Пуэз да кустарниккез кытiсь лоис ирга?

Некытшöм ягöд оз быдмы да оз шогмы миян округись саддэзын сымда, мымда быдмö да шогмö ирга. Эта культураыс абу няр, вермöм бура велавны миян предуральскöй погоднöй условиеэз дынö. И дзир сiйöн ни, что садитiсö сiйö садö ли, йöрö ли, вештiсьö отирлö уна ягöда урожайöн. Городын ли деревняын оз адззись, натьтö, и öтiк сэтшöм сад, кöдаын эз бы пантасьö эта чöскыт ягöда культуралöн куст нето кык. Сiдз жö, натьтö, оз овлы и сэтшöм год, кöр ирга куст вылын эз бы шогмы ягöд. И мыйсö дзир сыись отир оз кер, кытшöмöн только сiйö оз сёй.

Вежöртана, что медöддьöн ирга ягöдсö радейтö поснит челядь. Неетшажык челядься радейтö сiйöн чöсмасьны и пышкай. Кыдз öттэс, сiдз и мöддэс часто пондöтчöны сёйны иргасö эшö дзорöн, вотöмöн, гöрднас. Видзчисьны ягöдлiсь воöмсö выть нылöн оз тырмы. Пондöтчасö сёйны гöрдсянь и сёйöны сiдз быд лун, киссьытöдз. Да, натьтö, эшö оз и пöтö. И оз позь висьтавны, кинлö эта коста дöнзьö унажык, то ли члядьыслö, то ли пышкайыслö.

Радейтöны сёйны куст вывсис ирга ягöдсö и пöрисьжык отир. А этася нiя сэтiсь пуöны вареннё да кисель, керöны квас, сулöтöны настойка, пöжалöны пирöггез, косьтöны тöв кежö, мед веськöтны поснит челядьлiсь мыт шогöт. А оз кö кин дышöтчы, дак свежöй öктöм ягöдсö вузалö эшö рынокын деньга вылö мöдiк отирлö. Но нельки эта бöрсянь уна саддэзын да уна кусттэз вылын вель уна ягöд сiдз и кольччö öктытöг да сёйтöг, киссьö му вылö да тальсьö отир кок увтын. А что тальсьö кок увтын, некытшöм бöбöтчöм эстöн абу. Часто ас гöгöр городын позьö пантавны сэтшöм картина, кöр ирга кусттэз увтöт тэчöм тротуар киссьöм да тальсьöм ягöдсянь мыччассьö краситöмöн нето мичöтöмöн. Этасянь, натьтö, позяс висьтавны, что ирга ягöдыс округас шогмö тырмöмви. А эта понда керис уна удж миян Кудымкарскöй плодово-ягоднöй питомник, кöда юралiсьöн уна год сьöрна вöлi ыджыт энтузиаст-садовод Иван Фёдорович Овчинников. Сы дырни да сы юралöм увтын эта ягоднöй быдмасыс декоративнöйсис вöлi пыртöм да пöртöм садовöй культураö. Сы юралöм увтын питомник пондiс быдтыны отир понда иргалiсь саженеццез, кöдна öння кадöдз паськалiсö миян питомниксянь уна тысячаэзöн не только округ, но и омöн Россия пасьта. Не этасянь я эшö öння кадö отир басниись часто позьö кывны, бытьтö бы И. Ф. Овчинников иргасö, кыдз садовöй культура, петкöтiс ачыс. Но эта не сiдз. Не И. Ф. Овчинников, не кинкö мöдiк сымдасö эз кер. Иргасö сiдз жö, кыдз, шуам, льöмпу да сэтöр, петкöтiс ачыс природа. Кыдз гижсьö «Декоративнöй дендрология» учебникын: «Мушар пасьта природаын сылöн пантасьлöны куим вид: ирга колосистöй, ирга канадскöй да ирга круглолистнöй». Этна куим вид коласiсь миян Союзлöн территория вылын, сы шöрöт полосаын, пантасьлö бöрьяыс — ирга круглолистнöй. Но миян округлöн территория пасьта ачыс эта культураыс оз быдмы. Сiдзкö, колö думайтны, что округас сiйö пыртiс морт. Кин жö эта мортыс, кöда керис ас отир понда, коми-пермяккез понда, сэтшöм добро? Кысянь, кöрсянь да кинсянь миян округын лоис ирга?

Думайтны кö сы сьöртi, кин пöртiс иргасö садовöй культураö да пондiс быдтыны питомникын сылiсь виль саженеццез, и округас сiйö пыртöмыс кыдз бытьтö бы усьö сiя жö И. Ф. Овчинников вылö. Но былись я эта сiдз? И мыйлö ме пондöтi этö баснисö? Медодз пондыла сетны ответ бöрья вопрос вылö.

Öткö, округись садово-парковöй растительность тырсьöтöм (богатсьöтöм) сьöртi уджыс öддьöн бур да колана. И керöм эта уджыс öннявиöдз вель уна ни. Талун кежö то öтiклаись, то мöдiклаись ми вермам адззывны да лыддьыны нёльдас-витдас гöгöр сэтшöм декоративнöй пуэз да ягоднöй кустарниккез, кöдна асьныс миян вöррезын оз быдмö. Колö думайтны, что нiйö быдöннысö кöркö да кинкö пыртiс. Но часто овлö сiдз, что отирсö, кин керö этö колана уджсö, ми бытшöма ог тöдö. Этасянь и петö сiдз, что öтiклiсь керöм уджсö ми сорасьöмöн вуджöтам (висьталам, гижам) мöдiк вылö. А керны сiдз, сорны достовернöй факттэз да дзугны ассиным национальнöй история, — кыдз небытшöм, сiдз и небасöк. Историяыслö бöбöтчанаöн лоны оз позь, сiдз кыдз сэк сiя пондас ачыс ни бöбöтлыны и миян бöрсянь олiсь отирöс, миянлiсь потомоккезнымöс.

А мöдкö, — мый лоас висьталöм одзлань ирга йылiсь, кысь сiя лоис, надейтча, пöрас бытшöм да колана урокö быд том и пöрись лыддьöтiсь понда, а медöддьöн ны понда, кöдна радейтöны вöдитны сад да кутчисьöны быдтыны сыын быдкодь ягöд.

Öнöдз эшö ми етша тöдам асланым медодзза учёнöй, коми-пермяк, географ и картограф, историк и археолог, этнограф и экономист Иван Яковлевич Кривощёков йылiсь. Но вот мый гижö сы йылiсь Б. Н. Вишневский аслас книгаын «Географ-краевед И. Я. Кривощёков», кöда петiс роч кыв вылын Пермскöй книжнöй издательствоын 1961 годö. «Арнас, 1892 годö И. Я. Кривощёков получитiс (босьтiс) Казанскöй земледельческöй школа питомникись быдкодь виль пуэзлiсь да кустарниккезлiсь саженеццез. Арыс да тöлыс Поволжьеись пыртöм быдмассэз понда вöлiсö öддьöн неблагоприятнöйöсь. Чуть я не джын январь месяцöдз эз вöв лым, кöть декабрь кыкдас числоэзöдз и сулалiсö гырись да лёк мороззэз. Март медодзза декадаö вöлi ыджыт ульга. Шондi мороса крут керöссэз вылiсь сылiс быдöс лым и нiя кушамисö. А эта бöрсянь вились вачкисö мороззэз. Сэтшöм неблагоприятнöй условиеэзын, то ульга, то лёк мороззэз коста, ковсис велавны быдмыны виль быдмассэзлö, кöдна вöлiсö пыртöмöсь Иньва ю бассейнö. Аслас медодзза садоводческöй опыт йылiсь И. Я. Кривощёков юöртiс «Естествознаннё радейтiсь Уральскöй обществолöн запискаэзын».

Сiя жö книгаын авторыс одзлань юöртö: «Öння кадö городскöй паркын, кöда талун кежö шуöм И. Я. Кривощёков нимöн (примечаннёыс менам — Т. Ф.) быдмöны лиственница, сыспу, сирпу, веж акация, канадскöй чочком тополь, клён американскöй (ясенелистнöй), ыжман татарскöй, сирень, спирея, мöдiк пуэз да кустарниккез». Сэтчö жö эшö колö содтыны и кульльöм (крушина слабительнöй или жостер), кöдалöн öтiк кустыс садитöм сiдз жö И. Я. Кривощёков киэзöн да кöда дзир öтiк быдсöн округ вылö и эшö ловья.

Одзлань Б. Н. Вишневский сiя жö книгаын гижö: «Коми-пермяцкöй садоводство пондöтiсь пример сьöртi вöтчисö и мöдiк, Кудымкарын да матiсь селоэзын олiсь отир. Декоративнöй да садовöй растениеэзкöт акклиматизация сьöртi опыттэз бöрсянь Иньва ю бассейнын пондiс зорамны любительскöй садоводство». Сiя жö страница вылын одзлань авторыс юöртö эшö то мый: «Пондöтöм И. Я. Кривощековöн садоводческöй дело получитiс советскöй кадö одзланься зорамöм. 1935 годсянь Кудымкарын уджалö плодово-ягоднöй питомник, вежсьывтöм юралiсьöн кöдаын лыддиссьö И. Ф. Овчинников.

Энтузиаст-селекционер И. Ф. Овчинников обратитiс вниманнё И. Я. Кривощековöн садитöм ирга вылö...» Вот кытöн, тыдалö, и эм ответыс миян одзын сувтöм вопрос вылö: кытiсь лоис округын ирга? Петö сiдз, что и иргасö, кыдз и мöдiк виль пуэз да кустарниккесö медперво пыртiс округас не И. Ф. Овчинников, а сiя жö И. Я. Кривощёков. Мый керис И. Ф. Овчинников дак «обратитiс вниманнё И. Я. Кривощековöн садитöм ирга вылö». Быдöс лоö вежöртана. Эта вылын бы, натьтö, и позис сувтöтны точкасö. Но тэрмасьны ог пондö.

Природа дозоритан окружнöй обществоын уджавтöн меным неöтпырись да не öтiк мортсянь усьлiс кывлыны и сэтшöм басниэз, бытьтö бы И. Ф. Овчинников не только «обратитiс вниманнёсö И. Я. Кривощековöн садитöм ирга вылö», но и гарйис да нöбöтiс И. Я. Кривощёков садiсь ирга кустсö аслас садö. Этасянь вöлись И. Ф. Овчинников бытьтö бы öктiс кöдзыс да пондiс быдтыны питомникын посадочнöй материал — саженеццез. Вермис лоны и сiдз, но... Лыддьыны кö, что талуннявиöдз И. Я. Кривощёков хозяйствоись нем «ловйöн» эз ни кольччы — миян кадö ни керкусö сылiсь разисö, а садсö быдсöн гарйисö-бергöтiсö да сувтöтiсö сiя местаö, отирыс шуанöн, «дворянскöй гнездо» — ирга кустсö аскадö дорйöм-дзимлялöмись, вöвны кö бы эталö былись сiдз, умöльсö ме нем ог адззы. Но мед нем казявтöг не соравны, да сибöтчыны матöжык истина дынö, видзöтам, мый гижö эта культура йылiсь ачыс И. Ф. Овчинников.

Аслас брошюраын «Ирга» И. Ф. Овчинников висьтасьö эта йылiсь то кыдз: «Кудымкарскöй плодово-ягоднöй питомник нуöтö иргакöт уджсö 1939 годсянь. Сэк кежö питомник получитiс (босьтiс) невна иргалiсь кöдзыссö И. В. Мичурин нима Центральнöй генетическöй лабораторияись, город Мичуринскын Тамбовскöй областись (примечаннёыс менам — т. Ф.), а сiдз жö öктылiс гортын садовод-любитель Широв садын». Кыдз адззам, не И. Я. Кривощёков йылiсь, не сы удж да сад йылiсь И. Ф. Овчинников нем оз касьтыв. Сiя гижö мöдiк садовод-любитель йылiсь, кöда садiсь öктiс ирга кöдзыс. Сiдзкö, И. Ф. Овчинниковлöн, а висьтавны мöднёж, Кудымкарскöй плодово-ягоднöй питомниклöн иргакöт удж вотöдз эта культураыс округас вöлi не только пыртöм, но мымдакö нельки паськöтöм ни.

Оз позь эстöн кольны бокö и сэтшöм фактор, что И. Я. Кривощековлöн медодзза опыттэзсянь, висьтавны точнöйжыка, 1892 годсянь 1939 годöдз кадыс чулалiс вель уна, чуть не джын век. Вежöртана, что этöн каднас ирга, нельки öтiк кустсянь, вермис паськавны тöдчöмöн. И гарйыны И. Ф. Овчинниковлö И. Я. Кривощёков садiсь ирга куст, некытшöм нужда, думайта, эз вöв. Эд сылö, кыдз садоводлö, иргалiсь виль саженеццесö быдтöм понда колiс медодз не сiдз иргалöн садовöй куст кыдз сылöн кöдзыссэз. А эта понда позис öктыны асьсö ягöд и не только И. Я. Кривощёков садын, но и мöдiк садовод-любитель саддэзын, кöднаын сэк кежö эта культураыс тожö быдмис ни.

Быдöс вывланьын висьталöмись ми адззам, что первуись, эшö 1892 годö иргасö округас пыртiс медодзза миян учёнöй коми-пермяк, сiя жö эшö и садовод-экспериментатор, И. Я. Кривощёков. А 1939 годсянь мöдiк садовод-энтузиаст И. Ф. Овчинников пондiс быдтыны эта пыртöм культуралiсь виль саженеццез. Ог сорасьö, висьталамö кö сiдз, что И. Ф. Овчинников керис одзлань сiйö, мый эз ешты керны И. Я. Кривощёков.

Сiдз кык энтузиастлöн керöм удж сетiс округись отирлö виль садовöй культура — ирга. И эта öддьöн бур да колана пример быд мортлö, кöда радейтö видзны сад, быдтыны сыын виль, кыдз плодовöй да ягоднöй, сiдз и декоративнöй культураэз, мед тырсьöтны этöн округись садовöй да парковöй растительность.

Вывланьын вöлi казьмöтöм ни, что округись садовöй да парковöй культураэсö тырсьöтöмыс — удж öддьöн интереснöй, бур да колана.

Кольччö висьтавны, что талун кежö эта уджыс керöм эшö ылын не быдсöн. Мушар пасьта адззисясö эшö унася-уна быдкодь и декоративнöй, и плодовöй, и ягоднöй культураэз, кыдз, шуам, каштан да секвойя, актинидия коломикта да инжир, кизил да лимонник, кöдна округ природаын асьныс оз быдмö. Но пыртны кö ны коласiсь кöть бы мукöдсö, сiдз жö, кыдз вöлiсö пыртöмöсь ас кадö ирга, крыжовник, вишня, гöрд льöм да мöдiккез, этöн эшö öддьöнжык позис бы тырсьöтны миян округись садовöй да парковöй культураэз.

Кынымкö рассказын сэтшöм культураэз йылiсь да мукöдсö ны коласiсь округас пыртöм йылiсь лыддьöтiсь одзлань тöдсасяс.