«Смертькöт» пантасьöм

Ме сыись полi учöтсянь. Пола и öнi. И, натьтö, сэтчöдз понда повны, кытчöдз ловья. Сэтшöм уж мортлöн природа, что полöтанаыс сiйö век сьöрна полöтö. Велавны эта дынö оз позь. Сэтчö жö, кöр эта полöтанаыс эшö адззывлытöм да тöдтöм. Сэтшöмыс полöтö эшö öддьöнжык. Ме понда сiя сэтшöм и вöлi — адззывлытöм да тöдтöм. А быдöс сысянь, что миян местаэзын эта тварьыс оз ов. Не учöтсянь, не сёрöнжык, не кулöмöс и не ловьяöс, пантавлыны меным сiйö некöр эз усьлы. Но быдкодь литератураись да мöдiк отирлiсь ныкöт пантасьлöм коста быдкодь ужассэз йылiсь лыддьöтлi сымда, что сувтöтны кö быдöс этö син одзö, дак öтiк этасянь ни, кыдз баитсьö, юрси кышöпöн сувтö. Сiйöн меным быдкоста и мыччассьö сiдз, что усяс кö пантасьны казявтöг эта страшнöйся-страшнöй тварькöт кытöнкö вöрын нето нюр вылын да лоны кö эшö эта кадö öтнаслö, сiдз и тöд — пöран весьö. Сыкöт пантасьöмыс меным одзлань ни мыччассис кыдз смертькöт пантасьöмöн, и некытшöм охота эта вылö эз вöв.

Лыддьöтiсьыс öнöдз, натьтö, вежöртiс ни, что басниыс мунö змея йылiсь.

Тöдса отирсянь ме унаись кывлi, что эмöсь нiя и миян округын, нельки менам Косинскöй районын. Но не быд сы пельöсын. Кывсьö, что обыкновеннöй гадюкаöс несьöкыт пантавны Коса ю пöлöн сы улiсь визылын: Солым, Светлица да Усть-Коса посёлоккез гöгöр нюр-вöррезын. Но миян местаöдз, Чураковскöй «крайöдззас», кытöн ме чужи да быдми, да кытöн абу матын паськыт нюррез, нiя оз кайö. Абу нiя, тыдалö, и Иньва ю бассейнын, сiдз кыдз ныкöт пантасьлöм йылiсь басниэз эстöн олiсь отирсянь некöр эг кывлы. Эг пантавлы нiйö эстiсь и ачым.

Первуись меным усис пантасьны сыкöт Татарияын, Казань увтын, санаторий «Крутушкаын» шоччисьтöн. Да и эта пантасьöмыс, кыдз лоис вежöртана невна сёрöнжыка, вöлöм бöбöтчана. Юöрт кинкö одзжык, что сэтчин пантасьлöны змеяэз, санаторий стенаэз бердсянь ме бы и куим оськöв ылына некöдöрö эг мун. Но аскадö эта йылiсь меным некин эз юöрт. Сiйöн кыкöн ёртöкöт, кöдакöт олiм öтiк жырын, кытшöмкö лунö ми иньдöтчим Голубöй ты дынö. Эм сэтчин сэтшöмыс километр кык ылына санаторий дынсянь.

Кыдз ми панталiм сыкöт туй вывсис учöтик да повтöм дзöдзывпиянöс, кöда шонтiсис шондi югöррез увтын да некыдз эта увья эз мöд кежны миян туй вылiсь, эта йылiсь ме висьтаси ни. А тшöтш ты дорас меным усис пантасьны и сыкöт, кöдакöт пантасьöмись, кыдз вывланьын вöлi висьталöм ни, ме полi, кыдз смертись.

Öтiк ладорсянь Голубöй тысö янсöтiс Казанка ю бердiсь дзир непаськыт да веж песока туй. А тылöн мöд лажмытжык берегас быдмис тшöк ловпуа вöр. Эта тшöк вöр коласöт, нач ты бердöттяс, и вöлi тальöм кытшöлöн векнитик подöна туёк. Лажмыт местаыс увья да уна отир ветлöтöмсянь туёкыс вöлi пичиктöм-тальöм нятьöдз. А öтiклаын, не тальччавны кö бокö, турун да вужжез вылö, позис бродитны вонясянöдз. Но локтiм кö ми нарошно видзöтны Голубöй ты, миянлö сiдз жö, кыдз, натьтö, и быдöс отирлö, кöдна эстöн вöвлiсö, охота вöлi кöть öтпырись кытшöвтны омöн сы гöгöр. А сiдз кыдз ми Юрий Александровичкöт вöлiм туфлиэзöн, керны сымдасö эз позь, нятьыс эз сет.

Мыйкö дырна ми ёртöкöт жöдзöв-керим öтiк местаын, видзöтiм, кыдз то öтiклаын, то мöдiклаын, метр кык сувда голубöй рöма ва увтын, осьтаэза ты пыдöсiсь дугдывтöг бульчиктiс-петiс сэтшöм жö голубöй рöма ва. Сорасьтöг позьö висьтавны, что вачкисьö сiя рöмнас разведитöм меднöй купорос вылö.

Голубöй рöма ва — природаын интереснöй явленнё. Лоö сiя сэтшöмöн кытшöмкö природнöй минераллэзсянь, кöдна пыр ключöн петö мусис. Но кытшöм этна минераллэз, не учёнöй, сымдасö ме бытшöма ог тöд и висьтавны ог кутчись. Висьтала дзир сiйö, кытшöмöн да мый адззылi.

Берег дорас мыйкö дырна сiдз сулалöм бöртi ёртö кежис бöр туй ладорö. Ме жö эг вермы видзсьыны сыись, мед не кытшöвтны ты гöгöр. «Эд ветлöтöмась жö миян вотöдз отирыс эта нять туёк кузя. Эта ветлöтöмсянь сiя сiдз и тальсьöм. И миян бöрсянь тожö пондасö ветлöтны. Ыджыт я беда, нятьöсьтны кö öтпырись кöмкöт? Сiйö сэтöн жö эта бöрсянь и миськавны позяс». Этна лöньсьöтанкодь думаэзöн ме и иньдöтчи öтнам ты берег дорöт пыдына тальсьöм туёк кузя, кöда вачкисис унажыксö подаöн лойöм оттöмик сёр ^вылö.

Тöдны бы одзлань, кытшöм вöвлытöм пантасьöм видзчисьö менö эта дзескыт да нять сёр вылын, ме бы сiйö ордйи, кыдз баитсьö, сизим верста ылына. Но... мый видзчисьö мортсö минута нето оськöв бöртi, казявны да тöдны сымдасö одзлань ми некöр ог кужö-вермö. Кадiсь кадö сувтчышалöмöн да нёджжасьöмöн, вылынжык да кöсжыкиннэзö тальччавтöн, ме кери ты берег пöлöн оськöв. Öтпырись ме весьтiсь берег увтсис мыччисисö ваас кык вашыр (водянöй крыса) да ва вевдöрас мыччасьтöг джын метр пыдына вевдöрсяняс, дзик быльнöй водолаззэз, иньдöтчисö ты мöдöрас.

Жагвыв, мед етшажык нятьöсьтны коксим кöмкöт, вуджи ме и медпыдына лойöм нять местасö. Одзлань туёкыс лоис кöсжык ни, и оськавнытö лоис кокнитжык. Но кöр ме лэбтыштi юрöс одзлань видзöтчöм могись, эстöн вдруг, нач видзчисьтöг, казялi, кыдз дзир öтiк оськöв ылына ме дынсянь, зэв-зэв пуэс бердöт видзсьöмöн, сiя жö непаськыт да дзескыт туёк кузя, öтмöдöрö тöдчöмöн виклясьтöн, паныт мелань сибöтчö бурöй рöма, метр кузя, да ухват ороп кыза змея. Ась ме сiйö ловьянас некöр эшö эта вотöдз и эг пантавлы, но рисуноккез вылiсь, быдкодь книгаэзiсь видзöтлi унаись ни. Этасянь перво жö и тöдi. Казявны бы сiйö кысянькö ылiсянь, кулöмöн, кытöнкö куйлытöн нето ме шогья пышшытöн, нельки сэк, нельки сэтшöм пантасьöмыс пöртiс бы менö весьö. А эстöн сiя вöлi ме дынсянь дзир öтiк оськöв ылына и нач не кулöм, а ловья да эшö и локтiс мелань паныт. Ог кутчись висьтавны аслам сэкся состояннё йылiсь. Чапкис ли менö жарö, кынтiс ли местаам, тöдвылын нем эз кольччы. Но нельки повзьöмувья сöдзöм синваэз пыр ме бытшöма казялi, кыдз сiя, натьтö, вывтырнас öтмöдöрö чуклялöмсянь, сiдзжö öтмöдöрö öвтышалiс сантиметр дас сувдöн му бердсянь лэбыштöм сьöктан кодь юрнас. Казялi и сiйö, кыдз öткоста этакöт, дзик лöгасьöм кинкö вылö, грöзитöм могись, сiя сiйö и керис, кузьвевйöн мыччалыштлiс öмсис векнитик, сьöд да вожа йыла кывсö, а сы коста жö, и тожö, натьтö, грöзитöм могись, ась и не лöгöтöм пороз моз горöн, пишкайтiс.

Кыдз бы ме эг повзьы эта видзчисьтöм пантасьöмсянь, этасянь ылöсö уджавнытö сё жö эз дугды. Кытшöмкö мгновеннё коста ештi думайтны, что не казявны менö аскадö эта кыскасись тварь некыдз эз вермы. И эз кö сiя кеж öнöдз ме туй вылiсь, эз кö пондыв пышшыны нето сайöвтчыны ме син одзись, дак дзир сiйöн, что нарошно локтiс меным паныт, локтiс мед уськöтчыны ме вылö, мед курччöвтны, чушкыны. А эта ме понда не мый мöдiк, кыдз смерть, кöдö ме сiя кадö не эг видзчись, не эг кошшы.

Эта жö мгновеннё коста ме ештi эшö казявны сы кымöс вылiсь, эм кö эта тварьлöн кымöсыс да позьö кö сiдз висьтавны, анькытш тусь пасьтышта кык гöрд-веж пятно. Но сiя кадö нiя меным нем йылiсь эз ни баитö. Горöтi я ме повзьöмувья? Кори я кытшöмкö отсöт? Сымдаыс тöдвылын оз видзсьы. Ог вермы висьтавны и сiйö, кöд коста ештi бергöтчыны бöр да кытшöм перыта, дзик былись чушкалöм ни, кок увтö дзарышавтöг, вотялi-вуджи бöр нять мöдöрас. Öткоста видзчиси дзир öтiкö, кöр сiя чепöссяс ме сьöрö да каттисяс то ли коккез, то ли голя бердö. И, вежöртана, конешно жö, что эта тварь шогья пышшытöн не булькнитöм некытшöмö, не чольснитöм бöрсим эг ни кыв.

Туй вылас петтöдз змеяыс менö и эз вöт. Сiйöн, ты мöдöрас сулавтöн ни, ме дзар керыштi ва омöнняс сiя местаö, кöда весьтын шогмис эта тварькöт сэтшöм неколана да сэтшöм видзчисьтöм пантасьöмыс. Сэк вöлись меным и усис казявны, сьöктанöнмоз ва вевдöрас мыччисьыштöм юрсö. «Сiдзкö, — думайтсис меным, — кытшöвтнытö ме сьöрö нятинöттяс сiя эз понды, а вуджö веськыта ваöт». Эстöн ме и нач öши ладсим. Кытчö пондыны воштiсьны одзлань, эг тöд.

Сiя кадö менам ёртö сулалiс туй дорись пожуммез коласын, нёджжасис Казанка ю ладорö.

— Мунам эстiсь, Юрий Александрович! Змея ме сьöрö вöтчö.

— Кытшöм эшö змея? Кытöн?

— Да вот ты мöдöрсяняс миянлань вуджö.

Юрий Александрович тэрмасьтöг, кыдзкö, кыдз меным мыччассис, дышöтчöмöн бергöтчис мелань, оськöв бöрын оськöв петiс туй вылö.

— Кысь тэ сiйö адззылiн?

— Да вот жö юрыс ва вевдöрас тыдалö. — Эстöн öнi ме ни сылö мыччалi кинам ты ладорö, кöда кузя сьöктан юра змея сибöтчис миян ладорö сё матöжык да матöжык.

Юрий Александрович казялiс, оськöвтiс матöжык берег ладорö, мышкыртчöмöн видзöтöв-керис паныт сибöтчись тварь вылö.

— Не змея сiя, а уж. Нем сыись повнытö.

— Кысь тэ тöдан?

— Да вот жö гöрд-веж пятноэс кымöс вылас тыдалöны.

— А мыйлö нö сэк сiя ме сьöрын вöтлiсьö?

— Кыдз тэ сьöрын?

— А сiдз вот... — Одзлань ме пондi висьтасьны, кытшöм пантасьöм шогмис эта тварькöт ты мöдöрас. А кöр ме кончитi ассим басниöс, ёртö ваксьöв-керис ме вылын да сэтöн жö одзлань юöртiс:

— Петö, что тi öтамöдiсь пышшалат: тэ сыись, а сiя — тэись.

— Кыдз сiдз?

— А сiдз вот. Казявтöг пантасьöмсянь тэ повзин да уськöтчин пышшыны, а сiя сiдзжö. Тэ чепöссин бöр туёкыс кузя, а сiя — ваас. А таланись берегын эшö öтпыр пантасят.

Эта басни коласын одззамоз полöмöн кадiсь кадö ме сё эшö дзарышалi ты берег ладорö, кöр уж (былись кö сiя уж), петас талань берег дорö. Но берег дорас сiя сiдз и эз мыччась. Эшö öтпыр ва вевдöрись сылiсь сьöктан кодь юрсö ми ёртöкöт казялiм сэк, кöр сiя вуджис миян ладорсянь бöр ты мöдöрас.

А кыдз объяснитны ужкöт сэтшöм видзчисьтöм пантасьöмсö? Сёрöнжык меным усьлiс лыддьöтны, что эта кыскасян тварьыс ылö адззö умöля. Сiдзкö и ты мöдöрас медодзза пантасьöмным коста медодз казялiс не сiя менö, а ме сiйö. Эта жö лоис и мöдöтпырись пантасьöм коста. Уж уйис веськыта миян ладорö сэтчöдз, кытчöдз эз казяв миянöс берег дорсис. А кöр матiсяньжык казялiс, сэтöн жö бергöтчис бöр. Вот сэтшöм история менам петiс ужкöт пантасьöмсянь, кöдö ме повзьöмувья примитi гадюка туйö.