Вынсö не одзöстны

Унаись ни эта вотöдз меным усьлiс кывлыны отир басниись, бытьтö бы омöн мушар пасьта быдöс ловьяыс коласiсь кöдзывся вынажык сэсся некин оз адззись. Баитöны — сiя сэтшöм вына, что вермö нöбöтны нельки ас ыжда свинец. Но басниыс басни и эм. Веритсяс разь, кöр ас синöн сымдасö эн адззыв? Эд и эта йылiсь тожö баитöны — буржык öтпырись адззывны, ежели сизимись кывны.

Вермö я кöдзыв нöбöтны ас ыжда свинец, сымдасö, вежöртана, ме и эг адззыв да ог тöд. Сiйöн, натьтö, что свинецыс кöдзыввез понда — тор нач неколана, не сёян сэтчин кытшöмкö, и кыскавны сiйö весь, дзир вынöн ошшасьöм могись, нiя озö пондö. А вот мый баитсяс кöдзывлöн быдкодь вреднöй насекомöйезкöт пессьöм йылiсь, сэтшöм примерресö ны оланiсь позьö пантавны вель уна. Öтiк сэтшöм пример йылiсь, кöдö ме адззылi ас синöн, эстöн и висьтася.

Кыдзкö гожумнас, одз асывсянь, ме иньдöтчи вöрö. Колiс чукöртны тöв кежö пилитöм пес.

Погоддяыс лöсялiс лöнь да шоныт, невна нельки пöжис. А сэтшöм кадö да эшö вöр коласын, кытчö оз сибав некытшöм тöлок, быд коста тырмöмви ном-геб. И колiс дзир сюрны меным вöр коласас, кыдз нiя кымöрöн пондiсö лэбавны ме гöгöр. Сöстöм да лöнь асывся руас орöттöг öшалiс нылöн öтласа да унапöвса дзингöм.

Недыр мыйись вöр весьтас лэбтiсис шондi. Пу листтэз да турун вылiсь пондiс косьмыны гажöна югьялан лысва. Асывся ыркытыс жагвыв чулалiс. Лоис жар. И сэк мыччисисö кысянькö повтöм да горш лöдззез. Номмезся унаöн горöнжыка бизгытöн, нiя шупыта лэбалiсö ме гöгöр да сё норовитiсö лякасьны-пуксьыны öтпöвса паськöм, куш ки нето чужöм бердö. Но уджавтöнняс ме дугдывтöг вöрöтчи, и сибöтчынытö нылö ме бердö зэв эз позь.

А неылын сiя местасянь, кытчö ме чукöртi кряжöн орöтöм пес, öтiк паськыт кöз увтын, сулалiс ыджыт кöдзывпоз. Эстöн, кöдöрö бы эн видзöт, боёка шуксисö кок увтын сыын олiссез. Нiя дышöтчытöг керисö ассиныс быдлунся удж: вочисö да ыждöтiсö оланiн, заптiсö тöв кежö сёян, кинöс шедiс — гутöс, номöс, гусеницаöс, бабылöс — кыскисö асланыс позö. И мышкыртчыны кö лажмытжыка му бердас — несьöкыт вöлi кывны, кыдз унася-уна кöдзыввезлöн дугдывтöг вöрöтчöмсянь кылiс сэтшöм жö дугдывтöм кышöтöм.

Мыдзыштöм уль кряжжесö кыскалöмсянь кытшöмкö кадö ме юыштi сьöрö вайöм квас, öзтi куритны да пукси шоччисьны. И колiс дзир вöрöтчытöг лöньсьыштны öтiк местаын, кыдз ме бердö быд ладорсянь пондiсö лякасьны лöдззез. Унажыксö нiя мылякö пуксисö сьöд кирзовöй сапог гöленнез вылö, кöть курччöвтнытö ны пыр эз вермö. А öтiк, басöка пежьялан сина, ыджыт гöрд лöдз, коккез гöгöр вель дыр бергалöм бöртi, шупыта лякасис-пуксис сапог ныр вылö. Мый сiя думайтiс керны одзлань, то ли курччöвтны сы пыр кокöс, то ли дзир шоччисьыштны дыр лэбалöм бöрсянь, сымдасö, вежöртана, висьтавны оз позь. Пукалiс лöдз вöрöтчытöг, топ кынмöм, сiдз кыдз и ме эта кадö тожö эг вöрöтчы.

Сы коста жö сапог ныр мöдöрсяняс мыччисис кöдзыв. Кадiсь кадö недырик кежö сувтчышалöмöн, сiя кайис сапог ныр вылöдз. Кöр ны коласын кольччис куим-нёль сантиметр ылына, кöдзыв вöлиськö тыдалö лöдзсö казялiс, сувтiс. Дзик онмöссьöм, то ли вунöм аслас думаэз коласын, вöрöтчытöг кольччис пукавны и пежьялан сина лöдз. Учöтик кöдзывлöн сы одзын мыччисьöмыс сiйö, тыдалö, немымда эз полöт.

Ме орöттöг видзöтi öтдруг кыкнанныс вылö и некыдз эг вермы тöдны, мый видзчисьны ны коласын одзлань. Думайтсис, что даскынымись лöдзысся учöтжык кöдзыв повзяс, часöт жö бергöтчас бöр, нето орддяс ылiжык пежьялан сина тварьсö да и иньдöтчас аслас туй кузя. Кытчö сылö, сэтшöм учöтикыслö, кутчисьны сы ыждаыс бердö. Но...

Кыдз нарошно, петiс нач мöднёж. Не сэтшöм уж полiсьöн вöлöм учöтик кöдзыв, кытшöмöн ме сiйö медперво примитi. И кежны аслас туй вылiсь сiя, тыдалö, абу думайтöм. Кöдзыв топ одзлань ни кошшöм да видзчисьöм лöдзкöт этö пантасьöмсö. Висьтасьнытö ковсьö дыр, а быдöс петiс öддьöн перыта. Вот кöдзыв ордчыштiс бöрись коккес вылö, пуксьыштiс бöр вылас и... Одзлань ме и синöн кваркыштны эг ешты, кыдз сiя топ лыйис, уськöтчис лöдз вылö. Эта мымдасö сысянь нельки ачыс лöдзыс, тыдалö, эз видзчись, сiдз кыдз не кежны кöдöрöкö кöдзылыс уськöтчöмись, не лэбтiсьны борддэз вылö да лэбзьыны сiя эз ешты. Кылi дзир горöн да дженытика бизгыштöм, и сы коста жö нiя öтлаын таралiсö сапог ныр вывсис тшöк турун коласö.

Вежöртана, что джагöтны сы ыжда тварьöс, кытшöмöн вöлi пежьялан сина гöрд лöдз, учöтик кöдзыв перво жö и эз вермы. Пондöтчис пессьöм — кин кинöс вермас. Кöдзыв, кöда повтöг уськöтчис лöдз вылö, натьтö, лыддис аслас вын сьöртi, мед вермыны. Но сысся унаись ыджытжык да вынажык лöдз сетчыны пессьытöг тожö эз мöд. Мымда вын, сiя мырсис, мед вермыны мездiсьны. Лöдз перыта чепсасис турун коласас кöдöрö шедас, горöн да дугдывтöг сярзис вына борддэзнас, но мездiсьны кöдзыв шогья эз вермы, вын сылöн эз судз. Учöтик кöдзыв, мегырöн моз кöстiсьöмöн, дзик лякасис лöдзыс юр бердö и öнi, мымда прок, курччалiс сiйö, кыт шедас.

Чöлöмöн да дивуйтчöмöн ме видзöтi эта аскодьöм да адззывлытöм эшö эта вотöдз пессьöм вылö, видзчиси, мый лоас одзлань. Полöм петiс учöтик кöдзыв понда. Öнöдз сы пессьöмын мымдакö отсалiс турун, кöда коласö сiя уськöтiс ассис жертвасö. Но вермыны кö лöдзлö петны эта турун коласiсь да лэбтiсьны аслас борддэз вылö, кык-куим кöдзылöс сiя нем туйö нöбöтас. Но сiя и эм, что лöдзыс вына дзир руас, борддэс вылын. Эстöн жö, му вылас, да эшö турун коласас кöдзылыскöт пессьöмын нiя сылö колананёж эз отсалö, не висьтавны кö, что унажыксö дзир мешайтiсö.

Бöртiжык лöдз, тыдалö, сё жö вежöртiс, что лэбтiсьны борддэз вылö эта тшöк турун коласiсь сiя некыдз оз вермы. Сэксянь сiя и пондiс мырсьыны петны вывлань подöн, коккес вылын. И кыдз бы öнi повтöм кöдзыв эз кутчисьлы коккезнас быд турунок бердö, мед падмöтны, не сетны лöдзлö петны турун колассис, видзны сы ыжда тварьöс сылöн öтнаслöн вын некыдз эз судз. Ась и жагвылика, но лöдз кыссис турун тылöппес коласöт сё вывлань да вывлань, а öтлаын кыскис сьöрас и кöдзывсö.

Сiдз öтпыр, аслас ловья ношаöн, лöдз петавлiс ни вевдöрлань дженытик ситурун кузя, бизнитiс-öвтыштiс борддэзнас, мед лэбтiсьны да лэбзьыны. Но зэв-зэв сулалан турун тылöппес керны сылö сымдасö эз сетö. Ны бердö кышасьöмсянь, öтлаын аслас ношакöт, сiя усис бöр.

Мöдöтпырись лöдз инмис кузься-кузь турун тылöп вылö. Öнi сiйö и видзчись — петас сы кузя турун колассис, бизнитас-паськöтас просiнас вына борддэсö, и сэк... Сьöкыт висьтавны, мый вермас лоны сэк повтöм кöдзывкöт. Век кежö вермас нуöтны сiйö кытчöкö аслас горт да родня дынiсь. Но и кöдзыв сымдасö, тыдалö, тожö ылöстöм.

Кöд коста лöдз вились кыссис турун тылöп кузя вывлань, сы коста кöдзыв аслас жертва вылын весись тожö эз пукав. Быд вынiсь аслас жваллэзöн уджавтöн сiя сöскис лöдзлiсь бордвечик ^. Но вот лöдз кыссис подöн турун тылöп йылöдз. Эстöн сiя бизгыштiс-паськöтiс борддэсö, мед лэбзьыны. Но орöтöм ни сэк кежö öтiк бордыс кывзiсьнытö эз понды, янсалiс ас бердсис. Этасянь кöдзыв да лöдз вились усисö турун коласö.

Стрöйдöм ни, но кытчöдз сё эшö ловья лöдз и öнi эшö бизгышалiс öтiк дзонь борднас. Но лэбтiсьнытö сылö руас вöлi немöн ни, и эта бизгышалöмыс учöтик кöдзывсö сэсся эз полöт.

Эстöн ме и вежöртi, что вермис кö кöдзыв öтнас стрöйдыны сы ыжда, сэтшöм вына да эшö борда тварьöс, кытшöмöн вöлi пежьялан сина гöрд лöдз, вын кöдзывлöн и былись тырмöмви и одзöсасьны оз ков.