Глава IV

Вöвлыны Таисьялö настоящöй спектакллез вылын да видзöтны настоящöй жö артисттэзлiсь орсöм усьлiс неуна. Эз видзсьы мыйкö тöдвылын, мед сэтшöм запутымö, кытшöмöн лыддиссис Порсева деревняыс, артисттэз кежавлiсö год пытшкас öтпырся унажыкись.

Кынымкö спектакль нывка видзöтiс районлöн культура Керкуын шöрöт школаын велöтчикö, да öтпыр усьлiс вöвны театрын, городас ни, кöр ветлiс делегатöн окружнöй комсомольскöй конференция вылö. И шуны эта бöрсянь, что театртöг Таисья и овны оз вермы нето нем бурсö да коланасö сыын оз адззы — эз позь. Мукöд спектакллезын вöвлiсö бытшöма сувтöтöм эпизоддэз да картинаэз, кöднö видзöттöн Таисья вунöтлiс ас йывсис, кыдз видзöтiсь. Олiс сцена вылiсь геройезкöт öтiк оланöн: ны шогöн, гореöн да гажöн. Но вöвлi и нач мöднёж, кöр дзескöтiс сысянь, кыдз кытшöмкö актёр нето актриса кышсис петтöдз вынсьöтчис орсны роль: и керис, и баитiс быдöс сiдз, кыдз быльнöй оланас некöр оз овлы. Вежöртана, сэтшöм орсöмö Таисья эз верит, и сiйö кутлiс стыд орсiссес понда.

Артисттэс локтöм йылiсь юöрыс медперво нывкаöс öддьöн эз и гажöт. Сiя одзлань ни тöдiс, кытшöм бы эз вöв бур спектакль нето ыджыт желаннё видзöтны сiйö, мунны вöлi некöр.

Сёрöнжык, кöр зоотехникыс мунiс бöр, Таисьялö пондiс думайтсьыны, что спектакльыс деревенскöй олан йылiсь, нельки унажык — подавöдитiссез да ны удж йылiсь. Чожа этаö нывка сэтчöдз ни веритiс, кыдз бытьтö сорасьтöг тöдiс, что эта и былись сiдз. Сэк вöлись жагвыв и зорамис желаннё — ветлыны. «То кинлö оз ков — видзöтасö, а ме ог». Сэтöн жö усис тöдвылас и Галина подругаыс, кöда, уж сiдз и тöд, оз сёрмы, а сёрöнжык пантасьöм коста висьталас: «Мый нö тэ, кывзы жö, Тайка, сiдз? Спектакльыс, кыдз нарошно, тэ понда и сувтöтöм, а тэ эн и видзöт». Нывка пондiс думайтны, кыдз керны сiдз, мед адззыны кад ештыны. «А мый?.. Позяс, натьтö, и Öгань бабыс отсöттöг. Кольны, шуам, сэк кежö куканнесö видз вылас, кыдз зоотехникыс висьталiс, и ась сёйöны. Аслым ештыны кежавны гортö, йöртны пода, чилькöтны мöс, пасьтасьны да и дöс сэтöн. Позяс сiдз? Позяс!» — Радувья Таисья öтпыр-кыкись нельки шовкнитыштiс оча ки долонь.

Сёрöнжык деревня вылас пондiс кывны тракторрезлöн гурöтöм да бертöм подалöн баксöм. Таисья тожö иньдöтчис гортö. Тöдса стыннэз пöлöн перыта оськавтöн, нывка думайтiс, мый лöсьöтны пасьтавны вылас рыт кежö. Вежöртана, что Галиналöн кодь бытшöм наряддэс, кытшöмöн сiя мыччасис неважын ны ордын, Таисьялöн вöлiсö эшö шедтытöмöсь. Мамыс жö, кöда некöр да нем сэтшöм бытшöмсö и ачыс эз новйы, нывсö дона паськöмас тожö эз вочöт. Куим-нёль новйöмовöй ни выввежöт коласiсь Таисья бöрйис чочком кузя негырись гöрд тусёка платье, кöда, кыдз лыддис ачыс, мунiс сылö медöддьöн, тожö новйöмовöй ни, фиолетовöй рöма косинка да не вильöсь жö, но дзоньöсь кытчöдз, лажмытик каблучок вылын кокнитик сьöд туфелькаэз.

Кöр быдöс коланаыс вöлi лöсьöтöм-гладитöм да пондiс мыччассьыны виль местö, сэк кежö бертiс и пода. Карта воротаэз ладорсянь пондiс кывны мöслöн нюжвыв да гора баксöм.

Таисья перыта ештöтiс гортся удж, сэтшöм жö перыта миссис-сынасис да кöмасис-пасьтасис. А кöр петiс керкуись да игныштiс сьöрсяняс ыбöс, сы моз жö вежöм вывтыра отир, томöсь и пöрисьöсь, мужиккез и инькаэз, мукöдыс нельки поснит челядьöн, кыссисö ни клуб ладорö. Быдöнныс сьöрö иньдöтчис и сiя. «А не бöбöв Галкаыс, что уджсö сэтшöмö бöрйис. Сылö позьö этадз деревня кузяс, гаражöдззас да бöр чегнытö. Некытчö не он падмы, не он кышась».

Шöрись улицаас петтöдз нывка перво кылiс, а сёрöнжык и казялiс, кыдз кукань карта ладорсянь то ли гортас, то ли гаражöдз тэрмасис тележкатöг, простöй трактор вылын Поликарп дядь. Нывкасö бокись улицасис сiя эз казяв, сувтчывтöг вашöтiс одзлань. «Кысянь этö сiя сiдз? Турунсö эд, тыдалö, меным вайис. Мыля нö ме эта йылiсь нач вунöтi? Вот жö ылöстöм. Быдöс эта спектакль увья». Вежöртана, что мунны фермаö, мöдöтчöмыс бöрсянь, кöр быдöс отирыс тэрмасисö клубö, охота некытшöм эз вöв. Но куканнезлö турунсö вайöм увья гажыс, кöда кыдз промокашкаö ва, сё эшö йиджис нывкаыс ылöсö, вöлi сэтшöм ыджыт, что чожа сiя пöдтiс асьнас быдöс спектакльсянь видзчисьöм гаж. «Вайисö эд сё жö, вайисö, вайисö», — топ шувлiс Таисья моросын вынöн ёткöтан сьöлöм. Ачыс сiя думайтiс: «Бур, конешно. Эта жö öддьöн бур. Но мый ме часöт понда керны? Сiйö эд öнi жö колö пыртлыны. А быдса тракторнöй тележка мымдасö öтпыр-кыкись пыртöмöн он пырт». Кыдз дöнзьö кыскавны пельпон вылын ношаэзöн уль турун, Таисья тöдiс бытшöма ни. И öнi, кöр сiя недырик кежö сувтöтiс этö син одзас, öтiк сысянь ни перыта чапкис жарö. «Мый нö керны?» — думайтiс нывка, жагвыв одзлань коккесö вештавтöн. Сылö колiс адззыны öтiк, но медколана решеннё, кöда увья сёрöнжык эз бы ковсьы каитчыны да гöрдöтны недолытсянь ас одзын. А что вайöм турунсö спектакль видзöтöм шогья позис и нач не пыртлыны, сэтшöм думаыс сы юрын нельки матын эз вöв.

Нывка сибöтчис сiя местаöдз, кысянь колiс кежны клуб ладорö. Эстöн сiя сувтiс, нёджжасьöв-керис, думайтiс. Но вот Таисья дзик саймис, зэркыта öвтыштiс кинас клуб ладорö, керис оськöв бöрын оськöв, а сэсся чепöссис местасис, уськöтчис котöрöн, бытьтö пожар вылö. Но котöртiс сiя не клуб ладорö, кытчö мöдöтчис гортсянь. Нывка бабыв моз быркнитiс-лэбзис канава весьтöт, петiс туй шöрö. Эта коста öтiк син угöвнас сiя казялiс клуб ладорсянь паныт сибöтчись зонкаöс, адззывлытöм выввежöт увья, кöдö медперво эз и тöд. Видзöтны жö бытшöмжыка локтiсьыс ладорö тэрмасьтöнняс кадыс эз ни вöв. Сэтчö жö эшö паныт öшалан шондiыс ёрис синнэз. И дзир бöрсяняс шыасьöм сьöртi: «Тайка! Кытчö тэ?!» — позис вежöртны, что этö Порсев. Но не сувтчыны, не жагсьöтны оськöввез зонкаыс корöм увья Таисья эз ни пондыв. Котöртiкас сiя дзир öтпырись öвтыштiс сы вылö кинас, кыдз абутöм тор вылö да содтiс чож. Позис нельки думайтны, что нывкаыс нарошно тэрмасьö пышшыны зонкаыскöт пантасьöм шогья.

Казявтöг Таисья петiс деревня сайöдз, сэсся сiдз жö сибöтчис кукань карта дынöдз, конюховка весьтас сувтiс, öтпыр-мöдöтпыр ловзисис быдсöн мороснас, видзöтчис. Но мый увья сiдз тэрмасис, да мый сэтшöм охота вöлi казявны карта бердсис — эз казяв. Не воротаэз одзын, не кытöн мöдiклаын вайöм турун эз тыдав. Вöлi дзир тракторлöн неважынся вовлöм след, но не ачыс туруныс, не тележкаыс эз вöлö. Мед мездiсьны кутöм досада увья, не лэдзны сiйö матö сьöлöм бердöдз, асьсö бöбöтлöм могись Таисья думайтiс: «Аха, Поликарп дядьыс, натьтö, картавылас туруннас тележкасö сувтöтiс, мед меным ректынытö матынжык да кокнитжык вöлi». Аслас кöмкöт-паськöм йылiсь, кöдаын нывка эшö нач неважын оськалiс клубö, спектакль вылö, öнöдз сiя вунöтiс ни. Кыдз вöлi туфлиэзнас, сiдз ныын и сибöтчис воротаэз дынöдз, осьтiс, оськöв бöрын оськöв пырис пытшкас, видзöтiс. Но и эстöн туруныслöн не дук, не след эз вöлö.

Вонясянöдз лойöм нятьöт бродиттöн Таисья петiс бöр, жагвыв сибöтчис конюховка дынöдз, пуксис скамейка вылö. Öнi, кöр нывка вежöртiс, что нельки примитöм решеннё бöрсянь ой кежас куканнес кольччисö вердчантöг, сылö колiс тöдны дзир öтiкö — мыля, кытшöм сэтшöм причина увья сiдз вермис лоны. Вежöртана, что причинаэс эстöн вермисö адззисьны быдкодьöсь. Эз лöсяв, шуам, рыт кежас колана мымда ытшкöм турун, эз ештö сiйö грузитны, нето тэрмасьтöнняныс нач вунöтiсö эта йылiсь, то ли тележкаыс жугалiс. Эд мыйкö увья Поликарп дядь вашöтлiс жö сытöг простöй трактор вылын? Но кыдз да мый бы сэтчин эз шогмы, Таисья понда эта вöлi нач нем туйö. Быдöс причинаэз коласiсь, кöдна вермисö вöвны, сылö колiс тöдны дзир öтiкö, сiйö, кöда увья куканнес ой кежас кольччисö вердчантöг. А тöдны этö позис медодз дзир Поликарп дядьсянь, кöда, натьтö, сiйö юöртöм могись простöй тракторнас татчö и кежалiс. «Невночка то пантавнытö эг ешты. Не котрасьлыны я öнi жö сы дынö? Гортсис ли, клубсис ли, кыськö сё ни пантала». Нывка дженытика дзар керышалiс аслас туфлиэз вылö, кöдна нятьсис кодьöн эз и тыдалö, лöгвевйöн сьöвзис чурс, пыркöтöм могись кынымиськö вачкыштiс оча кок да мöдiс ни вöлi чепöссьыны вились деревня ладорö, но сёрмис.

Сы коста конюховка угöв сайсянь мыччисис Порсев, тöдны кöдö ылiсяньжык талун и былись эз позь. Зонка пасьталöм ась и новйöмовöй ни, но туяна эшö да бытшöма сы вылын пукалан коричневöй рöма костюм (натьтö, пöрисьжык воныс пельпон вылiсь), радзза йöрнöс вылö кышалöм сэтшöм жö галстук, миссьöм-сынасьöм и пондöм вачкисьны быльнöй кавалер вылö, кöдакöт ордчöн нем эз полöт мыччисьны рытся кадö порсевса син одзö.

Зонка сибöтчис матöжык Таисья весьтöдз.

— Тэ мый, кывзы жö, ме увья, кыдз кольмöм увья, пышшалан?

Таисья жалейтiс ни, что эз ешты аскадö сайöвтчыны зонкаыс син одзись. Эта увья сiя гажтöма и ловзисис.

— Кин тэныт сымдасö висьталiс?

— Ачым адзза — не слепöй. Часöт тай, кыдз шогöт увья, пантасьöмыс увья пышшин. — Порсев оськöвтiс скамья бердöдз, ордчöн пуксис. — И гортiсь тэнö некöр он кут. Луннас ли, ойнас ли — не дук, не след некöр абу.

— Тэ мый, бытьтö, и гортöдз ни ештiн вовлыны?

— А то эг ли мый ли?

Не веритны зонкаыс кыввезлö эз позь. Но Порсевлöн басниыс Таисьяöс мылякö не сымда гажöтiс, мымда серöмтiс, и одзлань нарочитöя ни, öддьöнжыксö шутитöм могись, сiя юалiс:

— Мыйлö бы, интересно, абу кö секрет?

— Колiс, сiдзкö, баитöм могись. Мыйлö эшö этася?

— Дак менам жö, Колька, удж. Вежöртан тэ, он сымдасö? — ас вылас издевайтчöмöн ни, баитiс одзлань Таисья. — Тэ разь он тöд, что ме порсевскöй фермаын, куканнез дынын уджала, и пукавны гортын да видзчисьны гöссесö меным некöр.

— Тöда — уджалан. Дак лун и ой разь фермасис он и петав?

— Ог эд, Колька. Или тэ öнöдз он тöд миян фермаэзiсь уджсö?

— Уджнат тэнö! — öвтыштiс кинас Порсев. Баитiсö — эн сюй юртö, кытчö оз ков — эн кывзы. А öнi — «менам удж, ме уджала». Висьтав мунан-он спектакль вылас? Пондöтчас чожа.

— Менам эшö билетыс небтöм.

— Да эн пов тэ этна билеттэз понда. Эмöсь нiя менам. — Порсев кыскис морос карманiсь кык билет, ошшасьöм могись вайöтыштiс нывкаыс син одзö, мыччалiс.

Таисья паныт эз шыась. Сiя вились думайтiс сы йылiсь, мый лöсьöтчис керны Порсевыс локтöм вотöдз — ветлыны Поликарп дядь дынö, мед тöдны, мый увья эз вайö ой кежас куканнеслö вердчан. Нывка понда эта öнi вöлi унаöн донажык, ежели спектакль. Сэтчö жö вежöртiс — сэтшöм кöмкöтын, кытшöмöсь вöлiсö сы кокын туфлиэз, клубас отирыс одзö он мыччись.

— Некöр, Колька, меным спектакллес вылö ветлöтны. Ме эшö турун ой кежас куканнеслö видзчися.

— Ха-ха, — горöн серöмтчис Порсев. — Турун, видзöт тэ, сiя эшö видзчисьö. Кин жö бы тэныт сiйö ойнас ваяс, кöр быдöнныс важын ни удж вывсяняс бертiсö да клубö чукöртчисö? Не сiя я Поликарп дядьыс, кöда меным часöт правленнё весьтас простöн пантасис?

— Сiя и кöсйисис, а мый?

— Да нем. Сiдз тай горöтчи, — шыасис Порсев, а недырик чöлыштöм бöртi содтiс: — Вайис сiя талун тележканас кытшöмкö турун, дак только не тэныт, тыдалö.

— Былись, Колька? А кинлö? — Таисья эз и казяв, кыдз кутыштiс зонкаыслiсь кисö. — Аслыс ли мый ли?

— Ог ме тöд сымдасö. Бригадирыс öшын увтö тай тележкасö сувтöтöм. Часöт, натьтö, ректытöг сэтчин сулалö.

Тöдны бы одзлань зонкалö, мый вермас лоны эта юöр бöрсянь, сымдасö Таисьялö сiя некöр бы эз и юöрт. Эз на ешты Порсев осьтны öмсö, мед горöтчыны мыйкö одзлань, кыдз мöдыс тöвчикöн нетшкöвтчис сы бокись, дзик пöртмасис, öтпыр-мöдöтпыр мелькнитiс син одзын, сайöвтчис конюховка угöв сайын.

— Тайка! Кытчö тэ?.. — Но некытшöм паныта шыасьöм эз ни кыв. Порсев сувтiс, öшöмöнмоз иньдöтчис нывкаыс сьöрö, но кöр сiя петыштiс конюховкаыс сайсянь, мöдыс вöлi ылын ни, вöтны да сувтöтны и думайтны нем. И вились боксянь видзöтiкö, позис вежöртны, что нывка тэрмасьö пышшыны зонкаыс шогья. «Но мый тэ сыкöт пондан керны? Йöймöм, сiя йöймöм и эм». Порсев чурс сьöвзис аслыс кок увтас, öвтыштiс кинас, жагвыв иньдöтчис сьöрсяняс.

Не спектакль, не Порсев йылiсь, кöдö колис öтнассö конюховка дынас, эта кадö Таисьялö эз думайтсьы, öнi, кöр кывсис деревня вылöдз вайöм турун йылiсь, кöдö мылякö эз вермö вайны кукань карта дынöдз, думайтны нывкалö вöлi мый йылiсь. «Бригадир, сiдзкö... Сэсся некин... Поликарп дядьыс и грузитiс, и вайис... А эстöн... деревня вылас ни... — котöртiкас орласьöм фразаэзöн думайтiс Таисья лоöмыс йылiсь. — Думайтны эд только... Примитöм решеннёыс бöрсянь... Бригадирыс... Коммунист эшö... А мый керö... Сэтшöмöн разь колö... коммунистыслö лоны?.. Кин только сэтшöм порссесö партияас примитö?.. Батi, эшö не сiдз мыйкö? Эд оз и веритсьы». Этнöн думаэзнас нывка сибöтчис деревня бердöдз, но тэрмасьны и öнi эшö эз дугдыв.

Бригадирыс олiс вевдöрись улицаас. И мед не сюрны аслас тэрмасьöмöн отир син одзö, кöдна эта коста вермисö лоны клуб гöгöр, колiс бы перво жö кежны вывлань. Но кöр эта усис нывкалö тöдвылас, поперегалан улицаыс вöлi чулалöм ни. Бертны сэтчин бöр охота эз вöв. «Йöймöмöн эшö лыддясö, адззыласö дак. Но и ась». Мед етшажык усьны отир син вылö, эшö клуб весьтас сибöтчытöдз Таисья кежыштiс туй шöрись, туянажык местаöт чеччöвтiс канава мöдöрö.

Спектакльыс, тыдалö, эз на пондöтчы. Том и пöрись отир сё эшö бергалiсö клуб посöдз гöгöр. Вежöртана, что не казявны дзик пожар вылö тэрмасись нывкаöс нiя некыдз эз вермö. И кöр сiя сибöтчис котöртiкас матöжык клуб весьтöдз, быдöнныс дзир сы ладорö и видзöтiсö. Кинкö мужиккез коласiсь нельки юалiс:

— Мый сэтшöмыс лоис? Кытöнкö сотчö я мый я?

Таисья дженытика нёджжöвтыштiс паныт эта юалöм вылö, но шыасьöмыс вöлi не Поликарп дядьлöн, а ачыс трактористыс быдöнныс коласын тожö эз тыдав. Сiйöн нывка не эз сувтчы, не паныт эз шыась, одззамоз котöртiс одзлань.

Чожа мый и клубыс, и сы гöгöр бергалiсь отирыс кольччисö бöрлань. Таисья петiс мöдiк поперегалан улица весьтö, сы кузя кежис вывлань. И вöлись сэк, кöр дугдывтöг пизян коккес вайöтiсö сiйö колана местаöдз, нывка вуджис оськöв вылö. Тэрмасьны одзлань лоис некытчö. Бригадирлöн керкуыс вöлi матын ни, а турунöн грузитöм тракторнöй тележкаыс и былись сулалiс сы öшын увтын, öнi этö Таисья адззис ас синнас ни. Этасянь, натьтö, позис бы бергöтчыны да мунны бöр. Но нывка дзик сё эшö эз верит аслас синнэзлö, сибöтчис зэв тележка дынöдз, жагвыв кытшöвтiс, судзöтiс сы вылiсь öтiк турун тылöпок, пиннес коласын курччавтöн, прицепыс дынын сувтiс. Позис думайтны, что сiя лöсьöтчö кыскыны тележкасö вылас. Мымдакö эта и былись вöлi сiдз. Тырмы бы эта вылö Таисьялöн вын, нывка сiдз бы и керис. Недырик кежö сiя нельки мышкыртчыштiс прицеп весьтö, кутчисьлiс сы бердö киэзнас, но сьöкыт кöртсö нельки местаись вöрзьöтны эз вермы. Адззись часöт кытшöмкö трактор, Таисья юасьтöг, бригадирыс син одзын нöбöтiс бы турун тележкасö кукань карта дынö. Но, кыдз нарошно, лöсялiс сэтшöм кад, кöр тракторыс йылiсь и думайтны вöлi нем. Уджалан кадыс чулалiс. Тракторрес сулалiсö то ли гаражын, то ли кинкö öшын увтын, а асьныс трактористтэс быдöнныс вöлiсö клубын, спектакль вылын, и надейтчыны ны отсöт вылö эз позь. Таисья пуксис кöртовöй прицеп вылö, пондiс думайтны, мый керны?

Зорамöм лöг увья нывка юрын и решеннёыс зорамис сэтшöм жö. Сiя тöдiс, что часöт клубас чукöртчис отирыс быд бригадаись. Сэтчин жö эта коста вöлiсö, натьтö, и бригадир, и правленнёись членнэз. «Сiдзкö, и меным колö лоны сэтчин жö». И бöра Таисья, кыдз тöвчик чепöссис коккес вылö, котöрöн уськöтчис клуб ладорö. «Ештыны бы только, кытчöдз спектакльыс эз пондöтчы. Адззыны бригадирсö...» Нывка петiс бöр тракторрезöн гарйöм-боровтöм шöрись улица вылö. Но кок увтас öддьöнсö эта коста сiя эз ни видзöт. «Чöв, бригадир... Ештыны бы... Часöт ме тэныт... спектакльсö мыччала...»

Матiсяньжык Таисья казялiс, что клуб посöдз гöгöрас некин оз ни бергав. Нельки Порсевыс, кöда ошшасис неважын небöм билеттэзнас, некытöн матын эз тыдав. Эта нывкаöс öзтiс эшö öддьöнжык. Чожсö чинттöг Таисья дзик лэбзис поспуэс кузя вывлань, тöвчикöн пырис фойеö, позяс кö сiдз шуны векнитик да дзескыт лöсавтöм стенаа коридор. Залас пыранiн одзын сiя невна эз пöрöт кок йывсис неыджыт вывтыра, годдэза ни, волькöтöм чукыра чужöма да кыза краситöм краскасянь дзик торья тырпа тöдтöм инькаöс.

Но протеза тырпаыс сы сибöтчöмись эз повзьы, нельки гажмыштiс.

— Спектакль вылö? Пожалуйста — рубль билет. — Администратор, сiя жö кассир, нюжöтiс Таисьялö билет, корись моз пондiс видзчисьны, кöр сылö паныт мыччасö колана руб.

— Ме не спектакль вылö. Меным бригадирöс колö адззывны.

Таисьялöн перыта пырöмыс да лöгвевья голосыс нем бурсö эз кöсйö, и протеза тырпа инька-администратор этö, тыдалö, вежöртiс.

— Оз позь! Сэтчин уджалöны! Актёррез сцена вылын. Некытшöм бригадирöс тэ он адззы.

Корны, мед лэдзлiсö кöть недырик кежö, не кад, не мыла эз тырмы. Таисья судзöтчис администратор бокöт уна киэзöн куталöмсянь ва да нильыг ыбöс вуг бердöдз, вынöнкодь кыскыштiс сiйö асланяс. Ыбöсыс невночка оссьыштiс. И лыддьы нывка ас понда коланаöн пырны пытшкас, администраторлöн падмöтöмыс сiйö сё ни бы эз видз. Но осьтыштöм ыбöс коласöт пытшкас нёджжöвтöм бöрын Таисья вежöртiс — нем оз пет. Неыджыт залын, кöда и вöлi дзир öтiк школьнöй класс ыжда, ыбöс бердсянь и зэв сцена бердöдз отирыс вöлi начкöм сымда, что и чунь мöртны некытчö. Сэтчö жö сiя вöлi эшö и югдöттöм, и кин кытöн пукалiс, адззыны эз позь. Не öддьöн югыт би югдöтiс дзир сценасö, кöда вылын кынымкö актёр нуöтiсö действие. «Сёрми, сiдзкö». Нывка гажтöма ловзисис, пöдныштiс ыбöссö бöр.

Мед адззывны бригадирöс нето кинöскö мöдiк начальство коласiсь, колiс видзчисьны, кöр чулалас спектакль. Но Таисья одзлань ни тöдiс, что нельки сэк куканнеслö турунсö некин оз ни вай, дзир кадыс лоас öштöм весь. И сылö нем эз кольччы, кыдз бертны бöр фермаö, босьтны киас литовка да вились пондыны ытшкисьны.