Тшакыль

Том гозъя неважын только гöтрасисö, пондöтiсö лэбтыны виль керку. Но нiя эшö етша уджалiсö, а этасянь деньга заптöсыс чожа бырсис. А томмес олiсö бы асланыс керкуын. Кöзяиныс, коммунист Николай Порозов, небис вöр кералан билетсö нач донтöма, вештiс кытöнкö куимдас руб гöгöр, но и сэтiсь бöр ыстiсö Порозовыслö дас куим руб сы понда, что вöрсö кералiсö сöстöма, уввесö чукöртöмöн. Порядок сэтшöм вöлi. Инькаыс, Таисья Фроловнаыс, сiя кадö уджалiс туй керан управленнёын, и машинаэсö корны эз вöв сьöкыт, медбы вöрсö ваявны строитчан местаас. Сiдзкö, чожа срубыс сувтiс крыша увтö. Сэтöн плотниккез уджалiсö. Колiс сэсся медавны джоджсö да потолоксö вöвдны, öшыннэсö да ыбöссö сувтöтны, заборсö керны. Сэсся уж колiсö столяррез, а кöзяиныс инструментнас эз уджавлы. А кытчöдз керкуыс сулалiс öтнас, кыдз кайпоз. Том гозъяыс нельки стыдитчыны пондiсö соседдэссянь, мыля дыр керöны керкусö. И нiя баитiсö-керисö, советуйтчыштiсö да решитiсö банкись босьтны ссуда.

— Кытöн эз вöв, — кöзяиныс макнитiс кинас. — Отирыс тай сiдз жö керöны. Чожажык керкуыс шогмас.

Эта вылын и адззисö öтласа кывсö. Порозовыс сетiс банкас документтэсö да аскадö сэтчинiсь босьтiс деньгасö, а иньыслö висьталас:

— Ме кöсйиси, а тэ пондан вештыны ссудасö. Тэ дынын эд öтласа кöшельыс. Сiдзкö, эн вунöт сроккесö.

Кöр деньгаыс эм, сэк овны гажажык. И керку дынас адззисисö уджалiссес. Нiя вöвдiсö джоджсö и потолоксö, волькöтiсö стенаэсö, сувтöтiсö косяккесö и керисö öшыннэсö, а горсö вартiсö крестьяна моз жö, лоас век кежö. Виль керкуас петiсö овны. Сэтчö небисö быдöс, мый колö мортыслö. Бура тöдсаэсö корисö гöститны. Эта рыт кежö заптiсö вина да уна öтiк-мöдiк сёянсö. И Таисьяыслö первуись ковсис пешлыны винаыслiсь кöрсö.

— Он кö ю, — баитiсö жöникыскöт öтлаын уджалiссес, ― то и овны пондан кöс куропаткаöн. Юöм вылас и муыс видзсьö.

— Ась инö тiян моза лоас, — шыннялiс кöзяйкаыс да юис.

Жöникыс жö уна юöм бöрас лоис кыдз бöбöв баран и бур, что сiя рытö юисö öтлаын и начальниккес, кöднiя веськöтлiсö вöралiссес да чери кыйиссес обшествоöн, кытöн уджалiс и Порозовыс. Нiя вовлiсö и ашынас юрнысö веськöтны, вöлiсö сэтшöм отир, кöдна любитiсö юыштны да висьтасьны-сюльзьыны быдкодь историясö, мый вöлi и эз вöв. Кыввесö сiдз баситасö, что вöралiсьыс пыр петлывлiс геройöн.

Порозовыс вöлi охотоведöн и чожа вежöртiс, кыдз позьö и уджавны, и сэк жö шоччисьны. Мунас Пожваö или Майкорö, корас сэтчин снасттез и пукалö берег дорас да тэрмасьтöг кыскалö ёдiэз. А кок увтас шлёпöтö ванырыс, шонтö шондiыс, и баддес коласын чивзöны кайес. Кöть быдса неделя чериалан, а лыддисян эд командировкаын, деньгасö сёравно мынтöны. Но не только Камскöй море дынас. Позьö и Нахты дынöдз ветлыны. Сэтчин ёкышшес стрась басöкöсь. А етша разь миян округын местаэс, кытöн чери кыйисьыс вермас шоччисьны? Этасянь Порозовыс эз любит пукавны контораас, унажыксö ветлывлiс командировкаö. Тöдвылас некöр эз вöв инькаыс, кыдз сiя олö и мый керö. Ваявлiс гортас черисö да пöткасö и вийöм зверьсö. Быд командировкаись локтöмсö чулöтлiс вина юöмöн, кытöн и иньыс пешлыштлiс курыт кöрсö. Видзöтны, дак нылöн оланыс дзик лöсялiс.

Тасяыс уджалiс кассирöн. Сы ки увтын пыр вöлi деньгаыс, а мынтiсö етша. Зарплатасö öктыштас да нуöтö банкас, медбы чожажык вештыны ссудасö. Мукöдпырся осьтас сейфсö да дырöн видзöтö деньга вылас. Киэс кыссисö пачкаэс дынö и мöдiс бы курмыштны басöк знаккесö, но ловыс эз лэбтiсьлы. Кватитны недыр да колас эд пуктыны бöр, а то... Думанас Таисьяыс иньдöтчывлiс нiя местаэзö, кытöн и кайес озö лэбалö. Сiя минутаö вывтырыс жмитчывлiс, бытьтö сiйö кутiсö гусясьтöнняс да юалiсö: «Мый жö тэ, ичмонька, думайтан? Ноко киэтö вешты государствоыслöн деньга дынiсь». Таисьяыс повзьöмöн клопайтiс касса ыбöсокнас, полiс нельки видзöтны.

Механизаторрес нылöн уджалiсö сэк ыджыт туй вылас, öтлаöтiсö городсö Менделеевакöт асфальтöн. Нiя уджалiсö и олiсö сэтчин вагончиккезын, етша вовлiсö гортаныс. Заработокнысö мынтiсö сэтчин жö, етшажык пируйтiсö. Уджалiссес тэрмасисö перытжыка керыштны туйсö. Öтiк лунö начальникыс корис Тасясö дынас да висьталiс:

— Часöт мун банкö да чек сьöртi получит деньгасö. А сэсся ветлан туй вылас уджалiссес дынö да сеталан нылö ведомость сьöртi.

— Öтнам? — повзьыштiс Тасяыс да видзöтiс начальникыс вылö.

— Мыля жö öтнат, лоас машина, и шофёрыс боевöй. Бензовозöн сiя ветлiс банкас и обед бöрас мунiс туйсö кериссес дынö. Шофёрыс вöлi том да бытшöм, паськыт мыгöра, неважын локтiс армияись и машинанас ветлiс кокнита да перыта, повтöг, пыр шынньöлöн, некöр эз тöждiсь.

— Нуöта и часыс оз чулав, — гажöна висьталiс Тасяыслö, кöр пуксисö кабинаас. — Асфальт вылöттяс öддьöн бур мунны.

Виль туйыс вöлi волькыт, и машинаыс котöртiс шутнялöмöн. Шофёрыс уна баитiс, висьтасис анекдоттэз, касьтылiс, мый керлiс армияас, кыдз служитiс. Тасяыс кывзiс да сералыштлiс. Нiя мунiсö ни джын туйсö и сэтöн шофёрыс кежöтiс машинасö важ туй вылас.

— Мыля умöль туяс петiн? — полöмöн юалiс Таисьяыс.

— А-а, сизим верстаыс абу кытшöвтöм, — горöтчис шофёрыс да чинтiс газсö. — Сьöрам эм бутылка, кöдö колö ректыны. Продуктыс сiя сэтшöм, кöдö дырсö оз туй видзны. Пешлыштан и кывтö ньылыштан. «Сливянка» шусьö. Инькаэслö только и юны.

— Мужиккес бытьтö и бöрланьö петитасö?

— А нылö кöть помой ведраöн сет, дак примитасö.

Нiя сувтiсö тэль дынö, кытöн быдмисö том пожуммез. Луныс вöлi кымöртöм, шондiа. Рамыник тöлок малалыштлiс зелёнöй турунсö. Гажöна чирскисö кöбывкаэз. Учöтик кушинок вылас быдмисö сякöй цветоккес. Шофёрыс чеччис кабинасис да мунiс лажмытик пожумок дынö и сувтöтiс бутылкасö нöиттöм турун коласас, видзöтыштiс машиналаняс да горöтiс:

— Но дак мый нö тэ, Таисья Фроловна? Лок öтлаö, обедайтыштамö. А то öтнамлö гажтöм!

— Меным жö оз туй, ачыт тöдан, — мугсьöмöн шыасис Тасяыс.

— Эстöн эд некин оз адззыв, немись повны.

— Ме бы и мунi да вот сумкаыс...

— Босьт сьöрат, ежели полан.

То не то Тасяыс петiс кабинасис да нёджжасьöмöн локтiс шофёрыс дынö. Сiя, кöть и эз баит, но мöдiс бы пешлыштны чöскыт винасö и кылiс ни, кыдз горшас пондiс кильöтны.

— А сёйны только кöс чериок, — бутылкасö осьтiкö баитiс шофёрыс. — Извинит, сэсся нем абу. Мийö тай пыр этадз керламö.

— Миян гортын эта жö овлö.

— Ме чериавны любита, — висьтасис шофёрыс, кöр кисьтiс винасö стаканö. — Неважын этö Обва юокись кыйи. Но дак инö тэ понда!

Шофёрыс юыштiс да мöдпöв тыртiс стакансö и сетiс Тасяыслö, думайтыштiс да висьталiс:

— Юышт менам здоровье понда.

Тасяыс чöсмасьöмöн пешлыштiс сук винасö да киас видзыштiс стакансö, кыв вывсис кывзiс чöскыт кöрсö.

— Мый думайтан, юышт ни быдöс, — öдззöтыштiс шофёрыс. — Дугдывлöмнас эд умöльжык юны. Чарöт ни пыдöсöдз!

Таисьяыс, кыдз бытьтö бура юись, кисьтiс öмас винасö да судзöтiс вундалöм черисö, а медбöрья кисьтöмсö сiя юис ни тшöктытöг, сыбöрын нюжöтчис небыт лудок вылас да киэсö тэчис юр увтас, а чужöмсö лöсьöтiс шондi панытас, синнэсö кунис. Шофёрыс видзöтiс-керис сы вылö да тожö водiс бокас. Öт кисö сiя сюйыштiс сы юр увтö, а мöднас пондiс шамравны инькаыслiсь нимöтчытöм няняэсö, пырис ни кофта увтас, пешлiс кынöм вывсис, кыз я сылöн госыс, а сэсся павтыртiс юбкасö...

— Эта бöрын ме мый гортын висьтала? — кофточкасö кизявтöн гусьöн шыасис Тасяыс да видзчисьöмöн видзöтiс зонкаыс вылö.

— Жöникыт, поди, не первöй жö вöлi, — негорöн висьталiс сiя.

— Сiя то сiдз, но...

— Вот и чöв, не учöт кага. Сылö оз ков тöдны. Вежöртiн?

— Ме то вежöртi, да ачыт эн висьтась. Кывсяс кö, дак умöль лоас.

Эта вылын и решитiсö. Одзланься туйторсö перво мунiсö шытöг, думайтiсö керöмыс йылiсь, но сэсся эзö вермö терпитны и пондiсö вились баитны. Лоисö кыдз важын ни тöдса морттэз. Нiя локтiсö местаас, и туй керись отирыс нем эзö казялö, лишь бы вöлi деньгаыс, а мöдiкö эзö думайтö.

И нiя пондiсö пантасьлыны, кöр жöникыс вöлi командировкаын. Но... бöбалiсь каньыс пö сёравно шедö, нылöн любитöмыс шедiс отирыс кыв вылö. Басниэс локтiсö и жöникыс дынöдз, кöда пондiс дзескöтлыны иньсö, кöр юас винасö. Сэк сiя вöвлi пизьöтöм ва кодь, кутчисис тышкасьны, видчыны да юасьны, вашöтлiс гортсис, и Таисьяыс узьлiс соседкаэс ордын. Оланыс лоис умöль, тшыксис. Öтпырись иньсö ойбыт пукöтiс стул вылын да юасис, кинкöт ветлöтö, но Таисьяыс нем эз висьтав.

— Керкусис дыв вашöта! — чанöтiс-горöтлiс жöникыс да мöртiс пуртсö пызан пöлас. — Вия, ежели он висьтав! Тэнат оланыт вот эта пурт йылын öшалö! Нылочкаö пöртчин, öтiк мужикыс оз тырмы? Томжыкöсь колöны?! Öнi вöлись вежöртi, кытшöм тэ вöлöмыт! Совестьтö öштiн! Тэ кодь мортсö колö только вийны, медбы эн мешайтчы! Или висьталан шашняэтö, или жö оланнат прошшайтчы. Бöрйы, кöдыс донажык.

Иньыс пукалiс чöлöмöн. Синваэс дугдiсö ни петны, и сiя дугдывтöг видзöтiс пемыт угöлас, кыдз бытьтö сэтчин вöлiсö одзза луннэс да шальнöя любитöмыс. Жöникыслöн горöтлöмыс сылö эз павк, эз вöрзьöт ловсö. «Янсöтчыны и только, — думайтiс сiя. — Эстöн бурсö нем ог адззыв. Вермас эд вийны. Мый тэ сылiсь босьтан? Коля быдöс и муна». Мылаыс сылöн кöсöдз ни бырис, а асывнас колiс мунны уджавны. Узьтöм ойсянь чужöмбаныс лоис чукöрасьöм, киэс öшалiсö, кыдз плеттез, коккес чуклясисö. Сiя локтiс аслас кабинетокö да пöрöмöн лэдзчисис пызан саяс. Сылö мыччасис, что быдöнныс лоисö öткодьöсь, некинлö сы дынöдз и дело абу. Но Тасяыс сорасис. Кынымкö минута бöртi сы дынö пырис инженер Надежда Георгиевна да повзьöмöн пондiс юасьны, мый сыкöт лоис? И ковсис висьтавны быдöс, кыдз вöлi ойнас.

— Сiя жö коммунист, — возмущайтчис инженерыс. — Кыдз позьö мортыс вылын тешитчыны? Талун жö ветла горкомас, ась корласö сэтчин.

Локтан рытыс нем бурсö эз кöсйы. Жöникыс локтiс код да ящикись кыскис пистолет, кöдö сетiсö обществосяняс, и лöга юалiс:

— Дак мый, норасьны пондiн? Верман керны мый тэныт колö, а часöт пуксьы да гиж расписка, что керкусис öткажитчан и пайсö он понды корны.

— Кыдз жö сiдз? — шыасис Таисьяыс. — Кин мынтiс ссудасö? Кредит сьöртi неби приёмниксö...

— Ассит пайтö тэ тöдан кытчö пуктiн? Вот сэтiсь и босьт. Гиж, а то басниыс тэкöт лоас дженыт.

Пистолетыс дуло увтын Таисьяыс гижис, кыдз тшöктiс жöникыс и, кöр сiя босьтiс бумажкасö, лöга висьталiс: «Öнi верман мунны нёльнан ладорас, ог видз. И медбы керку дынас дукыт эз вöв».

Таисьяыс сьöрас босьтiс только ольпасёксö, кöртовöй койкасö, ванна и кык ведра да сiйöнсорöн мунiс подружкаыс дынö. Мымдакö олiс сэтчин да вывтсö немöн лоис вежны. Бöра ковсис ветлыны гортас. Вöлi шоныт рыт, и отирыс тэрмасисö удж бöрас шедны асланыс поззэзö. Таисьяыс мунiс и думайтiс, кыдз талун пондас баитны кольöм жöникыскöт. Мöдiс керны бы мирнöя, шумиттöг, но эз тöд, кыдз сiйö панталас. Мунiс, кыдз оськöввесö лыддис, гусьöника видзöтчис улицаас. Тэрмасьтöг кайыштiс посöдзас да полöмöн стукнитыштiс ыбöсас и пырис керкуас. Кöзяиныс дзарнитiс ыбöсланяс и сувтiс осьта öмнас. Сiя эз видзчись иньсö.

— Мый, эн чайт пантавны менö? — полöмöнмоз юалiс Таисьяыс да мыкталöмöн содтiс, — сэк здорово инö.

— Здо-орово, — жагöна висьталiс кöзяиныс.

— Ме вот паськöмоккезла локтi.

— Абу тай жаль, верман нуöтны.

Таисьяыс несмела локтiс шифоньерыс дынö, дрöжитан киэзнас осьтiс ыбöсоксö и дивуйтчöмöн видзöтiс куш öшаланоккес вылö. Усьöм шыöн сiя юалiс:

— Кытöн инö виль платьеэс? А кофтаэс?

— Лешакыс тöдас, — лöга шыасис жöникыс да чеччис местасис и мунiс комас. — Кодувьям эд не öтiкöс вайöтлi, поди, нiя босьтiсö.

— Кыдз жö сiдз? — вериттöг юалiс Таисьяыс и сэтöн жö сы пельшыöдз локтiс, кыдз комас жолькнитiс кöртовöй ящикыс, кöдаын Порозовыс видзлiс пистолетсö. Таисьяыс кватитiс кольччöм паськöммесö да уськöтчис ыбöсас. Почти öтiк кадö, кöр клопнитiс ыбöсыс, керкуас гыпнитiс лыйöм, и пуляыс керис ыбöсас осьта, шутньöвтiс Таисьяыс пель дынöт. Инькаыс оз и тöд, кыдз чеччöвтiс посöдзсис да уськöтчис бокö эта синöн не адззан керку дынiсь.

Кынымкö минута бöртi сiя ышки-пойки пырис квартираас да вынтöг усис койка вылас. Сэтöн куйлiкас юрас вöлi кытшöмкö пустота, нем эз вежöрт. Только шоччисьыштöм бöрас юрсадьыс жагöника пондiс бертны. «Значит, былись мöдiс вийны? — шушкыштiс аслыс. — Но ме эд не воробей, верма ассяням очакывсö видзны. Не быдöс позьö керны коммунистыслö. Ась ме лои умöльöн, но и сылö лоас не буржык. Видзöтамö...»

Ашынас гижис милицияö.