Глава III

Петухлiсь öшын увтын горöн китсасьöмсö Таисья кылiс эшö онзiльувья, дзир саймынытö перво эз вермы. Нывкалöн юрыс топ сё эшö вöйис кытчöкö подушка коласас. А кöр сiя осьтiс синнэсö, керкуас вöлi югыт ни. Асывся шондiлöн медодзза, нач эшö вынтöм, гöрд рöма югöррес неыджыт öшын пыр судзöтчисö паныта стена бердöдз.

«Мый этö ме?.. Сёрми эд, тыдалö». Таисья перыта куркнитiс вывсис шебрас — байковöй векнитик одеяло — тэрмасьöмöн сувтiс. Эта коста вöлись саймис будильник, öдззис сярзьыны керку пасьта.

— Эн ни бы весь мырсьы, — дзик ловьялö, горöтчис нывка часыэслö. — Одзалöм миянöс тэкöт петухыс чеччынытö дак, — иньдöтчис гор сайись угöлын öшалан миссян доз дынö.

Медперво Таисья кутчисис гор бердö. Западня вывсянь — керкуыс вöлi лажмыт — сiдз жö, кыдз быд коста керлiс мамыс, нывка судзöтчис боковушка бердöдз, осьтiс труба, сюйыштiс сайкыт горö рытсянь пыртöм пес, ны коласö увтсяняс бердсиныс кульыштöм симöттэз, öзтiс. А кöр биыс кутчисис пессэз бердö — кадiсь кадö пондiс кывны нылöн гажöн шовкöтöм — нывка босьтiс эшö рытсянь гывьялöм да косьтöм высьтiсян ведра, петiс высьтiсьны.

Пусьыны лун кежö Таисья и талун эшö эз понды. Кытчöдз лонтiсис гор, нывка вились кайöтлiс ва, киськасис.

Бöртiжык сiя адззис мамыслiсь ырöш пизь, колана доз — куим-нёль литр тöрик сёёвöй гырнич, — судзöтiс ком джаджись важ, бырöм пеля мутэй, соровтiс ырöш. Овны деревняын квастöг да эшö гожумнас, шоныт погоддя коста, некыдз эз позь.

Горсö ештöтiкö Таисья ештiс сёйыштны, öткоста тэчис öтi-мöдi сьöрас лöсьöтöм сумкаö мамыслö гöстинеч местö.

Кöр шондiыс эшö эз на ешты бергöтчыны да сувтчыны деревняыслö доль, а сы пасьта не öтiк ладорсянь паськалiс молотоккезлöн наковальняэз кузя гажöн чокöтöм (вартлiсö литовкаэз, мед петны ытшкисьны), а асывся сьöкыт лысваыс поснит бисерöн öгралiс турун вылын, Таисья везтiс юр вылас кокнитик чышьян, чапкис кисой вылас зелёнöй гöрдззöм кофточка (зэрмас кö туй вылас), босьтiс сьöрас лöсьöтöм сумка, петiс туйö.

Сенина посадöдз дас километр кузя туйколас вöлi тöдса важынсянь. Талис сiйö нывка тöв и гожум не öтiк год сьöрна эшö сэк, кöр велöтчис сэтчинiсь школаын нёльöтсянь кыкьямысöт классöдз. Асланыс порсевскöй школаын куим класся унажык эз вöв. Дзир кык медбöрья годсö Таисья велöтчис шöрöт школаын районын и ветлыны эта туй кузя эз усьлы. Сiйöн талун, кöр нывкалö вились ковсис мунны сенинскöй туй вылöт, сiя гажмис эталö, кыдз важся да бур тöдсалö.

Деревня бердсянь туйыс медперво кыссис йöрйöм улицаöт. Öтöрланьсянь, йöр саяс, куйлiс неважын гöрöм да садитöм ыб, кöда пасьта не öддьöн веськыт лёдззезöн петалiс картов. Мöдöрланьсянь, матынжык оль бердö, вель ылына кыссис паськыт листа ид петассэзöн вевттисьöм му. Сiя чуклясис сайись межа дорас то öтöрö, то мöдöрö: öтiклаын жмитчис, мöдiклаын паськалiс бöр, а шöрöттяс, не öтiк местöт, вöлi орöтöм поперег, öт дорсянь мöд дорöдз тырöм логгезöн да турунзьöм межаэзöн. Ыб шöрас, то öтiклаын, то мöдiклаын, кыдз бырöм паськöм вылын мöдiк рöма дöмассэз, сулалiсö кынымкö неыджыт вöрок, кöдна то ли вöлiсö колялöмöсь эшö кöркö, ыбсö весöтiкö, то ли сёрöнжык ни вились лэбтiсисö асьныс. А быдöс весьтын эта мича да лöнь асылö öшалiс ыбшаррезлöн мыдзтöг питиртöм-дзурликтöм.

Этна ыббес Таисья понда вöлiсö и донаöсь, и гажаöсь сiйöн, что быд ладорсянь тöдсаöсь. Нiя сылöн вöлiсö аслас, кöдна коласын нывка и чужис, и быдмис, сувтiс кок вылö. Этна ыббез гöгöр сiя учöтсянь öктiс тшак-ягöд. Ны вылын жö гожуммезнас отсавлiс мамыслö пастучитны колхознöй куканнез. Этна ыббез вылiсь учöтсянь и öнöдз сёйис нянь, сiйö меддона да медколана торсö, донажык да коланажык кöдася морт оланын сэсся и лонытö нем оз вермы. Но талун Таисья первуись видзöтiс этна ыббез вылö не сiдз, кыдз видзöтлiс пыр эта вотöдз. Талун сiя видзöтiс ны вылö кыдз одзланься агроном, лонытö кöдöн вöлись думайтiс. И первуись жö сылö этна ыббес эз гленитчö. Эз гленитчö медодз сiйöн, что вöлiсö нiя учöтöсь, кыт тырöмöсь неколана вöрöн, кыт орлалöмöсь быдкодь логгезöн, кырассэзöн да межаэзöн, кöр нылö, этна ыббезлö, талуння машинаэз понда, кöдна уджалöны ны вылын: гöрöны да кöдзöны, вундöны да вартöны — колiс бы лоны да и кад ни вöлi лоны нач мöдкоддезöн, паськытжыккезöн да волькытжыккезöн. Эз гленитчö сiйöн, что сэтшöм басöк рöма подморина му годiсь годö сетiс гектар вывсис вит-квать центнер мымда сю, кöр мöдiк хозяйствоэзын сiя жö гектар (öнi эта йылiсь Таисья тöдiс ни) сетiс кык-куимись унажыкöн. Кыдз одзланься агроном — а гусьöн, ас кежас асьсö нывка сiдз и лыддис — сiя и тöдiс, и веритiс, что и нылöн ыббес вермасö лоны колана кодьöсь: и паськытöсь, и волькытöсь; и гектарыс вермас сетны урожайсö вит-кватись ыджытжыкö. Эта понда колiс дзир вермыны кончитны институт, бертны гортö да кутчыны уджавны.

Кыдз да мый пондас керны Таисья велöтчöмыс бöрсянь, мед босьтны гектар вылiсь сэтшöм урожай, öнiсянь бытшöма и эз тöд. Но мый вермис лоны, керны кö быдöс коланасö, этö аслас воображеннёын нывка адззис талун ни.

Вот август. Погоддяыс сулалö кöс да мича. Кыдз и тулыснас жö сё эшö орсöны йöррез. Дзир шондiыс гожумбытся калитöмсянь быгалiс паськыт да прос кымöр, öшис русис быдкодь цветитан турунлöн пöдтана кодь вына дук. Öнi сы местö кöвьясис дукыс воöм няньлöн.

А вот и ачыс Таисьяыс, сё сэтшöм жö винерик да кокнитик вывтыра, тэрмасьöмöн оськалö эта жö Чаняыб дорöт (сiдз шусьö ид увтiсь ыбыс), кöда öнi вежсьöм тöдтöмöдз: паськалöм да веськалöм. Тулыссяняс сiя тожö вöлi кöдзöм идöн. А ар кежас сюыс лэбтiсис да воис сэтшöм, кытшöмö порсевса векнысö овтöн эшö эз и адззывлö. Кыз да ён за вылын, кöда сулалiс тшöка, дзик лён, четверть кузя шепыс сэтшöм тыра, что кöстiсьöм аслас сьöкытсянь, топ мегыр. Бытшöм погоддя коста сюыс воöм ни — быдсöн ыбсö кöть öтпырись вундышт. Но комбайн сулалö öтiк местаын, оз уджав. Сы дынсянь паныт Таисьялö, горöн видчытöн, тэрмасьö Порсев, пондö норасьны. А быдöс делоыс сыын, что автомашина, кöда сувтöтöм новйыны комбайн увтiсь сю, керны этö некыдз оз ешты. «Мымда, интересно, Коля, гектар вывсис усьö?» Комбайнёр перыта вежсьö чужöм вылас. «Думайта, Васильевна, нёльдас центнер гöгöр лоас». А одзлань, вундöмподыс кузя комбайн ладорö ордчöн оськавтöн, лöньжыка ни, мед некин эз кыв: «Но дак кыдз? Не орсны я таво, эта нянь вылын свадьбасö?» Таисья зэркыта пыркöто юрнас. «Не, Колька. Оз меным нёльдас центнерыс свадьба кежас тырмы. Вот кöр витдас мымда гектар вывсис вундан-вартан...» «Дак тэ быдты, быдты сымдасö. Ме сайын уджыс оз сувт». «И быдта, Колька, только вот свадьбанас видзчисьыштны ковсяс».

Важын ни кольччис бöрлань Чаняыб. Чулалiс и неыджыт Чаньва ю, кöда дорын челядь вель дырöн шоччисьлiсö кöркö сенинскöй школаö ветлытöн. Быдса час сьöрна, а то и дыржык, нывка оськалiс то югыт да гора кыдзовöй рассэз пöлöн, кöдна пöдiсö быдкодь кайез дзульзьöмсянь, то уль да пемыт кöзъя вöр коласöт, кöдасянь вайöтiс пöжсьöм лыс да сiсь пу дукöн, а сiя öнöдз эшö олiс аслас мечтаэзын. Ны увья Таисья нельки эз казяв, кöр да кытшöм местаын чегöтiс кынымкö кыдзовöй улок, мед дорйисьны тшыг номмез шогья, кöдна быдса кымöрöн кольлалiсö сiйö шуч туй.

Кöр нывка петiс медодзза сенинскöй ыббез дорö, сэк вöлись дзик саймис аслас думаэзсянь. «Кöд коста нö, май, туйыс чулалiс?» А одзлань тöдвылас вились усис мамыс, кöдакöт сiя вот-вот пантасяс. «Быд лун, натьтö, оз и дугдыв, горзö, öтнассö керкусö колис да. Кокнит разь уджалiсь мортыслö гожум шöрнас больницаас куйлынытö. И меным немись-нем эз юöрт. Полiс, натьтö, что сы увья тöждiсьöмсянь экзаменнэсö сетны ог вермы. Мыйöн бы ме сылö сэтчинсянь отсалi, кöр не туй, не транспорт некытшöм гортöдз вовлыны абу?» Керöс паныт кайтöн Таисья гажтöма ловзисис. А керöс йывсяняс нывка син одзын, кыдз ки долонь вылын, оссис Сеника посад.

Мымда чулалiс кад туй вылö — Таисья эз тöд. Часыэс сылöн эшö эз вöлö. Но посадас сiя пырис сэк, кöр шондiыс сё эшö öшалiс керку юррез весьтын, турун вылiсь лысваыс косьмыны быдсöн эшö эз ешты, кысянькö кылiс öткаса литовка вартлöм, а отирыс (öння кадö удж вылас одз оз тэрмасьö), öтiк бöрсянь мöдiк, жагвыв петiсö видз вылö.

Участковöй больницаыс, кöртöн вевттьöм юра, вурöм да краситöм стенаа, гырись öшына вель ыджыт керку, сулалiс неылын посад дорсянь, краситöм жö кöркö вöлöм, забор сайын. Сы дынö сибöтчытöн Таисья ас кежас вились думайтiс: «Мамö эд оз и тöд, что ме сы дынö тэрмася. Оз и думайт, натьтö, сымдасö, оз и видзчись».

Паськыт калиткаöт нывка вуджис забор сайö, жагвыв сибöтчис лажмытик посöдз дынö, кöда вылiсь годдэза ни инька чышкис бус.

— Кин дынö тэ сэтшöм одз?

— Мамö дынö.

— Кысянь?

— Порсевасянь.

— Машинаöн я мый я вайöтiсо?

— Да не. Подöн ме... — Шондiтöг, натьтö, гортсит петiн?

Паныт эта вылö Таисья эз ни шыась. А мöдыс одзлань горöтчис:

— Видзчисьышт. Буссö чышка да вöлись. Öнi сэтчин, натьтö, уколлэз керöны. Дорись палатаас мамыт и куйлö.

Нывка вуджöтiс киись киö сумка, лöсьöтыштiс кисой вылас öшалан кофточка, нырыштчыштiс пельпоннэс посöдзлöн тёсöн вурöм заплот бердö, пондiс видзчисьны.

Пöдана ыбöс сайын пытшксяняс кылiс учöтик кагалöн дугдывтöг да вынтöма жексöм-горзöм.

— Кулас ни, тыдалö, эта нылöн. Лун и ой оз и дугдыв, сё горзö.

Инька лэдзис ваöн ведраö бон, вешшыштiс поспуэс весьтiсь.

А Таисья чышкыштiс коккесö павдöтöм мешöк бердö, оськöвтiс вывлань.

Куим неыджыт палата коласын соравны коланасö эз позь. Нывка осьтыштiс ыбöс, шыасьтöг да полöмöнкодь сувтiс порог дорас.

Кыдз и думайтiс Таисья, мамыс сылiсь локтöмсö абу видзчисьöм. Кысь сылö вöлi тöдны, что тöння лунсянь нылыс гортын ни. Сiя пукалiс аслас койка вылын, пырисьыслань мышкнас, видзис öлöдзас год етшся кагаöс, öмнас негорöн тпруськайтöмöн, вынсьöтчис пальöтны сiйö дугдывтöг горзöмись и нылыслiсь пырöмсö эз казяв.

Мöдiк томжык инька, тыдалö, горзiсь кагочкаыслöн мамыс, паныта сулалан койка весьтö мышкыртчöмöн, ольсалiс рузуммез ^. Таисьялань сiя сулалiс тожö мышкнас. Этнася куимысся, лыддьыны кö ны дынö и горзiсь кагаоксö, палатаас сэсся некин эз вöв. Сайись öшын бердын койкаыс сулалiс простöн.

— Мама? — негорöн шыасис Таисья порог дорсянь.

Öнi вöлись, кыкнанныс öтдруг, нiя нёджжöвтiсö пыранiн ладорö.

— О-ё-ёй, Раиса, на жö.!. — тэрмöтöмöн горöтчис нывкалöн мамыс, калькöтiс ас бердсис да нюжöтiс киэс вылын учöтиксö мамыслö. — Кагаö тай менам... Дитяö тай... — дивуйтчис одзлань Дарья Семёновна. — Тайкаö эд, видзöт жö... Ме дынö эд... А ме тай нö ог и думайт... — Просмöм киэзнас койка юр бердö кутчисьöмöн, сiя жагвыв пондiс лэбтiсьны коккес вылö.

Таисья öнi вöлись оськöвтiс матöжык мамыс дынö. Но сибöтчыны öтамöд бердöдз нiя сiдз и эз ештö. Сы коста жö томыник мам, кыкнаннысö одзалöмöн, оськöвтiс ны коласö, нюжöтiс веж рузумö каттьöм горзiсь кагасö зэв Таисья морос бердöдз.

— Бось. Зонöс тэныт вузала.

Учöтик кагаэсö вузалöм йылiсь эта вотöдз нывка и кывлiс ни, но мый эта лоö сэтшöмыс да кыдз керсьö былись, некöр эшö эз адззывлы, эз тöд. Сiйöн öнi эта Таисьялö мыччассис сэтшöм видзчисьтöмöн, что сiя повзис. Баралöм синнэзöн нывка видзöтiс то сы одзын сулалiсь, сьöд синкыма да томся-том кага мам вылö, то аслас мам вылö и некыдз эз вежöрт, мый керны одзлань: то ли босьтны сылань нюжöтöм горзiсь кагасö, то ли татшкыны сiйö дынсис бöр. Ас пондаись быдöс этаын Таисья кылiс мыйкö нёштöмö да неколанаö, нятьöсьö да дойданаö. И ло сiя эта коста öтнас, нето йöз отир коласын, чожажык бы откажитчис, ежели примитiс сiйö киас.

Отсалiс мамыс.

— Бось, дитя, да видзышт киат. Оз я кöть тэ дырни недырик кежö дугды горзынытö. Адззан-он, кулны ни горзöмсяняс мöдö. Немöн беднушколö татöн отсалнытö оз вермö да, — горöтчис Дарья Семёновна. — Босьтан, дак паныт деньга колö сетны. Сет мымдакö, эмöсь сьöрат посниттэс дак. Ужо, менам, натьтö, аслам кытöнкö... — Мамыс судзöтiс халат карманiсь кöшелёк, кыскис сэтчинiсь öтiк кöртовöй руб, нюжöтiс нылыслö.

Томыник мам чöлöмöн сулалiс Таисья одзын, видзчисис.

Сё эшö öшöмкодь, нывка öнi вöлись примитiс горзiсь зоночкасö, сы коста жö сетiс кисис рубсö сы мамлö. Таисьялö пондiс думайтсьыны, что часöт Раиса коляс сы киö кагасö, а ачыс бергöтчас да мунас кытчöкö сы дынiсь пыр кежö. И мый лоас сэк, сымдасö нывка эз тöд, нельки син одзö сувтöтны эз вермы.

Но нем сэтшöм полöтанаыс эз ло. Раиса чöлöмöн сюйыштiс зоныс понда сетöм рубсö аслас халат карманö, чöлöмöн жö кольччис сулавны одзза местаын.

Таисья киын ни, кыдзкö казявтöг, горзыны учöтикыс и былись дугдiс, лöньсис. Не öддьöн, натьтö, эшö уна ылöстан, дугдывтöг горзöмсянь вадзöлöса синоккезнас öнi сiя чöлöмöн видзöтöв-керис виль мам вылö, кöда вылö талун нывкаыс эшö ылын эз вачкись, вайöтыштiс öм бердас ассис луковка ыжда кулачоксö, горöн пондiс нимавны, а бöртiжык сы дорын кунис синнэсö, онмöссис.

Минута кыным бöртi, кöда коста аслас полöмувья зоночкаыс вылö Таисья бытшöмика и ловзисьнытö эз лысьт, кага мам шыасьтöг нюжöтiс киэсö, босьтiс сiйö бöр Таисья дынiсь, спасибоыс местö öтпырись гогиньыштiс юрнас, жагвыв бертiс аслас койка дынö. Сэк вöлись мама-ныла оськöвтiсö öтамöдлö паныт. Таисья жмитчыштiс недырик кежö мамыс пельпон бердö, осьтыштiс вöлi öмсö, мед мыйкö горöтчыны, но Дарья Семёновна одзалiс.

— Петалам, дитя, кытчöкö баитнытö, — содтiс: — Оз я сiя кöть эта кадö узьышт. Ойбыт сьöрна, батя, и он чир эз кер, и мамыслö узьнытö эз сет. — Койка юр да стена бердын видзсьышавтöн, Дарья Семёновна иньдöтчис жагвыв ыбöс ладорö. Таисья петiс сьöрсяняс.

Öшын увтас, забор пöлöн садитöм пöрись кыдз бердын, сулалiс чеччöм краскаа важ скамья. Сы вылö мама-ныла пуксисö.

— Да кöр нö, дитя, велöтчансянят локтiн?

— Тöн асывнас.

— Быдöс екзаменттэтö сетiн?

— Сетi тай.

— Дваэсö эн жö босьтал?

— Эг. Нельки öтiк четвёрка абу.

— Триэз я мый я дöс?

— Не триэз, а пятёркаэз. Куш пятёркаэз вылö сетi. Тройкаэз вылö, — дак и велöтчынытö нем вылö вöлi. Сетi öтпыр, педас поступайттöн, тройкаыс вылö математикасö, тырмас — гажвевйöн юöртiс Таисья. А одзлань, кöть и гусьöнжык ни, но эшö гажöнжыка: — Меным нельки медаль велöтчöмыс понда сетiсö, колö кö, мама, тэныт тöдны дак. — Нывка видзчисис, что эта юöрлö сыкöт öтлаын и мамыс тожö гажмыштас. А мöдыс сы местаö, нач видзчисьтöг, горöтчис:

— Но бöра и металь ни тэныт велöтчöмыт понда сетасö.

— Былись, мам, — пондылiс дорйисьны нывкаыс.

— Мун жö... Эн баит, кöдö оз кол. Эн пырт менö грекас, — сорис Дарья Семёновна нылыслiсь баснисö, — Ме век сьöрна колкозын уджала. Пöрисьмытöдз, туйö висьталны, пермасиныс эг петал, сё куканнезныскöт вöдитчи. Быдöс ассим здоровьёöс сэтчин пуктi. Син одзат вот — китöг и коктöг кольччи да и то метальсö шедтыны эг вермы.

«Ме эд тэнö жö, мама, гажöтыштны мöдi. Но он верит, дак ачыт тöдан». Таисья лöньсис, гажтöмкодя ловзисис ыш, обидитчöмöнмоз тшып кутыштiс тырппесö. Нывка эшö надейтчис, что часöт мамыс юалас сы одзланься велöтчöм йылiсь, а мöдыс сы местö горöтчис:

— Висьтал вот, ноко, мый ни гортын астöгьям керсьö? Садиттöм калег-капустаыс йылiсь ме тэнчит нем ни ог юал. Енöлтчис менам таво сiя рöсаданас вирöдз вылас эта проклённöй шогöт улъя, да сiдз ни, тыдалö, сэтöн и гожьяс. А картовкаыс öнöдз кöть петалö, оз? А кушманыс да морковыс? Лук гряддэс эд, натьтö, быдöс ёгтуруннас тырисö? Лолъяöсь абу сэтчин миян подаоккезным? Куканёкыс да дзалькаэс? Чилькöтлö оз рыт-асылнас Öгань бабыт мöссö? Сiйö эд ме тэ локтöдз ас местам, и гортö, и пермаас, куканнес дынö коли.

Вопроссэсö Таисья одзын мамыс öтдруг сувтöтiс сымда, что мöдыс медперво нельки öшис кодь, эз тöд, мыйсянь пондыны висьтасьны.

— Мый гортын керсяс? Умöльыс кытчöдз нем абу. Вирöдз вывсис рассадасö ме тöн садитi.

— Садитiн, шуан? — дивуйтчыштiс мамыс. — Киськалнытö эн вунöт?

— Мыля жö вунöта? Эг, конешно. Тöн и талун асыв киськалi. Кушман да моркошка петалöны. Погоддяыс кытчöдз кöс — лук гряддэс öддьöн абу тырöмась. А картовкасö тöнсянь жö тыртны пондöтчи. И подаыс коласiсь некин эз на торксьы: и куканёк, и дзалькаэз ловьяöсь. Тöння виöдз мöссö Öгань баб чилькöтлöм. А тöнсянь — ме ачым. Талун асывсянь и горсö лонтi, дзир няньсö эг пöжав.

— Лонтлiн, висьталан, горсö, дак эд колiс кöть ырöш сорöлтны да пöжны. Кыдз тэ сэтшöм жар погоддяас юаныстöг мöдан олны? Али полан — сысъясьнытö он прокмы?

— Ырöшсö ме соровтi, и пöжнытö сюйыштi. Сы увья горсö и лонтi. А сысъявнытö ог куж, дак медала кинöскö, — шутитыштiс Таисья.

— Стыдитчы жö, невеста морт, сымдасö баитны. Ырöшсö сысъялны йöзсö, батi, он жö медал. Сералны эд отирыс пондасö. — Ачыт эд, мама, шуан — ог прокмы. Тэ меным висьтав, кытöн шöмыс квассö шöммöтны?

— Да джоджылас жö, натьтö, кытöнкö учöтик туисокнас сулалö. Синъян бытшöмика, дак казялан.

Висьтасьны Таисьялö одзлань кольччис нем. Эта вылын мама-ныла мыйкö дырна кежö лöньсисö. Нывка öнöдз жалейтiс — мыля сэтшöм чожа да неколана местаын орис ны коласын велöтчöм йылiсь басниыс, пондöтны кöдö мöдöтпырись вöлi сьöкыт ни. Сiя сё эшö думайтiс, кыдз бы этö буржыка вöлi керны, кыдз мамыс одзлань горöтчис:

— Картовсö, баитан, тыртны пондöтчин? А кор нö öтнат тыртан?

— Таво жö, натьтö. Жагвыв эд тыртсяс.

— А турунасьнытö кор мöдан? Али орöтчыны ни тавосянь мöссис? А эд не видзны кö сiйö, дак сэсся деревняас и олнытö нем вылö.

Шыасьны паныт Таисья эз ешты. Одзлань мамыс кынымиськö клоп вачкис киэзнас боккес кузя.

— Ой, олан да ой, ола-а-ан! Думайтны эд, думайтны эд только, кытчöдз локтi. Некор тай оджжык сымдасö эг думайт, что этадз китöм-коктöмсяла-а-а да больничаэзын куйлыны понда-а-а, — öдззис причитайтны Дарья Семёновна.

— Чöв тэ, мама. Эн горзы. Синваэзнас сэтöн он отсав. Веськалан жö, батi, куйлыштан татöн невночкасö да.

— О-ё-ёй, Тайка, да о-ёй-ёй! Эн ни тэ меным сiйö, веськалöмсö баи-ит да эн ни баи-ит! Кысь нö ни ме веськала-а-а, кы-ы-ысь, кор кикок уджнас дöс и дöс надсадитö-öм. Чуркаöн эд менö татчö, чуркаöн вайöтiсö-ö-ö. Сэтчöдз эд менам нiя пыктöмöсь вöлiсö-ö-ö. Ямыштiсö вот,... — лöньжыка ни юöртiс одзлань Дарья Семёновна да мыччыштiс нылыс син одзын лöз больничнöй халат увтiсь öнöдз эшö пыкöса коккесö, — ...неделя сьöрна татöн куйлытöн. Да уна я этаись прокыс? Пета вот уджалнытö — бöра сiя жö лоас. О-хо-хо, олан да о-хо-хо-о. Кыдз нö ми тэкöт одзлань пондам олнытö? — Чышьян угöвнас сiя чышкыштiс рожабаннэс кузя визывтан синваэсö, видзöтöв-керис нылыс вылö.

Мый горöтчыны паныт мамыс кыввезлö Таисья эз тöд, дзир жмитыштiс пельпоннэзнас, гажтöма мышкыртiс юрсö.

— Эд мыйись мый... — баитiс одзлань Дарья Семёновна, — ...дак миян тэкöт и лишньöй кöпейкаыс абу. А деньгаыстöг талун, кöть и деревняас олтöн, некöдöрö он ни шагньöлт. Быдман вот. Велöтчин. Даскыкьямыс вылат вуджин. Невеста ни, позьö висьталны. Колö аслат семья йылiсь думайтны. А тэнат эд öнöдз не вылат, не кокат — немись-нем кодяжыкыс отирыслöн моз абу.

— Мун жö, мама. Эн баит, кöдö оз ков, — зэркытакодь пондылiс панöвтны Таисья мамыслiсь баснисö. — Оз меным сы йылiсь думайтсьы.

— О-ё-ёй, дитя, тэнö баснинат — «оз думайтсьы». Думайтсьö али оз, муннытö кöркö сё ни колсяс. Нылка юрнат вектö он пукал. А мужикыстöг да семьяыстöг инька мортыслö абу ни олан.

— Рад, натьтö, кинкö ме кодьыс вылö...

— Рад, нерад, а думайтны семьяыс йылiсь сё ни колö. Эд и зонкаэс не быдöнныс öткодь бытшöм-басöкöсь. Ылöсöн-кодьöн кужан-верман асьтö видзны, дак и тэныт кинкö ас кодьöм пантасяс.

— Но эд висьталiсö жö тэныт, мама, — эта йылiсь ме ог думайт. Меным эшö велöтчыны колö.

— Эн на разь мыдз öнöдз велöтчынытö? Дас год сьöрна ни велöтчин да... Öшö разь етша?

— Етша, конешно. Шöрöтсö кончитi, а специальность некытшöм. Кыдз нö сэк уджавнытö? Сiдз, дак сы дырнасö и велöтчыны эз ков.

И вились мама-ныла лöньсисö вель дыр кежö. Вились быдыс ны коласiсь пондiс думайтны ас кежас. А Таисья öнi не сымда думайтiс, мымда видзчисис, мый висьталас мамыс.

— И кинö жö бы тэ велöтчан? Сё я мый я педат мöдан мунны? — дыр мыйись юалiс Дарья Семёновна. — Эн на веж думаэтö?

Таисья вöлi рад не только сылö, что чöлöмыс ны коласын чулалiс, а эшö этася öддьöнжык сылö, что вель дыр чöлöм бöрсянь мамыс эз кежöт бокö пондöтöм баснисö, нуöтiс одзлань.

— Ог, мама. Сельскохозяйственнöйö меным колö, агрономическöй факультет вылö, мед агрономöн лоны.

— Дыр кежö я?

— Вит год кежö.

— Вежöрта — колö, — гажтöма ыш ловзисьöм сорöн горöтчис мамыс. — Быдöнныс öнi велöтчöны. И падтынытö тэнö ме ог бы падты. Но думайт ачыт, мыйöн тэ сэтчин сы дырнасö пондан велöтчыны? Куш сепендийыт вылын эд сё ни он кыссьы. А ме?.. Ог кö веськал?.. Мый ме сэк öтнам эстöн?.. Кыдз?.. Али тэ эта йылiсь нем он и думайт?

Таисья кылiс, кыдз мамыс кыввез бöрсянь кытшöмкö сьöкыт да неколана вир чепöссис юрас, тупкис пеллесö, пондiс дзугны, пемдöтны да сорлавны ылöссö, кыдз вермис бы лоны юр кузя вынöн вачкöмсянь. Сiя адззис, — мамыс баитö одзлань, но нывка ылöсöдз сылöн кыввес эз ни сибалö. «Вот жö ылöстöм. Кыдз меным сымдаыс аслым юрам эз пыр? И мый вылö, мый вылö вöлi сэтшöм неколана кадас этö баснисö пондöтны? Велöтчöмыс увья?.. Аслам велöтчöм увья öтiк мам йылiсь, калекаыс йылiсь вунöтчи. Колö жö эд, колö жö... колö жö...» Öнi вöлись Таисья вежöртiс, что сы одзланься велöтчöм йылiсь ны коласын басниыс важын ни баитсьöм. Жаль только, что этö сiя одзжык некыдз эз казяв. «А быдöс сысянь, что думайтi дзир ас йывсим, аслам мечта йылiсь. А кыдз жö сэк сыкöт, мечтаыскöт? Эта жö олан, быдöс менам одзланься оланыс».

— Тайка! Тайка, мыся? Он я мый я менö кыл? — Дарья Семёновна сибöтчыштiс кинас нылыс пельпон бердöдз. — Баита, баита, а тэ шы меным паныт он сет.

Таисья дзик онувья саймöм бöрсянь видзöтöв-керис мамыс вылö.

— Ме кывза, мама, кывза, баит.

— Оз я, мыся, кыдзкö мöднёж тэныт велöтчынытö туй? Сяко тай öнi отирыс велöтчöны.

— Ог тöд, мама. Ме эшö думайта ас кежам. Оз ков эта йылiсь... Кöр тэ гортö локтан? Дыр эшö куйлöтны пондасö?

— Немись-нем ог тöд. Öнöдз, видзöт кикоксим пыкöсыс эз ям да. А ямас да лоас невночка кокнитжыкыс, дак корсьыны жö понда. Не курорт меным эстöн куйлынытö, кöр гортын уджыс горшви.

— Но и ась. Уджсö быдöс некöр он кер. Веськöтчы. Костi эн пет.

— А тэ, дитя, метöг сэтчин весь бöра эн жö ол. Абу ни эд учöт, ылöстан сымдасö. Кутшöм прок весь олöмсяняс? Сьöкыт ли кокнит — тырт жагöник картовсö ме локтöм вотöдз. И капустатö киськаллы, садитiн, висьталан дак. Жар погоддяыс. Косьмас сiя тэнат. Гряддэсö весöт. Да керкусö, видзöт менам, нятьöся метöг эн видз. Верман ни öнi джоджсö миськалнытö. Да тшыгйöн бöра эн жö ол. Пизьыс гортын эм — пöжаллы няньсö. Нылка морт эд, невеста ни да. — Скамьяыс бердын киэзнас видзсьышавтöн Дарья Семёновна жагвыв лэбтiсис коккес вылö, сэтшöм жö жагвыв нiйö öтамöд бöрсянь вештавтöн, иньдöтчис бöр пыранiн ладорö. Мамсö киöттяс видзышавтöн, Таисья оськалiс ордчöн. Палатаас ни нывка вöлись кватитчис.

— Ме эд, мама, тэныт гöстинеч вайи да нач перво жö вунöтчи.

Таисья кыскис сумкаись чочком нянь буханка, джын кило мымда пряниккез да неыджыт кулёкын конфетаэз, тэчис сiйö быдöс мамыс öлöдзö.

— Спасибо инö, вайин дак. Няньсö только сымдасö миянлö оз кол. Ачыт гортын сёян. А миянлö и эта тырмас. — Дарья Семёновна бертыштiс ^буханкалiсь джынсö, мöд джынсö сюйыштiс бöр нылыс сумкаö.

— Он пол öтнат гортöдз муннытö?

— Ог. Öтнам жö тай татчöдз локтi.

— Но мун, лысьтан дак, котöрт. Кинiсь тöдса туй вылас полнытö. Адззисьлiм недырик кежö. Кöть сьöлöм öнi местаын лоас. Мун, дитя. Мый эстöн кадсö весись öштыны, эта мымда удж гортын да. Некин эд сiйö миянлiсь тэкöт оз кер.

Таисья öшöтiс кисой вылас гортсянь босьтöм кофточка, босьтiс киас кокнямöм сумка.

Раиса, кöда саймис эшö ны пырöм коста да öнöдз пукалiс чöлöмöн аслас койка дорыш вылын, öнi вöлись горöтчис:

— Спасибо тэныт, Таисья. — Тшöканас öвтыштöмöн мыччалiс рузуммез коласын лöньсьöм зоночка вылö. — Узьö эд, видзöт, эта бöрсянь.

— Бур, узьö дак. Ась быдмö. А тэ, мама, эн ни ме сьöрö пет. Шоччись да веськöтчы буржыка. — Таисья оськöвтiс порог омöн, коридорсяняс ни öвтыштiс мамыслö кинас, петiс.