Керкукерись

Кытшöм эд гажа да мича асывнас виль Кудымкарыс! Шондiлöн небыт югöрыс малыштö вит этажа керкуэзлiсь югыт öшыннэсö, и сэк жö быд квартираö койыштö рамыник да шоныт свет, ласковöя саймöтö олiссесö, визыв кöчокöн орсö челядь чужöммез вылын.

Кöр Леонид Александрович Савельев кокнита оськалö виль стройка вылö, быдпырись любуйтчö аслас киэзöн лэбтöм керкуэзöн. Томмö городыслöн чужöмыс, лоö сё бытшöмжык да сöстöмжык, мöдöтчö зелёнöй паськöмö. Улицаэс вевттисьöны асфальтöн.

Важын я сэтöн, кытöн öнi Строителлез нима улица, сулалiсö му бердас ляпкöтчöм крестьянскöй керкуэз? Талун сэтöн нетшкöвтчöны вывланьö уна этажа керкуэз. Сэтöн виль магазиннэз, челядь садиккез да яслиэз, аптека.

Сылiсь думаэсö дзугö отирыскöт пантасьöм. Мукöдыс здоровайтчикас жмитöны ки, мукöдыс просто качыкнитас юрнас.

— Миянлö квартирасö эта мортыс керис, — висьталас дед внучеклö. — Видзöт да эн вунöт сiйö мортсö. Ыджыт сылö спасибо.

Леонид Александрович тэрмасьö вагонокö, кытчö быд асылö öксьö каменщиккезлöн бригада. Отир коласын сiя немöн оз торйöтчы: шöрöт мыгöра, шыннялан чужöма, кöда калитчöм да сотчöм тöв вылас да шондi увтас. Пасьтасьö простöя, кыдз и колö уджалiсь мортлö. Только выправкаыс öнöдз кольччöм военнöй, кöть пятнадцать год ни Кудымкарас уджалö строительöн.

Каменщикас велöтiсö армияас, кытöн вöлi правило: быдöс кужны, сетöм задачасö керны аскадö, бура. Сыбöрын эта кодь жö правилоыс вöвлi и СМУ-ын, Щербинин бригадаын, кöдаö сiя инмис демобилизация бöрас.

Мийö пукалам вагонокын, баитам.

— Щербининыс дынын уджалi недыр, — висьтасьö Савельев. — Алексей Ильич Епин пондiс организуйтны хозрасчётнöй бригада, и менö кыдз комсомолецöс иньдiсö сы дынö. Каменщиккес миян öксисö томöсь да чожöсь, уджсö любитiс быд мортыс. Вот и пондiм вермасьны, кин буржыка керас да материалсö етшажык видзас,

Бригадирыс öтлаын быдöнныскöт тэчис стена. Öтласа удж мунiс шупыта. Но Алексей Ильич и уджалiкас видзöтлiс зонкаэс сьöрын, кыдз нылöн вöрöны киэзныс, веськыта ли кайö стенаыс, оз ли кинкö сайлась мöдiккез сайын.

— Вот ме и казялi, — касьтылö Алексей Ильич, — что Савельевыс кутчисьö удж бердас бытшöмика и оз кошшы кокнит местасö. Отирыскöт кужö лöсьöтчыны. А сэсся баитыштiмö бригадаас да сувтöтiмö сiйö звеньевöйöн. Сыын вöлi командирскöй струнка, кöдатöг оз туй миян уджын...

Звено — этö сiя жö бригада, но только етшажык отира. Часто сiйö ыставлöны, мöдiк стройкаэз вылö, кытчö бригадирыс не пыр шедас. Сэтчин быд торыс понда ответсö видзö звеньевöй. Сiдзкö, Леонидлö колiс видзöтны, нiйö ли конструкцияэсö вайöны, тырмöны я деталлес, озö ли материалсö нятяс чапкö, тырö ли планыс, быдöнныс ли петöны уджавны. Этöн дисциплинируйтiс и асьсö. Коран отирсянь, дак медодз ачыт ло примерöн.

Колiс велöтны, мый сэтшöм хозяйственнöй расчёт, мый бурсö сетö. Колö лыддьыны быд рубсö да толкöн видзны сiйö.

— Кöр каменщиккес вежöртiсö этö, — висьтасьö Савельев, — быд мортыс лоис хозяинöн. А хозяинлö быд копейкаыс жаль. И зонкаэсö менчим кыдз вежисö: пондiсö берегитны быдлаын и быдöс. А одзжык кыдз вöлi? Валяйтчö, шуам, кирпич — но и ась валяйтчö. Эшö тальччас сы вылö, медбы нятяс пыдынжыка пырис. Öтiкöн унажык или етшажык — нем эз тöдчы. Сы цена йылiсь эз думайтö.

Звенолöн эм эта кадся дневник. Сэтöн гижöм, кöр да мымда видзöм материалыс, кытшöм уджын экономитöм кадыс, кытöн — öштöм. Звено сэк мунiс тöдтöм туй вылöт и быдöс гижлiсö, медбы мыйкö не вунöтны, не сорасьны. И быдöс уджсö анализируйтiсö, кыдз колö. Зонкаэслö öд шедiс, кöр колiс мыччавны ассиныс кужöмнысö, петны уджнаныс медодзö.

Колö висьтавны, что и СМУ-сис начальствоыс эта кадö керис быдöс, медбы стройкаэс вылын уджыс эз сулав. Алексей Епинлiсь бригадасö хозяйственнöй расчёт петкöтiс округас одзын мунiсьö. Быд виль стройка содтiс сылö слава. Öтлаын лэбис и Савельев звенолöн кужöм. Эта кадö сiя лэбтiс ПТУ понда комплекс, Белоевоын да Серваын школаэз, стоквартирнöй керку. А звеньевöй сё олiс тёткаыс ордын квартираын. И вот решитiс гöтрасьны: невеста эм, свадьба понда деньга тырмас — мый эшö колö? И Татьяна эз понды мугсьыны, а только веськыта юалiс:

— Гöтрасьны гöтрасям, а овны кытöн пондам?

— Кытчöдз тёткаö дынын, а сэсся видзöтамö. Ме жö керкукерись.

Чулалöм годдэсö касьтылiкö, Леонид юалö ассис: кытшöм бы шогмис олан, кöр бы эзö вöлö ордчöн сыкöт шоныт сьöлöма морттэс? Колхозница мамыс, тёткаыс, да и Волпасис олiссес. И, конечно, Татьяна... Нiя, кыдз вермисö, сiдз и тэчисö сы лолö доброталiсь кöдзыссэз, кöдна сетiсö бур петассэз... Этасянь Леонид öнi олö да уджалö сiдз, кыдз тшöктö совесть, кыдз бы тэрмасьö сетны отирлiсь босьтöм долгсö.

Чулалiсö годдэз, Савельевлöн содiс отиркöт уджалан практика да строительствоын опыт. И вот сiя — каменщиккезлöн бригадир.

— Сэтчö менам шогмис Сашок, — шоныта шыннялö Леонид. — Олiм сё йöз квартираас. Колiс бы аслыным пельöсок, но корны совесть эз тырмы... И вились отирыс отсöтöн Кирзаводас сетiсö меным квартира. Парткомись, профкомись козиннэз вайисö...

Чужис нылöн зон, и оланыс мöдкодьсялiс. Леонид локтас гортас мыдзöм, ва паськöмöн, готов сэк жö и водны, но зонокыс сетас дзульган шыоксö — и быдöс йылiсь вунöтас да только чожажыка чöвтчö, медбы жмитны бердас кагасö. Нельки мыдзсö вунöтас.

Öтпырись иньыс пондöтiс басни:

— Тырмас, Лёня, важмоза овны.

— Кыдз важмоз? Не деревняын, а городын ни квартираным.

— Отирысся умöльжыкöсь мийö али етшажык деньгасö шедтамö?

— Пустöйöн пызаныс оз овлы. И паськöм эм.

— А квартираат мый? Кай да и то позсö лöсьöтö.

— Рака вон лöсьöтö, — шаттезiсь каттьö.

— Но пытшкас пух тэчö.

— Убедитiн, Танюша...

Чожа мöдкодьсялiс квартираыс, бытьтö бы жмитчыштiс да шоналiс, пондiс шыннявны. Пондöтчисö бекöр-паньсянь, пызансянь да стуллэзсянь, но жагöника босьтiсö быдöс. Босьтiсö трудовöй деньга вылö, кöда локтiс сола ньылöм пыр. И сiйöн быдторыс вöлi öддьöн дона, а этасянь и Сашкоöс велöтiсö берегитны нельки донтöмик чачасö.

— Öнi ме ог вермы вежöртны, кыдз одзжык телевизортöг олi, — сералö Савельев. — Газетаэз да журналлэз йылiсь и басни абу — нытöг лолавны сьöкытжык. Тöдны колö, мый странааным керсьö, и рубеж сайсö нёджжавны колö — оз ли сьöд кымöррес лэбтiсьö? Мирыс эд неспокойнöй.

Леонид Александрович бура тöдсасис партиялöн XXVII съезд решеннёэзкöт. И сiя надейтчö, что öння кадыс вежас важ порядоксö. Быд мортыс вежöртö, что нюжласьны кадыс абу, медбы одзлань мунны. Шупытсялöмсö колö öнi жö босьтны. Этö керны абу кокнит, но кинлöкö эд колö мыччавны примерсö. А Савельев коммунист, окружнöй Советын депутат и профсоюзнöй комитетын член. Кинлö, кыдз не сылö мунны одзас?

— Миян строительно-монтажнöй управленнёыс уна ни керис, медбы бурсьöтны отирлiсь олансö. Но быдöс я сы уджын бур? — висьтасьö Леонид Александрович. — Мукöд кадас керам и не сiдз, кыдз колö. Вот керку пондöтчам лэбтыны. Колö бы медодз керны колана коммуникация да бур туйез. А миян этадз оз керсьы. И кöр керкуыс лэбас, сэтчö овны ни петöны, а строителлес эшö быдса год нырьясьöны сы гöгöр: то газ, то телефон да водопровод лöсьöтöны. Кытшöм эта порядок?

Некокнит баитны сылö эта йылiсь. И ме думайта, что эта вопросыс важын ни тöждöтö сiйö, оз сет лöньсьыны. И баитö сiя не ас пондас, а юасьö руководителлеслiсь, кöдна организуйтöны, уджсö. Видзöтан да, керкуыс мича öшыннэзöн дзардö город вылас, а сы гöгöр гарйöмась траншеяэз, оз туй локны не подöн, не тракторöн. Сэтшöмыс Кудымкарас не первöй год. Начальстволö важнöйжык рапортуйтны керкуыс строитöм йылiсь, а сэтчин ась кöть лешакыс коксö чегас.

— Стройкаыс пондöтчö проектсянь, — баитö бригадир. — Каменщиклöн делоыс тэчны кирпичсö, кыдз гижöма проектын. Сылö абу сетöм право керны мöднёж. А проект сьöртi — не кокнит. Миян жö инженеррес оз отсалö, дышöтчöны думайтны. Этаын и бедаыс. Творчество абу.

Талун керкуэс лэбöны кыдз бытьтö перытжыка. Но колö босьтны виль темппез. Мый колö эта понда? Медодз сiя, медбы быд мортыс кылiс кадыслiсь пульссö, вöлi бы хозяинöн стройка вылас, а не просто уджалiсьöн. Колö кужны веськöтлыны виль техникаöн да технологияöн, мыйсянь содö производительность.

— Уна эшö не сiдз керсьö стройка гöгöрас, — юрнас качыкайтöмöн баитö Леонид Александрович. — Грузитöм машинасö нятьöт мырсьö-кыскалö только вына трактор, летö сiйö öтмöдöрö, жугдö. Кытшöм шофёрлöн лоас сэтöн настроеннё, кöр сiя рейс бöрын не öтiк час весöтö машинасö, медбы автоинспекция эз штрафуйт? Ме бы и ачым сьöвзи сэтшöм удж вылас! А начальниккезлö нем абу: нiя эд полированнöй пызан сайын пукалöны, киэзнысö оз марöсьтö...

Баитiсьлöн синнэзас мелькнитiсö лöг бичироккез. Тыдалö, важын ни быдöс эта сöскö сылiсь сьöлöмсö, öзтö вирсö, оз сет лöньсьыны лолыслö. Эта йылiсь сiя унаись ни баитлiс контораас, но, кинлö колö, нiя и чуньнаныс эз вöрзьöтö, медбы керны, порядоксö. Кывзасö, согласитчасö и сэтöн жö вунöтасö. Нылöн тöдвыланыс öтiк: кöть кытшöм ценаöн, но тыртны план.

Бригадирсö да бригадасö неöтпыр ни ошкылiсö окружнöй да областнöй газетаэзöн, окружнöй радио пыр. Каменщиккес дивуйтчöны: мый понда нылö сетöны сэтшöм почётсö да славасö, кöр уджалöны только джын вынöн? Вот бы паськöтны этö вынсö, сетны волясö, дак сэк бы мыччалiсö нiя, мый вермöны керны. Но нылiсь вынсö видзöны, медбы нiя эз разьö важ порядоксö, полöны, что бригадаыс нетшкöвтчас одзлань и мöдiккезлö колас вöтчыны сы сьöрö. А лоас сiдз, дак и управленнёыслö колас вежны уджсö. Тыдалö, этаись и полöны мукöд руководителлес.

— Мыла миян тырмас керны унажык, — чорыта шуö Леонид Александрович. — Миян эм сэтшöм примета: уджалан кö тэ неумöля, то верман уджавны эшö буржыка. Только ловтö пукты аслат уджö. Бура организуйтöм удж коста нормасö позьö тыртны кöть кöр, нельки керны унажык.

Отирыс Савельев бригадаын 34 морт, быдыс добрöй, отзывчивöй, тöдö ассис и ертыслiсь уджсö. Но одзлань мунiкö важ багажыс етша отсалö, сэтчö колö содтыны мыйкö вильö, колö велöтчыны, бурсьöтны мастерство. И этаын примерсö мыччалö ачыс бригадирыс, кöда неöтiк год ни ветлö шöрöт школаö. Мöйму строителлезлöн Всесоюзнöй праздник лунö трест чулöтiс каменщиккез коласын соревнованнё, и бригадир босьтiс первöй места, мыччалiс томмеслö, кыдз колö шупыта да басöка тэчны стенасö. Правда, и томмеслöн эм мастерствоыс: шöрöтöн бригадаыслöн лоö нёльöт разряд.

Конечно, абу кокнит кыскыны бригадирлiсь лямкасö. Быд мортлöн аслас характер, аскодь олан. Вöвлi и сiдз, что мортсö шыбыльтас не сiя туй вылö, и бригадир, кыдз коммунист, депутат, пöрисьжык ёрт, оз вермы мунны сэтшöмсö казявтöг.

— Босьтамö Николай Гаврилович Тупицынöс, — сьöкыта ловзисьöм бöрын пондöтö виль баснисö Савельев. — Пируйтöм бöрын шедлiс вытрезвительö, одзлань орöттöг юис. Ковсис сувтöтны вопрос сы дееспособность йылiсь, не сетны киас деньга. А то кытчöдз бы мортыс тарöвтчис? А деньгатöг унасö он ю...

Сэтшöм жö нильыг туй вылö пондылiс кыйсьыны Володя, кöдакöт бригадир тожö неетша пессис. Öтпырись стройка вылас Савельев пуксьöтiс сiйö бокас, мыччалiс улица вылö, кытöн öтмöдöрö ветлiсö отир да машинаэз.

— Тэ строитель, — рамыника висьталiс Леонид Александрович, — Кудымкарлöн гордость. И бытьтö абу стыд нырнат нятьсö гарйыны? Тэ эд морт вылас сэк он вачкись! Может, вина вылас мöдан вежны званнётö? Донтöма сэк асьтö сувтöтан...

Володя стройка вылынiнсяняс дыр видзöтас городсис пизяна олан вылö, Иньва сайись паськытiнö, качыкайтiс юрнас, сэсся гусьöн нюжöтiс:

— Да-а...

И, может, эта минутасянь и пондöтчис мортлöн виль оланыс.

Дисциплина да качество оз торйöтчö öтамöд дынiсь, крепыта йитсьöмась öтiк гöрöдöн. Этö тожö быдöнныс тöдöны. Тöдöны и сiйö: мымда бригадаыслö сетан, сымда сылiсь и босьтан. Кöр умöльжыка уджалан, дак етшажык и получитан.

— А миян отирыс простöйöсь, — одзлань висьтасьö Леонид Александрович. — Мый асьныс кужöны да тöдöны — быдöс висьтасьöны томмеслö. И эшö: бур велöтны сiйö, кöда бы велöтчö. А миян бригадаас дышкучиккес абуöсь. Кытшöм бы задача эн сувтöт — керасö аскадö. Чулалöм годö уджалiкас велöтiмö куим каменщикöс. Бур уджалiссез лоисö.

Но не только öтiк уджнас олöны каменщиккес. Эмöсь нылöн и мöдiк интерессэз, мый йылiсь бригадирыслö тожö колö тöдны. Может, и сiя виноват, что вина юöмсянь нылöн öтiк морт бобыльö пöрмис. И пессис Савельев мортыс понда: профсоюзнöй комитетö кыскалiс, бригадаыскöт öтлаын баитiсö, ачыс начальникыс сэтчö вовлiс, — но мыйкö не сiдз керисö! Эз ло семьяыс. Вот мый винаыс керö!

— Ме часто Ваня Томилин ордö пыравла, — аслас небыт шыöн баитö Леонид Александрович. — Сылöн куим челядёк. Вежöраöсь да кывзiсьöсь нiя. Ваня бур семьянин. Иньыскöт олöны дружнöя. А кöр бура олöны, бура и уджалöны. Колö бы и мöдiккез ордö вовлыны, да ог ешты. Луннас эд мыдза жö, öтмöдöрö бергавтöн.

— Часто пантасьла аслам избирателлезкöт, — висьтасьö бригадир. — Юася, кыдз нiя уджалöны да олöны. Адзза, что городсис олiссес тöдчöмöн быдмисö духовнöя, оланын лоисö сöстöмжыкöсь. И миян, керкукериссеслöн, сэтöн эм уджыс... Только вот мукöдпырсяс керкуыслöн качествоыс не сiя...

Веськыта висьтавны, каменщик сэтöн абу виноват. Сiя тэчö стенаэз, керö перегородкаэз да перекрытиеэз. Но лоöм бракыс и сылö кымöсас вачкö.

Босьтамö Кудымкаргражданстрой трестлiсь завод да строительнöй двор. Нысянь эд локтöны нестандартнöй деталлес да уль вöрись керöм блоккес. Вот и шыгралö нiйö косьмикас, кыдз лихорадка коста. А квартирант видö нiйö, кöдна керисö керкусö. Сылö öткодь, кин джоджсö вöвдiс, а кöда стенаэсö тэчис.

— Мукöдпырся виль керкуын олiсьлö стыд чужöмас видзöтны, — сознайтчö Леонид Александрович. — Рожа кульсьö ны понда, кин уль вöрись керö öшыннэз да ыбöссэз. Аслыныс, небось, сiдз оз керö.

Чулалöм годдэзö Савельевлöн бригадаыс строитiс уна объекттэз, сувтöтiс рекорд бöрын рекорд, а бригадирлö сетiсö орден да мöдiк наградаэз, вöлi премия министерствосянь.

Леонид Александрович мортыс не сэтшöм, медбы овны важ заслугаэзöн. Сiя велалiс мунны только одзлань, кайны вылöжык. А медбы кайны вывланьö, каменщиккез асланыс киэзöн тэчöны поспусö. Но овлö сiдз, что колана поспусö немись керны. Коктö лэбтан, а сувтны лоö некытчö. Медбы эз шогмы сэтшöмыс, бригадирлö колö ылына видзöтны одзланьö, юрöн уджавны. А пондöтчис сэтшöмыс сэк, кöр каникуллэз коста уджавлiс гортас «Совет» колхозiсь крестьяна коласын, кытöн озö любитö дыш мортсö.

― Давай тэрмась! — горöтыштлiсö нiя кадiсь кадö. Нянь бы сёян, дак ньылöмтö эн жалейт, сивилёныт только крепытжык лоас. Уджалiкат, кыдз чöрс бергав!

А сэсся, кöр лоис трактористöн, крюкавлiс мöдiккезöс:

― Механизатор ― деревняас первöй морт. Сы вылын колхозыс öшшö.

Учöтсянь пуктöм зарядыс эз öшты вынсö öння кадöдз. Леонид Александрович, кыдз и одзжык, керö бы унажыксö отир понда, кöда велöтiс сiйö овны трудовöй семьяын.

— Уджтöг Лёняыс нач оз вермы овны, — баитöны каменщиккес — Часöт вермас умöльтчыны, ежели стройкаыс мунö жагöна, мыйкö оз лöсяв. И ойсö оз понды узьны, кытчöдз оз адззы, кыдз тупикись петны.

— Öтласа мывкыднас кокнитжык овны, — шуö сэтчö бригадирыс — Сiя и шонтас, и туйдöтас тэнö. Öтнам-то ме только пешка, отирыстöг нем ог вермы керны. Бригадирыс сэк вына, кöр бригадаыс вежöртö да кывзö сiйö…

Леонид Александрович веритö, надейтчö быд мортыслö, сетö сылö самостоятельность. Оз тöждiсь, кöр мунас Совет сессия вылö или КПСС горкомлöн пленум вылö. Сiя тöдö, что бригадаыс кадсö весь оз öшты и быдöс керас бура.

— Эна годдэзö бригадаын лоис эшö дружнöйжык, дзик семья — радуйтчö Савельевыс.— Мöдöрö некин оз мун, оз бы торйöтчы. Мымда ни уджала, только кыка кытшöмкö годö иньдöтчисö кузь руббез шедтыны бур олан кошшыны. Но не весь жö и баитöны, что бурыс сэтчин, кытöн мийö абуöсь. Уджалiсьлö быдлаын бур, а дышкучикыслö и гор вылас кöдзыт. Тöдтöм краяс миянлö некин пирöгсö оз пöжав А гортын и роднöй кылыс шонтö.

Кöр миян партия да сылöн Центральнöй комитет принципиальнöя лэбтiсö перестройка йылiсь вопрос, Леонид Александрович быдöс ловнас сувтiс эта дор. И бригадасö нуöтiс ас сьöрас кужöмöн. Конечно быдöс сiя öтiк лунöн эз керсьы, тожö не кокнит вöлi. Но керис. А СМУ-2-ись мукöд руководителлес не öддьöн тэрмасьöны мöднёжа уджавны.

— Кыдзкö ме ветлi штаб заседаннё вылö, — касьтылö Леонид Александрович. — Штабсö керисö сы понда, медбы веськöтлыны культурнöй центр строитöмнас. А сэк миян бырсисö бетоннöй плитаэз, бригада весь олiс, и ме, конечно, видчи. Штабсис начальник Радостев висьталiс: «Плитаэз лоасö 15-öй апрель кежö». Но бур, мыся. Локтiс сiя луныс — эз вайö. Эшö кад чулалiс — абу... Мымда мыла öштан, кытчöдз ладсö адззан! Бронгöны-баитöны, кыдз джынняннэз, а толкыс абу».

Эта штабыс керöм Кудымкарскöй горком КПСС инициатива сьöртi, но уджалö не партийнöй принцип сьöртi: тэ — меным, а ме — тэныт. Горкомыс кöсйöм заводыслö пиломатериал, а мöдыс эта понда мöдöм сетны плитаэсö. Но горкомыслöн лесозаводыс абу, сiдзкö, и плитаэс абу. Вот керку кериссес и жаритöны-орсöны доминоöн.

— Не пыр бура уджалам, — сьöкыта ловзисис Леонид Александрович. — Мöйму, кöр сувтiм ударнöй вахта вылö, медбы достойнöя пантавны партиялiсь съездсö, месяцöн эта керку вылö тэчим кирпичсö 1200 кубометр. Казялöмöн лэбис этаж бöрын этаж. Лов радуйтчис. Начальство лöсьöтчис сетны рапорт, и строительнöй материаллэз киссисö, кыдз арöн зэр. Бригадаыс уджалiс орсöмöн. А сэсся миян вевдöрöт пондiсö уявны дузгыля кымöррез: кирпичыс бырсис, бригада кольччис уджтöг. Мыйсянь? Да контораас кинкö пеллезнас шваткöтö.

Уна формализм соревнуйтчöмын да обязательствоэз босьтöмын. Уджалiсьыслiсь оз юалö, вермас я сiя нiйö тыртны. И мортыс босьтö, сiдз кыдз тöдö, что обязательствосö нетыртöм понда некинöс эшö эз судитö. Вöлi бы только басöка оформитöм бумага да öшалiс тыдалан местаын. Горкомись начальствоыс ошкö руководительсö, кöр сылöн контораыс, кыдз сера петух, лякöма краситöм бумагаэзнас. Чулалас кампаниялöн ванырыс, и обязательствоэс йылiсь некин оз касьтыв. Мортыс тöдö ни, что обязательствоэзнас начальствоыс, кыдз челядь, орсöны. Сякöй совещаннё вылын нiя козыряйтöны: вот пö миян кытшöмöсь уджалiссес! А год конецас ойзöны: нылö и погодаыс мешайтiс, отирыс эз тырмы, машинаэс эзö вöлö, туйес умöльöсь. Причинаэсö адззасö быдса додь, но öтпырись оз видзöтö ас выланыс: мый жö нiя керисö, медбы тыртны обязательствоэз?

Быд асылö, кöр Леонид Александрович локтö стройка дынас, сьöлöмсö кутö зубыт шог: керкуыс лэбö öддьöн жагöна! А кытшöм эд бытшöм вöлi пондöтчöмыс! Тöдвылас усьö, кыдз пондiс веськöтлыны тракторöн. Колхозас эд кыдз? Сетасö быдса ыб да висьталасö: «Гöр и небзьöт мусö, медбы кöдзны позис». Солярка йылiсь и басни абу. Сiйö сетöны, мымда колö. Вот и уджалö тракторист — лов сылöн радъялö. А. эстöн?

Öнi уна баитöны бригаднöй подряд йылiсь. Леонид Александровичлöн бригадаыс талун готов уджавны эта метод сьöртi. Но сiдз абу готов уджавны администрация. Медбы лэбтыны керку срок кежö, дак сет бригадаыслö аскадö быдсöн колана материаллэсö. Ежели эн сет, то весь сулалöм понда вешты каменщиккеслö колана суммасö. Кысь тэ ваян кертöм уджыс понда деньгасö, бригадаыслö сё öткодь. Ежели каменщиккес уджаласö умöля, сроксö дзугасö, то чинт ны заработокись колана сумма. Öнi жö администрацияыс понда эттшöм порядокыс оз сет выгодасö: материаллэсö оз ештö ваявны.

Савельевлöн бригадаыс лэбтö культурнöй комплекс, сельхозтехникалö строитö уна квартираа керку, окружнöй аптекоуправленнё понда керö виль зданнё. Важ Кудымкарыс сетö местасö виль городлö.

Социалистическöй строй сетiс миян отирлö и гарантируйтö Конституцияöн овны бура. Годiсь годö крепамö миян государство. Но мийö олам эд не только öтiк лунöн, ог вермö довольствуйтчыны только сiйöн, кöда эм ни. Колö мунны одзлань, керны унажык, содтыны богатство. И ювны совесть сьöртi.

— Вот ме важын ни начальстволö шуа: сетö аслам киэзö грузовöй автомобиль, медбы ми вермим распоряжайтчыны сiйöн, кыдз миянлö колö, — тöждö Савельев, — Дак эд эз сетö. Полöны. Трактор С-100 — пожалуйста. Сiя сулалö лун-лун да тшынöтö кымöрсö. А кытчö сiйö? Менделеевоö кирпичла он ысты... Бур бы вöлi трестас керны сквознöй бригада, кöда бы уджалiс öтiк наряд вылö. Медбы плотник уджалiс сэтшöм жö качественнöя, кыдз каменщик или штукатур. Медбы стройдеталь керись заводыс миянлö сетiс конструкцияэз, а не шыгыра ыбöссэз да öшыннэз. Кад ни городас керны и колана бетоннöй конструкцияэсö.

Ме петi строителлес вагонокись и нёджжöвтi эшö öшынтöм керку вылö: медвылын уджалiсö отир — тэчисö кирпич. Тэчисö не тэрмасьöмöн, но чожа. Каменщиккезлöн уджыс сэтшöм, что браксö керны некыдз оз туй: тэчöм стенасö бöр он резьöт. Умöльсö öтöрсяняс он казяв, дак штукатуррес пеняйтасö. Колö керны строгöя проект сьöртi! Ежели сорасян кынымкö сантиметр вылö, то готовöй конструкцияыс сэтчö оз лöсяв. Колö синöн да юрöн уджавны.

Визывтö бригадалöн удж. Визывтö Савельевлöн дума бригада йылiсь, дума сы йылiсь, кыдз буржыка лöсьöтны керкукериссезлö уджсö, öтамöд коласын отношеннёэз, лэбтыны отирлiсь сознаннё.

ЧАРÖТÖМ ПУ

КУДЫМКАР, КОМИ-ПЕРМЯЦКÖЙ КНИЖНÖЙ ИЗДАТЕЛЬСТВО, 1994

Редактор Л. КОСОВА

Художник Л. БРАЖКИН

Техн. редактор Н. НОВИКОВА

ЛР № 040622

Сдано в набор 20.10.94. Подписано к печати 21. 11.94. Формат

84х108^1/32. Бумага офсетная. Усл. печ. л. 12,3. Усл. кр.-отт. 20,5.

Уч.-изд. л. 11,83. Заказ № 1506. Тираж 1000 экз. С 22.

Коми-Пермяцкое книжное издательство. 617240, Пермская обл., г. Кудымкар, ул. 50 лет Октября, 30.

МГП Кудымкарская типография. 617240, Пермская обл., г. Кудымкар, ул. Герцена, 50.