Мотоцикл

Лука Киселёв, Пров Васькалöн зоныс, быдмис деревня Шойдырын и велöтчис только нёль класс, кыдз ачыс баитлiс, нёль тöв ветлiс школаас, а сэсся дугдiс. Мыля? Да сiя кадö деревняас уна велöтчыны эз и ков.

— Кöть мымда бы юртö эн жугды, — сёрнитiс сiя челядьыслö котрасикас, — а петан конюхöн. Гижсьыны öнi кужа и меным тырмас. Ме эд не городын ола, кытöн заводдэз да фабрикаэз. Миян гортын öтiк фабрика — вартöм гор, кöда путриктö-лэдзö тшынсö не только öтöрас, но и керкуас. Сiдзкö, меным тырмас. Понда вöввезöн веськöтлыны, а сэтчö уна тöдöмыс оз ков. Тпрусö да нысö кужа шувлыны.

Но Лукаыс вöлi стрась любопытнöй, нельки завидуйтiсь. Кысь да мый только казялас, — корö пешлыны, видзöтны, чувйыны. Тöдö бы, мыйись керöма да кыдз уджалö. Кытчöдз оз павкöтчы торыс бердöдз — мортыс дынiсь кальк оз кер. А кöр интересыс чулалас, уна тöдöмöн висьталас:

— Бур штукаренцияыс, но не ме понда. Менам эм Савраско, кöда кöть кытшöм груз кыскö. Тöбала сылö тонна и ог тöжды, а только пола, телегаыс, мыся, жугалас.

Сулалiс гажа гожумся лун. Лукаыс тэчис колхозыс понда куртöм да ваялöм турун. Зородыс жагöника лэбис вывланьö. Отирыс мыдзисö ни. Шондiыс палитiс-сотiс.

— Мужиккез, — Лукаыс шуис öтлаын уджалiссеслö, — гöгнытö эдö орöтö зород дынас. Колхозсис уджсö öтiк лунöн он бергöт. Миян сьöрись эшö уна-а кольччас. Менам вот кынöм пондiс симавны. Быд кишкаыс рапорт гижö. Обедайттöг оз туй. Инькаэс эд тожö бы шоччисьöны.

Мужиккес висьталiсö копна кыскалiссеслö, медбы корисö куртiссесö обедайтны, кöдна палетурöн мунiсö вайны медбöрья копнаэз. Турун лэбтiссес сувтöтiсö вилаэзнысö зород бокас. Отирыс öксисö лапыт кöз увтö, пуксисö вуджöрас. Лукаыс кыскис павжун кежас босьтöм нянь, бутылка йöв да кольть. Обедайтiс сiя чожа, и сэтöн син вылас усис Петра Колялöн велосипед, кöда вылын Коляыс асывнас одзалiс телегаö доддялöм вöвсö, кöдöн веськöтлiс Лукаыс.

— Колька, — пондiс сiя юасьны кöзяиныслiсь, — бур вöвтö меным сетлы жö. Кöть öтпыр гöняйта бы кык колесо вылас.

— Да тэ жö и рулитны он куж...

— Вöвнас веськöтла и сiйöн лöсьöтча.

— Гöняйт, но только керöс увтас. Сэтчин кокнитжыка тарöвтчö.

Лукаыс локтiс велосипедыс дынö, лапкöтыштiс седлосö да мöдiс вожасьны, кыдз адззывлiс зонкаэслiсь, но сэтöн жö усис.

— Колö öдззöтны сiйö, — висьталiсö челядьыс. — Педаллесö таль, кöдалань пöран — сыланьö и кежöт.

— Эдö на эшö гöннас тырö пöрись воробейсö велöтны, — лöга видзис нылö очакывсö Лукаыс. — Керöс увтас ачыс öдззас.

Лукаыс вожасис перво рама вылас и коккезнас тойыштсис керöс увтас, а сэсся сувтiс педаллез вылас, но велосипедыс и тальтöг мунiс сё шупытжыка да ёнажыка и медбöрын, кыдз вöв, пондiс сярöтны, только сильканыс жольöтыштлiс. Лукаыс одзсис эз адззы нем, а только видзöтiс колесо увтас да видзис рульсö. Велосипедыс локтiс керöс увтас, торкйыштiс поперег мунан туй вылöт, кушинок коласöт и петiс шороклöн невылын берег вылö да сунгисис ваас. Лукаыс руль вевдöрöттяс лэбзис мöд берегас, паськалас, кыдз лягушка. Куйлыштiс да донсьöтiс лоöмсö, а сэсся чурс сьöвзис и уна тöдöмöн жагöника горöтчис: «Абу тай тэ вöлöмыт машина, а дяв увтыр».

Велосипедсö колис шорас. Сiя тэрмасьтöг кайис керöс панытас и думайтiс ас кежас: «Арттöм пасмалöн и этчö эз тырмы прокыт. Скоростьсö, натьтö, колiс вежны, но кыдз? Лешакыс сiйö тöдас. Не вöв, тпрусö он шу. Ась öнi юö ключсис васö». Лукаыс локтiс пондöтöм зород дынас и шысеттöг пуксис сы бокö. Некинкöт эз бы баит, эз шыась.

— Мый лоис, Лука? — локтыштiс да юалiс сылiсь Коляыс.

— Драндулеттö коли шорас, — лöга видзис очакывсö Лукаыс.

— Эх тэ, ныртöм сизь, — только и горöтчис Коляыс да лэдзчис керöс увтас, кытöн тыдалiс велосипедыс.

Эта эз на ешты вунöтсьыны, кыдз Лукаыс лякасис мöдiк бердö. Но нем он кер, кöр мортыслö оз лöсяв. Васька Тараканов вöлi небöма виль мотоцикл «Ковровец» и горт дынас любуйтчис виль машинанас. Ачыс вöлi кодöв. А Лукаыслö лöсялiс мунны боки. Кöр сiя казялiс красканас свиттялан машинасö, эз вермы не локны сы дынö, медбы видзöтны матынсянь. Сiя пешлiс кинас дермантиновöй седлосö, малыштiс баксö, павкöтiс рульсö и, дульсö ньылыштöмöн, горöтчис:

— Этö вот машина! Оз вачкись драндулет вылас. Некöр эг на пуксьыв руль саяс.

— А тэ, пуксьыв да пешлы кыдз мунö, — шыасис кодззыштöм кöзяиныс. — Мунö, кыдз вурсян машина вурö. Только газуйт.

— Ноко инö сетлы меным, — полöмöн, что öткажитас, юалiс Лукаыс и вериттöг видзöтiс кöзяиныс вылö.

— На ять машинаыс, — ошшасис кöзяиныс. — Пуксьы да мунышт. Ме часöт заводита, ачыт адззылан.

Кöзяиныс тальччис педаль вылö, и моторыс пондiс уджавны. Сiя мыччалiс, кыдз газнас уджавны и скоростьсö содтыны. Лукаыс пуксис руль саяс и сэк жö жмитiс газсö, но мотоциклыс эз мун.

— Ылöстöм тэ морт, скоростьсö кокнат включит, — кодувьяс сералöмöн висьталiс кöзяиныс. Чапкыв газсö да включит. Кай вон керöс панытас и пыр видз газсö.

— Но, но, вежöртi ни, — горöна шыасис Лукаыс да керис, кыдз висьталiсö.

Машинаыс дёрнитчöмöн нетшкöвтчис одзлань. Перво чуклясис жö, но сыбöрын пондiс мунны веськыта. Лукалöн сьöлöмыс радмис. Сiя эд первуись гöняйтiс эттшöм машина вылас, видзöтiс, кыдз колесо увтас пырö туйыс. Лолыс сьылiс. Но мыля сэтшöм чожа сiя локтiс мыс вылас? Колö бергöтчыны, но кыдз? Лукаыс содтiс газсö, кыдз висьталiсö, тэль дынас керис ыджыт круг и, одзас видзöттöг, мотоциклнас кайис торйын сулалан пожум вылö, нямыртiс одзись крылосö, паздiс фарасö.

— Вот эд мать, кытшöм изъян кери, — шогасьöмöн бобгыштiс Лукаыс да видзöтiс жугдöм машина вылас. — Мый меным кöзяиныс висьталас, кöр казялас эттшöмсö? Вот эд балбес кытшöм, и пожумсö эг казяв. Саврасконас тай мунан, и быдöс син одзын, а эстöн синнэз ли мый ли пöртмалöны. Вот незадача. Мый öнi висьтала Васькаыслö? Жугдi эд виль машина. Но... поди, кодувьяс проститас?

Лукаыс сувтöтiс мотоциклсö кок вылас, сьöвзис бокас, вынтöтчис да тойыштiс одзас. Керöс увтас колесоэс бергалiсö шупыта, и эз ков тойыштны. Но мылаыс бырсис сэк, кöр локтiс Васькаыс керку дынö. Кöзяиныс пукалiс посöдзас, а бокас вöлi поллитра, кöдаись кисьтас стопка да — öмас. Лукаыс сувтöтiс машинасö посöдз дорас, мöдiс висьтавны, но кöзяиныс одзалiс: «Гленитчис мотоциклаыс?» Винасяняс вöлiсö сэтчöдз калитчöмась синнэс, что сiя эз и казяв, мый лоöма мотоциклыскöт. Только асывнас, кöр кодыс чулалыштiс, сiя петiс öтöрас, кытшöвтiс машинасö да дыр беринялiс юрнас и аслыс бобгис: «Абу тэ вöлöмыт шом керисяс. Юан чуньтöг, мерасö он тöд. Этадз недыр, и сивилёнтö пиньöвтны. Кинлö быдöс кольччас? Тырмас асьтö бöбтыны. Кад ни ум бердат кутчисьны. Вот сiдз вот».