Шабашка

Сiдз уж пондiсö овны, что деревняас эз кольччы нельки öтiк вöв. Колхознас öнняся веськöтлiссес вöввэсö сетiсö колбаса вылö, медбы отирсö вердны.

— Мыйлö миянлö вöввес, — баитiсö нiя, — кöр машинаэз эмöсь. Индустриализациялöн векыс! Тырмас кöркöся сабаннас гöрны. Вильмоз пондамö овны! Миянлö оссьö мича да гажа ылынiныс.

А колхозникыслö мый? Сылö бы этадз бур и сiдз лöсялiс. Сьöлöмыс висьö не уджалöмыс понда, кыдз бы ловсö гажöтыштны да мыйöн юрсö кольмöтны, кöдаöн озö тшöктö думайтны. Правленнёас лоис кыдз мош рой, некöда дынö оз туй локны — нырнаныс пишкöны, мыйкö гижöны, а то лэбтасö юрнысö да сувтöтасö синнэзнысö потолокас и часöн думайтöны. Кин тöдас, мый йылiсь. Вермас лоны, сы йылiсь, мед луныс чулалiс бы чожажык, медбы гортаныс мунны. Луннас керöмсö эд некин оз меряйт да лыддьы, некинлö нем оз ков. Некин тай оз юав, кытшöм удж керöм понда деньгасö мынтöны. Нем и баитны, правленнёас бур пызан саяс пукавны. Год костас öтпыр-мöдпыр вашöтласö сэтчинiсь ытшкисьны или сюсö косьтыны, дак этö только ыркöтчöм понда. Председательыс кужö синватöг горзыны, и ыстасö велöтчиссесö нето горожанасö отсавны колхозыслö. Сiдз вот и овлö.

Кöр Чилимчик деревнясис нуöтiсö медбöрья вöвсö, шумыс вöлi чуть ли не тышкасьöмöдз. Зоотехникыс, кöда локтiс нуöтны вöвсö, томыник нывка, пондылiс баитны деревенсаыскöт, но...

— Огородечсö мыйöн пондамö гöрны, — рявзiсö мужиккес и инькаэс. — Пессö тöв кежас немöн вайны! Кулан, дак предыс вешьянiсьöн кыскасö! Деревнясö мöдатö вийны!

— Предыс висьталiс, что тiянлö сетасö трактор, — бурöтiс лöгасьöм отирсö зоотехникыс. — Сылö и туруныс оз ков. Тiйö жö етшаöн кольччит! Мыйлö весь тöждiсьöмсö?

— Дак эд тöждiсьтöг и туруныс оз быдмы.

— Техниканас быдöс керамö, кöдзам и быдмас. Деревенсаыс лöньсисö. Ны коласын вöлi и Степан Стопкин, кöда кытöн ни только эз уджав, да быдлаись вашöтöны винасö юöм понда. Сiя споритны эз кутчись, но шумсö öтлаын керис. Кыдз жö, Степаныс эд деревняас олiс да öтлаын сорласис-уджалiс. Только лякöсь бöжсö мöдiс сайöвтны: кутчылiс школаö, пондылiс милиционерöн, агентöн öктыны налоггез, грузчикöн вöлi сельпоас и городас ветлiс, да некытчö толкыс эз тырмы, а сыбöрын велöтчис трактористö, но дырсö эз уджав — оз пö ков миянлö эттшöм механизаторыс. Вот и пезьдiс бöр деревняас, олö да аскурресö пичкö. Дисциплинасö некин оз кор. Колхозас сы йылiсь озö и баитö. Кынымкö лун бöртi корисö правленнёас и висьталiсö:

— Примит гаражсис колёснöй трактор да рытсö и асывсö пондан фермасис йöв кыскавны. Техникасö верман гортат видзны. А шöммöтан йöвсö, аслат карманiсь мынтан.

Фермаöдззас вöлi кык километр, и Степаныс гöняйтiс сэтчин да кыскалiс йöвсö маслозаводöдз. Перво луннэс кыссисö кузя, мыла кöсöдз бырас рытсö видзчисьтöн, эз тöд, кытчö асьсö воштыны. А вöвлытöм срокас шондiыс сералiс мужиксö и эз тэрмась лэдзчыны аслас позö. Только сэк, кöр луннэс пондiсö тöдчöмöн чинны, деревнясис отирыс тöдвылас уськöтiс механизаторсö. Öтiклö колiс турунок вайны, мöдiклö — вöр, куимöтлö — пес, нёльöтлö — назём кыскыны.

Деревняас Степаныс лоис медвылын фигураöн, кöдö адззисö быдласянь. Но керöм уджыс понда колö мынтiсьны, а мыйöн? Трактористыс висьталiс отирыслö — винаöн, кöть бы кытшöм сiя эз вöв. А путёвкаас кыдз гижан?

— Мыйкö чиркнитыштам, — ыштiс Степаныс. — Правленнёöдззас ылын, а ме мортсö ог обидит. Начальствоыс модззесö кыскалö машинаöн, а ме оланыс понда удж кера. Соляркаыс, слава богу, тырмас.

Кыдзкö сы ордö локтiс не том ни öткаса инька да кеймисис вайны ключ сайись, тэллись керöм турун.

— Эстöн абу ылын, — баитiс сiя, — дыр ли ветламö. А ношанас ылын ваявны да и сьöкыт. Вöлi бы мужикö...

— Кытшöм тöждiсьöм? — серöмтчис Степаныс. — Вот только флягаэсö колö чапкавны телегасис. А-а, дзурскыны лоас?

— Господи, мыля ог адззы... лоас. Неважын керыштi. — Ноко инö петам да тележкасö лöсьöтамö и ветламö. Луныс орсiс. Шондi югöррес киссисö му вылас, руас кылiс чöскыт дук. Степаныс заводитiс тракторсö, и нiя мунiсö Пахомикаыс ордö. Кыкнанныс пукалiсö кабинаас. Инькаыс горт дынын Степаныс кутыштiс лэдзчикас Лизасö да жмитыштiс бердас. Вирыс чавкнитiс рожаас, и думайтсис: «Кытшöм эд сiя кокнит. Вот бы шамыртны». Но сувтöтiс инькасö кок вылас и пырис сьöрсяняс керкуас, кытöн заправитчис кынымкö стопкаöн, но перво тшöктiс юны кöзяйкасö.

— Ноко, ачыт пешлы, мыйöн юктасян, — висьталiс сiя.

— Эн пов, ог смилит, — серöмтчис Лизаыс да юис.

Лöсьöтчöмыс чулалiс недыр. Босьтiсö сьöраныс гез да вилаэз и мунiсö. Степанлöн сьöлöмыс пизис: сiя кадiсь кадö видзöтлiс бокись инька вылö да гусьöна шыннялыштлiс. Кöр локтiсö медодзза турунъюр дынас, трактористыс петiс кабинасис да мöдпöв кутiс инькасö, и нiя лоисö кöс турун бокас. Видзчисьтöг Лизаыс эз понды мугсьыны...

— Ловтö гажöтыштiн и тырмас, серöмтчыштiс инькаыс. — Öнi турунсö колö тэчны. Миянлö эд некин оз отсав.

— Куим юрыс уна ли сiя, часöт керамö, размöд макнитыштамö и готов. Охоткаöн уджсö керамö. Тэ понда быдöс ме кера.

Туруныс вöлi не сiдз уна, и нiя чожа вермисö тэчны да бура кöртавны тележкаэс. Кытшöмкö час бöртi мунiсö да ректiсö турунсö ворота одзас. Кольччис только лэбтавны сараяс.

— Часöт пыраламö да мыйкö кватитыштамö, — висьталiс кöзяйкаыс. Этадз талун уджалiн. Садьыт, натьтö, эд бырис?

— Мужикыслö эта только орсыштны, — дышöтчöмöн горöтчис Степаныс да чышкыштiс ныр увтсö. — А пыравны колiс бы. Горш кöтöтны неумöль бы вöлi. А?

— Лок да шоччись.

Кöзяйкаыс лöсьöтiс пызан вылас и пуксьöтiс трактористсö. Сувтöтiс и добрöя керöм аскурсö. Степаныс кынымиськö паньыштiс горын пуöм шыд, ньылыштiс уль кольть, а стаканö кисьтöм винасö юöм бöрын кутчисис лук бердö и риззис-сёйис сiйö няньтöг. Инькаыс кисьтiс мöдпырись.

— Öнi ачыт ю, ачыт, — сулалiс аслас вылын Степаныс. — Кыкöн уджалiмö и öтлаын юамö. Сiдз лоас буржык.

Нем эз кольччы керны, кыдз только юны. Невна пукалыштiсö, да кöзяйкаыс эшö ветлiс комас и вайис джыннялöм бутыльсö.

— Гöститöта уж ассим дона гöсьöс, — висьталiс сiя пуксикас.

Тракторыс тарахтитiс öшын увтас, но Степаныс бытьтö эз и кыв. Инькаыс тожö коддзыштiс и лöсьöтлiс басниэсö, а кадыс чулалiс. Степаныслö тöдвылас усис фермаыс. Шатласьöмöн сiя петiс да гыжьясьöмöн пырис кабинаас, сетiс газсö и тракторыс чеччöвтöмöн вöрзис местасис. А фермаас мунтöн колiс вуджны шор вевдöрöт керöм посок, дзир куим метра пасьта. Трактористыс вашöтiс чуклясьöмöн и скоростьсö эз чинтлы. То ли Степаныс эз казяв, то ли посыс вöлi векнитöв, но тракторыс самöй шöрас кежыштiс бокö, и одзись колесоыс öшöтчис пос бокас, а трактористыс содтiс газсö, и бöрись колесоыс нильдiс бокас. Машинаыс пöрис ваас. Трактористыс люкасис кöрт бердö да öштiс мывкыдсö, а ваыс тыртiс кабинасö. Сiдз и овсис оланыс. Отирыс казялiсö да локтiсö сэтчö, но вöлi сёр ни.