Смев морт

Никита Шöрöмов лыддиссис посадас смев мортöн. Сiя томöн кольччис айтöг и одз велалiс быд удж бердö. Уна отсалiсö этаын пöрись мужиккес, кöднiя коласын Никитаыс пыр бергавлiс. Нiя велöтiсö шоромсö тэчны и додьсö керны, дугасö кöстыны и угöвсö тшупны, кокнитжыка чернас керасьны и пиланас пилитчыны. Пöрись отирыс некöр эз видзö ассиныс мудерсö замок сайын, а старайтчисö сетны томмеслö, медбы нiя одзлань нуöтiсö пондöтöм делосö. Медодз ордчöн олiсь пöрись Öндрейсö велöтiс панны да кыйны ас понда нинкöммез:

— Отирас кöмтöг он пет, — баитiс зонкаыслö соседыс. ― И бырöм нинкöмасö сералöны. Сьöктансö колö пыр видзны свиттялöмöн. Эта делоыс не мудрёнöй, но колана.

Натураыс сьöртi Никитаыс быдмис уджалiсьöн. Уджсис дзугны сiйö нем эз вермы. Любитiс ветлывлыны помеччезö, кытöн унаö велалiс. Отирыс син одзын сiя быдмис, лоис крепытöн да вынаöн. Но локтiс срок, и Никитаыс мунiс служитны армияö. Локтiс гортас и чожа гöтрасис, аслыс строитiс керку. Пондiс уджавны шабашкаэз вылын да юыштлыны вина. И любитiс вермасьны, кин тöдö унажык да керö буржыка, кинлöн киыс паокжыка ветлö чернас, кыдз шогмö успехыс.

— Шабашкаыс сiйöн бур, что тöдан уджсö керны и деньгасö курмыштны, — велöтöмöн баитiс сiя. — А шудтöм колхозныслö керан-керан мыла быртöдз, а он тöд, кöр конецыс локтас да кин деньгасö мынтас. Бырöм вешьянсис он тöд кöр петан. А шабашка вылас уджалан быдса лунöн и мыдзöмсö он тöд, но деньгасö шедтан мымда тэныт колö. Ловтö верман гажöтыштны.

Никитаыс олiс сералыштлöмöн. Гортас видзис Альма понöс. Неважын чучаыс вöлi пиялöм быдса куча кычаннэз. Кöзяиныс быдтыштiс нiйö и, не чапкыны жö, начкывлiс да жаритöмöн сёйис. Не только ачыс, но и мöдiккезöс вердiс. Кыдзкö пырис сы ордö Яким Коля, кöдалöн сьöрас вöлi бутылка вина.

— Öтнамöлö мыйкö оз тöр, — небрежнöя висьталiс сiя. — Петалышта, мыся, тэ ордöдз. Кыкöн гажажыка кылалас.

— Делосö бурö керин, — радувьяс шынньöвтiс Никитаыс и видзöтiс керку пытшксö да горöтыштiс инькаыслö: — Ноко, Марфушка, пызан вылас вай жаритöм барсучоккезтö. Натьтö, стрась ни бура пöжсисö. Сосуноккеслö уна ли колö?

Яким Коляыс отирыссянь кывлiс, что барсук яйсö сёйны колö нылö, кöдна шогалöны туберкулёзöн, но адззöны не быд костаö. Кысь сiйö Никитаыс судзöтiс? Мöдiс юавны, но эз лысьт. Никитаыс эз любит унасö баитны, а унажыксö керис. Сыкöт позис только согласитчыны. Кöр Никитаыс тшöктiс вешшыны пызан саяс, дружокыс шысеттöг чожа пуксис бокас да сувтöтiс бутылкасö пызан вылас. Кöзяиныс кисьтiс стопкаэзас.

— Но дак мый? — Никитаыс мигнитыштiс дружокыслö. — Нямыртамö, ноко, пондöтчöмыс понда, ась ен сетас не медбöрьяись. Менам юрö поткöтö-висьö, места ог адззы. Спасибо тэныт, что локтiн.

Винасö юöм бöрсянь нiя кутчисö закуска бердас. Никитаыс ошкис дружокыслö:

— Барсукыслöн яйыс здоровье понда лöсялö. Ме кытчöдз ог шогав, но сёя, медбы здоровжыкöн лоны. А тэ, Коля бытшкы, бытшкы, эн пов.

— Госа и небыт вöлöма барсучинаыс, — закусывайтiкас баитiс дружокыс. — Некытшöм дук ог кыв.

— Кытшöм, поди, дук лоас, кöр нiя вöлись сосуноккез, — кöзяиныс баитiс серöмтчытöг. — Городас син одзам шедiсö, и неби.

— Лöсялас, дак и ме понда босьт, эн вунöт.

— Ладно, друг понда мыйсö он кер.

Никитаыслö бура лöсялiс юр веськöтöмыс. И настроеннёыс лэбтiсис. Сiя недыр мотырасис гортас да решитiс петавны отирыс коласö.

— Кытчö бöра шатöвтан? — мöдiс панöвтны инькаыс.

— Грех эттшöм лунас гортын пукавны.

— Мун, да бöра алям кодь лок.

— А этö кыдз уж ен шуас.

Никитаыс жагвыв иньдöтчис посадас. Сулалiс гажа тулысся лун. Шондiыс жалейттöг козьналiс муыслö ассис югöрресö, вашöтiс логгезö кольччöм медбöрья лыммесö. Ваыс пырис аслас береггезö, но вöлi эшö визыв да вына. Неыджыт расок весьтöт, кöда быдмис посад бокас, лэбалiсö уткаэз. Никита эз тöд кытчö воштыны этö лунсö, и этасянь жагöника оськалiс косьмöм ни, подöн ветлöтан туёк кузя, кадiсь кадö видзöтыштлiс кымöртöм небо вылас и ас пондаас думайтiс: «Сибöтчö ни кадыс, кöр отирыс пондасö строитчыны. Шабашникыслö лоас паськытiныс бöрйисьны. Кутчисьны бы вот ыджытжык керку лэбтыны. И деньгасö позяс курмыштны».

Туёкыс петкöтiс сiйö мельница дынö, кöда бердын вöлi пос, и сы вылын пукалiсö мужиккез да тшынйисö-куритiсö. Никитаыс кежис ны дынö и кашельтыштас да гажöна горöтчис:

— Мый тöждiсятö, мужиккез, кытшöм сэтшöм дума видзат?

— Вот баитчамö тай, кыдз кöдзан кадсö чулöтны.

— Адззöмась мый понда беспокоитчыны. Правленнёас начальник вылын начальник пукалö да начальникöн вашöтлö. Нылöн ась юрныс висьö, а колхозникыслö мый висьталасö, сiйö и керас. Сылiсь жö кывсö орöтiсö, да и озö кывзö.

— Сiя то сiдз, да эд колхозникыс сивилён вылöт быдöс мунö.

— А тiйö простöя — босьтö подряд.

— Босьтiн бы, но кыдз?

— А вот этадз, — Никитаыс видзöтыштiс ва вылö, кöда перыта мунiс шлюзöттяс, думайтыштiс да висьталiс, — вот ме чеччöвта ваас, но меным гижö бумажка, мый пондас эта сулавны?

— Былись уськöтчан? — юалiс шöрöт мыгöра Прокопий.

— Ассим кыввесö тöв вылас ог чапкав, — бергöтчыштiс сы дынö Никитаыс да видзöтыштiс сылö паныт.

— Давай сэк киись киö сöтамö. Ме сувтöта бутылка.

— Лöсялас, — думайттöг согласитчис Никитаыс, — но только бöбöтчытöг... не кыдз колхозас. Кин торйöтас?

— Давай ме, — чепöссис ны дынö шадра Еремей да торйöтiс киэзнысö. — Быдöнныт адззылiтö? Ме медодзза свидетель.

Прокопийыс ыстiс ассис дружоксö магазинö, а Никитаыс локтiс пос дорас да сералöмöн пернапасалiс кымöссö. Ваыс шумтöг, но лöга мунiс шлюзöттяс, вöлi эшö гудыра и повзьöтiс мортсö. Никитаыс мöдiс бöр керсьыны, думайтыштiс и оськöвтiс, но кок увтас эз кыв поспусö. Сылöн вывтырыс öшис пространствоас, вежöртöмыс кусiс. Эта кад торокö сiя, Никитаыс, лэбзис ва дынас. Но кöр стукнитчис вöвдöм пуэз бердас, мöдiс бы видзсьыны кок йылас, да вына ваыс пöрöтiс сiйö, только киэзнас ештiс макнитны. Ваыс шысеттöг Кватитiс сiйö, кыдз бытьтö дернитiс и зэлöтiс шлюз бокас да кыскис увланьö, гублянас.

Пос вылас сулалiссес видзöтiсö Никитасö öммезнысö осьтöмöн да видзчисисö, мый лоас одзлань. Вот сылöн вывтырыс бергöтчис, зэгнитчис да сувтiс шлюз бердас. Мужиккес казялiсö, что сылöн курткаыс кышасис мыйкö бердö. Никитаыс пондылiс мездöтчыны, но нем эз вермы керны. Сэк мужиккес кинитчисö сы дынö отсавны, мездöтiсö да кыскисö шлюз вылас. Никитаыс вöлi садьтöм. Сэтöн жö керисö искусственнöй дыханнё, и сiя осьтiс гудыра синнэсö. Эта момент кежö локтiс и Прокопийыслöн ыстöм мортыс. Му вылас куйлiсьыслö öмас кисьтiсö винасö, и сiя висьталiс, что чушыктыны öддьöн сьöкыт.

— Кутö, ноко, кытшöмкö доддя вöв или машина, — горöтiс Еремейыс да пуксис Никитаыс бокö. — Мортсö больницаö колö кайöтны.

Больницасис врачыс видзöтiс да кывзiс Никитасö и медодз тшöктiс желудоксö весöтны. Шогалiсьсö юкталiсö кытшöмкö ваöн, кöда бöрсянь кынöмсö орлавтöдз öсöтiс, но кокнитжыкыс эз ло — эз понды и ойнас узьны. Быд лун бöртi лоис умöльжык. «Конец ни локтö, тыдалö, — куйлiкас думайтiс Никитаыс, — А ме эд эшö и нёль десятоксö эг ов. Инькаö кольччас öтнас челядьыскöт. Но ладно, кыдзкö олас. Не сiя первöй. Челядьыс вот жальöсь кольччасö. Айтöг сьöкыт лоас».

Зубытыс орлалiс, летiс-вотiс морос пытшксö. Öтiк ойö сэтчöдз вайöтiс, что мылаыс бырис кöсöдз, и сiя öдва кыссис туалетöдз, пуксис сэтчинiсь öшын подушка вылас и решитчис...

Только асывнас шогалiссес казясисö да лэбтiсö шумсö, джагöтчöм пö, но вöлi сёр ни — вывтырыс эз ни кöстась.