Баламут

Яшка Костылёвлö эз вöв эшö и куимдасыс, а ештiс ни ветлыны, кыдз баитöны, не сiдз ылын местаö. Этаöдз сiя олiс городас, уджалiс заводын, да мынтiсö етша.

Вöлi сылöн инька, кöдакöт эз ешты гижсьыны. Тестьыс уджалiс строительöн и получайтiс неумöля. Яшка пыр завидуйтiс сылö и думайтiс, кыдз шедтыны деньгасö унажык. Но чулалiсö лун бöрсянь лун, а случайыс некыдз эз лок. Заводас пондылiс мырсьыны, да мастерыс эз и казяв. Эта жö кадö инькаыс сьöктiс, и сылö колiс чöскыт сёянок да эшö уна мый мöдiк. Лоис сьöкыт, а этасянь руббес эзö содö. Яшкалöн думайтöмсянь юрыс потласис, но вильсö нем эз адззы.

Инькаыс лöсьöтчис сiя кадö деревняö дедыс ордö. Кольласьöм бöрас Костылёвыс пырис автовокзалас, пуксис диван вылö да видзöтiс отирыслiсь туйын мунан олансö. И сэтöн казялiс, кыдз томыник зоночкаэз шуруйтiсö очередяс да öтiк осьта öма инькалiсь гусьöн кыскисö кошелёк. Яшка вöтчис зонкаэс сьöрö да öтöрас горöтiс: «Кытчö, рестанткельöп, ноко, сулалö! Пуксьö этчö скамейка вылас да баитыштамö. Сiдзкö, шпанитатö? Бур, что меным шедiтö, висьталö спасибо. Велöтчыны колö! Тiян гусясьöмыс умöля петö. Быд мортыс вермас казявны, киöттяныт кватитасö. Вежöртiтö? Вай, ноко, ме дынö кошелёксö. Колö видзöтны, мымда талун керитö. Деньгаыс лоас ме дынын. Ашын локтатö эта жö кадö вон сэтчин скверас. И эдö думайтö бöбöтчыны. Ме ог любит сэтшöммесö. А öнi мунö да шоччисьö».

Öшöтöм юррезöн зонкаэс мунiсö. Яшка адззис, что нiя мизгырасьöны, но и ась, абу жаль. Колас нiйö велöтны, кыдз деньгасö керны. Сiя кыскис кошелёксö да лыддис деньгасö. Вöлi кыкдас руб гöгöр. Сылöн анласыс лэдзчисис и лоис пиньöла. «Эта понда колiс я рискуйтны? — думайтiс сiя. — Вöлi бы тысяча или кöть сотня».

Пельпоннэс сылöн лэдзчисисö. Сiдз пукалыштiс кынымкö минута, а сыбöрын мунiс гортас. Водлiс шоччисьны, но эз узьöт, а юрыс пымсялiс калявтöдз. Дыр жöдзис комнатаöттяс. Син одзас вöлi, кыдз пукалö ресторанас, юö винасö да чапкасьö деньганас. Только пыд ойнас вермис ланьтны.

Заводас некин эз казяв сылiсь мыдзöм чужöмсö, да и некин эз видзöт сы вылö. Вöлi бы керöма планыс, а сэсся начальствоыслö нем оз ков. Яшкаыс лунтыр мотырасис öтмöдöрö и эз тöд кытчö воштыны кадсö. Кöр уджассяс, Яшкаыс чышкис маслоöн мавтчöм киэсö да перыта мунiс проходнöяс. Сылö эз терпитсьы пантасьны зонкаэзкöт. А кык пацанок пукалiсö ни скверикас неыджыт акация увтын. Яшка локтiс ны дынö да пуксис боканыс. Минутка-мöд пукалiсö чöлöмöн.

— Но дак мый, шöкööмеччез*, — горöтчис Яшкаыс, — мый висьтала, кывзö. Пассажирыс мый керö? А? Дак вот, медодз сiя пырö буфетö. Сэтöн колö видзöтны, кыдз сiя босьтасьö да кытчö деньгасö сюйыштö. Вежöртiт? Сэсся мунö билетсö небны. Вот сэтöн и колö уджавны. Медодз нёджжалыштö, абу ли матын милицияыс. Тренируйтö киэзнытö, медбы вöлiсö кыдз борддэз. Мортыс вöрзьöтчас и сэк жö пышшö сы дынiсь. Вот этасянь пондамö велöтчыны...

[* шöкööмеччез — сiдз шувлiсö ШКМ-ын (школа колхозной молодёжи) велöтчиссезöс]

Автовокзалсяняс пондiсö локны юöррез, что сэтчин гусясьöны. То öтiк, то мöдiк инька норасьö, что öштiс кöшельсö. Öшлывлiсö и мöдiк вещщез. И сэтчин керисö милициялiсь пост. Гусясиссес чожа шедiсö, а ныкöт и Яшкаыс.

Вöлi суд. Веськöтлiсьныслö сетiсö куим год. Инькаыс кольччис кыз кынöма. А мамыслö гижис, что вердöны öддьöн умöля и корис гортсис. Но вайöм посылкаэсö торйöтлiсö быдöнныскöт, а виль дружоккес велöтiсö сiйö мöдöрö, тшуписö сылö, что эта светын колö овны сы вылын, мый заптiсö пöриссес. Бöбöввес пö только уджалöны.

Сетöм срокыс, кöть и сьöкыта, но чулалiс. Тюрьмасис петiкö невна сетiсö и деньга, но сьöммес сiдз и юсисö. Кöзяиныс бертöмлö, кöть и деньгатöг, инькаыс вöлi рад, пызан вылас нельки сувтöтiс бутылка, кöдö видзис эта кад кежö. Яшкаыс юыштiс, и гажыс пырис сьöлöмас, пондiс ыжмавны-керны да и личкис инькасö небыт койка вылас, кытöн мыччалiс велалöмсö.

— Ой, да мый жö тэ керан? — чуть не горзöмöн юалiс инькаыс.

— Чöв, ме эд не курорт вылын вöлi, — лöга горöтчис жöникыс. — Лöсьöтчы, ноко, вот этадз...

Кадыс чулалiс, а Яшка эз и думайт уджавны. Олiс, инькаыс голя вывтi ысласис, кага йылiсь эз тöжды, сiя унажыксö быдмис бабыс дынын да велалiс дедсö шуны папöн. Тестьыссянь, конешно, сылö нем эз шед. Мужикыт думайтыштiс да иньдöтчис мамыс дынö. Пантасьöмыс понда мамыс адззис бутылка, но эта вöлi етша. Яшка пондiс треситны сiйö, шумсö сэтчöдз лэбтiс, что лэдзис öшынсис рамасö.

— Олан, кыдз буржуйка, а зонытлö шыш-выш, — горöтлiс сiя. — Сота быдöс керкутö! Ки увтö шедан, дак и асьтö öтлаö сюйышта! Кинлö заптан, ежели зонтö он юктав?!

— Господи, помилуй менö, — герьялiс мамыс. — Ме видзчиси тай отсöт, а локтiн розоритны. Да мый ни эта эттшöмыс?

— Дугды нюксыны, кыдз тшыг пон, — лöга висьталiс зоныс. — Сет меным начкылöм порсьыслiсь бöрись лядьбейсö — и тырмас!

— Кöть тай быдöс нуöт, абу жаль.

Яшкаыс петiс чуланас да кералiс яйсö и сюйыштiс мешöкö, кöдö нуöтiс городас. Инькаыс вöлi рад, что кöзяиныс думайтö горт йывсис, и мöдiс лöсьöтны пызан вылас, но Яшка одзалiс сiйö да сералöмöн висьталiс:

— Норовит невна, перво орсыштамö да вöлись.

— Бöра тюрьмаись методдэзнас?

— Пырттöм тэ морт, не пыр жö öтмоза.

— Кöр мöдан пондöтчыны уджавны?

— Вот шоччисьышта и понда.

— А менö ыстöны посадö, ог тöд мый керны.

— Дак мый жö, мунамö. Сэтчин эд тожö отир олöны. А квартирасö кöсйöны?

— Висьталiсö, что сэтчин быдöс лоас.

И нiя мунiсö виль местаас. Сэтчин Яшкаыс кутчисис уджавны комбинатö, мунiс керавны вöр. Сылö оссис сэтчин паськытiныс. Песыс посадас колiс быд мортлö, но не быдöнныс вермисö керавны. Яшка вузалiс вöрсö, но не деньга вылö.

— Лэбзьö ме дынö, бабылоккез, — перво макайтiс сiя кинас öткаса инькаэслö да тшöктiс вайны аскурсö куим литраöн. — Машина пес лоас гортаныт! Дзикöдз кöс пуэзiсь!

И быд лунö сiя вовлiс гортас кодöн, кöть и аслас вöлi немöн лонтны горсö. Локтiс сэтчöдз, что дровяниксис нуöтiс да вежис аскур вылö. Вежис нельки зöрсö, кöдö сетiс воныс. А кин ордö пырас, дак сэтчöдз оз пет, кытчöдз винасö оз удö.

— Менам характерö сэтшöм, — баитiс сiя дружоккеслö, — невна уджалыштны и пöттöдз юны. Ась жö пондылöны горбнысö лэбтавны. Аскурсö керöм понда недыр и нарсудö шедны. Сiдз-то вот, некин оз бы пукав. Ме олансис босьта быдöс, мый верма, кыдз верма да кужа. А уджавны? Ась бöбöввес уджалöны. Только вот ендi öтiк местаас. Адззан ли, Стульчиковыслö колö дисциплина. Джагалас ась сiя аслас дисциплинаöн. Коскаэс менам не сы понда.

Яшкаыс чапкис уджавны комбинатас и быдса гожум чужьялiс тöвсö. Мунас бытьтö уджавны, а пырас дружоккес ордö да пируйтö. Адззис и кокнит мывкыда нывкаэзöс. Эта понда вöлi öткаса Сашкалöн керкуыс, кытöн позис чулöтны лунсö. Кöзяиныс лоис алкоголикöн и торьясис инькаыскöт, некытöн эз уджав и любитiс нiйö, кин сы ордö пырö. Вина стопкаыс понда вузалiс нельки ассис койкасö. Яшка рад вöлi и эта вылö, кöть и ольпасьыс вöлi нятьöсь, но эд и ачыс не сöстöм.

— Вольнöй олансис колö кыскыны, мый только верман, — неöтпырись сiя баитiс винасö юикö, кöр паськалыштас сотчан ловыс. — Миян век вылö тырмас аймамыслöн заптöмыс. Öмнытö эд видзö осьтöн.

— Лоан бы велöтiсьöн, а гортсит нуöтiсö бредниктö, — горöтчис сылö паныт гöрд юра Мишка дружокыс.

— Сiя делоыс челядьлöн, — бергöтчис сы дынö Яшкаыс. — А ме аймамнысö кутi да судöн повзьöтi. Винасö тырмöмöн юи да эшö кыска. Менам нем весь оз öш.

— А шуринытлöн мотоциклыс?

— Жалейтi зонкасö. Аймамыслiсь и сэтчин юи винасö. Колас кöркö эшö пыравны, ась вештiсясö, мыля сэтшöмö быдтiсö зоннысö.

— А вот машинасис моторсö кыдз вузалiн?

— Колö паок ки и — басьни абу. Кольöм машинасö эд некин эз караулит. Нёль болтсö дыр ли мездöтны? Чассö эгö уджалö, а вит сотня мортыс сетiс. Донтöма сетi да ась, не ассим эд. Велöтчö, кытчöдз ме ловья! Оз ков только тöдчыны милицияыскöт.

Посадас Яшкалö лоис дзескыт и сiя пондiс кыскыны матiсь деревняэзiсь. Но инькаыс лöгасис да пондiс видчыны, а медбöрын юалiс:

— Тэ кöр пондан деньгасö ваявны гортö? Дыр ли понда овны тэ понда служанканас? Кагасö кин пондас быдтыны?

— Вежöрттöм тэ морт, — мирнöя горöтчис Яшкаыс, — кöр гортын уна деньгаыс, ойсö он понды узьны. Абу вылас и гусясисьыс оз пыр.

— Пызан вылас эд мыйкö колö вайны. — Корисьыслö и еныс сетас.

— Сэк еныс сетöмöн и ов. Видзöта, кыдз пондан виньгыртны. Мун да шатлась и гортö эн лок. Тэтöг кагасö быдта.

— Кытшöм тэнö зi талун чушкис? — Яшкалöн кодыс пондiс петны, и сiя жагöника локтiс пызан дынас. — Или шогöт кытшöмкö кутчисис?

— Квартирасö эд сетiсö меным, а не тэныт. Тырмас, терпитi, да мылаö бырис. Тэныт бур, дак ме тожö олышта бы бура. Адзза тэсся бытшöмжыкö.

— Кöть мый шу, а тэнö висьöтö, — думайтöмöн горöтчис Яшкаыс да жагöника мунiс койка дынас и чöвтчытöг водiс. Узьны сiя эз узь. Сылö эз веритсьы, мый висьталiс инькаыс.

«А эд вермас и сiдз лоны, — вачкис юрас. — Неужели ме лои сэтшöм умöль? И кытчö ме гортiсь муна? Быль эд вермас вашöтны».

Чулалiс ни ойшöрыс, а оныс эз лок. Куйлас да ружтiс, кыдз бытьтö ольпасьыс эз лöсяв. Сэтöн вöлись казялiс ас гöгöрсис нятьсö: винасö да сiмöм кока, чукыра рожаа нывкаэсö. Нiя кыскисö сiйö гублянас. Колö ны дынiсь мунны. Яшка эшö не быдöс öштiс мывкыдсö.

Юрыс поткöтiс-висис, кöр сiя асывнас мöдiс миссьыны. Кымöсыс вазис ньылöмсянь, сьöлöмыс гудрасис. Вывтырыслö вöлi недолыт. Сiя пондiс чикрасьны умывальник дынас.

— Летö эд шудтöм гырктö? — горöм одзас сулалiкö горöтчис инькаыс да бергöтчис мöдöрö. — Сiдз тэныт и колö. Алкогольыс нетшкöвтас сьöлöм вуджтö. Меным кöть кокнитжык лоас.

— Кöть бы тэ ни эн жебгы, — норöн горöтчис Яшкаыс. — Талунсянь шабаш, крест пукта юöмас. Нормаыс, тыдалö, тырис. Вина сайсяняс оланыс эз понды тыдавны...

Яшка мунiс да водiс бöр. Гажа луныс чулалiс кымрасьöмöн. Керкусис эз и петав. Сiя личкис лолыслiсь корöмсö. Эта вылö тырмис эшö выныс. А сэсся кутчисис уджавны.