Ольтшаккез

Гожумся кадiсь унажыксö ме чулöта аслам неыджыт садын. Уджыс сэк сэтчин, кыдз баитсьö, овлö горшви. То колö ытшкыны пуэз да кусттэз гöгöр лэбтiсьöм турун, то рышкöтны ны гöгöр жö му да сэтiсь жö кыскавны неколана ёгтурунлiсь вужжез, то киськавны асьнысö кусттэсö кытшöмкö вредитель-гаггез шогья, кöдна тшыкöтöны лист да ягöд.

Сiя жö вöлi и эта августö. Кынымкö лун сьöрна зэрöм бöрсянь бытшöма рышкамис му, кöр сы пытшкись орласьтöг да кокнитжыка кыссьö быдкодь ёгтурунлöн вуж. Кусттэс увтын то кекеркаöн, то пидзöссэз вылын пукавтöн этö уджсö ме и кери. Садас уджавтöн жö и казялi, кыдз менам сосед Анатолий Афанасьевич, кöда дзир неважын да тырöн кыссис вöрсянь, вились иньдöтчис сэтчин жö. Августыс — тшак ваялан кад и, вежöртана, что вöрсис сосед бертiс тшакöн. А мунiс кö бöр сiя жö гырись доззэзöн: спина сайын рюкзакöн да кисой вылö öшöтöм эмалированнöй ведраöн, мыйла мунiс, вежöртны эз вöв сьöкыт. Но тшаксö ваялöны не пыр öткодьö. Кинкö, местаэсö бытшöма тöдiсь, öктö куш мöсгоб нето рыжык, а кинкö сы местö куш масляккез да ниндуллез. И öтыс тшак, и мöдыс сiдз жö, дзир мöсгобсö маслякыскöт ордчöн сё ни он сувтöт. Мöсгобкöт ордчöн сувтöм понда масляклöн не сорт, не класс оз лöсяв.

— Мый, мыся, вöрсис сiдз кыскалан? — веськöтчыштi ме кусттэз коласын да юалi соседöлiсь матынжыксянь йöр омöн.

— Рыжык вылö, эг я, кывзы жö, инмы, — сайласьтöг юöртiс меным сосед, содтiс. — Тöн куим ведра мымда вайи, талун сымда жö да эшö вот лöсьöтчи чапкисьлыны.

Сувтöтi ме недырик кежö син одзö квать ведра мымда öктöм рыжыксö и, висьтавны веськыта, завид кутiс. Сымдасö аслам векын меным не только öктыны, а и адззывлынытö эз усьлы. Тöдi жö кыдз бытьтö бы эшö учöтсянь, что петалö эта бытшöм тшакыс частожыксö тырöм шутёммез вылын, шочыник да том кöзъя вöр коласын. Но мымда бы ме, городас овтöн ни, сэтшöм местаэзöт эг ветлöт, öктыны рыжыксö и джын ведра мымда меным некöр эшö эз усьлы.

— Мунам öтлаын, он дышöтчы дак, — рочалiс эта коста менö сосед да сiйöн сорöн иньдöтчис йöр бердсис.

Лöсьöтчынытö меным дыр эз ковсьы. Кöмасьöм-пасьтасьöм быдöс уджаланаö, керкуас ме дзир сы понда и кежалi, мед босьтны сьöрö колана доз, иньдöтчи сы сьöрö.

Непаськыт ыб сайын, эшö вöр бердас сибöтчытöдз, ёртöс ме вöтi. Öтлаын ни вуджим матын вöр коласiсь джуджыт кырас, а мöдöрас петiм аэродром вылö да сы бердöт кытшöвтöмöн, иньдöтчим ылын вöр ладорö.

— Ылынкодь эд муннытö. Кузя ныр нюжавлас, кытчöдз колана местаöдззас локтам, — юöртiс быд-берся коласын Анатолий Афанасьевич.

— Но мый жö?.. Ась. Ылын ли матын, гортö тшакыс ачыс оз лок.

Ыджытся-ыджыт аэродромнöй ыб кытшöвтöм бöрсянь, кöдалöн миян одзын не дор, не пон кыдз бытьтö эз и тыдав, вöлиськö поперегалiс миянлiсь туйнымöс асфальтируйтöм ни сэк кежö город сайöт Белоевскöй тракт, кöда кузя одз и бöр, тырöн и простöн, гугйисö-ветлiсö быдкодь тракторрез да автомашинаэз. Тракт мöдöрас мийö сюрим шочыник, а этасянь негырись да лапья кöза вöрö. Висьтавны кö веськытжыка, дак вöрнас сэтшöм местасö шунытö эз и позь. Чожажык эта вöлi важынсянь ни, но не öддьöн бытшöма тырöм, паськытся-паськыт видз, кöда кыссис туй бердöттяс не öтiк километр ылына и кöда пасьта пода вöдитiсь горожаналöн вöлiсö покоссэз. Местаыс эстöн не сэтшöм и лажмыт, но кыдз и быдлаын Кудымкар гöгöрас да сэтчö жö эшö кынымкö лун сьöрна дугдывтöг зэрöм бöрсянь, вöлi ва. Быд оськöв коста сiя чольскöтiс сапога коккез увтын, а мукöдлаас, негырись гöппезын, ваыс сулалiс нельки чулька весьтöдз. Сёя местаыс йиджöтны ас пытшкас васö оз тэрмась. Эстöн ни, лапья кöззэс гöгöр öтмöдöрö чуклясьтöн да öткоста кок увтас нёджжасьтöн, Анатолий Афанасьевич горöтчис:

— Видзöтлы, Павлович, кок увтат. Мыйкö, батi, казялан. — этö сiя сiдз казьмöтiс меным тшаккес йылiсь.

Паныт шыасьтöг ме дивуйтчыштi ас кежам: «Кинöс нö эттшöм ва местасис казялан, кытöн и кульбукыс син вылö оз усь?» Но недыр мыйись, кöр ме кежыштi пуэс коласö, жагсьöтыштi оськöввезöс да ёртö моз жö пондi видзöтышавны кок увтам, пятак пасьтышта öтiк рыжык и былись усис син вылам. Эта бöрсянь ковсис мышкыртчывны эшö да эшö. И кыдз бы менö одзлань местаыс эз дивуйт, öктöм-адззалöм тшаккес и былись вöлiсö рыжыккез. Но пантасьлiсö нiя эстöн не öддьöн тшöка. Частожыксö позис казявны дзир кольччöм под. Эта сьöртi позис вежöртны, что унажыкыс öнöдз öктöм ни. Сiйöн недыр мыйись ёртö öвтыштiс кинас, сы сьöрö жö горöтчис:

— Мунам одзлань. Öктöмась ни эстiсь.

Сы сьöрö чöлöмöн оськавтöн, меным одзлань вились думайтсис, что вот-вот ми чулалам этö лажмыт да ва местасö, петам кытшöмкö сöстöм вылынiнö, кытчö сiдз радейтö петны рыжык, да вöлиськö и пондам öктiсьны. Но некытшöм сöстöмжык да вылынжык места одзланьын мылякö эз пантась. Туйыс, кöда сьöрö ми оськалiм, кыссис сё увлань да увлань. И, вежöртана, кыным одзлань, местаыс лоис сё лажмытжык да лажмытжык. Туйыс пöлöн быдмис сё сiя жö кöзъя вöр, дзир вöлi сiя эстöн не сэтшöм увья, дженыт да шоч. Важын ни кольччисö бöрын и ытшкассэз. Эстöн, вöр коласас, ытшкытöг сулалiс морт сувдöн кайöм турун: литурун, сэтöр, петшöр, папоротник да лабазтурун. И вот... Тшöтш оль пыдöсас вöлиськö туйыс петкöтiс миянöс кытшöмкö паськыт да важ вöркерас вылö. Вежöртана, что пöрись вöрыс эстöн эз вöв. Быдсöн керас пасьта метр ылына öтамöд дынсянь да ордчöн-ордчöн эстi кыссисö öтмöдöрö пидзöс сувда кытшöмкö канаваэз. Орлалiсö я сiдз ольсö машинаэзлöн колесоэз да тракторрезлöн гусеницаэз, вöлiсö я этна канаваэс гарйöмöсь мыйкö вылö нарошно, вежöртны сымдасö эз позь. Быд сэтшöм канаваыс дорöн тшöтш вöлi тыртöм ваöн. Кöсöн кольччисö дзир ны коласiсь грядкаэз, кöдна вылын морт сувдöн лэбтiсьöм лабазтурун, вöйтурун да пырей коласын лёдзöн-лёдзöн вöлöм садитöм год кынымöн одзжык томыник кöзъя вöр.

Эстöн менам ёртö, кок увтас дзарышавтöн да буля-боля канаваэзöттяс бродиттöн, кежис мыйкö ылына туй бердсис, а öтiклаын, сапога коккезнас канаваас сулавтöн, вель дыр кежö мышкыртчис увлань да пондiс борсьыны кинас му бердын, турун коласас. Казялi ме и сiйö, кыдз сiя, турун коласас борсьытöн, кадiсь кадö тэчис мыйкö аслас дозö. Но мед ёртö öктiс эта местаись кытшöмкö тшак, да сэтчö жö эшö рыжык, сымдаыс ме юрö пырны некыдз эз вермы. Одзза местын жöдзышавтöн ме сё эшö видзчиси, что часöт сiя гуддисьнытö дугдас, петас туй вылас бöр и ми иньдöтчам одзлань, кошшыны рыжыка местаэз. А эта коста Анатолий Афанасьевич веськöтчыштiс аслас местаын, канава дорас, оськöвтiс одзлань да сы коста жö меным горöтчис:

— Мый нö он öктiсь? Локтiм ни эд местаöдззас.

Ме и эстöн эшö дивуйтчöмöн жмитыштi пельпоннэзнам. «Сiя мый, сералö я мый я ме вылын? Кытшöм нö кляп оль шöрсис öктынытö?» Мед не кольччыны сулавны одззамоз öтiк местаын, ме жагвыв, оськöв бöрын оськöв, кежыштi туй вывсис. А кöр ёртö моз жö мышкыртчи увлань да пондi смекайтчыны кок увтам, чожа мый кынымкö рыжык турун колассис и былись казялi. Эг ешты нiйö пуктыны дозö, кыдз син вылö усисö эшö, а сэсся сiдз жö. «Кыдз жö сiдз?.. Оляс?.. Вот некöр бы эн думайт...» — дивуйтчи ме тшаккес весьтö мышкырасьтöн, кöр кыскалi нiйö турун колассис да öтiк бöрсянь мöдiкö тэчи аслам дозö. Вежöртана, что вöлi эта не сiя боровöй рыжыкыс, кöда быдмö миян вылын да кöс яггезын. Эта вöлi вöснитик сiмрыжык, но сё жö...

Мед не мешайтны öтамöдлö да сорасьöмöн не öктiсьны öтамöд одзын, мыйкö дырна кежö ми ёртöкöт янсöтчим. А кöр öтiклаын пантасим бöр, сылöн ведраыс öтпырись вöлi ректöм ни. Сэк кежö ме дозын вöлi вöлись джынняс. Местаэсö тöдiсь морт и öктiсис месся перытжыка. Но кöр ёртö тыртiс мöдiк ведра, сэк кежö и менам наберукö тожö тырис.

Гортö ми бертiм сёрöн ни, но не простöн. Первуись ас оланын ме вайи ведра мымда рыжык. Но меддивуйтанаыс эстöн нач не ачыс тшакыс, а местаыс, кытöн сiя быдмис. Верми разь ме одзжык думайтны сымдасö, что сiмрыжыкыс вермас быдмыны сэтшöм ва да лажмыт ольын. А вот на тэныт... Ольтшак, ольтшак и эм.