Глава VIII

Сувтöтöм цель да сiйö судзöтöм йылiсь нывкакöт басниын Борис эз сорась. Кыдз сэк сiя баитiс, бöртiжык быдöс сiдз и лоис.

Августнас ни Таисьялöн суткися привессэс петiсö сэтшöмöсь, кытшöммез йылiсь сiя думайтiс медодзза кадö, кöр локтiс фермаö. Кажитчис бы — колана цель судзöтöм. Эта вылын позьö лöньсьыны, сувтны. Но не. Мый вöлi керöм тöн, талун мыччассис етша ни. Талун охота вöлi керны тöнняся унажык. А кернытö этö позис. Сентябрь сьöрна куканнезлöн вердчан эз бырав. Тонна кыкöн ытшкöм зöр-анькытшсö ваялiсö быд лун. Эз бырсьыв и картовка дзоля. Кольччис öтiк — не дышöтчыны керны удж. А керны ассис удж Таисья эз дышöтчы. И сы увья, мед талун керны тöнняся унажык, нывка кодьöн фермасис эз и петав. Быд лун, асывсянь рытöдз сiя дюттьöтлiс-кайöтлiс шор дорись ва, миськалiс да пыртлiс яслиэзö картов, сэтчин жö лэбталiс зöр-анькытш и вердiс, вердiс, вердiс. Лунтырся уджыс мыдзöтлiс сы бурна, что рытъявыв кадö, кöр быдöс коланаыс вöлi керöм-лöсьöтöм, а куканнез йöртöмöсь, руз мыдзöм Таисьялö нельки гортöдз мунны охота эз вöвлы.

Галиналöн фермаö локтöмыс вежис быдöс буржыклань. Кыдз некыдз эта вöлi отсöт и öддьöн колана кадö. Гожумыс чулалiс. Подакокувтiсь вердчан бырсис. Сибöтчис кад, кöр куканнесö ковсяс йöртны тöвбыт кежö, и быдöс вердчансö лöсьöтны да вайны ки вылын. И что Галина локтöм бöрсянь нылö эстöн нем лоис керны, эта немымда эз полöт. Таисья тöдiс — кутчисьны кö колананёж — уджыс кыкнанныслö тырмас пöттöдз. Полöтiс мöдiк — вермасö я нiя öтлаын уджавны öтвынöн да эшö буржыка. Сiйöн медодзза жö луннэзö сiя и баитiс:

— Тöдан, Галка, кытшöмöсь менам августнас привессэс вöлiсö?

— Тöда, конешно. Мыля жö ог?

— Невночка эд дзир килоöдззас эг вермы кыскыны. Дак вот. Уджавны умöльжыка интерес абу. Ог тöд эшö. мый сентябрьыс мыччалас. Но кытчöдз эм вердчан, колö кило сайöдз вайöтны, — баитiс Таисья. — Праздник жö одзаным. А сэтчин, видзöтан кö, и туйес лöсяласö, гырисьжыккесö ковсяс яйö сетны. Кыдз тэ эта вылö видзöтан?

— А мый, шогмас сiдз миян дак?..

— Мыля бы и оз? Кутчисямö кö... Кыкöн жö öнi. Одзлань сiдз и керисö.

Уджавны нылö кыкöн вöлi кокнитжык. Мед не сiдз вугмисö чуннез тыра ведраэсö öтмöдöрö кыскалöмсянь, куравны нiйö позис не сэтшöм тыррезöн. А новйыны карта пасьта да лэбтавны яслиэзö зöр-анькытш одззася ванна местö нывкаэз лöсьöтiсö носилкаэз: и кутчисьны кыкнан киöн лоис мый бердö, а тэчсис да нöбöтсис ны вылын унажык. А бытшöма керöм уджсянь и настроеннё вöвлi бур. Вöвлi, кöр кöдакö ны коласiсь, частожыксö Галина, пондöтлiс сьывны. Мый уж мый, а быдкодь сьыланкывсö да деревенскöй частушкаэсö «порсевскöйесö» — висьтассяс веськыта, сiя тöдiс вель уна. Эз кольччыв сы сьöрись и Таисья, öтлаасьлiс сэтчö жö. И сэк, кык голосöн ни, нiя öдззывлiсö люлльöтны сэтшöм горöн да басöка, что нельки видз вылö лэдзалöм куканнез вель дыр кежö лэбтывлiсö ныррезнысö турун бердiсь, кывзiсö.

Гажöн да кокнита чулалiс сентябрь. А öшлiсян луныс нывкаэз понда лоис ыджыт праздникöн. Кыдз Таисья и видзчисис, суткися привессэс вуджисö кило сайöдз. И вились, кыдз и августнас, кыдз и сентябрьнас, быдлаын öшалiсö зоотехник киöн гижöм «Молнияэз».

Октябрь медодзза жö луннэзö тöдчöмöн кöдздöтiс. Мыла бырöтан зэр местö кынымкö лун сьöрна усис лым — шлячитiс — бöбöтчытöм примета, что месяц бöртi тöлас. Арлöн сибöтчöмыс содтiс нывкаэзлö удж.

Дыр кежö нюжалiс колхознöй картовка дзимлялöм, и поснит дзолясö куканнезлö шочыника сё вайисö да вайисö. Но сiдз кыдз не гу, не весйöт ^некытшöм сы увтö эз вöв, сiйö одззамоз ректiсö чом бердö, кытöн недыр вöлi и кынмыны.

Не öтiк лун сьöрна нывкаэз думайтiсö, мый сыкöт керны. Вердны сымдасö öтдруг эз позь, а кынтнытö вöлi жаль — весь чапкиссяс. Бöртiжык петанiныс сё жö адззисис. Галина казялiс ректыны картовка дзолясö лунлапöв взвоз увтö. Эстöн сiйö ойтöвсянь сайöвтiс ачыс карта, а лажмытик взвозыс вöлi вевтöс местö. Вились ваялöмсö нывкаэз сэтчö и пондiсö ректыны. Сэтчö жö, кынымкö лун сьöрна ваялiсö носилкаэз вылын и чом бердiсь одзза ректöм картов.

Октябрь сьöрна бытшöм погоддя кодьöн эз ни петав. Сiя жö шляча нето поснит да тшöк зэр часто дзуглiсö нывкаэзлiсь удж, йöртлiсö нiйö конюховкаö. Эстöн пукавтöн куканьвöдитiссез кутчисьлiсö сьöраныс вайöм газетаэз да журналлэз бердö. Кöдö ны коласiсь занимайтiсö модаэз, а кöдö — кинкö удж йылiсь бытшöм статья. А кытшöмкö кадсянь сэтöн жö конюховкаас пондiсö мыччасьны книгаэз.

Лыддьöтны Галина öддьöнсö и эз радейт, но тöдны гижöмыс йылiсь и сылö вöлi охота. Сiйöн, кöр Таисья мышкыртчывлiс осьтöм страница весьтö, мöдыс баитлiс: "Мый тэ, Тайка, öтнат? Лыддьöт горöн. Ме бы эд тожö кывза».

Конюховкаас жö, кыдзкö шоччисьöм коста, зорамис ны коласын басниыс и асланыс одзланься удж да условиэз йылiсь.

— Кывзы жö, Тайка. — Пондöтiс Галина. — Думайтöны-озö миян правленчиыс тöв кежас кукань картасö кончитны?

— Кысь нö ме тöда?.. Кончитны, дак эд гожумнас колiс. А öнi кысь, кöр тöв ни сибöтчö.

— А ойся сторожсö миян дынö сувтöтасö-озö?

— Озö, натьтö. Ас дырнят жö зоотехникыс баитiс, что председательыс оз согласитчы татöн сторожсö видзны.

— А кыдз нö сэк? — эз лöньсьы Галина. — Полöм жö петö. Эта мымда пода, а ми нiйö ойбыт кежö öтнанысö колям. А мыйись мый кö эстöн миянтöг?.. Нем разь эта йылiсь правленнёас оз думайтö?

— Интереснöй тэ, Галка. Менчим юасян, мыйкö правленнёас думайтöны или озö. А кысь ме сымдасö тöда? Колö кö тэныт тöдны, дак ме уджалöм коста не фермаись заведующöй, не пред татöн эшö и öтпыр эз мыччасьö. Мымда вот зоотехникыс öтнас вовлö. Мöддэс понда эта кукань фермаыс кöть эм, кöть абу.

— Сiя жö, тыдалö, и эм, — гажтöма шыасис Галина. — Думайтны кö эстöн тöвйыны, дак миянлö кöть конюховкасö ас понда невна чередитны колö. То эд видзöт жö... — Галина мыччалiс тшöканас керавтöм нитша стена да белиттöм потолок вылö, — ...кыдз чуд сулалö.

— Былись эд, Галка, — кватитчис Таисья. — Кыдз меным öнöдз сымдаыс юрам эз пырав?

— Кöр нö тэныт, öткöн уджавтöн вöлi сы йылiсь думайтнытö. Тожö эд, натьтö, вильыс вылö надейтчин. А нем кö öнöдз оз кöсйö, дак сэсся и надейтчыны нем вылö.

Ашынас ни нывкаэз дышöтчытöг кутчисисö и эта удж бердö, гарйисö да ваялiсö выланыс конюховка дынö сёй, лэдзчöтлiсö сарайись турунчир, сорöвтiсö сы сорöн ваннаын раствор, а сэсся лун кыным сьöрна удж коласас лякисö сiйöн конюховка стенаэзiсь паззэз.

— Но вот и бур. Нач эд, видзöт жö, Тайка, мöдiк лоис. Ась öнi косьмыштас, а сэсся эшö белитам, — гажвевйöн баитiс Галина, кöр колана уджыс вöлi керöм ни.

Но погоддяыс öтöрас сулалiс арся, ыркыт да уль. Кыза лякöм паззэс эз косьмö. Этасянь конюховкаас тожö лоис ва да ыркыт. Сэтöн вöлись нывкаэз казялiсö лонтны неыджыт кöртовöй печка. А кöр кватитчисö, вежöртiсö, что и песныс нылöн тöв кежас абу. Конюховка бердын куйлiсö кубометр етш пилиттöм кряжжез. Сэк Галина вайис гортсис пила, и кынымкö лун сьöрна, бöра жö удж коласас, нывкаэз орлалiсö этнö кряжжесö чуркаэз вылö да поткöтлiсö.

Сёрöнжык, печкасö лонтöмсянь, стенаэс конюховкаас сё жö косьмисö. А кöр быдсöн сiя вöлi белитöм да миськалöм, пырны сэтчö и былись лоис гажажык.

Октябрь бöрья лунö кöр öтöрас асывсянь и синнэз кодьöн осьтны эз позь — зэрис да шлячитiс, фермаас нывкаэз дынö локтiс зоотехник.

— Здоровöн овлат, коми ныввез! — шыасис Светлана эшö порог дорсянь, сэтöн жö пыркнитiс лымöсь да ва паськöмсö. Горöтчöм кыввес сьöртi ни позис вежöртны, что и сылöн настроеннёыс талун тожö бытшöм.

— Эдö на лэдзалö куканнезнытö?

— Кытчö этшöминас? Сёрöнжык, батi...

— Вот и бур. Праздникöн сэк тiянöс.

— Кытшö-ö-öм? Быдса неделя эшö праздникöдззас да, — поперегалiс Галина. А Таисья, кöда вежöртiс, кытшöм праздник йылiсь казьмöтiс зоотехник, гажвевйöн юалiс:

— Мый, öшлыны пондам, Светлана Савельевна?

— Мыля бы и не? Талун медбöрья число. Нем, натьтö, оз видз.

— Ура! Галка! Öшлiсьны! А этася ыджытжык праздникыс миян понда и лоны оз вермы.

Эта и былись вöлi сiдз. Сiя кадсянь, кöр Таисья удж йылiсь вöлiсö лэдзöмöсь медодзза «Молния» листоккез, быд месяцö, кыдз куканьвöдитiсь, сiдз и зоотехник понда öшлiсян луныс лоис медыджыт да медгажа праздникöн, позис радуйтчыны бытшöма керöм удж понда.

Ась сiя лунö öтöрас эз позь мыччыны ныр, куканнез дынын, крыша увтас вöлi шоныт и кöс. Кадсö öштытöг нывкаэз кутчисисö тöдса удж бердö. Кытöн сьылышавтöн, кытöн ас коласын сералöм-шутитöмöн. Таисья да Галина кайöтлiсö весаэз вылö кукань бöрын кукань, кöдна тулысыс сьöртi öнi вöлiсö кыкись гырисьжыкöсь ни.

Рытъявыв, öшлiсьöмыс бöрсянь, быдöнныс ветлiсö недырик кежö горттэзö пажнайтны. А кöр бертiсö бöр, куканьвöдитiссез бöра кутчисисö удж бердö: пондiсö лöсьöтны рыт кежö подалö вердчан. Öтнас зоотехник кольччис пукавны конюховкаын. Сiя лыддис.

Пемдандорас, кöр уджыс вöлi ештöтöм, ва паськöмаöсь, мыдзöсь бертiсö конюховкаö Таисья да Галина. Кыкнанныслö охота вöлi тöдны, мый мыччалiс месяц сьöрна öтласöн керöм удж, керны кöдö нiя сыбурна старайтчисö. Но кöр нывкаэз осьтiсö ыбöс да сьöрсьöн-бöрсьöн оськöвтiсö порог, паныт нылö гажöн шыннялöмöн зоотехник перыта пöдныштiс журнал, сайöвтiс ны син одзись кынымкö гижöм ни «Молния» листок, одзалöмöн ачыс юалiс:

— Тöдат-одö, ноко, кытшöмöсь привессэс петiсö? Таисьялö эта весыс важы-ынсянь тöдса. Казялан, батi?

— Бöра я мый я кило сто, кыдз сентябрьнас вöлi? — тэрмасьыштiс Таисья. — Ме думайтi унажык лоас. Быдсöн жö месяцсö кыкöн уджалiм.

— Не эд, Таисья, — пыркнитiс юрнас зоотехник. — Июньскöй привессэсö эн на вунöт. Кöднасянь уджавнытö пондöтчин?

— Да тi мый, Светлана Савельевна? Сэк жö дзир двести тридцать граммöн вöлi. Неужто öнi?..

— Сэк, да. А öнi?.. Öнi тысяча двести тридцать! Вежöртат, нывкаэз? Тысяча да эшö двести тридцать! Да этася ыджытжыккес эд и лоны ни оз вермö. Тiянлö жö, тэныт, Таисья, эта понда орден кышавны колö! Вай ме тэнö эта понда, кыдз сойöс... — Зоотехник чеччис пызан сайсис, оськöвтiс зэв Таисья бердö, жмитiс ас бердас, пондiс окавны, Таисья паныт керис сiйö жö — öтлаын эд уджалiсö, и зоотехник, кыдз вермис — отсалiс.

Сёрöнжык, быдöнныс лöньсисö, пуксисö.

— Меным мыйкö оз и веритсьы, — горöтчис Таисья. — Былись, нывкаэз.

— Миян условиеэз кузя и меным тожö оз, но... — одзлань зоотехник осьтiс журнал: — видзöтö вот ас синнэзнаныт, лыддьö — быдöс одзаныт. — Сэтöн жö сiя паськöтiс кынымкö «Молния» листок. Таисья местасянь чöлöмöн видзöтöв-керис гырися петкöтöм цифраэз вылö, ловзисис, дзик лэдзис пельпоннэс вылiсь сьöкытся-сьöкыт ноша, лэдзис увлань синнэсö. Колiс бы радуйтчыны. Колiс бы гажöтчыны. Этна вöвлытöм привессэз увья талун позис быдöс: шутитны и серавны, сьывны и йöктыны. А Таисья дзик вунöтiс быдöс йылiсь, мунiс кытчöкö ылö-ылö аслас думаэзöн, сэтчин, мый пыр сылö ковсис мунны эта гожумö. Тöдвылö усис быдöс öтдруг: и дзугöм мечта, и подакокувт да вердчан понда пессьöм, и бригадирлöн нимкодялöм-издевайтчöм, и председательлöн пода дынiсь откажитöм да правленнёись вашöтöм, и нельки мамыслöн лöгалöм-видчöм да проктöмöн кöритöм. А быдöс местö вот сiя, медколанаыс — тысяча двести тридцать грамм мымда суткися привесыс — кöдаö вöлi пуктöм быдöс: вын, кад да мыла, и кöдö öнi не он суськы, не он дзеб, кöда öтнас пöдтö быдöс неколанасö: курытсö и зубытсö, сьöкытсö и гажтöмсö. И сё жö... сё жö... Таисья и ачыс эз казяв, кыдз кöдкö коста сöдзöм синваэз, öтамöдсö одзалöмöн, визывтiсö кык шорокöн рожабаннэз кузя, пондiсö усявны морос вылас. «Колiс я меным сэтшöм донöн да сьöкыта мунны этö туй? Эз я позь керны сiйö кокнитжыкöн да донтöмжыкöн?» Но быдöс неважын тöдвылö уськöтöмыс сэтшöм ятнöя сулалiс син одзын, что Таисья вежöртiс — этна условиеэз коста да этна отир коласын, кöдна зорöтiсö этнö условиеэсö, кокнитжыкöн мунöм туйыс лоны эз вермы. Сiдзкö и мунны сiйö кыдзкö мöднёж эз позь. И сувт талун Таисья одзын эта туйыс мöдпырись, нывка и мöдпырись мунiс бы сiйö сiдз жö.

Сiя жö рытö, гортын ни, мамыскöт ужнайтöм бöрсянь, кöр пызан вылiсь вöлi дзимлялöм пань-бекöр, Таисья пуксис книга сайö.

Дарья Семёновна мыйкö дырна бергалöв-керис комын, а кöр петыштiс да сувтiс занавеска весьтö, горöтчис:

— Мый нö, невеста морт, босьтiн вылвежöттö да он и меряйт? Пасьталлы жö да видзöтамö кöть, лöсялö-оз мыйкö. Праздник эд локтö, вочöтчыны пондас колны.

Эшö сентябрьнас, кык медодзза получка бöрсянь, кöр ас магазинын нем коланаыс эз адззись, лунысöн Таисья ветлiс вöр посёлокö босьтасьны. Быдöс небöм-вайöмсö гортын нывка каттьыштiс марлевöй занавеска коласö, öшöтiс сёр вылö, а сэсся дзик вунöтiс. Да и мый эшö этася вöлi керны? Виль вылвежöтсö уджавтöнняс он пасьтав.

— Мыля жö оз лöсяв, меряйтöмöн босьтi да. Ась öшалö, оз тай китсась. Празднуйтнытö меным кадыс эз на петав.

— Петалас, эз дак, кöркö, — Дарья Семёновна дышöтчытöг кежалiс комö, вайис да пуктiс нылыс одзö каттьыштöм паськöмсö. — Пасьталлы кöть видзöтöм могись.

Таисьялö нем эз кольччы, кыдз кывзыны. Нывка разис да кыскис голубöй рöм кузя бордовöй гвоздикаэза платье, пасьталiс, лöсьöтыштiс. А кöр сибöтчис да бергöтчис кругпöв неыджыт зеркало одзын, чöвтны сiйö вывсис бöр охота эз ни вöв. «Неужто ёнмыштi?» — дивуйтчыштiс нывка ас кежас, и сэтöн вöлись первуись, дзик саймис, казялiс — тöдчöмöн гöгрöссялöм пельпона, кызмыштöм кикока, ёнмыштöм вывтыра да нельки тырсялыштöм мороса, талун сiя вöлi ылын не сiя ни, кöда нёль месяцöн одзжык локтiс уджавны фермаö.

— Кузьöл тай нö абу я кö, — горöтчис Дарья Семёновна.

— Абу эд. Öнi дженыта оз новйö.

— Сiдз быдь дак... А ноко, öнi öшö пальтотö велдöрас пасьтал.

«Колö жö эд? — дивуйтчис Таисья одзлань, кöр пасьталiс платье вылö пемыт-гöрд рöма арся пальто да пуктiс юр вылас алöй рöма гöрдззöм шапочка. «Кöть вылiсь эн и чöвт».

— Бытшöм öддьöн, ме бы шуа. Кужöмыт, батя, налязга, бöрйынытö. Топ тэ вылö и вурöмöсь да, — ошкис Дарья Семёновна, быд ладорсянь нывсö нёджжавтöн. — Верман кö öшö этадз тöлсятö босьтны, дак лоас ни сэк мыйöн айка саяс петны.

— Мун жö, мама, дикöй баснинат. Эн бызды, кöдö оз ков.

— А этö нö мый вылö öшö шёлковöйсö босьтiн? — Дарья Семёновна босьтiс паськöммес коласiсь да паськöтыштiс нылыс одзын сiйö, мыччасьны да ошшасьны кöдöн отирыс син одзын оз туй. Таисья нёджжöвтыштiс мамыс ладорö, нельки сы одзын öзйыштiс чужöм вылас да öшыштiс недырик кежö баснинас. А мöдыс, нарошно, нылыс вылын сералöм могись, содтiс:

— Сэтшöмыс эд вылат, натьтö, оз и видзсьы, нильдыштас, а то öшö и нильдöтас... кинкö...

— Но жö тэ, мама, кытшöм... Мун син одзись. Эн вöрöт, кöдö оз ков. Колiс и босьтi. — Таисья перыта нетшкöвтiс мамыс киись небöм тор, перыта жö сайöвтiс сiйö бöр мöдiккез коласö, пондiс чöвтчыны. Видзöтны да меряйтны эшö и этася вöлi мый, но мамыс сералöм увья нывкалöн настроеннё тшыксис.