Мама-ныла

Кöр лэбис войнаыс, Зоя Шицына мунiс заводö и корсис примитны кытшöм-нибудь уджö. Сылö эз откажитö, сiдз кыдз уна уджалiссес мунiсö воюйтны. Сувтöтiсö слесарьöн. Пожваас сэк уна инькаэс локтiсö заводас да уджалiсö жöниккезныс туйö, думайтiсö чожажык вермыны врагсö. Мужиккес фронт вылын, а инькаэс мырсисö заводас. А Зояыс важын ни вöлi öткаса и только сэк, кöр лоис öддьöн сьöкыт, кутчисис слесаритны. Да и нянь вылас карточкаэз лöсьöтiсö. Уджалiсьыслöн паёкыс сё жö вöлi ыджытжык.

Зояыслö сэк мунiс только кыкдас витöт год. Айсö вийлiсö чочкоммес эшö дас öкмысöт годö, кыдз коммунистöс. Алексей Фёдорович Шицын Пожваас памятник вылын гижöм медодзас.

— Айыт вöлi коммунистöн, а тэ мыля бокын, — висьталiс кыдзкö Сиротиныс, кöда уджалiс партийнöй организацияас секретарьöн. — Гижышт-ко заявленнё да пырав ме дынö.

— Думайтышта да вöлись.

— Сэтöн нем думайтны. Эмöсь коммунисттэс, кöднiя и айтö тöдiсö. Да и война мунö, колö лоны коммунистöн.

Секретарь лöсьöтiс быдöс документтэсö, и собраннё вылын Зоясö примитiсö кандидатöн, а год чулалöм бöрын лоис коммунистöн.

— Öнi ло настоящöй партиецöн, — шуис Сиротиныс. — Медбы отирас нем сэтшöмсö эзö баитö.

— Но ме жö том и верма пезьдыны?

— Пезьдан дак, лöга юаламö, — серöмтчис секретарьыс. Сиротиныс эз ешты баитыштны, кыдз Зояыс бергöтчис да петiс кабинетсис. «Меным колö кага вайны, а сiя гардö аслыс, — думайтiс сiя мунiкас. — Да и ме не монашка. Мортыс ловья и том, кöдалö мужикыс колö. Сиротиныслö мый, сылöн инька бокас, а менö тшöктö видзсьыны. Кыдз бы не сiдз. Олансис босьта, мый меным колö. Не поп эд, грехсö сылö ог сет. Тырмас и сiя, что бура уджала, Почётнöй грамотаэз сетöны».

Олiс сiя öтнас гажа, югыт керкуокын, сiйö видзис сöстöма, шоныта. Любитiс порядок. Рыттэзнас любитiс гöрдззисьны. Ачыс серöтiс öшыннэзас басöк занавескаэз. Сы ордö вовлiсö подружкаэс, кöднакöт уджалiс заводас. Вайöтлiсö и ассиныс сьöлöмшöррезнысö, кöднакöт орслiсö картiэзöн, ворожитчисö да орсöтчисö. Керлiсö и просто гажöтчан рытоккез, касьтывлiсö одзза олансö, кöр нысся пöрисьжыккес гуляйтлiсö. Öтiк сэтшöм рытö Зояыс тöдсасис не том ни зонкакöт, кöдiя уджалiс тожö заводас. И нiя пантасьлiсö быд рытö, радейтiсö öтамöднысö и локтiсö сэтчöдз, что Зояыслö ковсис петны декретнöй отпускö. Сьöкыт вöлi, но войнаыс чулалiс ни. Бура уджалöмыс понда сылöн нимыс вöлi гижöма заводсис Почёт книгаö, вöлiсö уна грамотаэз. Зоясö наградитiсö доблестнöя уджалöм понда медальöн. Но медбур награданас лоис нылыс, кöдö вайис колана срокö. Керкуас пондiс кывны челядь шы. Ковсис вайöтны вöдитчисьöс, медбы аслыс уджавны.

— Шицына, организуйт бригада и ветлы колхозö отсасьны, — висьталiс арнас Сиротиныс. — Бöрйы аслыт крепыт нывкаэзöс и мыччав, кытшöмöсь заводас уджалiссез. Сюсö вартны пö отирыс оз тырмы.

— Война костас пыр отсалiмö и öнi ветламö, — согласитчис Зояыс да баитчис подружкаэскöт ветлыны колхозас, а заводас эта кадö сiдз жö мынтiсö деньгасö.

Сюсö вартiсö «Очёркаöн», а приводыс вöлi öтöрас, бергöтiсö вöввезöн: Зоя мöдiс вуджны осьсö, кöда бергöтiс машинасис ыджыт колесосö, но шумас да бусас эз казяв öтлаöтан кулаккезсö и юбканас кышасис ны бердö да каттисис. Сiйö кынымиськö бергöтiс-жекйис, и только сэк, кöр сюйисьыс тапкис барабанас быдса кольта, машинаыс падмiс да сувтiс. Вартiссес кинитчисö сы дынö, но вöлi сёр ни ― Зояыслöн коккес вöлiсö не öтiклаöт чеглалöмöсь, ачыс куйлiс шысеттöг, юрсадьтöг. Только телегаöн нуöттöнняс сiя пондiс кывны зубытсö да быд гöпокын трекнитöм бöрын ойзiс. Коскаэс зыртчисö, и вöлi сэтшöм зубыт, эз позь терпитны. Пожвинскöй больницаас керисö не öтiк операция, медбы сувтöтны кокйылас. Сiя жагöна веськалiс, но ветлöтны сiдз и эз вермы. Заводсис мастеррес лöсьöтiсö коляска и вайисö сылö гортас. Уджавны, кыдз одзжык, эз ни вермы.

— Весись пукавны гортын эшö сьöкытжык, — баитiс сiя Сиротиныслö. — Ме бы кöть инструментальщицöн верми уджавны заводас.

— Коммунистöс огö чапкö, — висьталiс секретарьыс. — Кошшамö тэ понда кытшöмкö кокнитжык удж. Юöртамö.

Эшö сизим год сiя уджалiс заводас, кöр ачыс кыссяс, кöр отирыс отсаласö. Пукавны позис инструменталкаас, кöть и вöлi инвалид мöдöдз группа сьöртi. Но кадыс чулалiс, и етшыс öшис. Нельки пукавтöнняс пондiс мыдзны. Керисö виль комиссия и петкöтiсö первöй группаö. Сэксянь и пондiс овны гортас, нывсö дозирайтны, кöда велöтчис ни школаын. Кынымкö год бöртi нылыс кончитiс öкмысöт класс да пондiс корсьыны Перемö велöтчыны техническöй училищеын, мыйись мамыс эз вермы откажитны.

Этаöдз гортас Ленаыс пондiс тöдчыны сы кодь жö нылочкакöт, кöдалöн мамыс кокнита асьсö видзис, и нылыс йылiсь ни мунiсö басниэз, что и сiя сэтшöм жö. Нiя часто ветлывлiсö клубö. Öтпыр кытöн подружкаыс мыччалiс ассис стильнöй танецсö, Ленаыс эз терпит сылiсь пиньласьöмсö и корис сiйö öтöрас да клёпкис пельбокас.

— Мый понда, Ленка? — эз вежöрт подружкаыс и юалiс сылiсь öбидитчöмöн да оськöвтыштiс бöрланьö.

— Эшö етша стилягалö? — лöга юалiс Ленаыс да бöра сибöтчис сы дынö. — Верма содтыны. Годдэс тэныт дас квать, а зонкаэс одзын каджтö пиньлалан. Кыдз абу стыдыс? Или тэ ныкöт бергалан ни? Шуры-муры ныкöт керан? Часöт жö висьтав.

— Мый только юрат пырас, — негорöн шыасис подружкаыс да мугсьöма öшöтiс юрсö. Ме просто сiдз гажöтча. Ме жö тэнö гортöдззат кольлавла, ачыт тöдан. Ог тай некинкöт кыскась.

— Сiдз то сiдз, — сомневайтчыштiс Ленаыс, — но эд менам керкуыс матын клубыс дынсянь, а сыбöрын тэ верман бертны сэтчин.

— Верит, Лена, сэтшöмсö нем ог кер. Висьтала тэныт, кыдз енлö.

— Ладно, верита, кытчöдз ачым эг адззыв. Но пырамö.

Нiя бертiсö клубас, и рытывбыт нывкаыс танцуйтiс отирыс моз жö, а сэсся Ленаыс кольлалiс сiйö гортöдззас. Сьöлöмыс вöлись бурмис. Гортсис оз лысьт петны. «А мый тэ сылiсь босьтан? — думайтiс Ленаыс гожумся рытнас улицаöттяс мунтöн. — Вермас эта кадö хахальыскöт нюжласьны. Кин тöдö? Нывкасö керкуас оз лэдзö, и кытчö сылö воштiсьны? Колас юасьны, мый тöдö сiя ветлöтöм йывсис».

Ашынас Ленаыс лякасис подружкаыс дынö аслас юасьöмöн, а мöдыс некыдз эз вермы мездöтчыны и висьталiс:

— Вот мый, Лена, небамö бутылка, мунамö посёлок саяс во-он сэтчин тэлляс, и ме висьтала тэныт быдöс секретсö. Вежöртiн?

— Кылi, не вукöй.

Луныс лöсялiс гажа. Важ пруд вылiсь вайöтiс ыркыток. Ротанка юокыс, кöдö вуджисö, котöртiс гусьöн, вöлi сöстöм. Заводсис шумыс кольччис бöраныс. Кык подружка кайисö керöс вылö. Эстöн чуть тöдчана тöлокыс малалiс нылiсь чужöммезнысö. Ны син одзын оссис прудыслöн волькытiныс, кöда шондi югöррес увтын орсiс поснит ваныррезнас. Подружкаыс эшö невна муныштiс да пыртiс тэлляс и пуксис кöз увтö, кытöн туруныс вöлi нöитöма.

— Лэдзчись бокам, — висьталiс Ленаыслö. — Эстöн керамö привал, шоччисьыштамö да бутылкасис пешламö. Эта винаыс чöскыт.

— Пешлiн ни разь?

— Кöрсö эг бы тöд, эг и баит.

— Бытьтö и винасö ювлан ни?

— Сысянь быдöс и пондöтчис...

— Но дак висьтась инö.

— Норовит, перво юыштамö, а то кыввес озö адззисьö. Нылöн сьöраныс вöлi стакан, кöдаö подружкаыс кисьтiс джынняс да горша юис, чышкыштiс öмсö ки бöрнас, малыштiс кывнас тырппесö и думайтöмöн висьталiс: — Чöскыт заразаыт. — Сiя мöдпöв содтiс стаканас винасö, сетiс Ленаыслö. ― Эстöн асланым клубыс, чарöт ноко. Да эн пов, нем оз ло, а гажыс содас, лолытлö долытжык лоас.

Ленаыс пешлыштiс невна, и кыв вылас кылiс слива кöр, сэсся пондiс чöсмасьны. Подружкаыс видзöтiс-керис да сьöлöмсяняс висьталiс, кыдз велöтiсь:

— Винасö колö юны шоччисьтöг, не чöсмасьöмöн, а то чожа коддзан. Öтiк гульк кер — и быдöс.

Бутылкасис чожа бырсис. Нывкаэс пукалыштiсö кöз увтас, бöбалыштiсö челядь моз да тарöвтчисö вуджöрас, небыт турунок вылас и лöньсьыштiсö. Сэсся Ленаыс юалiс:

— Но дак кыдз зонкаэскöт олан?

Роза невна висьтасьыштiс мамыс йылiсь, а сэсся и ас йывсис:

— ...Мамö сэк кодувьяс горöтiс: «Мый тэ, кöбыла, зонкасö мучитан, не сахарись керöмыт, он сыв. Цаца кытшöм адззисьöмыт. Гленитчатö öтамöднытлö и мунö син одзись, а мийö Ильяыскöт эстöн гажöтчыштамö». Сэк лои вот эта самöй местаын.

— Но и кыдз? — интересуйтчис Ленаыс.

— Простöйжыкыс нем абу, кыдз пуртöн ки тай чуть вундыштан. Сэсся öддьöн гленитчис — наслажденнё! Перво ме тöдi только öтiкöс, а сэсся лоисö и мöдiккез. Медодззаыс, думайтi, лоас менö дорйисьöн, но сыбöрын вежöртi, что быдöс эта вунöтсьö, чулалö. О, мымда вöлiсö весись полöммес да тöждiсьöмыс... И ме макнитi кинам. Öнi тöда только наслаждайтчыны. А пöрисьман — и кельдан, кыдз цветок, кöда некинлö оз ков. Быд зонкаын адззан мыйкö да вильö. Том годдэс мортыслö сетсьöны только öтпыр, и эта коста колö кутны быд моментсö, медбы сыбöрын не жалейтны. И ола ме вот сiдз. Босьта быдöс, мый сетö оланыс. Оз ков видзны асьтö осьта öмöн.

— Ме сiдз ог лысьт, подружка.

— А öнi, юыштiн да, эн бы пов?

— Юыштi да öнi вуджи бы подöн паськыт прудсö.

— Но, сэк висьтав, кин тэныт гленитчö?

— Гленитчö? Да Онтоныслöн Глебыс. Сiя пыр ме дын леститчö.

— Зонкаыс ничего, бур, позьö сыкöт матынсьöтчыны. Ме пантасьöмсö кера. Ашын жö. Вот адззылан. Лöсьöтчы.

Нiя дыр баитiсö тöдсасьöм йывсис, узьыштiсö ыркытiнас да вöлись мунiсö горттэзаныс. Ленаыслöн мамыс подозрительнöя видзöтiс нылыс вылö, но шы эз сет. Нылыс мунiс да водiс аслас койка вылö и думайтiс ашынся пантасьöм йылiсь. Мöдiс бы узьны, но эз узьöт. Сылöн сьöлöмыс эшö эз вежöрт, мый лоас одзлань, но кылiс, что оссяс ыбöс виль оланö, кöдаын быдöс вежсяс. Сiя кöсйисис кывзыны подружкасö и кывзас. Мыйлö панытавны желаннёэсö, кöр счастьеыс сэтшöм матын?

Нывкаэс баитчисö пантасьны Ротанка юок дынас, бытьтö больницаö мунтöн.

— А Глебыс кытöн нö? — юалiс Ленаыс, кöр казялiс подружкасö да видзöтыштiс гöгöрöттяс.

— Нiя мунiсö Мишкаыскöт одзлань.

— Менам полöм мыйкö петö.

— Эн ло дуранас! Пемытжык ояс звездаэс сотчöны югытжыка. Миянiсь святöй инькаэс озö петö. Дзелёк моза эн тэчкась. Ло мортöн.

Нiя локтiсö тöння местаас, кытöн пукалiсö ни Глебыс и Мишаыс. Одзаныс сулалiс осьтöм бутылка чочком винаöн. Зонкаэс видзöтiсö нывкаэс вылö.

— Не я джыннялiтö ни? — дивуйтчöмöн юалiс Ленаыслöн подружкаыс.

— Одз кыв тэ, Роза, — шыасис Мишаыс. — Только голюксö осьтiмö тiянöс видзчисьтöн. Пуксьö матöжык, часöт пешламö кöрсö.

Нывкаэс пуксисö. Розаыс висьталiс, кöда ув вылын öшалö стаканыс, и сылöн кавалерыс судзöтiс да креставтöн висьталiс: «Тьфу, тьфу, тьфу, несöстöм выныс ась мунас, а кольччас öтiк спиртыс. Розочка, ноко плеснитышт миянлö. Эта дынö тэ эд мастер».

Нывкаыс босьтiс бутылкасö, сорлалыштiс винасö да стаканас кисьтiкö горöтчис:

— Мöдi не сiдз керны, да мый эттшöм балбессэзкöт керан? Этö тэ, Мишка, нелöсялан шегыс. Сыбöрын колiс юны, да ась ни тэ моза лоас.

Розаыс кисьтiс стаканас джынысся етшажык и юыштiс, нельки эз чукрасьышт, бытьтö эз вöв курыт.

— Ноко, Лена, чарöт, медбы нёбоыслö вöлi жар. Эх, подружка, мыйыс миян оз овлы!

Ленаыс кутiс стакансö, видзыштiс киас мыйкö думайтöмöн да чатыртiс мороссö и дугдывтöг юыштiс, а сэсся кинас öвтыштiс öм дынас сирöн кылан русö.

— Молодчина, Лена, — ошкис Розаыс да шовкöтыштiс киэзнас.

Юисö и зонкаэс. Чочком винасяняс Ленаыс коддзис, и сiйö пондiс кыскыны он вылö. Этö казялiс Розаыс и висьталiс Мишаыслö: «Ветлам, тэльсö видзöтамö. Ась дудiоккес пукаласö кыкöн».

Нiя мунiсö, а Глебыс жмитiс бердас Ленасö да пондiс маласьны, окавны нывкасö, нöитны няняэсö, а сэсся водтöтiс небыт турунас да лöсьöтiс кисö юр увтас... Ленаыс ойкнитiс, а сэсся кутчисис веськыт кинас сы голя бердö...

Сыбöрын нiя пукалiсö шысеттöг. Ленаыс эз лысьт синнэсö лэбтыны зонкаыс вылö, сiйö кутiс стыд.

— Лэбты жö юртö да видзöт гажöнжыка, — висьталiс Глебыс да жмитiс Ленасö косöттяс. — Олан вылас бодрöйжыка видзöт. Не талун дак ашын эттшöмыс лоис бы. А тэ гленитчан меным.

— И ме важын ни тэ вылö видзöтлi, радейта сьöлöмсянь.

— Значит, пондамö пантасьлыны. Эн тöждiсь, Лена! Луныс пöлiньтчис рытланьö. Прудсяняс вайöтiс ыркытокöн. Ны дынö локтiсö Розаыс кавалернас. Подружкаыс сэк жö казялiс и жалейтöмöн горöтчис Ленаыслö:

— Лöньсьы, мый нырнат пишкан. Не кага учöтик. Эстöн пестунняыс только ачыт. Видзöта, кыдз эшö пондан наслаждайтчыны. Ноко чеччы, а то зонкаэс колясö. Талун тэ кыдз невеста, кöдiйö сетöны жöник сайö. Пыркöт юбкатö, эн ло ромозьнас, эн мыччав асьтö. Кин тöдас, мый керин? Сьöкыт пондöтчыны, а сэсся кыдз волькыт туй вылöт мунан. Видзсьы, Ленка, быдöс лоас бур.

Зонкаэс мунiсö одзаныс, а нiя жагöника оськалiсö бöрсяняс. Лэдзчисö керöс увтас, локтiсö пруд дорас да пуксисö пöрöм мыр вылö. Локтiссесö пуксьöтiсö боканыс.

— Ленаыс менам лоис золотöй тусьöн, — нывкасö малалiкö горöтчис Глебыс. — Берегитны понда сiйö.

— Мун жö, — жмитыштiс пельпоннэсö нывкаыс. — Отирыс дырни кöть эн ыжмав. Видзöт, чериэс чеччалöны.

— Тэ эд ны кодь жö. Пыр чеччалiн да öнi менам лоин.

— Висьталан тожö. Ме только ачым и аслам. Ленаыслöн мамыс сiдз и эз вермы ветлöтны. Гортас ысласис коляскаöн. Сiя инька сьöлöмнас кылiс, что нылыскöт мыйкö керсьö, и сiя жö рытö юалiс:

— Леночка, мый лоис? Тэнö бытьтö вежисö. Гортö пыран шатласьöмöн. Юны ли мый ли пондiн?

— Кытшöм тэныт дело? — эрöстiс нылыс. — Тэнчит тай ог вöрöт.

— Нёльдас сизим рубсис? Видзан, дак тшыгйöн кольччамö. Быд рубыс миянлö дона. Адззан, уджавны эг понды вермыны. Быдöс надеяыс только тэ вылö. Ыджыт ни эдö. Юрсадьтö колö видзны.

— Пондiс няргыны, — лöгöн висьталiс нылыс. — Кай да нюжöтчы койка вылат. Тэнат делоыт сымда и эм. Ме вылын керкуыс öшшö, кера тай мый колö, спасибо висьтав. Сёйны ваяла, и эн няргы.

— Быдтi жö нывсö аслам юр вылö, — мамыс пондiс горзыны да коляскасö тарöвтiс койка дынас. — Мый то керан, эг понды вермыны да.

— Гуляйтiн пöттöдззат, а öнi меным сет кадсö, — мамыс вылö видзöттöг шыасис нылыс. — Ме бы тожö олышта.

Мамыс, первöй группалöн инвалид, эз кутчись паныт. Сiя вежöртiс, что нылыс лоис некывзiсь, и, пожалуй, нем сысянь бурсö видзчисьны. Сьöлöмас вöлi сьöкыт. Синваэс тыртiсö синнэсö. Сiя шысеттöг кыссис койка вылас да тупыльтчис ольпасяс, каттисис да бергöтчис стенаыс ладорö. Сьöкытсяняс лолыс потласис, чушыктыны лоис немöн. «Кувны бы чожажык, — думайтiс сiя. — Менам син сайын бы ась красуйтчис. Но мыля менö вунöтiсö? Нельки Сиротиныс оз вовлы. Вот и коммунист. Не вöвсö, не тракторсö эзö сетö, кöть и кори. Кöр уджалан, сэк бур, а дугдан — сэк некинлö он ков».

Зояыс öнi эз понды тöдны, мый керсьö заводас. Кытшöмöсь партсобраннё вылас примитöны решеннёэз да кыдз нiйö тыртöны. Обидасяняс эшö ёнажык петiсö синваэс. Незаботливöй лоис отирыс. Быд морт думайтö только ас пондас, мöдiклiсь оз верит нуждасö. Мый нö йöзыс керö да кытчö мунö? Вот и нылыс пондiс мунны паныт. Адззан ли, быдöс сiя тöдö да кужö. Эта оланiсь только кувны ни кольччис.

А Ленаыс пукалыштiс öшын дынас да кушым-кашым петiс öтöрас и тэрмасьтöг иньдöтчис заводскöй клубö, кытöн быд рытö öксьывлiс том йöзыс. Сэтчин и пантасис Глебыскöт.

Öтпырись Ленаыс, сiдз лöсялiс туйыс, пырис Öгаш ордö, кöда лэдзлiс гортас гуляйтiсь том отирсö, сетлiс нылö торья комнатаок, кытöн позис орсны любитöмнас. Но кинкö адззылöма, и ашынас жö нывкасö корисö поссоветö и пондiсö юасьны, мыйлö сэтчö пыралiс.

— Беспутствосö посёлокас некинлö ог сет керны, — лöгöн рявзiс председательыс. — Публичнöй керку адззöмыт! Кöть бы дедытлiсь нимсö тöдвылат видзин. Да и мамыт заводас вöлi одзын мунiсь. Увтыртö ассит позоритан. Антикоммунизм керан? Колас мамыт дынö ветлыны. Бур быдмö нылокыс! Öгашыс ордö пыравлöны только проституткаэз!

— Иван Павлович, ме жö пыралi только öтпыр, — Ленаыслöн гöрдöтiс чужöмбаныс. — Ме жö эг тöд Öгашсö. Сэтчин вежöртi, что сiя öтлаöтлö томмесö. Ог сэсся пыр,

— Но дак гиж расписка. Босьт бумагасö и гиж. Ленаыс чикрасьыштiс, но гижис, что некöр оз пыр Öгашыс ордö. Сылöн дрöжитiсö киэс, ачыс пымалiс. Кымöсас петiс ньылöмыс, лэдзчис синнэзас, курöтiс.

— Вот, кыдз кужи, сiдз и гижи, — норöна горöтчис сiя да сетiс бумажкасö председательыслö.

Мöдыс босьтiс, видзöтiс нывкаыс вылö да жагöника висьталiс;

— Но эн вунöт, кöр эшö адззыласö пырöмсö, то сiдз и тöд, что тэнö ыстамö посёлоксис.

«Гожумнас пантасьны позьö кöть кытöн, — поссоветсис мунтöн думайтiс Ленаыс, — а вот тöлыс локтас, и кытчö мунан? Ладно клубас позяс адззисьлыны — и только. Но эта жö етша. И гортö оз туй вайöтны. Вот оказияыс».

Аслас полöм йылiсь рытнас жö висьталiс Глебыслö, кöда думайтыштöм бöрын висьталiс: «Тöлöдззас погоддяыс эшö неöтпыр вежсьывлас. Лоас кад и лоас места, нем тöждыны».

А Зояыс казясис, что нылыс нач вельмис, быд рытö петö шатласьны, и гусьöн баитiс инькаэскöт, тшöктiс заводсяняс ыстыны училищеö. И лун-мöд бöртi вайисö бумагасö.

— Дак вот, — решительнöя висьталiс нылыслö, — мунан велöтчыны профессиональнöй училищеö. Тырмас тэныт вольничайтны. Менам вирö ни кусö, кöр тэ уджтöг ветлöтан посёлокöттяс.

— Ыстан дак муна, — покорнöя шыасис нылыс. — Ветла да городсö кöть адззыла, отирсö видзöта и ачымöс мыччала.

Сiдз Ленаыс сюрис Перемö. Медодзза луннэзас, кытчöдз вöлi мамнас сетöм деньгаыс, овсис кокнита, но дырсö нiя эзö тырмö. Нывкаыс эз куж нiйö видзны. Оланыс лоис сьöкыт, няньсö немöн небны, и сёяныс абу. Училищеас вердiсö, но сылö эз тырмы. А сэтöн нывкаэс висьталiсö, что зонкаэс öктöны талун вечеринка и корöны öтлаö. Мыля бы не мунны? Тшыг рытыс чулалас перытжыка. И Ленаыс мунiс öтлаын. Тöдвылас вöлi сiя, что нем ни öштыны, а позяс адззыны кытшöм-нибудь зонкаöс и лöсьöтны сыкöт олансö, а ежели оз лöсяв, дак тöдсасьны мöдiккöт. Кöдöрсянь эд тöлыс пöльтыштас. Сэтöн нем он кер.

Нiя отсалiсö чöвтчыны нывкаэслö да пуксьöтiсö пызан сайö, кöда вылын сулалiсö бутылкаэз, вöлiсö помидоррез да солалöм огуреццез. Зонкаэс сэтöн жö мöртöтiсö синнэзнысö статнöй Ленаыс вылö, кöдалöн мороссэс зэлöтiсö платьесö, сотчисö рожабаннэс да свиттялiсö голубöй синнэс. И нывкаыс повтöг баитiс быд тема вылö, шутитiс и öтлаын сералiс. Зонкаэс лэдзисö радиола и пондiсö танцуйтны. Эшö Пожваас велöтöм стиль сьöртi танцуйтöмыс бура лöсялiс городас. Зонкаэс вермасьöмöн корлiсö сiйö кругас и жмитлiсö ас берданыс, и эта гленитчис Ленаыслö, кöр сiйö малалiсö каджöттяс да зэлöтлiсö морос берданыс. Юöм винаыс бöбтiс юрсö, и Ленаыс гажöтчис усьтöдз. Медбöрын сiя öтiк зонкакöт сюрис торья комнатаö да лоис постелля вылын. И ачыс оз тöд, кыдз чöвтчис ляч кушöдз да нюжласис зонкаыс увтын. Асывланяс вöлись саймис да котöртiс аслас öтласа оланiнö. Этасянь и пондiс нильдыны бокö, быд рытö адззисисö виль друггез, кöднiя гöститöтлiсö винаöн, позис закуситны да гажöтчыны. Зонкаэсö вежлiс, кыдз велосипедiсь чегöм спицаэз. А велöтчöмыс эз пыр юрас, кöда быдсöн вöлi тырöма любитчöм-орсöмнас. Оланыс лоис не велöтчисьлöн, не отирлöн кодь, а мöдiк, вевттьöм пемытöн. Но сэтчö вились мамыс сюйыштiс юрсö, кöда кылöма нылыс йылiсь, гижис сылö, медбы локтiс гортас, сiдз кыдз öтнаслö лоис сьöкыт и колö отсöт.

— Вот кытшöм нелöсялана морт, — бобгис нылыс чемодансö тэчикö. — Сё бы юбка увтас видзö. Нем оз пет, не кага ни.

Гортас пондiс уджавны заводас разметчицаöн. Конструкторскöй бюроын сылö висьталiсö, кыдз колö уджавны, и Ленаыс керис быдöс точнöя. Сы киöн нуöтöм виззез сьöртi газосварщик орлавлiс катеррез понда виль торрез. Сварщикыс öтпырись пондiс бöбалöтчыны нывкаыскöт и личкис Ленасö кöрт штабель бокас. Да и Ленаыс пессьыштiс только сiдз, приличиеыс понда. Штабель сайсис некин эз адззыв. Вöлiсö и мöдiк зонкаэз, но сiдз, боки мунтöн. А вот Алёшкаыс лякасис сы дынö и эз понды мездiсьны, кеймисис гöтрасьны да локны сы дынö овны. Ленаыс веритiс бызикайтöмас да и мунiс öвны сы ордö.

— Вот öктыштамö деньгаок да мунамö татiсь, — баитiс жöникыс, кöр вöлiсö öтнаныс. — Пондамö овны, кыдз миянлö колö.

Но аньнас Ленаыс эз лöсялö. Не том ни инька часто юктавлiс зонсö винаöн да гусьöник висьтавлiс сылö, кытшöм инька сiя вайöтiс, что отирыс сералö. Бытшöм-басöк обличчо вылас, да мывкыдыс кокнит. Алёшкаыс кодувьяс неöтпыр лэбтылiс шумсö, кöритiс инькасö керöмнас и кертöмнас. Ленаыс кывзiс-терпитiс первосянь, а сэсся сьöвзис да мунiс гортас бöр. Однако жöникыс караулитiс сiйö быд угöлын и эз лэдз шаг керны мöдöрö. Öтпырись кодувьяс пуксьöтiс Ленасö мотоцикл вылö да нуöтiс посёлок саяс, да бöр локтöнняс рульсö умöля видзöмсянь нiя пöрисö, и нывкаыслöн кокыс шедiс пым выхлопнöй трубаыс увтö, сотiс сiдз, что колiс ветлöтны только костыллезöн. Алёшкаыс сэк горзiс да кеймисис Ленаыс одзын, медбы локтiс сы дынö, вунöтiс одзза обидитчöмсö и проститас сiйö.

Нывкаыслöн ойыс чулалiс узьтöг. «Неужто менö сiя сiдз любитö? — койка вылас куйлiкö думайтiс Ленаыс. — И вообще, эм ли любитöмыс? Вот нылочкаэс баитöны, что эм, но мыля сэк вежöны кавалерресö? Значит, мыйкö оз гленитчы. Мыйкö, значит, оз тырмы. Зонкаэс кужöны маласьны, и кöр нылö колö, öддьöн ласковöсь да нежнöйöсь, но кыдз только керасö ассиныс, сэк жö вунöтöны сетöм клятвасö. Кыдз нылö эта бöрсянь веритны? Кытшöм вермас лоны басни любитöмыс йылiсь, кöр керöны только аслыныс удовольствиесö? Зонкаэс озö думайтö нывкаыс йылiсь, нылö колö только вывтырсö, медбы паньыштны долытоксö, а сэсся кöть ась туруныс оз быдмы. Нывкаэс лоöны кыдз заэз, кöдналiсь нетшкöвтiсö цветоксö и нöитiсö листтэсö, некин нiйö оз жалейт. Только важ романнэзын гижсьö сöстöм любитöмыс йылiсь, а миян оланас любитöмсö вежисö öтiк лунся занятиеö. Кöть и босьтны ачымöс. Мый меным сетiс жöник сайö петöмыс? Чеччöвтi, кыдз юкмöсö. А толкыс? Алёшкаыс дынö некытшöм любитöм эг кыв. Думайтi только öтлаын узьлыны да тöвсö чулöтны. А вот Алёшкаыс былись эд, тыдалö, любитö. Мыйлö бы сэк менö видзчисьны, кольлавны, гортöдз вайöтны и эшö окавны? Значит, любитö. А мый кера ме? Кöть и адзза, кыдз сiя тöждö, а немöн ог кокньöт тöждöмсö. Кытшöм жö ме морт? Он ло эдö счастливöйнас, кöр ордчöн мöдiк мортыс тöждö. Ме лои кыдз тормозтöм машина, кöда тарöвтчö керöс увтас и оз тöд, мый сэтчин лоас. Вермас петны и авария. Не весись жö мамöлöн важся подружкаыс баитö, что оланыс кузь и сы йылiсь колö думайтны томсянь. Да и цехсис начальникыс сiйö жö тотьö. Мывкыдöс колас вежны. Öнöдз только бöбалi, а колö овны».

Ашынас ны ордö бöра локтiс Алёшкаыс, и Ленаыс эз понды пыксьыны, жагöника пуксис сы драндулет вылö, и нiя мунiсö аньыс ордö.