Нинкöммез

Рытлапöлас мунiс война. Быдöс томжык мужиккес вöлiсö фронт вылын. Деревняэзас кольччисö только стариккез, инькаэз да челядь. Но и нiя эзö чинтö пашнясö: гöрисö, пинялiсö да кöдзисö и сюсö чарлаöн вундiсö, мукöдпырся и чапкалöм потшшез вывсянь, кöр вöлiсö зэра годдэз. Но коми мортыс, учöтсянь велалöм сьöкыт удж бердас, терпитiс быдöс, только бы фронт вылас врагсö вермисö. Инькаэс уджалiсö мороз коста, кöть и пасьтавны вöлi нем, öтiк шабурокöн петавлiсö. Медбы дыржык тырмисö нинкöммес, вурлывлiсö пыдöсас резина, пуись колодкаэз. Небасöк вöлi, но мый керан — мунiс война.

— Войнаыс быдöс гижас ас вылас, — баитiсö инькаэс, кöдна ас пельпоннэз выланыс нуöтiсö войнаыслiсь сьöкытсö. — Бырсяс жö эд сылöн мылаыс, локтас конецыс.

Эта грознöй кадö Елена Мушырова олiс Муткыль деревняын öтнас аслас керкуокын, кöдiйö строитлiс жöникыс войнаöдззас айыс дынiсь торйö, медбы овны сiдз, кыдз ачыс мöдiс, висьтавлытöг, но эз пет сэтöн овны. Ковсис мунны война вылас. Первосянь ыставлiс дженытик гижöтоккез, а сэсся мыйкö эзö пондö локны. Еленаыслö вöлi некöр тöждiсьны-пукавны. Öтлаын мöдiккезкöт сiя уджалiс колхозас и тыртiс бригадирыслiсь висьталöмсö. Öтпырись мунiс кыскавны потш йöркериссезлö. Уджалiс луншöр бöрöдз, а сэсся пуксис шоччисьны. Вöлыслö сетiс кöс турун. Сумкаись аслыс кыскис горбушка нянь, кольть да сов и жагöника лöсьöтчис сёйны. Сэтчö локтiс Еремей Петра да пуксис паныт, дыр видзöтiс инькаыс вылö да вöлись юалiс:

— Кыдз сiдз, коккетö нюжöтöмöн, верман пукавны?

— Нуждаыс тшöктö, — серöмтчис Еленаыс. — Ме жö не мужик, вешьянсö ог новйы. Томсянь сiдз велалi.

— Эта йылiсь пыр думайтлi да юавны эг лысьт.

— Инькаыслö не мыччавны жö увдöрсö быд мужикыслö.

— А женикытлö, шуамö, кöть пывсикас?

— Сэтчин жö биыс абу, оз тыдав.

— Но, а нинкöмыт мыля бырöм?

— И сiйö то аслым колö сьöктавны. Вот тэ бы, Петра, кутчин да и кыйин вильöсь. Ыджытö спасибосö висьталi бы.

— Кыйны абу сьöкыт, — думайтыштiс да висьталiс Петраыс, — но уджыс понда колас мынтны.

— Мынта мыйöн колас, нем понда ог сулав.

— Деньганас ог босьт. Ачыт тöдан, мый мужикыслö колö.

— Петра, кыдз тэныт стыдыс абу?

— А тэнат эм, дак мöдiклö закажит, — лöга висьталiс мужикыс.

— Мый пондiн чушьявны? Ме разь мыйкö висьталi? Кый, но только не челядь моза, а басöкöсь да ёнöсь.

— Сiдз бы и висьталiн. Вая гортат, ачыт донсьöтан. «Кульыс ли мый ли менчим кылöс дернитiс? — эта басни бöрын думайтiс Еленаыс. — Сiя жö намёк сетiс ольпась вылö. Но и куим рубыс деньга! Колхозас нiя озö чапкассьö. Куим лун мырсян и то он шедты. Ась уж, мый лоас дак, поди, еныс проститас. Только бы эзö адззылö отирыс».

Кольччöм луныс чулалiс дузгыля. Еленаыс эз серав и шутит, кыдз вöлi одзжык. Мужиккес пондöтлiсö баснисö, но эз панталö очакывсö и шысеттöг керисö уджсö. Еленаыс жö видзöтiс ас вылас öтöрсянь и мöдöрсянь. Кин сiя öнi? Не солдатка и не дöва. Мöдiк год ни мунö, кыдз жöникыс оз гиж. Но и мый жö? «А меным колö морт моза овны, — тöдвылас усис сылö, кыдз одзжык овлiсö кыкöн. — Мукöдыс тай ветлöтыштлöны и шы озö сетö. Ась и менам лоас грехыс, ас вылам босьта».

Лун-мöд бöртi рытнас сы ордö локтiс Петраыс и трепичö каттьöмöн вайис виль кыйöм нинкöммесö да сетiс Еленаыслö, кöда дзарнитiс ны вылö, и синнэс баралiсö: нинкöммес вöлiсö сера ныраöсь да ёнöсь, быд ладорсянь бытшöмöсь.

— Ноко, кут да пешлы, — висьталiс Петраыс да сетiс козинсö. — Кык рыт пукалi ны дорын. Нинкöмныр вевдöрас быд шульсö торйöтi шöри да сiдз жö и кыйи. Тэ босьт да видзöт кытшöмöсь пыдöссэс. Дырся-дыр тырмасö.

Еленаыс полöмöн локтiс рытся гöсьыс дынö да сы киись кутiс виль нинкöммесö, и сьöлöмыс пондiс ёткыны сiдз, бытьтö мöдiс чеччöвтны мороссис. А синнэс любуйтчисö. Мастерыслöн уджыс сылö гленитчис, керöм быдöс бытшöма, аккуратнöя. Да эшö нин вевдöрсö пыдöсас вöлi кыйöма кучикöн. А нинкöммез пытшкас пуктöма банiсь подкладкаэз. Мортыс уджалöма совесть вылö. Еленаыслöн кокыс волятöг оськöвтыштiс Петраыс ладорö, и кöзяйкаыс вöлi готовöй ни окавны гöсьсö, но медбöрья оськöвсö мыйкö пыкöталiс, и сiя дрöжитан шыöн юалiс:

— И-и... мымда жö, Петрован, эта понда коран? Ме часöт...

— Мийö жö, Елена, не руб йылiсь баитiмö, — паныт горöтчис гöсьыс. — Басниыс вöлi тэ йылiсь. Ноко лöсьöтышт мыйкö пызан вылас. Ме аскурок сьöрам вайи, юыштамö да баитыштамö морттэз моза.

— Мый ни то и лöсьöт, кöр нем абу сэтшöмыс. Ёрдöм войнаыс быдöс куртö. Уль кольттесö сёян?

— Ладно, нянь кусöк солöн тырмас.

Öткаса кöзяйкалöн и эта кадö адззисис мый вайны пызан вылас. Сэтчö жö Петраыс сувтöтiс бутылкасö. Перво пукалiсö оча-паныт, но мöд стопкасö юöм бöрын гöсьыс сибöтчис кöзяйкаыс дынö да жмитыштiс сiйö ас бердас. Еленаыс эз ни мугсьы, юыштöм бöрас вывтырыс небзьыштiс, сьöлöмас пырис одззася гажыс. Петраыслöн киэс кылiсö кöзяйкаыслiсь небзьöм яйсö и локтiсö ни кофточка увтас да шамыртыштiсö нимöтчытöм нянясö, пондiсö бöбавны юрокнас. Еленаыс вынтöмсялöма панытасьлiс, вештiс бы кисö, но эз вермы, а только сьöкыта да частöя лолалiс. Петраыс казялiс этö и...

Быдöс лоис сiдз, кыдз думайтсис. Еленаыс жöв керсис одеяло увтас, а мужикыс чеччис да öзтiс цигарка, ветлöтыштiс керкуöттяс и горöтчис:

— Вот и тöдсасимö, кыдз овлö отирас.

— Довольнöй? — негорöна шыасис кöзяйкаыс. — Öнi верман ванзыны-ошшасьны. Мужикыслö эд нем повны.

— Эн тэрмась бöрдны. Берегитчисьсö и еныс берегитö.

— Ме-то чöла, да тэ кывтö пинь саят видз. — Еленаыс тожö чеччис, локтiс пызан дынас. — Кисьт ли мый ли кольччöмсö.

— Важын бы сiдз, Еленушка. Мый ни керны, а винасö кисьтлыны ме любита. Чокнитчыштам, кыдз отирас керсьö. Эн тöждiсь, быдöс бур лоас. Ме мöдiк гоз эшö кыя.

— Кый, — согласитчис Еленаыс, — только уджавны, а то этнöн только праздник коста кöмасьны. А öнi важжесö пуксьы да сьöктав.

Тулысся рытыс ны понда чулалiс казявтöг. Только лöз асывнас Петраыс мунiс гортас.

ПОЖАР

Гусясисьыс пыралас да кöть стенаэсö коляс, а пожарыс чышкö кöс росöн. Быдöс, мый шедас, ньылö, сотö, кольö öтiк пöим, ежели сыкöт не пессьыны. Пожарыслöн киэс, кыдз раклöн клещиэс: мый шамыртас дак оз ни лэдз, кытчöдз он мырддьы. Вот этасянь и отирыс пессьö пожарыскöт öтласа вынöн. Кöр казяласö бедасö, быдсöн деревняыс лэбтiсьö, быд мортыс котöртö отсавны: кин кватитас ведра, кин чер или жö багор да тэрмасьö локны отсасьны. Чапкö быдкодь уджсö и мунö, сiдз кыдз тöдö, что биыскöт öтнас мортыс нем эз вермы керны.

Гожумся кадö Фёдор Шапкинлöн, ачыс оз тöд мыйсянь, öзйис постройкаыс. Неважын вились керöм картаыс вадзалiс кыдз шулялöм сартас: шовкöтiс да чавкöтiс, бикыввес нюлiсö стенаэсö да лэбтiсисö вывланьö. Чадсö кылöм бöрын кöзяиныс кинитчис öтöрас, петiс карта вылас да лэдзис подасö öтöрас. Только вот шудтöм порсьыс некыдз бы эз пет, и ковсис урвитны вила оропнас, медбы вöрзис местасис. Вöлись, то не то, рюксытöн петiс. Фёдорыс кинитчис керкуас, кытöн инькаыс жöдзис öтмöдöрö и нем эз письты керны. Кöзяиныс босьтiс одзас паськöмсö да шентiс осьта öшынас.

— Мый кыдз обороника шевксян? — горöтiс сiя иньыслö. — Позьöт киэтö да тэрмась! Биыс эд оз видзчись! О-о, челядьыс кытöн? Да мый нö эта эттшöмыс лоис? А-а, паськöмсö чожажыка чапкав!

Деревнясис отирыс öксисö да уджалiсö кыдз кöдзывкарын, нельки челядьыс эз кольччö бокö, быд мортлö адззисис дело. Шорыс дынсянь, кöда котöртiс неылын, керисö лёдз и ведраэзöн кайöтлiсö васö. Киöн качайтан насос уджалiс дугдывтöг. Мужиккес тшöктiсö киськавны крышасö, кöда öтлаасис керкуыскöт. Вадöм тёсыс сотчис умöльжыка, и пожарыс бушуйтiс только гид гöгöрас. Сотчöм да киссьöм крышасö мужиккес рознитiсö багоррезöн. Öтласа выннас эзö сетö öзйыны керкуыслö.

Вот сэтöн и пондiсö гадайтны, кин вермис öзтыны, кысянь пондöтчис пожарыс? Садь эд кöзяиныс! Кöбы вöлi код, дак сякöйсö позис думайтны. Но пожарыс сiдз оз шогмы.

— Да инькаыс öзтiс, — адззисис сэтчö Фёдорыслöн сойыс, Вассаыс, кöда эз лöсяв кенакыскöт, пыр споритлiс да видчис. — Меным кыдзкö тай висьталiс, что сотас керкусö, ежели кинкö мöдiк сы туйö локтас овны эта керкуö. Вонöкöт мый тай и желлясьö. Сiя инькаыс ас мывкыда — мый думайтас, сiйö и керö.

— А тэ юртö мыйлö сюйлан? — юасисö соседдэс.

— Дак эд вонöс жаль.

Пожарникыслö колiс тöдны пожарыслiсь причинаэсö, и сiя кутчисис эта басни бердö и ыстiс делосö милицияö, кытчö корисö Фёдорыслiсь инькасö да висьталiсö винитöмсö. Вассаöн öдззöтöм колесоыс пондiс бергавны. Инькаыс места аслыс эз адззы: кусöкыс öмас эз тöр, и оныс öшис, ачыс ветлöтiс кыдз вартлöм. Мый бы эз висьтав, а сылö эзö веритö. Öткö, челядьыс жальöсь, мöдкö, керку гöгöрыс сотчис, а сэтчö винитöны то асьсö. Öтiк морт кöть бы эд сувтiс сы дор, но эз адззись сэтшöмыс. И чожа лоис суд, кытöн сылö сетiсö срок да пуксьöтiсö тюрьмаö. Жöникыс кольччис челядьыскöт, кöдна вöлiсö витöн. Быдса год сiя мырсис ныкöт, но сэсся эз терпит и вайöтiс виль кöзяйка, кöть и Вассаыс эз бы лэдз.

Сiя мöдiс бы лоны воныс гортын кöзяйкаöн, да эз пет. Фёдорыс вились гöтрасис. Но Вассаыс ассис думаэсö эз чапкы бокö. Сiя бытьтö кыдз лöньсьыштiс, но вовлiс ны ордö быд лунö, баитлiс челядьыскöт да бытьтö казявтöг кыввезнас бытшкалыштлiс виль мамнысö, висьтасис, кытшöм сiя вöлi одзжык.

— Сiя жö быд мужикыс увтын куйлiс, а öнi мöдö лоны кöзяйкаöн, — баитiс Вассаыс челядьыс вылö видзöттöн, кöр мамныс эз вöв керкуас. — Асьсö лэбтö, да отирыс быдöс тöдö.

Мыйлö бы Вассаыслö юрсö сюйлыны воныс да кенакыс коласö, кöр сiя олiс айыс местаын, важ керкуас? Эд пöрись ни мортыс, рожаыс чукыртчöм, и ачыс горбыльтчöм, ветлöтiс дженыт оськöввезöн. Но сылöн вöлi аслас расчётыс. Пöрись нывкалöн бергöтöмöн пизис вирыс, лöгыс петiс, мыля эз шогмы оланыс, и сiя синнас эз адззы нiйö, кöдна петiсö жöник саяс, сьöлöмас шваркйис, оз кö висьтав мортыслö öбидитан кывсö. Отирас эз любитö сiйö, но и эзö лысьтö паныт кутчисьны. Лыддисö тöдiсьöн, кöть сiя нем эз тöд сысся, кыдз только лöгавны. Кучиксис петас, а керас сiдз, кыдз бытьтö этадз и вöлi, ачыс адззылiс. Пондас сплетняэсö висьтасьны, дак тырппес и киэс нельки дрöжитöны. Воныслö Вассаыс баитiс:

— Иньканас овны бур, да не сэтшöм колiс. Етша разь арта морттэс?

— Кин локтас йöз челядьыс дынö, — гажтöма шыасьлiс Фёдорыс.

— Гортат эд вовлöны сылöн дружоккес. Кыдз тэ терпитан сiйö? Неужто öштiн ассит мужик нимсö? Мыля он шугнит иньтö?

Фёдорыс и одзжык ювлiс винасö, но медбöрья кадас казялöмöн унаöв юис. Кодувьяс локтас гортас и пондöтö придирайтчыны, кöть и висьтавны немись. Öтпырись локтiс ляп код и порогсяняс жö пондöтiс шумсö, мыля бытьтö джоджыс сьöд, пызан вылас абу лöсьöтöма сёяныс, челядьыс мисьтöмöсь, кин керкуас кöзяиныс? Инькаыс мöдiс висьтавны паныт, но Фёдорыс кватитiс ки увтас шедöм катайтчан нöш да дöвкис сылö и... сöтiс, ачыс оз тöд кытчö. Инькаыс кольтаöн усис джодж шöрас. Кöзяиныс эшö содтiс да чапкис нöшсö, и пуксис öшын дынас, пондiс видзчисьны, кöр чеччас, но инькаыс эз и вöрöтчы. Вель дыр пукалiс Фёдорыс, и сылöн юрсис пондiс петны кодыс, синнэс баралiсö. Видзöтiс öтiк местаö. «Неужто кулiс, — думайтiс сiя. — Öтта кытшöм нежнöй, павкис эз павк, а нюжöтчис. Но и куйлы, а ме петала сойö ордö>>.

Керкусис петтöнняс сiя сiдз брякнитiс ыбöснас, что нельки стеклоэс жолькнитiсö öшыннэзас, кöдна умöлика видзсисö рамаэзас. Фёдорыс шатласьöмöн мунiс улицаöттяс и пырис Вассаыс ордö да мыдзöмöн висьталiс:

— Ветлы жö миянö да видзöт, мый лоис иньöкöт.

— Кöздыны ли мый ли пондiс?

— Не-е, чуть тай павкöтi, и сiя нюжöтчис джоджас.

— Вот чивера кытшöм. Быд мужикыс сiйö только малалыштлiс.

— И ме малыштi только... дöрасö катайтан нöшöн.

— Эн жö ылавлы, вонушко. Мыля сiдз баитан? Поди, былись мыйкö лоис, ноко ме инö котрася.

Вассаыс эз и лöсьöт лэдзöм баличаэсö, кинитчис ыбöсас да котöрöн мунiс воныс ордö, кытöн ыбöсыс вöлi оссьöма, а кöзяйкаыс вöрöтчытöг куйлiс джодж шöрас. Вассаыс пернапасасис да жагöника локтiс сы дынö и сэтöн казялiс кöсича весьтсис неыджыт ранаок, кöдаись сöдзöма вирокыс. Вассаыс уськöтчис бöр да котöртiс воныс дынö и перыта баитöмöн висьталiс:

— Вийöмыт тай мортсö. Мый öнi мöдан висьтавны? Косичаас инмöмыт. Öнi эд тэнö судитасö, а челядьтö кытчö?

— Мый лоны, дак ась и лоис. Колас мунны инькаö туй кузя.

— Христос тэкöт, мый лёбан, кöдö оз ков?

— Эн бурöт, не кага, вийöмыс понда озö проститö... Вассаыс котрасьтöнняс кöр и ештöма юöртны участковöйыслö, кöда локтiс да нуöтiс Фёдорсö. Инькасö дзебисö деревнянас, а кöзяинсö ыстiсö нематiсь местаэзö. Вассаыс локтiс овны челядьыскöт, но сiйö умöля кывзiс ыджытжык Зинаыс.

— Зинкасö ме юктала винаöн, и ась менö вартлас, ― баитiс инькаэслö Вассаыс. — Айыс туй вылöт ыста. Нылöн семьяыс сэтшöм. А учöтжыккесö сета приютö. Ась нiйö государствоыс быдтас. Сё эд бур морттэс ныись озö петö. Но Зинкаыс ас мывкыда.

И мöдiс бы керны ассис думайтöмсö, но нылочкаыс пышшис гортсис и узис соседас. Этасянь нылочкаыс воннэсö быдтöмсö босьтiс ас вылас, кöть и вöлi сьöкыт, но отсалiсö деревнясис инькаэс.

КАЁК

Мый эм мукöд мортас донаыс, дак этö сiя, что оз лэдзчись мöдiккез моз, и нельки сьöкыт кадас оз öшты ассис принципсö. Ась мучитö оланыс, ась местаас дзескöтö, и шондiыс оз тыдав, но принципиальнöй мортыс и сэк сетö быдöслö донсö и видзö надеясö, что эта только кадыслöн учöтик тор, и сiя чулалас, кыдз он, да бертас гажа луныс.

Рита Бабина öнöдз видзö тöдвылас сiйö кадсö, нельки чассö, кöр мöдiс, веськыта висьталам, джагöтчыны. Сiя лунiсь быд оськöлыс тöдвылас, туй вывсис быд нырокыс, кöр мунiс гортас, кыдз пырис керкуас да повзис.

— Менам синнэз баралiсö, — касьтылö сiя, ачыс сьöкыта ловзисьö да кутö рожабансö, — мöдiсö чеччöвтны кымöс вылам. Керкуас быдöс паськöмыс вöлi бергöтöм, стулыс пöрöтöма, буфетыс осьта, подушкаыс валяйтчö, паньбекöрыс усьöм, горпöданыс бокын, новьян паськöмыс чапкöм, диваныс местасис вештöма.

Тöдвылас усисö висьтасьöммес, кöр öння гусясиссес озö брезгуйтö немöн, нуöтöны нельки увтiсь паськöмсö. А уж вильсö чышкöны кöсöдз. Бабинаыс синнэзнас гöгöртiс керку пытшксö и нем öшöмсö эз казяв, но быд торокыс вöлi вöрзьöтöм аслас местаись. Сыбöрын казялiс джоджсис сьöд следдэз. «Да этö жö Коляыс, жöникö, — клёнгыштiс сылö юрас. — Гортö бöра вовлöма уджалансяняс». Сэтöн уж сьöлöмас ёткыштiс, и сiя кинитчис чуланас да локтiс стенаас öшалан мешöк дынö, кытöн видзис мöймуся таг, кöдаö дзеблiс бутылка вина. Мöдiсö пыравны аймамыс. Не ваöн жö нiйö юктавны. Вот и дзебис жöникыссянь, медбы эз адззы. И бутылкаыс вöлi местас. Кыдз эз инмы жöникыс? А эд тöдчис, что и чуланас петалöма. Тэчöм неколана паськöммес вöлiсö сорлалöмöсь, мöдöртöмöсь. Кин-кин, а кöзяйкаыс тöдö ассис тэчöмсö. Ритаыс пырис бöр керкуас да пуксис öшын дынас. «Но кыдз ни сэсся одзлань овны? — думайтiс сiя пукавтöнняс. — Кытшöм эта лоис олан? Быд копейкасö колö дзебны. Мый жö сэтшöмыс петö? Мыля сiдз жöникö пондiс юны? Мерасö оз тöд. Кытшöм тай бура олiмö».

И Ритаыслö тöдвылас усисö нiя луннэс, кöр нiя тöдсасисö, кыкнанныс томöсь да бытшöмöсь. Коляыс сэк вöлi рам, унасö эз баит да тешитчы, бура уджалiс и любитiс. Мортыс сысся некин эз и ков. Вот и решитiсö öтлаасьны. Гöтрасьöмыс вöлi гажа, счастливöй. Сылöн и аймамыс öддьöн вежöраöсь. А öнi мыля сiдз лоис? Кытiсь сiя вермис кватитны быдöс умöльсö да нёштöмсö? Керкусö быдсöн готов мöдöртны сы понда, медбы польскыны-юны. Ритаыс эд олö бы не умöльжыка жö бур отирысся. Сё тай гортö вайö, содтö бы хозяйствоас, медбы быдöс тырмöмöн вöлi. И карта вылас подасö видзö. Кык челядь быдтiсö, велöтчыны мунiсö. А кыдз нiя олöны сэтчин? Не айыс, не мамыс озö ветлö проведайтны. Мый нiя висьталасö сыбöрын?

Ох, беда лоис, беда. Только петляö кольччис юр сюйыштны...

Эта думаыс пондiс сёйны юрвемсö, тöчитiс сьöлöмсö. Мымда ни отирыс кинысö пуктiсö асланыс лов вылö? Ритаыс пондылiс лыддьыны, но сорасис да дугдiс. Ась мöдiк кончитас. Быд мортлöн кадыс аслас. Ритаыс чеччис öшын дынсис и оськöвтiс комнатаас да видзöтiс ас гöгöрсö, донсьöтiс быдöс чапкöмсö, увтöн-банöн бергöтöмсö и лöгыс петiс жöникыс вылö, кöда юöмыс понда нем оз жалейт. Кöзяйкаыс сувтiс комната шöрас да öвтыштiс кинас: «Ась дарсасяс тар-тарарыас, — небрежнöя горöтчис сiя да ыш ловзисис. — Терпеннё менам бырсис. Колö решитчыны». — И вдруг син вылас шедiс öшын саяс тыдалан могильникыс, кöда вöлi тэлля коласын.

— О-о, мымда сэтчин отирыс куйлö, и некин оз вöрзьöт. Мортыслö сэтчин спокой. А эшö кытшöм бура касьтылöны! Сэтчин куйлiсьыслö некытшöм тöждiсьöм абу. Морос вылас киэсö тэчöмöн куйлö и нем оз думайт. А эстöн жö олан да пыр видчан-ругайтчан, синваöн миссян и гажа лунсö он адззыв, а только маитчан. Быд лунö кöзяиныс локтö код, придирайтчö быд кыв дынö да эшö и вежöктö. Любитöм йылiсь и кывсö, натьтö, вунöтiс.

Жагöника локтiс рытся кад. Öтöрас сулалiс лöнь погоддя, эзö вöрö нельки пöрись кыдзлöн кузь чикиссес. Ритаыс дзарнитiс öшынас, кöда сайын тыдалiсö шоча ветлöтiссез, неылiсь туй вылöттяс жужжитiс-мунiс машина, неыджыт зелёнöй турунок вылын орсiсö челядь. Сы дынöдз некинлö эз вöв дело. Кöть бы эд кинкö пырис да советсö сетiс. Но морттэс мунiсö асланыс туй кузя, сы öшынö нельки эзö и видзöтö. «Вот эд кытшöм чорыт сьöлöмаöсь, — думайтыштiс Ритаыс. — Быд морт тöдö только асьсö. Нiя, натьтö, чайтöны, что быдöнныс счастливöйöсь, а ордчöн ме тöждiся да маитча. Садьö бырö ни начöдз».

Кöзяйкаыс пезьдыштiс да пыксис öшын косяк бердас. Керкуас сылö лоис гажтöм, кыдз бытьтö пемытсялiс, лоис учöтжык. Сiя веськöтыштiс коссö, малыштiс пидзöссö да кисö сэтчö и колис. А синнэс котрасисö угöлiсь угöлö и мыйкö кошшисö. Ритаыс нем эз казяв и сувтiс да нетэрмасьöмöн оськöвтiс комодыс дынö и нёджжöвтiс вевдöрись осьта ящичокас, кытöн видзис паськöм öшлан шнурсö. Сэтiсь жö адззис и ножничсö, кöдöн орöтiс колана кузясö. Шнурторнас сiя жагöника петiс чуланас, кытöн вöлi керöма осьта кайны вöскас. Лисничыс сулалiс важ местас, и коксö пуктiс сы вылö. Ачыс кылiс, кыдз вывтырыс быдсöн сьöкытсялiс, личкис улö. «Вот зараза, — видiс асьсö, — сэтчö он бы кай. Мый мугсян? Верма эшö тшöктыны. Менö он бöбöт. Кöть жöникö и нем туйö оз пукты, но думайтöмсис ог мездiсь. Ась öтнас олас да гажöтчас, абу жаль. Ловсö вöйöтiс винаас, дак ась пусяс пым ваас».

Ритаыс мыдзöмöн кайис лиснич вылöттяс лöсьöтöм судьбалö паныт, мунiс вöскас мауэрлат дынöдз да пуксис, тырöм думаэзнас. Но дырсö пукавны вöлi некор, кин-нибудь да вермас костiавны. Сiя керис петлясö да кöрталiс обрештёкаисьпотш бердö и пешлiс, кыдз уджалö петляыс. Ритаыс тöдiс, что мортыс сэк жö öштö юрсадьсö, кыдз только гезокыс зэлалас. Шнурыс зэлöтiс кулаксö и сöннэс польдiсö. Эта кадö син вылас шедiс вöскас каян осьтаыс, кöда мыччасис сылö мылякö могилаöн, кысянь путриктiс-петiс кöдзыт пар. Инькаыслöн сöдзисö синнэзсис сола воттез. Асьсö пондiс кынтны, кöть и шиферöн вевттьöм крыша увтас вöлi тырмöмви шоныт. И эта самöй моментö крыша вылас öтöрсяняс чив-чив шыасис кытшöмкö каёк да нырнас кынымиськö сяткыштiс шифер бердас. Ритаыс кылiс этö кыдз вöтöн, но сэк жö садясис да тэрмасьöмöн мездöтiс ки бердсис шнурсö. «Этö ме дынö эд локтiс каёкыс, — гусьöна шыасис аслыс инькаыс да юрсö лэбтiс вывланьö. — Кага тэ, ассит шысö меным козьналан, мекöт натьтö бы öтласа кывсö адззан. Кин тöдас, мый сiя мöдö висьтавны? Ох, любезнöй тэ, кагулёк менам, кöбы тöдiн менчим тöждiсьöмсö!.. Сьöлöмö измис ни, кыдз галятор лоис».

Ритаыс лэдзчис мауэрлат вывсис и пуксис трубка бокас тэчöм кирпиччез вылö да пыкис тшöкасö кöстöм кырым вылас и тöдвылас усис быдöс оланыс. «Олансö колö любитны сэтшöмöн, — думайтiс сiя, — кытшöм сiя эм. Нем, тыдалö, он кер, кöр овлö неöткодь, кöть и пыр вежсьö. Природаас тай тожö петавлöны кымöра луннэс, да чулалöны, мыччисьöны мича луннэз. А мымда эшö кертöмыс? Меным эд и сорокыс эшö абу. Вöлi ли любитöмыс? Ежели веськыта висьтавны, медодзза годдэзас вöлi, кöр Коляыс уджалiс да эз ю винасö. А гажöтчыштöмыс понда ачым неблывлi винасö да вайлi гортö, сэк пешлывлiс только невнаöн. Да и то не быд лунö. Öнi жö пондiс юны орöттöг, и гортö нем оз туй вайны. Менö эз понды лэдзны мортыскöт баитны, вежöктö быд мужикыс дынö. И сiдз петö, что сiя аслыс оз верит и полö, что ме не сiдз кера. Мортыс эд только сэк мыйкö вермö керны, кöр веритö аслас вынö. Тыдалö, öштiс совестьсö и лоис немортöн. Эта уж быдса беда. Öтлаасис сэтшöм морттэзкöт, кöдналöн совестьыс, кыдз бадьлöн шать, нёкрасьö öтмöдöрö, кысянь пöльтö тöлыс. Гортын лоис трутеньöн». Инькаыс видзöтыштiс вöскас каян осьта вылас и повзьыштас сьöд рöмсис, кöда бытьтö пондiс сибöтчыны сы дынö, паськöтiс сiсьмöм пиннесö да лöсьöтчис ньылыштны Ритасö. Чужöмыс инькаыслöн чикыртчис, киэс усисö бокас. Бытьтö бы садьыс бырис. Но минута бöртi сiя чепöссис местасис да дрöжитан киэзнас пöрччалiс шнурсö и шупкис ёрдöм осьтаас, медбы сiя джагалiс. Шупкöм бöрас бобгыштiс: «Аридав, несчастнöй, жорит, потны он вермы».

Ритаыс треситыштiс платье бердас лякасьöм буссö да чожажык лэдзчис вöсксис. Чуланас сiя казявтöг каттисис чапкöм шнурас да чуть эз усь. «Вот эд кытшöм репей, — думайтiс ас пондас, — и гортö пырны ни оз бы лэдз. Не весись баитöны, что мортсö петляыс личкö. Ме тэнö вот часöт изнала». Сiя лöгöна кватитiс шнурсö, петiс посöдзас, адззис сэтчинiсь чер да веськыта джоджас кералiс поснит торрез вылö, кöднö шупкис карта вылас. Сэсся кокнялöм сьöлöмöн пырис керкуас да кутчисис лöсьöтны порядоксö. Жöникыс локтытöдз ештiс джоджсö миськавны, резöмсö дзимлявны, гöгöрöт буссö чышкыштны — и быдöс пондiс свиттявны. Мыдзыштöм увьяс нёджжöвтiс öтöрас, кытöн гажöна чивзiсö каёккес.

— Праздник локтö, или жö кинöскö видзчисян? — юалiс жöникыс да мöдiс сьöд паськöмнас мунны комнатаас.

— Чöвт гунятö и эн лысьт сэсся нятьöсь паськöмнат пырны комнатаас, — лöгöна висьталiс иньыс. — Отирыс моза жö пондамö овны, а то соседкаэзöлö лоис стыд рожааныс видзöтны.

— Да тэ мый? — лöгасис жöникыс. — Кин эстöн кöзяиныс? Ме эд верма боккетö малалыштны вот этöн, — и мыччалiс жмитöм кулаксö.

— Кыдз ме висьталi, сiдз и лоас, — чорыта висьталiс иньыс. — Колö пондöтчыны вились овны. Юин пöттöдззат ни, тырмас.

— Меным мерасö некин эз сувтöт.

— Дак вот, тöд, что ме сувтöтi. Тырмас отирсö смешитны.