Кöритöм сорöн

Кöр Зоялöн мамыс вайöтiс мöдiк жöник, нылочкалö оланыс совсем эз ло. Виль айыс эз любит уджавны, но сёйис бы чöскыта да бура, а вина понда ловсö пуктiс. Винасö юас да лунтыр саркйö-узьö, а рытнас петö гуляйтны, кöть и инькаыс видчö. Инькасö немымда эз кывзы, а только эралiс да горöтлiс: «Тэ, сучка, пондан эшö горавлыны, дак сiдз и тöд, что коккетö чашкöта. Тöд ассит кад и места». Мамыслöн шысеттöг петлiсö синваэс, и сiя пуксьывлiс öшын дынас. Сылö эз туй и кыв горöтчыны паныт, жöникыс сöтлiс, мыйöн шедас. Рытся кадсö, кöр мамыс вовлiс гортас, Зояыс сайласьлiс гор вылын, медбы айыслö не шедны син одзас. Сiя эз бы кывзы нылiсь кöритчöмсö, кöр горöтлiсö чуклясьтöг, веськыта, но вöлiсö пеллес, и ковсис кывзыны. А öтпырись, кöр мамыс эз вöв гортас, айыс лöгувьяс шентiс сiйö горвывсис джоджас только сы понда, что мöс сюрись керöм сосканас эз куж нимöтны кагасö, и нылочкаыслöн чегисö кык пинь. Зубытсяняс сiя кöмтöг котöртiс бабыс ордö, кöда олiс улица мöдöрас.

— Сиротинушка тэ менам, — синваэз пыр баитiс бабыс, — некин тэнö оз жалейт, пыр гöн паныт малалöны. Кыдз пондан овны? Кин тэнö туйдас, кин велöтас? Чуча-мамыт только асьсö тöдö. Нучаткаöс оз жалейт. Уна и нуждасö нывка адззан. Господи помилуй.

Гортас эз мыччась кынымкö лун, и сэтчö локтiс мамыс, вайис пиас чöвпан нянь да норасис бабыслö:

— Совсем лэдзчисис Митькаыс, только пируйтö. Ог тöд ни, мый сыкöт керны. Нывкасö велöтны бы колiс, да сiя öм оз лэдз осьтны. Ме пö ог понды каганас вöдитчыны. Кыдз, шуö, вайин, сiдз и быдты. Кыдз эттшöмыскöт овны одзлань?

— Кöр колiс, дак сэк менö эн кывзы.

— Дак эд керкуас мужик колö.

— Не керкуас, а аслыт колö.

— Эн видзчы, мам, тожö томнас вöлiн.

— Конечно сiдз, ме вöлi и олi морт моза, эг кошшы.

— Но тырмас ни, мам. Зойка, лок мунамö гортö. Нылочкаыс полiс айыслiсь и эз бы мун бабыс дынiсь, но мамыс пасьтöтiс сiйö и кутiс киöттяс да кыскис öтöрас. Зояыс каньгöмöн корис, медбы колис пöрись мортыс дынö, однако вайöтiсö гортас. Сiя сэк жö кайис гор вылас да сайöвтчис трубка саяс.

— Вайöтiн пышшалiсь весь олiсьтö? — лöга юалiс айыс да эз и видзöт примитöм нылыс вылö.

И пондiсö кыссьыны öткодя сераöсь да кымöраöсь кузь луннэз, кöдна öксисö неделяэзö, месяццезö да годдэзö. Нероднöй айыссянь нывкаыс эз кыв öтiк бур кыв, а только шедлiсö зубыт сöтöммез, матькисьöм да няньсö сёйöмись кöритöм.

— Ме кера тэись мортсö, — горöтлiс сiя, кöр мамыс гортас эз вöв. — Кышасин менам сивилён вылö, кусöксö менчим сёян, а керан сымда — кыдз каньлöн синваэз. Кытчöдз только терпита?

Нывкаыс чеччывлiс одз асывнас, водлiс сёр рытöн, керис быдöс уджсö: миськалiс джоджсö, песлалiс паськöмсö, миссьöтiс посудасö, лöсьöтлiс ольпасьсö, ештöтлiс горсö, и карчйöрыс садитöм бöрас вöлi быдсöн сетöм сылö. Кöсыник нывкалö быдöс колiс керны аскадö, нето видзчись чорыт кулаксö. Зояыс ниртö-керö, а юрас пырöны сякöй думаэс: «Кокнитжык петляö пырны, ежели этадз маитчыны. Счастьетöм ме морт. Кöр ни еныс ас дынас босьтас? И школаас видöны, мыля умöля велöтча, и гортын некин оз жалейт».

Зояыс эта кад кежö дугдiс ни велöтчыны, öдва кончитiс квать класс. Кöть и кадыс вöлi гажа, но сылiсь сьöлöмсö зубыта орлалiс тöждiсьöмыс. Быдöс челядьыс котрасьöны öтöрас, а сiйö тшöктöны пукавны гортас да вöдитны кагасö, кöда орöттöг чирзiс-горзiс, спокойсö эз сет не аслыс, не нывкаыслö. Зояыс лöгувьяс кагасö чепöльтас да видзöтö сы вылö и думайтö: «Ась öмсö летö. Сыбöрын етшажык кудзалас. Трепиччесö озжык марайт. Меным жö эд нiйö пеславны. Кин сьöрья эттшöм горзiсьыс? Конешно жö, айыт кабöн керöмыт, сы моза жö авзан. Но и базанит». Кагаыс чирзас-горзас да садьыс бырöмсянь и ланьтас. Только сэк вöдитчисьыс кокнитжыка ловзисяс и гусьöника пуксьö öшын дынас да видзöтö гожся öтöрсö, кытöн гудыртöны-орсöны челядьыс. И сэтöн петöны синваэс. Кутö обидаыс, что быдöс челядьыслöн счастливöй оланыс, а сылöн кыдз каторга. Сiя горзö öтнас, шысеттöг и кленитö моментсö, кöр шогмис эта му вылö.»

Öтiк лунö эз ешты гряд вылiсь весöтыштны луксö и сы понда вештiсис гортсис вашöтöмнас.

— Суналiн ли мый ли лунтырöн? — юалiс мамыс.

— Да мый сыкöт баитны, — пон моз эрзыштiс айыс. ― Тырмас дармоедкасö вердны, ась мунас отирас да аслыс шедтас. Пондас тöдны, кыдз кусöк няньыс шедö. Медбы ашын жö дукыс эз вöв, ась провалитчас менам син одзись. Не то, дак, ог тöд мый кера.

Нывкаыслö мунiс дасвитöт год. Неыджыт мыгöра, кöсыник, тöждiсяна синнэзöн сiя оськалiс ыбись туй вылöт спинаас котомкаöн, кöдö öктiс мамыс. Котомаыс эз личкы пельпоннэзсö, сiдз кыдз сэтчин вöлi пуктöм невна нянёк да кык платье, кöднö неöтпыр ни пеславлiс. Зояыс мунiс, и ачыс эз тöд кытчö. Но вот мыччисис одзас деревня. Коккес асьныс казявтöг шупытсялiсö, кöть и нывкаыс эз тöд, мый сэтчин видзчисьö, но повтöг ёркöтчыштiс дорись керкуас да пырис.

— Висьтась, нылiньöй, кысь тэ да мый ветлöтан? — юалiс кöзяиныс да юрсяняс кокöдз видзöтiс нывкасö. Сiя баитiс спокойнöя да негора шыöн, и нывкаыс повтöг висьтасис быдöс ассис судьбасö. Кöзяиныс беринялыштiс юрнас и думайтöмöн висьталiс: — Эмöсь жö сэтшöм морттэс. Кыдз только муыс нiйö терпитö? Но ладно, ой кежас мортсö öтöрас он коль. Мийö не чалдоннэз, а христиана. Чöвтчы, нывка, да тöдсась кöзяйкаыскöт и отсалышт, мый колас. Дзескытöв керкуыс, но эн öбидитчы.

Кытшöм ни сэтöн ныр лэбталöм, кöр нывкаыс видзчисьтöг адззис сувтчанiнсö и вермас сэтöн узьны. Сiя чöвтiс вевдöрись паськöмсö да несмела юалiс кöзяйкаыслiсь:

— Джоджсö, поди, колö чышкыны или эшö мый керны? Эдö видзöтö менам учöт мыгöр вылö. Гортын керлi быдкодь уджсö. — Сiя видзöтыштiс гор одзас и висьталiс: — Пессö кытiсь босьтны, ме пырта.

— Керку бöрас поленицаыс, эн мыдз, дак пырт. Зояыс ветлiс и ваысла, тыртiс кöньöссö да юалiс:

— Мый эшö колö керны?

— Спасибо, шоччись, — висьталiс кöзяйкаыс да содтiс, — адзза, быдлаö киэт павкöны, кужан керны, кысйöтöмсö он видзчись.

— Гортын быдöс керлi, — стыдитчыштöмöн горöтчис Зояыс. — Мамö уджалiс, а ме керкуас и гöгöрас дзимляси. И карчйöрсö дозирайтi. Удж бердас учöтсянь велалi. Нероднöй айö вот эз понды любитны. Сысянь не только печиккес, но и кулаккес локтiсö. Мый то керан, и ковсис мунны. Ог тöд, кыдз понда овны.

— Мирас не добрöй морттэзтöг, — висьталiс кöзяйкаыс да сьöкыта ловзисис. — Отсаласö тэныт, и бур туйö петан.

Кöзяиныс вöлi обходительнöй, и нывкаыс тöвйис ны ордын. Сiя олiс кыдз ныв, кöда тöдiс подасö вашöтны поскотина вылö да вайöтны бöр, а тöвнас сёдлiс балясö и мöссö, джоджсö миськалiс да чышкис и керис уна мöдiкö керкуас.

Сiдз чулалiс кадыс отирас овтöн, то öтiк ордын, то мöдiк деревняын. Сыбöрын шедлiс лесоучастокö и год кералiс вöр, а мöд годсö вöлöн петкöтiс древесинасö. Сэк вöлись вермис паськöмоксö наживитны да бытшöмжыка пасьтасьны. Сiйö пондiсö величайтны Зоя Андреевнаöн. Нывкаыс крепыта сувтiс кок вылас, бытшöмсялiс чужöмнас, кыдз лым увтiсь петöм тулысся цветок. Контораас донтiсö и сувтöтiсö примерö. Уджыс сьöртi лоис ударницаöн. И сэк сiйö корис Шипицына колхозiсь председательыс да сувтöтiс бригадирöн.

Кык год уджалыштiс сэтчин да мунiс яслиö заведующöйöн. Кынымкö год бöртi решитiс мунны Гайнаö и кутчисис вузасисьö, а сэтöн панталiс мортöс, кöдiя гленитчис сылö, и петiс жöник сайö. Лоис учöтик, да аслас семья. Кажитчис, что оланыс лöсялiс, но жöникыс решитiс мунны городö и кутчисис шофёрöн стройконтораö. А Зоялö ковсис кутчисьны уджавны столовöйö официанткаöн, сэсся — буфетчицаöн.

Пыр сöстöма пасьтасьöм, чочком запонокöн, сiя радейтöмöн обслуживайтiс нiйö, кин локтiс сёйны. Приветливöй шынньöлок эз и öшлы сы чужöмись. Но локтiс кад, и колiс петны декретö.

— Сэтшöм уж инькаыслöн судьбаыс, — баитiс сiя соседкаыслö. — Кöть öтiкö да колö вайны. Нем яловицаас овны.

Отпускыс чулалiс öддьöн чожа. Шогмöм кагасö нимтiсö Ольгаöн и сетiсö яслиö, а мамыс бöр локтiс столовöяс да пондiс уджавны обеддэз сеталiсьöн. Лунтыр вöвлi кок вылас и мыдзлiс. Но уджалöм бöрас котöрöн мунiс яслиас да вайöтлiс нывсö гортас. Мамыс вöдитчис сыкöт ойöдз да вердiс тырöм мороссэзiсь йöвнас.

— Быдмы, менам кагулёк, — любуйтчис сiя нывнас. — Эн шогав, ло здоровöйöн. Чожа кок вылат сувтан, котрасьны пондан. Тюр-тюр-тюр мамыт дынö котöртан. Шондiок тэ менам, быдмы тэрмасьöмöн.

А невна годся унажык шогмис мöдiк нылочка, кöдö нимтiсö Людмилаöн. Отпуск бöрас Зояыс кутчисис уджавны магазинö вузасисьöн.

— Товарыс ки увтам лоас, Егор, — баитiс сiя жöникыслö. — А то кошшы сiйö кытiськö. Столовöяс эд мöдiк готовитö, а шишкаэс быдöс ме вылö киссисö. Вузасьны меным лöсялöжык. Мый колас, дак пыр небны верма. Да и мынтöны сэтчин выручка сьöртi. Нылочкаэс быдмасö и школаö пондасö ветлöтны. Нылö эд деньга колö.

— Ме тай ваяла гортö, ог пируйт, — шыасис жöникыс.

— Не сы йылiсь басниыс, — öмалiс сiйö Зояыс. — Тэ öтнат быдöссö он вермы керны. Ме эд том эшö и верма уджавны. Ог жö понды бабукаöн пукавны гортын. Ныввезнымöс колö велöтны, ась аймамсö бурöн касьтыласö.

Магазинö пырис быдкодь народыс, и вузасисьлö колiс керны сидз, мед босьтасисьыс мунiс довольнöй. Сiдз инькаыс и уджалiс, уджалiс пенсияöдз.