Льöмпу да таг

Кытшöм деревенскöй коми морт оз быдты аслас карчйöрын таг? Висьтавны кö сэтчö жö, что медбытшöм няньсö горпод вылас кöркö пöжавлöмась майöв сорöн, кöда керöм тагись, а ырöшсö и öнöдз эшö радейтöны юны тагьяö. А веритны кö медицинскöй литературалö, дак тагыс, кыдз быдмас, эшö и целебнöй. Пондыны кö, шуам, юны мортыслö веськöтчöм могись тагись ва вылын сулöтöм настой, этасянь сiя и сёйны, и узьны пондас бытшöмжыка.

Сiдзкö, бытшöма керö коми йöз, что вöдитö аслас карчйöррезын таг, кыдз колана быдмас. Эд керлiсö этö эшö миян предоккез: айезным да деддэзным. Öнi вöдитам-быдтам ми. И позьö надейтчыны, что и миян бöрсянь олiсь отир пондас керны сiйö жö.

Но тагыс отирлöн шогмывлö быдкодь. Кинлöн, видзöтан кö, и басöк — и плетьыс таг шестыс кузя, кыдз баитсьö, лöзöн бергöтö да ырöпöн быдмö-лэбтiсьö, и голиыс ар кежас чунь кузя да сырк öшалö. А кинлöнкö, ордчöн сэтöн жö, и ачыс ас вылас оз вачкись, нельки видзöтны нем вылö. Городас овтöн, кыдзкö и ме ас керку дынö тагсö тожö садитi. Местасö бöрйи асывлапöвсянь, дровяник бердö, кытчö етшажык сидзис тöв. Бытшöма лöсьöтöм муын и вужжес кутчисисö тожö бытшöма. Öдззис таг вашöтны вывлань ассис плеттесö да каттисьны сувтöтöм шесттэз гöгöр. Видзöта ме, кыдз сiя лунiсь лун лэбтiсьö сё вылынжыка, да радуйтча ас кежам: эшö, мыся, öтiк быдмас садам содiс. Лэбтiсис таг дровяник сувдöн, адзза, и цветитны пондöтчö. А эстöн беда. Пондiс сiйö öсилейтны-сёйны кытшöмкö гаг. Öтiккез сылiсь листсö, кыдз пож керöны, сёйöны. Мöдiккез сiйö жö эшö и трубкаö каттьöны да сэтöн поздiсьöны. Куимöттэз — нельки небытик плеттесö, томувья эшö, сöскöны да орöтöны. Этасянь ар кежас таг вылын голиыс то чуньпон кодь шогмыштас, а кöр, видзöтан кö, и сэтшöмыс абу. А сэтöн эшö кытшöмкö баг вувтас да сiйö, абутöмкодьсö, кöда и ас вылас кодьöн оз вачкись, быдсöн пöдтас-нильзьöтас. Вот тэныт и таг. Öтiк смех, сэсся нем.

Мырси ме сiдз год, мырси мöдiкö. А сэтöн сетiсö меным путёвка курорт вылö, и сюри ме Казаньö.

Санаторияс, веськöтчытöнням ни, усис кыдзкö меным пантасьны аслам землячкакöт, Бажинскöй школаись велöтiсь А. А. Баяндинакöт. А кыдзкö басни коласын Анна Александровна юöртiс, бытьтö бы санаторийын шоччисиссес ваялöны Казанка ю сайись таг. Колö пö и миянлö тожö ветлыны. Ме медперво кöсъяси видзöтчыны öтнам. И вот...

Кытшöмкö лунö павжун бöрсянь босьтi сьöрам полиэтиленовöй сумка, иньдöтчи Казанка ю сайö.

Кошшисьнытö ковсис нач недыр. Висьтавны веськытжыка, дак некытшöм кошшисьöм эз и вöв. Мунi ме сiдз километр ылына санаторий дынсянь. А кöр сюри вöрöдз, пондi нёджжасьны öтмöдöрö туй боккезöт.

Öтiклаын, зэв туй бердас, усис меным син вылам ыджытся-ыджыт льöмпу. Дыныс му бердсяняс ведрася кызжык ни, а ачыс вылынанас дас метрся джуджытжык лоас. Миян местаэзын, нельки пöрись льöмпуэз коласын, сэтшöммес етша пантасьлöны. И ягöдыс льöмпу вылас омöн топ нять öшалö, кыдз бытьтö некин сы бердö öнöдз абу и сибавлöм. Но мый дивуйтiс эшö этася öддьöн, дак этö льöмпуыс бердö каттисьöмöн быдмöм таг.

Мусис, аслас вужжез бердсянь, тагыс вöлi петалöм нач не льöмпуыс увтсянь, а ордчöн сыкöт лэбтiсьöм петшöр колассянь. Но метр да джын сувдöн быдмöм бöртi петшöрсö сiя одзалöм да вермöм судзöтчыны лажмыта öшалан льöмпу уввез бердö. Вель дыр каттисьöм таг ны коласöт, кытчöдз абу сибалöм льöмпуыс ствол бердöдз. Эстöн вöлись, öтмöдöрö кежласьтöг ни, дзир льöмпуыс гöгöр каттисьöмöн, и öдззöтчöмась таг плеттез вывлань. Джуджыт-джуджыт вöлi уна годся ни, пöрись льöмпу, а тагыс öтiк годнас ештöм быдмыны эшö джуджытжыка. Сылöн плеттес лэбтiсьöмöсь куим-нёль метр сувдöн льöмпуысся вылынжыка. Но сiдз кыдз видзсьынытö одзлань лоöм нем бердын, нiя кутчисьöмась каттисьны ас коласын, кусiньтчöмась пу йылыс бердсянь увлань да сiдз и кольччöмась öшавны увлань кык-куим метр кузьöн. Эта вылын ме нiйö и вöтi.

Оз позь не висьтавны эстöн и таг голи йылiсь. Воöм ни сэк кежö, вежкодь-зелёнöй рöма да чунь кузя, кыдз кöз голи, сiя силь видзис, öшалiс, топ рисуйтöм картинка вылын. Эта вотöдз отирлiсь тагсö ме адззывлi быдкодьö ни. И бытшöм-басöк голиаыс мукöд годö öтi-мöдiклöн пантасьлiс. Но сэтшöмыс, кытшöм öшалiс сэк ме одзын вöрас, пöрись льöмпу гöгöр быдмöм-шогмöмыс, нельки вöтöн адззывлыны меным эз усьлы.

Важын ни колiс бы, натьтö, кайны льöмпу вылö, мынöтны да лэдзны таг плеттесö увлань, а сэсся пондыны готтисьны. Одзлань и адззи, и вежöртi, что уджыс эстöн меным тырмöмви, кöдö öтiк час сьöрна он кер. Тöдi и сiйö, что мöдiк лун кежö этö уджсö ме сё ни ог коль. Инми кö сэтшöм колана тор вылö, простöн бöр ог берт. Сiйöн, кадсö öштытöг, колiс бы кутчисьны удж бердö. И ме тоти жагвыв öтiк местаын, льöмпу увтас, юрöс чатыртöмöн видзöтышалi вывлань, дивуйтчи, дивуйтчи... Дыр мыйись эта тотьöмлöн могыс лоис и аслым вежöртана. Менам петiс полöм кутчисьны удж бердö. И полi ме не сыись, что ог вермы кайны льöмпу вылö да лэдзны увлань таг голиöн плеттесö, и не сыись, что кера этöн мыйкö нетуянаö, не-е. Полöтiс менö нач мöдiк тор. Эд лэдзны кö пöрись льöмпу бердiсь сэтшöм басöк виль голиа выввежöт, сiя лоас кыдз нагöлеч чöвтöм. Да и ачыс таг голиыс, кöда öнi, öшавтöнняс, сiдз гажöтö синбур, не менö, не кинöс мöдiкöс гажöтны сэсся сiдз оз ни понды. Сiя оз ло.

Дыр мыйись льöмпуыс вылö ковсис сё жö кайны. Кадыс эз видзчись. Сэк кежö и шондiыс бергöтчис рытывлань ни да дзик калькалiс аслас медвылын местаись, öдззöтчис увлань. Но нельки сэк эшö ме аслам колана удж бердö эг кутчись. Öнi бöра ме син одзö усис воöм льöм, кöда йылiсь, тагсö казялöм бöрсянь, ме кыдзкö вунöтчи ни. Сiйö пöттöдз сёйöм бöртi, ме, вöлиськö, кутчиси медколана удж бердö: неыджыт, но лэчыт пуртокöн, кöда вöлi сьöрам, орлалi таг плеттез, рази-мынöтi нiйö льöмпу бердiсь да лэдзалi увлань.

Кöр эта уджыс лоис керöм, лэдзчи бöр льöмпу вылiсь, чукöртi лэдзöмсö быдöс öтiк местаö, кутчи готтисьны. Но эта удж коста вывлань, пöрись льöмпу вылö ме нельки öтпырись и дзар эг кер. Видзöтны öнi сы вылö петiс полöм, кыдзкö совесть эз тырмы. И вöлись сэк, кöр колана уджыс лоис керöм, а готтьöм таг голисянь мешöкö пöртчис бытшöма польдöм, зумыт подушкаö, и меным сэсся нем эз кольччы, кыдз бертны бöр, сё эшö полöмöн, дзир öтiк синугöвнам да перыта дзар керыштi сё жö вывлань. Кульöм-чöвтöм льöмпу, кöда сулалiс лöня, гажтöма да вöрöтчытöг, мыччассис, что и былись горзö. Но...

Öнöдз ме эшö эг юöрт лыддьöтiсьыслö сiйö медколанасö, кöда увья пондöтöм эта рассказ.

Сiя жö лунö, тыра сумканам ни, шондiыс пуксьытöдз, ме ештi эшö кежавны не öтiк местаö да адззыны аслам землячка понда таг, кöдала ми ветлiм сыкöт этна жö местаэзö сёрöнжык, мöдiк лунö ни. А мый усис казявны эта коста öткодьсö да мый некыдз эз вермы не усьны син вылö, дак этö то мый. Кыным таг быдман местаö бы ме эг сибав, быдлаын сiя быдмис дзир льöмпу бердын. Некысь и öтiклаись эг адззыв, мед таг каттисис кытшöмкö мöдiк пу бердö нельки сэк, кöр этна мöдiк пуэс, ловпу, шуам, пипу или бадь, быдмисö матынжык таг бердас, то ли зэв. Ны дынiсь, быдöнныс дынiсь таг пышшис сiдз жö, кыдз кыссис льöмпу бердö. И мый эшö эстöн позяс висьтавны интереснöйсö, дак этö сiйö, что öтлаын быдмöм коста не тагöс, не льöмпуöс эз сибöт некытшöм вредитель-гаг. А урожайыс кыкнанныслöн сы коста вöлi кыдз сказкаын. Интересно эд? Эшö бы не... Дак мыйын сё жö эстöн делоыс?

Лыддьöтiсь, думайта, тöдö сы йылiсь, что быд пулöн да кустарниклöн, а öтiк кылöн висьтассяс — быд быдмаслöн аслас дук. Наукаын нiя шусьöны фитонциддэзöн. Унажык пуэзлöн, кустарниккезлöн да туруннэзлöн тожö, дукыс öддьöн колана морт здоровье понда, сiдз кыдз сiя вийö асьнас сьöкыт шогöттэзлiсь микроббез. Эта увья и баитсьö, и гижсьö пыр да быдлаын сiдз, что вöрас руыс, кöдöн ми лолалам, унаись сöстöмжык, ежели, шуам, деревня вылын то ли городын.

Эм аскодьöм дукыс и льöмпулöн, кöдö оз вермы терпитны да кöдасянь локтö кувтöдз нельки шыр. Вежöртана, что эм аскодьöм дук и таглöн. Вредитель-гаггес нылöн быдыслöн тожö асланыс. И эм кö, шуам, кытшöмкö вредитель льöмпулöн, кöдалö сылöн дукыс нем туйö, то таглiсь дуксö сiя терпитны оз вермы. Эм кö кытшöмкö вредитель таглöн, то льöмпулiсь дуксö сiя тожö оз терпит.

Кытшöмкö кадö вежöртасö этö и льöмпу да таг. И мед нылö кокнитжык вöлi дорйисьны асланыс вредителлез шогья, одзлань кежö ас коласын нiя и «баитчасö» сiдз – быдмыны да овны öтлаын. Сiдз эта бöрсянь природаас и эм. Петас, шуам, кытчöкö льöмпу, лэбтiсяс кынымкö метр сувдöн, а сы сьöрö, видзöтан кö, и таг кыссьö. Сэксянь нiя пондöны быдмыны да овны öтлаын. И пондыв сэтöн сибöтчыны ны дынö кöдалöнкö вредитель-гаг. Этаись öнi нем оз ни пет. Пондылас бы сiдз сибöтчыны льöмпу бердö яблонялöн моль-бабыв, мед поздiсьны, да ордчöн быдман таглiсь дуксö терпитны оз вермы. Бергöтчас сiя бöр льöмпуыс дынiсь да сiдз, нем сорöн, и лэбзяс. Сибöтчас бы таг бердö турун бабыв, кöдалöн гусеницаэс таг листнас вердсьöны, да кылö бабыв, что льöмпулöн дукыс сiйö пондö пöдтыны. Этасянь зэв тагыс дынöдз сiя и сибöтчынытö оз лысьт.

Быдöс висьталöмыс вачкисьö сказка вылö. Но эта абу сказка. Эта оланiсь быль. И мед лыддьöтiсь эз примит сiйö бöбöтчöм туйö, одзлань висьтассяс эшö то мый йылiсь.

Льöмпуэс менам аслам садын тожö быдмöны. Садитi ме нiйö вöрись вайöммезö эшö учöттэзöн. И быдöс вöлi бур сэтчöдз, кытчöдз нiя эз пондö цветитны. Но кыдз только сибöтчис цветитан кад, сэксянь ны вылö и уськöтчис быдкодь вредитель-гаг. Медодз бöра сiя жö моль-бабыв. Но бедаыс эта вöлi не только менам садын да менам льöмпуэзкöт.

Не öтiк год сьöрна ни, быд гожумö, городiсь отир саддэзын эта вредительыс овлö вель уна. Сьöд точечкаа чочком борда поснитик бабыв лэбтiсьö борддэз вылö августнас. Сы коста жö сiя тэчö льöмпу вылö ассис кольттез. Не гожумся жар, не тöвся мороз кольттесö оз тшыкöт — не оз сот, не оз кынт. Сiдз нiя пуэс вылын и тöвйöны.

Тулыснас, шоныт погоддя коста, кöр потö льöмпу вылын пугыр, этна тöвйöм кольттезiсь петöны личинкаэз да пондöны вердсьыны том да небытик льöмпу лист вылын. Сы коста жö нiя эшö и поздiсьöны, каттьöны быд улоксö тшöкся-тшöк везöн, керöны сыись аскодьöм кошель. Сэтчöдз мукöд коста каттясö беднöй льöмпуöс, что эта вез коласiсь и öтiк улок кодьöн оз тыдав. Эта коста льöмпу нельки ас вылас оз вачкись. Сiя мыччассьö дзик саван увтын. А сы пытшкын личинкаэзiсь гусеницаэзöдз ни пöрöм гагыс сымда шуксьö-пуö-вöрö, что эта вылö нельки видзöтнытö полöм петö. Эстöн нiя и вердсьöны лун и ой, дугдывтöг йирöны-вильöтöны льöмпу листсö быд ладорсянь. И нем нiйö оз полöт, некытшöм управа ны вылö оз адззись. Быд ладорсянь тшöка каттьöм везыс полöтö нельки кайезöс. И сибöтчыны матö сэтшöм пу дынö нiя оз лысьтö. А кытчöдз эта мымда гусеницаэз вердсясö быдöнныс эта льöмпу лист вылын, сэк кежö сыись и нем дукыс, овлö, оз кольччы. И видзöтан сэк сiдз беднöй льöмпу вылö, а сылöн гожум шöрнас не лист, не ягöд — нем торыс абу, кыдз кöс рос сулалö. А кöр эта мымда гусеница пöртчас медодз куколкаö, а сэсся эта куколкаись петас да лэбтiсяс борд вылö бабывлöн виль поколеннё, сiя овлö сэтшöм уна, что вачкисьö лэбавтöнняс лым усьöм вылö. Этö сiя вились кошшö льöмпуэз, мед вились тэчны ны вылын кольттез мöдiк год кежö. И сiдз годiсь год.

Пессьыны эта вредителькöт öддьöн сьöкыт. Кыдз вылынжык вöлi висьталöм ни, сы каттьöм поз дынö кайыс оз сибöтчы. Мыйöнкö киськалöмöн поз пытшкись сiйö тожö он судзöт. А видзöтны саваналöм нето росö пöртöм льöмпу вылö — гажыс етша, кöр матö сы дынö и сибöтчыны кодьöн оз позь. Эта увья не öтiк сотня мымда бытшöм да басöк льöмпуэз город вывсис саддэзiсь медбöрья годдэзö лоисö кералöмöсь.

Эта жö судьба, натьтö, видзчисис льöмпуэсö и ме садын. Ась нiя вöлiсö эшö и учöтöсь, эшö и видзöтнытö кодьöн нем вылö, а гожум кежö вит-квать гагпоз ны вылiсь сё ни казялан. А сэтöн эшö уськöтчис ны вылö тля, кöдасянь тожö некытшöм спасеннё абу. Ештас сiдз оссьыны пугыр да вöрзьыны быдмыны виль улок, а сы вылын, видзöтан, вредитель-гагыс сьöд только пукалö да соксö пичкö-нималö. Сэтчöдз быд улоксö вильöтасö, что этасянь сiя гардсяс-чуклясяс öтмöдöрö, а быдмынытö одзлань сiдз и оз вермы.

Сiдз и чулалiсö год бöрын год, а дзезмöм льöмпуоккез одзлань эз мунö. Вот сэк вот меным и усис тöдвылам Казаняс льöмпулöн да таглöн öтласа быдмöм.

Лöсьöтi ме öтiк льöмпуок бердын места: бытшöма гарйи сы гöгöр му да сорлалi сiйö пильнöй чагöн. А сэсся гарйи да вайи вöрись таг вужжез, садитi нiйö льöмпуок гöгöр. Вужжес кутчисисö. И ась медодзза годö нiя лэбтiсисö не öддьöн вылына, надейтчыны одзлань кежö лоис мый вылö.

Мöдiк тулысö эта льöмпуок бердiсь яблоня мольлiсь позсö ме и öтiкö эг ни пантав, а тагыс ладорсянь льöмпу уввез бердiсь öшис и тля.

Сувтöтöм шесттэз бердöт ар кежас бытшöма лэбтiсис таг да сетiс медодзза басöк урожай. А гожумбытнас сы листтэз вылiсь и öтiк вредитель-гагöс эг казяв.

Эз мöд кольччыны сiя годö таг сьöрись и льöмпу. Ась сiя годö ягöдыс сы вылын и эз вöв уна, но дзезсялöмсис, кöдöн сулалiс уна год сьöрна, сiя петiс: öтiк годнас тагыс сьöрö быдмис вывлань быдса метр сувдöн. Этасянь сорасьтöг позьö висьтавны, что быдмöны кö нiя ас кежаныс природаас öтамöдкöт öтлаын, то быдмöны сiдз не весь — нiя бытшöма отсасьöны öтамöдлö. И колö кö, мед кинкö садын бытшöма быдмис льöмпу — садитö сы бердö таг. Колö кö кинлö быдтыны бытшöм таг — садитö сiйö льöмпу увтö. Бöбöтчытöг висьтала — од сорасьö. Быдкодь вредителлез шогья льöмпу да таг пондасö дорйыны öтамöднысö асьныс, и лоас сэк нылöн бытшöм урожай.