Пос дорын

Кырас весьтöт посыс вöлi умöль. Этö зоночкаэз казялiсö перво жö. Вöвдлöмась сiйö важын ни да эшö доль, öнöдз важ поспуэс унажыксö ештöмась сiсьмыны. Мукöдыс ны коласiсь вештассьöмась бокö. Керны жö вильсö кытчöдз эз ештö. Вуджны сэтшöм пос кузя полöм петö нельки подöн. Сiйö и видзöт, нильдан, усян да коктö пиньöвтан. А челядьлö колiс вуджны вöввезöн да эшö грузöн. Кежны бокö оз туй. Кырас пыдöсыс небыт, вöтяна.

Витя да Миша сё эшö дзарышалiсö öтмöдöрö. Эта коста Толя вуджалiс подöн мöдöрас, видзöтчис. А сэсся зонка бертiс бöр, сувтiс ёрттэс одзö.

— Но, мый пондам керны?

— Вуджны колö, мый разь эшö этася, — шыасис паныт Витя. Миша чöлiс.

— А кин медодз вуджас?

Эта вылö зонкаэз некöдыс эз шыасьö.

Медодз колiс бы лэдзны Мишалiсь Дюттянсö. Вöв сiя медпöрись и, натьтö, неöтпырись ни вуджавлiс этна поссэз кузя. Сэтчö жö Дюттян вöлi дыш да неполiсь. Не весь сiя и нимсö сэтшöмö новйöтiс. И вуджны кö сылö мöдöрас, сы сьöрö мöд вöввес вуджисö бы кокнитжыка, но кöр Толя казялiс Мишалiсь, кыдз зэран кымöр, кымöртчöм чужöмсö, чöлöмöн веськöтiс ассис Рыжкосö поспуэз вылö, лэдзис.

— Но, Рыжко, но! Мун жагöник вудж, — кыдз мортлö, рамыника висьталiс Толя вöлыслö. И Рыжко вежöртiс ассис хозяинсö. Сiя мыйкö дырна модейтыштiс местаас, корскöтыштiс нырнас, жагвыв сувтiс одзись коккезнас поспуэс вылö. Кадiсь кадö сувтчышалöмöн да кок увтсис поспуэсö пешлöмöн, вöв жагвылика иньдöтчис кырас мöдöрас. Челядь видзöтiсö сылö бöрсяняс, видзчисисö мый лоас. А эта коста пиняэзнас няридзыс кыссис сё одзлань да одзлань. Мунiкас Рыжколöн коккес мынлiсö поспуэз вывсянь. Сэк вöв недырик кежö сувтлiс. Сiя нюкайтчис, видзöтчис, а сэсся кань моз небытика вились тэчис коккесö, кыссис одзлань. Вот сiя пос шöрас ни, вот ылынжык, эшö ылынжык. А вот, топ повзьöмувья, Рыжко перыта чепöссьыштiс одзлань, вуджис коккезнас нильыг поспуэс вылiсь чорыт му вылöдз. Дырснитчис му бердö няридз. Жолькнитiсö öтамöд коласын пиняэз. Рыжко вöлi мöдöрас. Сiя сэтöн жö, топ зi, мöртчис нырнас турун бердö. Челядь кокнита ловзисисö.

Öнi Витя вайöтiс ассис Чалкосö пос дынас. Этакöт вöлi сьöкытжык. Кыдз-некыдз, том вöвлöн полöмыс унажык, а кужöмыс етшажык. Этасянь сiя и тэрмасьö. Но умöль местаын вöвсö видзны нето тэрмöтны оз ков. Быд ассис оськöвсö сiя лыддьö да керö ас мознас и буржык сiйö этаын не сорны.

Медодзза жö оськöввез коста Чалко нильдiс коккезнас поспуэз вылiсь, да аскадö ештiс сувтны бöр. Но повзьöмыс эстöн ни сетiс тöдны ас йывсис. Витя кылiс, кыдз Чалко пондiс тогзьыны эта бöрсянь быдсöн вывтырнас. Бöрсяняс Толя ёртыслö горöтчис:

— Джöмдас кö нето нильдас усьтöдз — чеччöвт бокö!

Но öтiк дело — висьтавны, нач мöдiк — керны. Вöлыс нильдiс пос шöрас. Нильдыны бы сылö бöрись кокнас, умöльыс да полöтанаыс нем эз бы вöв. Но Чалко нильдiс одзисьнас. Повзьöмувья сiя чепöссис одзлань, но поспуэз коласö вöйöм коксö кыскыны аскадö эз вермы, сэтöн жö усис ныр вылöдззас. Эта коста Витя видзсис кыкнан кинас вöлыс вылын да видзис сю мешöксö. Чеччöвтны зонка эз ешты, öтлаын сю мешöкыскöт сiйö топ кинкö нетшкöвтiс вöлыс спина бердiсь. Витя усис пос бокас, морт сувдöн лэбтiсьöм лобозь турун коласö. А сюнас тыра мешöкыс инмис вылас да ёнакодь личкис му бердас.

Усьöмсяняс зонка не сымда доймис, мымда повзис. Но эз на ешты сiя шыасьны, кыдз Толя ёртыс вöлi ордчöн ни. Зонка перыта кыскис ёртыс вылiсь сю мешöк, мöдiс отсавны чеччыны. Но мöдыс ачыс сувтiс коккес вылö.

Чалко öтнас ни, сю мешöктöг да ямщиктöг, тожö вермис сувтны коккес вылö бöр, тэрмасьöмöн вуджис пос мöдöрас, сэтчин вöлись пыркнитiс бердсис нятьсö да тожö пондiс сёйны.

— Но вот и ёртасим. Доймин? — Юалiс Толя ёртыслiсь.

— Да э-эг. Турун коласас уси да. Ме только вöлыс понда повзи. Эз жö эд, поди, коккесö дойд?

— Но эн доймы и бур. Да и вöлытлö нем, натьтö, эз ло. Доймис бы, дак эд чотiс ни, оз тай тöдчы чотöмыс.

Эстöн вöлись зонкаэз гажмыштiсö, пондiсö серавны. Не уна вöлi гажыс вöв вылiсь усьöмсянь, но гажöтiс кö сiя öнi челядьöс, сы сьöртi ни позис вежöртны, что умöльыс нем эз ло.

— А кыдз нö öнi, Толик, мешöксö пондам лэбтыны?

— Чöв, часöт мыйкö керам. — Зонка дзирбарасьыштiс öтмöдöрö. Син вылас сылö усис тöлöн пöрöтöм кыдз, кöдалöн дыныс вылынакодь öшалiс мыр бердас. Кыдзыс дынöдз вöлi даскыным метр ылына. Сэтчö зонкаэз и кыскисö тыра мешöксö да лэбтiсö медперво эта дын вылö. Сэсся Витя вайöтiс Чалкосö зэв пöрöм кыдз бердас, а Толя мöдöрсяняс пöрöтiс сю мешöксö вöлыс вылö.

— Сымда и вöлi.

— А ме думайтi, огö ни вермö бöр лэбтынытö, рудзöг эд.

Эта коста Миша мыр моз сё эшö пукалiс аслас Дюттян вылын, кырас мöдöрас. Кадiсь кадö, кыдз тупка, сiя бергöтлiс юрсö да сöдзöм синваэзпыр видзöтышалiс горт туй ладорö. Дюттян жö, öвадсö вашöтлöм могись, дыша öвтышалiс бöжнас да öмтырнас няжйис-сёйис туй бердсис небытик турун. Некöдыслö ны коласiсь кыдз бытьтö и дело эз вöв сы дынöдз, что мöддэс вуджисö ни мöдöрас, и нылö тожö колö вуджны.

— Но, мый нö видзчисян, он вудж? — юалiс Толя кырас мöдöрсяняс. Эстöн вöлись Мишалöн öмыс и жугалiс. Зонка адззылiс вöлыс вылiсь ёртыслiсь нöбасьöмсö. И кöть Витя и эз норась некытшöм доймöм вылö, Миша повзис. Горзöмсяняс мыкталöмöн, дыр мыйись сiя шуис:

— Ме ко-ко-ли о-ог лысьт ву-ву-уджнытö-ö-ö!

— Мый лоис? Мыля он лысьт?

— Вö-вöлыс ко-ккесö чег-чегла-ла-а-а-ас.

— Но он лысьт, дак сiдз сэтчин и сулав. А ми мунам.

Эстöн вöлись Миша горöтiс быдгоршись. Позис нельки думайтны, что паныт сылö сибöтчö ош, кöда шогья воштiсьны нач некытчö.

— Но вудж! Учöтик ли мый ли тэ, бабö моз жö герьялан.

— А кы-кыдз ме öт-öтна-ам ву-ву-вуджа-а-а?!

— А кыдз нö ми вуджим? — öнi Витя ни шыасис паныт Мишалö. Миша лöньсис, но местасис эз вöрзьы.

— Вот кын Педöт! — видчыштiс Толя да иньдöтчис поспуэс кузя кырас мöдöрас. А кöр пондiс сибöтчыны Миша дынö, повзьöмувьяс зонка веськöтiс вöвсö бöр гортлань. Сiя, тыдалö, думайтiс, что лöгöтöм Толя пондас косясьны, и эстöн, пыд вöр коласас, Мишаöс нельки некинлö дорйыны.

— Сулав! Кытчö бергöтчан?!

Миша лэдзис кисис поводдэсö, дорйисьöм могись нiйö жö лэбтiс вывлань, горзöмöнсорöн шуис:

— Пондыв только, пондыв. Ме гортын айöлö быдöс висьтала, вот.

— Мый тэ гортын айытлö висьталан? Сiйö, кыдз он лысьт кырас мöдöрас вуджны да пос дорас, топ шойна дорын, быдгоршись герьялан-горзан? — Толя босьтiс сермöт бердiсь киас поводдэсö. — Лэдзчы вöлыт вылiсь.

Повзьöмувьяс Мишалöн синнэс пондiсö ыждыны. Зонка некыдз эз вежöрт, мыйлö сiйö тшöктöны лэдзчыны вöв вылiсь да мый вермас лоны одзлань. Сiя эз тöд, кытчö воштiсьны и шардöмкодь синнэзöн ёртыс вылö видзöттöн вöрöтчытöг кольччис пукавны аслас Дюттян вылын.

— Лэдзчы, мый ме вылö синнэтö сувтöтiн?

— Мыйлö ме лэдзча?

— Ме шуи: лэдзчы. Он — ачым лэдза. Некöр меным эстöн тэнö пестунничайтнытö. Кадыс оз видзчись.

— Ме бöр гортö муна, вот.

— Но мун! Ог горзö тэ понда, — Толя лэдзис кисис поводдэсö. — Мун. Мун и висьтав бригадирыслö, что Гажа Грива дынас кырассö вуджны эн вермы. Ашын сэк айтö татчö кайöтан и сiя тэнö киэс вылын вуджöтас. Кысь тэныт öтнасытлö вуджнытö. Тэ жö эшö кага, дитя, вöзабыдтöм зон.

Толялöн кыввес Миша ылöсöдз сё жö йиджисö. Мöдöтпыр да мöдiклаын сiя кутчисис бы видчыны паныт, кыдз кужис-вермис, пондiс бы нимкодявны ёрттэсö. Но талун керны сымдасö сiя эз лысьт. Вежöртiс зонкаыт, что татöн сiя öтнас. Не ай, не мам ордчöн сыкöт эз вöлö, и сувтны сы дор вöлi некинлö.

Мыйкö дырна Миша эшö тiлис горзöмсянь гöрдöтöм синнэсö, а сэсся кыдз тыра мешöк, гужнитiс-лэдзчис аслас вöв вылiсь.

Толя ачыс ни вайöтiс сылiсь Дюттянсö пос дорас, чапкис поводдэсö вöвлö сиви вылас, лэдзис. Дюттян жагвыв сувтiс поспуэз вылö, ны бердöт нырсö нуöтöмöн, повтöг да тэрмасьтöг вуджис кырас мöдöрас. Поспуэс кузя мунтöн сiя öтпырись не эз нильды, не эз джöмды.

— Но мый, чеглалiс Дюттяныт коккесö? — сералöм могись юалiс Толя ёртыслiсь, кöр вöлыс вуджис мöдöрас ни.

Паныт Миша дзир вирснитiс нырнас да бергöтчис мöдöрö.