Вельмöм кöч

Велöтчан годдэзö петалiс ме оланын сэтшöм кад, кöр ме быдса год сьöрна эг ветлы школаö. Вöлi эта тшöтш война бöрсянь, кöр не сёйны, не юны, не кöмавны, не пасьтавны нем бытшöмика менам эз тырмы.

Нёльöт классö кончитöм бöрсянь арвыв менам ёрттэзö мунiсö велöтчыны одзлань. А меным ковсис чапкыны одзланься велöтчан да пондыны уджавны колхозын. Вежöртана, натьтö, кытшöм вöлi меись, дасöтiкгодсяись, уджалiсь. Но воштiсьнытö этася вöлi некытчö, кыдз верми, ковсис уджавны.

Уджалi ме вöлöн. Тöвбыт сьöрна ваялi фермаэзö вердчан: турун да кöрым, гунадорö кольтаэзöн сю да сэтчин жö — öвиннэз шупöтны пес. А тулыснас, кöр сибöтчис кöдзан кад, öтлаын пöрисьжык ёрттэзкöт, ме петi пинявны.

Неделя кык-куим сьöрна, а батi, и дыржык кыссис тулысся кöдзан кад. Быд лунö одз асывсянь ме тэчлi сьöрам пестерокö павжун да иньдöтчывлi вöв карта дынö. Сiйö жö керисö и мöдiк гöрись-пинялiсь отир. Сэтчин ми кутавлiмö ассиным вöввез да петавлiм лунтыр кежö ыб вылö. Гöриссез миян одзын гöрисö. Кинкö стариккез коласiсь чапкис гöрöм му вылö кöдзсян кудсянь сю, кöдзис. А кöдзöмыс бöрсянь ми пинялiм. Уна быдкодь ыб вылын деревня гöгöр ковсис вöвны миянлö этöн каднас. А кöдзансö кончитiм Чугуныбын. Сiдз миян шусис öтiк ыб. Сiя эшö арсянь вöлi гöрöм-кöдзöм öзим увтö. Но тулыснас ыб шöрöттяс, кытöн местаыс вöлi вылынжык да чожажык сылiс лым, öзимсö тшыкöтöм ойтöв. Сiйöн öнi этö местасö ковсис гöрны да кöдзны мöдпöв. Вились гöрöмыс кузя кöдзисö зöр, а миянлö кольччис пинявны. Эта понда кыдзкö одз асывсянь куимöн ми сэтчö и локтiм.

Эстöн мекöт и шогмис öтiк небытшöм история, кöда, кыдз оланiсь аскодьöм урок, кольччис тöдвылын пыр кежö.

Межа дорас ми юскисьлiм, мед кыминьтны ассиным пиняэз, кöднö вайим сьöраным няридзтöг, гатш бергöтöмöн. А кöр доддясим бöр, сэтöн жö и кутчисим удж бердö.

Кынымкö кытш бöртi ни, ветлöмлöн сайись дорас бергöтчытöн кинкö миян коласiсь тпрукнитiс ассис вöв, мыччалiс кинас öзим сайись межа ладорö да юöртiс:

— Видзöтö жö, челядь. Эта мый сэтчин бель видзö?

Куимнанным öткоста, ми дзар керыштiм öзим сайись межа ладорö, кытöн и былись мыйкö видзис бель, дзик сывтöг кольччöм лым. Пыд вöр коласын эта коста лымыс и былись эшö пантасьлiс. Но эстöн, осьта ыб вылас, лонытö сэтшöмыс, вежöртана, эз ни вермы. И былись. Недыр мыйись усис вежöртны, что этö сё жö не мый, а кин, сiдз кыдз чочком комокыс вöлi ловья да вöрöтчис. Кадiсь кадö сiя сувтöтлiс кузь пеллесö да лэбтышалiс вывлань юрсö, тыдалö, кывзiсис да видзöтчис. А мукöд коста сiя жö, неылö кöдöрöкö чеччöвтöмöн, вежлiс одзза местасö. И эстöн ми быдöнным вежöртiм, что эта не кин-нибудь, а кöч. И ась лымыс гöгöр эз ни вöв, сiя мылякö ассис тöвся пасёксö вежнытö эшö абу на ештöм, öнöдз вöлi чочком. Дивуйтiс миянöс и сiя, мыля кöчыс сэтшöм повтöм. Эд важын ни пондöтчис югыт лун, вель вылына öшалiс ыб весьтын шондi. Уджавтöн и ми горöн баитiм ас коласын да кадiсь кадö горöтышалiм асланым вöввез вылö. Не кывны да не казявны миянöс кöч некыдз эз вермы. А сылö, пиньöла синлö, кöть бы мый. Пукалö сiдз аслыс осьта ыб дорас да мурскö-сёйö небытик öзимсö, бытьтö сiдз и колö.

Чöвны, вежöртана, ми эг вермö. Куимнанным сэтöн жö кутчим горöтлыны да шутнявны, кин кыдз вермис. Но то ли тöлыс вöлi не кöчыс ладорö да миянлiсь горöтлöм-шутнялöмсö сiя эз кыв, то ли кылiс да, кыдз баитсьö, несйыштны эта вылö эз думайт. Тöдiс, натьтö, что не пон, не пишаль миян сьöраным абу. А кöть бы и вöлi пишальыс, дак лыйöмнас сы ылынасис сiйö сё ни он судзöт. Миян дынсянь межа дорöдззас вöлi не öтiк сотня оськöв ылына. А куш киöн кöчсö кутöм йылiсь нельки думайтны нем. Не весь жö эд эта йылiсь отирас сiдз баитöны, что кутнытö сылöн бöжыс нильыг.

— Вот уж, кывзö, вельмöм дак вельмöм.

— И пельöн эд, видзöтö жö, миян горöтлöм да шутнялöм вылö оз вöрзьöт, — баитiм-керим ми ас коласын да эта вылын кытчöдз и лöньсим. Вöв миян сэк кежö унажык керöм удж, ми бы, натьтö, сувтöтiм вöввезнымöс шоччöтны, а асьным сы коста вöтлiсьöв-керим вельмöм кöч сьöрын. Но уджалан луныс вöлись пондöтчис. Вöввезным мыдзнытö этöн каднас эшö эз ештö. Да и уджыс вöлi керöм эшö нач етша. Миянлö кольччис дзир öтiк, видзсьыны вожжиэз бердын, вöтлiсьны гöрöм му кузя асланым вöввез сьöрын, веськöтлыны нiйö челезнаэз весьтö да тэрмöтышавны ветлöм доррезнас бергавтöн. Сiя жö кадö, сайись ветлöм дорас бергавтöн, ми быд коста дзарышалiм öзим ыб сайись межа ладорö, кытöн вердсис кöч. Эд быд керöм кытш коста миянлö думайтсис, что кöчыс, натьтö, мунiс ни. Но тэрмасьнытö сылö, тыдалö, вöлi нач некытчö. И кынымись бы ми эг сибöтчö сайись ветлöм дорас, сiя сё одззамоз кольччис аслас местаын.

Час кыным бöртi, кöр уль му кузя дугдывтöг пиняэсö кыскалöмсянь миян вöввезным тöдчöмöн мыдзисö да пондiсö пымавны, ми вöлиськö петкöтiм нiйö ветлöм дорöттяс межа вылö, лэдзим йирсьыштны веж турун вылö, кöда сэк кежö шедiс ни пинь коласö. А асьным сiя жö межа пöлöн иньдöтчим ыб увтас, кöч ладорö. Но эг ештö ми сибöтчыны сы дынö и сотня оськöв ылына, кыдз сiя миянöс казялiс. Дразнитöм могись нетэрмасьöмöн пегышасьтöн кöч петiс öзим колассис межа дорö да сайöвтчис том пожумникöн тырöм шутёмок увтö. Но ми тöдiм, что ылö сiя эз мун, кытчöкö сэтчö жö и дзебсисис. А кыдз только сибöтчас рыт, сiя вились петас öзим вылö.

Вот сэк вот ме первуись и думайтыштi ас кежам: «Жаль, что пишальыс аслам абу, а то ме бы мыччалi тэныт, кыдз öзимсö сёйны». Лунтыр сьöрна, кытчöдз ми уджалiм, öзим дорас кöч сэсся и эз мыччась.

Рытнас, удж вывсянь гортö инмим локны öткоста гöриссезкöт. Вöв карта дынын ми лэдзалiм вöввез, а деревня вылас бертны ме иньдöтчи öткоста Васька дядькöт, кöда неважын бертiс фронт вывсянь, а гортын часто ветлывлiс вöравны. Сыкöт ордчöн оськавтöн öнi ме верми ассим полöмöс, юалi:

— Васька дядь, оз я тэнат адззись кытшöмкö пишаль?

— Мый, вöравны охота?

— Кöчöс мöда вийны. Чугуныбись öзим дорас петавлö.

— Эм менам öтiк курковöй. Кежав, видзöтам.

Эта юöрлö медперво ме нельки веритнытö эг лысьт. Кок увтiсь мусö кывтöг ме кежи Васька дядь сьöрö.

Пырны ны ордö керкуöдз ме эг ни понды, гажвевья сьöлöмöн кольччи видзчисьны öтöрись посöдзын. А недыр мыйись Васька дядь петкöтiс меным кöть и важ ни, аскерöм ложаа учöтик да кокнитик курковöй пишаль, висьталiс:

— Вот. Вöравнытö велöтчыны ладно лоас. Быдмытöдззат вöдитан. А сэтчин, ковсяс, дак и вильö босьтан.

Первуись ас оланын ме видзи не орсанаö ни, а быльнöй пишаль, кöдö позис зарядитны да кöдасянь туйис лыйны.

Пишальыс сьöрö Васька дядь сетыштiс меным кынымкö заряд мымда дроб-порох да дас кыным пистон. Эстöн жö сiя мыччалiс-висьталiс, кыдз колö зарядитны. И ась ме лунтырся удж бöрсянь вöлi мыдзся-мыдз, местаын öнi эз ни пукöт. Тэрмасьöмöн ме иньдöтчи гортö, кыдз велöтiс Васька дядь, зарядитi пишаль, да, кытчöдз эз на ешты пемдыны, иньдöтчи Чугуныбö, кытiсь адззылiм кöчöс. Колана местаöдз ме локтi пемдандорас, кöр пуксис шондi да тыдавнытö вöр коласас пондiс умöля ни. Но сьöрам менам вöлi зарядитöм пишаль, и вежöртана этасянь, что некытшöм полöм öтнасöлöн эз пет.

Казьмöтöм ни вöлi, вывланьын шутёмок бердын тэрмасьнытö ме дугдi, бытшöма пондi нёджжасьны ас гöгöр да одзлань. А недыр мыйись и асьсö кöчсö казялi. Кыдз ме асывсяняс думайтi, сiдз сiя и вöлi. Пемдiк кежас пиньöла син вились ештöм петны öзим вылö и öнi, кыдз и асывнас жö, вердчис. Сёйтöнняс кöч кадiсь кадö сiйö и керис, сувтöтышалiс пеллесö, лэбтышалiс недырик кежö юрсö, кывзiсис, видзöтчис. Лым кодь чочком пятноöн сiя тыдалiс ылiсянь, но сибöтчыны матöжык сы дынö веськыта ыб пöлöнняс эз позь. Местаыс вöлi осьта. Томыник пожумоккес, кöдна шочыника сулалiсö шутём пасьта, менчим вöрöтчöмöс бытшöма эз сайöвтö. Матöжык сибöтчöм могись меным ковсис кежны вöрö да керны неыджыт кытш.

Мöдöтпырись ме петi кöчыс вылö шутёмок увтсянь ни. Бур, что сiя сымдасö не эз кыв, не эз казяв, а этасянь и пышшыны эз думайт, вердсис сё одззамоз. И ась сэк кежö ештiс пемдыштны ни да тыдавны пондiс умöльжыка, сибöтчыны сы дынö позис матöжык ни.

Жагвыв, гусясьтöн, ме кысси вöр бердсяняс ыб ладорö эшö дас кыным оськöв ылына, öткаса пожумок увтöдз. А сэтöн, аслам волнуйтчöмсянь перыта тогзян сьöлöмöн лэбтi курок, метитчи мушка пыр да и нырыштi спусковöй крючок вылö.

Косьöвтiс лыйöм. А сылöн говкыс, ой кежö лöньсьöм вöрсö саймöтöмöн, нюжвылöн паськалiс сы весьтöт. Пороховöй тшын мыйкö дырна кежö везъясис ме син одзын. Сы коста жö ме казялi, кыдз ранитöм кöч, сьöкыта бöрсö лэбталöмöн да быд вынiсь, но дженыта чеччалöмöн, котöртiс вöр ладорö. Зарядитны пишаль мöдöтпырись лыйöм понда пемытiнас ме сэсся эг ни пондыв. Тöдi, что ранитöм кöч ылö оз мун. Ме сувтi коккез вылам да нетэрмасьöмöн иньдöтчи сьöрсяняс.

Вöр дорас, медодзза жö кöззэз коласын, кöч усьöм бок вылас, а осьтöн кольччöм синнэзын оланыс эз ни тыдав.

Медодзза жö вöралöм, медодзза лыйöм позис лыддьыны удачнöйöн. И, вежöртана, что эта менö гажöтiс. Öнi меным кольччис дзир мышкыртчыны, лэбтыны му вывсис вийöм кöчсö да и иньдöтчыны тырдозöн гортö. Зарядыс кöчлö инмöм, тыдалö, сюргилыас да бöрись коккезас, сiдз кыдз тшöтш нiя местаэс вöлiсö вирöсьöсь. И кöр ме мышкыртчи, мед лэбтыны ассим добычасö, сэтöн жö казялi, кыдз то ли вирыссянь, то ли сы дуксянь, менам перыта пондiс бергöтчыны юр; сiйö и видзöт — бырас садь кок йылiсь усьтöдз. И уси бы, натьтö, садьтöг, не бергöтчыны кö вирöсь кöч дынiсь перыта бöр да не вештыны ылöжык сы дынiсь.

Юрöс вывлань чатыртöмöн лапья кöз увтын пукавтöн, дыр мыйись ме сё жö вежöртi, что кыдз асьсö вирсö син одзын, сiдз и сылiсь дуксö терпитны ме ог вермы. Сiдзкö, некытшöм вöралöм йылiсь одзлань кежö меным и думайтны нем.

Дыр мыйись ме сувтi коккез вылö, босьтi бедь местö ассим пишаль да, вийöм кöчлань дзар кертöг, простöн иньдöтчи гортö. Эта вылын пондöтчис и кончитчис менам вöралöм. Сiя кадсянь талуннявиöдз чулалiс нёльдас годся унажык ни, но не йöзлiсь, не ассим пишальсö киö сэсся эг ни босьтлы и некинöс ловьясö, не зверьöс, не кайöс некöр эг вий.