Глава IX

Ассяняс сетöм кыв бригадир видзис бытшöма. Кыдз висьталiс — сiдз и керис. Не сiя лунö, не ашынас куканнезлö турун сiдз и эз вай. Сiйöн Таисья одззамоз ытшкис подакокувт, кыскалiс ношаэзöн ачыс. Бур кöть сiя, что тальсьыны этöн каднас подакокувтыс эз ешты, ытшкынытö адззисис мый, да и пыртлыны ытшкöмсö эз вöв ылын.

Пессьыны вердчансö ваялöм понда колiс бы медодз аслыс зоотехниклö. Эта сылöн удж и нянь. Сылiсь эта понда медодз и юассьö. Таисьялöн удж — вердны пода, вердны сiйöн, мый сетасö. Но кыдз нарошно, этна луннэзö зоотехникыс гортын эз лöсяв. А кадыс эз видзчись. Сiя мунiс, визывтiс, кыдз визывтö чуннез коласöт ва. Нывка вежöртiс, что бригадир дынö туйсö тальöмыс сылö нем оз сет. А правленнё посöдзын басни бöрсянь и председатель вылö надейтчыны вöлi нем. Но тöдiс Таисья и сiйö, что кольны кö öнiсянь быдöс, кыдз эм, бöртiжык сiйö он ни бергöт, сiдз быдöс важмоз и кольччас. И öвтыштны эта вылö киöн сiя и öнi эшö эз думайт. Сэтчö жö правленнёыслöн решеннё примитöм, и кутчисьнытö вöлi мый бердö. Буржык вылö надейтчöмыс нывка ылöсын эз на кус.

Нёльöт рытас, кöр ой кежö ытшкöм турун карта вылас вöлi пыртлöм ни, а куканнез йöртöмöсь, Таисья иньдöтчис гортö. Вердчан йылiсь быдкодь думаэз коласын сылö тöдвылас усис партийнöй секретарь. «Былись эд, май. Кыдз эта меным перво жö юрам эз пыр? Сiя жö медодз ме дор сувтiс», — дивуйтчыштiс нывка гажвевйöн, кежис.

Степан Васильевич керку дынö Таисья сибöтчис сэк, кöр мöдыс лэбталiс сарайö межа вылiсь куртöм турун.

Таисья сувтчыштiс карта угöв весьтö. Сы бердсянь улица пöлöн вöлi гöрдззöм кöзовöй ён стынинникись метр кык сувда стын, кöда коласöт (сiдз мыччассис боксянь видзöтiкö) нельки гутлö лэбзьыны эз позь. Нывка здоровайтчис, пондiс видзчисьны, кöр партийнöй секретарь коляс кисис вилаэз, петас паныт да, то ли рочалас пырны керкуö, то ли тшöктас пуксьыны (лунтырся удж бöрсянь нывкаыс вöлi мыдз) кытчöкö посöдз гöгöрас, да висьтасьны, кытшöм мог вайöтiс сы дынö эта сёр рытся кадö. Но кыдз усис вежöртны сэтöн жö, керны сымдасö Степан Васильевич абу и думайтöм.

Дыр мыйись, кöр юр кыным мымда чукöртöм туруныс лэбтассис, вилаэсö кисис лэдзтöг партийнöй секретарь оськöвтiс матöжык нывкаыс весьтö, сэк вöлись горöтчис:

— Ме дынöдз мыйкö?

— Да, Степан Васильевич. Баитöм могись ме...

— Но баит, локтiн дак. — Öнi вöлись партийнöй секретарь лэдзис кисис стын вылас, нывкаыс юр весьтö вилаэз. — Ме кылза. — Нёджжöвтыштiс бöрас, иньыс ношаöн вайöм турун вылö.

— Стын пырйöнняс я мый я?

— Да баит, кылö эд...

Таисьяöс некин эз вид, некин эз горöтлы, некин эз нимкодяв. Нач мöднёж — паныт сыкöт здоровайтчисö, паныт сылö сибöтчисö, тшöктiсö висьтасьны аслас мог йылiсь, лöсьöтчисö кывзыны. Но вöлi бы унаöн буржык, кутiсö кöбы сiйö эта коста видны да нимкодявны, ежели кывзыны сы шог йылiсь кык метр сувда стена кодь стын пыр. Видöм-нимкодялöм вылö, ло сэтшöмыс былись, паныт Таисья горöтчыны тöдiс мый. Но мый сiя вермис керны стена кодь стын сайсянь сылiсь баснисö кывзöм вылö, кöр одзлань ни, эшö висьтасьтöдззас, и адззис, и вежöртiс, что сылöн басниыс партийнöй секретарьлö оз ков и нем бурсö да коланасö сылö оз кöсйы. Охота лоис сьöвзьыны, öвтыштны киöн, бергöтчыны да и мунны бöр. И дзир аслас неважынся надейтчöмыс, кöдöн сiя локтiс, надейтчöмыс, что партийнöй секретарь (ась и стын пырйöт басни бöрсянь) мыйкö вермас вежны буржыклань, бöр мунны эз сет. «А сораси кö? Вдруг висьтасьöмыс бöрсянь партийнöй секретарь сэтöн жö горöтчас: «А, ноко, ветлам часöт жö предыс дынö», нето «Эн тöжды, Таисья. Мун да шоччись. Ашын кежö, сiдз и тöд, куканнетлö турунсö ваясö». А, батi, сэтöн жö вунöтас аслас вилаэз йылiсь, лöгувьяс нильыштас сапога кокнас биöн шупкöм сигаретасö, кыдз эм, ременьтöг, шапкатöг, топ-топ кыдз шолоховскöй Нагульновыс жö, революционнöй биöн сотчан сьöлöмсянь öгралан синнэзöн, уськöтчас деревня кузя бригадир дынö, мед вовлыны оча морос да пыркнитны сы юрись неколана спесьсö. Эд вермисö жö, вермисö кöркö сiдз Нагульноввес сулавны колхознöй доброыс понда, а öнi?..» Öтiк сысянь ни, аслас надейтчöмсянь, что часöт и былись вермас лоны сiдз, сiя восторгсянь, гажсянь да счастьесянь, кöднö нывка видзчисис партийнöй секретарь отсöтсянь, сылöн одзлань ни сöдзисö синваэз.

А эта коста Степан Васильевич, нывкаыслö отсыштöм могись, решётка кодь стын сайсянь горöтчис:

— Баит, Таисья. Ме кыла, — нёджжöвтыштiс вывлань, ас кежас содтiс: — Кымрасьны вот пондöтчö, бöра, натьтö, зэрас.

Партийнöй секретарьлiсь бöрья кыввесö Таисья аслас ылöсöн вынсьöтчис не примитны, кыдз позис, дженытика юöртiс быдöс йылiсь: что öшталöм пода увья зоотехникыс этна луннэзö гортын абу, бригадирыс турунсö оз ваяв, председатель, вачкисьö, сы дор жö, бригадирыс дор, а куканнес ойезнас, кыдз и одзжык, тшыгöсь.

Минута кыным сьöрна чулалiс чöлöмöн. А одзлань, быдöс местö, мый видзчисис сысянь Таисья, мöдыс юалiс:

— А зоотехникыс ачыс мый?

Куканьвöдитiсь быд вынiсь ньылыштiс мыйкö горшас сибдöмö.

— Висьталi тай часöт — гожумся лагерьын сiя, мöссэз дынын. Не öтiк лун сьöрна ни, кывсьö, кошшисьöны, öшталöмöсь подасö да.

— Сылöн эд эта уджыс, кöр правленнёыс решеннёсö примитiс. Мый сэк сiя думайтö? — Степан Васильевич кыввезöн быдöс вöлi висьталöм сiдз, кыдз колiс бы лоны. Этö Таисья и висьтавтöг тöдiс. Но мый думайтiс зоотехник кытöнкö вöрас, кöр сiя вермис эшö и не тöдны, мый керсьö эстöн, висьтавны этö партийнöй секретарьлö, кöть джагöт, нывка эз вермы. Сiя чöлiс. Чöлiс сы коста и мöдыс. Сы сьöртi ни позис адззыны да вежöртны, что ны коласын басниыс баитсис. Сiдз жö, кыдз Таисья эз вермы тöдны да висьтавны, мый думайтö кытöнкö зоотехник, партийнöй секретарь, аслас стын сайын сулавтöн, некыдз эз вермы вежöртны, мый сысянь корöны. А кöть и вежöртiс, дак керны сiйö, гортся удж увья, эз думайт.

Öнöдз и Таисья тожö вежöртiс ни, что видзчисьны Степан Васильевичсянь колана отсöт, кöда вылö сiя надейтчис да кöда увья локтiс — нем. Стын одзас сулавтöн нывка казялiс эшö и сiйö, что вачкисьö ачыс корись вылö, кöдалö и крöшка мымдасö сетны жаль. Кутöм стыдсянь да недолытсянь перыта чапкис жарö, вывтыр везъясис кытшöмкö нильыга сиралан ньылöмöн, кöдасянь лякасис бердö паськöм, а кок увтын муыс пондiс мыччассьыны калитчöм кöртöн. И мед дзир вермыны перытжыка мездiсьны, вермыны петны эта вöвлытöм состояннёись, Таисья бергöтчис, эта жö состояннёсянь то ли тувдöм, то ли му бердас лякасьöм коккесö быд вынiсь вештавтöн, иньдöтчис бöр.

— Пырала ме ашын предыс дынö... ешта дак, — öнi вöлись горöтчис партийнöй секретарь аслас решётка-стын сайсянь. Но веритны сылö, надейтчыны, что сы пыралöм бöрсянь мыйкö вежсяс буржыклань, нывка эз ни вермы. Этасянь и кыввес сылöн Таисья ылöсöдз эз сибалö, кылiс да эз кыв, и нельки ачыс, паныт эталö, эз ни бергöтчыв, эз шыась. Сьöлöмтыр зубытöн горт ладорö гажтöма оськавтöн, Таисья думайтiс: «Мый вылö? Мый вылö ме надейтчи?.. Мый кошшыны сы дынö мунi? Да нылö жö быдöнныслö эта ферманскöй подаыс, кыдз баитсьö, — до лампочки. И век бы сiя ны весьтын эз вöв, дак эшö буржык. А ме... дикöйыс... Тöдöмöн бы дак...» Таисья ловзисис ыш, гажтöма гогинялыштiс юрнас. Но и эта бöрсянь сьöкыт думаэс эз кольö. Мыччассис, что талун не только сылöн юрыс, а и руыс сы гöгöр тыртöм этöн жö гажтöм думаэзнас, мездiсьны да сайöвтчыны кöдна увья нельки вын эз судз. «Мый вылö?.. Мый вылö нылö колiс примитны этö решеннёсö, некинлö кö öтiклö сiйö тыртöмыс оз ков? Мед только ме шогья мездiсьны? Думайтны кö бытшöмжыка, дак сiдз и петö. Надейтчисö, натьтö, что примитöм решеннёсяняс куканнес пöтжыкöсь лоасö? Или менö сiйöн пöткöтны мöдiсö?» Таисья лöгвевйöн шынньöвтiс аслас шуткалö. Но партийнöй секретарькöт басни бöрсянь некыдз мöднёж эз ни думайтсьы. А этасянь одззася надейтчöм местö сыын зорамис öтiк — вир пизьöтан лöг.

Уна я эшö чулалiс школасö кончитöм бöрсянь, но этöн каднас, öтнас олöмсянь да гортын и фермаын лунiсь лун бергалöмсянь Таисья мыдзыштiс ни. Тöдчöмöн ештiс и гажтöмтчыны, сiдз кыдз не гортын, не удж вылын öтiк куканнезся и кывсö горöтчыны вöлi некинкöт. А быдöсся этася лун бöртi нывкалö колiс мунны школаö, и кольны ас местö вöлi некинöс. «Кöть бы эд мамö ни чожжык берт».

Эшö вель ылын аслас керку дынсянь öтöрись посöдзсис Таисья кинöскö казялiс. «Батi, мамö ни локтiс да?» Эстöн вöлись нывка оськöввесö содтыштiс. А матiсяньжык вежöртiс, что сорасис.

Посöдзас пукалiс не мамыс, кöда эшö эз вöв гортын, а Галина подругаыс, сэтчö жö не öтнас, а Петюль Васька ёртыскöт, кöдö армиясяняс локтöм бöрсянь Таисья эшö эз адззыв, но кöда орсöмöн да кольлалöмöн Галина сыбурна ошшасис.

Öнi нiя пукалiсö ордчöн вевдöрись поспу вылын, зэв-зэв öтамöд бердын, кадiсь кадö öвтышалiсö киэзнаныс номмесö вашöтлöм могись, негорöн мыйкö баитiсö ас коласын, видзчисисö хозяйкалiсь бертöм.

Эз на ешты Таисья сибöтчыны зэв посöдз дынöдз, кыдз Галина янсöтчыштiс зонкаыс бердiсь, одзасьöмöн горöтчис:

— Вот и видзчись хозяйкасö, верд öтöрас номмесö. Локтiм бы гöститны, а сылöн гортын не дук, не след.

— Галка, тi? Здравствуйте! Эгö на эд солдатыскöт пантасьлö.

— Здравствуй, Таисья! — Зонка сувтiс, нюжöтiс паныт кисö.

— А ме чайтi, мамö ни гортö бертiс, — баитiс Таисья. — Но и видзчисьö, локтiт дак, одö кö некытчö тэрмасьö.

— А тэрмасям кö? — чикыртыштiс Галина синнас.

— Сэк асьныт тöдат. Кысь нö меным, Галка, гортын лонытö, кöр югдiкас муна да пемдан дорас вöлись бöр локта? Тэ эд ме дынö фермаас кöсйисин вовлыны. Мыля нö сэтчин эд локтö?

— Вöлiм и сэтчин, колö кö тэныт тöдны дак. Мöдiм конюховкаас пукалыштны, öддьöн öтöрас номмес курччасьöны да. Но и сэтчинiсь тэнö тожö эг панталö.

— Но и пукалiт бы öтнаныт, пырит да. Некин бы тiянлö эз мешайт, и номмес бы эз сёйö. Ключыс эд сэтчин.

— Былись, Тайка? — дзик эз верит подругаыслö да дивуйтчыштiс Галина. Одзлань сiя видзöтöв-керис ордчöн пукалiсь зонкаыс вылö, гогинялыштiс юрнас, бытьтö горöтчис: мый нö пö ми думайтiм?

Зонка негорöн куршыктiс, паськöтыштiс киэсö, мыйöн топ паныт висьталiс: «Нем он кер, эгö кö ылöстö сымдасö».

— А öнi тэ кытöн, Тайка, вöлiн? Кöдöрсянь локтан?

— Партийнöй секретарь дынöдз тай кежалi, оз ваялö вердчансö да.

— Но и кыдз? Кöсйис мыйкö? — сэтчö жö юалiс зонкаыс.

— Кляпсö. Эз и петав стын сайсяняс баитнытö да.

— Тайка тэ, Тайка! Весь тэ быдöс этö, весь ас юр вылат кышалiн, — эз вермы терпитны да вились пондöтiс Галина унаись ни эта вотöдз баитöм баснисö. — Мымда ми тэныт Порсевыскöт тотим, кыдз падтiм. Эн кывзы вот сэк миянлiсь кывсö. А öнi мый думайтан?

— Но эд фермаас уджавны тожö кинлöкö...

— Чöв тэ, Вася, нем он тöд дак, — сорис Галина сылiсь баснисö. — Некытшöм вердчан нiя тэныт оз вайö, вот адззылан. Эстöн ме и пукала. И нем тэ ныкöт, чуркаэзкöт, он кер. Выныт оз тырмы.

Не зонкаыс, не Таисья Галиналiсь баснисö сэсся эз ни сорö.

— Ме тэнö, Тайка, и вежöрта. Тöда, мый тэныт колö. Тэныт эшö етша лоöм, что шöрöт школасö золотöй медаль вылö кончитiн. Тэ и фермаас медаль вылö бы уджалан, мöднёж некыдз он вермы. Но эстöн не школа, а колхоз. Этö, батя, вежöртны колö. Сэтчин, кыдз тэныт колiс, сiдз и керин, быдöс ассянят, вöлi бы охота. А эстöн быдöс нысянь, правленнёсянь. А правленнёас миян, ачыт тöдан, кытшöмöсь юралiссес пукалöны: асьныс нем оз керö и мöдiклö оз сетö.

— Весь тэ, Галка, медальыс йылiсь... — шыасис Таисья. — Сы йылiсь ме и школаас велöтчытöн эг думайт. Велöтчи, кыдз верми, кыдз меным колiс. Институт йылiсь жö думайтi. И фермаас охота вöлi уджавны сiдз, кыдз кужа да верма, кыдз отирыс уджалöны, но... — нывка паськöтыштiс киэсö, — кыдз баитан — асьныс нем оз керö и мöдiклö оз сетö, сiдз, тыдалö, и эм. — Но эд фермаас уджавны кинлöкö сё ни колö, — вились горöтчис зонкаыс нывкаэс басни коласö.

— А кыдз вот тэ сэтöн думайтан уджавнытö... — Галина бергöтчыштiс сылань паныт, — ...некытшöм кö условие абу?

— Лоасö, абу дак.

— Кытiсь жö бы? Он я тэ, Васенька, думайт, что миян правленчиыс тэныт нiйö козин местö тарелка вылын ваясö?

Жаралiс спор. Таисья вежöртiс ни, что гортся удж, кöда йылiсь сiя думайтiс локтöнняс, öнi гöссез увья, сiдз кертöг и кольччас. Шондiыс пуксис ни. А омöн везъясьöм зэран кымöррез шогья рытыс сулалiс гудыра. Но кытчö вöлi воштiсьны? Басниыс пондöтчис сы удж йылiсь, и нывкалö интересно вöлi тöдны, мый висьталас сы йылiсь зонкаыс. Сорны кыкыс коласiсь лэбтiсьöм спорсö Таисья эз ни пондыв. Сiя кайыштiс вывлань, ляпкисьыштiс-пуксис Галина-подругаыс бокö.

— Мый ме дурак ли мый ли, сiдз думайтнытö? — баитiс сы коста зонка. — Ачым тöда, что некин тарелкаыс вылын оз вай. Но кутчисьны...

— Вот-вот. Кутчись, мун. Видзöтам, мый тэ кутчисьöмись петас.

— Да чöв тэ, Галка. Не ме йылiсь часöт басниыс.

— А ме чайтi, тэ ас йывсит ни мыйкö вöвлытöмö мöдан... — эз вермы видзсьыны да, гажöн китшсьытöн, горöтчис Галина. Таисья син одзын сылö, тыдалö, öддьöн гленитчис споритны зонкаыскöт да сiдз, мед немын не сетчыны, мед кöть кывнас вермыны йöртны сiйö угöлö, кöть невночка вылынжыкöн мыччавны этöн асьсö, Но зонкаыс сымдасö кыдз бытьтö эз и адззы.

— Ас йывсим ме сёрöнжык верма, ковсяс дак, — а одзлань Таисья ладорö: — Эд сетöмась жö, кывсьö, Таисья, тэныт виль подакокувтсö?

— Сетiсö тай кытчöдз, озö кö бöр мырддьö.

— Но вот. И одзлань кö сiдз правленнёыскöт тышкасьны, дак и мöдiк вердчан сетасö. Вежöртана — не тарелка вылын, но сетасö. Только киэз одза-одз оз ков лэдзны да етшажык эттшöм подругаэтö, — зонка татшкыштiс пельпоннас Галина пельпонö, — кывзыны.

— Этö тэ ме йылiсь, Вася, сiдз? Да? Менö он тшöкты Тайкаыслö кывзыны? — кыдз кальыт кöрт бердiсь Галина вешшыштiс зонкаыс бердiсь, бергöтчис паныт, сувтöтiс сы вылö сэтшöм басöк, вадзöлöса да югьялан, а öнi, дивуйтчöмсяняс, эшö и ыждыштöм синнэсö.

— А кин йылiсь эшö?

Таисья видзчисис, что обидитчöм Галина часöт, кыдз чушкыштöм, чеччöвтас зонкаыс бокись, бöрас дзар кертöг уськöтчас, кытчö шедас, сымда тэ сiйö и адззылан. И висьтав сылö этадз кинкö мöдiк, нывка, натьтö, сiдз бы и керис. Но чепöссьыны да мунны зонкаыс бокись вын сылöн эз судз, нельки обидитчынытö, кыдз колiс бы, эз вермы. Синнэзнас перыта кваркышавтöн, мед только не сетны сöдзны синваэзлö, Галина, мыйкö дырна кыдз öшöм, видзöтöв-керис зонкаыс вылö, вежсьыштöм голосöн ни бöртiжык горöтчис:

— Вася, — а одзлань эшö небытжыка да рамжыка: — Васенька, да тэ мый? Вот, некöр бы эг думайт, что тэ ме йылiсь сiдз горöтчан. Ме разь Таисьяыслö мыйкö умöльö вöрдi? Сiя жö менам меддона подруга. Ме жö сы понда, колö кö тöдны, дак юрöс готов сетны...

Зонка, тыдалö, вежöртiс ни — не сувтöтны кö аскадö, не бергöтны баснисö шуткаö, ачыс Галина сувтчынытö öнi оз ни вермы,

— Оз ков, Галка, сымдасö. Думайт вот ачыт, кинлö тэ юртöгьят пондан ковны, сетан кö сiйö Таисьяыс понда? Тэнат жö сiя дзир öтiк. А Таисьяыслöн и аслас юр эм.

Эта видзчисьтöм шуткалö Галина и былись гажмыштiс. Шутка могись жö сiя вулйыштiс ёртыс вылö кинас.

— Но мый, май, сэтöн, кöдö оз ков да баитö. Ме сылö былись висьтала, а сiя... — Эта вылын Галина и лöньсис.

Чöлiс и Таисья. То öтыс, то мöдыс вылö кадiсь кадö дзарышавтöн, нывка видзчисис, мый лоас одзлань.

Зонка сувтiс, оськöв бöрын оськöв, лэдзчис увлань, сэтчинсянь вöлись нюжöтiс Галиналö кисö.

— Мунам. Таисьяыслö шоччисьны колö.

Галина бытьтö эз и кыв зонкалiсь корöмсö. Мыйкö дырна сiя кольччис пукавны вöрöтчытöг, думайтiс. Но вот сы югмыштöм синнэзын вуджöрöн мунiс чуть тыдалана шынньöвтöм, тыдалö, мыйкö гажа да колана усис тöдвылас. Паныт зонкаыслö кисö сiя эшö и эз нюжöт.

— Мунам ми, — горöтчис Галина Таисья ладорö, синнэсö вывлань лэбтывтöг, сувтiс, лэдзчис поспуэз кузя, одзалiс. Зонкаыс чöлöмöн иньдöтчис бöрсяняс, недыр мыйись вöтiс, пуктiс кисö сы кос вылö. Нывка кынымиськö бергöтыштлiс юрсö сы ладорö, тыдалö, мыйкö шувлiс, но не мездöтчыны сы ки увья, не янсöтчыны сы бердiсь, вачкисис, эз ни думайт.