньдöтчисö бöр горт ладорö.

Ми кытчöдз сё эшö кольччим сулавны ас местаын, витдас-кватьдас оськöв ылына ошшес дынсянь, öтамöд бердын видзсьытöн, осьта öмаöсь, видзöтiм, мый керсис ошшез да пон коласын. Но кыдз только подводаэс бергöтчисö бöр да иньдöтчисö горт ладорö, миян коласiсь нывкаэс горöтлöмöн пондöтiсö:

— Видзöтö жö, зонкаэз! Бöр эд подводаэс бергöтчисö да мунöны. Колясö эд этчö миянöс. Мый нö ми сэк öтнаным?

Висьтавны кö веськыта, дак видзчисьны кытшöмкö отсöт подводаэз вылiсь ямщиккезсянь миянлö вöлi нем. Эта пияна ош увья нiя вöлiсö нерадöсь асьныс аслыныс и нельки миянтöг эз тöдö, кыдз да мый керны. Но öтлаын ныкöт, пöрисьжыккескöт, миян не сiдз петiс полöм. Öнi жö, кöр нiя иньдöтчисö бöр гортлань, миянлö тожö колiс мыйкö керны. Бергöтчыны да кайны бöр Чуракö некинлöн миян коласiсь охота эз вöв, а гортлань миянлiсь туйсö поперегалiс пияна ош, кöдö ми нельки орддьыны некöдöрсянь эг лысьтö.

Мыйлö колiс понлö петкöтны туй вылас пияна ошсö, эта вöлi вежöртана быдöнныслö. Но не ямщиккезлöн, не миян некытшöм пишаль сьöраным эз вöв и вийнытö сiйö вöлi немöн. Патраш жö, кытшöм бы сiя эз вöв вына да дёрок, мырсьыны этöн каднас куимыскöт, мед видзны нiйö öтiк местаын да не сетны некöдöрö мунны, мыдзис ни. Куимыс сьöрын дугдывтöг чепсасьтöн да пурöмöн панлавтöн сылö некöр вöлi весöтыштны ош гöнöн тырöм горшсö. И кöр сiя кынымöтчид ни, зубыта пышналöмöн, уськöтчис янсöтны да вашöтны мампöв ош бердiсь сылiсь пияннэсö, ачыс мампöлыс кытшöмкö кадö сё жö ештiс чепöссьыны туй мöдöрас неважын пöрöм пипуовöй колода бердöдз. Сы бердö сiя öнi бöрнас и жмитчис. Сы увтö жö сайöвтчисö и ошпияннэс. И мымда бы эстöн Патраш эз мырсьы, кыдз эз пондыв репöтны нiйö туй шöрас бöр, этаись öнi сылöн нем эз ни пет.

Сiя жö кадö, сувтсöн, öтамöд бердын видзсьышавтöн, мийö, пöрччалiм коксиным кöмкöт — нинкöммез да нямöттэз, öтамöд бердö домалöмöн кышыштiм нiйö пельпоннэз вылö, мöдöр туй бокöттяс пондiм сибöтчыны сiя места весьтöдз, кытöн эшö öнöдз кира-вара тышкасисö öтамöдкöт пияна ош да Патраш, а ны горöна пурсьöм-ряксöмсянь кык пельшы коласын кывны да вежöртны нем эз позь. Кыдз только одзын мунiсь зонкаэз сибöтчим ош весьтöдз, сысянь вöлись быдöнным, мымда кинлöн прок, уськöтчим котöрöн горт ладорö. Ась эта коста мампöв ошыслö вöлi ылын не миян дынöдз, миянлö быдöннымлö мыйсянькö думайтсис сiдз, что кыдз только мампöв ош мездiсяс Патраш шогья, сэтöн жö уськöтчас миян сьöрö. И ась не перво жö и не сёрöнжык сымдаыс и эз вöв, но öдззöтчöмöсь эта местасянь, одзлань ми эг ни сувтчывлö. Кинкö миян коласiсь котöртiкас то ли нильдывлiс, то ли падмывлiс да усьлiс ныр вылöдз, горзöмсорöн сэтöн жö сувтчывлiс коккес вылö, вились уськöтчывлiс быдöнныс сьöрö. Эз кольччы миян сьöрись и Сьöдпель, кöда полöтана местасö чулалöм бöрсянь петiс медодзö.

Дугдывтöг котöртöмсянь ми быдöнным важын ни вöлiмö пымалöмöсь люзь. Уналöн миян коласiсь, не висьтавны кö — быдöнныслöн пакмис горшын, и öддьöн охота вöлi юны. Но мампöв ош да Патраш коласын вермасьöм-лёкасьöмлöн говкыс пуктiс-сибалiс бöрсяняным миянлö да полöтiс сэтшöм бытшöма, что сувтчыштны кöть бы öтпырись ловзисьöм кежö некинлöн миян коласiсь нельки дума лоны оз вермы. Сэтчö жö и подводаэсö, кöдна бергöтчисö бöр да иньдöтчисö гортö миян одзын, некытöн туй вылас ми эгö ни вöтö.

Öндрейкулян пос весьтын Патрашлöн камгöм-вувтöмыс да мампöв ошлöн ряксöмыс кывнытö дугдiсö ни. Эта вотöдз километр кык-куим бöраным вöлi кольöм ни. Сiйöн эстöн ми первуись недырик кежö сувтчыштiм, пыд моросiсь ловзисим да öтiк бöрсянь мöдiк юим пос увтсис кöдзыт да кöра ключовöй ва. Но пуксьыны кöмасьны бöр ми и эстöн эшö эгö лысьтö, сiдз кöмтöг и петiм асланым ыббез вылö.

Вот сэтшöм и вöлi ме оланын öтпырись пияна ошкöт пантасьöмыс, кöда кольччис тöдвылын пыр кежö.