Глава VI

Чулалiс медодзза неделя.

Этöн каднас аслас куканнезкöт нывка ештiс сибавны подакокувтiсь быд пельöсö. Сiя сё эшö кошшис турунажык местаэз, кытöн нiйö позис бы вердны пöттöдз. Но быдöс весь. Кытшöм бы туруна видззез кузя лунтырнас Таисья подасö эз новйöт, дыр кежö нiя некытöн эз сувтчывлö, кошшисьтöн мунiсö сё одзлань, а рытнас бертлiсö гортö тшыгöсь, йöртöм бöрсянь вились пондывлiсö баксыны.

«Кытöн нö эстöн ладыс?» — лунiсь лун жугдiс нывка юрсö. Том да опыттöм, казявны перво эталiсь причинасö сiя некыдз эз вермы. Видзöтны кö боксянь, дак подакокувтыс кыдз подакокувт и вöлi: мыччассис турунаöн, уналаöт позис нельки ытшкыны. Дыр мыйись, кöр Таисья нарошно пондiс бергавны зэв-зэв куканнес гöгöр да видзöтны бытшöмжыка, мый нiя сёйöны, сэк вöлись быдöс и вежöртiс.

Куканнес весь эз ветлöтö. Сёяныс öнi вöлi кок увтын, и нiя кошшисö буржык, чöскытжык турун: пырей да сизьюр, небыт ыбанькытш да брыжьятурун. И усьлiс кö инмывлыны кöр колана вылö, сёйисö сiйö вуж бердöдз. Но сэтшöм чöскыт туруныс пантасьлiс етша. Омöн подакокувт пасьта быдкодь подасö видзöмсянь быдöс сiя важын ни вöлi нильöм-тальöм, травитöм да назьмитöм. Неделя сьöрна куканнесö пастучиттöн Таисья син одзын и öтпыр эз мыччась сэтшöм места, кытчö бы лун нето кык сьöрна эта вотöдз эз сибав пода. Кольччöм турунсö, кöда коласын унажык пантасьлiсö быдкодь вундасян осокаэз, зутурун, чорыт горадзуль да вежчача, некытшöм пода эз сёй. Кöднакö ны коласiсь вöлiсö курытöсь, кöднакö чорытöсь, а кöдна нельки ядовитöйöсь. Ны увья и подакокувтыс гожумбыт сьöрна мыччассис турунаöн. «Вот кытöн, сiдзкö, ладыс, — сэк вöлись дивуйтчыштiс Таисья. — Вот мый увья пар йöрас годiсь годö видзöмсянь куканнес и дзезмöны. Неужто сымдаыс мамöлö некöр юрас эз пырав? Эта дырна ни фермаас уджалö да...» Таисья вежöртiс, — кыдз бы сiя эз вынсьöтчы вердны ассис пода, некытшöм прок сы уджись эта подакокувт вылын оз ло. А мый керны одзлань, нывка эз тöд.

Нiя жö луннэзö, кыдзкö одз асывнас, эшö подасö лэдзавтöдз, Таисья дынö фермаас локтiс зоотехник. Колiс öшлыны куканнез.

Уджыс тырмис лунтыр кежö. Дзир рытъявылас, кöр вöлi лэдзчöтöм весаэз вылiсь бöрья кукань, нывкаэз пырисö конюховкаö (кукань фермаыс вöлi важ вöв картаын), кутчисö лыддьыны. Кыкнанныслö охота вöлi тöдны, кытшöм петас месяцся привес. А петiс сiя сутки кежас нач неунаöн — дзир двести тридцать граммöн.

Лöгувья зоотехник шупкис кисис ручкасö, öшöтiс юр, мыйкö дырна кольччис пукавны гажтöм да лöнь, думайтiс. Но мый вöлi керны, кöр уджыс аслат и винитны сы понда некинöс? Недыр мыйись, кватитчöмöн, сiя юöртiс:

— Да, Таисья, чуть эд эг вунöт. Гожум кежас ковсяс обязательствоэз босьтны, — дзик дорйисьöм могись содтiс: — Мамыт шогалöм увья ми этö одзжык эг вермö керны. А öнi, кутчисин кö тэ сы местö, ковсяс. Думайтышт вот да часöт жö и гижам. Чожа, кывсьö, заседаннё правленнёыслöн лоас, сэк кежö менчим нiйö корисö.

— А мый сэтöн думайтнытö? И сытöг вежöртана. Привессэс тай мыччалiсö. Унажыкыс йылiсь и думайтны нем... сэтшöм подакокувтас.

Нывкалöн веськыта горöтчöм кыввес зоотехник понда вöлiсö, тыдалö, нач видзчисьтöмöсь, тöдчöмöн повзьöтiсö.

— Мыля жö, Таисья?.. Миян жö плановöйес — четыреста. Этася учöтжыккесö некыдз оз позь, — пондылiс сiя веськöтны нывкасö.

— Сiдз, батi. Но эд гырисьжык обязательствоэзсянь унажык прокыс сё оз ло. Эта понда колö куканнесö буржыка вердны. — Таисья вежöртiс — обязательствоэз йылiсь басниыс пондöтöм öддьöн колана кадö. Öтлаын этакöт позис баитны быдöс йылiсь, мый сiя адззис да думайтiс. Подакокувтсö да буржыка вердöмсö казьмöтöм бöрсянь нывка видзчисис, что паныт эта вылö зоотехник мыйкö сё ни висьталас. Но мöдыс эта коста думайтiс дзир обязательствоэз йылiсь, кöднö сылö колiс вайны заседаннё кежö. Сэтчö жö и Таисьялöн видзчисьтöг да поперег горöтчöм кыввес ладсис сiйö öштiсö. Зоотехник вежöртiс — басниыс ны коласын пондöтчö нач не сiя, кöдö бы сылö колiс. Нетуяна подакокувт да куканнесö умöля вердöм йылiсь сiя, кыдз специалист, тöдiс Таисьяся не умöльжыка, дзир висьтавны паныт мыйкö бурö да коланаö эз вермы. Эта сiйö и полöтiс. И вöлi бы унаöн буржык, вермыны кö этö баснисö ордйыны.

Чöлöмыс ны коласын нюжалiс.

Бöртiжык, кöр Таисья сё эшö видзчисис, мый висьталас зоотехник сы горöтчöм кыввез вылö, мöдыс сы местö дзир сымда и юалiс:

— Но дак кыдз нö сэк обязательствоэзнас?

Эта юалöмыс и саймöтiс нывка сьöлöмын мыйкö обида вылö вачкисянаö. Думайттöг, колö я перво жö сэтшöм веськыта, куканьвöдитiсь, дзик кералiс, горöтчис:

— А некыдз.

— Мый нö ме сэк правленнёас висьтала?

Ассис зэркыта горöтчöмсö Таисья вежöртiс сэтöн жö, но зоотехниклöн одзлань юасьöмыс не эз чинт, не эз падты сы ылöсын обидасö.

— Мый эм. — Нывка сё эшö надейтчис колана басни вылö, недырик чöлыштöм бöрын сы увья жö содтiс: — Висьталö, что привессэзся ыджытжык обязательствоэз босьтны оз позь. Вердны буржыка куканнесö эта подакокувтын немöн.

Но нельки этатшöм поперешнöй басни бöрсянь не öтöрö, не мöдöрö зоотехник сiдз нем и эз висьтав. Сiя дзир гажтöма гогинялыштiс юрнас, пöдныштiс да вештiс одзсис журнал, шыасьтöг оськöвтiс ыбöсö.

Зоотехникыс мунöм бöрсянь Таисья вöлись вежöртiс, что ны коласын шогмис мыйкö небытшöм. И ась нывка нем умöльсö и эз кер, а горöтчис кö мый, дак дзир сiйö, кöдö и колiс горöтчыны, одзлань ни вежöртiс, что эта сылö сiдз оз чулав. «Ашынсянь жö, сiдз и тöд, омöн деревня пасьта паськалас: адззылiт пö вот, кытшöм сiя, миронняыс вöлöма? Ештiс я эз я мамыс местö кутчисьны, а зоотехниксö, кывсьö, пермасис вашöтöма ни». Эта думасянь ни Таисьялö лоис недолыт. Тöдiс нывка и сiйö, что и правленнёыс этö сылö сiдз тожö оз коль. Часто я пантасьлö сэтшöмыс, мед кинкö фермаын уджалiссез коласiсь эз босьт обязательствоэз, кöдна колöны отчёттэз понда? Сёрöнжык, гырися да гöрдöн гижöмöн, нiя лоасö öшöтöмöсь стена вылö, медтыдалан местас, мед мыччавны этöн правленнёлiсь удж. Мед локтас кö, шуам, кин районнöй начальство коласiсь, дак правленнёсис петавтöг вермис адззыны да тöдны, мый понда пессьöны гижöт вылын колхозас уджалiсь отир.

Быдöс этö Таисья вежöртiс бытшöма. Эз вежöрт сiя дзир öтiкö, мыля, кытшöм сэтшöм причина увья, кöр казьмöтiс зоотехниклö небытшöм подакокувт йылiсь да куканнесö умöля вердöм йылiсь, мöдыс эта вылö и джын кылöн паныт эз шыась.

Кöр зоотехник сайöвтчис син одзись, Таисья петiс конюховкаись, иньдöтчис кукань карта ладорö. Недолыт увья дорйисьöм могись нывка сё эшö думайтiс: «А мый ме сэтшöмсö кери? Горöтчи, кыдз эм и дöс сэтöн. Эд примитöм обязательствоэзсянь привессэс сё ни оз содö». Таисья сувтiс воротаэз одзö, кöдна сайын быд горшись уалiсö-баксiсö тшыг куканнез. Öшлiсьöмныс бöрсянь нывка мöдiс кöть недырик кежö лэдзавлыны нiйö вердны. Öнi сiя видзöтöв-керис лажмыта öшалан шондiлань, вежöртiс — сёр ни. «Кытчöдз нуöтан шуч деревня пыр ыбöдззас, видзöтан кö и шондiыс пуксяс, пондас пемдыны. А сёяныс нылö сэтчин сё сымда». Кольны тшыг куканнесö вердтöг ойбыт кежö тожö эз позь. «Ны увья сэк, сiдз и тöд, он ни онмöссьыв. Мый жö?..» Гусьöн, мед подаыс эз кыв сылiсь матын бергалöм, Таисья кежис воротаэс дынiсь бöр, аслас думаэз коласын сибöтчис да сувтiс олись йöр бердö, кöда сайын, шуч деревня увтöт, кыссис год кынымöн одзжык весöтöм, паськыт, туруна видз. «Вот бы кытшöмö куканнеслö подакокувтсö, дак вöлi бы мыйöн верднытö. Сэк эз бы пет полöм и колана обязательствоэсö примитны». Но эта вöлi дзир мечта, кöдасянь тшыг куканнес пöтны эз вермö. Öтiк мöдiкся горöнжыка, нiя баксiсö сё одззамоз, и оз дугдö сэтчöдз, кытчöдз тэ нiйö он лэдзав да он верд. Сэк и зорамис Таисья ылöсын дума — ытшкыны эта видз вылiсь ой кежö турун. «Да, да, кöть невночка», — гажмыштiс нывка аслас думасянь. «Былись эд. Кыдз эта меным перво жö юрам эз пыр?»

Позяс я ытшкыны куканнезлö эта видз вылiсь турун, сы йылiсь нывкалö öнi эз ни думайтсьы. Таисья рад вöлi öтiклö, что петанiныс адззисис. Сiя уськöтчис гортö, а тэрмасьтöнняс думайтiс, кыдз да мый пондыны керны одзлань. «Кыдз только подасö йöрта да мöссö чилькöта, сэк жö босьта сьöрам литовка и бöр». Но кöр нывка сибöтчис аслас керку дынöдз, казялiс, что подаыс ыбсис эшö абу локтöмöсь. «Мый жö?.. Мунны кö öнi жö бöр, дак кöр ме гортö берта?» Узьтöтны гортiсь подасö меститтöг тожö эз позь. Таисья кежис Гришика старуха дынö, кöда эта коста бергалiс карчйöрын, гряддэз коласын, орасис ^.

— Öгань баба, — горöтчис нывка эшö йöр бердас сибöтчытöдз. — Ме могöн тэ дынö.

Гришика старуха веськöтчис, бергöтчис паныт, кынымкö оськöв ылына сибöтчис матöжык, сибдöмкодь голосöн паныт шыасис:

— Баит, могöн дак.

— Подаыс гортö öнöдз абу бертöмöсь. А меным видзчисьнытö некöр, колö бöр фермаö котöртны. А муна сэтчин, дак дыр, натьтö, овсяс, — тэрмасьöмöн юöртiс Таисья. — Локтасö кö миян мöсыс да баляэс, дак йöрт, пожалуйста.

— Йöрта инö, тшöктан дак. Воротаэсö осьтны абу сьöкыт.

— Спасибо, сэк ме котöрта. — Таисья вöлi бергöтчис ни бöр, мед мунны, но мöдыс эшö юалiс: — Неладно я мый я мыйкö пермаат?

— Да не. Öшлiсим талун. Некöр вöлi сы увья куканнесö лэдзавлыны, тшыгйöн ой кежас кольччисö. Муна турун невночка ытшкышта.

— Мун жö! Эн ылаллы баснисит. Не куим кукань эд нiя картаас сулалöны. Кысь тэ сы ыжда араваыслö ытшкан? Нылö эд кöть тракторöн вай, дак сё он пöткöт. Öтiк ойсö и тшыгйöн узясö. Нем нылö колкознöйеслö оз ло, оз кулö, — пондылiс падтыны нывкасö Гришика старуха. Но сылiсь одзланься баснисö Таисья эз ни кывзы, котöрöн уськöтчис гортас.

Нывка перыта осьтiс ыбöс, пырис пытшкись посöдзö, судзöтiс керку стена бердын öшалан сiмöм дорыша да вартлытöм эшö таво литовка-шестёрка. Сэтöн жö джаджокын сылö син вылас усисö кынымкö важ, чирйиссьöм дора лопатка. «Мый жö?.. Ковсяс ли оз? Ог эшö куж лопатитчынытö да...» Öтiкö ны коласiсь Таисья босьтiс, сюйыштiс куртка карманас. Домöт местö мынöтiс тув вылiсь метр кык кузя гезок, керкуас пыравтöг, петiс бöр. А кöр одззамоз вöлi игныштöм замок вылö посöдз ыбöс, нывка, кыдз быльнöй ытшкисись, öшöтiс литовкасö пельпон вылас, перыта иньдöтчис бöр фермаö.

Мед не öштыны весись кад, не конюховкаö, не карта пытшкö, куканнес дынö, сэсся Таисья эз ни кежав, перво жö сибöтчис йöр дынö, вуджис мöдöрас, лэдзис пельпон вылiсь литовка, пондiс ытшкыны.

Бытшöма лöсьöтöм, весöтöм да волькöтöм видз вылын туруныс лэбтiсьöм тшöк, басöк. Öнöдз сiя вöлi эшö том, небыт, вöлись цветитiс — ытшкиссис кокнита. И ло Таисья киын литовкаыс лэчытжыкöн, ытшкисьны сэтшöм видз вылын рытся кадö, кöр эз ни калит шондi да эз быгыльт жарсяняс вывтыр пасьта ньылöм, вöлi бы öддьöн бур. Но недыр мыйись нывка казялiс — сiмöм да вартлытöм дорыша литовка нельки небыт турунсö эз босьт. Сiя не сымда ытшкис, мымда нильдалiс да нилис. Сэтчö жö Таисья тэрмасис, кыдз вермис. Куканнезлöн дугдывтöг баксöмыс не только шоччисьны, а и ловзисьны бытшöмжыка эз сет. Дас минута бöртi ни нывка пымалiс люзь, а öткоста вежöртiс — лöсьöттöм дорыша литовкаöн унасö он ытшкы, киэз орасö. И кöть лопатитчыны — удж ылын не нывкалöн (эта вотöдз сiйö Таисья нельки вöтöн эз керлы), воштiсьны вöлi некытчö, ковсис кутчывны. «Киэзöс бы дзир не вундавны. Мыйись мый, дак сэк и чилькöтчынытö гортын немöн лоас». Нывка сувтiс, мыйкö дырна нёджжасьöв-керис ас гöгöр, абу я кин матын сы дынсянь да оз я видзöт гусьöн сы удж сьöрын. А кöр некин не ферма гöгöр, не видз ладорсянь син вылас эз усь, сэк вöлись сiя полöмöн кутчисис тöдтöм удж бердö.

Таисья лэбтiс кырымас кок увтсис ассис жö нильöм-ытшкöм турун, кыдз позис, бытшöма чышкис литовкасö быд ладорсянь. Но кутны сiйö видзöм могись шульга кинас, кыдз колiс бы, эз куж. Этö сысянь, что лэдзис литовка оропсö му бердас не шульга конувтöт, кыдз колiс, а морос одзöт да веськытлань. Сэтчö жö и полöмыс, что кинкö вермас казявны сiйö эта удж сайись, öнöдз эшö эз чулав. Сэк Таисья лэдзис литовкасö нырнас му бердöдз, ачыс пуксьыштiс кекеркаöн сы весьтö, вöлись кутчисис лопатка бердö, пондiс гужгышавны сiйöн литовка дорыш бердöт, то öтöрсянь, то мöдöрсянь.

Вежöртана, что лопатитчыны мышкырöн, кыдз некин оз кер, вöлi умöль: и сьöкыт, и недолыт. Но бурыс Таисья понда эстöн сiя, что турун коласас пукавтöн нывка некинлö эз тыдав, а му бердас нырнас зангыштöм литовкаыс горöн эз горав.

Медперво Таисья вель дыр новйöтiс лопатканас дынöттяс, сэсся сiдз жö шöрöттяс, сэсся бöра дынöттяс да бöра шöрöттяс. А кöр лэбтыштiс литовкасö му бердсис бöр, оропыс, кыдзкö казявтöг ни, колананёж сюрис конувтас. Сэк нывка сiдз жö бытшöма лопатитiс и нырсö. «Нем эд, натьтö, менам оз пет. Тшыкöта дзир öддьöнжык». Но кöр Таисья дзимлялiс лопаткасö бöр да вились кутчисис литовка бердö, öтпыр-мöдöтпыр öвтыштöм бöрсянь вежöртiс, что öнi сiя сылöн босьтö нач мöднёжа. «Ай да ме! Кужи эд, тыдалö, мало-дело!»

Эта бöрсянь нывка дзик мынiс. Ытшкисьнытö лоис тöдчöмöн кокнитжык. Час сьöрна, а то и дыржык Таисья уджалiс сувтчывтöг. Сэк кежö и шондiыс ештiс сибавны вöр бердöдз, сiйö и видзöт — сайöвтчас. «Тырмас. Унажыксö сё ни не пыртлыны». Сос сорнас нывка öвтыштiс чужöм пасьта визывтан ньылöмсö, öшöтiс йöр вылö литовка, пöрччалiс кос бердсис да нюжöтiс кок увтас гезок, сэтöн вöлись кватитчис, что босьтны гортсяняс куран нач вунöтiс. Котрасьны сы увья öтмöдöрö кадыс эз вöв. Куш киэзöн ытшкöм турунсö курышавтöн Таисья пондiс тэчны сiйö гезок вылö.

Медодзза ноша дынö тшыг куканнес уськöтчисö сымда, что нывка сiйö и яслиöдз лэбтыны эз ешты. А кöр сiя пырис ношанас мöдöтпырись, одззася пыртöмсис и след некытшöм эз ни вöв.

Кыкдасöт ношасö, кöть быдöс ытшкöм туруныс эшö и эз вöв пыртлöм, йöр мöдöрас быд вынiсь вуджöттöн нывка уськöтiс, а лэбтыны бöр пельпон вылас сэсся эз ни вермы, сiдз му вылöттяс и кыскис. Кöр туруныс вöлi сё жö пыртöм да лэбталöм, сэк вöлись нывка и кылiс, кыдз сiя ештöм мыдзны эта уджсянь. Веськыт пельпонсö, кöда вылын Таисья кыскалiс ношаэсö, вöснитик паськöм пыр чорыт гезокыс сэтчöдз орöтiс, что öнi сы бердö и павкöтчыны эз позь, вöлi зубытся-зубыт, кыдз öдöм чирей. Гезоксö жö видзöмсянь чуннес нач вугмисö, нельки эз и куснясьö. Дзик дыр шогалöм бöрсянь зэв ёна зэгалiсö коккес, а сьöлöмлöн быд ёкнитöмыс вартлöмöн паськалiс омöн вывтыр пасьта. Пымалöмсянь нывка вылын паськöмыс вöлi люзь ва, топ кöтöтöм, кöть öнi жö чöвт да пидзрав. Но кыдз бы сэтчин эз вöв, колана уджыс керöм. Сiйöн не етшажык эта мыдзся вöлi и гаж. И гажöтiс медодз сiя, что турунсö пыртлöм бöрсянь тшыг куканнес кöть недырик кежö баксыны дугдiсö. Öнi нiя горöн бергалiсö öтамöд гöгöр, дызгышавтöн пелитчисö яслиэз дынö, мед кöть öтпыр вермыны сибöтчывны нырнаныс турун бердö. «Ась. Лöньсясö жагвыв. Асылöдззас öнi тшыгйöн оз ни кулö», — думайтiс Таисья, кöр бокынмоз сулавтöн сё эшö видзöтiс куканнез вылö.

Бöртiжык нывка петiс, игналiс воротаэз, жагвыв сибöтчис конюховка дынö, но пытшкöдззас эз ни пыр, öтпырись ловзисьöм могись пуксис стена бердiсь лажмытик скамья вылö.

Важынкодь ни сайöвтчис шондi. Лöньсис деревня. Ыркалiс ру, кöть сайкавнытö быдсöн и эз на ешты. Видз ладорсянь, кöда эстöн вöлi нач ордчöн, сибалiс цветитан турунлöн дук. Лолассис кокнита, но вöрöтчыны вын эз вöв. Охота лоис сэтöн жö куньны синнэз да ланьтны. И дзир номмес курччалöмсянь, кöдна пымалöмыс бöрсянь дугдывтöг лякасисö кикок да чужöм бердö, онмöссьынытö эз позь.

Пукавтöнняс ни Таисья кылiс, что сiя тшыгся-тшыг. Сэтöн жö тöдвылас усис, что гортын мöсыс öнöдз чилькöттöм, нывка сувтiс.

Гортiсь подаыс вöлiсö йöртöмöсь ни. Мöс да кукань куйлiсö карта шöрын, шоччисисö. Гидын кадiсь кадö кылышалiс дзеллезлöн негорöн тэчкасьöм.

Керкуас Таисья сибöтчис комись залавка дынö. Сы вылын высьтiсян ведраыс вöлi тыра. Гришика старуха киэзöн мöсыс вöлi высьтöм, кольччис дзир пожпыртны да дзимлявны йöв.