Том солдатка

Иван Бичиров локтiс гортас армияын служитöм бöрын да невна гуляйтыштiс и мöдiс бы гöтрасьны. Сылöн айыс да мамыс вöлiсö пöрисьöсь ни, и колiс отсасись, кöдiя бы кужис видзны хозяйствосö. Ас коласаныс нiя неöтпырись пондöтлiсö эта йылiсь баснисö, бöрйисö невестасö, кöдiя лöсялiс бы ны увтырö. Сувтiсö Клавдия вылын, кöдiя олiс неылын, Муткыль деревняын. Сылöн аймамыс видзисö челядьсö крепыта, эзö лэдзö бöбавны, велöтiсö только удж бердö. Да и отирыс баитiс ны йылiсь бура.

— Сэк инö ветламö корасьны, — баитiс мамыс. — Сысся буржык ичмонькасö он адззы. Сiя меным лöсялас. Ветлы, айыс, корась.

Баитчöм лун кежас лöсьöтчисö, керисö сурок да аскур, кыдз овлiс отирас, мунiсö корасьны. Пукалiсö да юыштiсö сэтчин, и мужиккес öдззисö шваткыны-баитны да сiдз, что кадыс лоис сёр рытöдз. Иваныслö гленитчис мича чужöма нывкаыс, и сiя готов вöлi эта жö рытö нуöтны сiйö гортас, но айыс висьталiс: «Эн чепсась, некытчö сiя оз ло, оз пышшы».

И петiс сiя луныс, кöр Клавдиясö öтлаын коробьянас пуксьöтiсö телегаö да вайöтiсö Иваныс керкуö, кытчö öксис быдöс увтырыс, вайисö уна козиннэз да тшöктiсö дыр и дыр овны и уна челядь быдтыны, добронас тыртны керкусö. Томмесö унаись окöтiсö.

А чожа мыйись пондöтчис война, кöда вылö перво босьтiсö неважын служитöм отирсö. Медодзза жö ыстöммезас мунiс и Иваныс, кöда кöсйисис чожа бертны бöр. Том иньыс чапкис уна синва и баитiс, что öтнасыслö лоас сьöкыт овны, пондас гажтöмтчыны. Жöникыс пуксис машина кузовö, и сы бöрсянь только бус путриктiс да каттис öтлаö мича луннэсö. Керку пытшкыс Клавдияыс понда дузгыльтчис, кыдз бытьтö югытыс кусiс, югöрыс öшис. Ольпасьыс эз понды лöсявны, лоис кöдзыт и гажтöм. Жöник саяс эд пондiс только велавны овны и вдруг — быдöс орис. Нiя олыштiсö кытöнкö месяц гöгöр, но кинлöкö колiс дзугны счастьесö. Жöникыскöт пондiс видзны сiйö öтiк почтаыс, кöда пыр вовлiсö гижöтоккес, но видзчисьтöг и эта тылöпокыс орис, письмоэс дугдiсö локны. Мый лоис Иваныскöт? Пöрись отирыс баитiсö, что война вылас сякöйыс вермас лоны. Колö терпитны да видзчисьны. Инькаыс сiдз и керис. Ассис тöждiсьöмсö вунöтлывлiс только колхозас уджалöмын. Неыджыт мыгöра да топыта тэчöм, сiя быд уджсö кужис керны, ыбсö пинялiс, гöрис и сюсö вундiс, вöрсö кералiс и мешöксö кыскалiс, вартiс и тöлöтчис, чернас и виланас бергалiс, прокыс быдлаö тырмис. Только Менделееваöдз тöвнас ветлывлiс дасся не етшажыкись, кыскалiс сэтчин сюсö. Кöр локтас кадыс, любитiс и ытшкисьны. Öтамöдлö отсасьлiсö помеччезöн, кöдна вылö пыр корлiсö и Клавдиясö.

Öтпыр нiя кералiсö да ваялiсö пес Акулина соседкаыслö. Рытнас öтлаын ужнайтiсö, кытöн адззисис и невна аскур.

Кöдзыт öтöр бöрсяняс инькаэс невна небзьыштiсö да гажмисö. Перво баитiсö асланыс сьöкыт доля йылiсь, а сэсся норöн сьылыштiсö да пондiсö орсны кругöн важ песня сьöртi, кытчö корисö и Митяöс, кöда помечалiс жö. Зонкасö пуксьöтiсö круг шöрас, и сы дынö лöсьöтчис Клавдияыс. Нiйö сьылöтiсö кыдз жöникöс да невестаöс и медбöрын тшöктiсö окасьны. Митяыс шамыртiс ичмонькасö да пыма окалiс. Инькаэс радувьяныс гажöна шовкöтiсö. Этаын эз вöв нем сэтшöмыс, и некин эз казяв, кыдз том солдаткаыс жмитчыштлiс зонкаыс бердö и небыта кутiс сылiсь кисö. Вирыс койыштiс чужöмас.

— Ноко, лэдз жö, окояннöй, — бытьтö пессис да мездiсис Клавдияыс — Няня бердö кыдз кага кутчисин, он и мездöтчы.

— Да эд миянöс гöтралiсö, — серöмтчис Митяыс.

— Потехасö он ли мый ли вежöрт? Кад ни бы авйыны.

Инькаэс гажöтчисö да пондiсö мунны горттэзаныс. Клавдияыс пасьтасьтöнняс пантасис зонкаыс синнэзкöт и гусьöника мигнитыштiс сылö. Кöр сiя подружкаыскöт петiс öтöрас, Митяыс иньдöтчис сьöраныс. Ойыс вöлi тöлiсьтöм. Полöмöн сiя мунiс бöрсяняныс, медбы не öштыны син вывсис. Но вот кык ичмонька сувтiсö, баитыштiсö да торйöтчисö. Улицаас вöлi сэтшöм лöнь, что кок увтын кылiс лымыслöн муркöтöмыс. Митяыс шупытсьöтiс оськöввесö и чожа вöтiс Клавдиясö, кутiс сiйö да негорöна висьталiс:

— Ноко сулалышт, кытчö тэрмасян? Кыдз шальнöй тай мунан.

— Менам, поди, эд горт эм, — зонкаыс вылö видзöттöг шыасис Клавдияыс да сувтчис. — Ойнас только поннэз котрасьöны. Мый колö месянь?

Эта кадö инькаыс моросын пессисö кык чувство: сiя важын ни видзöтлiс эта зонка вылö, но эз лöсяв сэтшöм кадыс. Мöдкö, сiя полiс, что кывсяс гортас, и лоас дзескыт.

— Норовитышт кöть минутка, — висьталiс зонкаыс да сувтiс сы одзö. — Баитыштамö кöть невночка.

— Тэ эд зонка, а ме жöник сайын. Кытшöм вермас лоны басни?

— Уна ли олiн жöникыткöт? А часöт кытöн сiя?

— Кыдз этö кытöн? Ачыт тöдан, мунö война, и сiя воюйтö, оз вермы меным гижны. Вежöртан тэ сiйö?

— Лэдзамö сэтчöдз, что эз вермы гижыштны месяц или кыкö, но быдса годсö чöвны... сэтöн мыйкö не сiдз.

— Ачым вежöрта, но меным колö овны пöриссескöт. Нiйö бокö он чапкы, и не лыддисьны этöн оз туй.

— А тэ жö ачыт мигнитыштiн?

— Вермис и сiдз петны, но сiя минутаö, натьтö, ме вöлi не ме, кытшöмкö садьтöм... Меным сьöкыт бöрйыны. Кин оз тöд менчим олансö, дак оз верит. Кыдз кöч пола быдöсiсь.

Кыдз помечас жö Митяыс шамыртiс морос одзас лöсьыт ичмонькасö да сибöтчис чужöм дынас. Клавдияыс мöдiс пыксьыны, но эз вермы, и ачыс шедiс бöб вын увтас, сылöн киэс волятöг кутчисисö зонкаыс голя бердö, но кынымкö минута бöртi сiя садясис да негорöна шыасис:

— Мый жö мийö эстöн керамö? Кин-нибудь адззылас и баснисис он мездöтчы. Инькаэслö эд только шед кыв выланыс, а нiя сплетничайтны кужöны.

— Адззам кытчö сайöвтчыны. Ме вежöрта, кытшöм вермас петны басниыс. Вермамö кежны бокö. Но дак мый, кежимö?

— Только... недыр кежö, а то гортын öштасö... Мый ме висьтала йöзайöлö? Сiя оз лэдз дырöн ветлöтны. Жалейт менö.

Клавдияыс керку дынöдз вöлi неылын, и мунiсö тэрмасьтöг. Ичмонькаыс думайтiс, кыдз пондасö пантасьлыны. Подружкаыс ордын? Но сэк пондас тöдны куимöт морт. Мый жö керны? Эм жö эд кытöнкö петанiныс.

— Мыля дузгыльтчин? — ас бердас жмитыштiс да юалiс Митяыс, кöр нiя локтiсö Клавдияыс керку дынö. — Или не сiдз мыйкö кери? Эта делоын тэ эд тöдiсь, дак висьтав, мый не сiдзыс?

— Эн модь, кöдö оз ков, — Клавдияыс сувтыштiс Митяыс одзö да кулакнас буткыштiс моросас. — Тöжда не сы йылiсь, а одзланься пантасьöммес понда. Талуннясö отирыс син одзын оз туй керны. Сiдз и сiдз ковсяс сайласьны, но кыдз?

— Эн тöжды, — перыта горöтчис Митяыс, жмитыштiс ас бердас ичмонькасö да окалiс. — Мый миянлö сетöма — быдöс босьтамö.

— Тэнчит кыввесö да еныс пельö бы.

Нiя баитыштiсö недыр, а сыбöрын Клавдияыс тэрмасис пырны гортас, кытöн сотчис учöтик биок, и айыс кыйис нинкöммез, аньыс узис.

— Мыйкö талун дырöв тай помечалiн? — йöзайыс шваткöтыштiс сьöктаннас бергöтöм нин шуль кузяс да видзöтыштiс моньыс вылö.

— Ужинайтiмö да пукалыштiмö тай öтлаын да баитiмö, кыдз овны одзлань. Быд инькаыс ассис сьöкытсö кисьтiс-висьтасис. Эгö и казялö, кыдз кадыс чулалiс.

— Ме тай вот пукси да шватка тэныт нинкöммез. Рытыс сiдз жö чулалö. Гозсö талун кыйышта.

— Спасибо тэныт, — пасёксö чöвтiкö шыасис моньыс. — Бр-р, мыйкö кöдзыткодь керкуыс. Помечас жаравлi, а öтöрöттяс мунтöн сайкалi.

— Печкасö лонтышт, песыс эд пыртöма.

— Ой кежас мыйлö ни? Ме полатяс вода.

— Ачыт тöдан, а ме даки кыйышта нинкöмсö.

Клавдияыс кышым-кашым кайис полатяс да чöвтiс вывтсис и водiс. Но сiйö эз узьöт. Сiя жöв керсис ольпась вылас и оськöв бöрын оськöв бöрйис чулалöм рытсö. «Вот и босьтi аслам лов вылö этö грехсö, — думайтiс сiя, — но не век жö эд овны мужиктöг. Сьöлöмлö гажыс только сымда и кольччис. Мый уж пуктöма менам ним вылö, сэтiсь некытчö он воштiсь. Кысь, кöдöрись кошшыны да видзчисьны жöникöс? Вöлi бы ловья, дак ыстiс бы гижöтоксö. Сыкöт олöмыс вöлi кыдз чардби — югйöвтiс и абу. А видзчисьны мылаö ни бырис. Ась кöть мый лоö, но пантасьлыны понда. Митяыслiсь киэсö и часöт кыла ас бердам, небытöсь да ласковöйöсь. Ог вермы сылö паныт мугсьыны. Да и мыйлö? Ме жö сiйö важын ни любита. Вот и понда овны сыкöт, ась кöть мый баитöны».

Айыс улын перыта шваткöтiс сьöктаннас, а моньыс вöрзьöтчытöг куйлiс ольпасяс. Сiя ланьтiс только пыдын ойнас и асывнас узис бы дырöдз, но саймöтiс аньыс. Клавдиялöн юрыс клёнöтiс-висис, но норасьны вöлi некинлö. Колхозас уджавны мунтöдз сiя ештiс подасö сёдны, джоджсö чышкыны да посöдзсö. Керис этö перыта, медбы одзжык мунны бригадаас да пантасьны модзыскöт. Туйыс как раз сы öшын одзöт, казялас. А Митяыс вöлi петöма ни поспу вылас да тшынöтö табакöн, но казялiс ичмонькасö и котöрöн локтiс сы дынö да юалiс:

— Но и кыдз гортат?

— Быдöс бура чулалiс, — Клавдияыс серöмтчис. — Айö тай вöлi пукалö да нинкöммез кыйö.

— Значит, дозирайтiс, кöр локтан. Мый ни бы сылö тöждыны? Ачыс эд вежöртö, что зоныс оз ни лок.

— Пöрисьыс кувтöдззас пондас видзчисьны, а меным талун колö.

— Но дак ме жö ордчöн, — Митяыс мöдiс кутны модзсö.

— Только не эстöн. Вот локтамö и сайöвтчыламö карта саяс. Сэтчин некин оз казяв. Колö берегитчыны.

Нiя мунiсö и эзö баитö, кыкнанныс вöлiсö каттьöмась любитöмнас, кöда пырис сё пыдöжык да лэдзис вуджжесö.

Кужисö пантасьлыны быд удж коста, нельки подасö вашöтiкö. Быд коста Клавдияыс кужис адззыны мог, мед пантасьны. Öтамöдныстöг эзö пондö вермыны овны. Колiс мыйкö керны. Но быдöслöн эм дор да пом, войнаыслö локтiс конец. Недыр мыйись гортас локтiс и Иван Бичиров, кöда вöлöма пленын, да мездöтöмась союзниккес. Локтöм бöрас сiя медодз айыслiсь юалiс:

— Висьтав, кыдз Клавдияыс олiс метöг? Веськыта баит.

— Умöльыс тай эз кывсьы. Отирыс нем эзö баитö.

— А тэ, Клавдия, мыля синлыссэтö лэдзин?

— Кывза тай, мый баитатö.

Эта вылö вачкисян басниыс вöвлi унаись, но Клавдияыс бердö нем понда вöлi кутчисьны. Иваныс беситчыштiс и дугдiс, но пондiс юны вина, а инькасö дынсис эз вашöт. Сiдз чулалiсö кынымкö год. Клавдияыс косьмис, умöльтчис, нем сылö эз понды ковны гортас.

— Чулалiс менам гажа кадö, — кыдзкö сiя норасис Митяыслö, кöда ештiс ни гöтрасьны. — Сьöлöмö тэ понда тöждö, а ола мöдiккöт. Сьöкыт и лунсö чулöтны. Но, тыдалö, сэтшöм менам судьба.

ПОДРЯД

Одзжык эд кыдз вöлi? Мортыс босьтас подрядсö и перво баитчö, мымда кöзяиныс пондас мынтны. Ежели мортыслö гленитчö уджалöмыс сьöртi мынтöмыс, то кутчисьö и керö делосö.

Томнас Яков, Каплянов Матвейлöн зоныс, одз пондiс кутчисьлыны сроккезö: то ли пинявны или жö пода пастушитны. Пöриссезсянь велалiс гöрдззыны и саккез, и мерёжаэз. Этö керны вöлi не сэтшöм сьöкыт и шонытiнын, а мынтлывлiсö неумöля. Колiс только не дышöтчыны. Яковыс аслыс керис нельки лямöтöм проволокаись гöрдззисян ем, кöда вылö каттьывлiс шöртсö. Велалiс и киэсö вöрöтны. Неделя гöрдззисяс, и пуд нянь сетлывлiсö. Мый сэсся колö гов зонкалö? Кöр няньыс эм — и оланыс бур. Гортiссезлö пондiс отсавны. Аймамыс ошкисö, кöр сюсö ваявлiс нылö. Вот и велалiс ветлöтны неылiсь деревняэзöттяс.

Кыдзкö сiя шедiс Шабур деревняö и пантасис сэтчин стариккöт. Баитчисö керны сылö сак да мерёжа. Пöрись мортыс сё эшö абу чапкöма чериалöмсö, но снасттес бырöмась. Старикыс ачыс керис бы, да умöля пондöма адззыны. Мынтансö кöсйис жалейттöг. Баитчöм лун кежö Яков мунiс сы ордö. Керкуас вöлi неыджыт мыгöра не том ни нывка, кöдiя чожа котрасис öтмöдöрö, керис гортсис уджсö. Кöзяиныс тшöктiс локтiсьсö шоччисьыштны, нывкасö — заптыны колана шöрт. Кок вылас чож нывкаыс лöсьöтiс табурет, пуктiс öшын подушка вылас тшакыллез да пондöтчöмыс понда гасничок. Старикыс пуксьöтiс локтiсьсö пызан сайö, медбы не тшыг гыркöн пондöтны уджсö, кыдз колö гöститöтыштiс, а сыбöрын юрбитыштiсö, и зонкаыс пондöтчис гöрдззисьны. Нывкаыс дзимлялiс пызан вывсис паньбекöрсö да локтiс öшын бокас и пуксис лабич вылö да пондiс видзöтны Яковыслiсь уджсö. Старикыс эта кадö лöсьöтчыштiс да мунiс гортсис, и нiя кольччисö кыкöн. Яковыс юалiс:

— Кытöн да мый керö кöзяиныс?

— Мельницаö тай шатöвтiс, — небрежнöя висьталiс нывкаыс. — Лун-лунöн сэтчин гуддисьö. Тöдвылас только мельницаыс, а сэсся нем оз ков. Мöдiк йылiсь и думаыс абу. Ме эстöн пыр öтнам.

— Асланыт мельница — этö бур, — горöтчис Яковыс, ачыс нёджжöвтiс нывкаыс вылö. — Сэтчин и буссö кыркöтö. Богата, натьтö, олатö?

— Мало-дело кыссямö тай, — ыш ловзисис нывкаыс. — Менам эд оланыс строшнöйлöн кодь жö.

— Кыдз жö сiдз? — эз верит зонкаыс. — Эттшöм бур хозяйство, и ачыт сэтöн кöзяйкаыс. Тэ разь сылöн не ныв?

— О-о, тэ нем он тöд, — тöждiсьöмöн висьталiс нывкаыс, — Миян эд кыдз петiс? Жöник саяс ме и кык годсö эг ов. Жöникö вийсис вöр кылöттöн. Затор вылын. Ме жö десятинасö эг понды вермыны гöрны да кöдзны. Сэтчö, кыдз нильыг налим, пырис ме дынö Калич Митрейыс да вайöтiс гортас. Сыкöт лоисö кык пашня. Вот сiдз и пондiмö овны. Первосянь эг жö мöд сибöтны бы ас дынам, да тулыснас аслам жö пашня вылын уджалiкö кутiс и насильничайтiс. Норасьны вöлi некинлö. Миян гöгöрын некин эз вöв. Горзi тай пöттöдз и пондi сыкöт узьлыны. Одзжык вöлi удав, да öнi атшалiс, сылö и ме эг понды ковны. А меным эд только кыкдас вит год. Пукала гортын да караулита сылiсь хозяйствосö. Некин ордö ог пыр не ог пет. Ачыс оз лэдз. А сьöлöмö эд инькалöн. Мукöд кадас сiдз чепöльтас, что чапки бы быдöс да пышши сы дынiсь...

— А тэ инькаыс эшö тово, асьтö абу öштöмыт, жерек, — синнэзас видзöттöн висьталiс Яковыс да серöмтчис. — Вывтырнат госа да и чужöмыт мича. Он висьтав, что пöрисьмöмыт. Меным гленитчан.

— И меным эд тэ. Кыдз только пырин керкуас, сэк жö сьöлöмöс емöн моза бытшкис, — стыдитчöмöн висьталiс инькаыс да видзöтiс зонкаыс синнэзö. — Старикыссянь эд бурсö ог ни адззыв. Год-мöд ни торйын узьламö. Быдöс ни бокö сайкалiс.

— Ме и шонтi бы, да ог тöд кыдз, ог авйы.

— Ась менö еныс проститас, но велöта, — пыма горöтчис инькаыс да пуксис Яковыс дынö, нюжöтчыштiс да кутiс сылiсь каджсö. — Ноко дугдыв гöрдззисьны. Одзлань эшö уна лоасö луннэс, ештан. Кытшöм эд тэ том да бытшöм, ангелочек кодь. Кыдз только еныс вайöтiс миянö. Чеччы да кайламö горвылас, — инькаокыс корöмöн видзöтiс сы вылö.

Яковыс емсö мöртiс сакас да радувьяс кайис инькаокыс сьöрö. Нiя водiсö одзжык лöсьöтöм паськöммез вылö, и сэк жö кöзяйкаыслöн киыс пырис вешьянас, а зонкаыс сапырнитiс сiйö и ки увтас кылiс, кыдз инькаыслöн яйыс быдсöн вынтöтчöма да дрöжитыштлiс, ачыс частöя да жарöн лолалö, жмитчö зонкаыс бердö, сiя жö кадö перыта шушкö:

— Пöрччав киззетö да... вот этадз... Ноко лэдз, ме ачым... Вот сiдз... Эн тэрмась, нюжвыла... И зонкаыслiсь кутiс каджсö да зэлöтiс ас бердас.

Яковыс керис сiдз, кыдз висьталiс вöвлöм эта делоын инькаыс. А сыбöрын, öтамöдöн довольнöйöсь, нiя лэдзчисö горвывсис, пукалыштiсö ордчöн, и зонкаыс пондiс гöрдззисьны. Лэбтiсьöм öдыс эшö эз чулав, и Яковыслöн киэс дрöжитiсö, нельки петляэс эзö инмö, но жагöника сьöлöмыс лöньсис, и тэрмасьöмöн пондiс вöтны кольöмсö. Кöр локтiс кöзяиныс, сылöн уджалiсьыс вöлi спокойнöй да перыта керис саксö.

— Но и кыдз, Öксинь, — юалiс сiя инькаыслiсь, — обедсö шедтiс жö миян уджалiсьным?

— Эз тай и чеччыв местасис, — гажöна висьталiс Öксиньыс. — Оз курит не оз баит. Кин сьöрья и эм. Керкуас бытьтö некин абу.

— Норовитышт, велалас и пондас баитны, — думайтöмöн висьталiс кöзяиныс. — Мортыс локтiс тöдтöм местаö и оз эшö письт. Тэ эд кужан баитны, вот и öдззöт сiйö. А öнi лöсьöт пызан вылас.

Хозяйкаыс чожа öктыштiс пызан вылас да висьталiс: — Лок öтлаö, мизгирь, сёйышт да шоччöт спинатö.

Яковыс то не то, жагöника локтiс пызан дынас да пуксис дорас, кыдз керлывлiс мöдiк керкуэзас. Эз вунöт, конешно, пернапассö пуктыны, кыдз истöй христианин. Сёйикас эзö баитö, а сыбöрын кöзяиныс тэрмасис мунны мельницаас, эз бы мый ло сэтчин. Öксиньыс дзимлялiс пызан вывсис да бöра пондiс орсöтчыны. Весь овтöнняс сылöн эд госыс пизис, и ачыс гажöтчис бы да бöбалыштiс. Подёнщик Яковлö вились колiс тыртны сылiсь охоткасö. Сiдз и пондiсö чулавны одзланься луннэс. Öксиньыс кыдз бытьтö томмыштiс, ветлöтiс кокнита, часто вовлiс зонкаыс дынö, кутавлiс голясö да пыма окавлiс. Боксянь видзöттöн позис висьтавны, что счастьеыс сылöн пизьö вевдöрöттяс. Только вот кытчöдз сiя кыссяс? Эд син одзас сакыс содiс, он и казяв, кыдз гöрдззиссяс. И инькаыс кыдз вермис, сiдз и кыскис кадсö, мешайтiс зонкаыслö. Но локтiс лун, кöр сакыс лоис готовöй, кöда понда ошкис кöзяиныс да висьталiс:

— Спасибо, зонiньöй, спасибо. Манитчытöг керин. Öнi пондöт мерёжасö керны. Кутчись да сiдз жö уджав. Мынтöмыс понда эд ог сулав.

— Эн мугсьы, Яша, кутчись да уджав, — висьталiс инькаыс.

И зонкаыс эшö кольччис. Сылö эд вöлi сёравно, кöть кытöн овны, а татöн кöзяйкаыс вердiс пöттöдз и нем эз жалейт, нельки сiйö вайлiс, кöдö и кöзяиныслö эз мыччавлы. Кöр кöзяиныс эз вöв гортас, чеглывлiс уль кольттез, вайлiс сметанасö, яйсö.

— Оланыс кыдз райын, — сёйтöнняс сералö Яковыс.

— Тöдан разь, кыдз сэтчин олöны? — юалö Öксиньыс.

— Кöбы не тэ, дак эг бы тöд, — жмитiс ас бердас кöзяйкасö, а сэсся пуксьöтiс öлöдзас да пырис кофточка увтас, кыдз нянюшник. — Ноко сет, ме нималышта.

— Да мый ни тэкöт керан, нимав, ыджыт кага тэ. Мыйöн бы эн бöбав, но только бы эн горзы, менам ангелочек.

Яковыс невна бöбалыштiс нянянас да кутiс Öксиньсö морос одзас, лэбтыштiс коккез вывсис и нуöтiс горвыв дынас, кытöн висьталiс: «Кайламö жö шонтiсьны. Кöзяиныт эд абу гортын...»

Но и мерёжаыс гöрдззиссис. Яковсö кутiс тöждiсьöм, кыдз пондас янсöтчыны Öксиньыскöт. Оланас медодзза инькаыс сылö гленитчис, öддьöн ни сiя небыт да кужö любитчыны. Кыдз сiйö колян старикыс дынö? Тöждiсьöмсяняс вермас кувны. Вот кытшöм историяыс. А кöзяйкаыс важын ни этö думайтöма и, кöр локтiс кöзяиныс да пуксисö ужинайтны, сiя ачыс пондöтiс баснисö:

— Кывзы, Митрей, мый мöда висьтавны. Мельницаас тэ öтнат. Сiдз эд? А не кольны ли зонкасö отсалiсьöн? Яшаыс боёк и тэнö вермас вежлыны. Кыдз тэ эта вылö видзöтан?

— Тэ разь баитiн ни сыкöт?

— Мыля ме понда не аслам делоö пырны. Тiйö, мужиккез, и баитö ас коласаныт. Поди, оз откажитчы?

— Дак кыдз, Яков, согласитчан? — старикыс бергöтчис зонкаыс ладорö да видзчисис очакывсö.

— Меным то эд кöть кытöн уджавны, — полöмöн висьталiс сiя. — Ежели верма уджавны, то кольччи бы.

— Велöта, — висьталiс кöзяиныс, — сэтчин абу сьöкыт. Только видзöтлыны колö. Но дак мый, кольччан?

— Но-о, пондыла инö...

Яковыс лоис мельникыслö отсасисьöн. Öксиньыс ваявлiс нылö сёянсö мельницаас, медбы мужиккеслö не ветлöтны. Яковыс чожа велалiс изыннэсö лöсьöтлыны, кöр кисьтöны сюсö, сизьдыны нiйö, кыт мавтны и кыдз васö лэдзны. Старикыс видзис надеясö и мукöдпырсяс эз и вовлы, тöдiс, что зонкаыс керас быдöс. А Öксиньыс сэк кöзяйкаалiс сэтчин аслыс пользаöн, керис быдöс, медбы Яковыслö эз вöв гажтöм да и аслыс вöлi бур. Нiя босьтiсö ассиныс быдса мераöн, любитчисö коддзытöдз. Эта кадö Öксиньыс эз пов не еныслiсь, не отирыс басниись, тöдiс только асьсö. Тшыгьялöм вывтырыс корис, медбы сiйö радейтiсö да малалiсö, нöитiсö да ниглялiсö. Эта торыс усис Яковыс ним вылö. Но локтiс тулыс и вешняггесö* лэбталiсö. Яковыслöн бырсис срокыс, колiс мунны гортас.

[* вешняг (вершняк) — мельничнöй плотинаын лэбтасян пöдан]

— Нянь-солыс понда спасибо тэн... — чуть эз висьтав Öксиньыслiсь нимсö, но джöмдiс джын кыв вылас да веськöтчис, — тiянлö, бурöсь вöлöмась морттэз. Век ог вунöт. Эшö вовла, эдö откажитö.

Медбöрья кыввес вöлiсö ыстöмась кöзяйкаыслö, и сiя вежöртiс. Яковыс босьтiс котомкасö и оськöвтiс ыбöс саяс. Петiс öтöрас, а сэтчин югьялiс шондiыс...