Глава XIV

Таисьяöс кольлалöм бöрсянь Светлана бертiс керкуö, пуксис пызан сайö. Эта коста пондiс кывны колхознöй куканнезлöн баксöм. Медперво сiя кылiс ылiсянькодь и не сэтшöм горöн. Но чожа баксöмыс паськалiс омöн деревня пасьта. А кöр зоотехник костi чеччис пызан сайись да уськöтчис öтöрö, сэк куканнес вöлiсö деревня шöрас ни.

Светлана некыдз эз вежöрт, мый эта сэтшöмыс: кин нiйö лэдзалiс да мыля нiя лоисö вдруг деревня вылын. И вöлись сэк, кöр сiя котöрöн уськöтчис нылö паныт, казялiс, кыдз Дарья Семёновна, Таисьялöн мамыс, кöзовöй кузь ньöрöн вылына öвтышавтöн мырсьö-вашöтö куканнесö пар йöр ладорö, важ подакокувтö.

Куканнез баксiсö мымда горш, чепсасисö то öтöрö, то мöдöрö, мед бергöтчыны да бертны бöр. Вежöртiсö, тыдалö, что пар йöрас нылö сёйнытö нем. Мукöдыс ны коласiсь и былись мынлiсö вашöтöмыс увтiсь: кöда йöррес пöлöн, кöда кыдз пышшисö бöр карта ладорö. Но кольччöммесö Дарья Семёновна вынсьöтчис вашöтны одзлань.

«Таисьяыс я мый я ас местас лэдзавны тшöктiс? Но эд баитчим жö ми сыкöт, что куканнесö ме ачым и лэдзала, и йöрта, — думайтiс зоотехник. — А тшöктiс кö сiя мамсö, дак мыля важ подакокувтас? Мыля вильыс йылiсь нем эз юöрт? Нем мыйкö ме этаись ог вежöрт».

Куканнес коласöт Светлана иньдöтчис паныт Дарья Семёновналö, горöн баксöмыс пыр эшö ылiсянькодь юалiс:

— Тi мый, Дарья тётка, этö керат? Кытчö нiйö вашöтат?

Сылiсь юалöмсö мöдыс дзик эз и кыв, зоотехникыслань нельки дзар эз кер. Куканнес вылö одззамоз ньöрнас вувьявтöн, сибдöм кодь голосöн сiя горöтлiс:

— Тпру-уч! Тпручö, былыга синнэз! Мый öшö сэтöн горшнытö летат? Вунöтiт я мый я ыбас туйсö?

— Дарья тётка, мыся! — горöтчис Светлана нач матынсянь ни. — Ме эд тiянлiсь юала, кытчö куканнесö вашöтат? Эз разь Таисьяыс висьтав, кытöн ми нiйö öнi видзам?

— Меным сэтчöдз дело абу, кытöн видзат, — зоотехникыс вылö дзар кертöг, лöгвевйöн шыасис Дарья Семёновна. — Тiянтöг тöда, кытöн куканнесö видзны. Кытчö колö, сэтчин и вашöта.

— Оз ков сэсся сэтчин, Дарья тётка. Куканнеслö виль подакокувт сетiсö. Бергöтö бöр да йöртö ферма увтiсь Оляс, — сё эшö корöмöн баитiс зоотехник, кöть и кылiс ни, кыдз паныта кыввезсянь чепöссьöм вир пондö öзтыны рожабаннэсö. «Вот тэныт и на. Сы местаö, мед радуйтчыны, что кöть öтiк гожум кежö вермим петкöтны куканнесö нетуяна подакокувтсис, сылö, видзöт тэ, и дело сэтшöм абу». Горöтчы сiдз Дарья Семёновна мöдiк кадö, споритны сыкöт Светлана некöр бы эз понды, öвтыштiс бы кинас, бергöтчис да и сайöвтчис сы син одзись. Но примитöм решеннё бöрсянь вöлi вежöм дзир подакокувт. Ой кежас куканнезлö турунсö эшö и öтпыр эз вайлö. Эта увья нывкаэз, эз тöдö мый керны. И вежöртана, что Дарья Семёновналöн пар йöрас куканнесö вашöтöмыс вöлi нач неколана. Этадз и виль подакокувтсö недыр вöлi öштыны бöр. Колiс öнi жö мыйкö керны.

Корны одзлань, мед Дарья Семёновна бергöтiс куканнесö бöр, зоотехник сэсся эз понды. Мыйкö дырна сiя эшö думайтöв-керис ас кежас, лöсьöтчис, а сэсся повтöг да решительнöя оськöвтiс паныт, нетшкöвтiс сы киись ньöр, туйсö поперегалiс.

— Кин тiянöс тшöктiс карта вывсис куканнесö лэдзавны?

— Некин эз. Колiс — и лэдзалi.

— Вот и весь. Тi жö, Дарья тётка, эшö больницаыс вотöдз заявленнё сетiт, мед фермасис вежисö. Вот тiян местö правленнёыс нывнытö и сувтöтiс. Эта вылö талун и решеннё эм. Дак мыйлö нö эшö эта бöрсянь сэтчö юрнытö сюйыштат?

— Тöда и ог ме тiян кодь укашшичаэсö! — Вот кыдз?.. Бур бы, керит кöбы тi сiдз, кыдз висьталöны. А то эд баит, эн баит — бытьтö од и кылö. А одö кö тi кывзö менчим кыв, дак эта бöрсянь тiянлö фермаас и керны нем. Сэтшöм уджалiссес меным оз колö. Сiдз и тöдö. И куканнесö важ подакокувтас вашöтны ме тiянлö ог сет. Кытчö колö — ачым вашöта.

Эта споритöм коста унажык куканнез ештiсö бергöтчыны бöр, öтамöд коласын одзасьöмöн, пондiсö тэрмасьны асланыс карта ладорö. Зоотехникыс зэркыт кыввезсянь öшöм кодь Дарья Семёновна кольччис сулавны одзза местаас, мый керны, эз тöд. И вöлись сэк, кöр казялiс, что панлавны да вашöтны кольччис некинöс, горöн сьöвзис кок увтас, зоотехникыс сьöрö горöтчис:

— Да вашöт тэ, вашöт, колö öддьöн дак! Ог герйöлт куканнет понда! Кытчö тэныт колö, сэтчин и вашöт. Кöть осяэс вылö öнi жö йöрт! — Лöгвевйöн сiя öвтыштiс кинас зоотехник ладорö, грöзитiс: — Эн-на, эн-на ныртö öддьöн лэбтал! Радöсь, батi, öшö ме вылö лоат! Локтат öшö келмисьнытö! А ме перманыт вылö сэсся некор и дзар ог кер! И сьöлзьыны ог думайт! Вот! Тырмас! Уджалi! Быдöс ассим здоровьёöс сэтчин пуктi да сё сымда чесьсö нажывитi!

«А мый, былись кö ковсяс?.. Не унаöв я горöтчи? — думайтiс зоотехник Дарья Семёновналiсь грöзитчöмсö кывзытöн. Дивуйтчыштiс ас кежас: «Кыдз этö ме сымдасö лысьтi? — а одзлань дорйисьöм могись ни: — А кытчö нö вöлi воштiсьнытö, кöр сiя менчим кывсö оз кывзы? Эд не откажитчыны жö сы увья виль подакокувтсис. Донтöма разь сiя миянлö дöнзис? Вöв часöт ме местын ачыс Таисьяыс, дак эта понда сiя эшö бы не сэтшöмö мыччалiс». Дарья Семёновналiсь одзланься горöтлöм-видчöмсö Светлана сэсся эз кывзы. Мырддьöм ньöрöн кадiсь кадö öвтышавтöн да негорöн тпручöкайттöн нывка тэрмöтiс куканнесö бöр карта ладорö. И вöлись сэк, кöр вöлiсö йöртöмöсь асланыс подакокувтö, зоотехник ловзисис кокнитжыка.

Кöр Светлана пöдныштiс завор да иньдöтчис бöр деревня ладорö, казялiс, кыдз сэтчö жö, подакокувтiсь йöр бердö, литовкаэзöн пельпоннэз вылын öтiк бöрсянь мöдiк, чукöртчöны ытшкисиссез. Зоотехник сувтiс, мыйкö дырна видзöтöв-керис быдöс вылö ылiсянь. Нем полöтанасö этаись перво нывка эз казяв. Етша я, мыйлö колiс ытшкисиссезлö чукöртчыны подакокувтiсь йöр бердö? Но чожа мый деревня ладорсянь мыччисис бригадир, тэрмасьöмöн сибöтчис инькаэс дынö. Быдöннысся одзжык сiя вуджис йöр саяс, кадiсь кадö пондiс öвтышавны киэзнас видз ладорö, тыдалö, мыйкö баитiс. Эстöн вöлись Светлана, дзик саймис, вежöртiс, мый думайтö керны бригадир. «Вот тэныт и на. Этö дзир и эз тырмы? Сымда бöра куканнесö и вердiм». Кöдзалöм сьöлöмöн зоотехник, оськöв бöрын оськöв, кежис аслас туй вылiсь, иньдöтчис быдöнныс дынö.

Ытшкисиссез вуджисö бригадир сьöрö йöр мöдöрас, мукöдыс ны коласiсь кутчисисö литовкаэз бердö, пондöтчисö ытшкисьны.

Ны сьöрö жö сувтчывтöг вуджис и Светлана, оськöвтiс зэв матö бригадир дынö.

— Тi мый этö, Прокопий Егорович, керат?

— Ха, этö тэ, Свет Савельевна? Здоровöн я чеччин? А ми вот вердчан, вердчан колкознöй поданытлö тöл кежас заптам, — издевайтчöмсö сайöвттöг шыасис паныт бригадир. — Или тэ он адззы, он вежöрт сымдасö, мый син одзат керсьö?

— Адзза. Мыйлö тi подакокувтсö ытшкат, кöр сы вылö правленнёöн решеннё примитöм?

— Ог тöд сымдасö, Свет Савельевна. Некытшöм решеннё понда, кыдз правленнёись член, эг голосуйт.

— Тi эд голосуйтö, дак мöдiккез голосуйтiсö.

— А мöдiккес вылö ме, колö кö тэныт тöдны, дак тьфу... — горöн сьöвзис аслыс кок увтас, — ...этадз и сьöвзьыны ог думайт.

Зоотехник вежöртiс, что баитны бригадиркöт одзлань нем. Оз кö сiя думайт лыддисьны примитöм решеннёкöт, дак мортлö моз висьталöм кывсö сё ни оз вежöрт. «Жаль, Таисьяыс гортын эз лöсяв. Вöв сiя часöт эстöн, дак не ме моз бы тэкöт баитiс».

— Дак мый, ытшкыны пондат?

— Пондам, Свет Савельевна, обязательно пондам. Эта понда верман не тöждыны. Сэтшöм туруна видз вылiсь дзезмöм куканнезнытлö вердчансö быдса тöл кежö туяс керны.

— Но мый жö?.. Керö. Керö кöть куим тöв кежö, но подакокувтсис керöмсö ме тiянлiсь и грамм мымда ог примит. Вот адззылат.

— Сiдз, дак мыйлö нö сэк эсчö кадсö торкны? Оз и кол ытшкыны, — горöтчис кинкö ытшкисиссез коласiсь пондöтöм покос дорас. Но бригадирлö зоотехниклöн сэтшöм решительнöя горöтчöм кыввес вöлiсö, тыдалö, нем туйö. Одззамоз издевайтчöмöн сiя баитiс:

— Ытшкö, ытшкö, инькаэз! Эд кылзö тi сылiсь баснисö. Етша я мый мортыс горöтчас, кор баитнытö сэсся нем йылiсь? Нем кляпсö сiя миянкöт оз кер, баитас мымда. Пöрöтöм турунсö куканнес сё ни оз сёйö. А косьтам да зородалам, дак тöлнас асьныс жö радöсь лоасö. Асьныс жö миянлö спасибо висьталасö.

«Вот уж не весь отирас баитöны, что горбасö дзир шойна гу веськöтас», — думайтiс Светлана йöрсö вуджтöн. Кывзыны бригадирлiсь одзланься баснисö охота сылöн эз ни вöв. Зоотехник вежöртiс, что председательлö казьмöттöг эта эз керсьы. Сiйöн нывка иньдöтчис перво правленнёö. «Видзöтам часöт, мый сiя миянлö висьталас».

Пытшкись посöдзсяняс ни Светлана кылiс правленнёын кинлiськö горöн видчöм-баитöм, а кöр пырис коридорöдз да оськöвтiс ванйöв осьта ыбöс дынöдз, сэк вöлись вежöртiс — инмис öддьöн неколана кадö. Председатель одзын кабинетас сулалiс Дарья Семёновна, басниыслö отсалöм могись лöгвевйöн öвтышалiс кинас, баитiс:

— Кутшöм öшö сiя тiянлö пермаын уджалiсь, челядёкыс, кагаыс? Мый сiя ылöстö? Мый кужö-вермö? Öння кадö отирыслöн сы годсяэс öшö аканнезöн орсöны, колö кö тiянлö тöдны дак. Вот.

— Вот сiйöн вот, Дарья Семёновна, что том да оз ылöст, ме сiйö бöр и кери, — баитiс паныт председатель. Кин йылiсь мунiс ны коласын басниыс, вежöртнытö вöлi несьöкыт.

Паймыштöм кодь Дарья Семёновнакöт вились пантасьöмсянь зоотехник недырик кежö сувтчыштiс порог сайын.

— А стыдыс? Позорыс эта бöрсянь нывкаыслö? Мыйлö сiйö вöлi том киння томöн пермаас сюйыштны? Кин сiйö эта вылö ызйöтiс? Ас юрнас сымдасö сiя эд сё ни эз кер, — баитiс Дарья Семёновна.

Сайласьны одзлань эз позь. Зоотехник оськöвтiс порог омöн, Дарья Семёновна одзын сувтiс.

— Кытшöм эшö стыд, Дарья тётка? Кытшöм позор? Кысь тi этö босьтiт? Кинсянь кылiт, что Таисьясö фермаас кинкö öзйöтiс? Кин висьталiс, что кинкö сiйö бöр куканнес дынiсь вашöтiс?

— Тэ вот и ызйöтiн! Тэ и ылöтлiн! Чодзыл син тэ! Чалкан син тэ! Тэ быдöс этö и сорöлтiн! Тэ кашасö и пуин да лысьтан эшö эта бöрсянь ме син одзö мыччисьны? — вуджис Дарья Семёновна зоотехник вылö. — Ме тэнчит, кульвугырлiсь, синнэтö эта понда кыскала! Вирöдз кöрыша рожатö кера! — чепöссис зоотехник вылö, öтпыр-мöдöтпыр пондылiс кутчисьны киэзнас сы чужöм да юрсиэз бердö.

— Мун жö, Дарья тётка! Йöймин я мый я? Эн кутчись весись. — Сайласьтöнняс зоотехник вынöнкодь татшкыштiс дынсис Дарья Семёновнаöс, но мöдыс нельки эта бöрсянь лöньсьыны эз думайт, горöтлiс:

— Ме вот тэныт мыччала Дарья тёткасö! Ме тэныт эта понда!

— Дугдö жö правленнёас! — Председатель чепöссис пызан сайсянь, уськöтчис инькаэс коласö. — Лöньсьы, Дарья Семёновна. Не дело тэ сымдасö керан.

Председатель пуксьöтiс сiйö стул вылö, а пызан мöдöрсяняс сылö паныт пуксис зоотехник, лöсьöтыштiс дзугöм юрсисö.

— Весь тэ ме вылö, Дарья тётка, горзан. Некин Таисьясö фермаас эз бöбöтлы. Ачыс сiя, ась вот председательыс висьталас, заявленнёсö татчö вайис. Ачыс куканнес дынö кутчисис. И фермасис сiйö некин эз вашöт.

— Кыдз нö эз, коли ачыс Тайкаыс гортын висьтасис? И предыс вот тожö оз суськись. Сiйö жö тэ пыран одзын баитiс.

— Ме тiянлö эшö öтпырись висьтала, — некин Таисьясö фермасис, куканнес дынiсь, эз вашöт.

— Да не, Светлана Савельевна. Вöлi миян коласын Таисьяыскöт сэтшöм басниыс, — öнi вöлись шыасис председатель.

— Адззан вот? А öшö баитан — некин эз вашöт.

— Эз, — сулалiс зоотехник аслас вылын. — Не мекöт, не правленнёкöт эта йылiсь басни эз вöв. Ме ассим соглассё эг сетлы. И лысьтiт кö тi, Яков Терентьевич, керны сымдасö öтнаныт, ковсяс извинитчыны да босьтны кыввезнытö бöр. А öнi висьталö, пожалуйста, мыля ой кежас куканнеслö вердчансö од ваялö?

Председатель шынньöв сьöртi позис вежöртны одзлань ни, что зоотехниклöн вопросыс сiйö нельки гажöтiс.

— Этö тi, Светлана Савельевна, не менчим, а медодз ассиныт да бригадирыслiсь юалö. Решеннё примитöм, наряд сетöм. Вот и керö. Мый öшö этася тiянлö правленнёыссянь колö? Не сылö жö, натьтö, правленнёыслö ме шуа, тiянлiсь уджсö керны.

— А кин бригидирыслö нарядсö сетiс подакокувтсö ытшкыны?

— Кутшöм öшö наряд? Некин сэтшöм нарядсö эз сетлы.

— Мыля сэк сiя талунсянь ытшкыны пондöтчис?

— Сiя пондöтчис, дак сылiсь и юалö. Мыля тi этö менчим... — эта вылын председатель, тыдалö, и мöдiс сувтöтны колана точкасö.

— Не, Яков Терентьевич! Пукалат кö тi кытчöдз юралiсьыс местын, дак тi и висьталö. Или тi дзир местасö занимайтат?

Баитны председательлö подакокувт ытшкöм йылiсь да эшö сэтшöм кыввез бöрсянь, лоис тыдалö, недолыт. Зоотехниклань бокöнмоз пызан саяс пукавтöн, сiя то ли бöрйис ас кежас колана кыввез, то ли думайтiс, кыдз буржыка нiйö горöтчыны, шыасьны паныт эз тэрмась.

Дарья Семёновна, кöда пукалiс сэтöн жö, тыдалö, вежöртiс ни, что Таисья йылiсь басниыс эта вылын баитсис, сувтiс.

— Вашöтiт и вашöтiт. Сэсся оз и лок пермааныт уджалнытö. Ась сэки велöтчыны мунас, металь вылö, висьталö, школасö кончитöм дак.

Не председатель, не зоотехник паныт сы басни вылö эз шыасьö. Сiдз эта чöлöм коста Дарья Семёновна и оськöвтiс порог сайö. Öнi вöлись Яков Терентьевич дзар керыштiс зоотехник ладорö.

— Некутшöм наряд, Светлана Савельевна, подакокултсö ытшкöм вылö бригадирыслö ме и эг сетлы, но... колö бы вежöртны, что подакокултас ми лэдзим медбур видз, а сы улъя бригадаыслö ытшкыны нем.

— Кин тiянлö сымдасö висьталiс, что бригадаыслö ытшкыны нем?

— Бригадир, конешно, кин эшö этася.

— И тi сылö веритат? — Председатель вылö веськыта видзöттöн, зоотехник гажтöма гогинялыштiс юрнас. «Э-хе-хе, Яков Терентьевич, Яков Терентьевич. Кытшöм жö тiянiсь юралiсь, кöр тiян местö унажыксö бригадир соровтö?» — Сiйöн, мый öт кинаныт сетат, мöднаныт сэтöн жö бöр мырддят? Етша эшö, что и ой кежас куканнеслö турунсö од ваялö, дак эшö и подакокувтсö пондöтiт ытшкыны. Надейтчат, натьтö, что эта тiянлö сiдз и чулалас? А мыйлö сэк решеннёсö примитiт?

— А мый керны, Светлана Савельевна? Мый керны, кор тöл кежас подаыслö вердчаныс заптытöм, а ытшкынытö сэсся нем?

— Тырмас бöбöтчыны, Яков Терентьевич. Сiдз, натьтö, ме тiянлö и верита. Тöдат жö кöть, одö, мымда талун колхознöй видззес пасьта асланыс колхозниккеслöн турун зороддэс сулалöны?

— Эг лыддьы. Не менам уджыс. Эта вылö ревизионнöй комиссия эм.

— Тi эд лыддьö, дак ме лыдди. Турунасян страдаыс эз на чулав, а колхозниккеслöн колхознöй видззес пасьта сымда туруныс заптöм, что быдса ферма тöвйöтны тырмас. Не эта увья я быд год колхознöй подасö дзир кулöмсис кыскам? А тi меным эшö висьталат, что ытшкынытö нем да некысь. Одö кö тöдö, мый тiян ныр увтаныт керсьö, дак эта йылiсь и баитны нем. Ог ме сэсся кывзы тiянлiсь баснинытö и öтiк кывлö ог верит. И пондат я ваявны эта бöрсянь ой кежö куканнезлö вердчан да дугдат я ытшкыны подакокувт — нельки ог и юав. Одзлань ни тöда — бöбöтлат.

— Колхозниккеслö ассиныс мыйöнкö тожö колö вердны.

— Ме ог шу — оз. Но эд не колхознöй видззес вылiсь жö керöм туруннас, кöр быд семьялö быдса гектарöн видзыс сетöм. Мыйлö нö сэк абутöмсö баитны, бытьтö колхознöй подаыслö ытшкынытö нем? Светлана пондiс видзчисьны, мый висьталас эта вылö председатель. Но мöдыс, вачкисис, сылiсь баснисö эз и кыв, öзтiс куритны, бергöтiс пышшалан синнэсö öшын ладорö, пызанпöв кузя чуннезнас орстöн пондiс думайтны ас кежас, мыйöн и мыччалiс, что басниыс ны коласын баитсис. Зоотехник сувтiс, сiдз немтöг петiс кабинетсис бöр.

Аслас жырокын ни Светланалö тöдвылас усис, что асывсянь лöсьöтчис Липовскöй фермаö, кытöн эз вöв быдса неделя сьöрна да эз тöд бытшöма, мый сэтчин керсьö. Но быдöнныскöт асывбыт споритöм коста кадыс вöлi торкöм вель уна, а уджалан настроеннё лоис сэтчöдз тшыкöтöм, что кутчисьны эта бöрсянь мыйкö бердö некытшöм охота эз ни вöв. Председателькöт споритöм бöрсянь öнöдз эшö тогзисö ки и кок, и нем коланаыс юрö эз пыр. Сэтчö жö и подакокувтсö ытшкöм кузя мунны Липоваас эз позь. Öнöдз Светлана вежöртiс ни, что не бригадирöс, не председательöс убедитны немын сiя эз вермы. Быдöс вылö, мый бы сiя эз висьтав, нiя и несйыны эз думайтö. А кытчöдз эз берт Таисья, эз позь надейтчыны и йöз отсöт вылö. «Кыдз эшö райкомас видзöтасö? Тожö, батi, быдöс нем туйö пуктасö? А кöть и озö, дак ештасö я эшö эта увья локнытö, да кöр? А подакокувтсö, пондöтiсö кö сiйö ытшкыны, лун кынымöн, сiдз и тöд, пöрöтасö. Сiдзкö, и йöз отсöтсö видзчисьны нем. Колö мыйкö керны. Но мый?..» Эта вопрос вылö зоотехник ответсö эз адззы. Кыдз сувтöтны суточнöй рацион, мед вöлiсö йöв да яй, этö нывка тöдiс бытшöма, но мый керны правленнёись членнэзкöт, кöдна оз тыртö ассиныс примитöм решеннё, эз тöд. Институтскöй программаöн эта эз вöв велöтöм. А сысянь и куканнес дынö, кытöн ытшкисö нылiсь подакокувт, мунны охота эз вöв. Уна я сысянь гажыс, кыдз тэ син одзын бригада бритö-пöвсалö видз, кöда бöрсянь подаыслö мышкыртчынытö лоас нем дорö, а панöвтны этö он вермы? Эд бригаданас юралö бригадир, и мый бы ытшкисиссеслö зоотехник эз висьтав, сылiсь кывсö инькаэс сё ни оз кывзö. Сiйöн бöр куканнес дынö зоотехник и эз тэрмась. Павжун бöрсянь сiя пукалiс пызан сайын, керис неделя сьöрна чукöртчöм удж. Дзир рытъявыв, кöр правленнёас некин эз ни кольччы, нывка вöлись иньдöтчис кукань карта дынö.

Подакокувт дынас матö сибöтчытöн зоотехник казялiс, что лунтырнас ытшкисиссез куим-нёль покосöн ештöмöсь вуджавны видз мöдöрöдз — нёльöт торыс вöлi ытшкöм. Часöт инькаэз пукалiсö йöр бердын, шоччисисö. Куканнес жö, кöдналö сёйны тырмис кытчöдз ытшкытöм местаас, сё эшö бергалiсö асланыс карта весьтын.

«Ылöстöмöсь тi, ылöстöмöсь. Од и думайтö, что лун кыным бöртi и эстöн тiянлö сёйнытö лоас нем», — зоотехник вуджис йöр мöдöрас, сувтчывтöг иньдöтчис куканнез дынö, кытшöвтiс быдöннысö сай ладорсянь, негорöн тпручöкайттöн, иньдöтiс видз шöрö.

Мыйкö дырна нiя эшö кежласисö. А кöр кынымкö ыджытжык порозок петiсö быдöнныс одзö, панлавны да вашöтны сэсся нiйö эз ни ковсьы. Видз шöрöт вердчытöн табун пондiс кыссьыны одзлань. Сэк и ытшкисиссес тожö сувтiсö, пондöтiсö виль покос.

Чожа куканнезлöн табун сибöтчис ытшкас бердöдз, но ытшкöмыс вылö вуджны эз ни понды, рознитчас сы дорöт омöн видз пасьта. Му бердöт литовкаэзöн öвтышалöмсянь нiя эз полö, сёйтöнняныс горöн пишкайттöн, сибöтчисö зэв ытшкисиссез бердöдз. Инькаэз пондылiсö тпручöкайтны да öвтышавны киэзнаныс, но вашöтöммес местö пелитчисö-пырисö мöдiккез.

— Эта нö мый сэтшöмыс? Оз эд сетö уджалнытö?

— Кежöт, Светлана, куканнетö. Дöс эд, видзöт жö, ытшкöмсö талясö.

Сорны ытшкисиссезлiсь удж эта вотöдз зоотехник и эз думайт. Но öнi, кöр сiя адззис да вежöртiс, мый шогмö сы син одзын, подакокувтсö ытшкöм понда бригадир да председатель вылö лöгувья гажмыштiс.

— Ог и думайт. Ась тальöны. Ме тiянлö эг тшöкты ытшкыны.

— Норасям эд бригадирыслö.

— Мунö, норасьö. Ме сыись сымда жö пола, мымда сiя меись.

Дас кыным ытшкисись коласын адззисисö и сэтшöмöсь, кöдна сувтiсö зоотехник дор. Неыджыт вывтыра, сьöдыник, кыз, дзик пыкöса тырпа да югыт сина Öлдöть — партийнöй секретарьлöн иньыс, инькаэс басни коласö бытьтö кысянькö боксянь горöтчис:

— Мыйлö нö вöлi бригадирыслö подакокултсö ытшкыны, лэдзисö кö сэтчö куканнезнысö? Нылö эд тожö колö мыйкö сёйны. Эд висьталiсö жö сылö асъяпоннас, что эстiсь керöм турунсö оз примитö.

Сэк вöлись бригадирлöн иньыс, ылын не Прокопий Егорович кодь кöс ватшкан, кöдалöн, кажитчис бы, и вешьяныслö видзсьыны нем бердö, а мича рожабана, öдöм вывтыра, дзик век сьöрна тыра да мöс кодь жаг — тальччö и оз — Матрен, нузгöмöн быдöнныс одзын горöтчис:

— Мхунам гхорттэзö, инькхаэз. Нхнем эстхöн весьялнытö. Ась хнiя хвидзныс понда ас кхоласаныс пхоннэз моз пхурсьöны. Миянлö схетчöдз дело абу. — Ачыс сiя медодз лэбтiс чышкытöм литовкасö пизь мешöк кыза пельпон вылö, бергöтчис петкöттöм покос дорас, паськöм увтын пымалöм увья недолытсянь гыр кодь коккесö паськöлöн вештавтöн, жагвыв иньдöтчис быдöнныс одзын деревня ладорö. Сы бöрсянь чожа керисö сiйö жö и мöдiккез. А гажмыштöм зоотехник чöлöмöн видзöтiс ытшкисиссезлö бöрсяняныс, ас кежас думайтiс: «Вот тай кытöн лекарствоыс вöлöм».