Пелькытша кран

Чулалiс гожумся шоныт рыт. Важынкодь ни саясис кытчöкö пруд ладорö шондi. Лöньсис автомашинаэзлöн да автобуссэзлöн город пасьта гугйöтлöм. Жагвыв пуксис туйез бокö, кыдз туман, ны колесоэзöн лунтыр сьöрна лэбтöм бус. А лунтыр сьöрна жö да бытшöма шоналöм му весьтын öнöдз эшö öшалiс шоныт, кыдз парнöй йöв, ру. Öтмöдöрсянь сулалан соседскöй керкуэзын, öтiк бöрсянь мöдiк, кусiсö биэз. Жар погоддя коста лунтырся удж бöрсянь мыдз отир водiсö шоччисьны дженытик да югыт гожумся ой кежö.

Удж вывсянь гортö бертöм бöртi ме рытывбыт гуддиси садын: оралi (весöтi) гöрдъягöд грядка вылiсь быдкодь ёгтурун. А сёрöн ужнайтöм бöрсянь петi да пукси калитка сайись скамья вылö шоччисьыштны. Сэк менам син вылö и усис сiя картинаыс, кöда вермас усьны мортыслö дзир öтпырись вексö овтöн и кöдö, öтпырись адззылöм бöрсянь, век сьöрна он ни вунöт. Сiя сiдз и кольччас пыр кежö овны тöдвылын да кадiсь кадö быд тöдчана торнас сэтшöм жö ятнöя пондас сувтны син одзö.

Улица да туй мöдöрас, неылын ме керку дынсянь, сiя годö пондöтiсö строитны город понда виль котельнöй. Ордчöн пондöтöм стенаэзкöт сулалiс ыджыт башеннöй кран, кöда отсöтöн лэбталiсö лесаэз вылö кирпич, раствор да мöдiк строитчан материаллэз. Сэк сiя лунтырöн жагвыв тарласис öтмöдöрö увтас тэчöм рельсаэз кузя, бергалiс аслас кузь стрелаöн то öтöрö, то мöдöрö, сiйöн жö, топ нюжöтöм киöн, судзласис площадкалöн быд пельöсöдз.

Öнi сулалiс сёр рыт. И вежöртана, что строитчан площадка вылас отирыс эз ни вöлö. Ой кежö кольöм кран, сiдз жö нюжöтöм «киöн», сулалiс вöрöтчытöг. Вöрöтчытöг жö öшалiс стрела бердын, увлань лэдзчисьöм трос вылын, крюк, кöда вачкисис онняюрöн бергöтöм юасян знак вылö.

Мича погоддя коста гожумся ойес югытöсь, бытшöма тыдалö вель ылö. А кöр неылын кран дынсянь мыччисис эшö ась и не быдса, а чарла кодь джыння тöлiсь, гöгöр пондiс тыдавны эшö бытшöмжыка. Вежöртана, что тöлiсьыс öшалiс краныс сайын. И сы югöр пыр кранлöн силуэтыс пондiс мыччассьыны сэтшöм ятнöя, кыдз бытьтö вöлi рисуйтöм пемыт-лöз енöжлöн свод вылын. Но мединтереснöйыс вöлi нельки не сiя, а нач мöдiк. Ме син вылö краныс усис тшöтш сiя кадö, кöр чарла кодь джыння тöлiсь, вывлань лэбтiсьтöнняс, сибöтчис улiсянь öшалан крюк бердöдз да кыдз пелькытш, сiдз и кольччис сы увтын мыйкö дырна кежö. Боксянь видзöтiкö öнi сiдз и мыччассис, что тöлiсь, кыдз пелькытш, былись кышалöм да öшалö крюк бердын.

Дивуйтчöмöн ме видзöтi эта картина вылö, янсöтчынытö кöдакöт вöлi нельки жаль, сiдз кыдз одзлань ни вежöртi, что век сьöрна сэтшöмнас эта картинаыс лоны оз вермы. Чулалас минута сьöрна кад, и сiя разьсяс. А мöдöтпырись сэтшöмсö сэсся он ни пантав. И былись. Кран понда пелькытшöн век кежö тöлiсь эз кольччы. Минута бöртi ни, вöрöтчытöг вывлань лэбтiсьтöн, сiя жагвыв вешшис öшалан крюк увтiсь. И сiя картинасянь, кöда менö сы öддьöн дивуйтiс да гажöтiс нач неважын, öнi и след некытшöм эз ни вöв. Но öтпырись адззылöмыс век кежö кольччис тöдвылын.

Кадыс сэксянь чулалiс уна ни, но адззылöмыс дивуйтö да гажöтö менö сё одззамоз.

Гожум шöрнас

График сьöртi менам отпускыс вöлi июньнас. А кытшöм бытшöм да гажа годлöн эта кад, лыддьöтiсьыс, думайта, вежöртö. Тшöтш сэк кежö пуксьöны тулысся ваэз — ыждöм юэз пырöны бöр асланыс береггезö.

Сэк кежö саймö да ловзьö быдöс природа. Саддэзын паськöтöны медодзза лист яблоня да вишня, пондöны цветитны. Кыдз невеста, купайтчö аслас свадебнöй нарядын ю береггез пöлöн быдман льöмпу. Видззез вылын ырöпöн лэбтiсьö турун. А сы коласын, лажмытжык да вöра местаэзын, гусялö синбур оссьöм горадзульлöн шондi рöмöн öгралöм-цветитöм. Кытöнкö вылынжык местаэзын, шондi морос вылын, сы коста жö бель видзö и гöрдъягöдлöн оссьöм цвет.

Быдöскöт этакöт лунтыр, шондi петан кадсянь и шондi пуксьытöдз, дугдывтöг öшалö руас быдкодь кайезлöн сьылöм. И кывны этö быд голоса сьылöм-питиртöмсö позьö быдлаись: садiсь и ю дорись, ыбись и вöрись. И, вежöртана, что отпусклöн эта гожумся кадыс менö öддьöн гажöтiс. Висьтавны кö сэтчö жö, что вöлi эта му пытшкын уджавтöн, кöр гожумся цвет-гажöн тырöм мусö лунся югыт коста кодьöн он и адззывлы. А уджалi ме сэк и былись му пытшкын, öтiк кизеловскöй шахтаын.

Отпускыс пондöтчис дасöт числосянь. Эта вöлi понедельник лунö. Сэк кежö жö сетавлiсö и месячнöй зарплата. Но поезд вылö менам билетыс вöлi небöм кынымкö лунöн одзлань ни, воскресенье рыт кежö. Уджавнытö сэктöдз, а ветлöтi ме сiйö неделясö нёльöт сменаö, кольччис кынымкö лун. Эта кадö и пондiс кöдздöтны бöр.

Лунвывся шоныт да рам тöлыс, кöда пондöтiс гожумсö, кöда коста быдöс саймис-ловзис да потiс-оссис, мед пондыны быдмыны-цветитны, кыдзкö нач видзчисьтöг вежсис бöр, пондiс пöльтны ойвывсянь. И бур бы, пöльтiс кö бы сiя не сэтшöм кöдзыта. А то эд вундыштiс-орöтiс коскаэз бердöдз.

Охота или не, но гожумся кöмкöт-паськöмсö ковсис вежны бöр тöвся вылö. Кепись-шапкатöг öтöрас и мыччисьны эз позь. Кынымкö ой сьöрна нельки кынтлiс да сiдз, что асыввезнас кок увтын муыс горалiс, кыдз кöрт. А сiдз кыдз кымöра погоддя коста шондiыс эз мыччась, ойся шонытжыкыс и луннас эз вöвлы. Ой сьöрна кынтöм муыс бöр эз и сыв, сiдз кынöн и кольччис.

Бадь, льöмпу да тополь лист, бöрьяыс вылын кöдна коласiсь сiя вöлi челядь долонь пасьта ни, сьöдöтiс, кыдз шом, топ сiйö палитiсö би вылын, да пондiс каттисьны. Этатшöмыс оз овлы нельки арнас, одзвевья кöдздöтöм-тöлöм коста. Сэк пуэз вылын листыс частожыксö дзир рудмö, косьмö да сэтшöмöн мукöд коста и кольччö тöвйыны пу йыввес вылын. Но меддивуйтанаыс усис сё жö кресення вылö.

Эшö суббота рытас, кöр ме сёрöн ни, медбöрья автобусöн, мунi смена вылö, кöдздöтöм кузя кынтöм му вылö шочыника пондöтчис усьны лым.

Мый керсис вевдöрас ойбыт сьöрна, адззывны му пытшксяняс эз позь. А кöр сменасö уджалöм бöрсянь, асыв кежас ни, лэбтiсим «на гора», син одзын картинаыс оссис нач гажтöм.

Пондöтчöм ни вöлi эта вотöдз гожумись и след некытшöм эз тыдав. Туй вылын ли туй бокын, керку юррез вылын ли карчйöрын, видз вылын ли вöрын, пуэз вылын да ны коласын — гöгöр да быдлаын куйлiс лым. И вöлi сiя не уль, кытшöм вермис бы усьны недырик кежö шоныт погоддя коста, а кöс да чорыт, кыдз песок, кытшöм овлö дзир тöвшöрнас, ён мороззэз коста. Öтлаын этакöт сэтчö жö эшö сiдз нöбöтiс, что, кыдз баитсьö, не син, не бан — нем эз тыдав.

Сэтшöм видзчисьтöм да неколана погоддя увья эта луныс менö дзир сiйöн и гажöтiс, что поезд вылö билетыс, кыдз одзланьын юöртi ни, менам вöлi небöм и öнi кольччис видзчисьны дзир рытлiсь сибöтчöм. Поездыс мунiс рытъявыв. Но эшö поездыс вылö пуксьытöдз меным колiс ветлыны гортсянь городскöй баняö, мед не нöбöтны сьöрö отпускас шахтаись угольнöй алакша-бус.

Общежитиесянь, кытöн ме олi, городскöй баняöдззас кык сотня метрся унажык эз вöв. Эта туй коласын колiс дзир вуджны кöрттуй мöдöрö.

Мед не сiдз кöдзавны баня понсянь да не гумлавны туфлиэзöн лым, баняас мунны ме кöмалi хромовöй сапоггез. Но кöр петi гортiсь да сибöтчи кöрттуй насыпь бердöдз, сэтöн ни вежöртi, что лымсö бродитöмись менö и сапоггес оз дорйö.

Сутки сьöрна усьöм-нöбöтöм коста кöрттуй насыпь бердас öтмöдöрсянь сiйö ештöм вайöтны да пуксьöтны сы сувдöн, что бродитнытö кöрттуй мöдöрас вуджтöн меным ковсис не вонясянöдз да не пидзöсви, а, кыдз баитсьö, гöгви. Сiйöн не туфлиэзас ни, а нельки сапог голеннезас лымсö усис гумлавны тырся-тыр. И вöлi сэтшöмыс не сёр арöн, и не тöвнас, шуам, декабрь нето январь месяцö, а июньнас, чуть я не гожум шöрнас. Сiдз жö усис бертны банясис и бöр.

Отпуск кежö быдöс колананас чемоданыс вöлi тэчöм одзлань ни. Рытъявнас меным сымда и кольччис, кыдз сюрны автобус вылын вокзалöдз да пуксьыны поезд вылö. Мый ме и кери.

Видзöтны вагонсянь öшын сайö сэтшöм погоддя коста, кöр быдöс зеленьыс сьöдöттöдз вöлi кынтöм, му вылас куйлiс пидзöс сувда лым, а сы кузя пöльтiс-гуляйтiс вундыштан тöв да каттис-бергöтiс син тыртан падера, — видзöтны сэтшöм погоддя вылö нельки шоныт вагонсянь некытшöм охота эз вöв. Сэтчö жö и кадыс сибöтчис рытся, чожа пондiс пемдыны. А меным, мыдзувья, охота вöлi шоччисьыштны. Ме водi да сэк жö ланьтi не кузь да кокнит онöн, кытшöм и овлö туй коста.

Сайми бöр вöлись одз асывнас. Медперво вештыштi öшын весьтiсь занавеска, дзар керыштi сы сайö.

Поездыс öнöдз эшö кыссис сопкаэз кодь негырись керöссэз коласöт. Но мый медодз усис син вылö да и гажöтiс медöддьöн, дак этö сiя, что некытшöм лымлöн эстöн и дукыс эз ни вöв.

Керöссэс коласöт кадiсь кадö мыччасьыштлiс дзир неважын мыччисьöм да лажмыта эшö öшалан шондi. Пуэз вылын, кыдз и овлö эта кадö, кышöтiс том да югыт-зелёнöй рöма лист. Му вылын тшöка лэбтiсис турун. Негырись шоррез пöлöн да лажмыт местаэзын, шочыник вöр коласас, быдса куртинаэзöн синбур гусявтöдз сотчисö-öгралiсö югыт би рöма горадзуллез. Быд рöма бичирöн вериктiс шондi югöррез увтын турун вылын öшалан лысва. И думайтны кö, мый вöлi быдöскöт этакöт одзза лунас да бöрлань кольöм местаын, кыдзкö эз и веритсьы, мед июнь месяцö сэтшöмыс вöлi былись. Сiя чожажыксö вачкисис кытшöмкö вöт вылö. Но кольччис кö ме тöдвылын пыр кежö, сiдзкö и былись вöлi.