Гажа грива

Тшынас гöгöрын шоччисьыштöм бöрсянь челядь пондiсö лöсьöтчыны узьны. Кöдзись чукöртiс головняэз, чапкалiс ны вылö ой кежö ваялöм пес. Киас черöн, Толя суййис кынымкö томыник ньыв. Суййöм уввесö ёрттэс кыскалiсö шалашö.

Ольсалöм лыс вылö челядь павдöтiсö ассиныс паськöм: Витялiсь руд гуня да Мишалiсь пальто. Толялöн сьöрас вöлi важ öн. Сiйöн зонкаэз шебрасисö.

Саймöм бикыввез перыта кутчисисö пес бердö. Пуэз коласöт вывлань путриктiс-кайис сьöд коколя тшын. Кадiсь кадö негорöн тачкöтыштлiсö головняэз да чеччалiсö öтмöдöрö эта тачкöтöмсянь биа шоммез. А кокнит да гажа би нюлышалiс пессэз, чепсасис вывлань, тшыныс сьöрö, дзик танцуйтiс ассис гажа танец. Матын би гöгöрас вöлi югыт, а ылынжык, кöдöрö бы эн видзöт, нырыштö сьöд ой. Арвыв нiя вöлiсö пемытöсь ни. А эстöн, пыд вöр коласас, мыччассисö эшö пемытжыккезöн. А пемытiнас тöдтöмöн да полöтанаöн мыччассисö быд пельöс.

Он некинлöн эз пет. Быдыс думайтiс мыйкö ас кежас. Зонкаэз куйлiсö небыт ольпасьын, видзöтiсö би вылö, чöлiсö. Витялö тöдвылас усис Зiпозiсь адззöм наган. Сэк жö зоночкалö охота лоис тöдны, кыдз сiя татчö шедiс да мыля сiдз некинлö сэсся и эз ковсьы. Сiя вежöртiс, что наганыс не чача и причинатöг татчö сюрны эз вермы. Витя татшкыштiс гырдззанас ёртыслö, шушкыштiс:

— Толик, юалам, кöдö баитiм?

— Ештан, — шыасис паныт Толя.

Иван дед, кöда челядьыс ветлöтöм коста ештöм вöлi уморочитны ни, öнi саймис бöр. Сiя нырыштсис тшöканас одзас тэчöм киэс вылö, пондiс чöлöмöн видзöтны биыслань, тыдалö, мыйкö думайтiс.

— Он мыйкö оз пет, — горöтчис Толя. — Висьталiн бы, деда, миянлö кытшöмкö сказка.

— Шоччисьö. Уна ни эд, натьтö, кадыс. Ашын одз ковсяс чеччыны.

Толя и былись недырик кежö кунис синнэсö, лöньсис. Эта коста кытöнкö вöр коласас кылiс горöн укöстöм. Миша, кöда öнöдз куйлiс шыасьтöг, öнi перыта лэбтыштiс юрсö, юалiс:

— Эта кин, не ош?

— Да не-е. Этö сюзь горалö.

— А вöввесö сiя оз повзьöт?

— Да о-оз. Вöввес сiйö тöдöны.

Миша лöньсис. Толя бергöтчис кöдзисьыс ладорö, юалiс:

— А кинлöн, деда, этна муэс одзжык вöвлiсö?

— Кинлöн, шуан? Гаврилöвчи увтырлöн, — миян, сiдзкö.

— А керкуэс?

— И керкуэс сiдз жö.

— Да? — дивуйтчыштiс зонка. — А ме öнöдз эта йылiсь эг тöд. А сэсся, деда, öтлаöтiсö, но?

— А сiдз, зонö, кöркö вöлi, — горöтчис кöдзись, ловзисис ыш. Пондöтöм басниыс уськöтiс, тыдалö, пöрись мортлö тöдвылас мыйкö не öддьöн гажöтанаö. Сiя горöтчис: — Öтлаöтiсö вот. До-онöн сiя миян увтырлö кöркö сувтiс, эта öтлаöтöмыс.

Сэк кежö челядь ештöмась ни öшöтны пеллезнысö кöдзисьыс басни увтö. Миша нельки лякöсь нырнас вирскайтны дугдiс. А Толя одзлань юалiс:

— А мыля, деда, шуан, донöн сувтiс?

Кöдзись бытьтö эз кыв зонкалiсь юалöмсö. Сiя бергöтчис шульга бок вылас, веськытланьсис кыскис табак кисет, жагвыв пондiс каттьыны куритны. А кöр пöрись морт öзтiс каттьöм цигаркасö да лэдзис ас одзас неыджыт лöз кымöрокöн тшын, сэк вöлись одзлань горöтчис:

— Мыля, шуан? Умöля ми эшö сэк этö олансö, но талуннясö инö, вежöртiм. Стрöйдiс сiя, виль оланыс, миянлiсь увтырсö, орöтiс, позьö шуны, вуж бердöттяс, — эстöн кöдзись вöлись лöньсис. Сiя ыш ловзисис, косьмöм чуннезнас кынымиськö гыж-гыж керис пель сайсö, топ уськöтiс тöдвылас вунöтöм кадсö. — Нёльöн ми, нёль вон кöркö вöвлiмö. А кольччи чунь öтнам. Вот и думайтö, кыдз сiя миянлö виль оланыс дöнзис. Кöр öтлаöтiсö артиляс миянлiсь муэсö, айным неделя бöртi кулiс. Пöрись ни сiя вöлi да и нездоров. Дзебим ми сiйö, а чожа эта бöрсянь воннэзö пышшавны лэдзчисисö.

Не Толя, не сылöн ёрттэс эта йылiсь нем эшö эз кывлö. Öнi челядь готовöсь вöлiсö ойбыт сьöрна не узьны да кывзыны, мый висьталас одзлань пöрись морт. Аслыныс казявтöг зонкаэз вешшисö матöжык кöдзисьыс бердö. А сiя видзöтiс ас одзын гажöна сотчан би пытшкö, одзлань висьтасис:

— И кöр лэдзчисисö воннэзö пышшавнытö, сэксянь миян быдöс и пондiс киссьыны-разьсьыны. Мыйсянькö сотчисö керку-карта. Куима сэк нiя миян татöн сулалiсö. Пондiс öшны пода, торксисö...

Толя эз вермы видзсьыны одзлань, юалiс:

— А тэ, деда?

— Ме, шуан? А мый ме?

— Тожö ныкöт пышшавны пондiн?

— Кытчö ни вöлi меным сэк пышшавнытö? Быдöнныс коласiсь ме вöлi медпöрись: сiя кадö гöтыра ни и челяддез вöлiсö. Да и олi ме торйын ны дынiсь, деревняас ни. Ме и артиляныс быдöнныскöт öтдруг, йöз отирыскöт, пыри да öтлаын уджалi.

— А нiя, деда, мыля эзö пырö?

— А кин сiйö тöдö. Томöсь, ылöстöмöсь, натьтö, эшö вöлiсö. А, батi, муэсö татiсь жаль вöлi öтлаöтнытö. Öддьöн бытшöма сэк миян эстöн сюэс шогмывлiсö. Вот и эз пырö. Сё тай кöсйисьлiсö пышшалiканыс ме дынö кöркö вовлыны, юöррез нельки ыставлiсö, да эз тай то ны моз пет, эз шу еныс сымдасö.

— И тэ бы, деда, мунiн?

— Кытчö?

— Но ныкöт...

— Да не сьöраныс нуöтны нiя менö кöсйисисö, а мöдöр светас иньдöтны. Вийны инö, мöднёж висьтассяс, лöсьöтчисö.

— Воннэт, деда?

— Но кин нö сэсся. Да и нiя я дзир? Уна эд сэк горттэзсиныс мунiсö. Сымда сiя годдэзö мича вöррезын отирыс олiс-шатласис, что и деревняись öткöн петны эз позь. Мужиккезöс вийлiсö, инькаэзöс...

— А мый понда, деда?

— А сё сы понда жö, артиляс пырöм да муэсö öтлаöтöм понда. Уналö эд, богатöй отирыслö, сiя эз гленитчы. Вот кöть миянлiсь жö семьясö сэксясö босьтны. Вöввесö мымда видзимö — кытшöмö колö доддяв. Мöссэсö, татöн овтöн, сизимö чилькöтiм. А му-видз йылiсь дак и баитны нем. Мымда сiя миян увтыр увтын вöлi — айö и ачыс бытшöма эз тöд. А сэтчö эшö быд год вилиннэсö весöтлiсö. А миян разь дзир сiдз олiсö? И миян киння эшö сэтшöммес вöлiсö, кöдна уджавнытö эз дышöтчö. А кöр öтлаöтiсö, некинлöн нем эз ло, быдöс öтласа, артильнöй. Вот сэк и лэбтiсисö öтамöд вылö. Висьтася вот эшö сэксясö öтiкö. Кайим ми медодзза тулыснас артильным татчö гöрны-кöдзны. Уджалам, а асьным сiйö и думайтам — вот петасö, вот локтасö.

— Киннэз, деда?

— Да пышшалiссес, мыся. Быдса бандаэзöн, висьтала тай то, вöррезас сiя кадö олiсö. Кывсьывлiс нельки, что менам воннэзö сэтчин жö, öтлаын. Меным и адззывнытö нiйö охота вöлi — воннэз эд, и пантасьнытö сэтшöммескöт полöм петiс. Былись, мыся, вийны ештасö. Пышшалiссез нiя — пышшалiссез и эмöсь. Мый тэ нылiсь босьтан.

Узьны эта лунö Гаврилöвчи Гриваын — а сiдз сэк миянлiсь этö кутöрсö шувлiсö — кольччыны некин эз лысьтö. Рытнас лэдзчимö бöр гортö. Кайим ашынас, видзöтам, а миян не гöр, не пиня, нем абу. Думайтiм ни — вöрас пыртлiсö нето сотiсö. Но сымдасö бöра абу жö керöмась. Кошшим, кошшим да сы бöрсянь вöлись син выланым усис. Видзöтам, а миян гöррес да пиняэс кыдз йыввез вылын öшалöны, а пуэс увтсяняс быдöс черöн тшапöмöсь. Думайтны эд колö. И дыш нылöн абу петöм челядь уджсö уджавны. И смек и грек. Вель дыр думайтiм, мый пондыны керны. Кайны сэтчин — он кай, полöм петö. Пöрлавны пуэсö — гöрресö да пиняэсö жугдалам, чаггез кольччасö. Вот и жугды сэтöн юртö. Матын, а он судзöт. А кадыс эд оз видзчись. Шондiыс, видзöтам, вот-вот веськыта сувтас, а ми доддясьтöг сулалам. Кöть бергöтчы сэтöн жö да и лэдзчы бöр гортö. Но адззисис öтiк повтöм морт, Васькöвчи Лаврейöн шуисö. Сiя и корсис кайны да лэдзавны.

— И лэдзалiс, деда?

— Да кыдз тiянлö висьтавны?.. Лэдзис öтiк пиня, а öтлаын и ачыс лэдзчисис. Ештiс вöлись сiя пиняыс бердöдз кайны, а сэтöн пуыс кутiс да и мунiс. И видзисö жö бы отирыс увдöрсяняс, но да видзан разь чернас тшапöмсö? Пöрис Лаврей öтлаын пуыскöт, чеччöвтнытö эз ешты, да и чеччöвтнытö вылын öддьöн вöлi. Пиняыс пиннезнас усис вылас да быдöс и бытшкалiс. Пондылiсö жö бы отсавны, да нем ни эз вермö кернытö. Сэтöн и лолыс петiс. Лолыс петан одзын сымда и ештiс горöтчынытö — дзебö пö менö татчö. Ме пö ныкöт эшö вештiся.

— А кытчö сiйö, деда, дзебисö?

— А галяыс тай то вот туй бердас куйлö — сы увтын и эм.

Челядь перыта дзар керыштiсö öтамöд вылö. Витя горöтчис:

— Дак вот мыля сiя Лаврей галянас и шусьö. А Толя одзлань эшö юалiс:

— А кыдз сiя, деда, кулöмыс ни, мöдiс ныкöт вештiсьны?

— Кин сiйö тöдö, кыдз мöдiс. — А недырик чöлыштöм бöрын одзлань эшö содтiс: — Ачыс эз, дак мöдiккез сы местö вештiсисö. Дзебим ми сiйö татчö, кыдз тшöктiс. А сы бöрсянь этчö быдса отряд кайис. Но и кутiсö нiя матi гöгöр вöрсö куртны-сынавны. Ноша тыр быдкодь пишальсö да винтовкасö кыськö миян керкуэзiсь вöлi петкöтöмась.

Витя эстöн первуись вöрöтчыштiс местаас, негорöн юöртiс:

— А ми, деда, талун сэтчинiсь тожö кытшöмкö наган адззим.

— Но вот... И сiя нысянь жö кыдзкö кольччис... Вель дыр сiя лунö вöрас лыйсьöмыс кылiс. Павжун кежас куим мортöс петкöтiсö. Нёльыс, кöдна ныкöт жö вöлöмась, сiдз сэтчин и кольччöмась. Öтлаö ны коласö и менам вонö, Егорöн шувлiсö, вöлi шедöм. Нельки дзебны отирöс моз эз сетö. Но да кин нiйö эта пасьта вöрсис кошшас. Сiдз кытöнкö сэтчин поннэзлöн моз шойезныс и сiсьмисö. Висьтасьлiсö öтi-мöдi отирыс коласiсь бытьтö бы лыэзнысö пантавлöмась. А меным дак и эз усьлы.

— А мöд воннэт, деда?..

— И нiйö тожö эг пантавлы. Кежисö тай олансис да топ помойö гуттэз вöйисö. Не дук, не след некытöн и öнöдз абу. Да и абу ни, натьтö, öнöдз ловьяöсь. А ыбсö этö сэксянь Гажа Гриваöн пондiсö шуны, кöть и не уна вöлi сiя кадö эстöн гажыс. — Иван дед öдззöтiс кисис сотчöм цигаркасö би ладорö. — Но узьö, водiт дак. Чеччыны асывнас пондас ковны.

Кытöнкö ойся пемытiнас вились укöстiс сюзь. Но öнi челядь бытьтö эз и кылö сылiсь полöтана горалöмсö. Быдыс ас кежас сё эшö думайтiс сы йылiсь, мый часöт усис кывны пöрись мортсянь. Этна думаэз коласын сёрöнжык быдöнныс и ланьтiсö.