Чарöтöм пу

Деревня гöгöрас важын ни эзö пондö лöсьöтны йöрресö. Нiя казявтöг важмисö, сiсьмисö да паськалiсö, но некин эз думайт керны вились, мöднёж. Пöрись инькаэс тöждiсьöмöн öктiсö песö туяна потшсö да мырсисö-кыскалiсö гортаныс, кöть невна да шонытсö сетас. Сiдз и кушамис деревняыс, кöда гöгöрöт быдмисö кöдзöм сюэз, а нiйö некин эз караулит. Но му вылас уджалiссес эзö мöдö кольччыны податöг и видзисö гортаныс мöссэз, баляэз да уна мöдiк живность. Деревняын олiссес решитiсö подасö дозирайтны очередь сьöртi. Локтiс очередьыс — и мун пастушитны шысеттöг. Тэнчит дозирайтöны, и тэныт колö дежуритны соседдэт пода дынын. Сiдз вот и мунiсö: морттэс кольлiсö уджсö колхозас и ветлiсö пастушитны ассиныс подасö.

Эта лунö погоддяыс сулалiс мича. Асывсянь небоас эз тыдав öтiк кымöрок. Гожся тöлокыс только чуть вöрöтыштлiс пуэзлiсь зелёнöй листоккесö. Андрей Лысов эз бы мöд мунны кöджжезас, кытöн видзлiсö подасö, но иньыс висьталiс:

— Ме инö ветла, а тэ гортын кер быдöс уджсö. Медбы гöгöр сöстöм вöлi.

— Мый тэкöт вермасьны? — думайтыштiс да шыасис Андрейыс, кöда керлiс кöть кытшöм удж, но эз любит гортас бергöтлыны бекöрпаньсö да джоджсö чышкыны. — Коли сiдз, дак ветла, но мöдпырись мунан ачыт, а то нимтасö мöс дзизöн.

Инькаыс öктыштiс павжунок, и мужикыс мунiс. Напарникнас сылö локтiс Клавдия, кöда эшö томнас вöлi тöдса, но одзжык петiс мöдiк сайö и вайис ни кага. Андрейыс гажöна панталiс кöркöся подружкасö да радöна висьталiс:

— Тэкöт оз ло гажтöмыс, и луныс казявтöг чулалас. Важын ни эг адззыв, а тэ бытшöмсялöмыт, сё кыдз нывкаöн олан. Мужикнас овны и еныс шуöма тэныт. Тыдалö, пользаö мунö. И вывтырыт лöсялыштöм, и чужöмбаныт гöгрöсмöм, вирыт орсö, кыдз öзйö.

— Эн модь, кöдö оз ков, — шыасис Клавдияыс да макнитiс кинас.

— Мый, не сiдз ли мый ли? — лöгасьыштöмöн баитiс Андрейыс да невна думайтыштöм бöрын содтiс: — томнат эд кöсыник вöлiн, а öнi лöсялыштöмыт. Некытчö сiйö он вошты.

— Видзöт жö, мöссэс рознитчöны, — медбы вежны баснисö, висьталiс Клавдияыс да мöдiс мунны, но Андрейыс одзалiс котöртны и панöвтiс торйöтчöм подасö. И мöссэс жагöника мунiсö тöдса туй вылöт, кадiсь кадö йирыштлiсö боксиныс турунсö, кöда вöлi сока, небыт да и тшöк. Ой бöрас муыс чушыктiс сöстöма, ыркыта.

— Кыдз праздник кежö видзыс мöдöтчöма, — моросас тыр русö кыскöмöн горöтчис Андрейыс да нёджжöвтiс ас гöгöрсö. — Одзжык эг казявлы эттшöмсö, сё удж йылiсь думайтi.

— Мыйсянь талун вильмоза баитан?

— Да уна тöдвылам усис, — стадо бöрас видзöттöн негорöна висьталiс Андрейыс да синлыс увтсяняс видзöтыштiс Клавдияыс вылö. Эта кадö сылö вöлi охота жмитыштны инькасö ас бердас да окавны пöттöдз, медбы вöрзьöтны сылiсь быд сöнсö, öзтыны вирсö и вадзöтны одзза любитöмсö, но сiя только макнитiс кинас да жалейтöмöн висьталiс:

— Не сiдз керимö, кыдз колiс. Думайттöг петiс, и асьным эгö казялö. Тэ эд пасмасö дзугин.

— Вот и кöджас ни локтiмö, — ылöтiс баснисö Клавдияыс.

Кöджас пырны муыс вöлi кыкдас саженься не паськытжык, сэтöн юыс кежис бокö и кытшöвтiс неыджыт видзсö да бöр локтiс сiя жö местö, но эз вермы öтлаасьны и гагöн мунiс увланьö. Медбöрья годдэзас этчö быдмис бадь, ловпу да пипу, кöднаись керсис стена, да мешайтiс подаыслö локны берег дорас. А мöссэс, паськыт синнэс, кыдз локтiсö кöджас, сэк жö паськöтчисö сэтчин и риззисö-ветлöтiсö да пондылiсö пырны быд угöлокас.

— Вот эстöн, — висьталiс Андрейыс лапыт кöз дынö локтiкас, кöда быдмис перешеек шöрас, — пондамö дозирайтны. Эстi тöлокыс ветлö и вуджöрыс лоас, видзöтны абу паськыт.

Шондiыс лэбтiсис сё вылöжык. Мыччисисö и лöдззез, кöдна спокойсö эзö сетö мöссэслö, вöтлiсö нiйö местаись местаö, зубыта курччалiсö. Нерадсялöм подаыс рознитчис, ветлöтiс öтмöдöрö, мöдiс бы пышшыны эта налькись, но Андрейыс панлавлiс бöр.

— Шудтöм гырккезкöт не удж, не шоччисьöм, — висьталiс сiя Клавдияыслö, кöр локтiс кöз увтас. — Только сёй бы да сёй, дак не жö, аслыныс спокойсö оз сетö, гöняйтöны, кыдз пороззэз.

— Вот чулалас луншöрыс, и нiя водасö, — шынньöвтыштiс Клавдияыс да нетшкöвтiс бокас быдмöм цветок. — Асьтö эн мучит, а то рытöдззас нырыт нюжалас сапог ныррет дынöдз.

Эстöн эд не йöр керны, кытöн майöгсö мöртан и сыбöрын куритан, колö срок тöдны.

— Эстöн и куритны некöр, — шыасис Андрейыс сигарета пачкасö кыскикö.

Сiя босьтiс сигаретасö, нöитыштiс чуннез коласас да öзтiс спичасö и пондiс куритны. Сы öм дынсянь лэбтiсис лöз тшынок, кöда кайис лыссэз коласöт. Недыр думайтыштöм бöрын висьталiс:

— Сiдз петö, что эстöн не бригадаас уджавны.

— А ме мый нö тэныт баита, — шынньöвтыштiс Клавдияыс да видзöтiс одззася модзыс вылö. — Подаыс эд аслат и дозирайт сiйö, кыдз ассит, а колхозас быдöс öтласа.

— Колхозас кöть и мöсыс кулас, дак кытчöкö гижасö, и виноватöйсö он адззы, кыдз ваö вöяс. И бырö колхознöй доброыс. А миян кодьыслö колö овны и одзлань думайтны.

Луншöр бöрас, кыдз и висьталiс Клавдияыс, мöссэс водiсö шоччисьны. Öтöрас вöлi жар. Андрейыс да Клавдияыс пукалiсö кöзыс вуджöрын, кытöн кылiс ыркыток. Казявтöг кофтасис кизьыс пöрччасьöм, и инькаыс эз кыв сiйö, а Андрейыс мöртöтчис сы морос вылö да видзöтiс сотчытöм и чочком няняэсö.

— Мый тэ синнэтö мöртiн, — казялiс инькаыс да макнитiс кинас, — кыдз гут маторö лякасин. Мужик и эм мужик. Инькаытлöн озö тырмö, дак йöзыслiсь дзарьян. — Клавдияыс кизялiс кофтасö да кöритöмöн видзöтыштiс мужикыс вылö.

— Няняэт лоöмась кыдз булкаоккез.

— Дак ме жö нимöтчи, — дивуйтчöмöн шыасис Клавдияыс. — Тэ тай нем он вежöрт. Вот абыз кытшöм. Нимасьны, поди, охота?

— Лэдзан дак мыля бы не сiдз, — горöтчис Андрейыс да сибöтчис инькаыс дынö. — Ме эд тожö учöт челядь кодь.

— Мый тэ, мый тэ, Öндреюшко, думайтан? — перыта баитiс Клавдияыс киэсö одзас нюжöтöмöн. — Эн жö мывкыдсит петав.

— Чöв! Ме понда тэ сё эшö нывка.

— Мыйлö тэ грехас пыран? Инькаыт мый висьталас?

— Эн касьтыв, кöдiйö оз ков. Мийö эстöн только кыкöн.

— Ой, лэдз жö кöть киэзöс. Зубыт эд.

— Терпит, не челядь эд, — гусьöн висьталiс Андрейыс.

— Мöссэс эд пышшасö...

— Ась кöть чёртыс дынö мунöны.

А эта кадö вöр сайсяняс мыччисис сьöд кымöр да пондiс вевттьыны небосö, кысянь и локтiс тöлок да вöрзьöтiс листтэсö, качыкнитiс кöз лыссэсö. Первосянь кытöнкö ылын кылiс гымалан гор, кöда сибалiс сё матöжык и матöжык. Андрейыс да Клавдияыс пукалiсö лöньсьыштöмöсь да мыдзöмöсь. Инькаыс кутiс чышьян дорсö да чышкис Андрейыслiсь ньылöмсялöм кымöссö, а сэсся ассис гöрдöтöм рожасö.

— Ме тай некöр эг думайт эттшöмсö, — гусьöна шыасис сiя. — Но ась, еныс, поди, проститас.

Но сэтчö небоас югйöвтiс чардби, кöда сöтiс кöз йылас и шулялiс пусö, летöвтiс пукалiссесö öтамöдныс дынiсь да шупкис бокö.

А кымöрыс лöга гымалiс да мунiс одзлань. И лоис руас сöстöм да лöнь. Кык мортыс эзö ни вöрöтчö. Подаыс гортаныс локтiс пастуххезтöг. Отирыс казялiсö этö и мунiсö кошшыны. Адззисö. Дивуйтчöмöн видзöтiсö шулялöм пусö. И решитiсö, что пастуххес шедiсö чарöтны.