Гагпыжьян

Вайи ме кыдзкö, год-мöдöн одзжык, ас öшын увтö быдса тракторнöй тележка мымда песок. Сэк сiя меным ковсис. Лöсьöтчи разьны да тэчны вились гор.

Сёрöнжык, керöм удж бöрсянь, песокыс кольччис. Но строитчытöн сiя, кыдз материал, колö быд год. Сiйöн пыртлыны садö му местö ме сiйö эг ни понды, а лöсьöтi сы гöгöр важ тёссэзiсь мыйкö ящик кодьö да сiдз сэтчö и коли. Сiдз сэтöн менам песокыс год кыным сьöрна и олiс. А таво гожумнас сiя меным вились пондiс ковсьыны.

Сiдз кыдз городас строитчан песоксö ми ваялам не ю дорись, а карьерись, бытшöмöн сiйö лыддьыны оз позь. Чожажыксö сiя вачкисьö му вылö. Сэтчö жö сы коласö сюрö вель уна сёй да галька. Этасянь пожнавтöг сэтшöм песокöн уджавны оз позь. Мед керны туяна раствор, песоксö колö пожнавны. И кыным тшöкжык пож пыр сiйö лэдзан, сыным буржык. Эта удж бердö кытшöмкö лунö ме и кутчиси. Öтiк совковöй зырöн ваялi калитка сайись песок, пожналi. Пожнышта сiдз пуктöмсö, кисьта пож вылö кольччöм сёй-галькасö ордчöн сулалан тазö да бöра вились.

Кытшöмкö кадö öтлаын песокыскöт пож вылас сюрис пуктыны кытшöмкö невежöртана сьöд комок. Умöля адззöм увья ме сiйö примитi сьöд мусин местö, но янсöтны одзлань эг ни понды, сiдз öтлаын и коли. Кутчиси ме пож бердö, öвтыш-кери öтмöдöрö. Кöс песокыс перыта лэдзчисис увтас, а сьöд комокыс öнi вöлись пазалiс унася-уна торрез вылö. Но песокыс сьöрö пожыс пыр сiя эз мун, а öтлаын сёй комоккескöт да галькаэскöт кольччис пож вылас. И эстöн вöлись ме казялi, что вöлöм сiя нач не мусин, кыдз ме медперво думайтi, а... гуттэз. Да, да, нiя назём гуттэс, кöдна унася-унаöн лэбалöны быдкодь помойкаэз гöгöр, шоныт погоддя коста. Буржык лоас висьтавны нельки сiдз, что этна вöлiсö не асьныс гуттэс ни, а дзир нылöн кöс кышшес да борддэзныс, сiдз кыдз асьнысö нiйö кинкö эта вотöдз ештöм вöлi нимавны-сёйны ни. А кин жö бы вот керис сымдасö? Кин чукöртiс öтiклаö да сёйис эта мымда гут? Эд öтпырись гарйыштöм коста зыр вылас гут кышшес сюрисö не öтiк дас мымда. Гарйыштi да пожныштi мöдöтпырись, вились сымда жö пож вылас кольччисö. А сэсся эшö да эшö. Позис думайтны, что кинкö натодиль, гожумбыт сьöрна, дзир этöн уджнас и занимайтчöм — дышöтчытöг куталöм да чукöртöм гуттэсö öтiк местаö, песок пытшкас. Но кин эта вöлi сэтшöмыс? «Вот эта задача», — думайтi ме ас кежам. Кайез, овлö, гуттэсö куталöны, сырчик сэтчин нето пышкай. Но кутöмсö нiя нельки оз и тордö, сэтöн жö сёйöны быдсöн. Не кыш, не борд эта бöрсянь — немись нем оз кольччы. Да кöть бы, шуам, и кольччис мый, дак сы пыдына песок пытшкас чукöртны да дзебны кайес сiйö сё ни оз пондö. Сiдзкö, не кай. А кин эшö?

Бöртiжык гут кышшес сё жö бырсисö. Шедавны зыр вылö песок сорнас сэсся эз пондö. А ме сё эшö жугдi юр эта вопрос вылын — кин сымдасö вермис керны? Но быдöс весь. Вежöртны адззывтöг сiдз нем и эг вермы.

Эстöн жö колö висьтавны и сiйö, что пожнавны неыджыт пожокöн кипонiсь песок — удж абу кокнит, сэтчö жö, кöр керан этö уджсö мышкырöн. И вын, и мыла сы вылö колöны вель уна. Öвтны кö, шуам, сiдз пожнас öтмöдöрö лунтыр сьöрна да эшö жар погоддя коста, этöн каднас вывтыр пасьта ньылöмыс быгыльтас не сизимись ни, кыдз примитöм баитны отир басниын, а нельки дассизимись. А рыт кежас сэтшöм удж бöрсянь киэз вывлань он и лэбты.

А погоддяыс сiя лунö и былись лöсялiс жар. А висьтавны кö веськытжыка, то сiйö ме бöрйи ачым, сiдз кыдз мöдiк погоддя коста, зэрикö, шуам, нето зэрöмыс бöрсянь, этö уджсö он и кер. Вамöм песокыс пожыс пыр сэк оз мун, лякасьö. Сiйöн и ковсис керны этö уджсö жар да кöс погоддя коста.

Сьöкыт уджсянь да пымалöмсянь дугдывтöг пакмис-косьмис горш. Удж коласас ме кадiсь кадö пырышавлi керкуö. А кöр тöдчöмöн мыдзыштi, öзтi куритны да пукси калитка вуджöр весьтö шоччисьыштны. Гут кышшес йылiсь дума и öнöдз эшö юрись эз петав. Сiйöн пукавтöнням кадiсь кадö ме сё эшö дзарышалi пожнавтöм песок ладорö: кресь, мыся, мыйкö интереснöй ештас усьны эта коста син вылö.

Надейтчöм-видзчисьöмыс и былись эз бöбöт. Кытшöмкö кадö, кытöнкö вывланьын, веранда стена бердас, пондiс кывны гутлöн горöн да недовольнöя бизгöм-пессьöм. Овлö сэтшöмыс сыкöт, кöр сюрас казявтöг кытшöмкö пемыт пельöсын чераньвезö. Сэк сылöн вынöн да лöгвевйöн бизгöм-пессьöмыс кыссьö дыр и дыр, кытчöдз сiя оз мезмы бöр, нето пессьытöнняс оз каттись эшö бытшöмжыка да оз джагöт сiйö сэтöн кыйсись черань. А эстöн гутлöн бизгöмыс кылыштiс нач недыр. Сёрöнжык сiя жö, но лöньжыка ни, кылыштiс кынымиськö ме юр вевдöрын, руас ни. А чожа мый ме одзö песок вылас пуксьыштiс... Кыдз сэтöн висьтавнытö?.. Зi не зi, лöдз не лöдз. И юрсигусьнас нето борда кöдзывнас сiйö тожö он шу. Сорасьтöг позяс висьтавны сы йылiсь дзир öтiкö, что эта вöлi кытшöмкö хищник, учöтик да борда хищник. Сiя и видзис öмнас (позяс кö сiдз шуны) кутöм гутсö.

Песок вылас ни, хищникыс öмын, гут сё эшö бизгышалiс дженытика борддэзнас, пессис, тыдалö, мед мездöтчыны. Но да кытчö сэтчин? Бытшöма сьöвталöм быд ладорсянь, вывтырнас сiя и трек керны эз вермы. А мöдыс гутлiсь этö бизгöмсö, вачкисис, эз и кыв. Песок вылас аслас ношаöн пуксьöм бöрсянь сiя перыта пондiс изöвтны-бергавны öтiк местаын, дзик кошшис мыйкö öштöмö. А вöлi сiя то кытшöм. Одзланьсянь и тшöтш кос гöгöрöдз сiя мымдакö и былись вачкисьлiс зi, мош нето борда кöдзыв вылö, вöлi сэтшöм жö вöснитик коса. Кынöмокыс сылöн, кыдз и быдсöн вывтырыс, тожö вöлi кузь да вöснит, дзик нарошно нюжöтöм мыйкö вылö да сэтчö жö эшö и не öтiк рöма. Кос бердсяняс сiя сылöн вöлi сьöд, а бöрланьсяняс — виж-гöрд. Сэтчö жö не кынöмокыс, не вывтырыс сылöн эзö вöлö гöнаöсь, кыдз мошлöн. Мый сылöн вöлi быдöсся этася зi нето кöдзыввез сьöртi, дак этö пыжьян кодь кузь да йыла жало, кöдö сiя новйöтiс бöрсяняс бöж местö. Лэбзикас сылöн борддэс негорöн силькöтышалiсö-горалiсö сiдз жö, кыдз нiя силькöтöны-горалöны юрсигусьлöн нето кыдз силькöтö-горалö тöв вылын симöт киль. Но пукавтöн сiя кольлiс нiйö не поперег, кыдз юрсигусьыс, а тэчлiс мош моз, зэв-зэв вывтыр бердас. Кыдз адззат, лыддьöтiсь, некытшöм вылö казьмöтöм эстöн насекомöйез коласiсь миян виль тöдсаным быдсöн эз вачкись. Сiя вöлi аскодьöм. Ас мозöн жö сiя видзис асьсö и му вылас. Кыдз вöлi висьталöм ни, песок вылас пуксьöм бöрсянь, ассис жертвасö лэдзтöг, сiя перыта пондiс котрасьны öтмöдöрö, дзик кошшис мыйкö öштöмö.

Мукöд коста, öтлаын аслас ношакöт, сiя перыта лэбтiсьлiс борддэз вылö, но чожа мый пуксьывлiс бöр.

Эстöн вöлись меным топ и вачкис юрам — вежöртi, мыйын делоыс. Джагöтöм гутнас, кöда сэк кежö бизгышавнытö нач дугдiс ни, хищник бергалiс тшöтш сiя местаын, кытiсь меным сюрисö неважын песок сорнас сымда гут кышшез. Сiдзкö, эта делоыс сылöн и эм. Сiдзкö, эстöн песокас вöлi сылöн поз, оланiн, кöдаö сiя пыравлiс вевдöрсянь писькöтöм нораöт. Вот мыйсянь сылöн и вывтырыс сэтшöм вöснит да кузь, дзик нарошно нюжöтöм. Эд сэтшöм вöснитик вывтырöн ветлыны одз да бöр нораöттяс унаöн кокнитжык.

Öнi сiя и этö, вились кутöм гутсö, мöдiс, тыдалö, пыртны ас позас. Но нораыс сылöн сэк кежö вöлi разьöм ни. Вот мый увья и бергалiс хищник сы дырна öтiк местаын, а быдöс весь. Не нораыс, не позыс одзза местаас сылöн эз ни вöлö.

Дыр мыйись аслас жертваöн хищник лэбтiсис бöр борддэс вылö, лэбзис кытчöкö мöдiк местаö. Ме нельки жалейтыштi, что ковсис разьны поз сэтшöм полезнöй насекомöйлiсь, кöда öтнас ештöм кутны да сёйны сымда гуттэз. Думайтсис нельки, что эта бöрсянь разьöм позас сiя бöр оз ни берт. Но думайтсьöм сiдз весь.

Песокыс меным колiс неуна. Сiйöн и пожнавны быдöс, мымда вöлi, эг понды. Чукöртыштi кольччöмсö öтiк местаö да сiдз одзлань кежö и коли. А кытшöмкö кадö сэтöн жö эта виль тöдсакöт усис пантасьны и мöдöтпырись.

Сiя лунö, рытъявыв, веськöтлi ме песок дынас, палисадник столб вылын, важ кöрттуввез. Сулалi öтiк местаын, вöрöтчытöг. Эта коста кыськö кок увтсим и мыччисис песок вылас тöдса хищникыс. Кыдз и медодзза пантасьöм коста сiя керис сiйö жö удж, вайöтiс гортас ассис жертваöс. Но талун сiя керис этö не сiдз, кыдз одзжык, а нач мöднёж ни. Сэк кутöм гутсö сiя вайöтiс руöт, борддэз вылын. Талун сiя тэрмасис гортас подöн, му кузя да кыскис сьöрас кытшöмкö зелёнöй рöма гусеницаöс. И колö висьтавны, что и этö уджсö сiя керис тожö ас мознас и, тыдалö, не первуись ни. То ли вийöм, то ли стрöйдöм сэк кежö, нюжöтчöм гусеница эз ни вöрöтчы. А хищник кутöм сiйö юрöт аслас хоботокöн, керöм быдкузьöн ас увтас и куим гоз кок вылын кокнита оськавтöн, кыскö сiйö нем туйö «буксир» вылын.

«Мыля буксир вылын, а не руöт, кыдз гутсö жö?» — думайтi ме ас кежам. Но кöр бытшöмжыка видзöтöв-кери хищник да сы жертва вылö, и эта тожö лоис вежöртана. Аслас вывтырöн гусеницаыс хищникысся вöлi унаöн ыджытжык: кузьжык да кызжык. И пуктыны кö бы нiйö öтамöд коласын весаэз вылö, гусеницалöн весыс лоис бы кык-куимись сьöкытжыкöн. Вежöртана, что сы сьöкыта ношасö лэбтыны руас аслас борддэз вылын хищник эз чайтчы, а вот му кузяас гужгис-нöбöтiс сiйö нем туйö. Дыржык эд, натьтö, сiдз нöбöтнытö лоö? Натьтö, сiдз, дыржык. Но надёжнöйжык.

Сiдз öтамöд коласын коккесö перыта вежлавтöн, сiя нöбöтiс кутöм гусеницасö керöс паныт песокыс кузя метр кык ылына, медвылын местаöдз, а сэтöн кыдз вöйис кытчöкö син одзись. Ме дышöтчытöг оськöвтi матöжык сiя местаö, пондi видзöтны. Сiдз и эм — нора. Сiдзкö, хищник сэтчин и пыртiс ассис жертвасö.

Вот сiдз вот. Тöдсасьнытö тöдсасим, а кыдз сiйö шуöны ним-фамиллёнас, ог тöд. Висьтавны кö рочöн, дак эта наездник. Природаас нiя пантасьлöны уна вид. Эмöсь, натьтö, поснитжыкöсь, эмöсь и гырисьжыкöсь. Эз вöв учöт и сiя, кöдакöт пантаси ме. Вывтырнас сiя вöлi сантиметр кык кузя, то ли невна кузьжык. Эстöн висьтасьöмись ни позьö вежöртны, что наездниккес — хищниккез да сэтчö жö эшö и паразиттэз. Нiя не только кутöны да вийöны вреднöй насекомöйезöс, но и кольттезнысö ассиныс тэчöны ны кольттезö жö, личинкаэзö, а эшö частожык — ны гусеницаэзö. Эстöн ны кольттезiсь петöм личинкаэс и вердсьöны да быдмöны, а вреднöй гусеница этасянь жагвыв кулö. Вот мый увья нiйö, тыдалö, и шуöны рочöн сiдз — наездниккезöн. И вийöны-сёйöны кö нiя сiдз садiсь вредителлезöс да нылiсь гусеницаэз, петö, что этна хищник-паразиттэс öддьöн полезнöйöсь да коланаöсь морт понда. А вот кыдз нiйö шуны комиöн?..

Мымда бы ме эг думайт да эг вынсьöтчы тöдны, кыдз нiйö шуöны миян кыв вылын, тöдвылö сiдз нем и эз усь. Эг адззы ме этö асланым литератураись да словарись. Сэксянь и шуи сiдз, кыдз пырис юрам — гагпыжьянöн.