Глава IV

Эшö одзза лунас Савелий Григорьевич юöртiс, что ашынас быдсöн семьяöн петаласö уджавны аслыныс. Колiс куртны да тэчны зэра луннэзö мужиккезöн ытшкöм турун.

Асывнас, кöр быдöнныс пасьтасьöмöсь уджалан паськöмö петiсö калитка сайö, сэтöн вöлись Борис сойыслö горöтчис:

— Тэныт ковсяс кольччывны. Сёрöнжык öтнат локтан.

— А мый, Борька, сэтшöмыс лоис? — Эм решеннё — чулöтны ашын комсомольскöй воскресник, мед керны куканнез понда культурнöй пастбище. А чукöртны отирöс удж вылö поручитöм комсомольскöй секретарьлö,

— Тэ мый, Борька, шутитан? Кин метöг сэтшöм решеннёсö примитiс?

— Инициатива, кыдз баитсьö, увдöрсянь, кöр вылiсянь нем оз керö.

— А мыля ашын? Эд позис жö, натьтö?..

— Эз и оз. Öткö, кресенняыс ашын ни, а мöдкö, понедельникнас, тэ ачыт тöдан, меным колö мунны.

— Но, Борька! Кыдз жö сiдз? Кöр тэныт эта юрат пырис? И мыля тэ одзжык эта йылiсь нем эн висьтав? Мый сэк меным кернытö?

— Буржык öнi жö юöртны быдöнныслö, киннэз тэнат эмöсь. Рыт кежас мыдзан, котрасьны деревня пасьта охота оз ло. — Борис босьтiс сойыс киись павжунöн сумка, кышыштiс сiйö вила ороп вылö, иньдöтчис аймамыс сьöрö, Светланалö нем эз кольччы, кыдз кытшöвтны деревня пасьта. Мунтöнняс ни нывка, öтiк бöрсянь мöдiкö, куснялiс чуннесö, лыддис, кыным мортöс позяс чукöртны воскресник вылö, кин дынö кежавны. Сы коста жö сiя ас кежас дивуйтчис: «А былись эд?.. Кыдз этö ме ачым одзжык эг думайт?»

Кресення лунö, одз асывсянь, том порсевскöй отир пондiсö чукöртчыны кукань карта дынö.

Локтiсö не быдöнныс, кöдна вöлiсö корöмöсь да кöдналö колiс бы. Кынымкö мортöс бригадир сё жö эз лэдз. Эд некытшöм выходнöй сiя лунö эз вöв, и кынымкö механизатор керисö мöдiк удж. Эз вöв быдöнныс коласын и томыник колхознöй экономист Вера Власова, кöда и правленнёас пукалiс дзир местасö видзöм могись. Öкмыс морт коласiсь куим зонкакöт вöлi сiя жö Савелий Григорьевич, кыдз уджсö тöдiсь, кöда юралöмтöг мыйкö вермис петны не сiдз. А унажыкыслö и локнытö вöлi некысь. Унажык том отирыс Порсева вылас эз вöлö.

Чукöртчисö тожö не öтдруг. Этасянь и видзчисьны öтамöдöс эз пондö. Кöр кеслыштöм черрезöн конюховка дынö сибöтчисö Петюль Васька да Порсев Андрей, кöдалöн тракторыс сулалiс вочтöмöн гаражын, Савелий Григорьевич да Борис уджалiсö ни, мöрталiсö майöггез.

Эшö зонкаэсся сёрöнжык локтiсö Андрейлöн иньыс, учöтик да быд ладорсянь гöгрöса, топ сёёвöй кашник, Раиса, да Галина аслас томжык сойкöт, Ленакöт.

— Сымдаöн ми и эмöсь Порсева вылас, кöдналö сiя мам местö, — гажтöмкодя шутитыштiс зоотехник. — Мунам, нывкаэз, уджавны колö.

— Мый нö ми, этмымдыштанас, уджалам? — шыасис Раиса.

— Мый колö — быдöс. Кытчöдз подакокувтсö ог янсöтö, гортö некин оз мун. — Конюховка дынсянь Светлана иньдöтчис подакокувт ладорö. Сы сьöрö жö вöрзьöтчисö и мöдiккез.

«Нем, натьтö, миян оз пет», — гажтöма думайтiс Таисья, чöлöмöн оськöвтiс быдöнныс сьöрö. Кинлö-кинлö, а сылö эта йöрыс колiс медöддьöн. Медöддьöн сы понда нывка и тöждiс.

Уджыс и былись быдöнныслö дöнзис тырмöмви.

Мед не ветлöтны öтмöдöрö простöн, конюховка дынсяняс жö быдöнныс кежисö карта увтö, кытöн подакокувт йöр бердын вöлiсö тэчöмöсь быдса штабеллезöн майöг да потш. Майöггезöн пельпоннэз вылын быдöнныс иньдöтчисö видз шöрö. Сэсся сiдз жö ковсис керны эшö вит-кватись. А кöр быдöс ваялöм майöггес вöлiсö рознитöмöсь поперег видз мöдöрöдз, зонкаэз сибöтчисö Савелий Григорьевич дынö:

— Одзлань мый бердö, Сава дядь? — юалiс Андрей.

— Ньöрьясьны эд, натьтö, ковсяс. Кералö, пырö оляс да. Висьталат нывкаэслö — петкöтласö.

Зонкаэз мунiсö. А Савелий Григорьевич вились кутчисис аслас удж бердö.

Кытчöдз ая-зона сувтöтлiсö майöггез, Петюль Васька да Андрей кералiсö ньöр: стычинник сувда томыник да векнитик кöзоккез. Нывкаэз сьöрсяняныс жö петкöтлiсö нiйö видз вылö, кынымöнкö рознитiсö сувтöтöм майöггез пöлöн. Эта уджыс кыссис павжунöдз. Но павжнайтнытö гортöдз и былись некин эз ветлы. Быдöнныс дзир юисö конюховкаись джын ведра тöрик туисöн юан, кöдö Светлана лэдзчöтiс гортiсь эшö асывсянь, шоччисьыштiсö, вились кутчисисö удж бердö. Мужиккез, öнi нёльнанныс öтлаын ни, пондiсö ньöрьясьны. Нывкаэз ваялiсö потш.

Оз позь висьтавны, что уджыс быдсöн петiс бытшöма. Арся ньöрыс не сэтшöм нюдз, кытшöмöн сiя овлö одз тулыснас, качыс кульсьытöн. Майöггес гöгöр каттьытöн уна ны коласiсь чегласисö, часто ковсис разьны да вежлавны. Эта уджсö манитiс. Öтпырись шоччисьöмся кад мужиккезлö сэсся эз петав. Некöр вöлi пукавны и нывкаэзлö, мед не кольччыны ньöрьясиссез сьöрись. Кöдзыввез моз нiя сiйö и керисö — ветлiсö öтамöд бöрсянь карта ладорö да бöр, кыскалiсö выланыс потш. И вöлись сэк, кöр ньöрыс вылö быд кузьöн кык ряд мымда потшыс вöлi пуктöм, Таисья да и Светлана тожö ловзисисö кокнитжыка, öнi нывкаэз вежöртiсö ни — бура или умöля — йöрыс шогмис, сiдзкö, и подакокувтыс лоас янсöтöм.

Лун сьöрна öтамöд коласын бергавтöн, зонкаыс вылö Таисья нельки синнэсö кодьöн эз лэбтыв. Мыйсянькö шуч мыччассис, бытьтö дзир ны сьöрын быдöнныс и синйöны. Этасянь нывка видзсис ылынжык зонкаыс дынсянь. Галина жö нач мöднёж: орсöтчис аслас Петюль Васькакöт, кыдз вермис, некытшöм полöм да недолыт сылöн эз вöв. Позис думайтны, бытьтö нiя эстöн öтнаныс, то ли Галина быдöс керис нарошно, отир син одзын ошшасьöм могись. Уджалiкас сiя дышöтчытöг босьтлiс суййытöм йыла да желля ньöр, кутчывлiс желлявны сiйöн йöрнöстöм зонкалiсь куш пельпоннэсö, пышшöтлiс сы ки увтiсь чер, гусьöн сибöтчывлiс бöрсяняс да кутлiс сылiсь синнэсö.

Сiйöн кытшöмкö кадö нельки томжык сойыс, Ленаыс, горöтчис:

— Дугды жö, Галка, отирыс син одзын кышсит петны. И стыд тэныт абу, пысасян. Басöк разь видзöтнытö?

Рытъявыв кежö нёль потш сувдöн йöр вöлi лэбтöм. А этасся вылынжыксö эз и ков. Öнiсянь позис лыддьыны, что подакокувт янсöтöм.

Кöр лоис пуктöм медбöрья потш, Савелий Григорьевич вачкыштiс сы кузя черöн, öзтiс куритны, нёджжасьыштiс керöм удж вылö.

— Эта дорын бригадаыс неделя сьöрна бы нюлсис. Уджалны тiян нёдж, дак öтiк петилеткаöн колхозыс миллёнерö пöрас.

— А мый, кутчисьны кöбы этадз быдöнныслö дак?.. — шыасис паныт Андрей, уджалан куртка подувнас öвтыштiс рожабаннэз пасьта визывтан ньылöмсö. Мöдiккез, мыдзöсь, тшыгöсь, но гажмыштöмöсь пöрисьжыкыс ошкыштöмсянь, шынь видзисö сы гöгöр сулавтöн.

— Ай да ми! Спасибо, что кужам уджавнытö! — юöртiс гажвевйöн Светлана, öнi, кöр уджыс вöлi керöм ни, нывкалöн настроеннё бурмис. Эта увья зоотехник и гортö öддьöнсö эз тэрмась. Кöр быдöнныс жагвыв пондiсö рознитчыны, айыслö да воныслö нывка горöтчис:

— Тi мунö, шоччисьö. Ме сёрöнжык локта, — а одзлань, сё эшö дивуйтчöмöн да гажöн Таисьялö ни: — Петiс эд, видзöт жö, уджыс. Ме мыйкö эг и надейтчы сымдаыс вылö, а петiс.

— Ме перво тожö полiкодь.

— Сiдзкö, быдöс позьö, кутчисьны дак. А кыдз öнi тэнат карта пытшкас? Эг вовлы ме этна луннэзö...

— Кежалам, од тэрмасьö дак, — рочалiс Таисья, дзик гöститöм могись. Нывкаэз иньдöтчисö кукань карта ладорö. — Буржык öнi, вочисö яслиэсö да. Етшажык пизьыс пондiс киськассьыны. Турунсö только умöльö ваялöны. То сартас кодь лобозник кыськö ытшкасö, то зутурун, кöдö некыдз куканнес оз сёйö. Уна я нiйö сэтшöмнас вердан. Адззылат вот часöт. Вайисö ни, натьтö, öнöдз.

Басниыс коласын нывкаэз сибöтчисö кукань карта дынöдз. Эстöн Таисья одзалыштiс, осьтiс зоотехник одзын воротаэз. А кöр нiя сьöрсьöн-бöрсьöн пырисö карта пытшкöдз, сэк вöлись казялiсö, что туруныс сiя лунö некытшöм эз вöв вайöм.

— Вот тэныт и на, — паськöтыштiс Таисья киэсö. — Ме вöлись норася, что умöльö турунсö ваялöны, а сэтöн не бур, не умöль — некытшöм абу. Мый бöра ныкöт сэтшöмыс лоис? Быд лун эта вотöдз ваялiсö да.

— Ваяссис бöра, натьтö, эта вылын. Эн думайт, что бригадирыс сэтшöм ылöстöм да лишньöй удж пондас керны.

— Но эд керис жö эта вотöдз...

— Керис, кытчöдз рудзöг подыс эз чорзьы. А öнi сiя чорыт ни, куканнес сёйны оз пондö. И бригадирыс тöдö, что ытшкисьнытö Шорсаяс тэ сэсся он мун.

— А мый нö сэк лоас, озö кö пондö öнiсянь ваявны? Куканьвöдитiсь юалöм вылö зоотехник эз шыась.

Сiя кытшöвтiс карта пытшкöт, видзöтiс айыс да воныс киэзöн керöм удж, а кöр бертiс бöр матöжык воротаэз дынö, вöлись горöтчис:

— Адззыла вот бригадирсö, дак юала, мый сiя сэтчин думайтö.

Зоотехниклöн лöнь ответыс, бытьтö басниыс мунiс абутöм кодь тор йылiсь, Таисьялö эз гленитчы. Одзлань чорытжыка сiя юалiс:

— А мый виль кукань картаыскöт керсьö?

— Нем кытчöдз. Эзö на эшö дугдö страдуйтнытö да. — Кытöн нö сэк куканнесö тöвйöтны думайтöны? Тi жö видзöтö вот, Светлана Савельевна, мый эстöн назёмыс увтын керсьö. — Таисья оськöвтiс матiсьжык столб дынö, сапога кокнас чужйыштöмöн мыччалiс. Му бердсяняс столбыс джынысви вöлi сiсь, дзик тшаптöм, киссьöм, и этасянь, мыччассис, не сымда видзö вевдöрсянь сы вылö пуктöм слега, мымда пöрöмыс увья видзсьö сы бердын ачыс.

— Адззат вот... — баитiс Таисья, — ...кытшöмöсь нiя кольччöмöсь. Назёмсö петкöтöм бöрсянь картаыс топ эшö öддьöнжык пиньöвтчис. Эшö разь мöдат эстöн куканнесö тöвйöтны?

— Озö кö вильсö строитö, дак кытчö нö воштiсян?

— А пöрас кö, мыйись мый, подаыс вылö? Быдöннымöс эд сэк судитасö. Или эта йылiсь правленчиыс нем оз и думайтö?

Куканьвöдитiсь басниись позис вежöртны, бытьтö картаыс увья, пöрны кö сылö, шуам, былись, судитнытö медодз пондасö не кинöс-нибудь, а сiйö, кöть пöрöтны картасö нарошно нывка некыдз эз вермы, и винитны пöрöмыс увья сiйö некыдз эз позь.

— И пöр бы эд то, пö-öр, кöр сэтчин некин абу. Буржык ни бы вöлi. Эзö я бы сэк вильсö чожжык строитö. Мыдзи ни ме предыслö эта йылiсь модьнытö. Но мый жö?.. Эшö пондыла баитны. — Баитiканыс нывкаэз иньдöтчисö бöр петанiн ладорö.

— Полöм, батя, петö тöв кежас татчö кольччыны. Думайтны кö эстöн тöвйöтны, дак öнiсянь жö мыйкö колö керны, — баитiс Таисья конюховка весьтас локтöн.

— Тöда — колö, но кöсйыны ме нем ог лысьт. Картаыс — не йöр, öтiк лунöн он сувтöт. Предыскöт ме и баита. Но тэ жö ачыт тöдан, сы вылö кытöн пуксян, сэтöн и чеччан. Эстöн жö не басни колö, а удж. — Зоотехник вöлi оськöвтiс ни, мед мунны, но эта коста подакокувт ладорсянь завор весьтын ышки-пойки тэрмасьöмöн мыччисис бригадир.

Кукань карта дынын сылöн видзчисьтöм мыччисьöмыс дивуйтiс нывкаэзöс вель ёна. Одзлань ни позис тöдны — нем бурсö сiя эз кöсйы.

Бригадирсö казялöм бöрсянь нывкаэз, лöньсисö. Оськöв кыным ылына зоотехник керис бöр, негорöн куршыктiс ас кежас, пондiс видзчисьны. Таисья жö, пемдыштöм чужöм вылас да жмитчыштöм быдсöн вывтырнас, жагвыв оськöвтiс скамья бердöдз, пуксис.

Оз позь висьтавны, бытьтö зоотехник да куканьвöдитiсь полiсö бригадиркöт пантасьöмись, кыдз вермасö повны аймамись поснит челядь, кöдна казявтöг ли, нарошно ли керисö мыйкö умöльö да неколанаö. Кыкнанныс вöлiсö не челядь ни, и нем умöльсö эз керö. Нiя керисö удж, кöдасянь куканнесö вердöмын видзчисисö кöть кытшöмкö прок. Сэтчö жö Таисья вöлi не ны коласiсь, кöдна эз бы вермö сувтны ас понда. Касьтывны кö сылiсь рудзöг ыб дорын бригадиркöт неважынся пантасьлöм, то повнытö колiс не Таисьялö, а чожажык аслыс бригадирыслö. А зоотехник панласьны бригадир шогья öнöдз тожö велалiс ни. Полöтiс кö нывкаэзöс мый, дак не ачыс бригадиркöт, кыдз вöвлытöм начальствокöт, пантасьöм, а сылöн колана и неколана местын бöбись горöтлöм-видчöм, быд берся понда весись винитöм-грöзитöм, кöдна уджын некинлö эз отсалö, а дзир дойдiсö сьöлöм, тшыкöтiсö уджалан настроеннё. Кöр подасö видзöм-вердöмын быд лунся заботаэс да быдкодь решиттöм проблемаэс вöлiсö тырмöмви, кывзыны бригадирлiсь горöтлöмсö нывкаэз мыдзисö ни. Но охота или не, колiс лöсьöтчыны и сэтшöм пантасьöм кежö.

Вуджны йöр пöдналöм завор вевдöрöт Прокопий Егорович тэрмасьтöнняс эз ни пондыв: кöстiсис кык кусiнь, пелитiс юркоксö заворняэз коласöт, петiс нывкаэз ладорö. А кöр веськöтчис, лэбтыштiс вешьян, бордпавкйöн иньдöтчис нылань, ылiсянь эшö пондöтiс:

— Эт-та öшö мый сэтшöмыс, Свет Савельевна? Мый эстöн керсьö? Кутшöм öшö безобраззё? Кутшöм йöр? Мый тiянлö юраныт пырис? Кинлiсь юасит сымда потш вöрсö торкны? — Горöтлытöнняс бригадир сибöтчис матöжык, оськöв кыным ылына сувтiс. — Сы понда разь ме сiйö петкöтi? Майöг вöрсö? Думайтат жö, мый керат? Менам жö öнi остожьяэсö керны немись! Дзезмöм куканнезныт улъя! Мый вылö вöлi ольсö янсöтны? Век разь подакокултын мöдат видзны?

Таисья лэдзис юрсö пидзöссэзас гырдззаэзöн пыкöталыштöм киэс вылö, нiйöн жö вевттьыштiс пеллесö. «Неужто эт-а йылiсь некыдз мöднёж оз позь?»

— Ой, мыдзи ме, Прокопий Егорович, — зоотехник öвтыш керис юрнас, оськöвтiс скамья ладорö, ордчöн Таисьякöт пуксис.

Бригадир дивуйтчöмöн видзöтöв-керис сы вылö, но горöтчöмсö, тыдалö, бытшöма эз вежöрт.

— А кин тiянöс тшöктiс этö ылöстöм уджсö керны? — Да не уджсяняс, не уджсяняс, ме шуа, а тiян баснисянь.

Падмöтöм этна видзчисьтöм кыввезöн, бригадир горöн ньылыштiс дуль, чöлöмöн бергöтчис, кватитчöмöн кыскис папироса, синнэзнас кваркышавтöн пондiс нöитны чуннес коласын.

— Мый, бурмис сьöлöмныт пон моз вувтöмсяняс? Думайтат, натьтö, öддьöн бур тiянöс кывзыны? Сьöлöм ни эд этасянь гудыртчö. Неужто тi, Прокопий Егорович, сымдасö од вежöртö? — баитiс зоотехник. — Спасибо эд колö висьтавны, что бригадирыс местö том отирыс йöрсö керис. А тi: «кутшöм йöр?» да «кинлiсь юасит?» — Бригадирлöн горöтлöмыс нывкаöс, тыдалö, обидитiс зэв ёна. И кыным унажык öнi сiя баитiс, сыным унажык шедiс öд. — Не сы понда менö институтас вит год сьöрна пöжисö, мед тiян кодьыслiсь юасьны, кыдз колхознöй подасö вердны. Колiс, и янсöтiм. Ковсяс, и век сьöрна видзны пондам! Немись, шуат, остожьяэсö керны? А кин тiянöс тшöктiс подакокувтсö ытшкыны? Эз и ков. Этö ме тiянлö перво жö баитi.

Быдöс вылö эта вылö бригадирлö горöтчынытö вöлi нем. Горша куриттöн, сiя неöтпырись ни дзарышалiс деревня ладорö, лöсьöтчис, тыдалö, нетшкöвтчыны местасис да мунны, но öтiк тор мунны шы сеттöг, кыдз баитсьö, шымыртöм бöжöн, — гордость сылö эз сет. Бригадир сё эшö думайтiс, кыдз бы да мыйöн зубытжыка пантавны зоотехниклiсь висьталöм баснисö, но нем коланаыс, тыдалö, эз адззись. А недырик чöлыштöм бöртi зоотехник эшö горöтчис:

— Висьталiт бы вувтöмныт местö, Прокопий Егорович, мыля талун ой кежö куканнеслö турунсö эд вайö?

Вердчан йылiсь пондöтöм басниыс бригадирöс вöлись ловзьöтiс.

— Тi öшö лысьтат вердчан менчим корны? Эта мымда сэрп керöмась да... — öвтыштiс юрнас подакокувтлань.

— А мыля бы и не лысьтны?.. — дразнитiс-сералiс зоотехник, — ...кöр колхознöй пода йылiсь мунö басниыс.

— Ытшкö! Вердö! Колö кö тiянлö öддьöн. Менам сэсся нем ытшкынытö. А йöрнытö тiянлiсь ме ашын жö бöр резьöта! Сiдз и тöдö!

— Резьöтö! Кöть талун жö! Резьöтнытö — не керны. Сы вылö ылöсныт тырмас. Думайтiт бы, кытöн куканнесö тöвйöтны мöдат, дак буржык вöлi. Или видзчисят, кöр эта боквывтчас?

— Ась боквылтчö! Менчим сы понда оз юалö! Картаыслань дзар кертöг бригадир öвтыштiс кинас, иньдöтчис конюховка дынiсь деревня ладорö.

Таисья, кöда чöлöмöн кывзiс бригадир да зоотехник коласiсь споритöм, гажтöма думайтiс: «Вердсис бöра, тыдалö, эта вылын куканнесö, сiдз и тöд». А кöр бригадир сайöвтчис син одзись, нывка юалiс.

— Мый нö одзлань вердчаныстöг, Светлана Савельевна, лоас?

— Нем, Таисья, оз ло, эн пов. Ашынсянь силоснöй комбайн мöдiк бригадаö сувтöтам. Сэтчин даскык гектар мымда зöр-анькытш кöдзöм.