Вареннё кöр

Адззисö я мöссэз кок увтсиныс озъягöд? Вежöртiсö я сылiсь кöрсö? Или сёйисö, кыдз сёяна турун, öтлаын мöдiк туруннэзкöт? Колана ответ этна вопроссэз вылö ме öнöдз эшö сетны ог вермы. Но что мöссэз вежöртöны чöскыт кöр, талун этаын менам некытшöм сомненнё абу. А тöднытö этö усис то кыдз.

Мöссэз коласын этадз озъягöдсö öктöм бöртi чулалiс неделя кык мымда кад. И сэк кежö миян вöррезын воис эшö öтiк чöскыт ягöд — чöд. А шогмис сiя миян деревня дынсянь нач неылын, и мед мунны эта ягöдла, кузь туйколас тальны эз ков. Медодзза жö лунас, километр ылынаись деревня дынсянь, ме öктi чöдсö кыкьямыс литртöрик чайникö. А сёрöнжык, рытнас, гортын ни, кöр вöлi йöртöм ой кежö картаэзö пода, ме пондi пуны эта ягöдiсь вареннё.

Колö висьтавны эшö сiйö, что не газ, не электроплитка миян деревняас эз вöв. Сiйöн ме вареннёсö пувлi важ таганок вылын, кöдö сувтöтлi öтöрö, öшын увтiсь лудъясьöм канаваö да кöда увтын натодиль лöсьöтöм поснит пес сорöн видзи колана би.

Сiя жö вöлi и эта рытö. Медодз, вежöртана, лöсьöтi колана пес. Öзтi таганок увтö би. Вевдöрсяняс сы вылö сувтöтi сахарнöй песокöн эмалированнöй таз. А кöр сахарнöй песокыс сылiс да пöртчис сиропö, сэтчö кисьтi бöрйöм ни сэк кежö ягöд. Öнi кольччис содтыны эшö сахарнöй песок да пондыны пуны одзлань. Но одзлань петкöтöм песокыс эз вöв. Сiйöн ме медперво бытшöма лöсьöтi таганок увтын би, а сыбöрсянь вöлись пыри керкуö. А недыр мыйись, кöр ме песокнас ни мыччиси бöр, син одзын оссис быдса ЧП. Ыджытöла лэбтiсьöм бисянь быгöн сироп öтлаын пусьытöм эшö ягöднас, таз дорыш весьтöт тэрмасис-пизис ортсö.

Кытчöдз ме лэдзчи поспуэз кузя, котöрöн сибöтчи таганок дынöдз да койыштöм ваöн ладзöтi би, быгöн лэбтöм сиропыс лоис таз мöдöрас. Сiя пизис-котöртiс таганок гöгöр муас, кöдаись бöр не киöн, не паньöн куравнытö сiйö эз ни позь. Сiдз сiя жагвыв муас и йиджис.

Вареннёсö пуöм бöрсянь водi ме рытнас сёрöн ни. Сiйöн и асывнас чеччынытö эг тэрмась. Но узьны сiя асылö пöттöдз меным сiдз и эз сетö. Кыдз только вöлiсö высьтöмöсь да лэдзалöмöсь öтöрö пода, сэк жö миян öшын увтын лэбтiсис кытшöмкö эшö вöвлытöм, невежöртана шум: öтлаö чукöртчöм мöссэзлöн боксышалöм да соседкаэзлöн горöн чирзöм-горöтлöм. Эта коласын кысянькö öтöрсяняс жö керкуас бертiс мамö.

— Быдöс я мый я рытнас вареннёсö муас пуин?

— Мыля?

— Некыдз тай соседкаэс таганыт дынiсь мöссэзнысö вашöтны оз вермö. Люкасьтöдз öтамöд коласын локтiсö. Му сорнас таганыс гöгöр лудсö кокöны да сёйöны.

Мый ме тöдлi мöссэз йылiсь эта вотöдз, дак дзир сiйö, что нiя радейтöны сов. Эта увья миян мамö быд коста помояс сiйö невнаöн и пуктыштлiс, мед мöсыс бытшöмжыка юис. А что нылö сыöддьöн гленитчö чöскыт кöр, кытшöмöн вöлi тазiсь пизьöм сахарнöй сироп, сымдасö ме эшö эг тöдлы.

Кöр ме, кöмкöта-паськöма ни, петi öтöрö, картинаыс ме син одзын öшын увтас оссис то кытшöм. Кык сюра мöс сулалiсö паныт öтамöдлö öтмöдöрсянь бипур бердас, борышалiсö коккезнаныс му да сы сорöн няжйисö-сёйисö сiя местаись дженытик луд. Эшö куим-нёль мöс дызгышавтöн бергалiсö ны гöгöр и дзир пелитчынытö кыкыс коласö эз лысьтö. Сэтöн жö мöссэз гöгöр киас шатьöн бергалiс неыджыт вывтыра томыник да кузь кыла ичмонь, чирзышалiс:

— Тпруч, былыга синнэз! Кынымись ни öшымöс сайöдз вашöтлi, а тiянöс вöрисьыс сё бöр бергöтö!

«Не вöрисьыс, — думайтi ме ас кежам, — а вареннё кöрыс, кöда, тыдалö, и мöссэзлö тожö гленитчö».