Прикашайтчис

Пöрись Мария Люстыровалöн нылыс, Ульянаыс, гижис, что öнöдз жöникыскöт олiсö бура, быдтiсö поснит челядьсö, радуйтчисö олан вылас и нем сэтшöмсö эзö думайтö. «...И вот Прокопыс пондiс шогавны, — гижис сiя юöрсö. — Больницаас керöм анализзэс öддьöн умöльöсь. Врачыс висьталiс, что Прокопыслöн вöлöма лечиттöм туберкулёз. Ачыт тöдан, кытшöм сiя опаснöй шогöт. Ог и тöд, кыдз пондамö овны. Челядьыс эшö поснитöсь, и думайтны ог вермы, кыдз нiйö кок выланыс сувтöтны. Тэ тöдан, ме уджала почтальонöн, и деньгасö мынтöны етша, а Прокопийыс вöлi электрикöн, унажык шедтiс, а öнi олö гортын. Беда да и только. Сы дынiсь эд он пышшы. Да и кытчö пышшан, кöр челядьнас сиаси. Вот сэтшöм, мам, лоис менам оланыс. Судьба вылам, тыдалö, гижöма терпитны. Мöдi ни киэзöс тэчны ас вылам, да челядьö жальöсь. Нiя эд не понпияннэз, он чапкы».

Мария Люстырова получитiс этö гижöтоксö, лыддьöтiс да пондiс думайтны, мый жö лоис Прокопыскöт. Совсем эд неважын, чулалöм гожумö, сiя иньканас вовлiс гöститны и нем йылiсь эз норась — и вот тэныт... Он эд и думайт, мый мортыскöт вермас лоны. Вöлi бы матын, дак отсалiн бы, мыйöн вермин, но сы ылынаас эд он чеччöвт, да и пöрисьöсь ни лоимö. Марияыс пукалыштiс пызан саяс киэзсö лэдзöмöн, думайтiс тöждiсьöмöн да и висьталiс жöникыслö:

— Пантелей, босьт жö да лыддьöтышт Ульянаыссянь гижöтсö. Семьяас нылöн мыйкö оз лöсяв.

Пантелейыс жагöника чеччис западня вылiсь, локтiс инькаыс дынö, босьтiс гижöтоксö и пуксис öшын дынас, кытöн вöлi югытжык, да не тэрмасьöмöн пондiс лыддьöтны. Сы сьöртi, кыдз сiя вежöртiс нылыслiсь висьтасьöмсö, чужöмыс пондiс вежсьыны, синнэзас кусiс бичирыс, тошыс пондiс треситчыны, киэс дрöжитiсö. Чöлыштöм бöрын сiя висьталiс:

— Улькаыслöн сьöкыт положеннёыс. А мый ме верма керны? Вöлi бы кöть фершал, совет кöть бы сетi, а то мый меись толкыс — деревняись мужик.

— Мый ме висьтавны мöда, — жагöника горöтчис иньыс. ― Миян эд эм ма. Ыстамö жö, давай, поди, мыйкö отсалас.

— Колö лöсьöтны посылка да ыстыны.

— Дак ящичоксö тэ дор, а масö ме лöсьöта. Мыйкö бы вот банка сэтшöмö адззыны. Чомас ноко ветла, поди, син вылам мыйкö усяс.

— Стеклоись банкаэс сэтчин тыр.

— Дона эд маыс, да уж ась.

— Не быд мортыс тöдö маыслiсь донсö, — думайтыштiс да уна тöдöмöн висьталiс Пантелейыс. — Мошыс кöть и учöт насекомöйыс, но керö мортысся унажык. Медбы öктыны нектарсö, сiя лэбзьывлö не öтiк километра сайö, пуксьö да кошшö зеллёсö не öтiк цветокись, тöбасьö, кыдз сьöкыт машина, и кыскö гортö, тэчö соттезас, а мортыс грабитö сiйö, тшöктö уджавны куимись унажык. Ме бы разь олi сымда годдэсö, ежели эг занимайтчы мошшесö вöдитöмöн? Кыдз бы не сiдз. Менчим олансö видзö маыс. Вот ыстамö зятьнымлö, и ачыт адззылан, кыдз кок вылас сувтас.

— Ась ен сетас сылö здоровьесö.

Старикыс дорыштiс неыджыт ящичок, кöдаö пуктiсö банкасö манас и тыртiсö боккесö пильнöй чагöн. Марияыс ветлiс почтовöй отделеннёöдз да ыстiс. Но Мария сьöлöмлö спокойыс эз лок, тöждiсьöмыс пыр бытшкалiс. Петас ли вала, или пес пыртны, подасö дозирайтны, соседкаыс ордö баитыштны, а думаэс сiйö озö кольö, öтлаын мунöны, кыдз бытьтö бердас гöрöдалöмöсь, озö вермö мезмыны. Сьöлöмыс лоис не аслас местаын и пыр мыйкö кошшис, да эз вермы адззыны. Марияыс ачыс эз вежöрт, мый сыкöт лоис, уна кеймисис еныслö, но и сiя эз кыв сылiсь молитваэсö. Лоис öшöм кодь, киас эз пыр уджыс, синнэс баралiсö.

— Мыйкö ог вежöрт, мый мекöт керсьö, — кыдзкö рытнас висьталiс Пантелейыслö да сьöкыта ловзисис. — Лов вылам кытшöмкö сьöкыт, изналö сьöлöмöс, места ог адззы.

— Зятьтö öддьöн радейтан да, — вежöра шыасис жöникыс. — Матын бы олiсö дак, ветлiм, но сы ылынаас кытчö мунан? Да и керкусö эд öтнассö он коль. И мошшесö колö видзöтлыны.

— Получитiсö, эзö нiя посылкасö?

— Мыля жö, поди, эзö, почтаыс эд уджалö. Ноко, сёр ни эдö, лöсьöт мыйкö сёйыштны да и водны колö. Слава еныслö, луныс чулалiс.

Арся рытыс пемдö чожа Нiя ужнайтыштiсö, и Марияыс лöсьöтiс ольпассесö да водiсö. Чожа Пантелейыс пондiс ныргорнас узьны, а Марияыс некыдз эз вермы ланьтыны. Сякöй абуыс пырис юрас, кыдз пондас овны нылыс челядьнас, а поди, и веськалас жöникыс. Только ойшöрланяс оныс ляпкöтыштiс сiйö, и мыдзöм тöждiсьöмнас да шоныт ольпась вылас, сiя öвсис. Но узис недыр. То ли кылiс, то ли вöтасис, кыдз карта вылас пырис телега, тарйöтiс-мунiс чом гöгöрсö, кытшöвтiс омшаниксö да горöн дзуртöмöн петiс бöр. Марияыс повзис да чепöссис ольпась вылас.

— Пантелей, тэ узян ли мый ли? — горöтiс сiя жöникыслö. — Кылiн, кыдз ёркöтiс карта вылас?

— Чомор тэнö, Мария, — нежитчöмöн шыасис Пантелейыс, а сэсся лöгöна моз висьталiс, — тырмас ни тöждiсьны. Но гольнитiс карта вылас, и мый жö? Етша ли овлö сэтшöмыс? Да, можот, сэтчин тёс усис или гуна росыс пöрис. Кин тöдö?

Ноко, петалышт öтöрас да нёджжасьышт омшаник гöгöрас. Лешакыс оз тöд... Вермасö и шпанитны. Мый тэ öння томмеслiсь босьтан?

— Пондiс бöра бöрдлыны, — инькаыс недовольнöя жевгыштiс да пуксис койка дорас. — Петала уж, видзöта, а то пондан ойбыт бобошитны. Тэ эд сэтшöм, он вермы терпитны.

Марияыс кöмтöм кок вылас, тэрмасьтöг, петiс карта вылас, кытöн вöлi дзирс пемыт. Сiя кишупнас ветлiс ворота дынас, пешлiс сэтчинись игансö да бертiс омшаникыс дынö, сулалыштiс ыбöс одзас да пырис бöр и висьталiс:

— Некытшöм тай кикимора эз пантась, не эз шыась.

— Но тэ эд кылiн телеганас торйöтöм-мунöмсö?

— Кылi, но и мый жö?

— А сiя, что мыйкö миян лоас. Ме тöда не öтiк пример, кöр мортыслö прикашайтчö, и не весись. Тöдан эд Ёрка Романсö? Дак вот, кöр сiя уджалiс Балихаас да керис винтовка понда болванкаэсö, то вöлi этадз жö ойнас своякыс явитчöма. Посöдзас только гым мыйкö усьöма. Петасö видзöтны, а сэтчин нем абу. Неделя бöртi гортаныс локтасö, и нылö висьталöны, что свояксö дзебисö. Видзчись кытшöмкö умöль юöр. Отирас эта йылiсь оз любитö баитны. Важся поверьё сьöртi видзчисьлiсö куим лун, кöр мыйкö да шогмас. Мортыс сэк олö полöмöн и думайттöг нем оз кер. Пернапастöг оз кутчись некытшöм дело бердö. Вот мый сiя.

— Неужто зятьнымкöт умöльыс лоис?

— Кадыс мыччалас.

И былись эд куимöт лунас локтiс нывныссянь гижöт. «...Жöникöс дзебимö. Оланыс лоис гажтöм. Ог и тöд кыдз понда чулöтны ойлунсö. Спасибо отирыслö, что отсалiсö. И тiянлö спасибо маыс понда. Öнi челядьыслö невнаöн сетавла. Гижö меным частожык...»

ЧУДО

Вöлi ытшкисян кад. Быдöс отирыс уджалiсö гортсяняныс сизим верста ылынаын, Турöп увтын, кыдз шуисö видзсö. Нимсö видзыслö сетлiсö эшö важся кадö, мыля сiя вöлi кöть и пруд бокын, но сидзисö быд ладорсянь тöввес, бергалiсö тöвчикöн и только пруд вевдöрас öшлiсö. Эстöн туруныс косьмывлiс öддьöн чожа. Лишньöй лунсö эз туй видзны. Колiс тэрмасьны.

Луныс вöлi öддьöн ни бур: кымöртöм небоас гажöтчис шондiыс, калитiс мусö. Луншöрланяс нельки каёккес лöньсисö, туруныс сырлёльсялiс, да и ытшкисиссес мыдзисö. Турунас каттисисö местасиныс вöрзьöтöм уткапияннэз, эшö вынтöмöсь, и сiйöн часто шедлiсö лэчыт косаэз увтас. Отирыслiсь бырöтiс вынсö не сымда уджыс, кыдз тöлоктöм погоддяыс да жарыс. Матiсь прудыс только шочыника öвтыштлiс ыркытокнас. Ньылöмсяняс инькаэслöн паськöмныс вазис, но мужиккес, кöдна лопатитiсö косаэсö, сё эзö сетö шоччöтсö, тэрмöтiсö ытшкыны унажык, а то бригадирыс пондас видчыны, трудоденьсö оз гиж.

— И ох-ма, вот коса, — сералiс том морттэс вылын лопатитчись, пöрись ни морт, дзор тоша Викут Митрей, кöр неыджыт зудокнас размöд малыштiс косасö да сетiс нывкаыслö. — Ачыс пондас ытшкыны, только киэтö вежлав.

— Тэ жö зудсö эн и павкöт дорас, — шондi вылас сотчöм чужöма томыник Маришка сетiс косасö бöр да содтiс: — Кер морт моза, а то ме тошоктö öтiк тылöпокöн лета.

— Ылöстöм тэ калига юр, — эз лöгась, старикыс. — Не лэчыт косаыс босьтö, а том выныс. Öвтны колö, а не баитны.

— Ачыт бы мыччалiн ныж косанас уджалöмсö, — висьталiс мужикыслö ны дынö локтöм не том ни Лукерья да чапкис одзас косасö.

— Прокопейыслö колас висьтавны, — бокö видзöтiкö серöмтчис Митрейыс, — кыдз тэ мавтчан лопатитчисьыс дынö. Сiя чожа лöсьöтас, кыдз тэныт колö, и бордпавйöн пондан уджавны.

— Сюльтырт эшö, а то видзöт... вон бригадирыс локтö.

— Кадыс, значит, павжун ни локтiс.

Бригадирыс пуксис лопатитiссес дынö, и чожа öксисö сы гöгöрö быдöс ытшкисиссес. Но сiя эз шутит, не эз серав, кыдз вöвлi одзза луннэзас. Сьöлöм вылас мыйкö видзис.

— Дак мый ни сэтчин керсьö посадас? — юалiс сылiсь Митрейыс.

— Посадыс то сулалö, — дыша висьталiс бригадирыс. — Только вот отирыс чинöны. Талун асывнас Турöпов Таняыс ловсö еныслö сетöма...

— Ой, мый тэ баитан? — инькаэс сьöкыта ловзисисö.

— Кöдö кылiтö, — жагвыв горöтчис бригадирыс. — Мортсö пуктöмась ни енугöлас. Ме ачым адззылi.

— Вот и эшö öтiк морт мунiс миян коласiсь, — горöтчис Прокопикаыс да пернапасасис. — Бур морт вöлi, уджалiсь. Жаль, что одзöв кулiс. Проститчыны пыравны колас.

— Кыдз жö, конешно, пыраламö, — öтлаасисö и мöдiккез.

Быд мортыс видзчисис рытсö, и видз вывсис мунiсö öтлаын, медбы покойницаыс дынö пыравны öтлаын. Простöй да баитiсь инькасö тöдiсö пöриссес и томмес, кöдна понда Таняыс вöлi соседкаöн, уджавлiс öтлаын, кöть и пöрись ни вöлi. Сы ордö пырисö шысеттöг. Пöрисьжыккес сибöтчисö да малалiсö вывтырсö, аслыныс мыйкö шушкисö, а томмес сулалiсö бокын да видзöтiсö. Покойницаыслöн юр вевдöрас, лöсьöтöм божонкаас, сотчис масiсь. Кык пöрись инька, Таняыс увтырись, пукалiсö юр дынас. Отирыс проститчисö и мунiсö. Керкуас кольччисö только кык пöрись мортыс. Öтöрас пемдiс. Нiя öзтiсö би. Ой кежас мöдiсö сёйны, но...

Покойницаыслöн саваныс гусьöника кышнитiс да кöстасьыштiс, и лабич дорас мыччисис киыс да öшöтчис чуть ли не джоджöдззас.

— Но, молитваöн, — мыля киыс усис? — горöтчис пöрисьжыкыс, Настассяыс, да мöдiс оськöвтны кулöмыс дынö, медбы лöсьöтны. — Некöр тай эттшöмыс эз вöвлы. Мый нö тэ, Татьяна?

Покойницаыслöн ыскöвтiс чужöм вывсис чочком дöраыс, и жагöника оссисö гудыра синнэс, юрыс пöрис бок вылас, а мöд киыс шамыртiс саван дорсö да лэдзис кынöм вылас. Настассяыслöн синнэс повзьöмöн паськалiсö да сувтiсö öтiк местаас, вывтырыс быдсöн тувдiс, эз вермы и вöрзьöтчыны. Мöд инькаыс сулалiс пызан дынас да сiдзжö лоис, кыдз кынмöм, кисö видзис öм дынас вайöтöм шаньгаöн. Нiя нем эзö ылöстö, и нельки оськöвныс эз шогмы. А эта минутаö покойницаыс чеччис и пуксис лабич вылас да вöрöтыштiс коккезнас, кöднаö вöлiсö кöмöтöмöсь важ нинкöммез, и... чеччис да жагöника мунiс порог дынас, сувтчыштлiс, пернапасасис да петiс öтöрас. Кык пöрись инька вöлись дзарнитiсö öтамöдныс вылö да пондiсö юрбитны угöлас керöм ен вылö и шушкисö молитва: «Отче миян кымöрас сущöй! Да святитчö нимыт тэнат и му вылас и кымöрас. Эн пырт миянöс искушеннёö, но сайöвт миянöс лукавöйыс дынiсь, сiдз кыдз тэнат лоö царствиеыс и выныс и славаыс вексö. Аминь, аминь, аминь». Нiя эшö пернапасасисö, да Настассяыс висьталiс:

— Часöт миссямö, чышкамö чужöммезнымöс, медбы оссисö синнэзным, кыдз ловнымлöн светильниккез. Тöд Марфа, что синыт лоас сöстöм и лолыт тожö. Грехыс сы вылiсь мунас, — и нiя шупыта мунiсö миссян доз дынас да, кыдз лапаöн кань, малыштiсö синбаннысö. Но посöдзас мыйкö жолькнитiс, и кык пöрись морт дзебсисисö комас.

Покойницаыс петалiс öтöрас и пырис бöр керкуас да сувтiс джодж шöрас, норовитыштiс, видзöтiс керку пытшксö, тöдмавтöг видзöтiс инькаэс ладорö, а сэсся оськöвтiс пызан дынас, босьтiс öтiк тупöсь, бергöтлыштiс киас, но эз понды сёйны, а пуктiс бöр, сэсся кресталiс пызансö да жагöника мунiс лабич дынас, кытöн вöлiсö ольсалöмöсь подстилкаэз, пуксис сэтчö да пöрччалiс нинкöммесö и сувтöтiс басöка ордчöн. Сэсся пукалыштiс невна, пернапасасис енугöлас да жагöника нюжöтчис лабич вылас, кыскис ас вылас савансö, кыдз бытьтö шебрасис.

Керкуас сувтiс лöнь, нельки кылiс, кыдз инькаыс недыр эшö кышöтчис енугöлас, а сэсся лöньсис.

Кык пöрись морт пукалiсö комас да эзö лысьтö петны öтласа жырас. Нiя эзö вежöртö, мый лоис, мыля покойницаыс чеччис. Пыр тай перво сiдз водтöтасö, и покойникыс куйлö, кытчöдз гробас озö водтöтö. А эта чеччис и ветлöтö. Мый эта сэтшöмыс? Отирас тай эз кывсьы. Мыйкö светыс ли мый ли вежсьö? А может сiя бырсьö, и покойниккес ловзьöны? Мыля?

— Менам кизьöртiс ни кынöмöс, — гусьöн висьталiс Марфаыс. — Ог нем вежöрт. Öнi оз ни кыв вöрöтчöмыс?

— Терпит, сваття, терпит, не пыр эттшöмыс овлö. Висьтасьны пондан, дак некин оз верит. Но... Христосыс терпитiс и миянöс тшöктiс.

Кык пöрись морт синнэзнысö эзö и куньлö, а мöд ой кежас корисö эшö куимöт старушкаöс, медбы вöлi не сэтшöм гажтöм. Адззылöм чудосö эзö висьтасьö сэтчöдз, кытчöдз могиласö эзö тыртö. Басниыс пондöтчис только сэк, кöр пуксисö касьтывны.

— Вачкисьö, что сiя шогалiс — узис летаргическöй онöн, — висьталiс уна тöдiсь гöрд тоша мужик. — Сылöн эзö тöдчö не лолалöмыс, не сьöлöмыслöн уджалöмыс. Но шогыс вермис. Овлö и сiдз.

А посадас эшö дыр баитiсö эта йылiсь.

МАМ

Тэ шогмин сэк, кöр öтöрас падеритiс пурга и, бытьтö повзьöмсяняс да кöдзытсяняс, видзчисьтöг пондiн горзыны. И эта минутаö мамытлöн киэс небытика босьтiсö тэнö и жмитiсö шоныт морос бердас, сетiсö öмат тырöм нянясö, медбы нималыштiн йöвсö и лöньсин. Öнi сылöн тöждiсьöмыс быдсöн только тэ понда. Тэ он тöд, мымда ойесö оз узьлы мамыт, кöр тэ шогалан, кöр горзан, а сiя вежö вамöм трепиччетö, каттьö вились, сöстöмöн да шонытöн. Тэ понда оз жалейт медбурсö и донасö, вильсö и бытшöмсö, миссьöтö шоныт ваöн, медбы быдмин гажаöн да чожажык.

Мамыт видзöтö тэ вылö мыдзöм синнэзнас и думайтö тэнат одзланься олан йылiсь, дорйö тэнö быд неколана оськöв дынiсь, медбы эн джöмды туй вылас, ас вылат эн кор бы несчастьесö. Сылöн сьöлöмыс пыр уджалö только тэ понда, мыдзтöг ёткöтö только тэ понда, тöждö аслас пиян понда. Тэ велалан сы тöждiсьöм дынö и он думайт, мыйсянь лоöны синнэз гöгöрас чукыррес. Тэ понда казявтöг чулалöны годдэс, а мамыт сьöлöмö шогмöны тшупöттэз, джендöтöны сылiсь олансö, но тöждiсьöмыс оз чин. Тэ эшö он шедты деньгасö, а мамыт быд месяцö чинтö аслас кошелёкись да тэчö тэнат ним вылö.

Вот сiдз или примерно сiдз быдмöны челядьыс. Аркадий Капустин шогмис Лидия да Евдоким семьяын и учöтсянь эз тöд кытшöмкö нетырмöм. Учöтсянь велалiс öтiк корны мамыслiсь да айыслiсь, мый только колiс. Сэк эшö томöсь, гозъяыс керисö быдöс зонныс понда, кöть и мукöдпырся аслыныс öткажитлiсö öддьöн коланаас. Сы ним вылö нiя осьтiсö сберкассаын счёт и тэчисö жагвыв деньгасö. Аркадийыс мунiс служитны армияö, а осьтöм счётыс вылын содiс.

— Мийö тэкöт пöрисьмамö, — баитiс Евдокимыс инькаыслö, кöр нiя шоччисьлiсö рыттэзнас, — а кöр ог пондö вермыны, зонным миянлö отсалас.

— Ась ен сетас сылö здоровьесö.

Кык пöрись морт дырöн баитлiсö эта йылiсь. Нiя лыддисö ассиныс долгöн öктыны зонныслö унажык деньга, медбы сiя вермис овны не умöльжыка мöдiккезся.

— Локтас гортö и сылö лоас сьöкыт сразу пондöтны невоеннöй олансö, — баитiс айыс. — Ась виль костюм небас, пасьтасьыштас да сапоггесö вежас. Поди, гöтрасьны думайтас. А мый? Зонка сiя мыгöра, видзöтны бытшöм. Оз эд понды бобыльöн пукавны. Свадьба кежас деньгаыс ковсяс. Öнi эд миянлö нем ни оз ков. Вöлi бы только нянь кусöкыс. Кыдз-нибудь кыссямö. Öтiк зоныс, миян пиыс, и сы понда нем абу жаль.

Аркадий Капустинлöн служитан срокыс бырсис. Командирыс благодаритiс бура служитöм понда, и зонкаыс öктыштiс чемоданокö паськöмоксö да иньдöтчис кузь туйö. Сылöн вöлi öтiк тöждiсьöм — мый пондас гортас уджавны. Киэс важын ни лудiсö настоящöй дело понда. Нельки ойнас эз узьöт. А поездыс мунiс степь кузя, вагоныслöн колесоэс сяткöтiсö рельсаэс стыккез вылын, кыдз бытьтö шувлiсö: «Гор-тö, гор-тö!» Но вот и локтiс сылöн медбöрья станцияыс. Аркадийыс мöдпöв пуксис автобус вылö и гажа сьöлöмöн иньдöтчис аслас городö, кöда панталiс сiйö асывся сöстöм туманын. Сы корöм сьöртi шофёрыс сувтöтiс машинасö колана улица весьтö, и сiя чеччис. Сьöлöмыс пондiс гажöна да ёна ёткöтны. Кыдз панталасö аймамыс?

Но полiс весь: кык пöрись морт важын ни видзчисисö юрвердiсьнысö и вöлiсö öддьöн радöсь, кöр пырис гортас. Нiя пондiсö дзöрны-вöрны, ветлöтны одзö-бöрö да лöсьöтны пызан вылас сёян-юансö. Зонныс жö локтiс! Чожа эта юöрыс паськалiс и соседдэс коласын. Öксис быдса пир. Тöдсаэс вöлiсö радöсь, что Аркадийыс бöр локтiс гортö.

— Но мый, зонö, думайтан керны? — кынымкö лун бöртi юалiс айыс.

— Вот тöдсасьышта и кутчися уджавны, — видзис очакывсö Аркадийыс да серöмтчис, — тiян голя вылын ог понды öшавны.

Капустиныс ветлiс горкомö да сувтiс партияыслöн учёт вылö, а секретарьыс, баиттöн, сiйö корис уджавны инструкторöн, сэтöн жö горкомас.

— Вынтö оз туй сайкöтны, — висьталiс секретарьыс. — Колö öнi жö кутчисьны удж бердö.

— Сетö кык-куим лун эшö шоччисьыштны.

— Только куим лун, и не унажык, — согласитчис секретарьыс.

Виль уджалiсьыслö горкомыс сэк жö сетiс виль да бур квартира, а айыс радувьяс козьналiс зоныслö сберкнижкасö, кытöн вöлi öксьöма ыджыт сумма. Сiя видзис надея, что зоныс босьтас аймамсö виль квартираас, а то важ керкуыс сiсьмис, мöдö ни пöрны, тöвнас кöдзыт. Капустиныс пондiс лöсьöтны ассис олансö и гöтрасис, вайöтiс том кöзяйкаöс. Сiя небис мотоцикл, кöда вылын лоис кокнит ветлывлыны командировкаэзö. Айыс да мамыс кольччисö сiсьмöм стенаа керкуас. Обиданас кутöм айыс пондiс шогавны и чожа кулiс. Сiйö дзебтöн зоныс эз чапкы нельки воть синва, а мамсö бытьтö эз и казявлы. Кöр мамыс пондiс тэчны медбöрья причётсö, Капустиныс сьöвзис да лöга горöтчис: «Тьфу, баля рожа, пондiс куль голоссö кыскавны», тальсьыштiс кок вылiсь кок вылö да мунiс могильниксис. Дзебсиссес вежöрттöг видзöтiсö сы спина вылö да шушкисö: «А эшö горкомын уджалö. Обычайсö отирыслiсь оз тöд. Эд роднöй айсö дзебö».

Капустиныс лэбтiсис служебнöй лестница вылöт. Горкомыс сувтöтiс сiйö партгосконтроль комитетiсь председательöн. Сы син да кипод увтын лоисö не только городыс, но и быдсöн районыс. Сылö эз ни понды тырмыны мотоциклыс, и вузалiс сiйö, небис виль машина, кыдз и одзжык эта понда книжка вылiсь босьтiс кольччöм деньгасö. Мамыс кынымиськö вовлiс зоныс дынö да корис отсöт, сiдз кыдз öтiк пенсия вылас овсис сьöкыта, но Аркадийыс öткажитiс наотрез. Мамыс горзöмöн корис, но эз пет нем. И пöрись инькалö эз кольччы нем, кыдз мунны да кутчисьны уджавны техничкаöн, а зоныс эта коста гöняйтiс аслас машинаöн, бöрйис норасьöммез, кытöн отирыс юöртiсö комитетас быдкодь умöль делоэз йылiсь, кöдна керсьöны районас, чорзьöм сьöлöма веськöтлiссез йылiсь, кöдна озö отсалö отирлö.

— Кыдз тiйö локтiтö сэтшöм оланöдз, — баитiс Капустиныс комитетыслöн заседаннё вылын, — кöр отирыс адззö и норасьö? Медбы велалiтö, перво накажитамö месяцся окладöн. Мынтö асланыт карманiсь. Тiянöс сэсся немöн он велöт.

Мамыс эта кадö пондiс шогавны — коккес эзö пондö кывзыны, висьöтiс гöгöрöт, эз вермы не васö пыртны, не пессö. Сiя эз ни вермы уджавны, эшö öтпыр корис зонсö босьтны ас дынас. Но Аркадийлöн вöлi аслас планыс. Сiя корлiс дынас пöриссез понда керку-интернатiсь директорсö бытьтö бы жалобаöн бöрйисьны и медбöрын юалiс:

— Кыдз тiян свободнöй местаэзнас? Менам бы колö öтiк мортöс поздöтны тiян дынö.

— Тiян понда, Аркадий Евдокимович, кера быдöс и нельки сiдз, кыдз отирас оз овлы. А тэ норасьöмсö чапкы, кыдз бытьтö эз и вöв. Миян пöриссез сьöртi он куж керны, стрась эд привередливöйöсь. Нем озö бы керö, а норасьöны.

Кынымкö лун бöртi Капустиныс пуксьöтiс мамсö аслас машинаö и нуöтiс городöттяс, но эз вайöт гортас, орддис ассис квартирасö, кыскис мöдöрö.

— Не разь гортат нуöтан? — юалiс мамыс.

— Государствоыс лöсьöтiс тэныт горттö, — лöга висьталiс зоныс да кежöтiс интернат дынас. — Тэ коддеслöн только эстöн оланiныс, олан и тöждiсьöм он тöд.

Обидасяняс мамыслöн петiсö синваэс, но керны вöлi нем, и сiя пырис зоныс сьöрö. Директорыс услужливöя примитiс Капустинсö и корис кабинетас. Мый йылiсь нiя баитiсö, некин оз тöд, но мамсö чожа нуöтiсö кык морт понда комнатаö да висьталiсö, что сэтöн пондас овны. Мамыс казялiс, что быдöс вöлi керöма сытöг, и öнi эз кольччы нем, кыдз только овны. «Вот кыдз зонö керис мекöт, — думайтiс сiя. — Некöр тай эг видзчись эттшöмсö. Сё сы йылiсь да сы йылiсь тöждiси, а сiя и пöрись увьям медбöрья кусöксö мырддьö. Вот эд кытшöм лоис том йöзыс. Аслам гортiсь вашöтiс, йöз ки вылö сетiс. Но и ась, еныс сiйö накажитас».

А Капустиныс эта бöрсянь босьтiс мамыслiсь усадьбасö аслас ки увтö, резьöтiс важ керкусö и керис сэтчö дача.

— Кужны колö овны, — сералiс сiя соседдэс вылын. ― Важся огородечыс стрась лöсялö дача увтас. Вон кыдз зорамö быдкодь карчыс.

Интернатас эз думайт вовлыны мамсö проведайтны. Сiя ачыс лоис айöн и быдтö челядь. Только вот кытшöмöсь нiя лоасö?