Туригум

Роч кыв вылын гижöм сьыланкывсö: «Ой, цветёт калина...» сiя кадö ме ешö эг кывлы. Эг тöд бытшöма и эта кустарниклiсь нимсö, сiдз кыдз миян местаын олiсь отир коласын калинанас примитöм шуны понуль. А коми кыв вылын асьсö калинасö шуöны то турипу, то туричерпу, а то и турикокпу. Этö, натьтö, сысянь, что кустарникыслöн öтiк гоз уввез бердсянь мöдiк гоз уввез бердöдз быдмöм шатьыс, видзöтны кö сы вылö листтöм кадö, мыйöнкö и былись вачкисьö тури кок гум вылö. И былиськö эта сiдз, то калинасö комиöн буржык, натьтö, лоас шуны то ли турикокпуöн, то ли турикокгумöн, то ли эшö простöйжыка да дженытжыка — туригумöн.

Эстöн жö корсьö висьтавны эшö и сы йылiсь, что этö жö туригумсö уна отир соралöны мöдiк неыджыт кустарниккöт, кöдö примитöм шуны жопуöн, жоягöд пуöн или зынапуöн, бöрьяыс кöдна коласiсь медточнöй. Эта кустарникыс, кыдз аслас листтэзöн, сiдз и цветнас да ягöддэзнас былись сэтшöм зына или нечöскыт дука, что этö дуксö оз вермö терпитны нельки уна садовöй вредителлез. Соравны жö öтамöд коласын этнö кык кустарниксö, кöр морт тöдö бытшöма ны коласiсь кöть öтсö, — некöр оз ни понды. Öткö сiйöн, что листтэзнаныс этна кык кустарникыс öтамöд вылö некыдз оз вачкисьö: нiя ылын не öткодьöсь. Зынапулöн быдса листыс аркмöтöм куим, нето вит торья листоккезiсь и öддьöнжыксö вачкисьö американскöй клён, нето ясень лист вылö, сiя кадö, кöр туригумлöн öтвывса да кидолонькодь паськыт листыс матынжык аслас рисунокöн йыла листа клён дынö. Мöдкö, и цветитöмнаныс öтамöд вылö нiя тожö матын оз вачкисьö. Зынапулöн цветыс быгалöм-веж рöма да рышкытик, а быдсöн соцветиеыс гöгрöса, топ шар. Туригумлöн жö соцветиеыс гöгрöса, не шар вылö вачкисяна, а висьтавны кö роч выраженнёöн — зонтичнообразнöй, кöдаын öткоста эмöсь, кыдз айпöв, сiдз и мампöв цветтэз. Сэтчö жö нiя эшö и неöткодьöсь. Бель чочком рöма айпöв цветтэс розыс пасьта дзир öтöрсяняс и аркмöтöны аскодьöм гöгрöса кытш. Эта кытш пытшкын цветитöны мампöв цветтэз, кöдна асланыс вежкодь-зелёнöй рöмöн и син вылö кодьöн оз усьö. Но сёрöнжык тшöтш этна не öддьöн тöдчан цветтэз местö шогмöны туригум кустарник вылын донася-дона дон кодь сьöкыт, югыта свиттялан, басöк ягöддэз, кöдна немöн оз вачкисьö дробь гырися, кöть и тожö гöрд, но бель вачкöмкодь рöма зынапу ягöддэз вылö.

Эмöсь этна кык кустарниклöн вывланьын висьталöммесся и эшö мöдiк ассяма торрез. Бус кодь сера рöма кö, шуам, качыс туригумлöн, то зынапуыслöн сiя пемыт-коричневöй, а том уввес вылын эшö и свиттялана. А то эшö. Радейтö кö, шуам, сiя жö зынапу, кутчисьны да быдмыны ас кежас ась и кöс местаын, но бытшöм му вылын, то туригум радейтö лажмыт да ва местаэз. Этасянь сiя и пантасьлö ас кежас частожыксö лажмыт видззез вылын да шоррез пöлöн.

Быдöс эстöн висьталöмсö ме пондi тöдны вöлись öння кад кежö, джын векöс олöм бöртi. Сэк жö, вит-кватьгодся зоночкаöн, ме нельки эг тöд сiйö, кыдз шуöны этö кустарниксö, но асьсö, кыдз быдмасöс, ме сiйö тöдi ни. И тöдi, думайтсьö, нач не сiйöн, что миян местаэзын туригумсö позьö пантавны быд оськöв вылын — не. Нач мöднёж. Деревня гöгöрись быдöс тöдса ыб-видз вылiсь сiйö позис пантавны дзир öтiк местаись.

Джын километр ылына миян деревня дынсянь, неыджыт вöрок сайын ойвыв ладорö, куйлiс паськыт да ойвывлань жö покатакодь ыб Шабурник. Деревня ладорсянь векнит да дзескыт вывланись межа дорын, кытöн тöдчис неыджыт ва жила, пöдтöм быд ладорсянь поснит пипу да бадь вöрöн, и быдмис öтiк винерик куст, кöда быд тулысö, кыдз вермис цветитiс öддьöн басöк чочком цветтэзöн, кöдна оссьывлiсö дзир роз гöгöрöттяс, а роз пытшкас нiя вöвлiсö вежкодь-зелёнöйöсь.

Шогмывлiс я цветитöмыс бöрсянь эта куст вылын ягöд, и кытшöм сiя вöвлi рöмнас да кöрнас, висьтавны ог куж, сiдз кыдз адззывны нето пешлыны нельки öтпырись эз усьлы. Некытöн мöдiклаын горт деревня гöгöр эта кустарникыс челядь кад коста сэсся эз пантасьлы.

Мöдöтпырись меным сiйö усис пантавны гортын жö, но не кытöнкö ас деревня гöгöр, а Косаын, сизимдасöт годдэзö. Öнöдз тöдвылын сiя, что вöлi ме сэтчин арвыв кадö, сентябрь месяцö. Кайи ме рытъявыв Косаас Кордон ладорсянь, вежöртана, — подöн. А кöр чулалi важ кирпичнöй весьтöт, вывланьын эта кустарникыс пондiс пантасьлыны чуть я не быд палисадникын, быд керку öшын увтын. И лоны бы туригум кусттэзлö ягöдтöммезöн, син вылö меным нiя, натьтö, некöр бы эз и усьö. Но кыдз нарошно сiя годö ны вылын ягöдыс, ась эшö и не быдсöн вöлi сэк кежö ештöм, вöлi сымда, мымда ме сiйö не одзжык этася, не бöртiжык — некöр эг адззывлы. Гырись да сьöкыт роззэзсянь быд кустыс, дзик асывся кыз лысва увтын ытшкытöм турун, вöлi кöстöм да нырыштöм му бердöдз.

Но вöлi менам эта туригумкöт эшö öтiк пантасьöм, кöдö, кытчöдз ме ловья, некыдз да немöн тöдвылiсь он ни пыркöт.

Сизимдас öкмысöт годö мартнас, кöр омöн Гайнскöй район пасьта куйлiс эшö кык метр сувда лым, меным ковсис сюрны Верхньöй Старицасянь Нижньöй Старицаö, кöда сэк кежö вöлi важын ни чапкöм-пöдналöм и некытшöм туй, да сэтчö жö эшö тöвнас, эз вöв. А волокыс кыссис даскыкьямыс километр ылына. Вöралан лыжаэз вылын югдандорас ме петi туйö, мед посёлокас вöлöм-видзöтчöм бöрсянь рыт кежас ештыны бертны бöр. Но пыдын да небыт лым увья ме увтын вöралан лыжаэс вöйисö тожö пыдына. Быд оськöв коста ме вöйлi лымас чуть я не пидзöсöдз. Некытшöм чарöм, кöдалö колiс ни бы лоны эта коста, мылякö эз вöв.

Вежöртана, что этадз вöялöм шогья мунсис и сьöкыта, и жагöна. Но мед ештыны бертны сэтчинсянь эшö и бöр, ковсис тэрмасьны. Сэтчö жö ме вöлi пасьтасьöм шоныта, а асывся кöдзыт погоддяыс, кыдз эта и овлö мартнас, вежсис сёрöнжык шоныт вылö. Чожа мый муннытö лоис жар. И эта жарсянь перыта пондiс косьмыны горш. Но некытшöм юан тор менам сьöрын эз вöв. Сёйны жö кок увтiсь лым ме тожö эг лысьт. Сiя вöлi кöдзыт. И пымалöм вылö сiйö сёйöмсянь недыр вöлi простудитчыны.

Кынымкö час сьöрна эта горшкосьманкöт пессьöм-мырсьöмсянь ме тöдчöмöн мыдзи. А волокыслö одзланьын не дор, не пон эшö эз тыдав, кöть и сэтчин, дор-понас, некытшöм юан тор менö эз видзчись. Сiйö позис адззыны дзир Верхньöй Старица посёлокись, вермыны кö бертны сэтчин бöр.

Этöн каднас, жагвыв одзлань коккезöс вештавтöн, ме неöтпырись ни думайтi, не бергöтчыны я джын туй вывсянь, да не бертны я бöр олан посёлокас сiдз, немтöг. Но сэтчин вöлöмлöн причинаыс вöлi ме понда öддьöн важнöй, бергöтчыны джын туй вывсянь бöр да бертны немтöг некыдз эз позь.

Сьöкыт висьтавны, кыдз да мыйöн бы вермис чулавны ме понда эта сьöкыт туйколас, не пантасьны кö бы менам туй вылын öтiк туригум кустлö. Öтiклаын вöр коласас менчим туйсö поперегалiс неыджыт юок. И кöр ме лымöн тырöм пос кузя оськалi ю мöдöрас, этасянь ни сэтчинiсь берег дорсис меным усис казявны мыйкö гöрд рöма доннэз вылö вачкися-наö. Öшалiсö этна доннэс нач лажмыта лым весьтас, а мукöдыс ны коласiсь вöлiсö нельки веськыта лым коласас.

Ылiсянь ме этнö виррöма доннэсö примитi няппез туйö. И дзир зэв матö ны дынö сибöтчöм бöрсянь и казялi, и вежöртi, что нiя нач и не няппез, а туригум ягöд. Ар кежас воöмыс, кыдз и рябина жö, киссьынытö му вылас сiя эз тэрмась, и оз кö инмылö кайез, тулысöдз вермас öшавны кусттэз вылын, мый ме син одзын сэк и вöлi.

Туригум ягöдсö нельки бытшöма воöм бöрсянь чöскытöн шуны оз позь. Аскодьöм шöмся сiя эшö и аскодьöм жö курыт кöра. Но öнi, кöр ме киын лоисö кынымкö гöрд дон кодь туригум ягöд тусь, чöскытся-чöскыт конфетка туйö öтiкö ны коласiсь ме босьтi öмам. Кöр сысянь, сылöмсяняс ни шöм кöрыс паськалiс öм пасьта да сöдзыштöм дуль сорöн шедыштiс горшöдз, сэк ни ме казялi, что пакмыны-косьмыны одззамоз сiя дугдiс.

Кöр куст вывсис вöлiсö öктöмöсь медбöрьяöдз не öтiк дас мымда ягöд да сюйöмöсь телогрейка карманнэзö, сэк вöлись ме вöрзи одзлань. Öнi ме тöдi ни, что кувны горш косьмансянь эта туй вылын нiя меным оз сетö.