Лолалан шор

МЕ ОЛАНIСЬ

БЕЛЬПУ

ВАРЕННЁ КÖР

ВЕЛЬМÖМ КÖЧ

ВЕСÖТЧИСЬ

ВИЛЬ ЯГÖД

ВИШНЯ

ВÖРМÖССЭЗ

ВÖРПИ

ВЫНСÖ НЕ ОДЗÖСТНЫ

ГАГПЫЖЬЯН

ГОГОЛЬ-ШОГОЛЬ

ГОЖУМ ШÖРНАС

ГОРТТШАК

ГÖНАГАГ

ГÖРД ЛЬÖМПУ

ДИВО-КЛЮЧ

ЕНÖЖ КАРТИНАЭЗ

ЗÖРТУСЬПУ

КОРИСЬ

КÖДЗЫВ ТУЙЕЗ

КÖДЗЫВВЕЗ

КЫДЗТШАК (БИТШАК)

КЫТIСЬ ЛОИС ИРГА?

КЫТШÖМ МИЯН БАДЬÖГ

ЛОВЬЯ ЛЫМ

ЛОЛАЛАН ШОР

ЛЫМ ДА ЦВЕТ

ЛЫМЬЯГÖД

ЛЫСПУ

ЛЬÖМПУ ДА ТАГ

ЛЯГУШКАЛÖН ТÖВЙÖМ

МАНЬЧЖУРСКÖЙ ОРЕХ

МЕДБАСÖК КЛЁН

МЕДЧÖСКЫТ ЯГÖД

МЕНАМ ЫБШАР

МОНГОЛЬСКÖЙ ГÖСЬ

МЫЛА

МЫРРЕЗ ГОРОДЫН

МЫРТШАККЕЗ

ОЛЬТШАККЕЗ

ÖМИДЗ

ÖМИДЗРÖМА ГОВК

ÖШАЛАН ВÖР

ПЕЛЬКЫТША КРАН

ПИЯНА ОШ

ПОВТÖМ ДЗÖДЗЫВ

ПÖРИСЬ КАНЬ

СЕРА ГОРА КАЙ

СIДЗКÖ, ЛОВЬЯ

«СМЕРТЬКÖТ» ПАНТАСЬÖМ

СÖСТÖМ ЧОЧКОМ БОКА

СТОЛББЕЗ ОРСÖНЫ

СЬÖДКАЙ

СЬÖДПЕЛЬ

СЭТÖРЛÖН КÖР

СЮРА БАБЫВ

ТÖВСЯ КУПАЙТЧÖМ

ТУЛЫСЛÖН СЛЕДДЭЗ

ТУРИГУМ

ТШАК-ПУШКА

ТШАКЬЯЛIСЬ УР

УРКАНЬ

ХИЩНИК-КАЙ

ЧАВКАННЭЗ

ЧÖСКЫТ ТШАК

ЧÖСМАСИССЕЗ

ШЕР БÖРСЯНЬ

ЮССЕЗ

ЯГÖДАЛIСЬ МÖССЭЗ

Ме оланiсь Гижисьлöн автобиографияись тор

Гижны мортлö ассис биография лоö не мый мöдiк, кыдз отир одзын бöбöтчöм. Былись эд. Лыддьöтан сiдз кинлiськö гижöмсö — чужи то кöр, то кытöн да то кинсянь и сэтöн жö думайтсьö, кысь нö сылö вöлi тöднытö, кытшöм местаын, кöр да кинсянь чужис, ежели мортыс эта кадö нельки асьсö оз тöд? Природалöн этна таинственнöй явленнёэс, кыдз чужöм да кулöм, не чужись, не кулiсь тöдвылын оз видзсьö.

Кин вот, ноко, лыддьöтiсь отир коласiсь вермас висьтавны ас ылöссянь да ас йывсис, кöр, кытöн да кытшöмöн сiя мыччисис свет вылö да мый пондiс керны одзлань? Висьталас, батi, что перво жö корис аймамыслiсь паськöм-кöмкöт, мед кöмасьны да пасьтасьны? Эд кöть и баитöны мукöдыс йылiсь отирас, бытьтö пö «родился в рубашке», дак этö дзир мукöдыс йылiсь. Унажыкыс йылiсь жö баитöны — «в чем мать родила». Колö вежöртны сiдзкö, что этна унажыкыс, то ли асланыс тэрмасьöм увья, то ли эшö мыйсянь, чужöны свет вылас пасьтöмöн. А чужöмыс вермас лöсявны не только гожумнас, но и кöдзыт тöв коста. Кöмтöг-пасьтöг сiя кадö овны оз позь, а кайны перво жö горвылö прок оз тырмы. Этасянь сiйö и видзöт тöрстан или, кыдз эшö баитöны миян косинскöй говор вылын, оча кок шваткан. Но корис я кин чужöмыс бöрсянь аймамыслiсь кöмкöт-паськöм: вуруновöй шöртiсь гöрдззöм чупиэз, ползуноккез сэтчин, или распашонкаэз, или талуння кроссовкаэз, джинссэз да свитер, сымдасö некинлö висьтавны оз позь сiдз жö, кыдз оз позь висьтавны ас ылöссянь, кöр, кытöн да кинсянь тэ шогмин.

Вот и ме тожö. Мый дырна ола эта свет вылын, сы дырна мырся уськöтны тöдвылö (интересно эд сё жö тöдны ас йывсит) кöр, кытöн да кинсянь тэ шогмин. Но быдöс весь. Сымдаыс тöдвылö кытчöдз оз усь. Батi, сёрöнжык кöркö... И усяс кö эта тöдвылö сёрöнжык, вежöртана, сайöвтны лыддьöтiссянь некöр ог понды, кыдзкö сё ни висьтала. Но этö дзир кöркö, кыдз баитсьö, кöр кöрыс котöртас. Öнi жö?.. Колö кö кинлö тöдны, кольччö öтiк, висьтасьны эта йылiсь йöз баснисянь.

Сiдз вот. Веритны кö ме ним вылö сетöм метрикалö (свидетельство о рождении), чужсьöм менам эта свет вылö не öддьöн бытшöм историческöй 1937 годö, бöрья тöвся месяцö — февральнас, 11 числоö, кöр овлö, что лэбтiсьöм пурга увья не син, не пель оз тыдав. Тöдны бы сымдасö одзлань, некöр бы эг и согласитчы. Чужи бы кытöнкö март конецö, кöр пондö саймыны быдöс ловьяыс, кöр оз ков куйлыны горвыв сёрдын, а позьö ни петны öтöрö да шонтiсьыштны дзирыт шондi югöррез увтын.

Чужанiныс менам — Косинскöй районiсь деревня Новожилова. Сiдз гижöм метрикаын. А висьтавны кö точнöйжыка, мамö басни сьöртi, Новожиловскöй начальнöй школа, кытöн сiя кадö мамö, Созонова Пелагея Петровна, уджалöм техничкаöн.

Сы висьтасьöм сьöртi, зыбкаыс туйö меным вöвлöм горöдз — овлö, кöр горвылас ачыт кайны он чайтчы, — а медодзза пестун-пестунняэзнас — нiя челядьыс, кöдна велöтчöмась сiя кадö школаын.

Айö, Фадеев Павел Егорович, чужлöм Октябрьскöй революция вотöдз кык годöн одзжык (1915 г.) ыджыт крестьянскöй семьяын витöт или кватьöт зонöн, но кыдзкö вермылöм мымдакö велöтчыны, вöлöм грамота тöдiсь мортöн. Мамö висьтасьöм сьöртi, 1935 — 1936 годдэзö сiя уджалöм колхозын председательöн. Менам чужан годö сiйö босьтöмась действительнöй военнöй служба вылö.

Айöс тöдiсь отир басни сьöртi, служитöм сiя кавалеристöн. Кынымкö год бöртi сiя вовлöм öтпырись отпускö, но чожа мый мунöм бöр. Думайтсьö — вöлi эта война одзся 1939–1940 годдэзö. Год нето кык сьöрна сiя ештöм кончитны кытшöмкö танковöй училище, а 1941 годö лэбтiсис война. Эта жö годö, сентябрь месяцö, младшöй лейтенант званнёын сiя öшис без вести Калининскöй фронт вылын.

Отирыс да мамö висьтасьöм сьöртi, айö вöвлöм гажа мывкыда, кокнит кок йыла, чож мортöн. Сiя вермывлöм бытшöма баитны отир одзын, кужлöм сьывны да йöктыны, бура орслöм гармоння вылын. Мый сiя мöдiс вермыны керны оланын, кытшöм мечтаэз зорöтiс одзлань кежö, сымдасö ме ог тöд.

Ачымöс эта оланын пондi вежöртны куим годсянь и бöртiжыкся оланiсь öтi-мöдi тöдвылын кольччис ни.

Олi ме мамöкöт и не ас угöлын (сэтшöмыс миян дыр эз вöв), а кинлöнкö простöн сулалан керкуэзын. Не дед, не баб, не пöрисьжык сой нето вон менам тожö эз вöлö. Эз вöв деревняас и ясли-сад, а мамöлö лунiсь лун ковсис уджавны. Эта увья учöтсянь, кыдз пондi вежöртны ачымöс, олi öтнам. Суськисьны нем — кольччыны öткöн лунтыр кежö пемыт, лöнь, гажтöм да сэтчö жö эшö öтöрсянь игана керкуын некытшöм охота и эз вöвлы. Удж вылö мунтöдз мамö вель дырöн ылöтлiс, мед ме кольччи да эг горзы, и сiдз кыдз воштiсьнытö этася вöвлi некытчö, дыр мыйись ме и былись кöсйисьлi, и вермывлi видзсьыны горзöмсис сэтчöдз, кытчöдз эз пöднассьывлы мамö бöрсянь ыбöс. Но колiс дзир кывны, кыдз мамö öтöрсяняс игнавлiс тув нето замок вылö посöдз ыбöс, и петны öтöрас эз ни позь, ме горзытöн уськöтчывлi öшын дынö, кори, мед осьтiс. Эта корöм-горзöмыс эз ни отсав. Мамöлö колiс уджавны. Куранöн нето литовкаöн пельпон вылын сiя тэрмасис сайöвтчыны син одзись: надейтчис, натьтö, что эта бöрсянь ме горзынытö дугда, нето горзöмыс оз понды сибавны сы пельшы бердöдз. Син одзись сайöвтчöм бöрсянь сы пельшы бердöдз менам горзöмыс, натьтö, и былись эз ни сибав, но нельки сэк горзынытö ме эг дугдыв. Öшын одзын пукавтöн горзывлi атшавтöдз, а кытшöмкö кадö, нач вынтöмсялöм, сэтöн жö ланьтлi.

Саймöм бöрсянь, эз кö бертлы сэк кежö мамö, вились пондöтчывлiс сiя жö. И сiдз лунiсь лун.

Мед кöть невночка гажöтны менчим öткаса олан, кытшöмкö кадö мамö вайöтiс меным ёрт местö сьöд-чочком сера каньпиянöс. Овны сыкöт лоис и былись гажажык. Но медодзза кадö каньпияныс вöлi сэтшöм учöт, что нельки гор вылö ме сьöрö кайны эз вермы. Лэбтыны жö сьöрам ме сiйö эг лысьт, полi, что сэтчинсянь сiя казявтöг вермас усьны да вийсьыны. Сiйöн, кöр ме кайлi горвылö (а колö думайтны, что эта вöлi тöвнас ни), а сiйö öтнассö кольлi джоджö, гажтöмсянь каньпиян пондывлiс горöн нявзыны.

Кыдзкö öтпыр нявзöмсис öлöтöм увья, ме чапки гöбечсянь каньпиянлö ки увтö шедöм луковка. Повзьöм увья сiя медперво вылына чеччöвтiс нёльнан лапа вывсянь, мегырöн кöстiсьöмöн мыйкö дырна кежö кольччис сулавны öтiк местаын, видзöтiс. Сёрöнжык каньпиян, тыдалö, вежöртiс, что вылiсянь усьöм луковка чепöссьыны сы вылö оз думайт. Сэк сiя сибöтчис луковка дынöдз, öтпыр-мöдöтпыр вöрзьöтiс сiйö лапанас ачыс. Луковка сильöтыштiс кышнас, бергöтчис, тарöвтчис. Эта каньпиянлö, тыдалö, гленитчис. Нявзыны гажтöмсянь сiя дугдiс, пондiс орсны. Каньпиян тарлалiс луковкасö джодж пасьта, сы сьöрын жö вöтлiсис ачыс, панлалiс сiйö то öтöрсянь, то мöдöрсянь, то чеччалiс сыкöт öтлаын, то быглялiс. Гажа вöлi сылö, гажа и меным. Но кытшöмкö кадö луковка инмис тарöвтчыны западня увтын джодж бердöт писькöтöм кань öшынö, усис джоджулöдз. Орсны каньпиянлö одзлань лоис немöн. Гаж чулалiс. Сiя вились пондiс нявзыны. Сэк ме чапки сылö вылiсянь и мöдiк, и куимöт луковка, а сэсся эшö да эшö. Каньпиян орсiс. Сiя котрасис усялан луковкаэз сьöрын, катлялiс нiйö угöлiсь угöлö керку пасьта, быглясис, чеччалiс, вöтлiсис.

Эта орсöмыс вöлi сэтшöм гажа да интереснöй кыкнанным понда, что одззася гажтöмтчöм да горзöм йылiсь и дума некытшöм эз ни вöв. Ми вунöтчим нельки кад йылiсь. Эг и казялö, кыдз эта орсöм-гажöтчöм коста чулалiс лун. Рытъявыв кадöдз, мамö локтiк кежö, мешöк да джын мымда лук, кöда куйлiс гöбечас, вöлi лэдзöм джоджö да рознитöм омöн керку пасьта.

Вöвлi и мöднёж, кöр месся год-мöдöн пöрисьжык челядь, деревня кузя котрасьтöн, кывлiсö менчим öткаса горзöм. Нiя повтöг осьтлiсö меным öтöрсянь игналöм ыбöс. И сэк жö ме тожö сюрлi öтöрö.

Кöдзыт я, шоныт я вöвлi öтöр, эта йылiсь сэк эз ни думайтсьы. Пыртны бöр иган увтö сэсся менö и арканöн эз ни позь, кöть учöт увья ас керку дынiсь ылö и эг ветлыв, частожыксö бергалi посöдз гöгöр. Но вöвлi, кöр нiя жö челядь бöбöтлöмсянь вунöтлi аслам гажтöм горт да каньпиян ёрт йылiсь. Частожыксö вöвлi сiдз шоныт гожумся кадö. Гажа ватагаон ми лэдзчывлiм джын километр ылына деревня дынсянь Арьяшор дорöдз, «кульмим» сэтчин лунтыр пидзöс сувда ваын: кыйим чолиэз да аргышшез, керим горрез, быглясим да жаритчим веж песок вылын. Бур, что шор дорын — вöйнытö вöлi некытчö.

Колö висьтавны, что öтнам керкуас ме пукавлi не пыр. Шочыника эта коласын вöвлi, кöр мамö колявлiс менö лун кежас матiсь соседдэз ордö, пöрисьжык челядь дынö. Вот мый кольччис тöдвылын Костя Гриша соседдэз ордын олöмись.

Öтöрын гожум. Ытшкисян страда. Сулалöны, кыдз баитсьö, ви вийöтан луннэз. Быдöс уджалiсь отир видз вылын: ытшкö да куртö. А Костя Гриша, Олёп Костя айыскöт — бöрьяыс кöдна коласiсь и колхозас некöр эз пырав — пируйтöны асывсянь.

Ми — а этö Костя Гришалöн год куим-нёльöн месся пöрисьжык ныв-зон, Люба, Веня да ме, кыдз шыррез, дзебсисьöмöн куйлам пöлать сёрдын. А нiя, ая-зона, сiйö и керöны, ваялöны кыськö пызан вылö четушка бöрын четушка — юöны. Ляс код Олёп-зон сёрöнжык чöвтö вывсис (натьтö, гожумся жар увья) вешьян, а чочком визя йöрнöссö косялö ленточкаэз вылö да лэдзö сэтчö жö кок увтас. Кольччöм дзир сiйöн кушнас, кöдöн, кыдз баитсьö — «мать родила», сiя вились пуксьö пызан сайö.

Кашник кодь куш да гладь юра Олёп Костя — айыс нач мöднёж, пукалö пызан саяс пöрччалöм кизя да паськöтöм полаа, веж рöма дубитöм пасьын. Нiя важын кодöсь ни. Но некöдыс ны коласiсь не оз сьыв, не оз йöкты, кыдз овлö частожыксö код отир коласын. Баитны отир моз нылö, тыдалö, тожö нем йылiсь. Сiйöн быдöс местö нюжвылöн да горöн, дзик петухлöн китсасьöм, омöн керку пасьта кадiсь-кадö паськалö: «... и твою бога ма-а-а-ать!»

Эта жö маттисьöм коста кöдакö ны коласiсь öдззöтлö пызан вылiсь вина увтiсь просмöм бутылкаэсö порогувт ладорö. Нiя инмалöны то порог, то ыбöс бердö, вынöн кайöмсянь чижнитöмöн жугалöны поснит торрез вылö, а торрес лэбзьöны бöр омöн керку пасьта. Этасянь омöн джодж пасьта и тальччыны лоö некытчö. Кадiсь кадö асьныс юиссес сэтчö жö порог дорас вовлöны недырик кежö öтöрасьны.

Сёрöнжык олiм Гришкина деревняын, кöда километр ылына Новожилова дынсянь. Олiм бöра жö йöз керкуын, квартираын, а луннэзнас ме вились öтнам да иган сайын. Оз видзсьы тöдвылын, кытöн да мый эта коста керис мамö. Но часто вöвлi сiдз, что ме и рыттэзöн кольччывлi керкуас öтнам. Эстöн, сартаса биöн бöбалöмсянь, невна эг сотчы öтлаын керкуыскöт. Кыдз кусöтiсö, ог тöд. Тöда дзир, что эта бöрсянь гобеч весьтöт шомсялöм стена да потолок пондiсö мыччассьыны ой кодь сьöдöн да ош кодь полöтанаöн.

А сэсся мöдiк керкуын ни, но сё сiя жö, кöр öткаса, кöр соседдэз ордын, олöм. Эта кадö ме вöлi вит год гöгöрся ни, но öтнасöс öтöрас лунтыр кежö мамö сё эшö эз лэдзлы. Гожумнас, мыйкö дырна сiя колявлiс менö Пёдорко соседдэз ордö, кöдналöн даскык-даскуимгодся, но сэк кежö тушавевья ни ныв Таня пестунничайтiс аслас пöрисьжык вонлiсь нылочкаöс.

Эстöн недырик олöмись тöдвылын кольччис то мый. Тöдтöм йöз ордын, полiсь да лöнь, ме чöлöмöн пукала порогувтiсь öшын весьтын, лабичын. Öтöрас гожум. Этасянь керкуас жар. Менам абу некытшöм чача. Вöрöтчыны, орсны немöн. Этасянь да жарыс увья петö он. Но водны нельки сэтчö жö лабич вылас ог лысьт, мыйсянькö пола. Сiйöн и сунала пуксöн.

Сы коста пестуння Таня вель дыр вочöтö учöтик Улькалö рукляэзiсь вурöм акань: пасьтöтö да тöбалö. Сёрöнжык сiя ольсалö западня вылö ольпась, и нiя водöны. Ме одззамоз чöлöмöн кольчча сунасьны пуксöн öшын одзын.

Эта жö лунö эта пестуння дынiсь ме пышши бöр. И кыдз бы эта бöрсянь мамö эз кор да эз тшöкты, овны сэтчин сэсся эг мун.

Кольччöм гожумся кад чулалiс öткöн олöмын, но öнi менö одззамоз керкуас мамö эз ни игнавлы. Сiйöн унажык кад чулöтi ме öтöрын, улич вылын, кытöн эзжык вöв гажтöм.

Арсяняс и тöвбыт кежö ме велалi улица мöдöрись соседскöй зонка Яким дынö. Вит-квать годöн месся пöрисьжык лоны меным ёртöн сiя, вежöртана, и эз вермы. Но вовлыны сы дынö меным вöвлi быд коста интересно.

Якимка ветлiс школаö, велöтчис нёльöт классын, и ме быд лун видзчиси сылiсь уроккез бöрсянь бертöм. Вовлiс сiя гортö павжун гöгöр, мынöтлiс пельпон вылiсь öтiк волыса дöраовöй сумка, сэкжö пуксьывлiс пызан сайö сёйны. Сэк кежö ме вуджавлi улица мöдöрö, кайлi поспуэз кузя полöтанаöдз вылын посöдзö, пыравлi ны югыт да гажа керкуö.

Пажнайтöм бöрсянь жö Якимка медодз кутчисьлiс гортся уроккез бердö. Дзимлялöм пызан вылö сiя кыскавлiс аслас сумкаись книгаэз да тетраддез, кутчывлiс гижны да решайтны. А мед ме эг гажтöмтчы да эг мешайт сылö, Якимка сетлiс меным видзöтны кытшöмкö книга. И ась лыддьöтны сiя кадö ме эшö и эг куж, павтыравны да видзöтны ныись быдкодь рисуноккез вöвлi öддьöн интересно. Ны дынö менö кыскис.

Медбасöккезöн меным мыччассисö литература (хрестоматия) да естествознаннё сьöртi учебниккез. Öтас ны коласiсь пантасьлiсö Ленинлöн, Сталинлöн, Калининлöн, Молотовлöн да Когановичлöн портреттэз, мöдас — быдкодь зверрезöн рисуноккез.

Лыддьöтны сiя кадö ме эшö и эг куж. Но Якимка велöтöмсянь пондi тöдны кынымкö буква. Сiя жö велöтiс менö орсны и шашкаэзöн, кöднö неöтпырись керлiс ачыс. Нёль ладорсянь лöсалöм небыт нинпуовöй бедись Якимка орлавлiс пуртöн колана мымда кубиккез, джынсö кöдна коласiсь мичöтлiс фиолетовöй нето сьöд чернилаöн, а мöд джынсö кольлiс чочкоммезöн. Сiдз жö кытшöмкö важ книга коркаись сiя керлiс доска, и ми орслiм.

Кужлiс Якимка керны сартассэзiсь быдкодь ужганнэз да сярканнэз. А меным интересно вöвлi видзöтны сы удж сьöрын, мымдакö отсавны: вайны да сетны, кутны да видзны, а быдöс коста велöтчыны этаö аслым. Сiдз чулалiс эшö öтiк тöв, кöд коста меным тырис кватьöт год.

Сэк кежö мöдiк год сьöрна ни кыссис война, кöда асмознас сетiс тöдны ас йывсис. Деревня вывсис том мужиккез сё мунiсö да мунiсö, а бöр некин эз берт. Кадiсь кадö ны местö ваявлiсö дзир сьöд визя открыткаэз и сэк то öтiк, то мöдiк керкуын, кöр сутки сьöрна, кöр дыржык кывлiс инькаэзлöн быд горшись горзöм-герьялöм. Горзiсö и том, дасквать-дассизимгодся нывкаэз, кöднö нуöтiсö гортiсь ФЗО-ö, мед уджöтны сёрöнжык оборона вылö уджалан эвакуируйтöм заводдэзын. Локтiс сэтчöдз, кöр босьтiсö трудовöй армияö медбöрья пöрись ни мужиккезöс, кöдна эз вермö воюйтны фронт вылын. Некинлö лоис доддявны вöв да сувтны плуг сайö бороздаö, вартлыны литовкаэз, лэбтыны турун зороддэз, вартны сю, кыскавны сю мешöккез. Вийöм мужиккез увья курыт-зубытся водiс инькаэз пельпоннэз вылö эшö и нылöн удж. И кыным одзлань, лоис сё сьöкытжык да гажтöмжык. Öддьöн сьöкыта керсис инька вынöн некокнит колхознöй удж. А быдöс быдтöм-босьтöмсö ковсис сетны фронтлö. Пондöтчис тшыгьялöм, кöда эз ордйы и челядьöс.

Мед кöть невночка кокньöтны инькаэзлiсь быд лунся удж да сьöкыт быдтiсьöм, 1943 годся гожумö колхозын оссьылiс ясли-сад. Но олiсö сэтчин дзир поснит челядь, кöдна эшö эзö вермö котрасьны. Ми жö, гырисьжыккес, вовлiм садикас только сы понда, мед сёйны да видзчисим кад, кöр вердасö. А вердiсö, кыдз кольччис тöдвылын öннявиöдз, лунiсь лун öтiк да сiя жö йöв-шöмйöлöн (ясли-садыс вöлi колхознöй) да анькытшовöй, кöр пым, кöр кöдзыт, едöм, кыдз студень, кисельöн. Нельки няньсö ясли-сад понда натодиль эз пöжавлö. И вöвлi кö кöр да кинлöн, сiйö ми ваявлiм сьöраным гортiсь. Вежöртана, тшыгувья ми вöвлiм радöсь и эталö. Но павжнайтöм бöрсянь некинöс миян коласiсь, а висьтася ме вит-кватьгодся зоночкаэз йылiсь, адззывны эта садикын эз ни позь. Пöтыштöм кынöммезöн, ми сэтöн жö мынлiм порог сайö, неыджыт ватагаöн пышшывлiм матiсьжык вöрö, видз вылö, шор дорö, кытöн позис керны быдöс, мый пыравлiс юрö.

Этатшöм миян поведеннёлö вöлiсö аслас причинаэз. Öтiк ны коласiсь — ми учöтсянь эг вöлö велöтöмöсь овны челядь садын. Сэтчö жö неыджыт керкуокын, кытчö вöлiсö чукöртöмöсь быдгодся гырись и поснит челядь, посниттэс увья да ны горзöмсянь миянлö, гырисьжыккеслö, вöлi и дзескыт, и гажтöм, сiдз кыдз некытшöм чачаэз сэтчин эз вöлö. Эта садын ме «не олöм» понда вöлi эшö öтiк причина, сiя, что воспитательницанас сэтчин вöлi öнi сiя жö пестунняыс, Таня.

Матiсьжык вöррезöт, деревня увтiсь бадь тальниккезöт да анькытш ыб вылöт гуляйтöм бöрсянь ми чукöртчывлiм ясли-садас бöр дзир рытъявыв, кöр вились пондывлiс симавны кынöм да колiс видзчисьны маммезнымлiсь удж вывсянь бертöм.

Кыдз лоис вежöртана сёрöнжык, ме оланын эта вöлöм медбöрья гожум, кöр ме, кыдз челядёк, вöлi эшö ас воля вылын, верми кинкö шогья пышшавны да лыддьыны сизимöт год вывся обязанностьтöм олан кадсö челядьсяöн.

Сiя жö 1943 годся арö месся пöрисьжык челядь, кöднакöт ме чулöтi гожум да кöдналö ештiс тырны сэк кежö сизимöт годöн, пондiсö ветлыны школаö. Ыджытжыккес коласiсь садикас ме кольччи öтнам. И вежöртана — сэтчин менö öнi и домöт вылын видзны эз позь. А сiдз кыдз неыджыт деревня вылын ме годся челядьыс эз вöлö, овны-орсны меным лоис нач некинкöт.

Мый тöдвылын сiя кадсяыс — неделя сьöрна пукалi гортын, некытшöм места эг адззы, гажтöмтчи. Мый керны мекöт одзлань, эз тöд, тыдалö, бытшöма и мамö. Мöдöтны менö школаö вöлi одз, годыс эз тырмы, вермисö бы не примитны. Видзны гортын вöлi тожö некинкöт. Мунны школаас аслым тожö петiс полöм. Медодз полöтiс аслас сьöкытöн велöтчöм да сiя жö, что томувья оз примит

Неделя бöртi, то ли мамö тшöктöм сьöртi, то ли кыдз (сымдаыс тöдвылын мылякö оз видзсьы) тöдса Öльöш дядь, кöда уджалiс колхозын вöлöн, кыдзкö асывнас пуксьöтiс кöмтöм-пасьтöмöс — öтiк дженытик йöрнöс-вешьянаöс — куш да чорыт зэркöтан телега дроггез вылö, нуöтiс Новожилова деревняöдз, километр ылына Гришкина дынсянь, кытöн вöлi начальнöй школа. Сэтчин сiя менö уроккес коста и пыртiс.

Одззася полöмыс, что вермасö не примитны, менö и сэк эшö эз коль. Но Александра Михайловна, кыдз шуисö менчим медодзза велöтiсьöс (жаль — фамиллёсö сылiсь ог тöд), бöр перво жö эз вашöт. Сiя адззис места, пуксьöтiс парта сайö да колис менö классас сэтчöдз, кытчöдз ог пышшы ачым. Колö висьтавны, что сэтшöмыс ась и не öддьöн часто, но вöвлi, кöр месяц, а то и кык бöртi мукöдыс быдкодь причинаэз увья чапкывлiсö велöтчан, пышшывлiсö школасис бöр.

Сiдз годöн пöрисьжык челядькöт ме пондi ветлöтны первöй классö. Сiя жö классын велöтчисö кынымкö и кык годöн пöрисьжык зоночкаэз, кöдна локтiсö школаас сизимöтыс тырöм бöрсянь эшö мöйму да кольччисö вуджöттöг мöдiк год кежö.

Нем сэтшöм сьöкытыс, кöда сыбурна полöтiс школаас локтöм вотöдз, медодзза кадö эз пантась. Унажык велöтчись челядь вöлiсö тöдсаöсь. Эстöн ныкöт лоис тöдчöмöн гажажык, нежели овны садикын, поснит челядь коласын нето пукавны лунiсь лун öткöн гортын. Сiйöн месяц бöртi, кöда кежö менö колисö школаö, пышшыны бöр эг ни думайт, пондi ветлыны одзлань.

Сiя кадö менам, кыдз и быд велöтчисьлöн, вöлi ни вурöм мамö киэзöн öтiк волыса сера чöвтöтовöй сумка. Сыын ме быд лун кыскавлi школаö ассим букварь да кынымкö школьнöй тетрадь. Талунся ученическöй портфеллес да ранеццес, кöднöн челядь ветлöны школаö, миян нельки вöтын эз вöлö. Ученическöй портфельнас школаас вовлiс дзир миян велöтiсь. И кöр Александра Михайловна пыравлiс классö да пуктывлiс портфельсö пызан вылö, ми видзöтiм сы вылö осьта öммезöн, кыдз настоящöй чудо вылö.

Кыдз усис вежöртны сёрöнжык, сьöкытыс ме понда вöлöм не школаас велöтчöмын, а сэтчин ветлöмын.

Сибöтчис сёр ар, а öтлаын сыкöт и медодзза кöдзыттэз. Октябрь месяцö часто пондiс зэрасьны. А мича погоддя коста асыввес кежö бытшöма кынтлiс, усьлiс пуж. Ёрттэзö пондiсö ветлыны школаас арся кöмкöт-паськöмöн, кöда менам эшö эз вöв. Сiйöн нельки кынтöм му да пуж коста меным сё эшö ковсис котрасьны километр ылына кöмтöг-пасьтöг, нiя жö дженытик йöрнöс-вешьянын, кöднаын менö первуись вайöтiсö школаö.

Кыдз дöнзьывлiс школаö сэтшöм ветлöтöм, висьтасьны эстöн нем вылö. Сiя бытшöма висьталöм «Кык норма» рассказын.

Сёрöнжык, мамö киэзöн жö, меным вöлi лöсьöтöм пась, адззисисö кыськö и шапка да кеписсез. Кинкö деревенскöй стариккез коласiсь (тöдвылын эз видзсьы) кыйис меным и нинкöммез. Но тырмисö кö новйыны не öтiк год сьöрна пась да шапка, то гоз нинкöмыс вермис тырмыны дзир месяц кежö. А сiдз кыдз кыйны нiйö сiя годдэзö ме не эг куж, не эг вермы, кöмкöтнас усис пессьыны не öтiк год сьöрна. Кыдз? Эта йылiсь висьтассьö «Тöдiсь» рассказын.

Кыдз велöтчи? Быднёж. Сiдз жö, кыдз и унажык ёрттэзö, и бура, и умöля. Невночка одзасьыштöмöн позяс висьтавны, что год бöртi, кöр азбукаыс вöлi велöтöм, радейтi мыдзтöг гижны, лыддьöтны да рисуйтны. Умöля сiйöн, что учöтсянь умöля вежöртi математика: эз гленитчы некöр лыддисьны, решайтны примеррез да задачаэз, а сёрöнжык — уравненнёэз да формулаэз.

Но 1943-1944 учебнöй годыс вöлi миян оланын не только школьнöй азбука велöтан годöн. Сiя жö тöдсöтiс миянöс оланлöн сэтшöм азбукакöт, кыдз да мый керны, мед не кувны тшыгйöн. Эд мунiс война. И позис я сiя годдэзö велöтчыны буржыка сысся, кыдз ми велöтчим — висьтавны сьöкыт.

Миян эз тырмö тетраддез. И часто öтiк тетрадяс ковсис и гижны и решайтны. Быдсöн класс вылö быд предмет сьöртi вöвлiсö кык-куим учебникöн, а часто дзир öтiкöн — велöтiсьлöн. Сiйöн гортся уджись сетöм упражненнёэз, примеррез да задачаэз ковсис гижны уроккез бöрсянь классын, а сетöм текст лыддьöтöм понда чукöртчыны быдсöн класслö кинкö öтiк ордын. Эз тырмывлö ручкаэз да карандашшез, эз вöвлы чернила. Сiйöн ми асьным керлiм ва сорöн саись. Электрическöй би местö унажыкыслöн вöвлi нельки не керосиновöй лампа или масiсь, а дзир сартаса би. Но быдöс эта, кыдз баитсьö, бедалöн джыныс.

Мый миянлö быдöннымлö мешайтiс сiя годдэзö велöтчыны буржыка, дак тшыг кынöм да кöмкöттöм-паськöмтöм нужда.

Вывланьын вöлi висьталöм ни, что войналöн медодзза жö годдэзö быдöс мужиккес вöлiсö босьтöмöсь боевöй да трудовöй фронт вылö. Уджавны колхозын öтiк инькаэзся да ловья эшö стариккезся лоис нач некинлö. А сiйö неуна шедтöм-быдтöмсö, кöда, натьтö, и асланыс да челядьыслö эз бы тырмы, колiс сетны фронтлö.

Война кадся кык медодзза годыс колхозлiсь экономикасö сэтчöдз орöтiсö, что надейтчыны одзлань кежö кольччис нач нем вылö. Этöн жö каднас видзсисö отирлöн и одзза годдэзся запассэз. Пондöтчис тшыгьялöм, кöда эз ордйы и челядьöс.

Декабрьнас ни, кöр вачкисö медодзза мороззэз, то öтiк, то мöдiк миян коласiсь эз пондö вовлыны школаö. Нем вöвлi кöмавны-пасьтавны вылö. Сетiс тöдны ас йывсис и тшыг кынöм. Уроккез коста думайтсис не сы йылiсь, мый баитiс велöтiсь, а частожыксö сiя жö тшыг кынöм йылiсь. А уроккез бöрсянь сöстöм ру вылын садь быртöдз дикмывлiс юр. Часто мукöдыс миян коласiсь усявлiсö. Сiйöн уроккес бöрсянь школасис ми петавлiм полöмöн да жагвыв. Тэрмасьны некин эз лысьт. Медсьöкытыс пондöтчис тöвшöрнас, кöр колхозсяняс сюсö пондiсö сетавны шоча да нач етшаöн. Сэк кежö бырсисö унажык отирлöн капуста, калига да картовка, а мöссэс пиявнытö эзö на ештö, и эз вöв йöв. Эта кадö уна керкуэзын тшыгсянь жагмöм отирöс позис адззыны сэтшöм удж сайын, кöр нiя пыртлiсö керкуö кын пипуовöй нето кыдзовöй кряжжез да орлалiсö нiйö поперечнöй пилаöн унася-уна гöгляннэз вылö джодж шöрö павдöтöм нянь рузум весьтын, мед керны унажык пильнöй чаг. Сёрöнжык эта чукöртöм пильнöй чагö содтышлiсö невночка (вöвлi кö эшö кинлöн эта невночкаыс) пизёк, мед пöжавны кöвдöммез.

Мед не кувны тшыгйöн, сiйö жö уджсö лунiсь лун керим и ми мамöкöт, кöть учöтлöн менам пиласö кыскавны прок эшö и эз вöв, а тшыгувья юр дикмöмсянь часто сэтöн жö и усявлi ныр вылöдз. Кинлö усьлiс ас оланын сёйны пильнöй чагись пöжалöм нянь, думайта, — сылö эта йылiсь висьтасьны оз ков, и сытöг тöдö бытшöма. Не весь жö öння кадö быльнöй пизись умöля пöжалöм няньсö примитöм сравненнё местö сувтöтöны ордчöн пильнöй чагкöт. Но кыдз бы сэтчин эз вöв, сiя — пильнöй чагыс — уналö миян коласiсь отсалiс мымдакö не кувны тшыгсянь, кöть и вöвлi, что кувлiсö, и кувлiсö не только пöрись отир, но и челядь. Часöт эшö син одзын дадёк вылын гатш куйлытöн, кынтöмыс зубытсянь осьта öма да гер керöм пиня, öкмысгодся Öльöшка (Гöрд Öльöш).

Тöвнас, медыджыт мороззэз коста, кöр лэбзьытöн кынмöны да кулöмöн ни усялöны кöдзыт лым вылö воробейез да кöрымкайез, Öльöшка кынымкö лун сьöрна эз мыччась школаын. Тшыг да пасьтöм увья часто вöвлi сэтшöмыс и мöдiккезкöт. Сiйöн этна луннэзö быдöннымлö и думайтсис сiдз, бытьтö кöдзытыс увья сiя пукалö гортын.

А кытшöмкö асылö, кöр ми, кöдзытсянь ёжгыльтчöмöн пукалiм школьнöй классын урок вылын, öшын стекло бердiсь пятачок пасьтöн гыöрсö сылöтöм осьтаок пыр кинкö миян коласiсь казялiс школа öшын увтöт кыссян туй вылiсь Öльöшкалiсь пöрисьжык вонсö, Егоркаöс. Соликамскöй районiсь деревняэзöт неделя сьöрна кортöн ветлöтöм бöрсянь атшавтöдз мыдз да кынмöм, вынтöмсялöм, жагвыв гужгöмöн сiя кыссис гортö. А морос одзöт пельпон пыр волысöн кышалöм дадёк вылын Егорка кыскис сьöрас ассис томжык вонсö — кыскис не овны ни, а мед дзир дзебны. Даскыкьямыс километр ылына Крутишанскöй волоксö бимороз коста сутки сьöрна туйтöг петтöн Öльöшка ештöм пöртчыны шойö, кöдö ми и казялiм öшынöт воныс дадёк вылiсь.

Кытшöм бы эз вöв сьöкыт эта тшыгьялöмсянь, велöтчансö медодзза годас ме сiдз и эг чапкы. Но кыссьыны тулысланяс, кыдз баитсьö, веж турун вылöдз, кöр эз вöлö не нянь, не картовка, лоис сё сьöкытжык. Тшыг кулöм шогья кыссим мый вылын только позис: лён кöдзыс, йики, кöрым жуг да арсянь эшö косьтылöм картошка кыш, а унажыксö сё сiя жö пильнöй чаг вылын. Сiйöн тулысланяс, эшö лымыс сывтöдз, кöр тöдчöмöн пондiс шонтны шондi, школаын чулöтöм уроккез бöрсянь, ми пондiм гарйисьны гунадорын. Сэтчин, пыдын лым столаэз увтын, сэк кежö кольччöмась вердтöмöн колхознöй подалö арся вартöм бöрсянь неджуджыта чапкöм анькытш гöридзовöй зороддэз.

Лым увтiсь гарйöм гöридзсö ми сэтöн жö тöлöтлiм мöдпöв чуман нето пож весьтын. Кынымкö час сьöрна сэтшöм удж коста усьлiс янсöтны гöридз коласiсь кырым кык, а то и содз мымда тшыкöм ни сэк кежö, пöдöм да багсьöм анькытш, кöдöн позис вештыны тшыг кулöмсö кöть лун кежö. Сёйим и асьсö анькытш гöридзсö. Косьтöм да тойöм бöрсянь сыись тожö пöжавлiм «нянь».

Мартнас пондöтчис сывны лым. Ылiсь ыббезын мыччисисö шором местаэз. Сэк ми мамöкöт босьтлiм мешöккез, öн да рос, одз асывсянь, кытчöдз лэбтiс чарöмыс, иньдöтчывлiм ыбö, мед чышкыны да куравны шором местаэзiсь шыррезöн орöтöм да вемдöм ^ни сю. Усьлiс кö кытшöм лунö чукöртны содз кыным, а то и джын ведра мымда (мед кöркö вöвлi унажык, сэтшöмыс тöдвылын оз видзсьы), сэк вайöм да косьтöм, тöлöтöм да киöн изöм бöрсянь, шогмывлiс невночка пизь. Эта пизись сiя жö пильнöй чаг сорöн позис пöжавны кынымкö кöвдöмок и лун, а то и кык сьöрна лоны «пöтöн».

Но этö жö уджсö керис сэк деревня вылiсь быдöс тшыг отир. И эз кö усьлы кöр некинöс одзавны, шором местаись шором местаö кытшлалöм туйыс быдöс вöвлi керöм весь и гортö ковсис вовлыны нач простöн. Вежöртана, что мунны сэтшöм лунö школаö не вын, не охота эз ни вöвлö.

Нельки медсьöкыт олан коста кадыс öтiк местаын оз сулав. Сiя сё öтмоз визывтö одзлань.

Чулалiс март. А öтлаын сыкöт мунiс и лым. Апрельнас кушамисö ыббез. Колхознöй картовка муэз вылын сэк кежö мыччисис кын дзоля. Сыись, öктöмсис да чередитöмсис, позис пöжавны ва кисель нето лягуша пöк рöма, сiсь дука, уль резина кодь нюжалан «блиннэз».

Мыйкö дырна, кыдз порссез, ми борсим-öктiсим этна картовка ыббез вылын. Мый донöн сувтiс миянлö эта шедтiсьöмыс, висьталöм «Тупöссез» рассказын. Тшыгьялöм увья эз чайтчы вермыны кынтiсьöм бöрсянь шогöт да кулiс бытшöм сiя кадö менам ёрт Колька, кöда дзир сы вотöдз дзебис ассис дедсö.

Сiя жö годö, эшö тöвшöрнас, гырись мороззэз коста дзебисö эшö öтiк том мортöс, даскыкьямысгодся Öндрей Настяöс, кöда вермис ни шедтыны аслыс нянь, но кöдö нельки шедтöмсö ни сетнытö вöлi некысь. Öтлаын томмескöт мунiсö мöдöр светас и вит-квать старик, кöдна войнатöм пöт кадö вермисö бы эшö овны да отсасьны колхознöй уджын.

Сылiс лым. Кушамисö ыббез. Саймис да кокнита ловзисис вöр. И ась колхозсяняс сюсö сетавлiсö сё одззамоз, öддьöн шоча да етшаöн, дзир дразнитöм могись, нiя, кöдна вермисö кыссьыны веж турун вотöдз, тшыг кулöмсис öнi эз ни полö. Лымыс сылöм бöрсянь медодз да медöддьöн отсалiс миянлö тыртны тшыг кынöмсö кöктоин, кöда петавлiс сiя годдэзö вель унаöн чуть я не быд ыб вылын.

Школаын чулöтöм уроккез бöрсянь тшыгöсь, ми перво жö иньдöтчывлiм матiсьжык ыб вылö кöктоинавны. Сёйим сiйö, мымда позис ённас, частожыксö нельки миськавтöг. Кин мымда вермим, сiйö жö öктiм да вайим гортö, мед пуны шыд. Эз чапкиссьыв и кöктоинлöн кульöм кышыс. Косьтöмöн ни сiйö тойим гырын — шогмывлiс пизь, кöдаись позис пöжавны кöвдöм.

Быдöнным гажмим öддьöнжыксö сэк, кöр чулалiс велöтчан кад, миянöс лэдзалiсö гожумся каникуллэз вылö.

Сэтöн жö висьтассяс, что медодзза велöтчан годыс ме понда весь эз чулав. Бытшöм отметкаэзöн ме вöлi вуджöтöм мöдiк классö.

Чулалiс öтiк тöв челядь садö ветлöм бöрсянь. Но кыдз жö тöдтöмöдз сiя вежис миянöс быдöннымöс. Быдыс ас кежас и быдöнным öтлаын ми вöлiм радöсь сылö, что тöвбытся тшыгьялöмыс да кöдзытыс миянöс эзö пöртö шойö. Ми, ась и винерикöсь, но вöлiм ловьяöсь, ас кок вылын, вермим кывны да адззыны, лолавны да баитны, вермим шонтiсьны шондi югöррез увтын, думайтны — овны. Вежöртана, что мöймуся садиковскöй анькытшовöй кисель йылiсь, кöдöн миянöс вердлiсö лунiсь лун да кöда уналö эз гленитчы, таво некин и думайтны эз ни лысьт. А сiя тшыг нуждаыс, кöдакöт усис пессьыны не лун нето неделя, а быдсöн кöдзытся-кöдзыт тöв сьöрна, мырддис миянлiсь челядь кад да сувтöтiс ордчöн гырись отиркöт олан понда одзланься пессьöм вылö. И петiс сiдз, что нельки зорамöм обстоятельствоэз вылö некин миян коласiсь эз норась, сiдз кыдз этна обстоятельствоэз вöлiсö миянся «гырисьжыкöсь». Миянöс жö гажöтiс сiя, что чулалiс велöтчан год, кöр эз понды ковны думайтны тшыгувья быд лунся уроккез йылiсь. Öнi асывсянь и рытöдз позис кошшыны аслыт пöтöс. Быдыс понда эта лоис сувтöтöм кыдз оланлöн медодзза да медколана задача. И сiдз кыдз быдыслö миян коласiсь охота вöлi овны, паныт эталö некин эз сувт. Быд лун, асывсянь и рытöдз ми олiм öтiк и сiя жö думаöн — кытiсь мый адззыны сёйны да мыдзтöг кошшим-шедтiм аслыным сёян.

Мыйсö только эз усь сёйны тшыг кулöмись эта сьöкыт, няньтöм кадö. Кöктоинавтöн ми ватагаöн кежавлiм матiсьжык вöрö, чывлiм лапья кöззэз да пожуммез вылö, мед судзлавны сёйны кöзъягöд да пожумьягöд.

Медодзза тулысся зэррез бöрсянь ловзисö видззез. Пондöтчис лэбтiсьны виль турун, кöда коласын медодз — сёянаэс: кöчазь, шöмкор да пикан. Куимнансö ны коласiсь позис сёйны пуöмöн. Куимнансис жö, косьтöм да тойöм бöрсянь, позис пöжавны и «нянь». Сэтчö жö öтлаö мунiс и кöктоинлöн мöдiк урожай — урбöж, кöда лэбтiсьлiс сёрöнжык, ыббесö гöрöм-кöдзöм бöрсянь, öтлаын осяэскöт ни, кыдз ёгтурун. Быдса ношаэзöн öктiм да ваялiм сiйö. Öткоста керсисö кык колана удж: öтöрсянь — орассис осяэз коласiсь ёгтурун, мöдöрсянь — сiя жö мунiс аслыным вердчан туйö. Гортын эта урбöжись, косьтöмсис ни, керлiм тожö «пизь».

Гожум кежас тулысся урбöжыс орис. Унажыкыс сы коласiсь вöлi öктöм да сёйöм, мымдакö ештiс чорзьыны. Сэк кежö гöртöм ыббез вылын (война коста нiя пантасьлiсö вель уна) лэбтiсьлiс баляшöмкор. Пым сёян эта турунiсь и оз пувлö, но шыдöс кодь поснит кöдзысiсь, невночка содтыштöм пизь сорöн, позис пöжавны нiйö жö кöвдöммез. И ась эта няньыс вöвлi и курыт, и чорыт, и джагыт, и дука, топ-топ кыдз пильнöй чагыс жö, буржыксö сiя кадö босьтнытö вöлi некысь. И мед не кувны тшыгйöн, сёйнытö и сiйö колiс. Воштiсьны этася вöлi некытчö.

Вежöртана, что быдöс, мый ми öктiм да вайим, быдмис-шогмис ыбын, вöрын да видз вылын. А сiдз кыдз унажык кад чулавлiс миян кошшисьöмын да öктiсьöмын, ыбись-вöрись ми кодьöн ог и вовлö. Сэк ни уна миян коласiсь ветлöтiсö пурттэзöн. Новйöтiм ми нiйö сьöраным, кыдз и гырисьжык отир, йи бердö öшöтöм симöтовöй пуртöссэзын. Пурттэзöн ми шедтавлiм писсэз да пишалкаэз, серöтлiм беддез, но тшыгувья (грех висьтавны öнi эта браконьерскöй удж йылiсь) лиасьлiм. Жар погоддя коста сiйö жö баляшöмкорсö öктiкö пондывлiс косьмыны горш. Ас коласын баитчöмöн кольлiм ыб вылö тырттöм кöзичаэз, шоччисьöм могись кежавлiм матiсьжык пожумникö. Пантасьлiс кö лиажык пожум, кулим кач да лиалiм вылiсянь и вуж бердöдз. Чожа мый сiя, дзик чöвтöм нагöлеч, бель видзис мöдiккез коласын, и, вежöртана, что сэтшöм экзекуция бöрсянь овны-быдмыны одзлань эз ни вермы, косьмис. Миянлö жö и эта вöлi аскодьöм пöтöс местö.

Асмознас гажöтiс миянöс июль месяц. Сэк кежö ыбын-вöрын воис быдкодь ягöд, пондöтчис петны тшак. Шондi мороса гриваэз вылын быгыльтчис да гöрдöтiс гöрдъягöд, а неделя бöртi матiсь дзиббезiсь позис ни öктыны сэтшöм небытик да чöскыт чöд. Ны дынö эз ков некытшöм пизь, кöда некинлöн эз вöв. Эз ков нiйö и пуны нето косьтыны: сёйнытö позис кок вывсянь. Эз полöт нысянь и некытшöм шог. Этасянь ягöдалан кадыс вöлi быдöннымлö праздник местö.

Одз асывсянь, эшö лысваыс косьмытöдз (тшыг кынöмыс эз видзчись), ми чукöртчывлiм деревня дорын, кин котелокöн, кин вуга чуманокöн и чожа мый неыджыт ватагаöн, иньдöтчывлiм вöрö. Бур, что сiя вöвлi матын, боканым. Чöдыслö километрся ылöжык мунны эз ков. Сёйим и öктiм, öктiм и сёйим мыдзтöг. Павжун коста, шоччисьöм могись, недырик кежö вовлiм гортö. И эгö кö ештывлö öктöмсö сёйны сэтöн жö, туй вылас, кружка мымдаöн вайлiм нельки гортöдз. А час кыным сьöрна шоччисьöм бöртi вились иньдöтчывлiм сэтчин жö.

Эг видзчисьö öддьöнсö и сьöдсэтöрлiсь воöм. Сiйö ми öктiм ённас, пöжлiм горын и панялiм чöскыт компот местö. Ульнас жö сёйим тшакьявтöн и чöскыт тшак — бурöй рöма уртшак, кöдалöн не юрын, не кокын некытшöм курыт эз кыв.

Эг орддьывлö не ыбись, не деревня вылiсь соседскöй льöмпуэз, кöр воис ны вылын льöм. Готтьыны сiйö вылын пуэз кузя чывтöн миян понда удовольствие вöлi тöдчöмöн ыджытжык, ежели мышкырöн öктыны вöр коласын чöд. Вöвлi, что соседскöй льöмпуэз вылö кайöм понда не только грöзитлiсö, летлiсö пеллез, лэдзлiсö вешьян да вольлiсö небытжык местаöт петшöрöн. Но часто эта нельки эз видз да эз сувтöт. Лун кыным бöртi сiя жö местаын ми керлiм сiйö жö.

Ась одззамоз эз тырмы нянь. Но быдыслö миян коласiсь гожумнас шедыштлiс йöвтор. Августнас ни пондiм гарйышавны ась и том эшö, виль картов. Бытшöма отсалiс и гожумыс аслас тшак-ягöдöн. Этатшöм вердчан вылын ар кежас (позяс кö сiдз висьтавны) ми нельки гажмыштiм да ёнмыштiм. И кытшöм бы эз вöв гажтöм овны няньтöг, ми сё жö вöвлiм челядь, и, кыдз быдöс миян годся челядьыс, радейтiм орсны: вöвлыны неыджыт ю дорын, котрасьны öтамöд коласын одзасьöмöн лудъя, деревенскöй улица кузя — кин кинöс одзалас. И ась быдыслö миян коласiсь асывсянь вöвлi сетöм наказ караулитны курöггез пырöмись карчйöр, вердны да дозирайтны типпез, весöтны гряддэз, ваявны тшак да ягöд, жар погоддя коста быдöс коласын ми сё ни адззывлiм кад, кöть öтпырись ештывны километр ылына Сия ю дорöдз.

Колiс дзир чукöртчыны кынымкö зоночкалö öтлаö деревня шöрись грива вылö, кыдз сэтöн жö кинкö миян коласiсь горöтчывлiс: «Лэдзчылам, челяда, купайтчыны!» А мöдiккез эта коста дзик сiйö дзир и видзчисьлiсö. Чожа мый куим-нёль, а то и вит-квать зоночка, кин кинöс одзалас: «Ура! Купайтчыны! Ура! Кöкушкаö!» — горöтлöмöн, турöпöн уськöтчывлiм деревня сайö.

Одзасьöмöн вуджавлiм деревня увтiсь завор. А сэсся казявтöг кольччывлiсö бöрланьын непаськыт, волькыт видз, неыджыт кöзъя вöрок, гöгрöса шутёмок, улица пасьтышта оль да кузьмöса Кöкушкаыб. Деревня бердсянь и ыблöн сайись дорöдз туйыс тöдчöмöн лэдзчöтiс кырывлань.

Ыб ладорас, эшö котöртiканым, пондывлiм ни кульны вывсиным йöрнöс-вешьян. Пасьтöмöсь, одзасьöмöн сибöтчывлiм берег дорö и, бöра жö кин кинöс одзалас, уськöтчывлiм ваö.

Пыд вöр коласöт визывтан юоклöн ваыс вöвлi быд коста кöдзытся-кöдзыт. Этасянь овны сыын дыр эз позь. Öтпыр-мöдöтпыр ми ештывлiм вуджавны уйöмöн ю мöдöрöдз, а сэсся лöзöтöм да пупырсялöм вывтыраöсь, петавлiм бöр, пондывлiм быглясьны берег дорись шоныт, небыт да кöс песок вылын, тэськасим.^

Кадыс вöлi арвыв ни. Чожа вились колiс лöсьöтчыны мунны школаö. Сiйöн одзланься велöтчöм йылiсь дума часто усьлiс тöдвылö öнiсянь ни. Сэтöн жö берег дорас оссьывлiс недырик кежö аскодьöм класс. Киö сюрлiс шать нето ёсь, и волькöтöм песок вылын нiйöн ми гижлiм мый кужим да вермим, решайтiм примеррез, а унажыксö рисуйтiм.

Пöттöдз сiдз быглясьöм-велöтчöм бöрсянь гывьясьöм могись недырик кежö эшö тульснитчывлiм ваö. А час бöртi сэтшöм жö гора ватагаöн, кин кинöс одзалас, тэрмасим бöр деревня ладорö.

Гожумся кöс погоддяö быдöнным радейтiм орсны деревенскöй небыт луд вылын. Быдса чассэзöн вермим вермасьны, быглясьны, берездасьлыны да чеччавны, вöтлiсьны бабыввез да малянкаэз сьöрын, кöдна öктiсö цветтэзiсь нектар. Сизьюр цветтэз нималöмöн сiйö жö керим и ми асьным. А шоныт зэр бöрсянь мыдзтöг бродитлiм ва гöппезын, бель вачкытöдз миськавлiм сöстöм зэр ваын нятьсянь вартчöм да потласьöм коккез. А öтамöд сьöрын котрасьтöн да резсьытöн неетша и вадiсьлiм. Бур, что пöжсьыны эта вадiсьöм бöрсянь миян вылын вöлi немлö. Некытшöм кöмкöт гожумся кадö некинлöн миян коласiсь эз вöвлы. Лымсянь лымöдз ми быдöнным олiм: орсiм-котрасим, тшакьялiм-ягöдалiм пыр кöмтöг. А мый баитсяс öтiк дженытик йöрнöс-вешьян йылiсь, кöдна гырдззаэз да пидзöссэз весьтöдз частожыксö вöвлiсö бырöмöсь, дак нiя выланым жö и косьмывлiсö.

Чукöртчывлiм ми öтлаö эшö и рытся кадö деревня шöрись сiя жö грива вылын, кытöн мыдзтöг орсiм шар-палкаöн да мячöн.

Эшö буржыка ловзьöтлiс быдöннымöс август конец, кöр воис рудзöг да пондöтчывлiс вундан кад. И кыдз только рудзöг ыб вылын мыччисьлiсö медодзза суслоннэз, а гунадорын шыасьлiс «тарабайка» (неыджыт вартан машина, очёрка), медгажа орсан местаыс миян лоис сэтчин жö.

Эз вöв эшö вартöм да тöлöтöм колана мымда сю. Эз вöв керöм няньтöг гажтöмтчöм отирлö колхознöй правленнёын ведомость. Но гуна пытшкын да сы гöгöр виль няньлöн дукыс кылiс ни, и сiя миянöс пöткöтiс.

Вартöм бöрсянь рышкытик стогö чапкöм идзасын, кöдасянь нырö патшкис сiя жö нянь дукöн, ми дышöтчытöг, кыдз мушыррез, писькöтлiм доль и поперег нораэз, мед вöлi кытчö дзебсисьны куруöн орстöн. Эстöн öтпыр и шогмис мекöт не öддьöн гажа история, кöда йылiсь висьтасьöм «Гажа грива» повестьын.

Рытъявыв кадö вит-квать зоночкакöт асланым идзасовöй деревняын ми орсiм куруöн. Кинкö öтiк миян коласiсь вöдитлiс, а мöдiккез дзебсисьлiсö.

Сёрöнжык, вöввезнысö лэдзалöм бöрсянь, миян дынö öтлаасисö эшö кынымкö зонка — пинялiссез. Содыштiс гаж. Вöлi бöрйöм вöдитiсь. Быдöнныс уськöтчисö дзебсисьны идзас стоггез пöлöн. Дзир ме öтнам чепöсси идзас стог вылö, мед колана местаын, писькöтöм нораöт лэдзчисьны увлань стог пытшкас, мый менам и эз пет.

Öтiк местаын, зэв идзас стог бердас, вöлi неджуджыт, но вель паськыт гу, кöдаын ар кежас быд пасьтöн ештöм лэбтiсьны морт сувда петшöр. Рожень вывсянь, тальтöг, стогö чапкöм идзасыс вöлi рышкыт да нильыг. И колiс шогмыны сiдз, что кöр ме котöрöн сибöтчи нач гу весьтас, ме кок увтiсь нильдiс не öтiк рожень ыжда идзас палак, öдззöтчис увлань. Öтлаын сыкöт, эг и казяв, кöд коста лэбзи гуö. Усьны бы меным идзас палакыс сьöрö, нем умöльыс, видзöтан кö, и эз бы вöв. Но петiс сiдз, что усьтöнням ме идзас палаксö одзалi и пуджсьöм йöрнöс-вешьянöн пуркнитчи лöз петшöр коласас одзжык. А бöрсяням буждöм идзасыс шебрыштiс вевдöрсянь да личкис менö гуас, кыдз шырöс. Метр куим сувда стог вывсянь усьöмсянь ме, вежöртана, не эг доймы, не эг повзьы. Доймынытö вöлöм нем бердö, а повзьынытö некöр. Эз вермы пöдтыны и рожень куим ыжда рышкытик идзас палак. Но кытшöм зубыт вöлi петшöралöм вывтыр, сымдасö ме нельки талун, нёльдасся унажык ни чулалöм год бöртi, висьтавны ог куж да ог вермы. Думайта сё жö, что сэтшöм зубытыс вермас лоны дзир сэк, кисьтны кö нагöлеч пасьтöм морт вылö ведрапонiсь чугунын пуöтöм ва. Но гу пыдöсас куйлытöн медстрашнöйыс вöлi не эта, а сiя, что меным эз позь вöрöтчыны. Эд куйлi ме кушöтчöм вывтырнам лöз петшöр вылын, сiйöн жö вöлi и шебралöм, идзасыс усьöмсянь. И сiдз ни бытшöма заваритöм вывтыра, быд нетöдчана вöрзьöтчöмсянь петшöрыс сотiс сё одзлань. И кольччис кö мый керны идзас увтын гу пыдöсас куйлытöн, дак этö горзыны-горöтлыны мымда гор, кöдö ме и кери.

Чожа мый эта горзöм вылö чукöртчисö быдöс челядь. Ны отсöтöн, вöлиськö, ме и петi. Но нельки эта бöрсянь гаж ме понда некытшöм эз вöв. Петшöралöм местаыс, а вöлi сiя петшöралöм омöн вывтыр пасьта, öнi сотiс-лудiс сыöддьöн, что терпитны этö сотöм-лудöмсö некытшöм вын эз судз. А гыжьялöмсяняс, кыдз былись заваритöм бöрсянь вывтыр пасьта пондiсö лэбтiсьны чуньпон гырися ва поллез. Не повзьöтны сэтшöмыс эз вермы. Но сё жö унажык лудöмсяняс ме и места некытшöмö эг адззы, изöвтi-бергалi дзик заводитöм, а öткоста визжитi, кыдз визжитö зiэз чушкалöм бöрсянь кычан. Ёрттэзлö жö нем эз кольччы, кыдз кынöммезныс бердын видзсьытöн да ме гöгöр быглясьтöн ваксьыны-серавны ме вылын. Сёрöнжык кинкö пöрисьжык зонкаэз коласiсь висьталiс, что петшöралöм местасö колö мавтны... зырымöн. Кин бы согласитчис мавтчыны нарошно зырымöн да эшö йöз ныррезiсь? Думайта — некин, кöда эз сюрлы гу пыдöсiсь лöз петшöр коласö, кыдз ме. И мед только вермыны мездiсьны эта чирыштан зубытсянь, кöда увья ме одзын сiя кадö нельки чочком светыс эз тыдав — согласитчи. И менö мавтiсö. Кинлöн мымда нырас адззисис, чожа мый быдöс вöлi каттьöм ме бердö. И кыдз бы сэтчин эз вöв, висьтала, что лекарство эта вöлöм öддьöн бур. Зырымöн мавтöм местаöт заваритан-сотан зубытыс перыта чулалiс. Лудны вывтыр дугдiс. Сы сьöрö палялiс и менам горзöм-визжитöм.

Орсны ме сiя рытö одзлань эг ни понды. Но гортö ме бертi здоровöйöн, дзик некöр да нем сэтшöмыс эз и вöвлы.

Кынымкö лун бöртi деревня вывсис отирыс дзик ловзьыштiс. И кöть эз вöв некытшöм праздник, рытыс вачкисис мыйöнкö праздничнöй вылö. Эта рытö невночка одзжык, ежели пыр, бертiсö удж вывсянь уджалiссез. Невночка горöнжык одззася, кылiс сiя рытö и öтамöд коласын баитöм, а кытшöмкö томжык чужöм вылiсь позис казявны нельки сэтшöм надз этна курыт годдэзö шынньöвтöм. Быд семьяись öтiк мортöн, неыджыт кöзичаöн да вежыштöм вылöн отир пондiсö тэрмасьны гуна ладорö, кытöн сэк кежö лöньсис ни тарабайкалöн лунтырся уннялöм-сярöтöм.

Праздникыс быдöнныс понда сiя лунö вöлi сыын, что, вöлиськö, вöлi керöм ведомость, кöда сьöртi гунадорын сеталiсö невночкаöн виль урожайись сю.

Веськыта гуна долонь шöрас сулалiсö весаэз. Кладовщик сетлiс гижсьыны ведомостьö, ачыс эта коста кадуляöн гумыштлiс чукöрись да öшлiс лöз рöма, ульöв эшö и этасянь гырись, польдöм кодь туся да сьöкыт рудзöг, кисьтавлiс сiйö кинкö лöсьöтöм кöзичаö. «О, господи! Истиннöй Кристос, Ен-батюшко! Эз жö öшö, батя, сет кувнытö. Виль няньöдз вермим кыссьыны», — пернапассорöн сöдзöм синваэсö чышкышавтöн шыасьлiсö негорöн быд лунся гажтöмсянь да сьöкыт уджсянь тöвзьöм-чукрассьöм чужöма да пемдöм сина инькаэз, лэбтывлiсö не öддьöн тыра кöзичаэз пельпон сайö да сайöвтчывлiсö гуна воротаэз сайö.

Мамö уджалöм понда, кыдз и быдöнныслö, сетiсö невночка сюоксö и миянлö.

Сеталöм сюыс öтiк ойöн быдöнныслöн вöлi косьтöм. Но и öнi эшö сыись няньсö пöжавны эз позь. Медодз сiйö колiс пöртны пизьö и бöра жö киöн, сiдз кыдз война годдэзö кырöтöм пруд дорын мельницаыс эз уджав. Эта увья деревенскöй стариккез вынöн гырись мельничнöй изыннэз вöлiсö кайöтöмöсь да сувтöтöмöсь деревня шöрись простöй чомö, кöднö и бергöтiс сiя годдэзö деревенскöй отир.

Ашынас асывсянь этна изыннэз дорын сулалiс ыджытся-ыджыт очередь, эд изнытö колiс быд семьялö, а быд мортлiсь изöмсö усис видзчисьны час кыным сьöрна.

Мамö тшöктöм сьöртi рытъявыв эта жö очередьö сувтi и ме. Но кытчöдз сибöтчис миян очередь изны, джын сутки мымда кад чулалiс.

Вöлись асыв гöгöрас мамö сибöтчис изын станок дынöдз. Ачыс сiя кутчисис карлан бердö, сы бердö жö кышыштiс косiсь пöрччалöм пöкрöм да нюжöтiс меным. Узьтöм, тшыг да мыдз номмескöт ойбыт сьöра тышкасьöмсянь, сiя кадö ме и коккез вылын сулавны кодьöн эг ни вермы. Но уджыс миян вöлись пондöтчис. А кернытö сiйö колiс нянь пöжалöм понда, кöдö ме сы дырна ни эг адззыв, что нельки кöрсö вунöтi. Сэтчö жö очередьыс изын дынас и миян бöрсянь эшö эз бырсьы. Сiдзкö, узьны-шоччисьны и думайтны вöлi нем. Охота или не, ковсис отсавны, лыддьыны кö сэтчö жö, что и мамö вöлi ме кодь жö: узьтöм, тшыг да мыдз, сiдз кыдз лунтыр сьöрна, коссö веськöтлытöг, эз лэдзлы кисис чарла, вундiс.

Öнi сiя, кадiсь кадö киэсö карлан бердiсь вежлалöмöн, дугдывтöг бергöтлiс сьöкытся-сьöкыт мельничнöй изын, а удж коласас кадiсь кадö жö тэчышалiс изын горшас сю.

Сы местö изын гöгöр быд ладорсянь жагвыв, дзик вотялiс, лэдзчис руд рöма, шоныт да небыт пизь. Эта и былись вöлi нянь ни, дзир пöжавтöм, кöда вылö видзöтöмсянь вотялiс дуль.

Изынлöн быд кытш бергöтчöм коста, кöр карлан чулавлiс сайись дорсö да пондывлiс сибöтчыны мелань, меным колiс отсавны кыскыны сiйö пöкрöмöттяс ас ладорö, мед кöть этöн невночка отсыштöмнас кокньöтыштны мамöлiсь удж. А что вöлi сiя сьöкытся-сьöкыт, дак эта йылiсь и баитны нем.

Кыдз прокмис керны мамö быд лунся сьöкыт колхознöй удж, эта вöлi син одзын и ме мымдакö вежöртi ни. Эта кадö, сiя гöрис и кöдзис, вартiс и тöлöтiс, шупöтiс öвиннэз (косьтiс сю) и тэчис турун зороддэз. Сылö нем эз видз чулöтны шоччисьтöг джын километр кузьöн покос. Мукöд луннэзö мамö вундывлiс киöн куимдас-куимдас квать соткаöн бытшöм зöр нето шогдi — сымда, мымда не быд коста усьлiс мöдiккезлö гöрны то ли пинявны вöлöн. Эстöн жö öнi мельничнöй изнысö дас минута сьöрна кинас бергöтлöмсянь сiя пымалiс люзь. Шорöн визывтан сирньылöмыс — ог пов горöтчыны этö кывсö — лякöтiс вывтыр бердö паськöм, гырись да сьöкыт воттезöн, кыдз ртуть вотялiс сы чужöм бердiсь сэтчö жö, изын дорас.

Полöмöн да жалейтöмöн кадiсь кадö ме дзарышалi мамö ладорö, а öткоста, изын станок бердö коккезнам тарашитчöмöн, кыкнан кинам вынсьöтчи кыскышавны пöкрöмöттяс асланьö изын. Этатшöм уджсянь чожа мый и ме вывтыр пасьта сiдз жö визывтiс ньылöм. Но уна я эшö вермис лоны прок сэтшöм отсасиссянь, кöда нельки асьсö кок йылас видзны бытшöма эз вермы?

Сёрöнжык ас оланын меным усьлiс керны быдкодь сьöкыт удж. Но сьöкытжык сысся, кыдз сизимгодсялö тшыгувья, да и сёрöнжык тожö, ковсис кыскавны пöкрöм вылын мельничнöй изын — сьöкытжык эта уджся нем эз ни пантасьлы.

Ассиным уджсö ми сэк ештöтiм югдандорас. И кöр öтамöд коласын каттисян коккез вылын ме кысси деревня кузя мамö сьöрö гортöдз, кынöм сималöмсö ас пытшкын эг ни кыв. Ме, кыдз баитсьö, рад вöлi месталö, и кöр сибöтчи ольпась дынöдз, сэк кежö джынысви узи ни.

Эг кыв ме асывнас мамöлiсь и удж вылö мунöм. Гортö сiя менö кольöм узьтöн. А кöр сайми, эшö синнэзöс осьтöдз кылi, кытшöм сьöлöм öдззöтан, шоныт да вына нянь дук кöвьясьö омöн керку пасьта.

Ольпасись чеччытöн ме казялi комись залавка вылiсь лёдзöн öтамöд бердö сувтöтöм вит-квать рудзöговöй нянь чöвпан. Кокнита везтыштöм нянь рузум увтын нiя вöлiсö эшö шонытöсь, дзик ловьяöсь. Этö нiя и лолалiсö керку пасьта сiйöн шоныт да пöткöтан дукнас, кöдасянь лэдзчис дуль да кокнита бергöтчис юр.

Сэтöн жö залавка вылас, ордчöн зелёнöй рöма эмалированнöй кружкакöт, кöдаын меным мамö колявлiс лун кежö йöв, куйлiс челядь кидолонь пасьта небыт да кыз нянь шöрöм — менам павжун. Сiя тожö эшö вöлi шоныт. Но видзчисьны сылiсь одзланься сайкалöмсö вын менам эз ни судз. Ме сэтöн жö пондi сёйны.

Пöт кынöммезöн ни кынымкö лун сьöрна ми эшö ештiм котрасьыштны да орсыштны кöр грива вылын шар-палкаöн, кöр гунадорын — куруöн. А сэтöн и гожумся каникуллэс чулалiсö. Быдöннымлö ковсис мунны школаö.

Велöтчаныс таво эз ни полöт сiдз, кыдз эта вöлi мöйму. Мымдакö, тыдалö, ылöстi ни, что нем умöльыс да неколанаыс сыын абу. Эд сэк кежö ме тöдi азбука, жагвыв верми лыддьöтны. А лыддьöтнытö менам гортын нем эз вöв. Школаас жö нiя учебниккезся, кöдна сьöртi ми велöтчим гижны да лыддьöтны, вöлi эшö неыджыт библиотека, кöдаись книгаэсö кынымкö лун кежö позис босьтавлыны гортö.

Öнöдз эшö тöдвылын, что сэкся школьнöй библиотекаын книгаэс унажыксö вöлiсö вуджöтöмöсь роч кыв вылiсь. Этö М. Шолоховлöн «Лэбтöм вильса», Н. Островскийлöн «Кыдз калитчис сталь», М. Горькийлöн «Мам» да мöдiккез. Ны коласiсь мукöдсö, не öддьöн эшö бытшöма вежöртöмöн, ме пондi лыддьöтны вöлись год бöртi, куимöт классын. Мöдiк классын медодз лыддьöтöм книгаэз коласiсь öнöдз эшö тöдвылын «Куим порсьпиян», «Муму» да мöдiккез. Сiйöн, кöр сибöтчис сентябрьлöн медодзза лун, велöтчыны мöдiк классö ме мунi ыджыт охотаöн. Эз полöт немымда нельки виль велöтiсь, Денисова Анна Николаевна. Но сiдз кыдз одзза тшыгьялан годыс вунны сэк кежö тöдвылiсь эз на ешты (сiя и öнöдз тöдвылын и сiдз некöр оз и вун), то эта полöтiс одзлань ни. Эд велöтчан годыс пондöтчöм бöрсянь вились сибöтчасö гажтöм ар да кöдзыт тöв, нем лоас сёйны. Сэтчö жö мунiс вöлись 1944 год. Войнаыс эшö эз чулав, и одззамоз вöлi сьöкыт. Сiйöн одзза годся тшыгьялöмыс полöтiс öнiсянь ни. И полöтiс сiя не только менö öтнамöс, а быдöс менчим ёрттэзöс, кöднакöт ме велöтчи. Сы увья и школаас медодзза лунсянь ми чукöртчим гажтöмöсь.

Вермис я война коста орöтöм колхозын вежсьыны мыйкö буржыклань öтiк годö? Сэтчö жö кöр и ачыс войнаыс эшö эз чулав. Вежöртана — сымдасö видзчисьны эз позь, и некин эталö эз верит. Видзчисис кö мый отирыс одзлань кежö, дак дзир оланлiсь умöльжыклань (ме висьтася только ас деревняын олiсь отир йылiсь) вежсьöм. Видзчисьны умöльжыклiсь сибöтчöмсö и былись усис недыр.

Вились, кыдз и одзза годас жö, арсяняс колхозниккезлö сюсö сетавлiсö шоча да нач етшаöн. Эта кузя отирлöн перыта бырсис ас карчйöррезын быдтöм карч: картовка, лук, калиг да капуста. Тöвшöрнас вöтiс бöра сiя жö, мый вöлi быдöнныскöт чулалöм годö. Тшыг кулöмсис вились ковсис сёйны кач да турун, пильнöй чаг да упаддез (кулöм пода).

Эта тулыс кежö локтiс фронт вывсянь контуженнöй, глухöй да комиссованнöй солдат — Созонов Давид, кöдö общöй собраннё вылын колхозниккез сэтöн жö бöрйисö председательöн. Важся председательыс — Горба Öндрей — эшö войнаыс кончитчытöдз пышшис.

Оз позь висьтавны, что виль председатель дырни сьöкыт колхознöй удж лоис кокнит да пондiс керсьыны ачыс. Кокнитжык лоис сiйö керны, сiдз кыдз отирыслö уджалöмыс понда пондiсö сетны быд месяц да унажыкöн нянь. Лишньöйыс и сэк эз вöв, но кувны тшыгсянь некинлö эз ни сетö.

Тöдчöмöн кокнитжык лоис и миянлö, но тожö не дарöм. Чулалöм годыс тöдвылын. И таво отир пондiс лöсьöтчыны тöв кежö аскадö. Пöрись отир, кöдна ловйöн кольччисö гожум кежö, а öтлаын ныкöт и ми, челядь, мымда вермим ваялiм да солалiм тöв кежö тшак, косьтiм ягöд...