Тшак-пушка

Уна быдкодь тшак пантасьлö миян мушар пасьта. И быдмö сiя быдлаын, кытöн только шедас. Мукöдсö ны коласiсь позьö пантавны назём вылiсь, а мукöдсö карчйöрын гряддэз коласын, бороздаись. Кöднакö быдмöны сiсь йöрпотш вылын, кöднакö — джоджулiсь ва стена бердын. А эмöсь, кöдна нельки оз дышöтчö кайны сiсь керку юр нето пуэз вылö. Но унажыкыс ны коласiсь пантасьлöны сё жö вöрын, то гора да гажа кыдзовöй рассэзын, то уль да пемыт кöзъяиннэзын, то югыт пожумника кöс яггезын.

Эмöсь тшаккес коласын сёянаöсь. Сэтшöммес чукöртчöны нёльдас гöгöр. А быдöнныс нiя этася витiсь унажык ^1. Пантасьлöны ны коласын ядовитöйöсь, но сы коста жö нiя и целебнöйöсь. Овлöны тшаккес гырисьöсь и поснитöсь, басöкöсь и нёштöмöсь, чöскыт и нечöскыт дукаöсь. Эмöсь, кöдна тшаккес вылö, кытшöммезöн ми примитам нiйö ас ылöсöн, часто нельки оз и вачкисьлö. Позьö я, шуам, лыддьыны тшакöн ва керку пельöсiсь баг нето мыр бердiсь сынан пиннез моз унася-уна да тшöка быдмöм небытик ёссез? Эд не öтыс, не мöдыс ны коласiсь тшакыс вылö немöн оз и вачкисьö. Но кыдз ва керку пельöсiсь или джоджулiсь баг, сiдз и мыр бердiсь сынан пинь кодь небытик ёсёккес, не мый мöдiк, кыдз тшак. Позьö я шуны тшакöн ловья кыдз бердiсь чага, кöр сёйнытö сiйö некыдз оз позь? Но и эта чагаыс — тожö тшак.

Эмöсь тшаккез, кöдна формананыс вачкисьлöны цвет вылö. Сэтшöм несёяна тшаккес шочыника пантасьлöны Германия да Венгрия вöррезын, сёр арöн, песока нето иза му вылын ^2.

Австралийскöй гриб Азера вачкисьö цветок вылö сiйöн, что му бердсяняс сылöн кокыс пондöтчö быдмыны чашка кодь основаннёись ^3.

Южнöй Америкаын эм тшак, кöдö шуöны «покрывало увтiсь дамаöн». Олö сiя быдöссö дзир джын сутки сьöрна. Быдмынытö пондöтчö рытъявыв кадö кольть кодь зародышсянь и кык час сьöрна лэбтiсьö син одзын метр сувдöн. Сэтöн вöлись сiя бытьтö казялö, что отирыс син одзын нагöлеч пасьтöм, горöн кажöтöмöн лэдзö шляпка увтсянь кок увтöдз чочком рöма ажурнöй покрывало. Эта коста жö сы бердсянь пондö паськавны сьöкыт упадь дук, кöда вылö быд ладорсянь чукöртчöны унася-уна быдкодь гуттэз да ойся бабыввез. Рытся пемытыс коста гриб шляпка увтын öзйö югыт-зелёнöй рöма би, кöда небытик матовöй югöрöн югдöтö сылiсь ойся покрывалосö. Но асыв кежас ни эта гриблöн оланыс овсьö. Сэк кежö сы местö му вылас кольччö дзир неыджыт нильыг комок ^4.

А вот эшö. Мексикаын, кытöн олöны индейскöй племенаэз, эм сэтшöм тшак, кöдö сёйöмсянь мортыслöн лоöны быдкодь галлюцинацияэз. Эта коста сiя вермö адззывны быд рöма краскаэзын быдöс нiйö местаэсö, кытöн быдмö эта тшакыс, кöть ачыс сёйисьыс нiя местаэзын некöр эз вöвлы ^5.

Миян округын этатшöм причудаа тшаккес и оз пантасьлö. Но öтi-мöдi интереснöйсö адззывны ны коласiсь тожö позьö. Босьтам пример туйö сiйö жö енгум ^6, кöда быдмö омöн округ пасьта.

1930-й годдэзся пожар вотöдз миян Гришкина деревняыс, кытöн ме быдми учöтсянь, вöлöм вель ыджыт. Но сотчöмыс бöрсянь эта местаын вились строитчынытö отирыс быдсöн абу ни ештöмась. Вöтiс война. Сэксянь джын деревня местаыс, кытöн одзжык сулалöмась керкуэз, картаэз, чоммез да баняэз, вуджис подакокувтö.

Гожумся кадö, шоныт зэррез бöрсянь, эта подакокувтын петавлiсö унася-уна енгуммез. Сiя кадö ми, деревенскöй челядь, сымдасö эшö эгö тöдö, что енгуммес тожö тшаккез да сэтчö жö эшö и сёянаöсь. Кин кöть öтпырись пантавлiс енгум, сiя тöдö, что сёяна тшак вылö аслас формаöн да вевдöрсяняс строеннёöн сiя немымда оз вачкись. Не торья кок, не поснитик трубочкаэза нето вöснитик пиннеза юр, кытшöмöсь овлöны сёяна тшаккес, енгумлöн абу. Юр и кок сылöн öтвывса, зумыт да сöстöм чочком рöма. А форманас енгум öддьöнжыксö вачкисьлö гöгрöса мяч нето груша кодь электролампочка вылö. Сэтчö жö и быдмö сiя унажыксö не вöрын, кöть и сэтчин шочыника тожö пантасьлö, а пустыррез вылын: то ли важ постройкаэз местын, то ли кытшöмкö подакокувтын. Сiйöн нельки сьöкыт да тшыгьялан война годдэзö некинлö миян коласiсь кыдзкö юрö эз пырав сэтшöмыс, что енгумыс — сёяна тшак, кöдö позьö пуны, пöжны, косьтыны да масьтыны сiдз жö, кыдз, шуам, рыжык, уртшак, мöсгоб да мöдiк сёян тшаккез. Бель чочком рöмаöсь, формананыс басöкöсь, кыдз кольттез, да зумытöсь, дзик резиновöй мяччез, енгуммес миян понда вöлiсö медодз чачаэзöн, орсан-гажöтчан торöн. И инмывлiм кö ми кытшöм кадö ны колония вылö, öтамöд коласын одзасьöмöн öктывлiм öлöдззезаным, кин мымда ештiс да вермис, а сэсся янсöтчывлiм кык торйöн да лэбтывлiм быдса «война», пондывлiм кыйсьыны ^— кин кинлö инмас, кин кинöс вермас.

Вежöртана, что енгумыс, ась сiя и зумыт, кыдз мяч, но сё жö не галя, инмöмсяняс вийтöдз он дойд. Сiйöн нельки матiсянь öтамöдлö шупкалöмсянь да инмалöмсянь зубытыс горзытöдз эз вайöт. Öтамöд коласын орстöн сымдасö позис терпитны. Сiдз кыйлiсьтöн-орстöн, ми вель дыр кежö вунöтчывлiм кад йылiсь, «ура» да «победа» кыввез горöтлытöн, «нуöтлiм бой да наступайтлiм» öтамöд сьöрын деревенскöй улицаэз пасьта.

Унапöв шупкалöмсянь да öтамöдлö унапöв жö инмалöмсянь енгуммес, кöдна вöлiсö миянлö то ли гранатаэз, то ли аскодьöм снаряддэз местö, бöртiжык жугавлiсö: потласьлiсö да янсавлiсö уна торрез вылö. Час кыным сьöрна сiдз «воюйтöм» бöртi «снаряддэс» бырсьывлiсö. Ны местö, омöн улица пасьта, öнi дзир бель видзисö нысянь кольччöм «осколоккез». Ми жö, öддьöн довольнöйöсь асланым орсöмсянь, чукöртчывлiм öтлаö, мед «миритчыны». А одзлань жугдывлiм юр сы вылын, мый бердö бы позис кутчисьны эта бöрсянь.

Часто вöвлi и мöднёж. Енгуммес вылö ми инмывлiм сэк, кöр нылöн оланныс вöвлi овсьöм ни. Сэк кежö нiя быдмывлiсö вель гыриссезöн и одззасякодь мяччес вылö эзö ни вачкисьлö. Öнi нiйö чожажык позис примитны сьöд кашниккез местö. Эз ни вöлö енгуммес и одззасякодь ёнöсь, зумытöсь да сьöкытöсь. Но мöдiк тшаккез моз пöрись енгум перво жö оз сiсьмы-лёпсьы. Сiя дзир косьмö сэк кежö да вежö ассис одззася рöм: бель чочкомыс местö лоö коричневöйöн. Косьмöмсяняс жö енгум лоö рышкытöн да кокнитöн, и вöдитны сiйö мяч туйö одззамоз оз ни позь. Вевдöрсяняс зорамöм коричневöй рöма вöснитик кыш увтын енгумлöн воöны сэк кежö не öтiк миллион мымда, сэтшöм жö коричневöй рöма спора-кöдзыссэз. Нiя сэтшöм поснитöсь, что öтлаын öтамöдкöт вачкисьöны тшын вылö. Эта тшыныс и вöвлi миян понда медколана забаваöн. И пантасьлiс кö сэтшöм пöрись енгум, а то öтдруг эшö кык-куим, эта миян понда вöвлi быд коста ыджыт гажöн.

Быдöнным ми сэтöн жö уськöтчывлiм медперво кошшыны беддез. А кöр чукöртчывлiм бöр адззöм енгум гöгöр, пондöтчывлiс аскодьöм «артиллерийскöй канонада», кöда и былись вачкисьлiс мымдакö сэтшöмкодь вылö.

Кинöскö öтiкöс ас коласiсь ми бöрйывлiм командирöн. Бокынмоз сулавтöн сiя сетавлiс командаэз. Висьталас: «Лöсьöтчыны!» Кинкö миян коласiсь, киас лöсьöтöм бедьöн, сувтö енгумыс одзö пидзöссэс вылö, пондö видзчисьны. Одзлань кылö: «Раз, два, три, огонь!» Юр вевдöрöт бедьнас öвтыштöмöн, «артиллерист» вурыштö-вачкö енгум кузя. «Бах!»

Ачыс бедьöн вачкöмыс, вежöртана, и абу сэтшöм гора, кытшöмöн вермас лоны быльнöй пушкаись лыйöм. Но вачкöмсяняс енгум кышлöн шлопнитöм-потöмыс невночка и былись вачкисьö негорöн лыйöм вылö. Биыс сэтшöм лыйöмсянь тожö оз петав. Но мый баитсяс тшын йылiсь, дак эстöн сiя тырмöмви. Бедьнас вачкöмсянь шлопнитö-потö енгумлöн вöснитик кыш, и сы коста жö веж нето бурöй рöма тшын коколлез перыта чепöссьöны öтмöдöрö. Вот эта спораэзлöн тшынöнмоз чепсасьöмыс и вачкисьö пушкаöн лыйсьöм вылö.

Медодззаыс бöрсянь одззакодь жö команда увтö да сiйö жö керöны и мöдiк, и куимöт, а сэсся эшö да эшö. И вöвлi мукöд коста — сэтчöдз лыйсям, что чужöммез вылö эта тшыныс пуксьöмсянь и вачкисям быльнöй артиллеристтэз вылö. А вöвлi, кöр эта жö спораэзöн, кыдз пудраöн, эшö нарошно пудритчам. И оз кö адззись бöртiжык некытöн матын ва, мед миссьыны, сэтшöммезöн рытъявыв и горттэзö бертам.

Жалейта вот öнi — эг тöдö учöтсянь, что енгумыс не мый мöдiк, кыдз сiя жö тшак да эшö сёян. Мымда бы сiя война годдэзö отирсö тшыгьялöмсис дорйис-падтiс. И сы местö, мед енгумсö öктыны да сёйны, ми сiйöн дзир орсiм-бöбалiм.