Кольмöм юр

(Иньва, 1995)

Мишка Габовöс корис ас дынас больницасис главнöй врачыс да тшöктiс тэрмасьны, делоыс пö срочнöй. Врачыс вöлi неыджыт мыгöра, новйис очкиэз и кöть шогалiссес лыддисö рам мортöн, но аслас уджалiссезкöт тöдчис ассямаöн, мывкыдыс вежсьывлiс. Раз уж корö, то сэтiсь некытчö он воштiсь — колö мунны. Мишкаыс ветлiс машина вылын, кöдöн отирыслö сетлiсö чожа колана отсöт. «Мунны не мунны, — думайтiс сiя да гыжьялыштiс юрбöрсö. — Муна дак шеда, кыдз налькйö». Сiя любитiс гусьöн юны винасö и тöння польскöм бöрсянь чужöмыс вöлi пыктöм, чукрасьöм, и быд чукырокыс тöдчис, а киэс дрöжитiсö, и коккес эзö кывзö. Но, кыдз бы эз вöв, а колiс ветлыны врачыс дынö. Не весись натьтö эд корö? Сiя дыша петiс гаражсис да тюрликасьöмöн иньдöтчис больница ладорас.

«Мый висьтала главнöйыслö? — бергалiс юрас. — Мыйöн оправдайтча?» Сэтöн сылö лоис мыйкö недолыт, горшас лэбтiсис комок, и Мишкаыс кинитчис акация сайö, быкышшис да лöсьöтчис öсны. Но мый сылöн петас, кöр öмас талун эшö и крöшка эз чапкы. Петiс тай невна зелёнöй, дуль кодь, нильыг, а вуктöтiс сэтчöдз, что кынöмыс пондiс доймыны, чужöмыс чочкоммис, кымöсас петiс пым ньылöм, нельки синнэс вазисö. Аслыс думайтсис, что быдсöн гыркыс, натьтö, бергöтчис, кишкаэс орласисö. «Мый нö ни керны? — клёнöтiс юрас. — Садьö эд кöсöдз бырис. Ветлiн бы кинкö ордö да главнöйыс корис».

Кыдз шогалiсь жö, Мишкаыс пырис больницаас, сьöкыта ловзисис да локтiс кабинет дынас, кöда ыбöс сайын кылiс басни. Велалöм сьöртi Габовыс пырис стукöтчытöг и сувтiс ыбöс дынас, синнэсö лэдзис джоджас, медбы эз казяв главнöйыс. Но сьöкыт баснисис сiйö мездöтiс аптекаись заведующöй Елена Абрамовна, кöдiя горöтчис:

— Сэк инö, Борис Васильевич, сетö путёвкасö, и мийö мунамö. — Мунö, дыр ли эстöн ветлатö городöдззас.

Мишкаыс лолавтöг босьтiс путёвкасö да тэрмасьöмöн петiс кабинетсис. Быдса моросöн сiя ловзисис только коридорас. Кымöсас мыччисисö кöдзыт ньылöм воттез.

— Видзчисьыштö öтöрас, ме часöт локта, — дыша висьталiс Габовыс да мунiс гаражас. Сэтöн вöлись сiя малыштiс вазьöм кымöссö да чикыртчöмöн шынньöвтыштiс и ас пондаас думайтыштiс: «Эм жö тыдалö еныс, главнöйыссянь боки нуöтiс. Абрамовнаыс поди лечитыштас? — усис тöдвылас. — Сiя мортыс öткаса и некöр тай эз откажитлы. Тöдсасьны вот бы сыкöт матынжыка, кыдз овлö мужикыс да инькаыс коласын?»

Мишкалöн кöть и лэбтiсьыштiс настроеннёыс, но гаражас пырис чöлöмöн, локтiс да гöгöртiс машинасö и пырис кабинаас. Сы увтын дзуркнитiсö важ пружинаэс, кыдз бытьтö сералiсö шофёрыс удача вылын. Дрöжитан кинас сюйыштiс ключсö замокас и заводитiс моторсö да петiс гаражсис. Моторыс уджалiс сiдз, кыдз шофёрыслöн ёткис сьöлöмыс, а кокыс кывзiс умöля, бöбöла чеччалiс педаль вылас. Больницаö пыран ыбöс дынас видзчисис ни Елена Абрамовнаыс, кöдiя гажа чужöмбанöн пуксис шофёрыс бокö да серöмтчöмöн горöтчис:

— Кыным лун ни лöсьöтча городас да сё эз лöсяв, а талун вот петiс. Лекарствоэсö колö вились вайны, а то отирыс просто видчöны ни. Но висьтав, ме мый верма керны, кöр машинаыс абу? Кысь вая буржык лекарствоэсö? Меным жö быд микстураыс понда колö городас мунны.

— Меным вот тожö лекарство бы колö, — одзас видзöттöн шыасис Габовыс да косöйöн видзöтыштiс бокас пукалiсьыс вылö.

— Кытшöм? — бергöтчис сы ладорö аптекаршаыс.

— Да мужикыслöн эд шогöтыс пыр öтiк овлö. Тöн тай жорскимö сап петтöдз, а талун вот мучитча, сьöлöмö кыдз баля бöж треситчö.

— Ой, батюшки тэ менам, верита этö шогöтсö, но отсавны немöн ог вермы. Каплиöдз бырсис. Талун, кыдз сетасö, сiдз и торйöта. Терпитышт. Но мыля инö сэтшöм жагöна мунан? Газуйт, не кольттез кыскан.

Нiя мунiсö вöр шöрöт туй кузя, кытi неважын керисö асфальт. Туйыс вöлi волькыт да веськыт, и машинаэс эзö пантасьö. Только газуйт да вашöт, но шофёрыс эз тэрмась. Казявтöг моторыс пондiс несйыны, то чепöссьыштас машинаыс одзланьö, то чинтас котöртöмсö. Шофёрыслöн синнэс бергалiсö. Сiя ятнöя кылiс, кыдз кинлiськö шы: «Газуйт, газуйт ёнажык, керöсыс эд абу ни ылын. Ов ассит медбöрья минутаэтö. Керöс увтас кульк-мельк бергöтчан, сымда и адззылан ассит олансö.»

Шофёрыслöн нельки кырыммес вазисö, рульыс пондiс ысласьны ны увтын и сiя повзьöмöн юалiс бокас пукалiсьыслiсь:

— Мый тэ шуан?

— Пукала тай, шы ог сет. Думайта вот, кытшöм гажа, нельки вöрыс радуйтчö, быд пуокыс кыссьö шондiыслань.

— Но сэк инö думайт, дума-айт, — нюжöтiс шофёрыс.

— Вот олöны эд отирыс, — минута бöртi горöтчис Елена Абрамовнаыс, кöр казялiс туй боксис дачнöй керкуэсö, — городас квартира эм, а татöн гожумся кад кежас учöтик оланiнок. Рай да и только. Руыс сöстöм, сир дука, здоровöй. Тэ бы, Миша, эстöн олiн?

Но шофёрыс эз шыась. Сiя думайтiс кытшöмкö ассис дума, а машинаыс петiс ни вöрсис и мунiс сэтi, кытöн шочыника быдмисö кыдзоккез да пипуэз и вересовник. Туйыс кежис веськыт ки вылас да лэдзчисис кузь керöс увтö. Улын тыдалiс пос, кöда дынö öтмöдöрсянь вöлi лэбтöма муись насыпь. Мишкалöн синнэс пемдiсö, а пель одзас кинкö шушкис сё горöнжыка: «Мый сунасян? Вашöт, газуйт, моторсö сёд бензиннас! Вашöт машинасö перытжыка! Адззан, вон, пос дынас, кытöн чукыльыс, сэтчö и сунгисян. Машинаыт öнняюрасяс, только торрес лэбзясö. Мынтны эд он понды, деньгаыт абу, вина сы вылö юин. Гов, кыдз сокол, кольччин. Векся местаат тэрмась!» Сэтöн Габовыс кыдз онiсь саймис, вывтырсö жмитiс, кöстiсис да гырчикнитыштiс пиннезнас и тормозитiс машинасö, а аслас петiсö синваэс.

— Вот и локтiс менам визьыс, — чуть кылöмöн горöтчис сiя. — Сы сайö мунны оз туй. Менам сэтчин только погибель.

Сiя чöлöмöн бергöтiс машинасö да иньдöтiс сiйö бöр посадас. Елена Абрамовнаыс повзьöмöн юалiс:

— Мый лоис, Миша? Мыля нö бöр мунамö? И городыс вон тыдалö ни.

— Юалi тай лекарствотö да тэ жалейтiн, — мыдзöм шыöн горöтчис сiя. — Ме думайтi, тэ тшöктан вашöтны пропастяс.

— Еныс помилуйтас менö, — шыасис пассажиркаыс да дзарнитiс шофёрыс вылö. — Кристос тэкöт, мыля сiдз думайтан?

— Тыдалö, бöбмыны мöда, — жагöника висьталiс шофёрыс. — Меным пондiс сякöйыс прикашайтчыны, быдкодь кикимораыс петö да нерö.

— Сiя, конешно, не бур одзын, колö берегитчыны. Да винасö орöттöг оз ков юны. Этö винаыс быдöс керö.

Габовыс жагöника ыстiс машинасö туй дорöттяс. Сiйö одзалiсö уна машинаэз, и шофёррес, натьтö, думайтiсö, что кошшö вöрас кежан туёк, медбы гажöна чулöтны кадсö. Шофёрыс жö нырыштсис руль вылас да кыдз вермис, сiдз и мунiс гортланяс. Некинлö нем эз и висьтав, сувтöтiс машинасö да брякнитчис топчан вылö. «Мый жö мекöт керсьö? — юалiс сiя ассис. — Неужто стопка винаыс понда вежи оланöс? Но ме жö том, только пондöтча овны». Вопроссэс öтiк бöрсянь мöдiк пыжьянöн бытшкалiсö сьöлöмсö. Мöдiс бы узьыштны, но оныс некыдз эз лок. Сiя тöдiс, что главнöйыс талуння понда юрсиöт оз малав, накажитас, а син одзас и часöт сулалö, кыдз машинаыс лэбзьö пос увтас, кöстасьö да чегласьö торрез вылö. Дружоккес пондiсö юасьны, кытшöм сулема сылö шедiс, но Габовыс только макнитiс кинас да бергöтчис мöд бок вылас, ме дынiсь пö мунö ылöжык, тiянтöг пö недолыт.

Луныс чулалiс взбучкатöг, но этасянь вöлi эшö сьöкытжык. Сiя эз тöд, мый сыкöт керас главнöйыс, кытшöм сылöн лоас решеннёыс, коляс ли больницаас уджавны. Вот зараза винаыс кытчöдз вермö вайöтны. Кöть и полiс, но ачыс мунiс врачыс дынö.

— Виятö или проститатö, — пондöтiс сiя, кöр пырис кабинетас, — но пыри греххезöс сетны. Тыдалö, локтi олан пельöсöдззас. Вот кольччис только авария керны, чуть машинасö эг изводав, но бертi. Лыддитö пыр бур уджалiсьöн, а эдö тöдö, кыдз тiянöс бöбöтлöны. Путёвкасö тшöктывлi мöдiк мортöс босьтны, медбы эдö кылö вина дуксö. И вот... чуть эг бöбмы. Син одзам вежмасьöны быдкодь куллес, сякöй шысö кыла. Талунсянь решитi сэсся не юны. Вот тiянлö крест. Тырмас, юи мымда колö, а сэсся капец. Верматö, дак проститö...

Врачыс думайтыштiс да... проститiс.

ВÖТЫН

(Иньва, 1995)

Матвей Лымов сизимдасöт год вылас пондiс шогавны. Ачыс оз тöд, кытшöм зараза кутчисис. Просто лоис недолыт, висьöтыштлiс, а кынымкö лун бöртi пöрöтiс кок йывсис. Голяыс пыктiс, киэс эзö кывзö асьсö, коккес дубалiсö. Эз вермы керкусис петны. Гажтöм лоис. Кыным ни год инькаыс кулiс, а сэтшöм гажтöмыс эз вöв. Ладно, кöть зоннэс вовлiсö кадiсь кадö проведайтны да эшö пöрись сойыс пыравлiс. А то кöть и кув — некин оз тöд. Деревнясис стариккес нельки етша вовлiсö, а локтасö, дак только сы понда, медбы невна пукалыштны да табаксö куритны. Баитöны только, кинлöн и мымда таво öксяс табакыс, кыдз сiя быдмö. Локтан рытö Матвейыс эз ни петав öтöрас, а пукалiс öшын дынын да видзöтiс туй вылас, кытi ветлiсö машинаэс да куритiс сымда, что кöть черсö öшöт тшын вылас. Кöсичаыс жыв кыдз пондiс потласьны. Синнэз одзас пондiс нельки чеччавны. Лымовыс шатласьöмöн мунiс койка дынö да пöрöтчис сэтчö. «Натьтö, этадз и кулöны, — охотиттöг думайтыштiс сiя. — Мортыс пезьдас-пöрас и абу. А ме эшö бы олышта. Уна ли адззылi бурсö? Учöтнам и сёянторыс пызан вылас эз вöвлы. Быдми да зимогоритi. Сэсся кык война вылын вöлi. Ловйöн локтi да годдэс, тыдалö, мöдöны личкыны. Мыля жö мортыслö эттшöм етша сетöма овны?»

Оныс сiйö небытика каттис аслас ольпасьö, эз и казяв, кöр ланьтiс. Узис, кыдз сьöкыт удж бöрын мыдзöм мужик, только нырыс горавлiс да зэгöтiс подушкасö. А öшын пырйöттяс шытöг видзöтыштлiсö кöдзыт звездаэс, да кылiс деревняас пон шлявгöм. Быдöс югыт мирсö ойыс каттис ас пытшкас. Матвейыс пондiс вöтасьны. Бытьтö бы сiя вöлi ыджыт вöрись кушин вылын, кытчö öксьöмась уна деревенсаыс, кианыс масiссезöн. Быдöнныс юрбитiсö, Пернапасасис и Матвейыс, кöдiя тöдiс и эз тöд ассиныс отирсö. Народыс сё содiс и содiс. И Лымовыс лоис ны одзын. И сiя казялiс кушин вывсис ыджыт котёл, кöдаын пизис ваыс плескайтчис вевдöрöттяс, но доррес вöлiсö калитчöмась чочкомöдз, и резсис только парыс, вачкисис тшын вылö, кöда путриктiс котёл вевдöрас. И ваыс сэтöн вöлi не пырсякодь, а веж да сук, кыдз каша. Гöгöрöттяс котрасис пöрись чёрт, гырись сюрреза да кöза кока, вывтырыс быдсöн вевттьöм рукйöсь гöнöн. Сылö отсалiсö куим томыник чертёнок. Нiя ваялiсö котёл увтас пессö, мед ёнажык вадзалiс биыс.

— Кытшöм эд чöскыта пусьöны, — котёл гöгöрас чеччалiс да кöза тошнас треситiс чёртыс, а бöжнас чышкис джоджсис чапкалöм окуроккесö, öктiс да чапкалiс котёлас, кысянь пондiсö мыччисьлыны киэз.

— Норовитö, не быдöннытлö öнi жö! Шудтöм гырккез, куритатö бы? Ме сета жарсö тiянлö, Пырö быдöнныт котёлас! Кытшöм бура пусьöны!

Котёлас мелькайтiсö не только киэс, но и мыччисисö морт юррез да мöдiсö бы петны пизян соровтассис, но чёртыс люкалiс нiйö да тойлалiс бöр:

— Ариддэз, пусьö, мед кишкаэзнытö бергöтiс. Табакнас ась тырас гыркныт. Менам царствоö чожажык локтатö, — чёртыс кватитiс паськыт зыр и сiйöн чапкалiс котёлас öктöм окуроккесö.

Нечöскыт дукыс пиньöвтiс нырвуж, сьöлöм гудралiс да юр кольмöтiс, нач пондiс пöдтыны, немöн лоис чушыктыны, морос потласис. Матвейыс горöтö бы да оз вермы. Сiя кинитчис бокö, пырис вöрас, и отирыс вöтчисö сы сьöрö да мöдiсö бы кутны. Быд мортлöн синнэс паськалöмась, баралöмась да повзьöтанаöсь. Одзлань пышшыны эз ни вöв выныс, пондiс джöмдавны, усявны. Кинкö зубыта вачкис сылö морос кузяс и сiя усис, усис, усис и сэтчö... Матвейыс саймис. Сьöлöмыс сiдз чеччалiс, бытьтö мöдiс петны мороссис. Ачыс быдсöн вöлi вазьöма кöдзыт ньылöмöн. Киэс дрöжитiсö, юрыс клёнгис-висис, а коккес вöлiсö кöдзытöсь. Куйлö и думайтö: «Мый жö эта лоö сэтшöмыс? Кытшöм ме вылö уськöтчис покась? Тыдалö, былись эд пондi шогавны. Чушыктыны лоис сьöкыт. Колас бедь лöсьöтны, господи, помилуй менö. Не табаксяняс ли этö? Чёртыс, натьтö, кылiс менчим дуксö и пуис менчим ловöс. Былись эд öддьöн пондi куритны. Оз ков сiйö керны. Гыркö пондiс мекöт вермасьны. Вот эд кытчöдз олi. Колас чапкыны.»

Асывнас сы дынö пырис томжык сойыс, кöдiя одзжык уджавлiс медикöн. Матвейыс мöдiс чеччыны, но эз вермы. Сойыс повзьыштiс да локтiс койка дынас.

— Бöра ли мый ли висьöтны пондiс? — юалiс сiя.

— Коккезöс тай ог вермы лэбтыны, — норасис старикыс. — Кытшöмкö пружина, тыдалö, сiсьмис. Мый но понда керны?

— Больницаын ковсяс куйлыны, — сайкалöм коккесö пешлiкö висьталiс сойыс. — Тэнö пондöтчöма парализуйтны. Ме эд баитi, мыся оз ков куритны, а тэ он кывзы.

— Тулыссянь öмам ог босьт, умöль вöт адззылi.

— Важын ни колiс...

Дзор старикöс водтöтiсö öтласа палатаö. Медодзза жö лунас сiя тöдсасис куйлiссезкöт и лоис асланыс мортöн, шутитiс да висьтасис ассис вöтсö, сералiс куритiссез вылын. Эзö обидитчö, любитiсö öтлаын пильскыны.

— Уколсö меным керöны кыдз пуляöн — висьталiс Матвейыс. — Бытшкытöнняс нем ог кыв, да сыбöрын зубыт. Одзжык ачым бытшкавлi, а öнi меным татшöтöны сякöй заразасö. Пöрисьнас умöль овны. Одзжык эд ох-хо-хо кытшöм мужик вöвлi.

— Висьталышт ноко, — тшöктiсö сiйö.

— Ог ни понды грехсö лов вылам босьтны, сiдз ни мучитча.

Матвейыс куйлiс больницаас мöдiк неделя, и коккес пондiсö лöсявны. Недыр мыйись вермис чеччыны койка дорас, а сэсся и сувтiс кок вылас, пондiс ветлöтны. Лоис аппетит. Больницаас кöть и бура вердiсö, но сылö колiс мöдiк, дзик номсöтiс... колбаса вылö. А кысь сiйö небан, кöр буфетас шоча ваялiсö?

— Кин вайис бы колбасасö, дак сетi бы ассим керкуöс, — баитiс сiя шогалiссеслö. — Нем эг бы жалейт. Öткодь сёяныс сьöлöмöс орöтö. Ась кöть пон яйись, но сёравно сёя. Менам оланыс только сыын.

Сылiсь баснисö висьталiсö врачыслö, кöдiя керлiс обходсö, и сiя мöд жö лунас гортсис торйöтiс джын килограмм мымда да гöститöтiс стариксö. Матвейыс, кыдз тшыгьялöм морт, уськöтчис да сёйис няньтöг нельки джынсö. Эз вермы терпитны и чеччылiс ойнас да эшö пешлiс колбаса кöрсö. Асывсö сiдз жö пондöтiс кольччöм торнас.

— Сьöлöмö вöлись бурмис, — гажöна висьталiс шогалiссеслö. — Вот эд мымда колö мортыслö. А ежели абу коланаыс, то сылöн и оланыс абу. Ассим счетсö öнi понда тыртны стоöдз. Врачихаыслö колас небны бур козин. Пета татiсь и пырала магазинас. Менö не лекарствоыс лечитiс, а сылöн сьöлöмбурыс. Эзö бырсьö эшö бытшöм морттэс.

Матвейсö лэдзисö больницасис гажа лунö. Öтöрыс панталiс сiйö мича шыннялöмöн. Шогалiссеслö висьталiс:

— Челядь, чапкö куритны. Бурöдззас сiя оз вайöт.

Гортöдззас вит километрасö мунiс боёк оськöлöн. «Оламö эшö, сорласямö отирыскöт», — думайтiс сiя.