Вот и чож!

Васяткалö мунiс нёльöт год. Олiс сiя городын. Сэтчин зоночкалöн эз вöлö не дед, не баб. Эз вöлö и пöрисьжык сой нето вон. Олiс Васятка öтiк мамкöт. Зоночкалöн мамыс уджалiс мастерскöйын вурсисьöн. А Васятка ветлiс челядь садö. Быд асыв, кöр зоночкалöн мамыс ветлывлiс удж вылö, Васяткаöс нуöтлiс сьöрас. Мунны подöн город шöрöдз вöлi ылын. Сiйöн Васятка мамыскöт пыр ветлiсö городскöй автобус вылын.

Городас зоночкаöс мамыс кежöтлiс челядь садö да кольлiс сэтчин лунтыр кежö. Садын, сыкöт öтлаын, олiсö и мöдiк челядь: сы кодь жö учöтик нылочкаэз да зоночкаэз. Вöлiсö сэтчин и уна быдкодь чачаэз, кöднöн позис орсны. Овны Васяткалö садын вöлi бур да гажа. Казявтöг чулавлiс лун. А рытъявыв кадö садас вовлiс зоночкалöн мамыс. Кыкöн нiя иньдöтчывлiсö автобуссэз сувтчанiнö, мед бертны гортö.

Сiдз чулалiс шоныт да гажа гожум. Сибöтчис кöдзыт да зэра ар. Öтпыр рытнас Васятка мамыскöт тожö петiсö садiсь да сибöтчисö автобуссэз сувтчанiнö, мед мунны гортö. Сiя лунö öтöрас сулалiс умöль погоддя. Эз мыччась вылiсянь рам югöра шондi. Ойвыв ладорсянь пöльтiс вына да кöдзыт тöв. А поснит зэркöт вылiсянь усис ва лым — шлячитiс. Сiя лунö мыйкö увья эз лок колана автобус. Бертны гортö вöлi немöн. Вель дыр видзчисьöм бöртi Васяткалöн пондiсö кынмыны киэз.

— Ма-ам, мунам ни гортö-ö, — нуöтчис зоночка. Сiя кутчисьлiс мамыс ки бердö да кыскис сiйö сьöрас.

— Чайтчан подöн гортöдз муннытö? — юалiс сэк зоночкалiсь мамыс.— Чайтча, — повтöг висьталiс Васятка. Подöн нiя иньдöтчисö, гортлань.

Муннытö вöлöм ылын. Мамыс ки бердын видзсьытöн, Васятка вель дыр оськалiс, керöс паныт. Эстöн ни зоночкалöн кок етшыс орис. Ылö-ылö ковсис оськавны эшö веськыт улица кузя. Сэсся сiдзжö ковсис мунны мöдiк улица кузя. А Васяткаэзлöн тöдса керкуыс мылякö сё эз тыдав. Гортö зоночка локтiс гажтöм да мыдз.

Керкуас Васяткалö мамыс отсалiс чöвтчыны да пöрччасьны. А сэсся тшöктiс орсны аслас чачаэзöн. Ачыс сiя чöвтчис да мунiс кухняö, мед лöсьöтны ужин.

Мыйкö дырна зоночка öтнас и былись орсiс. Неважын небöм самосвалöн сiя ваялiс стройка вылö песок да горöн буксуйтiс туй вылас. Но чожа мый этадз орсöмись Васятка мыдзис. Сылöн пондiс петны он. Охота лоис узьны. Сэк кежö Васяткалöн мамыс лöсьöтiс сёйны. Учöтик бекöрокö сiя чöвтiс зоночкалö суп, висьталiс:

— Пуксьы, Васятка, пызан сайö. Пондам ужнайтны.

Но пукавны пызан сайын зоночкалöн етшыс эз ни тырмы. Сiя паныт висьталiс:

— Ог сёй веж супсö. Ме бы гöрдö сёя.

— Талун гöрдыс абу. Сiйö вöлись ашын пуам. А талун колö сёйны вежö. Ме сэтчö пуктi лук, капуста да картов. Сiя тожö öддьöн чöскыт.

— Ог веж супсö сёй, — вились горöтчис Васятка поперег мамыслö. — Менам коли синнэз лякасьöны, — норасис сiя одзлань.

— Но ладно, он сёй супсö дак, ачыт тöдан, — согласитчис зоночкалöн мамыс. — А лукоксö да капустаоккесö тэ сёян? Сэк, видзöтан кö, и синнэт лякасьнытö оз пондö.

— Сёя, — шыасис зоночка.

— Вот и чож. Вай ме тэныт ачым отсала, — висьталiс Васяткалö мамыс. Сiя пуксис пызан сайö,босьтiс зоночкасö киас, пуксьöтiс сiйö пидзöссэс вылö, пондiс вердны. Чожа мый капустаэс да луккес вöлiсö сёйöмöсь. Эстöн Васятка сёйнытö вились дугдiс. Зоночка пондiс норасьны юр висьöм вылö.

— Ась инö, эн сёй супсö, юрокыт висьö дак. Ог и тшöкты. А картовкаэсö тэ сёян? Сёйышт вот небытиккесö и юрокыт дугдас висьны. Вот адззылан.

— Сёя, — вились висьталiс паныт зоночка. Одзлань Васяткалöн мамыс пондiс панявны супсис картовка торрез, вердiс нiйöн зоночкасö. Недыр мыйись и нiя тожö вöлiсö сёйöмöсь.

Öнi Васятка пондiс норасьны коккес висьöм вылö. Сэк сылö мамыс одзлань висьталiс:

— Этö сысянь, что тэ супсис пым ваоксö некыдз он бы паняв. А вот панялышт бекöроксис кольччöм ваоксö, сэк и кококкет висьны дугдасö.

— Былись? — дивуйтчöмöн юалiс Васятка мамыслiсь.

— Конешно, былись, — шыасис паныт зоночкалö мамыс.

Сэк Васятка босьтiс сы киись пань, вештiс матöжык одзас ассис бекöрок, кутчис панясьны ачыс. Супись кольччöм ваокыс зоночкалö, тыдалö, и былись гленитчис. Недыр мыйись сiя быдöс вöлi сёйöм. Эта бöрсянь Васятка сёйис эшö быдса котлетка да юис чöскыт чай.

— Но, кыт эшö тэнат висьö? — юалiс сэк зоночкалiсь мамыс.

— Некыт сэсся оз, — шыасис паныт Васятка да лэдзчис мамыс öлöдзись джоджö. Эстöн сiя, кыдз кöзапиян, скок-скок чеччöвтыштiс коккес вылын.

— Вот и чож. Веськöтiс супыс?

— Веськöтi-и-ис.

— Эшö эта бöрсянь он понды сёйны?

— И понда, понда, понда, — öдззис шувлыны Васятка, одззамоз мамыс одзын чеччавтöн. Сiдз, пöт кынöмöн, сiя петiс кухняись да иньдöтчис узьны.